ದೀಸ್ಪಡ್ತೊ ಗ್ರಾಸ್
ಜೊಡ್ಚ್ಯಾ ಇರಾದ್ಯಾನ್ ಮಾಯ್ಗಾಂವಾ ಪಯ್ಸ್ ಏಕ್
’ಪಯ್ಣಾರಿ’ ಜಾವ್ನ್ ಯೇವ್ನ್, ಪರ್ಗಾಂವಾಂತ್ ಸಯ್ತ್
ಕೊಂಕ್ಣಿ ಫುಲಂವ್ಕ್/ಪಾಲೆಂವ್ಕ್ ವಾವ್ರ್ ಕೆಲ್ಲ್ಯಾಂಚ್ಯಾ
ಮೆಳಿಂತ್, ಸುರತ್ಕಲ್ಚೊ ಮಾನೆಸ್ತ್ ಬಾಬ್ ಹೆನ್ರಿ
ಡಿ’ಸಿಲ್ವಾ ಪ್ರಮುಕ್. ಕೊಂಕ್ಣಿ ಭಾಸ್, ಕೊಂಕ್ಣಿ ಸಂಸ್ಥೊ,
ಕೊಂಕ್ಣಿ ನಾಟಕ್, ಕೊಂಕ್ಣಿ ಸಮಾಜ್ ಅಶೆಂ ವೆವೆಗ್ಳೆ
ಶೆತಾಂತ್ ವಾವ್ರ್ ದಿಲ್ಲೊ ಹೊ ಏಕ್ ಸಂಘಟಕ್, ಕೊಂಕ್ಣೆಚ್ಯಾ
ಉದರ್ಗತೆಚೊ ಶೆವೊಟ್ ಹಾಚೊ, ಕೊಂಕ್ಣಿ ಎಕ್ವಟಾಖಾತಿರ್
ಸರ್ವಾಂನಿ ಎಕಾ ಮನಾನ್ ಲಾಗಿಂ ಯೇಂವ್ಕ್ ಜಾಯ್, ಆನಿ ತ್ಯೇ
ದಿಶೆನ್ ಎಕ್ವಟಿತ್ ಮನೋಭಾವಾನ್ ಕಾಮ್ ಕರುಂಕ್ ಜಾಯ್
ಮ್ಹಳ್ಳೆಂಚ್ ಹಾಚೆಂ ಮುಳಾವೆಂ ಚಿಂತಪ್.
ವೃತ್ತೆನ್ ಏಕ್
ಪಯ್ಣಾ-ಯೆಜಂಟ್ ಸಂಸ್ಥೊ ಚಲಂವ್ಚಾ ಹಾಣೆಂ ಪಾಟ್ಲ್ಯಾ ಚಾಳೀಸ್
ವರ್ಸಾಂ ಥಾವ್ನ್ ಕಿತ್ಲೆಶ್ಯಾಗೀ ಕುಟ್ಮಾಕ್, ಪರ್ಗಾಂವಾಂತ್
ಕಾಮಾಂ ದಿಂವ್ಚೆಮುಖಾಂತ್ರ್ ಪಾಟಿಂಬೊ ದಿಲಾ, ದೀವ್ನ್ ಆಸಾ.
ಸ್ವತಾ ಏಕ್ ನಾಟಕಿಸ್ತ್ ಜಾವ್ನ್, ಹೆರ್ ಕಲಾಕಾರಾಂಕ್
ಸೊಧುನ್, ವಳ್ಕುನ್, ಆವ್ಕಾಸ್ ದಿಂವ್ಚೊ ಹಾಚೊ ಹವ್ಯಾಸ್.
ಹಾಚ್ಯಾ ಮಯ್ಪಾಸಿ ಶೆಗುಣಾಂಕ್ ಅನಿ ಕೊಂಕ್ಣಿ ಮೊಗಾಕ್
ಲಾಗುನ್ ಆಮಿಂ ಹಾಕಾ ಹ್ಯಾ ಮಯ್ನ್ಯಾಚೊ ’ಕೊಂಕ್ಣಿ ಕಾರ್ಭಾರಿ’
ಅಂಕಣಾಕ್ ವಿಂಚ್ಲಾ. ಮುಂಬಯ್ಚೊ ಫಾಮಾದ್ ಬರವ್ಪಿ ಬಾಬ್
ಹಿಲರಿ ಡಿ’ಸಿಲ್ವಾನ್ ಚಲಯಿಲ್ಲೊ ಸಂವಾದ್ ಹೊ. |
1. ಹೆನ್ರಿಯಾಬ್ - ಮುಂಬಯಾಂತ್
ಆಯ್ಲೆವಾರ್ ತಶೆಂಚ್ ಪಾಟ್ಲ್ಯಾ ಚಾಳಿಸ್-ಪನ್ನಾಸ್ ವರ್ಸಾಂನಿ
ಜಾಯ್ತೆ ಕೊಂಕ್ಣಿ ಸಂಸ್ಥೆ ಉದೆಲೆ ಅನಿ ಆಳ್ವೊನ್ ಗೆಲೆ.
