ಗೊಂಯ್ ದಮಣ್ ಆನಿ ದೀವ್ ಚ್ಯಾ ರಾಜ್ಕಾರಣಾನ್ ಶಶಿಕಲಾ ಪರ್ವ್ ದೂಸ್ರ್ಯಾ ಫಾವ್ಟ್ ಸುರು ಜಾಲ್ಲೆಂ. ಅನುಶಾಸನ್ ಪರ್ವಾನ್ ಕಾಂಯ್ ಮ್ಹಯ್ನ್ಯಾ ಆದಿಂ ನಿಮ್ಣೆ ಶ್ವಾಸ್ ಮೆಜಿಲ್ಲೆ.

"ಆತಾಂ ಪೊತ್ತೆಂ ಬಾಯ್ಲಾಂ ರಾಜ್ ಮುರೆ ಭೊಟಾ?" ಜುಜೆನ್ ಹಾತಾಂತಲೊ ಪೆಪರ್ ಸಕಯ್ಲ್ ದವ್ರತ್ ಘರ್ಚ್ಯಾ ವಟೆನ್ ವಚ್ಪಿ ಬಾಳ್ ಭಟಾಕ್ ಮ್ಹಳೆಂ. ಜುಜೆಕ್ ಪಳೊವ್ನ್ ಬಾಳ್ ಭಟಾಚ್ಯಾ ಪೊಟಾಂತ್ ಕುಳ್ಳ್ ಜಾಲೆಂ. ನಾಕಾ ತೊ ವಿಶಯ್ ಕಾಡ್ಲೊ ಜಾಲ್ಯಾರ್ ಹಾಣೆ.

"ಮ್ಹಣ್ಜೆ ಆತಾಂ ಪರ್ತೂಯ್ ತೀಚ್ ಮುಖ್ಯಮಂತ್ರಿ?" ಬಾಳ್ ಭಟಾನ್ ಅಜಾಪ್ ಅಶೆಂ ದಾಖೊವ್ನ್ ಸಹ್ಜತಾಯೆನ್ ಅಸೊ ಪ್ರಸ್ನ್ ಕೆಲೊ.

ಜುಜೆನ್ ಜಾಪ್ ದಿಲಿ ನಾ. ತೊ ಸವ್ಳ್ಯಾ ಬಾಳ್ ಭಟಾವಾಂಗಡಾ ದೊನ್ ಹಾತ್ ಪಯ್ಸ್ ರಾವ್ನ್ ಚಲ್ಪಾಕ್ ಲಾಗ್ಲೊ.

"ಫ್ರಾಂಸಿಕಾಂನ್ ಪತ್ರ್ ಬಿ ಧಾಡ್ಲಾಂ?" ಬಾಳ್ ಭಟಾನ್ ಚವ್ಕಶಿ ಕರ್ಪಾಚ್ಯಾ ಸುರಾನ್ ವಿಚಾರಲೆಂ. ಪೂಣ್ ಕಾಳ್ಜಾಂತ್ ಭಿರಾಂತ್ ಆಶಿಲ್ಲೀಚ್!

"ವೊಯ್ ನಾತ್ಲಾಂಕ್ ಯೆತ್ ಹುಂಯ್!"

"ಹೆಂ ಮಾತ್ರ್ ಬರೆಂ ಜಾಲೆಂ ಆಂ... ಕಟ್ಕಟೀಚ್ಯಾ ಕಾಳಾಂತ್, ಕಟ್ಕಟೀಂಕಡ್ಲ್ಯಾಂನ್ ಪಯ್ಸ್ ಉರ್ಲೊ ಫ್ರಾಂಶಿಕ್"

ಜುಜೆ, ಫ್ರಾಂಸಿಸ್ ಆನಿ ಬಾಳ್ ಭಟ್ ತಶೆ ಎಕಾಚ್ ಪಿರಾಯೆಚೆ. ವಾಂಗ್ಡಾ ನಾಚ್ಪಿ ಖೆಳ್ಪಿ. ವಾಂಗ್ಡಾ ಮರಾಠಿ ಶಾಳೆಂನ್ ವಚ್ಪಿ. ತಶೆಂ ಕೊಣಾಚೆಚ್ ಶಿಕಪ್ ಜಾವ್ಪಾಕ್ ಜಾಯ್ ತಶೆಂ ಜಾಲೆಂ ನಾ. ಬಾಳ್ ಭಟ್ ಆನಿ ಜುಜೆಚ್ಯಾ ತುಳೆನ್ ಫ್ರಾಂಸಿಸ್ ಅಭ್ಯಾಸಾಂತ್ ಹುಶಾರ್ ಆಶಿಲ್ಲೊ. ತೊ ಹೆಂಚೆಪರಸ್ ದೊನ್ ತೀನ್ ವರ್ಸಾಂ ಅದೀಕ್ ಶಾಳೆಂನ್ ತಿಗ್ಲೊ ಇತ್ಲೊಚ್ ಕಿತೆಂ ತೊ ಫರಕ್. ಕಸೊ ತರಿ ಕುಯ್ಟಾಕ್ ಕಾಯ್ ಖಂಯ್ ತರಿ ಪಾವ್ಲೊ. ಹರ್ಶೀಂಯ್ ಬಿ ಗೊಂಯ್ಕಾರಾಚ್ಯಾ ನದ್ರೆಂನ್ ಭಾರ್ತಾ ಭಾಯ್ಲೆ ಜಗ್ ಮ್ಹಳ್ಯಾರ್ ಕುಯ್ಟೂಚ್! ಗಜಾಲಿ ಕರತ್ ದೊಗಾಂಯ್ ಸಾಕ್ವಾರ್ ಪಾವ್ಲೆ. ಜುಜೆ ಸಾಕ್ವಾವೆಲ್ಯಾನ್ ಪಲ್ತಡೀಂನ್ ಗೆಲೊ. ಆನಿ ಸಾಕ್ವಾಚ್ಯಾ ವಯ್ಲ್ಯಾವಟೆಚ್ಯಾ ಭಟ್ವಾಡ್ಯಾಂತ್ಲ್ಯಾ ಕುಳಾಗರಾಂತ್ಲ್ಯಾಂನ್ ಬಾಳ್ ಭಟ್ ಘರಾ ಸಕಯ್ಲಿ ಸೊಪ್ಣಾ ಚಡ್ಪಾಕ್ ಲಾಗ್ಲೊ. ದೊನ್ ಸೊಪ್ಣಾ ಚಡೂನ್ ಜಾಲ್ಲಿಂ ಇತ್ಲ್ಯಾಂನ್ ತಾಕಾ ಫಾಟ್ಲ್ಯಾ ವಟೆಂತ್ಲ್ಯಾಂನ್ ಸಾದ್ ಘಾಲ್ಪಿ ಜುಜೂಚೊ ಆವಾಜ್ ಆಯ್ಕಲೊ. ಆತಾಂ ಮಾತ್ ಬಾಳ್ ಭಟಾಲ್ಯಾ ಪೊಟಾಂತ್ ಗುಳೊಚ್ ಆಯ್ಲೊ. ಆತಾಂ ವಿಚಾರತಾಚ್ ದಿಸ್ತಾ ಹೊ.

"ಭೊಟಾ! ಚಲೊ ಇಶ್ಕೊಲಾ ವೊಯ್ತ್ ಮೊರೆ... ಕಾಯ್ ಘೊರ್ ಬೊಸೊನ್ ಮೊಂತ್ರ್ ಧೊಲ್ತಾ?" ಜುಜೆಚೊ ಹೊ ಪ್ರಸ್ನ್ ಬಾಳ್ ಭಟಾಕ್ ಅನ್ಪೆಕ್ಷಿತ್ ಆಶಿಲ್ಲೊ. ಪೂಣ್ ಹೊ ಪ್ರಸ್ನ್ ಜುಜೆ ಕಿತ್ಯಾಕ್ ವಿಚಾರತಾ ಹೆಂ ನ ಕಳ್ಪಾ ಇತ್ಲೊ ತೊ ಪಿಸೊಯ್ ನಾಶಿಲ್ಲೊ. "ಹಯ್" ಬಾಳ್ ಭಟಾಂನ್ ಎಕಾ ಉತ್ರಾಂನ್ ಜಾಪ್ ದಿಲಿ. ಆನಿ ತೊ ಸೊಪ್ಣಾ ಚಡ್ಪಾಕ್ ಲಾಗ್ಲೊ.

