ಕಾರ್ಭಾರಿ 1. ವಿ.ಪಿ.ಲೋಬೊ [ಸಂದರ್ಶಕ್: ಪ್ರಸನ್ನ ನಿಡ್ಡೋಡಿ]

ಮಂಗ್ಳುರ್ ದಿಯೆಸಿಜಿಂತ್ಲ್ಯಾ ನಿರ್ಖಾಣ್ ಫಿರ್ಗಜೆಂತ್ಲ್ಯಾ ಎಕಾ ದುಬ್ಳ್ಯಾ ಕುಟ್ಮಾಂತ್ ಜಲ್ಮೊನ್, ಹೈಸ್ಕೂಲ್ ಮ್ಹಣಾಸರ್ ಶಿಕಾಪ್ ಸಂಪವ್ನ್ ದೀಸ್ಪಡ್ತೊ ಗ್ರಾಸ್ ಜೊಡುಂಕ್ ಮುಂಬಯಾಂತ್ ಆಯಿಲ್ಲ್ಯಾ ಹಾಣೆಂ ಟೇಕ್ಸಿ/ಗಾಡಿಯೊ ನಿತಳ್ ಕರ್ಚೆಂ, ಲೌಂಡ್ರಿಂತ್ ವಸ್ತ್ರಾಂಕ್ ಇಸ್ತ್ರಿ ಕರ್ಚೆಂ ಕಾಮ್ ಕರುನ್, ಅಪ್ಲ್ಯಾ ಜಿಣ್ಯೆಚೊ ಶೆವೊಟ್ ಮತಿಂತ್ ಧರುನ್, ಆಜ್ ಅಪ್ಲೆಂಚ್ ಮ್ಹಳ್ಳೆಂ ಸ್ವತಾಚೆಂ ರಿಯಲ್ ಎಸ್ಟೇಟಾಚೆಂ ಉಧ್ಯಮ್ ಆಸಾ ಕರುನ್ ಕೊಂಕ್ಣಿ ಯುವಜಣಾಂಕ್ ವರ್ತೆಂ ಪ್ರೇರಣ್ ಜಾವ್ನಾಸಾ. ಮನ್ಶಾಚಿ ವ್ಹಳೊಕ್ ತಾಣೆಂ ಕರ್ಚ್ಯಾ ಕಾಮಾಚೆರ್, ತಾಣೆಂ ಭಂವ್ಚ್ಯಾ ಗಾಡಿಯೆಚೆರ್ ವ ತಾಣೆಂ ರಾಂವ್ಚ್ಯಾ ಬಂಗ್ಲ್ಯಾಚೆರ್ ನ್ಹಯ್ ಬಗಾರ್ ತಾಚ್ಯಾ ಮತಿಂತ್ಲ್ಯಾ ಚಿಂತ್ನಾಂಚೆರ್, ತಾಣೆ ಆಧಾರ್ಚ್ಯಾ ಕರ್ನೆಂಚೆರ್ ಆಸುಂಕ್ ಜಾಯ್.

ಇಂಗ್ಲಿಶಾಂತ್ ಏಕ್ ಸಾಂಗ್ಣಿ ಅಸಾ ’Simplicity is the sign of greatness’, ಜೊ ಖರೆಪಣಿಂ ವರ್ತೊ ಜಾವ್ನಾಸ್ತಾ ತೊ ಅಪ್ಲೆಂ ಸಾದೆಂ/ಖಾಲ್ತೆಂಪಣ್ ಹೆರಾಂಕ್ ಧಾಖಯ್ತಾ. ಜೊ ಅಪ್ಲಿ ಪೊಕೊಳ್ ದವ್ಲತ್ ಹೆರಾಂಕ್ ಧಾಖಯ್ತಾ ತೊ ಖಂಡಿತ್ ಪೊಕೊಳ್ ಸಂಯ್ಬಾಚೊ, ಜಾಂವ್ ತೊ ಕೊಣ್‍ಯೀ. ಹರ್ಯೆಕ್ ಮನಿಸ್ ವ್ಯತಿರಿಕ್ತ್ ರಿತಿನ್ ಜಿಯೆತಾ; ಕಂಜೂಸ್ ಮನಿಸ್ ಅಪುಣ್ ವರ್ತೊ ದಾನ್ ದಿತೆಲ್ಯಾಪರಿಂ ಪರ್ಗಟ್ ರಿತಿನ್ ಧಾಖಂವ್ಕ್ ಪೆಚಾಡ್ತಾ. ಧರ್ಮಾಂದ್ಳೊ ಅಪುಣ್ ಮಹಾನ್ ಧರ್ಮಾಚೊ ಭಕ್ತ್ ಮ್ಹಣುನ್ ಪರ್ಗಟ್ ರಿತಿನ್ ಧಾಖಂವ್ಕ್ ಪೆಚಾಡ್ತಾ.