ಕೊಂಕ್ಣಿ ಸಂಸ್ಥೆ ಕಿತ್ಯಾಕ್ ಬಾಳ್ವನಾಂತ್?
ಜ: ಜೆದ್ನಾಂ ಸಂಸ್ಥ್ಯಾಂನಿ ’ಕೊಂಕ್ಣಿ’ ಆಸತ್ ತರ್, ತಸಲೆ
’ಸಂಸ್ಥೆ’ ಕಾಮಾಂ ಕರುಂಕ್ ಸಕ್ತಾ. ಪುಣ್ ’ಹುದ್ದೆ/ನಾಂವ್’
ಖಾತಿರ್ ’ಕೊಂಕ್ಣಿ’ಕ್ ತುರುಪಾಚೊ ಎಕ್ಕೊ ಕರುನ್
ಚ್ಯಾರ್-ಪಾಂಚ್ ಬೊಡಾಂಕ್ ಎಕ್ಟಾವ್ನ್, ಖಬ್ರೆ ಪತ್ರಾಂನಿ
ಪರ್ಜಳುಂಕ್ ’ಸಂಸ್ಥೆ’ ಕೆಲ್ಯಾರ್, ತಸಲ್ಯಾ ಕಸಲ್ಯಾಯ್
ಸಂಸ್ಥ್ಯಾಕ್ ಬಾಳ್ವಿ ನಾ. ಹೆ ಮ್ಹಜೆ ಖಾಸ್ಗಿ ವಿಚಾರ್.
ಇತ್ಲೆಂ ಸಾಂಗ್ತಾನಾ, ಎಕಾ ಮಹತ್ವಾಚೊ ಉಲ್ಲೇಕ್ ಹಾಂಗಾಸರ್
ಗರ್ಜೆಚೊ; ’ಕೊಂಕ್ಣಿ’ ಮಟ್ಟಾರ್ ಚಿಂತುಂಕ್ ತಿತ್ಲೆ ದೂರ್ದೃಷ್ಟಿ
ಆಸ್ಚೆ ಕೊಂಕ್ಣೆಂತ್ ಆಸ್ಚೆಂ ಭೋವ್ ಗರ್ಜೆಚೆಂ. ಚಡ್ತಾವ್
ಸರ್ವ್ ’ಕೊಂಬ್ಯೆನ್ ಅಪ್ಲೆ ಪಾಂಯಾಂ ಪಂದಾ ಉಸ್ತುಂಚೆಪರಿಂ’,
ಫಕತ್ತ್ ಅಪ್ಣಾಚೆಂ, ಅಪ್ಲೆಂ, ಆನಿ ಅಪ್ಣಾಕ್ ಜಾಯ್ ಜಾಲ್ಲೆಂ
ಕರುಂಕ್, ಭಿಲ್ಕುಲ್ ದೂರ್ದೃಷ್ಟಿ ನಾಸ್ತಾನಾ ಸುರು
ಕರ್ಚ್ಯಾ ಕಾಮಾಂಕ್ ದುರ್ಭಾಗ್ಪಣಿಂ ಕೊಂಕ್ಣಿ ನಾಂವ್
ಚಿಡ್ಕಾಯ್ತಾತ್ ಆನಿ ದಾಂಗ್ರೊ ಮಾರ್ತಾತ್. ಪುಣ್ ಹ್ಯಾ
ಸರ್ವಾಂ ಮಧೆಂ ’ಕೊಂಕ್ಣೆಂತ್ ಎಕ್ವಟಿತ್ ವಾವ್ರ್’ ಕರ್ಚೊ
ಮನೋಭಾನ್ ಆಸುನ್, ತ್ಯೇ ಪಾಸತ್ ಪ್ರಾಮಾಣಿಕ್ ವಾವ್ರ್
ಕರ್ತೆಲ್ಯಾಂಚಿ ಗರ್ಜ್ ಕೊಂಕ್ಣೆಕ್ ಆಯ್ಚ್ಯಾ ದಿಸಾ ಆಸಾ,
ಆನಿ ಅಸಲೊ ಮನೋಭಾವ್ ಆಸ್ಲ್ಯಾರ್ ಮಾತ್ ಕೊಂಕ್ಣಿ ಎಕ್ವಟಿತ್
ಜಾಂವ್ಕ್ ಸಾಧ್ಯ್ ಆಸಾ ಆನಿ ತಸಲೆ ಸಂಸ್ಥೆ ಮಾತ್ರ್
ಬಾಳ್ವತಾತ್.
2.
ಅಜೀಕ್ ಚಾಳಿಸ್ ವರ್ಸಾಧ್ಲಿ ಆನಿ ಆತಾಂಚಿ ಕೊಂಕ್ಣಿ ಪರಿಗತ್
- ಹ್ಯೇ ವಿಶಿಂ ತುಮ್ಚೆ ವಿಚಾರ್ ಕಸಲೆ?