ನಿಮ್ಣೆ ಸೊಪಣ್ ಚಡೂಂನ್ ಆಂಗ್ಣಾತ್ ಪಾವ್ತಾ ಇತ್ಲ್ಯಾಂನ್ ಸೊಮ್ನಾಥಾಲೊ ಆವ್ರ್ತನಾತ್ಲ್ಯಾ ಅಥ್ರ್ವಶೀರ್ಷಾಚೊ ಮಂತ್ರಪಾಠ್ ತಾಚೆ ಕಾನಾರ್ ಪಡ್ಲೊ.

’ಓಂ ನಮ್ಸ್ತೆ ಗಣ್ಪತಯೆ। ತ್ವಮೆವ್ ಪ್ರತ್ಯಕ್ಷಮ್ ತತ್ವಮಸಿ। ತ್ವಮೆವ್ ಕೆವ್ಲಮ್ ಕರ್ತಾಸಿ । ತ್ವಮೆವ್ ಧರ್ತಾಸಿ । ತ್ವಮೆವ್ ಕೆವ್ಲಮ್ ಖಲ್ವಿದಮ್ .....’ ಧಾ ವರ್ಸಾಂಚ್ಯಾ ಪಿರಾಯೆಚ್ಯಾ ಸೊಮ್ನಾಥಾಲೆ ಉಚ್ಚಾರ್ ಸ್ಪಷ್ಟ್ ಆಶಿಲ್ಲೆ. ಮಂತ್ರಪಾಠಾತಲೆ ಸ್ವರ್ ಸಂಥಾ ದಿವ್ಪಿ ಬಾಳ್ ಭಟಾಚ್ಯಾಕೂಯ್ ಪಕ್ಕೆ ಆಶಿಲ್ಲೆ. ಪೂಣ್ ಹ್ಯಾ ವೆಳಾರ್ ಸೊಮ್ನಾಥಾಲ್ಯಾ ತ್ಯಾ ಮಂತ್ರಪಠಣಾಚೊ ಬಾಳ್ಭಟಾಕ್ ತ್ರಾಸೂಚ್ ಚಡ್ ದಿಸ್ಲೊ. ಆನಿ ಜುಜೆನ್ ಉಲೊ ದಿವ್ನ್ ವಿಚಾರಿಲ್ಲೊ ನಿಮ್ಣೊ ಪ್ರಸ್ನೂಯ್ ಚಿಮ್ಟೊ ಕಾಡ್ಲ್ಯಾ ಬಗರ್ ಗೆಲೊ ನಾ. ತಾಣೆ ಆಂಗ್ಣಾತ್ಲ್ಯಾನೂಚ್ ಬಾಯ್ಲೆಕ್ ಪ್ರಸ್ನ್ ಕೆಲೊ;

"ಅಗೊ ಪಾಣಿ ತಾಪ್ಲೆಹೆಂ?" ಬಾಳ್ ಭಟಾಲೊ ಸಾದ್ ಆಯ್ಕೂನ್ ತಾಚಿ ಬಾಯ್ಲ್ ಖೊಕತ್ ಭಾಯ್ರ್ ಆಯ್ಲಿ.

"ತಾಪ್ಲೆಹೆಂ! ಇತ್ಕಾ ವೆಳ್ ಕಶಾ ಝಾಲಾ." ಬಾಯ್ಲೆಂನ್ ಪಯ್ಲ್ಯಾ ಪ್ರಸ್ನಾಚಿ ಜಾಪ್ ದಿವ್ನ್ ದುಸ್ರೊ ಪ್ರಸ್ನ್ ವಿಚಾರಲೊ.

"ಜುಜೆ ಮಿಳ್ಳಾ ವಾಟೆರ್! ಪರತ್ ಶಶಿಕಲಾಚ್ ಝಾಲಿ ಮ್ಹಣೆ! ಬಾಯ್ಲಾಂಚೆ ಅಣಿ ಭಾಯ್ಲ್ಯಾಂಚೆ ದಿವ್ಸ್ ಮ್ಹಣ್ಟಾ ತೆಂ ಫಟ್ ನವ್ಹೆಂ!" ಬಾಯ್ಲೆಂನ್ ತಾಚೆ ಮ್ಹಣ್ಣೆ ಆಯ್ಕೊವಪಾಕ್ ಜಾಯ್ ತಿತ್ಲೆಂಚ್ ಆಯ್ಕಲೆಂ ಆನಿ ತಿ ಪರತ್ ಖೊಕತ್, ಖೊಕತ್ ಘರಾಂತ್ ಗೆಲಿ. ಬಾಳ್ ಭಟ್ ಘರಾತ್ಲ್ಯಾ ಫಾಟ್ಲ್ಯಾ ವಟೆಚ್ಯಾ ಮಾನ್ನ್ಯಾಂನ್ ಆಯ್ಲೊ ಆಣಿ ದೊನ್ ಗರಮ್ ಉದ್ಕಾಚೆ ಚಂಬು ಬೊಡಾರ್ ರಕೊವ್ನ್ ತಾಣೆ ಗಣ್ಪತಿ ಸ್ತೊತ್ರಾಕ್ ಸುರ್ವಾತ್ ಕೆಲಿ ’ಪ್ರಣ್ಮ್ಯ್ ಶಿರ್ಸಾದೆವಮ್ ಗೌರಿ ಪುತ್ರಮ್ ವಿನಾಯ್ಕಮ್....’
ಸೊಮ್ನಾಥಾಚಿ ಶಾಳಾ ಬರಿ ಚಲ್ತಾಲಿ. ಮೆ ಮ್ಹಯ್ನ್ಯಾಚಿ ಸುಟಿ ಕಾಬಾರ್ ಜಾಲ್ಲಿ. ಸೊಮ್ನಾಥ್ 8ಸ್ತ್ರ್ ಟಕ್ಕೆ ಮಾರ್ಕ್ ಘೆವ್ನ್ ಪಾಂಚ್ವೆಕ್ ಪಾವಿಲ್ಲೊ. ಪೂಣ್ ಮ್ಹಯ್ನ್ಯಾಕ್ 60 ರುಪ್ಯಾ ಫಿ ಫಾರೀಕ್ ಕರ್ಚಿ ಪಡ್ಟಾಲಿ. ಮೀರ್ಗ್ ಮುಕಾರ್ ಪಾವಿಲ್ಲೆಂ. ಆಂಗಣ್ ತಾಪ್ತಾಲೆಂ. ಘರ್ ತಾಪ್ತಾಲೆಂ. ಆನಿ ಕಿರವ್ಟೀಕ್ ಗರ್ಜೆಕ್ ಲಾಗ್ಪಿ ಪಯ್ಶೆ ನಾಶಿಲ್ಲ್ಯಾಂನ್ ಬಾಳ್ ಭಟಾಲೆಂ ಮಾಥೆಂಯ್ ತಾಪ್ತಾಲೆಂ. ಗಾಂವ್ಚಿಂ ಸಗ್ಲಿಂ ವ್ಹಡ್ ಭಟ್ಪಣಾ ಪುರೊಹಿತಾಕ್ ಮೆಳ್ಟಾಲಿಂ. ಎಖಾದ್ಯಾ ದಿಸಾಕ್ ತಾಕಾ ಫಾವ್ನಾ ಜಾಲ್ಯಾರ್ ಪುರ್ಶಾ ಕಡ್ಲ್ಯಾಂನ್ ಪುರಯ್ತ್ ರಕಾದ್ ಪಾವ್ಯ್ತಾಲೊ. ಆನಿ ತೆಂ ಪುರಯ್ತಾಕ್ ಚಡ್ ಜಾಲ್ಲೆಂ ಭಟ್ಪಣ್ ಬಾಳ್ ಭಟಾಚ್ಯಾ ವಾಟ್ಯಾಕ್ ಯೆತಾಲೆಂ. ಪೂಣ್ ಜೆಷ್ಟ್ - ಆಶಾಡ್ ಸುಕೆಚ್. ಸಗ್ಲ್ಯಾವಟೆನ್. ಕಿರವ್ಟಿ ಮಾತ್ಶಿ ತಾಯ್ಟ್ ಜಾತಾಲಿ ತಿ ಶ್ರಾವ್ಣಾನ್ ಆನಿ ಸಾಠವ್ಣೀಕ್ ದವ್ರಪಾಚೆಂ ಭಾದ್ರಪದಾಂನ್. ಮದ್ಲ್ಯಾ ಕಾಳಾಂತ್ ಕೊಣಾಲೆಯ್ ಎಕ್ ದೊನ್ ಪುರಯ್ತಾನ್ ಸಾಂಗೂನ್ ವಾಟ್ಯಾಕ್ ಪಡಿಲ್ಲೆ ಮ್ಹಾಳ್...! ಮಾಗೀರ್ ಲಕ್ಷ್ಮಿ ಪುಜನ್ ಆನಿ ತುಳ್ಶೀಚೆಂ ಲಗ್ನ್. ಜಾಲೆಂ ವರ್ಸಭರಾಚೆಂ ಹೆಂಚ್ ಕಿತೆಂ ತೆಂ ಅಥಂಕರಣ್.