ಮುಂಬಯ್ ತಸ್ಲ್ಯಾ ಶೆರಾಕ್ ಜರ್ ಕೊಣ್‌ಯೀ ಅಪ್ಲೆಂ ಖರೆಂ ಸ್ವಪಣ್ ಘೆವ್ನ್ ಆಯ್ಲಾ ಆನಿ ತ್ಯೇ ಪಾಸತ್ ಜೊಕ್ತಿ ಮಿನತ್ ಕೆಲ್ಯಾ, ತರ್ ಮುಂಬಯ್ ಶೆರಾನ್ ಕೊಣಾಕ್‌ಚ್ಚ್ ನಿರಾಸ್ ಕರುಂಕ್ ನಾ ಮ್ಹಣ್ಚ್ಯಾಕ್ ಹೊ ಏಕ್ ಧಾಖ್ಲೊ ಮ್ಹಣ್ಯೆತಾ. ಪುಣ್ ಶೆವೊಟಾಚೆಂ ತೆಂ ಪಯ್ಣ್ ಸಲೀಸ್ ನ್ಹಯ್, ಹಾಂಗಾಸರ್ ಹರ್ಯೆಕಾ ದಿಸಾ, ’ಭುಕ್’, ’ಕಶ್ಟ್’, ’ಎಕ್ಸುರ್‌ಪಣ್’ ಭಗುಂಕ್ ಪಡ್ತಾ. ಜೊ ಹೆಂ ಸರ್ವ್ ಭಗುನ್ ಜಿಣ್ಯೆಚಿ ಫುಡ್ ಕರುನ್ ಉರ್ತಾ ತೊ ಜಿಕ್ತಾ ನಾ ತರ್ ಮುಂಬಯ್ ಸೊಡುನ್ ವೆತಾ. ಹಿ ಕಾಣಿ ನ್ಹಯ್, ಕಲ್ಪನಾಂ ನ್ಹಯ್ ಬಗಾರ್ ಹಕೀಗತ್. ತೆಚ್ಚ್ ಪಾಸೊನ್ ಮುಂಬಯಾಕ್ ’ಮಾಯಾನಗ್ರಿ’ ಮ್ಹಣ್ತಾತ್.

1. ಕೊಂಕ್ಣಿ ಸಮಾಜೆಂತ್ ತುಮಿ ಪಾಟ್ಲ್ಯಾ ಥೊಡ್ಯಾ ವರ್ಸಾಂನಿ ಪರ್ಜಳುನ್ ಆಸಾತ್, ತುಮ್ಚಿ ಜಿಣಿ ಕಾಂಯ್ ಆಯ್ಚ್ಯಾ ಯುವಜಣಾಂಕ್ ದೆಖಿಬರಿತ್ ಜಾಂವ್ಚ್ಯಾಕ್ ತುಮಿ ಕಾಡ್‌ಲ್ಲ್ಯಾ ವಾಂವ್ಟಿಚೊ ಮಟ್ವ್ಯಾನ್ ವಿವರ್ ದಿಶ್ಯಾತ್?