ಜ: ದಿಸಾನ್ದೀಸ್ ಸಂಸಾರ್ ಬದ್ಲೊನ್ ಯೆತಾ, ಬದ್ಲಾವಣ್
ಗರ್ಜೆಚಿ. ಜಶೆಂ ಸಂಸಾರ್ ಬದಲ್ಚೆಪರಿಂ ಸಮಾಜ್, ಲೋಕ್
ಬದಲ್ತಾ. ಕೊಂಕ್ಣಿ ಲೋಕ್ ಚಡ್ ಜಾವ್ನ್ ಮುಂಬಯಾಕ್ ಆಯಿಲ್ಲೊ
ಪಯ್ಣಾರಿ ಜಾವ್ನ್, ವೆವೆಗ್ಳ್ಯಾ ರಿತಿನ್ ಅಪ್ಲೊ ದೀಸ್ಪಡ್ತೊ
ಗ್ರಾಸ್ ಸೊಧುನ್ ಆಯಿಲ್ಲೊ, ಪರ್ಗಾಂವಾಂತ್ ಆಸುನ್ಯೀ
ಅಪ್ಲ್ಯಾ ಮಾಯ್ಗಾಂವ್ಚೊ ಉಡಾಸ್ ಜಿವಾಳ್ ದವ್ರುಂಕ್ ಸರ್ವ್
ಎಕಾಮೆಕಾ ಮೆಳ್ತಾಲೆ, ಎಕಾ ಥರಾಚೊ ಭಾಂದ್ ಜಿವಾಳ್ ಆಸ್ಲೊ,
ಅಪ್ಲೊ-ಪೆಲೊ ಮ್ಹಳ್ಳೆಂ ಚಿಂತಾಪ್ ಮಹತ್ವಾಚೆಂ ಜಾವ್ನಾಸ್ಲೆಂ,
ತವಳ್ ಟಿವಿ/ಅಂತರ್ಜಾಳಿ ನಾತ್ಲ್ಲ್ಯೊ, ಜಾಯ್ತೊ ವೇಳ್
ಆಸ್ಲೊ, ಪುಣ್ ತಾಚ್ಯಾಕೀ ಚಡಿತ್ ಮಾಪಾನ್ ಎಕಾಮೆಕಾ
ವಳ್ಕುಂಚೊ ಮನೋಭಾವ್ ಆಸ್ಲೊ. ಪುಣ್ ಆಯ್ಚ್ಯಾ ದಿಸಾಂನಿ
’ವೇಳ್’ಚ್ಚ್ ದುಡು ಜಾಲಾ, ಮಾಧ್ಯಮಾ ಚಡ್ಲ್ಯಾಂತ್,
ಸರ್ವಾಂಕ್ ಜಿಣ್ಯೆಚಿ ಧಾಂವ್ಣಿ ಆಸಾ, ಹ್ಯಾ ಪರಿಗತೆಂತ್
ಸರ್ವ್ ಗರ್ಜೊ ತಿರ್ಸುಂಕ್ ’ದುಡು’ ಗರ್ಜೆಚೊ ಜಾಲಾ, ಆನಿ
ಹ್ಯಾ ಧಾಂವ್ಣೆಂತ್ ಆಮಿ ಹೊಗ್ಡಾವ್ನ್ ಘೆತ್ಲಾಂ ಆಧ್ಲೆಂ
ಚಿಂತಾಪ್, ಆಧ್ಲೊ ಮಾಯಾಮೊಗ್, ಆನಿ ಆಧ್ಲೊ ಎಕ್ವಟ್.
3. ತುಮ್ಕಾಂ ಸಂಘಟನಾಚ್ಯಾ
ವಾವ್ರಾಕ್ ಕಶೆಂ ಪ್ರೇರಣ್ ಲಾಭ್ಲೆಂ?
ಜ: ಹಾಂವ್ ಸುರತ್ಕಲ್ ಫಿರ್ಗಜೆಂತ್ ಯುವವಾವ್ರ್ ಕರ್ನ್ ಜಾಣಾ,
ಮ್ಹಜ್ಯಾ ತರ್ನಾಟ್ಪಣಾರ್ ಸಯ್ತ್ ಫಿರ್ಗಜೆಂತ್ ನಾಟಕ್
ಖೆಳಂವ್ಚೆ, ನಾಟಕ್ ಬರಂವ್ಚೆ, ನಾಟಕಾಂತ್ ನಟನ್ ಕರ್ಚೆಂ
ಹವ್ಯಾಸ್ ಆಸ್ಲೆಂ. 1975 ಇಸ್ವೆಂತ್ ಹಾಂವೆಂ ’ವಾಟೆವಯ್ಲೊ
ಕಾಂಟೊ’ ಮ್ಹಳ್ಳೊ ಮ್ಹಜೊಚ್ಚ್ ನಾಟಕ್ ಖೆಳವ್ನ್ ಧಾಖಯಿಲ್ಲೊ.