"ಆಬಾ! ಫಿ ಭರಾವಿ ಉದ್ಯಾಂ ತರಿ... ಅಣಿ ಸತ್ರೀಯ್ ಹವಿ ಶಾಳೆತ್ ಜಾಯಾ, ಪಾವ್ಸ್ ಜವ್ಳ್ ಆಲಾಹೆ" ಸೊಮ್ನಾಥಾನ್ ಕಾತ್ನ್ಯಾರ್ ಬಸೂನ್ ಬೆಡೆ ಸೊಲ್ಪಿ ಬಾಪಾಯ್ಕ್ ಮ್ಹಳೆಂ. ಬಾಳ್ ಭಟಾಚ್ಯಾ ಕಪ್ಲಾರ್ ಮಿರ್ಯೊ ಪಡ್ಲ್ಯೊ. ಪೂತಾಚೆಂ ಉಲೊವ್ಪ್ ಆಯ್ಕೊವನ್ ಆವ್ಯ್ ಭಾಯ್ರ್ ಖೊಕತ್ ಖೊಕತ್ ಭಾಯ್ರ್ ಆಯ್ಲಿ. ತಿಣೆ ಎಕೆ ಫಾವ್ಟ್ ಚಲ್ಯಾಚ್ಯಾ ಪ್ರಸ್ನಾಕ್ ಜಾಪ್ ನ ದಿವ್ಪಿ ಘೊವಾಕ್ ಪಳಯ್ಲೊ ಆನಿ ದುಸ್ರೆ ಫಾವ್ಟ್ ಗರ್ಜೆಕ್ ಆಯ್ಲ್ಲ್ಯಾ ಚಲ್ಯಾಕ್.

"ಆಯ್ಕಿಲೆಂ ರೆ ಆಬಾ! ಫಿ ಭರಾವಿ ಉದ್ಯಾಂ ತರಿ" ಸೊಮ್ನಾಥಾನ್ ಹೆ ಫಾವ್ಟ್ ಚಡೂಚ್ ರಡ್ಕುಂಡೆಕ್ ಯೆವ್ನ್ ಸಾಂಗ್ಲೆ.

"ಹಂ" ಬಾಳ್ ಭಟಾನ್ ಇತ್ಲೀಚ್ ಜಾಪ್ ದಿಲಿ. ಆತಾಂ ಆವ್ಯ್ಕ್ ಮದಿಂ ತೊಂಡ್ ಘಾಲ್ಚೆಂಚ್ ಪಡ್ಲೆಂ.

"ದೆವ್ಯಾಂ ರೆ ದೆವ್ಯಾಂ; ಉಗೀಚ್ ಕುರ್ಕುರುಂ ನಕೊ... ಚಲ್ ಖೆಳಾಸ್ ಚಲ್" ಇತ್ಲೆಂ ಮ್ಹಣ್ ತಿ ಪರ್ತಿ ಖೊಕ್ಪಾಕ್ ಲಾಗ್ಲಿ. ಆವ್ಯ್ನ್ ದಿಲ್ಲ್ಯಾ ಜಾಪೆನ್ ಧಾದೊಶಿ ಜಾವ್ನ್ ಸೊಮ್ನಾಥ್ ಭಾಯ್ರ್ ಗೆಲೊ. ಸೊಮ್ನಾಥ್ ಭಾಯ್ರ್ ಗೆಲ್ಲ್ಯಾಚಿ ಖಾತ್ರಿ ಜಾಲೆ ಉಪ್ರಾಂತ್ ತಿ ಯೆವ್ನ್ ಬಾಳ್ಭಟಾಚ್ಯಾ ಕುಶೀಕ್ ಬಸ್ಲಿ.

"ಕಾಇ ಹೊಣಾ ಹೊ?" ತಿಣೆ ಭೀತ್ ಭೀತ್ ಪ್ರಸ್ನ್ ಕೆಲೊ.

"ಹೊಣಾ ಅಣಿ ಕಾಯ್! ಕರ್ಮ್ ಮ್ಹಾಜೆಂ? ಕೊಠ್ಠೂನ್ ಆಣು ಮಿ ಸಾಠ್ ರುಪ್ಯೆ? ಇಥೆಂ ಕಿರವ್ಟೆಸ್ 10 ರುಪ್ಯೆ ನಾಹೀತ್. ಗಾಠೀಸ್ ಎಕ್ ಭಟ್ಪಣ್ ನಾಹಿ, ಕಾಯ್ ಕರುಂ ಜೀವ್ ದೆಂವ್?" ಬಾಳ್ ಭಟ್ ಸಂತಾಪಾನ್ ಉಲೊವ್ನ್ ಬಾಯ್ಲ್ ಫುಡೆಂ ಕಿತೆಂ ಮ್ಹಣ್ಟಾ ಕಾಯ್ ಹಾಚಿ ವಾಟ್ ಪಳೊವ್ಪಾಕ್ ಲಾಗ್ಲೊ. ತಿಣೆ ಮುಖಾರ್ ಉಲೊವ್ಪಾಚಿ ತಯಾರಿ ಕೆಲಿ ಇತ್ಲ್ಯಾಂನ್ ತಿಕಾ ಪರತ್ ಸಾಮ್ಕಿ ಜೀವ್ಘೆಣಿ ಖೊಕ್ಲಿ ಆಯ್ಲಿ. ಮಾಗೀರ್ ಫುಡ್ಲಿಂ ದೊನ್ - ತೀನ್ ಮಿಣ್ಟಾಂ ತಿ ಖೊಕೀತ್ ರಾವ್ಲಿ ಆನಿ ಬಾಳ್ ಭಟ್ ತಿಕಾ ಪಳಯ್ತ್ ರಾವ್ಲೊ. ತಿ ಖೊಕ್ತಾಲಿ ಇತ್ಲ್ಯಾತೂಂಚ್ ಬಾಳ್ ಭಟಾಚ್ಯಾ ಕಾನಾರ್ ವಳ್ಖೀಚೊ ಆವಾಜ್ ಪಡ್ಲೊ.

"ಭಟ್ಮಾಮ್ ಒ ಭಟ್ಮಾಮ್!" ಹಯ್ ವಳ್ಖಿಚೊಚ್ ಸಾದ್. ದಾರಾಂತ್ ಪುರ್ಸೊ ಆಯ್ಲ್ಲೊ! ಬಾಳ್ ಭಟ್ ಉಮೆದೀನ್ ಉಠ್ಲೊ. ಖೊಕ್ಲ್ಯೆನೂಚ್ ಮಾತ್ಸೊ ವಿಸವ್ ಘೆತ್ಲೊ. ಬಾಳ್ ಭಟ್ ಭಾಯ್ರ್ ಆಯ್ಲೊ.

"ಕಿತೆಂ ರೆ ಪುರ್ಶಾ ಆಯ್ಜ್ ಸಾಂಜೆರ್ ಸೊ?"

"ಕಾಲ್ ರಕಾದ್ ಪಾವೊವ್ಪಾಕ್ ಸಾಂಗಿಲ್ಲೊ ಪುರೊಯ್ತಾನ್ ವೆಳ್ ಮೆಳ್ಳೊ ನಾ ಮ್ಹಣ್ ಆಯ್ಲೊ ಆಯ್ಜ್" ಪುರ್ಶಾನ್ ಜಾಪ್ ದಿಲಿ.

"ಬರೆಂ ಕಿತೆಂ ಜಾಲೆಂ? ಕಸ್ಲೆಂ ಕಾರಣ್ ಆಸಾ?" ಬಾಳ್ ಭಟಾನ್ ಮ್ಹಾಯ್ತೀತಲೊ ಪ್ರಸ್ನ್ ವಿಚಾರಲೊ.

"ದೆಸಾಯಾಗೆರ್ ಸತ್ಯನಾರಾಯಣಾಚೆಂ ವಿರ್ತ್ ಆಸಾ ಧಾ ತಾರ್ಕೆಕ್. ಸಾಹಿತ್ಯ್ ಸಗ್ಲೆಂ ಹಾಡ್ಟ್ಲೊ ತೊ. ದೊನ್ ಕಿಲಾಚೊ ಸಪಾದ್. ಕರ್ಪಾಚೊ!" ಪುರ್ಸೊ ಫಟಾಫಟ್ ಉಲೊವ್ನ್ ಗೆಲೊ.