ಜ: ಹಾಂವ್ ಮುಂಬಯಾಕ್ ಆಯಿಲ್ಲೊಂ ದೀಸ್ಪಡ್ತೊ ಗ್ರಾಸ್ ಸೊಧುನ್, ಮತಿಂತ್ ಜಾಯ್ತಿಂ ಸ್ವಪ್ಣಾಂ ಘೆವುನ್, ಸುರ್ವಿಲ್ಯಾ ದಿಸಾಂನಿ ಜಶೆಂ ಚಡ್ತಾವ್ ಮಂಗ್ಳುರ್‌ಗಾರ್ ಮುಂಬಯಾಕ್ ಯೇವ್ನ್ ಕುಡಾಂನಿ ವಸ್ತಿ ಕರುನ್, ಹೊಟೆಲಾಂನಿ ಕಾಮಾಂ ಕರುನ್, ಶಿಕಪ್ ಮುಖಾರುನ್ ಉಂಚ್ಲ್ಯಾ ಹುದ್ದ್ಯಾಕ್ ಪಾವ್ಲೆ, ತೆಚ್ಚ್‌ಪರಿಂ ಮ್ಹಾಕಾಯ್ ಮ್ಹಜ್ಯಾ ಆವಯ್-ಬಾಪಾಯ್ಚೆಂ ಬೆಸಾಂವ್ ಸೊಡ್ಲ್ಯಾರ್ ಹೆರ್ ಕಿತೆಂಚ್ ನಾತ್ಲೆಂ, ಪುಣ್ ಕಠೀಣ್ ಪರಿಶ್ರಮ್ ಕರುಂಕ್ ಆಸ್ಲೆಂ, ಜಿಣ್ಯೆಶೆವೊಟ್ ಜೊಡುಂಕ್ ಹಿ ಎಕಾ ರಿತಿಚಿ ಪರಿಕ್ಷಾ, ದೆಕುನ್ ಹಾಂವ್ ಎಕೆಕಾ ಪರಿಕ್ಶೆಂತ್ ಪಾಸ್ ಜಾವ್ನ್ ಮುಖಾರ್ ಚಲ್ಲೊಂ;

ಏಕ್ ಟೆಕ್ಸಿ ಧುಂವ್ಚೊ ಮಾಮೂಲಿ ಯುವಕ್ ಜಾವ್ನ್, ಲೌಂಡ್ರಿಂತ್ ಇಸ್ತ್ರಿ ಕರ್ಚೆಂ ಕಮ್ ಕರ್ಚೊ ಯುವಕ್ ಜಾವ್ನ್, ಆಫಿಸ್ ಬೋಯ್ ಜಾವ್ನ್, ಉಪ್ರಾಂತ್ ಮುಂಬಯಾಂತ್ಲ್ಯಾ ಫಾಮಾದ್ ’ಎವರ್‌ಶೈನ್ ಡೆವಲಪರ್ಸ್’ ಚೊ ಸಿ.ಇ.ಒ. (CEO) ಜಾವ್ನ್ ವಾವ್ರ್ ಕೆಲಾ, ಆನಿ ಪ್ರಾಮಾಣಿಕ್ ರಿತಿನ್ ಹಾಂವೆಂ ತೊ ವಾವ್ರ್ ಕೆಲಾ. ಪುಣ್ ಮ್ಹಜಿಂ ಸ್ವಪ್ಣಾಂ ಮಾತ್ ಜಿವಾಳ್ ದವರ್ಲಿಂ ಆನಿ ತ್ಯೇ ಪಾಸತ್ ಕಠೀಣ್ ಮಿನತ್ ಕರುನ್ ಆಜ್ ಹ್ಯೇ ಪಾಂವ್ಡಾಕ್ ಪಾವ್ಲೊಂ ಪಳೆತಾನಾ ಸಂತೊಸ್ ಭಗ್ತಾ.

2. ತುಮಿ ಕೊಂಕ್ಣಿ ಭಾಸೆಚೆ ವಿಶೇಸ್ ಮೊಗಿ?