ದೆಕುನ್ 1976 ಇಸ್ವೆಂತ್ ಮುಂಬಯಾಂತ್ ಸಯ್ತ್ ಹೊ ನಾಟಕ್
ಖೆಳವ್ನ್ ಧಾಖಂವ್ಚೆ ಇರಾದ್ಯಾನ್ ಮ್ಹಜ್ಯಾ ವಳ್ಕಿಚ್ಯಾ
ಸರ್ವಾಂಕ್ ಸಂಪರ್ಕ್ ಕರುನ್ ಮುಂಬಯಾಂತ್ ಏಕ್ ಸಂಸ್ಥೊ
ಘಡುಂಕ್ ಪ್ರೇತನ್ ಕೆಲೆಂ. ಸಭಾರ್ ಕೊಂಕ್ಣಿ ಲೋಕ್ ಹ್ಯಾ
ಸಂಸ್ಥ್ಯಾಂತ್ ವಾಂಟೆಲಿ ಜಾಲೊ, ಪುಣ್ ಹಾಂವ್ ತ್ಯೇ ವೆಳಾರ್
ಮುಂಬಯಾಕ್ ನವೊ ಆನಿ ಹ್ಯಾ ಸಂಸ್ಥ್ಯಾಂತ್ ’ಇಂಗ್ಲಿಶ್’
ಕಾರ್ಭಾರ್ ಚಲಂವ್ಚೆ ಹುದ್ದೇದಾರ್ ಜಾಲೆ ಆನಿ ತಾಂಚೆಂ
’ಇರಾದೆ’ ವೆಗ್ಳೆಚ್ಚ್ ಜಾಂವ್ಕ್ ಲಾಗ್ತಾನಾ, ಹಾಂವ್
ನಿರಾಸ್ಲೊಂ, ಪುಣ್ ಮ್ಹಜೆಂ ಪ್ರೇತನ್ ಸೊಡುನ್ ದಿಲೆಂನಾ,
ಹಾಂವೆಂಚ್ ಮುಖೇಲ್ಪಣ್ ಘೆವ್ನ್ 1976 ಇಸ್ವೆಂತ್ ’ವಾಟೆವಯ್ಲೊ
ಕಾಂಟೊ’ ನಾಟಕ್ ಖೆಳವ್ನ್ ಧಾಖಯ್ಲೊ. ತ್ಯೇ ಉಪ್ರಾಂತ್ ಪಾಟಿಂ
ಪಳೆಂವ್ಕ್ ನಾ, ಬಗಾರ್ ಮ್ಹಜ್ಯಾ ತಾಂಕಿಪ್ರಕಾರ್, ಮ್ಹಜ್ಯಾ
ಸಕ್ತೆಚೊ ಕೊಂಕ್ಣಿ ವಾವ್ರ್ ಕರುನ್ ಆಯ್ಲಾಂ ತಶೆಂಚ್
ಪಾಟಿಂಬೊ ದೀವ್ನ್ ಆಯ್ಲಾಂ.
4. ಮುಂಬಯಾಂತ್ ’ಎಕ್ವಟಿತ್
ಕೊಂಕ್ಣಿ ವಾವ್ರ್’ ಸಾಧ್ಯ್ ಆಸಾಗಿ?
ಜ: ’ಕೊಂಕ್ಣೆಚಿ ದೂರ್ದೃಷ್ಟಿ’ ಆಸುನ್ ಸುರು ಕೆಲ್ಲೊ
ವಾವ್ರ್ ಮುಂಬಯಾಂತ್ ಮಾತ್ ನ್ಹಯ್, ಸಂಸಾರಾಚ್ಯಾ ಖಂಚ್ಯಾಯ್
ಕೊನ್ಶ್ಯಾರ್ ಸಾಧ್ಯ್ ಆಸಾ. ’ಎಕ್ವಟಿತ್ ಕೊಂಕ್ಣಿ ವಾವ್ರ್’
ಕರ್ಚ್ಯಾ ಇರಾದ್ಯಾನ್ ಮುಂಬಯಾಂತ್ಲ್ಯಾ ಸರ್ವ್
ಸಂಸ್ಥ್ಯಾಂಚ್ಯಾ ಮುಖೆಲ್ಯಾಂಕ್, ಪಯ್ಣಾರಿ.ಕೊಮ್ ಹಾಣಿಂ
ಎಕ್ಟಾಂವ್ನ್ ಸುರು ಕೆಲ್ಲ್ಯಾ ನವ್ಯಾ ಮಿಸಾಂವ್ ’ಎಕ್ವಟ್’
ಜಮಾತೆಂತ್ ವಲ್ಲಿ ಕ್ವಾಡ್ರಸಾನ್ ಉಲಯಿಲ್ಲೆಂ ಉಲವ್ಪ್
ಭಾರಿಚ್ಚ್ ಖಾಯ್ಸ್ ಜಾಲೆಂ. ಅಶೆಂ ಭಗ್ಲೆಂ ತೊ ಮ್ಹಜೆಂಚ್
ಚಿಂತಾಪ್ ಉಲವ್ನ್ ಆಸ್ಲೊ, ಕೊಂಕ್ಣೆಪಾಸತ್ ಆಮ್ಚ್ಯಾ
ತಾಂಕಿಚೊ ವಾವ್ರ್ ದಿಂವ್ಚೊ ಆಮ್ಚೊ ಕಾಯ್ದೊ ಆನಿ ಜವಾಭ್ದಾರಿ.