"ದೆಸಾಯಾಗೆರ್ ಮ್ಹಾಕಾ ಸೊ ಧಾಡ್ಲೊ ತರ್ ಪುರೊಯ್ತಾನ್?"

"ನಾ ಭಟ್ಮಾಮ್; ಪುರೊಯ್ತ್ ಮಡ್ಗಾವಾಂ ವಚ್ಪಾಚೊ ಖಂಯ್ ಧುವೆಗೆರ್. ಕಿತೆಂ ತರಿ ಕಾರಣ್ ಘೆತ್ಲಾ ಖಂಯ್ ಜಾವ್ಯಾಂನ್"

"ಅಶೆಂऽऽऽ ಆಂ!"

"ಬರೆಂ ಆತಾಂ ಯೆಂಉ ಭಟ್ಮಾಮ್?" ಅಶೆಂ ಮ್ಹಣೂನ್ ಪುರ್ಸೊ ಸೊಪ್ಣಾ ದೆಂವ್ಪಾಕ್ ಲಾಗ್ಲೊ. "ಆಜ್ ಚಲೊ ಖಂಯ್ ತರ್?" ಅಸೊ ವತಾ ವತಾಂ ತಾಣೆ ಪ್ರಸ್ನ್ ಕೆಲೊ. "ಆಶಿಲ್ಲೊ ಆತ್ತಾಂ!" ಅಶಿ ಬಾಳ್ ಭಟಾನೂಯ್ ಧಾಂವ್ತಿ ಜಾಪ್ ದಿಲಿ.

ಪುರ್ಸೊ ಸೊಂಪ್ಣಾ ದೆವ್ನ್ ಪಯ್ಸ್ ಪಾವ್ತಾ ಮೆರೆಂನ್ ಬಾಳ್ಭಟ್ ತಾಕಾ ಪಳಯ್ತ್ ರಾವ್ಲೊ. ದೆವ್ ಪಾವ್ಪ್! ಮ್ಹಳ್ಯಾರ್ ಕಿತೆಂ ಹಾಚೊ ಅಣ್ಭವ್ ಕಾಂಯ್ ಖಿಣಾಂಆದಿಂ ಬಾಳ್ಭಟಾನ್ ಘೆತಿಲ್ಲೊ. ಸೊಮ್ನಾಥಾಲಿ ಫಿ, ಸತ್ರಿ ಜಾವ್ನ್ ಸುದ್ಧಾ ತೀಸ್ - ಚಾಳೀಸ್ ರುಪ್ಯಾ ಹಾತಾಂತ್ ಉರ್ಪಾಚಿ ವೆವ್ಸ್ತಾ ಜಾಲ್ಲಿ. ದರ್ಯಾವಟೆಚ್ಯಾಂನ್ ಮೊಡಾಂ ವಯ್ರ್ ಸರ್ಪಾಕ್ ಲಾಗಿಲ್ಲಿಂ. ಬಾಳ್ಭಟ್ ಆಂಗ್ಣಾತ್ ದೆಂವ್ಲೊ ಆನಿ ದರ್ಯಾವಟೆಂನ್ ಮಳ್ಬಾಂತ್ ಪಳೊವ್ಪಾಕ್ ಲಾಗ್ಲೊ. "ಆಯ್ಜ್ ಯೆತೊ ಗೆ ಸೊಯ್ರಾ" ಅಶೆಂ ಭಿತರ್ ಖೊಕ್ಪಿ ಬಾಯ್ಲೆಕ್ ಮ್ಹಣೂನ್ ಘರಾಂತ್ ಗೆಲೊ. ಭಟಾಚಿಂ ಉತ್ರಾಂ ಖರಿಂ ಜಾಲೀಂಚ್. ಸಾಂಜೆರ್ ವಾರೊ, ಪಾವ್ಸ್ ಆನಿ ಗಡ್ಗಡ್ ಅಶೆ ತಿನೂಯ್ ಸೊಯ್ರೆ ಆಯ್ಲೆ. ಆನಿ ತಾಪಿಲ್ಲೆಂ ಥಂಡ್ ಜಾಲೆಂ.

ರಾತ್ಚಿಂ ಜೆವ್ಣಾ ಜಾಲ್ಲಿಂ. "ಮಾಸ್ತರಾಸ್ ಅಕ್ರಾ ತಾರ್ಕೆಸ್ ಫಿ ಭರ್ತೊಂ ಮ್ಹಣೂನ್ ಸಾಂಗ್" ಅಶೆಂ ಸಾಂಗೂನ್ ಬಾಳ್ಭಟಾನ್ ಸೊಮ್ನಾಥಾಕ್ ನ್ಹಿದಯ್ಲ್ಲೊ. ಭಾಯ್ರ್ ಪಯ್ಲೊ ಪಾವ್ಸ್ ನೆಟಾನ್ ರಕ್ತಾಲೊ. ಖಂಯ್ಚ್ಯಾ ತರಿ ಕೊನ್ಶಾತ್ಲ್ಯಾನ್ ಭೀತರ್ ಸರ್ಪಿ ವಾರ್ಯಾನ್ ಪೆತ್ರೊಲಾಚೊ ದಿವೊ ನಾಕಾ ತಿತ್ಲೊ ಥರ್ಥರತಾಲೊ. ಆನಿ ಭಟ್ಣೀಲೆ ಖೊಕಪ್ ತಾಕಾ ಸಾಂಗಾತ್ ಕರ್ತಾಲೆಂ.

"ದೆವ್ ಆಹೆ ಮ್ಹಣ್ಟಾ ತೆಂ ಫಟ್ ನವ್ಹೆಂ ಗೊ!" ಬಾಳ್ ಭಟ್ ಸಮಾಧಾನಾನ್ ಉಲೊವ್ನ್ ಗೆಲೊ.

"ಪಣ್ ದೆಸಾಯಾಚ್ಯಾ ಘರಿಂ ತುಮಾಶೆಂ ಕಾರಣ್ ದಿಲೆಂ ತರ್ ಪುರಯ್ತಾನ್?" ಬಾಯ್ಲೆನ್ ವಿಚಾರಲೆಂ

"ಮಡ್ಗಾವಾಂ ಕಾರಣ್ ಘೆತ್ಲೆಹೆಂ ಮ್ಹಣೆ ಗೊ ಜಾವ್ಯಾಂನ್! ತಿಥೆಂ ಜೊಡ್ ಜಾಸ್ತ್! ಇಥ್ಲ್ಯಾ ಸಾರ್ಕೆಂ? ಇಥೆಂ ದಿವ್ಸಾಸ್ 20 ಗಣ್ಪತಿ ಪುಜ್ಲ್ಯಾರ್ 100 ರುಪ್ಯೆ ಹಯ್ನಾತ್. ಮಡ್ಗಾವಾಂಸ್ ಬಿ ಭಟ್ ಕಾರ್ಣಾಪಯಲೀಂಚ್ ದಕ್ಷಿಣಾ ಸಾಂಗ್ತೊ ಮ್ಹಣೆ. ಪರತ್ ವಸ್ತು ಸಗ್ಳ್ಯಾ ಭಟಾಸ್. ಬಾಮ್ಣಾಚ್ಯಾ ಘರಾಂತ್ ಕಾರಣ್ ಅಸ್ಲ್ಯಾರ್ ಅಣಿ ವಿಚಾರಾಸಚ್ ನಕೊ ಸತ್ಯನಾರಾಯಣಾಚೆಚ್ 500 ಮಿಳ್ತಾತ್ ಮ್ಹಣೆ!"

"ಅऽऽಶೆಂ! ಆಂ...!" ಬಾಯ್ಲೆಂನ್ ಖೊಕತ್ ಖೊಕ್ತೂಚ್ ಅಜಾಪ್ ಉಕ್ತಾಯಲೆಂ"

"ಭಯಾನಕ್ ತಾಣ್ ಆಲ್ಲಾ ಮ್ಹಾಜೆರ್, ಆತ್ತಾಂ ಸಾಠ್ ರುಪ್ಯೆ ಕಾಡ್ ಮ್ಹಟ್ಲ್ಯಾರ್ ಕುಠ್ಠೂನ್ ಕಾಡಾಚೆ? 11 ತಾರ್ಕೆಸ್ ದೆತೊಂ ಮ್ಹಣೂನ್ ಸಾಂಗೂನ್ ನ್ಹಿಜಿವ್ಲಾ! ದೆಸಾಯಾಚ್ಯಾ ಘರಿಂ ಮ್ಹಣ್ತರೀಂನ್ 151 ಕುಠ್ಠೆಂ ಗೆಲೆ ನಾಹಿ ಸತ್ಯನಾರಾಯಣಾಚೆ. ತುಜಯ್ ದೊತೊರಾ ಜವ್ಳ್ ನ್ಹೆಊನ್ ಆಣೂಯಾ ಮಗ್ ಆಂ!" ಬಾಳ್ಭಟ್ ಉಮೆದೀನ್ ಉಲಯ್ತಾಲೊ. ಬಾಯ್ಲ್ ಖೊಕತ್ ಖೊಕತ್ ಘೊವಾಲಿ ಉಮೆದ್ ನಿಯಾಳತಾಲಿ ಆನಿ ಭಾಯ್ರ್ ಸೊಯ್ರೊ ಉಮೆದೀನ್ ಸಾಮ್ಕೊ ಪಿಶ್ಯಾಂವರಿ ರಕ್ತಾಲೊ.