ಜ: ಖಂಡಿತ್ ಜಾವ್ನ್ ಕೊಂಕ್ಣಿ ಮೊಗಿ ಪುಣ್ ಝುಜಾರಿ ನ್ಹಯ್, ಹಾಂವ್ ಸಾತ್ ಭಾಸೊ ಸಲೀಸಾಯೆನ್ ಉಲಯ್ತಾಂ, ಮ್ಹಜ್ಯಾ ಘರಾಂತ್ ಮ್ಹಜೆಂ ಕುಟಾಮ್ ಕೊಂಕ್ಣಿ ಜಾಣಾ. ಪುಣ್ ಕೊಂಕ್ಣಿ ಖಾಂವ್ಚೆಂ, ಕೊಂಕ್ಣಿ ಪಿಯೆಂವ್ಚೆಂ, ಕೊಂಕ್ಣಿ ಸೊಡ್ನ್ ಹೆರ್ ಕಿತೆಂಚ್ ನಾ ಮ್ಹಳ್ಳಿಂ ಮೂರ್ಖ್ ಚಿಂತ್ನಾಂ ಮ್ಹಜಿಂ ನ್ಹಯ್. ಕೊಂಕ್ಣಿ ಏಕ್ ಲ್ಹಾನ್ ಸಮುದಾಯ್, ಜರ್ ಆಮಿ, ಆಮ್ಚ್ಯಾ ಭುರ್ಗ್ಯಾಂನಿ ಹ್ಯಾ ಸಂಸಾರಾಂತ್ ಬರೊ ಫುಡಾರ್ ಜೊಡುಂಕ್ ಮುಖಾರ್ ಪಾವೊಂಕ್ ಜಾಯ್ ತರ್, ಕೊಂಕ್ಣಿ ಮಾತ್ರ್ ಪಾವಾನಾ, ದೆಕುನ್ ಹೆರ್ ಭಾಸಾಂಚಿ ಜಾಣ್ವಾಯ್ ತಾಂಕಾಂ ಗರ್ಜೆಚಿ. ದೆಕುನ್ ಕೊಂಕ್ಣಿ ಭಾಸೆಖತಿರ್ ಝುಜೊಂಕ್ ಮ್ಹಾಕಾ ನಾಕಾ, ಪುಣ್ ಕೊಂಕ್ಣಿ ಭಾಸೆಚೆರ್ ಅಭಿಮನ್ ಭರ್ಪೂರ್ ಅಸಾ, ಅಸ್ತಲೊಚ್ಚ್.

3. ಆಮ್ಚ್ಯಾ ಕೊಂಕ್ಣಿ ಸಮಾಜೆವಿಶಿಂ ತುಮ್ಚೆ ವಿಚಾರ್?

ಜ: ಆಮ್ಚೊ ಲೋಕ್ ಆಳ್ಸಿ, ಚಿಂತ್ಪಾಂತ್ ತಶೆಂಚ್ ಕರ್ನೆನ್ ಬೇಜವಭ್ದಾರ್, ಅಜೀಕ್ ಶೆಂಭೊರ್ ವರ್ಸಾಧಿಂ ಕಸೊ ಆಸ್ಲೊಗೀ ತಸೊಚ್ಚ್ ಆಸಾ, ಜಾಂವ್ಕ್ ಪುರೊ ನ್ಹೆಸ್ಪಾಂತ್, ಚಾಲಿಂತ್, ಬೊಲಿಂತ್ ಬದ್ಲಾವಣ್ ಜಾಲ್ಯಾ. ಪುಣ್ ಚಿಂತ್ಪಾಂತ್ ಜಾಂವ್ಕ್ ನಾ. ಅಜೂನ್ ಆಮ್ಚೊ ಲೋಕ್ ಇಲ್ಲೆ ಕಶ್ಟ್ ಆಯ್ಲ್ಯಾರ್ ಇಗರ್ಜೆಕ್ ಧಾಂವ್ತಾ, ಸಾಂತಾಂ-ಭಕ್ತಾಂಚೊ ಆಧಾರ್ ಘೆತಾ. ಅನಿಕ್‌ಯೀ ಇಲ್ಲೆ ಕಶ್ಟ್ ಆಯ್ಲ್ಯಾರ್ ಪೊಳ್ಕುರೊ ಜಾವ್ನ್ ಧಾಂವ್ತಾ. ಅಜೂನ್ ಅಮ್ಚೊ ಮಂಗ್ಳುರಿ ಕೊಂಕ್ಣಿ ಲೋಕ್ A, B, C, D ಮುಳಾಚೊ, ಪಾಳಾಚೊ ಆನಿ ಸಂಯ್ಬಾಚೊ. ದೆಕುನ್ ಜಾಂವ್ ದೊತೊರ್, ಇಜ್ನೆರ್ ವ ಕುಜ್ನೆರ್, ವಕೀಲ್ ವ ಆಫಿಸರ್ - ಪುಣ್ ಮುಳಾವಿಂ ಚಿಂತ್ನಾಂ, ಮುಳಾವೆ ವಿಚಾರ್ ಭಿಲ್ಕುಲ್ ತೆಚ್ಚ್.