ಹೆಂ ಚಿಂತಾಪ್ ಆಜ್ ಮ್ಹಣಾಸರ್ ಕಾರ್ಯಗತ್ ಹಾಡುಂಕ್
ಮುಂಬಯಾಂತ್ ಕೊಣೆಂಚ್ ಮುಖೇಲ್ಪಣ್ ಘೆಂವ್ಕ್ ನಾ. ಸರ್ವ್
ಸಂಸ್ಥ್ಯಾಂನಿ ಅಪಾಪ್ಲೊ ಮ್ಹಳ್ಳೊ ನಿರ್ದಿಶ್ಟ್ ಇರಾದೊ
ದವರುನ್ ಕಾಮ್ ಕೆಲಾಂ, ಕರುನ್ ಆಸಾತ್. ಆನಿ ಹೆಚ್ಚ್
ಸಂಸ್ಥ್ಯಾಕ್ ಫುಟಂವ್ನ್ ದೋನ್/ತೀನ್/ಚ್ಯಾರ್ ಸಂಸ್ಥೆ/ಸಂಘಟನಾಂ
ಉಭಿಂ ಕರುಂಕ್ ಪೆಚಾಡ್ತಾತ್ ಶಿವಾಯ್, ಸರ್ವಾಂಕ್ ಲಾಗಿಂ
ಹಾಡುಂಕ್, ತಶೆಂಚ್ ಸರ್ವಾಂನಿ ಎಕ್ವಟಿತ್ ಜಾವ್ನ್ ಕೊಂಕ್ಣಿ
ವಾವ್ರ್ ಕರುಂಕ್ ಕೆಲ್ಲೆಂ ಪ್ರೇತನ್ ಹೆಂ ಪಯ್ಲೆಂ ದೆಕುನ್
ಹಾಂವ್ ಹ್ಯಾ ಮಿಸಾಂವಾಂತ್ ಭೋವ್ ಸಂತೊಸಾನ್ ವಾಂಟೆಲಿ ಜಾಲಾಂ.
ಸುರ್ವಾತ್ ಜಾಲಿ ದೆಕುನ್ ಕಾಮ್ ಜಾಲೆಂ ಮ್ಹಣ್ ಹಾಂವ್
ಸಾಂಗಿನಾ ಪುಣ್ ಬರೆಂ ಕಾಮ್ ಬರೆ ರಿತಿನ್ ಕರುಂಕ್ ಆಮಿ
ಖಂಡಿತ್ ಸಕ್ತೆಲ್ಯಾಂವ್ ಮ್ಹಳ್ಳೆಂ ಮಾತ್ ಖಂಡಿತ್ ಸಾಂಗ್ತಾಂ.
5.
ಆಧ್ಲೆ ನಾಟಕ್ ಪಳೆಂವ್ಕ್ ಕೊಂಕ್ಣಿ ಲೋಕ್ ಹಾರಿಹಾರಿಂನಿ
ಯೆತಾಲೊ ಪುಣ್ ಆಜ್ ಉಣೊ ಜಾಲಾ ತರ್ ಹಾಚೆಂ ಮೂಳ್ ಕಾರಣ್
ಕಸಲೆಂ?
ಜ: ಸತ್ ಸಾಂಗ್ಚೆಂ ತರ್, ಆಧ್ಲ್ಯಾ ನಾಟಕಾಂನಿ
ನಾಟಕಿಸ್ತಾಂಚಿ ಜಾಣ್ವಾಯ್ ಆನಿ ಜಿಣ್ಯೆ ಅನ್ಭೋಗ್ ವರ್ತೊ
ಜಾವ್ನಾಸ್ಲೊ. ಚಡ್ತಾವ್ ಕೊಂಕ್ಣಿ ಲೋಕ್ ಉಣ್ಯಾ ಶಿಕ್ಪಾಚೊ/ಸಮ್ಜಣೆಚಿ
ಜಾವ್ನಾಸ್ಲೊ ದೆಕುನ್ ಹ್ಯಾ ನಾಟಕಾಂನಿ ಸಯ್ತ್ ಜಾಯ್ತೆಂ
ಶಿಕ್ತಾಲೊ. ಪುಣ್ ಕಾರಣಾಂತರ್ ಬದ್ಲಾವಣೆಂತ್ ಆಜ್ ಲೋಕ್
ಶಿಕ್ಪಿ ಸಮ್ಜಣೆಚೊ ಜಾಲಾ ಪುಣ್ ತೆಚ್ಚ್ ಮಾಪಾನ್ ಆಮ್ಚೆ
ನಾಟಕಿಸ್ತ್ ಪಾವುಂಕ್ ನಾಂತ್, ತೆಚ್ಚ್ ಪನ್ನಾಸ್ ವರ್ಸಾಧ್ಲಿ
ಕಾಣಿ ಆಯ್ಚ್ಯಾ ಲೊಕಾಕ್ ಸಾಂಗುಂಕ್ ಆಯ್ಲ್ಯಾರ್ ತಸಲ್ಯಾ
ನಾಟಕಾಕ್ ಕೊಣ್ ಯೆತಿತ್? ದುಸ್ರೆಂ ನಾಟಕಾಂನಿ ವ್ಹಾಪಾರ್
ಜಾಂವ್ಚೆಂ ದೊಡ್ಯಾ ಅರ್ಥಾಚೆಂ ಪೊಜ್ಡೆಂ ಸಂಭಾಷಣ್
ಜಾಯ್ತೆಪಾವ್ಟಿಂ ಕಾಂಠಾಳೊ ಹಾಡ್ತಾ ದೆಕುನ್ ಲೊಕಾಕ್
ಕೊಂಕ್ಣಿ ನಾಟಕಾಂ ಥಾವ್ನ್ ಪಯ್ಸ್ ಧಾಂವ್ಡಾಂವ್ಕ್ ಸಯ್ತ್
ಹೆಂ ಕಾರಣ್ ಮ್ಹಳ್ಳಿ ಮ್ಹಜಿ ಅಭಿಪ್ರಾಯ್.