ಸಕಾಳಿಂ ಬಾಯ್ಲೆಚ್ಯಾ ಪಯ್ಲ್ಯಾ ಸಾದಾಕ್ ಬಾಳ್ ಭಟ್ ಉಠ್ಲೊ. "ಮಾತ್ಶೆ ಸಾಖರ್ ಘೆವ್ನ್ ಯೆತಾತ್? ನಿದಾನ್ ಗೂಳ್ ತರಿ ಆಣಾ ಥೊಡಾ! ಅಣಿ ದಾಳಯ್ ಸಮ್ಪಲೆಹೆ!"

"ಅಗೊ ಪಂಧ್ರಾಚ್ ರುಪ್ಯೆ ಆಹೆತ್ ಕಿರವ್ಟೆಸ್! ತೆಯ್ ಮೊಡ್ ಮ್ಹಣ್ಟೆ?" ಬಾಳ್ ಭಟಾನ್ ಪ್ರಸ್ನ್ ಕೆಲೊ.

ಬಾಯ್ಲ್ ಖೊಕ್ಲಿ. ತಿಕಾ ಪರತ್ ಕಾಂಯ್ ಉಲೊವ್ನ್ ದಿಸ್ಲೆಂ ನಾ. ಭಾಯ್ರ್ ರಕ್ಪಿ ಸೊಯ್ರ್ಯಾನ್ ಪುರಾಯ್ ಚಿತ್ರೂಚ್ ಬದ್ಲೂನ್ ಉಡಯ್ಲ್ಲೆಂ. ಬಾಳ್ ಭಟ್ ಉಠ್ಲೊ ಆನಿ ಕಿರವ್ಟಿ ಪಾಂಚ್ ರುಪ್ಯಾ ಲಾವ್ನ್ ಪಸ್ರ್ಯಾ ಕಡೆಂನ್ ವಚ್ಪಾಕ್ ಲಾಗ್ಲೊ. ಯೊ ದಿಸಾ ಭರ್ ಪೊಟಾ ಹಿ ಗತ್ ಆಶಿಲ್ಲೆ ಲೊಕ್ ಪರ್ಸಾಕಡೆಂನ್ ವಚ್ಚೆಂ ಪಯ್ಲೀಂಚ್ ಪಸ್ರ್ಯಾಡೆಂನ್ ಪಾವ್ತಾತ್. ಗಾಠೀಕ್ ಪಯ್ಶೆ ಆಶಿಲ್ಲ್ಯಾಂಕ್ ಪಸ್ರೆ ಸೊದ್ಚೆಂ ಪಡ್ನಾತ್. ಘರಾಂತ್ ಡಬೆ ಭರೂಂನ್ ಉರ್ತಾತ್. ಶೆತಾಂತ್ ಉದಕ್ ಚಡೀಲ್ಲೆಂ. ಪಯ್ಲ್ಯಾ ಪಾವ್ಸಾಕ್ ನುಸ್ತೆಂ ವಯ್ರ್ ಚಡ್ಟಾ. ಗಾವ್ಚೆಂ ಪೊರೆ ಹಾತಾಂತ್ ವಾರ್ ಘೆವ್ನ್ ಶೆತಾಂತ್ ಚಡಿಲ್ಲೆಂ ನುಸ್ತೆಂ ಧರ್ತಾಲೆ. ಬಾಳ್ ಭಟಾಚಿಂ ಪಾವ್ಲಾಂ ಮಾತ್ಶಿ ಥಿರಾವ್ಲಿಂ. ಭಟ್ ನುಸ್ತೆಂ ಖಾಯ್ನಾತ್. ಭಟ್ ದಾಳ್ ಖಾತಾಟ್, ಬಟಾಟ್ ಖಾತಾತ್, ತಾಂದೂಳ್ ಆನಿ ಹೆರ್ ಕಡ್ಧಾನ್ಯಾ ಖಾತಾತ್. ಸಗ್ಲೆಂ ವಿಕ್ತೆಂ ಹಾಡ್ಚೆಂ ಪಡ್ಟಾ. ಭಟ್ಪಣಾಚೆ ತಾಂದೂಳ್ ಶೀತ್ ಕರ್ಪಾಕ್ ಉಪ್ಕಾರನಾತ್. ಕೊಣೂಯ್ ಬರ್ಯಾ ಮನಾನ್ ಬರೆ ತಾಂದೂಳ್ ದಿಲೆ ಜಾಲ್ಯಾರ್ ಫುಕ್ಟಾಂತ್ ಶೀತ್ ಜಾತಾ. ನಾ ಜಾಲ್ಯಾರ್ ಕೊಣಾಲೆಂಯ್ ಭಾತ್ ಘೆವ್ನ್ ಗಿರ್ಣೀರ್ ವಚೂಂನ್ ಕಾಣೂನ್ ಹಾಡ್ಚೆಂ ಪಡ್ಟ್ಟಾ.

ಸಾಕ್ವಾಕಡೆಂನ್ ಪಾವ್ಪಾಕ್ ಜುಜೆಲಿ ಜಾಪ್ ಬಾಳ್ಭಟಾಲ್ಯಾ ಕಾನಾರ್ ಪಡ್ಲಿ. ಜುಜೆಲೆ ಶಂಬರ್ ರುಪ್ಯಾ ಬಾಳ್ ಭಟಾನ್ ಪರ್ತೆ ಪಾವೊಂವಂಕ್ ನಾಶಿಲ್ಲೆ. "ಭೊಟಾ... ಹೂಂಯ್ ರೆ ಸೊಕಾಣಿ ಸೊಕಾಣಿ?"

"ಕಾಂಯ್ ನಾ ರೆ, ಪಸ್ರ್ಯಾರ್ ವತಾ ಮಾತ್ಸೊ" ಬಾಳ್ ಭಟಾನ್ ಜಾಪ್ ದಿಲಿ. ಆಪ್ಣೆ ಜುಜೆಲೆ ಘೆತಿಲ್ಲೆ ಶಂಬರ್ ರುಪ್ಯಾ ಪಾವ್ಯ್ಲೆನಾತ್ ಮ್ಹಣ್ಪಾಚೆಂ ತಾಚ್ಯಾ ಮತೀಂತ್ ಆಯ್ಲೆಂ, "ಜುಜೆ ಬಾಬ್! ತುಜೆ ಪಯ್ಶೆ ದಿತಾಂ ಆಂ ಅಕ್ರಾ ತಾರ್ಕೆಕ್" ಭಟಾನ್ ಜುಜೆಕ್ ಮ್ಹಳೆಂ. "ದಿ ರೆ ಸುಶೆಗಾತ್! ರಾತಿ ಪಾವ್ಸ್ ಮಾತ್ ಕಾಸ್ತಾ ಝೊಳ್ಳೊ ಆಂ" ಜುಜೆನ್ ಸಹ್ಜಪಣಾನ್ ಜಾಪ್ ದಿಲ್ಲಿ.