6. ಕೊಂಕ್ಣಿ ತಾಲೆಂತ್ ಆನಿ
ಸಮರ್ಥಿ ಆಸ್ಚೆ ಕೊಂಕ್ಣೆಂತ್ ಕೊಣ್ಯೀ ನಾ ಮ್ಹಣ್ ತುಮ್ಕಾಂ
ಭಗ್ತಾ?
ಜ: ಭಿಲ್ಕುಲ್ ನಾ, ಪುಣ್ ಸಮರ್ಥಿ (ಅರ್ಹತಾ) ಆನಿ ಉಂಚಿಪಣ್
(ಕ್ವಾಲಿಟಿ) ಆಸ್ಲೆಲ್ಯಾಂಲಾಗಿಂ ದುಡು ನಾ, ಆನಿ ದುಡು
ಆಸ್ಲೆಲ್ಯಾಲಾಗಿಂ ಚಡ್ ಜಾವ್ನ್ ತಾಲೆಂತ್ ನಾ. ದೆಕುನ್
ತಸಲ್ಯಾಂನಿ ’ಗಾಯಿಲ್ಲೆಂಚ್ ಪದ್’ ಜಾಲಾಂ.
7. ಕೊಂಕ್ಣಿ ಎಕ್ವಟಿತ್
ವಾವ್ರ್ ಕರ್ಚೆಂ ಮಿಸಾಂವಾವಿಶಿಂ ತುಮ್ಚೆ ವಿಚಾರ್ ಕಸಲೆ?
ಜ: ಖಂಯ್ಚೇಂಯ್ ಮಿಸಾಂವ್ ಬರೆ ಮನಾನ್ ಸುರು ಜಾಲೆಂ ತರ್,
ತಾಕಾ ಸರ್ವಾಂ ಪಾಟಿಂಬೊ ದಿತಾತ್ ಆನಿ ಸಹಕಾರ್ ದಿತಾತ್
ಮ್ಹಣುಂಕ್ ಜಾಯ್ನಾ. ಏಕ್ ಸಂಸ್ಥೊ ಮ್ಹಳ್ಯಾರ್ ಧಾ-ಭಾರಾ
ಮನೋಗತೆಚೆ ಮನಿಸ್ ಹಾಂತುಂ ಮೆತೆರ್ ಜಾತಾತ್ ದೆಕುನ್ ತೆ
ಸರ್ವ್ ಏಕ್ ಮಾಪಾನ್, ಎಕಾಚ್ಚ್ ರಿತಿನ್ ಚಿಂತುಂಕ್
ವಚಾನಾಂತ್, ಬಗಾರ್ ವೆವೆಗ್ಳೆ ರಿತಿನ್ ಚಿಂತುಂಕ್ ವೆತಾತ್.
ಅಶೆಂ ಆಸ್ತಾಂ ಹ್ಯಾ ಮಿಸಾಂವಾಕ್ ಸಭಾರ್ ರಿತಿಚಿ ಖೊಡಿ
ಕಾಡ್ತೆಲಿಂ ಆಸ್ತಿತ್, ಪುಣ್ ಹ್ಯಾ ಸರ್ವಾಂಕ್ ಆಮಿ ಆಮ್ಚಿಂ
ಮನಾಂ ಲ್ಹಾನ್ ಕರುನ್ ಬಸಾನಾಯೆ. ಆನಿ ದೂರ್ದೃಷ್ಟಿ ಆಸ್ಚೆ
ಅಸಲ್ಯಾ ಸಂಗ್ತೆಕ್ ಗುಮಾನ್ ಕರಿನಾಸ್ತಾನಾ ಆಪ್ಲಿಂ ಕಾಮಾಂ
ಕರುನ್ ವೆತಾತ್. ಆಮ್ಚೆ ವಿಚಾರ್ ಸುಡಾಳ್ ಆಸಾತ್, ಕೊಣಾಕ್
ಕೊಂಕ್ಣೆಚೊ ಸಂಘಟಿತ್ ವಾವ್ರ್ ಕರುಂಕ್ ಆಸಾ, ತಸಲ್ಯಾಂಕ್
ಆಮಿಂ ಉಗ್ತ್ಯಾ ಮನಾಚೊ ಸ್ವಾಗತ್ ದಿವ್ಯಾಂ, ವರ್ಸಾಕ್ ಏಕ್
ಸಹಮಿಲನ್ ಆಸಾ ಕರ್ಯಾಂ, ಆಮ್ಚೆ ಕೊಂಕ್ಣಿ ಮಾನೆಸ್ತಾಂಕ್
ಮಾನ್ ಕರ್ಯಾಂ, ಆಮ್ಚ್ಯಾ ಕೊಂಕ್ಣಿ ತಾಲೆಂತಾಂಕ್
ಪ್ರೋತ್ಸಾಹ್ ದಿವ್ಯಾಂ. ಭೋವ್ ಅಪುರ್ಭಾಯೆಚೆಂ ಚಿಂತಪ್
ಹೆಂ. ಕೊಣೆಂಯ್ ಕರುಂಕ್ ನಾ ಮ್ಹಣುನ್ ರಡುನ್ ಬಸ್ಚೆಪ್ರಾಸ್
ಆಮಿ ಕರ್ಯಾಂ.
8. ’ನಶಿಬಾಚೊ ಖೆಳ್’
ಫಿಲ್ಮಾಕ್ ಕಸಲೆಂ ಪ್ರೇರಣ್ ಆನಿ ಸುರ್ವಾತ್ ಜಾಲಿ? ’ನಶಿಬಾಚೊ ಖೆಳ್’
ಪಿಂತುರ್ ಭೋವ್ ಲೊಕಾಮೊಗಾಳ್ ಜಾವ್ನ್ ಆಸಾ, ಹ್ಯೇವಿಶಿಂ
ತುಮ್ಚೆ ವಿಚಾರ್ ಅನಿ ದಿಶ್ಟಾವೊ ಕಳಯ್ಶ್ಯಾತ್?
ಜ: ಅಜೀಕ್ ತೀಸ್-ಪಾಂತೀಸ್ ವರ್ಸಾಧಿಂ ’ಕಾಜಾರಾ
ಉಪ್ರಾಂತ್’ ಮ್ಹಳ್ಳೆಂ ಏಕ್ ವಿಡಿಯೊ ಫಿಲ್ಮ್ ಕಾಡ್ಲ್ಲೆಂ.
ಲೊಕಾಂನಿ ಜಾಯ್ತೊ ಪಾಟಿಂಬೊ ದಿಲ್ಲೊ.
ತೆಚ್ಚ್ಪರಿಂ ಏಕ್ ಕೊಂಕ್ಣಿ ಫಿಲ್ಮ್ ಕಾಡ್ಚಿ ಅಲೋಚನ್
ಮತಿಂತ್ ಆಸ್ಲಿ, ತ್ಯೇ ಖಾತಿರ್ ಜೊಕ್ತಿ ಕಾಣಿ ಸಯ್ತ್
ಮತಿಂತ್ ಆಸ್ಲಿ, ತೆಚ್ಚ್ ವಗ್ತಾಂ ಹೆರ್ ಭಾಸಾಂನಿ ಸಯ್ತ್
ನಿರ್ದೇಶನಾಂತ್ ಅನ್ಭೋಗಿ ನಿರ್ದೇಶಕ್ ಮಾನೆಸ್ತ್ ಹ್ಯಾರಿ
ಸಯ್ತ್ ಲಾಭ್ಲೊ ಆನಿ ಬಜೆಟ್ ಸಯ್ತ್ ಕಶ್ಟಾಂನಿ ತರ್ಯೀ
ತಯಾರ್ ಕರುಂಕ್ ಸಾಧ್ಯ್ ಮ್ಹಣುನ್ ಭಗ್ಲೆಂ ದೆಕುನ್ ಹೆಂ
ಸ್ವಪಾಣ್ ಜ್ಯಾರಿ ಕರುಂಕ್ ಸಾಧ್ಯ್ ಜಾಲೆಂ. ’ನಶಿಬಾಚೊ ಖೆಳ್’
ಫಿಲ್ಮಾಕ್ ಲೊಕಾಂನಿ ಭರ್ಪೂರ್ ಪಾಟಿಂಬೊ ದಿಲಾ, ಆನಿ ಎದೊಳ್ಚ್ಚ್
350 ಧಾಖವ್ಣಿ ಜಾವ್ನ್ ಕಾಂಯ್ 35000 ವಯ್ರ್ ಲೊಕಾಂನಿ ಹೆಂ
ಫಿಲ್ಮ್ ಪಳಯ್ಲಾಂ. ಮ್ಹಾಕಾ ಹ್ಯಾ ಫಿಲ್ಮಾಚೆ 1000 ಧಾಖವ್ಣಿ
ಕರವ್ನ್ ಉಣ್ಯಾರ್ ಉಣೆ 2 ಲಾಖ್ ಲೊಕಾಂನಿ ಪಳೆಶೆಂ ಕರುಂಕ್
ಜಾಯ್ ಮ್ಹಳ್ಳಿ ಆಶಾ ಆಸಾ.