ಗಾಂವ್ ವ್ಹಡ್ ಜಾತಾಲೊ. ಗಾಂವ್ಚೆ ಲೊಕ್ ವ್ಹಡ್ ಜಾತಾಲೆ. ಲೊಕಾಲಿಂ ಘರಾಂ ವ್ಹಡ್ ಜಾತಾಲಿಂ. ಕೊಲ್ವಾಚ್ಯಾ ಘರಾಂಚೆರ್ ನಳೆ ಯೆತಾಲೆ ಆನಿ ನಳ್ಯಾಚ್ಯಾಂ ಘರಾಂಚೆರ್ ಸ್ಲೆಬ್! ಗಾವಾನ್ ದರ್ ಎಕಾ ಘರಾಂನ್ ರೆಡೀಒ ವಾಜ್ತಾಲೆ. ಆನಿ ಭಟಾಚ್ಯಾ ಘರಾಂತ್ ಮಾತ್ ಮಂತ್ರ್ ಆನಿ ಖೊಕ್ಲಿ! ಬಾಮ್ಣಾಲಿಂ ಭುರ್ಗಿಂ ಮಡ್ಗಾವಾಂ ರಾವ್ನ್ ಶಿಕ್ತಾಲಿಂ. ದೆಸಾಯಾಲಿಂ ಭುರ್ಗಿಂ ಪೊಲಿಶೆಂನ್, ಫೊರೆಸ್ಟಾನ್ ಬಿ ಕಾಮಾಕ್ ಲಾಗ್ತಾಲಿಂ. ಮೆಸ್ತ್, ಗವ್ಣಿ, ಮ್ಹಾಲೊ, ಪಾಡೆಲಿ ಹಾಂಕಾಯ್ ಗಾವಾಂತ್ ಆತಾಂ ಭರ್ಪೂರ್ ಕಾಮ್ ಆಸ್ತಾಲೆಂ. ಕಿರಿಸ್ತಾವಂ ಚಾರ್ - ಪಾಂಚ್ ಪುಸ್ತಕಾಂ ಶಿಕ್ತಾಲೆ ಆನಿ ಪಾಸ್ಪೊರ್ಟ್ ಕರೂನ್ ಕಶೆಂ ತರಿ ಕುಯ್ಟಾಕ್ ಪಾವ್ತಾಲೆ. ಘರಾ ಪಯ್ಶೆ ಧಾಡ್ಟಾಲೆ. ಗಾವಾಂನ್ ಬೆಕಾರ್ ಭೊಂವ್ಪಿ ಭುರ್ಗ್ಯಾಂಕೂಯ್ ಪಾವ್ಸಾಳ್ಯಾಂತ್ ನುಸ್ತೆಂ ಧರ್ಪಾಚೆಂ, ಹುಂವಾರಾತ್ ಯೆವ್ಪಿ ನಾಲ್ಲ್ ಎಕ್ಠಾಂಯ್ ಕರ್ಪಾಚೆಂ, ಕುಲ್ಲ್ಯಾಂಕ್ ವಚ್ಪಾಚೆಂ ಅಸ್ಲಿಂ ಪೊಟ್ ಭರ್ಪಾಚಿಂ ಕಾಮಾ ಆಶಿಲ್ಲಿಂ. ಆನಿ ವರ್ಣ್ ವ್ಯವ್ಸ್ಥೆಂತ್ ವಯ್ರ್ ಬಶಿಲ್ಲೊ ಭಟ್ ಮಾತ್. ಅಶ್ವಥಾಮ್ಯಾಭಶೆನ್ ಸಾಖರ್, ಗೊಡ್, ದಾಳ್ ಅಸ್ಲ್ಯೊ ಶಿವ್ರಾಕ್ ವಸ್ತು ಸೊದತ್ ಭೊಂವ್ತಾಲೊ.

ಶೆನ್ವಾರ್ ಆಶಿಲ್ಲ್ಯಾಂನ್ ಸೊಮ್ನಾಥ್ ಘರಾ ಬೆಗೀನ್ ಆಯ್ಲೊ. ಆಯ್ಜ್ ಸಾಂಜೆರ್ ಶಾಳಾ ನಾಶಿಲ್ಲಿ. ಪಾವ್ಸಾನೂಯ್ ವಿಸೊವ್ ಘೆತಿಲ್ಲೊ. ದನ್ಪಾರ್ಚ್ಯಾ ಜೆವ್ಣಾ ಉಪ್ರಾಂತ್ ಆತಾಂ ಬಾಳ್ ಭಟಾಕ್ ಮಾತ್ಶೆಂ ಆಡ್ ಪಡ್ಪಾಚೆಂ ಆಶಿಲ್ಲೆಂ. ಸೊಮ್ನಾಥ್ ಬಾಳ್ ಭಟಾಲಾಗಿಂ ಆಯ್ಲೊ. "ಅಕ್ರಾ ತಾರ್ಕೆಸ್ ದೆತಾ ನ್ಹವೆ ಪಯ್ಶೆ ಆಬಾ?"

"ಆರೆ ಹೊಯ್ ರೆ! ಆತಾಂ ಆಡ್ ಪಡಾಸ್ ದೆ ಬಘುಯಾಂ ಮಾತ್ಸಾ. ತುಂ ಮ್ಹಣಾ ಬೈಸ್, ಉದ್ಯಾಂಪಸೂನ್ ಮಹಿಮ್ನಾಚಿ ಸಂಥಾ ದೆತೊಂ ತೂಜ್" ಅಶೆಂ ಮ್ಹಣ್ ಬಾಳ್ಭಟಾನ್ ದೊಳೆ ಧಾಂಪ್ಲೆ. ಧಾಂಪಿಲ್ಲ್ಯಾ ದೊಳ್ಯಾಂಕ್ ಉಕ್ತ್ಯಾಪರಸ್ ಚಡ್ ಪಳೊವ್ಪಾಕ್ ಕಳ್ಟಾ. ಭಿತರ್ ಬಾಯ್ಲೆಚೆಂ ಖೊಕಪ್ ಸುರೂಚ್ ಆಶಿಲ್ಲೆಂ. ಬ್ರಾಹ್ಮಣ್ ಜಲ್ಮ್ ಮೊಠ್ಯಾ ಪುಣ್ಯಾಯೆನ್ ಮೆಳ್ಟಾ ಖಂಯ್. ಬಾಳ್ ಭಟಾಕ್ ಆಪ್ಣಾಚೆರೂಚ್ ಹಾಸನ್ ದಿಸ್ಲೆಂ. ಪೂಣ್ ನಾ ಆಪ್ಣಾಲೆಂ ಜಾಲೆಂ ತಶೆಂ ಸೊಮ್ನಾಥಾಲೆಂ ಜಾವ್ನ್ ಉಪ್ಕಾರನಾ. ಸೊಮ್ನಾಥಾನ್ ಶಿಕ್ಪಾಕ್ ಜಾಯ್. ನಿದಾನ್ ಮಾಸ್ತರ್ ತರಿ ಜಾವ್ಪಾಕ್ ಜಾಯ್. ಪುರೊಯ್ತಾಲೊ ಚಲೊ ಜಾಲಾ ತಸೊ. ಭಟ್ ಆನಿ ಕಾಂಯ್ ಧಂದೊ ಕರೂಂಕ್ ಉಪ್ಕಾರನಾ; ಪೂಣ್ ಮಾಸ್ತರ್ ಜಾಲ್ಯಾರ್ ಕೊಣ್ ಕಾಂಯ್ ಮ್ಹಣ್ನಾ. ಉರ್ಫಾಟೆಂ ಮಾಸ್ತರ್ ಬ್ರಾಹ್ಮಣ್ ಆಸ್ಲ್ಯಾರ್ ತಾಕಾ ಚಡ್ ಮಾನ್ ಮೆಳ್ಟಾ. ಮಾಸ್ತರಕಿ ಆನಿ ಭಟ್ಪಣ್ ದೊನೂಯ್ ವಾಂಗ್ಡಾ ಸಾಂಬಾಳಪಾಕ್ ಮೆಳ್ಟಾ. ಪೂಣ್ ತೆ ಖಾತೀರ್ ಸೊಮ್ನಾಥ್ ಶಿಕ್ಪಾಕ್ ಜಾಯ್. ಮಾಸ್ತರ್ ಜಾವ್ಪಾಕ್ ಜಾಯ್. ಆನಿ 11 ತಾರ್ಕೆಕ್ ಫಿ ಭರ್ಪಾಕ್ ಜಾಯ್.