9. ತುಮ್ಚೆ ಕೊಂಕ್ಣಿ
ಸ್ವಪಾಣ್ ಕಸಲೆಂ?
ಜ: ಖಂಡಿತ್ ಜಾವ್ನ್ ಕೊಂಕ್ಣೆಂತ್ ಎಕ್ವಟಿತ್ ವಾವ್ರ್ ಕರ್ಚೊ
ಆನಿ ತಸಲ್ಯಾಂಕ್ ಪಾಟಿಂಬೊ ದಿಂವ್ಚೊ. ಮ್ಹಾಕಾ ಮುಖಾರ್ಯೀ
ಹೆರಾಂಚಿಂ ಕಾಣಿ ಘೆವ್ನ್ ಕೊಂಕ್ಣಿ ಫಿಲ್ಮ್ ಕಾಡುಂಕ್ ಆಸಾ,
ಕೊಂಕ್ಣೆಚ್ಯಾ ಚಡಿತ್ ಆನಿ ಚಡಿತ್ ತಾಲೆಂತಾಕ್ ಉಜ್ವಾಡಾಕ್
ಹಾಡುಂಕ್ ಆಸಾ, ಆನಿ ತ್ಯೇ ಪಾಸತ್ ವಾವ್ರ್ ಕರುಂಕ್ ಆಸಾ.
ಹಿಂ ಸರ್ವ್ ಕಾಮಾಂ ಎಕೆಕ್ಲ್ಯಾನ್ ಕರ್ಚೆ ತಸ್ಲಿಂ ನ್ಹಯ್,
ಸರ್ವಾಂನಿ ಎಕಾಮೆಕಾ ಸಹಕಾರ್ ದೀವ್ನ್ ಕರುಂಕ್ ಜಾಯ್ ತಸ್ಲಿಂ.
ಕೊಂಕ್ಣೆಂತ್ ಭೊವ್ ತಾಲೆಂತ್ವಂತ್ ಲೋಕ್ ಆಸಾ, ಆನಿ
ಎಕ್ವಟಿತ್ ಜಾವ್ನ್ ಆಮಿ ರಾವ್ಲ್ಯಾಂವ್ ತರ್, ಕೊಂಕ್ಣೆಂತ್
ಫುಡಾರಾಕ್ ಅನಿಕ್ಯೀ ಬರೆ ದೀಸ್ ಯೆಂವ್ಚೆ ಆಮಿ
ಪಳೆವ್ಯೆತಾ.
10. ತುಮ್ಕಾಂ ಪಯ್ಣಾರಿ.ಕೊಮ್
ವಾಚ್ಪ್ಯಾಂಕ್ ಸಂಧೇಶ್ ದೀಂವ್ಕ್ ಆಸಾತ್?
ಜ: ಸತ್ ಸಾಂಗ್ಚೆಂ ತರ್ ಮ್ಹಜಿ 40 ವರ್ಸಾಧ್ಲಿ ಹುಮೆದ್
ತುಮಿ ಜಿವಾಳ್ಳಿ, 40 ವರ್ಸಾಧಿಂ ಹಾಂವ್ ’ಪಯ್ಣಾರಿ’ ಚೆರ್
ಹೆಚ್ಚ್ ಉರ್ಭೆಂತ್ ಆಸ್ಲೊಂ, ಆತಾಂ ಪಯ್ಣಾರಿ.ಕೊಮ್ ತುಮಿ
ಅಪುರ್ಭಾಯೆಚ್ ಚಲವ್ನ್ ಆಸಾತ್, ತುಮ್ಚ್ಯಾ ಕಾಮಾಂತ್ ಹಾಂವ್ಯೀ
ವಾಂಟೆಲಿ ಜಾತಲೊಂ, ಆಮಿ ಸರ್ವಾಂ ಸಂಘಟಿತ್ ಜಾವ್ನ್ ಎಕಾ
ಮನಾನ್ ವಾವ್ರ್ ಕರ್ಯಾಂ, ಆಮ್ಕಾಂ ಸರ್ವ್ ಕೊಂಕ್ಣಿ ಸಂಸ್ಥೆ
ಜಾಯ್, ಆಮ್ಚೆಲಾಗಿಂ ವೆಕ್ತಿಭೇಧ್ ಆಸುಂಕ್ ಪುರೊ ಪುಣ್
ಕೊಂಕ್ಣೆಖಾತಿರ್ ಆಮಿ ತೊ ಪಯ್ಸ್ ಕರುನ್ ಎಕಾ ಮನಾನ್
ಕೊಂಕ್ಣಿ ವಾವ್ರ್ ಕರ್ಯಾಂ ತಶೆಂಚ್ ಹೆರಾಂಕ್ ಏಕ್ ಮೇಲ್ಫಂಕ್ತ್
ಜಾವ್ಯಾ. |