ನ್ಹೀದ್ ಕಾಂಯ್ ಪಡ್ಲಿ ನಾ. ಬಾಯ್ಲೆಚಿ ಖೊಕ್ಲಿ ಕಾಂಯ್ ಕಮಿ ಜಾವಾಪಾಚೆಂ ನಾವ್ ಘೆಯ್ ನಾಶಿಲ್ಲಿ. ಪಾವ್ಸಾಳ್ಯಾಂತ್ಲ್ಯಾ ಥಂಡೆಕ್ ತಿಜೊ ಜೀವ್ ಕಸೊ ಸೊಸ್ತಲೊ ಕಾಯ್ ಹೊ ಹುಸ್ಕೊ ಬಾಳ್ ಭಟಾಕ್ ಪಿಡ್ಟಾಲೊ. ಲಗ್ನ್ ಕರೂನ್ ಘರಾ ಹಾಡ್ಲಿ ತೆನ್ನಾ ಸಾವ್ನ್ ತಿ ಘರಾಚಿ ಆನಿ ಘರ್ ತಿಜೆ ಜಾವ್ನ್ ಗೆಲ್ಲೆಂ. ಚಡಾಂನ್ ಚಡ್ ದೊನ್ ವರ್ಸಾಂತ್ಲ್ಯಾಂನ್ ಎಕ್ ಕಾಪಡ್. ಹೆಂ ಸೊಡೂನ್ ತಿಣೆ ಕಾಂಯ್ ಮಾಗ್ಲೆಂ ನಾ. ಸೊಮ್ನಾಥಾಚ್ಯಾ ವೆಳೆಕ್ ತಿಕಾ ತಿಜಿಂ ಘರ್ಚಿಂ ಆಪಯ್ತಾಲಿಂ. ಪೂಣ್ ತೆನ್ನಾಯ್ ತಿ ಗೆಲಿ ನಾ. ಸೊಮ್ನಾಥ್ ಹ್ಯಾಚ್ ಘರಾಂತ್ ಜಲ್ಮಾಕ್ ಆಯ್ಲ್ಲೊ. ಬಾಳ್ಭಟಾಲ್ಯಾ ಜಾಣ್ಟ್ಯಾ ಆವ್ಯ್ನ್ ತಿಜೆ ಬಾಳಂತಪಣ್ ಕೆಲ್ಲೆಂ. ದೊನ್ ವರ್ಸಾಂ ಪಯ್ಲಿಂ ಬಾಳ್ಭಟಾಚಿ ಆವ್ಯ್ ಮೆಲ್ಲಿ. ಆನಿ ಪಂಧ್ರಸ್ ಜಾವ್ನೂಯ್ ಭಟೀಲೆಂ ದುಕ್ ಕಮಿ ಜಾಊಂಕ್ ನಾಶಿಲ್ಲೆಂ. ತೆನ್ನಾ ಸಾವ್ನೂಚ್ ಹೆಂ ಖೊಕ್ಲ್ಯೆಚೆಂ ಪ್ರಕ್ರಣ್ ಸುರು ಜಾಲ್ಲೆಂ. ಜೆ ದಿಸಾಂನ್ ದೀಸ್ ವಾಡ್ತೂಚ್ ಆಶಿಲ್ಲೆಂ. ದೊನ್ - ಚಾರ್ ದೊತೊರೂಯ್ ಜಾಲ್ಲೆ. ಪೂಣ್ ಅಶೆಂ ಘರ್ ದಾರ್ ಸೊಡೂನ್ ಬಾಯ್ಲೆಕ್ ಘೆವ್ನ್ ಕಿತ್ಲ್ಯಾ ಫಾವ್ಟಿಂ ಮಡ್ಗಾವಾಂ ವತ್ಲೊ!

ಶೆನ್ವಾರ್ ಜಾಲೊ. ಆಯ್ತಾರ್ ಜಾಲೊ. ಆನಿ ಸೊಮಾರ್ ಉಜ್ವಾಡಲೊ. ಜುಜೆಲ್ಯಾ ಘರಾವ್ಟೆಂನ್ ಲೊಕಾಂಲೊ ಬೊವಾಳ್ ಆಯ್ಕತಾಲೊ. ಕಿತೆಂ ಜಾಲೆಂ ಕಾಯ್ ಮ್ಹಣ್ ಪಳೊವ್ಪಾಕ್ ಬಾಳ್ಭಟ್ ಸೊಂಪ್ಣಾ ದೆಂವ್ಲೊ. ಭಾಟಾತಲಿ ಲ್ಹಾನ್ಶಿ ವಾಟ್ ಚಮ್ಕೂನ್ ಸಾಕ್ವಾಕಡೆಂನ್ ಪಾವ್ಲೊ. ಹಯ್ ಜುಜೆಲ್ಯಾ ಘರಾಕಡೆನೂಚ್ ಆಶಿಲ್ಲೊ ಬೊವಾಳ್. ಸಾತ್ - ಆಂಠ್ ಮಾನಾಯ್ ಕಿತೆಂ ತರಿ ವೊಡೂನ್ ವ್ಹರ್ತಾಲೆ. ಜುಜೆ ಮುಕಾರ್ ಫಾಟಿಂ ಕರೂನ್ ತಾಂಕಾ ಮಾರ್ಗದ್ರ್ಶನ್ ಕರ್ತಾಲೊ. ಫ್ರಾಂಸಿಸಾಂನ್ ಕಸ್ಲಿ ವಸ್ತ್ ಬಿ ಧಾಡ್ಲಿ ಕಾಯ್ ಕುಯ್ಟಾ ಸಾವ್ನ್? ಪೂಣ್ ಇತ್ಲಿ ಜಡ್ ವಸ್ತ್! ಸಾತ್ ಆಠ್ ಮಾನಾಯಾಂಕ್ ಆಟಾಪನಾ ಜಾಲ್ಲಿ. ಖೂಬ್ ದಿಸಾಂ ಸಾವ್ನ್ ಜುಜೆಗೆರ್ ಬೊವಾಳ್ ಸುರು ಆಸ್ತಾಲೊ. ಧಡಯ್ - ಬಡಯ್ ಸುರು ಆಶಿಲ್ಲೆಂ. ಪೂಣ್ ಕಿತೆಮ್ ಚಲ್ಲಾ ಕಾಂಯ್ ವಿಚಾರಪಾಚೆಂ ಅವ್ಸಾನ್ ಬಾಳ್ಭಟಾಕ್ ಜಾಲೆಂ ನಾ. ಪರತ್ ಶಂಬರ್ ರುಪ್ಯಾಂಚಿ ಖಬರ್ ಆಯ್ಲ್ಯಾರ್ ಹಿ ಭಿರಾಂತ್ ಬಾಳ್ಭಟಾಕ್ ಆಶಿಲ್ಲೀಚ್. ಇತ್ಲೆಂ ಮ್ಹಣ್ ಸರ್ ಬಾಳ್ ಭಟ್ ವೊಡ್ಟಲ್ಯಾಂಲಾಗಿಂ ಪಾವ್ಲೊ. ಎಕ್ ವಿಚಿತ್ರ್ ಅಸೊ ಗಾಡೊ. ತಾಕಾ ಚಾರ್ ವಟೆಂನ್ ಚಾರ್ ರೊದಾಂ. ಮದಿಂ ಶಿಮಿಟಾಂನ್ ಮಾಖ್ಲ್ಲೆಂ ಭಾಣಾಭಶೆಂನ್ ಆಯ್ದನ್. ಆಯ್ದನಾಕ್ ಫಾಟ್ಲ್ಯಾವಟೆಂನ್ ಆನಿ ಎಕ್ ರೊದ್ ಆನಿ ತ್ಯಾ ರೊದಾಕ್ ಫಿರೊವ್ಪಾಕ್ ಎಕ್ ದಾಂಡೊ ಕಸೊ.

"ಕಿತೆಂ ರೆ ಜುಜೆ! ಉದಕ್ ತಾಪೊವ್ಪಾಕ್ ಭಾಣ್ ಹಾಡ್ಲಾ ನವೆಂ" ಭಟಾಚ್ಯಾ ಪ್ರಸ್ನಾಚೆರ್ ಕೊಕ್ರೀಟ್ ಮಿಕ್ಸರ್ ವಡೂನ್ ವ್ಹರ್ಪಿ ಸಗ್ಲೆ ಆನಿ ಜುಜೆ ಮೊಠ್ - ಮೊಠ್ಯಾನ್ ಹಾಂಸ್ಪಾಕ್ ಲಾಗ್ಲೆ. ಬರೊಚ್ ವೆಳ್ ತೆ ಹಾಂಸತ್ ಉರ್ಲೆ. ಕೊಣೂಚ್ ಹಾಂಸ್ಪಾಚೊ ಥಾಂಬ್ನಾ ಆನಿ ಕಾಂಯ್ ಉಲಯ್ನಾ ಮ್ಹಣ್ಟಗೆಚ್ ಬಾಳ್ ಭಟೂಚ್ ಲಜೆಲ್ಯಾ ಬಶೆಂನ್ ಜಾವ್ನ್ ವಿಚಾರಪಾಕ್ ಲಾಗ್ಲೊ. "ಕಿತೆಂ ಜಾಲೆಂ ರೆ ಜುಜೆ... ಹಾಸ್ತಾ ಶೆ"

"ಭೊಟಾ! ಕೊಕ್ರೀಟ್ ಮಿಕ್ಸರ್ ತೊ; ಬೆಥೊ ಕಾಲೊವ್ಪಾ ಹಾಡ್ಲಾ!" ಜುಜೆನ್ ಹಾಂಸತ್ ಹಾಂಸತ್ ಜಾಪ್ ದಿಲಿ.

ಹೆಂ ನವೀನ್ ಯಂತ್ರ್ ಕಶೆಂ ಕಾಮ್ ಕರ್ತಾ ಹೆಂ ಪಳೊವ್ನ್. ಬಾಳ್ ಭಟ್ ಪರ್ತೊ ಘರಾ ಆಯ್ಲೊ. ಘರಾಂನ್ ಪಾವ್ತನಾಚ್ ಬಾಯ್ಲೆಂನ್ ಖೊಕತ್ ಖೊಕತ್ ವಿಚಾರಲೆಂ, "ಕೊಠೆಂ ಗೆಲ್ಲೆ?"

"ಜುಜೆಚ್ಯಾ ಘರ್ಜವಳ್, ಬೆಥಾ ಘಾಲ್ತೊ ತೊ ಛಪ್ರಾಸ್"

"ಹ್ಯಾ ಪಾವ್ಸಾಂತ್?"

"ಮಾಟೊವ್ ಘಾತ್ಲಾಹೆ ಥೊಲ್ಲಾ ಘರಾವ್ರತಿಂ. ವರೂಂನ್ ಪ್ಲೆಸ್ಟೀಕ್ ಘಾತ್ಲೆಹೆಂ. ಪಾವ್ಳ್ಯಾ ಕೆಲ್ಯಾಹೆ ಚಾರಯ್ ವಟೆಂನ್. ಪಾವ್ಸ್ ಕಶಾ ಯೆಣಾ ಭಿತರ್? ಪಯ್ಸಾ ಉಲ್ಲ್ಯಾರ್ ಕಾಯ್ಯ್ ಕರಾ ಯೆತೆಂ ಮ್ಹಣ್ಟಾ ತೆಂ ಫಟ್ ನವ್ಹೆಂ" ಬಾಳ್ ಭಟ್ ಸಾಂಗೂನ್ ಮೆಕ್ಳೊ ಜಾಲೊ.

ದನ್ಪರಚಿಂ ಜೆವ್ಣಾ ಜಾಲಿಂ. ಎಕ್ ದೊನ್ದಾಂ ಪಾವ್ಸಾಚ್ಯೊ ಲ್ಹಾನ್ಶೊ ದಡ್ಕೊ ಆಯ್ಲ್ಯೊ. ದಡ್ಕೊ ಯೆತಾಲ್ಯೊ ತೆನ್ನಾ ಮಿಕ್ಸರಾಚೊ ಆವಾಜ್ ಬಂದ್ ಜಾತಾಲೊ. ಆನಿ ಪಾವ್ಸ್ ಥಾಂಬ್ತಗೆಚ್ ರೊಕ್ಡೊಚ್ ಸುರು ಜಾತಾಲೊ. ಆಯ್ಜ್ ಬಾಳ್ಭಟ್ ಸೊಪ್ಯಾರೂಚ್ ಆಡ್ ಪಡಿಲ್ಲೊ. ಕುಶೀಕ್ ಬಸೂನ್ ಸೊಮ್ನಾಥ್ ಶಾಳೆಚೊ ಅಭ್ಯಾಸ್ ಕರ್ತಾಲೊ. ಇತ್ಲ್ಯಾನ್ ವಳ್ಖೀಚಿ ಜಾಪ್ ಬಾಳ್ ಭಟಾಲ್ಯಾ ಕಾನಾರ್ ಪಡ್ಲಿ. ಹಯ್ ಪುರ್ಸೊಚ್. ಪುರ್ಸೊ ಆಂಗ್ಣಾನ್ ಪಾವ್ಲೊ. ಆನಿ ಎಕ್ ಕಾಯಂ ಪಡ್ಟಾ ದಿಸ್ತಾ ಪದ್ರಾಂನ್. ಬಾಳ್ಭಟ್ ಮನಾತ್ಲ್ಯಾಮನಾತ್ ಖೊಶಿ ಜಾಲೊ.

"ಕಿತೆಂ ರೆ ಪುರ್ಶಾ ಪುರಯ್ತಾನ್ ಧಾಡ್ಲಾ?" ಬಾಳ್ ಭಟಾನ್ ಚವ್ಕಶೀಚ್ಯಾ ಸ್ವರಾಂತ್ ವಿಚಾರಲೆಂ

"ನಾ ಭಟ್ಮಾಮ್, ದೆಸಾಯಾ ಘರ್ಸೂನ್ ಆಯ್ಲಾಂ. ಫಾಲ್ಯಾಂ ವಿರ್ತ್ ಜಾಯ್ನಾ ಮ್ಹಣ್ ರಕಾದ್ ಧಾಡ್ಲಾ ದೆಸಾಯಾಂನ್; ಸೂಂಯೆರ್ ಆಯ್ಲಾಂ. ಗಾವ್ಣಗಿರ್ಯಾಂ ಸೂನ್ ಸುಟ್ಲಿ ಖಂಯ್ ವ್ಹಡ್ಲ್ಯಾ ಭಾವಾಲಿ." ಪುರ್ಸೊ ಉಲೊವ್ನ್ ಗೆಲೊ. ಪುರ್ಶಾಲಿಂ ಉತ್ರಾಂ ಬಾಳ್ಭಟಾಚೆರ್ ಘಣ್ ಪಡಿಲ್ಯಾವರಿ ಪಡತ್ ರಾವ್ಲಿಂ. ಪುರ್ಸೊ ಗೆಲೊ. ಮಿಕ್ಸರ್ ವಾಜ್ಪಾಕ್ ಲಾಗ್ಲೊ. ಮೊಟ್ಯಾನ್. ಫಾಟ್ಮೊರ್ಯಾ ಪುರ್ಶಾಕಡೆಂನ್ ಬಾಳ್ಭಟ್ ಪಳಯ್ತ್ ಆಶಿಲ್ಲೊ. ಫಾಟ್ಲ್ಯಾಂನ್ ಸೊಮ್ನಾಥ್ ಆಯ್ಲೊ "ಆಬಾ! ಉದ್ಯಾ ಫಿ ಭರಾಸ್ ಪೈಶೆ ದೆತಾ ನ್ಹವೆ?" ಕಿತೆಂ ಜಾಲೆಂ ಹೆಂ ಸಮ್ಜುವಪಾಚೆ ಆದೀಂಚ್ ಬಾಳ್ ಭಟಾಂನ್ ಸೊಮ್ನಾಥಾಲ್ಯಾ ಕಾನ್ಪಟಾರ್ ದೊನ್ ಥಾಪ್ಟಾಂ ಮಾರ್ಲಿಂ. ಸೊಮ್ನಾಥ್ ಸಕಯ್ಲ್ ಪಡ್ಲೊ. ಬಾಪಾಯ್ಲೊ ಅಸ್ಲೊ ಅವ್ತಾರ್ ಪಳೊವ್ನ್ ಭಿಯೆಲೊ. ಅಭ್ಯಾಸಾಚಿಂ ಪುಸ್ತಕಾಂ ಆಶಿಲ್ಲಿಂ ತಾಚ್ಯಾ ಕಡೆಕೂಚ್ ಎಕ್ ಪಾಠ್ ದವ್ರಿಲ್ಲೊ. ಸೊಮ್ನಾಥ್ ಮಾಂಡಿ ಮಾರೂನ್ ತ್ಯಾ ಪಾಠಾರ್ ಬಸ್ಲೊ. ಆನಿ ರಡತ್ ರಡತ್ ತಾಂಣೆ ಅಥ್ವಂಶೀಷಾಂಕ್ ಸುರ್ವಾತ್ ಕೆಲಿ. ತಾಚೆ ಆಂಗ್ ಥರ್ಥರತಾಲೆಂ ಆನಿ ಭಿಲ್ಲಿ ನದರ್ ಬಾಪಾಯ್ಚ್ಯಾ ವಿಚಿತ್ರ್ ವಾಗ್ಣ್ಯಾಕ್ ಹೆರ್ತಾಲಿ. ಮಿಕ್ಸರ್, ಅಥ್ರ್ವಶೀರ್ಷ್, ಖೊಕ್ಲಿ ಅಶಾ ಆವಾಜಾಂತ್ ಉಬೊ ಬಾಳ್ಭಟ್ ಶೆಣೂನ್ ಗೆಲೊ. ಹ್ಯಾ ಸಗ್ಲ್ಯಾ ಆವಾಜಾಮದಿಂ ರಡ್ವೆಂ ಅಥ್ರ್ವಶೀರ್ಷ್ ಮಾತ್ ತಾಕಾ ಸ್ಪಶ್ಟಪಣಾನ್ ಆಯ್ಕುವಪಾಕ್ ಯೆತಾಲೆಂ.