4. A, B, C, D ಮ್ಹಳ್ಯಾರ್?

ಜ: A ಮ್ಹಳ್ಯಾರ್ ಅಯಾ
B ಮ್ಹಳ್ಯಾರ್ ಬೊಟ್ಲೆರ್
C ಮ್ಹಳ್ಯಾರ್ ಕುಕ್ (ಕುಜ್ನೆರ್)
D ಮ್ಹಳ್ಯಾರ್ ಡ್ರಾಯ್ವರ್

ಆಮ್ಚಿ ಕೊಂಕ್ಣಿ ಪುರ್ವಜಾಂನಿ ಸುರ್ವಾತ್ ಕೆಲ್ಲೆಪರಿಂ; ಘರ್‌ದಾರ್, ಮಾಯ್‌ಗಾಂವ್ ಸೊಡ್ನ್ ಕಾಪ್ಯೆ ತೊಟಾಂನಿ ಕಾಮ್ ಕರುಂಕ್ ಲಾಗ್ಲೆಂ, ಉಪ್ರಾಂತ್ ಬೊಂಬೊಯಾಂತ್ ಮಾಗಿರ್ ಗಲ್ಫಾಂನಿ ಆನಿ ಅತಾಂ ಇಸ್ರೇಲಾಂತ್ ಕಾಮ್ ಕೆಲೆಂ. ತವಳ್ ಶಿಕಪ್ ಉಣೆಂ ಆಸ್ಲೆಂ, ಸಮ್ಜಣಿ ಉಣಿ ಅಸ್ಲಿ, ಲೋಕ್ ಲ್ಹಾನ್ ಸಮುದಾಯಾಚೊ, ದೆಕುನ್ ಲ್ಹಾಲ್ಹಾನ್ ಚಿಂತ್ನಾಂಚ್ ಚಿಂತಾಲೊ, ಎಕಾಮೆಕಾಚಿಂ ನಕ್ಲಾಂ ಕರ್ಚಿಂ, ಎಕಾಮೆಕಾಚೆ ಪಾಂಯ್ ವೊಡ್ಚೆ, ಪಾಟ್ಲ್ಯಾನ್ ಖೆಳ್ಕುಳಾಂ ಕರುನ್ ಹೆರಾಂಚೆರ್ ಹಾಸ್ಚೆಂ. ಎಕಾಮೆಕಾಚ್ಯೊ ಖಬ್ರೊ ಕರ್ಚ್ಯೊ, ಅಪುಣ್ ಉಂಚ್ಲೊ ಮ್ಹಣ್ ಧಾಖಂವ್ಚ್ಯಾಂಕ್ ಹೆರಾಂಚೊ ಮಾನ್ ಕಾಡ್ಚೊ.

ಚಡ್ತಾವ್ ಹಿಂ ಚಿಂತ್ನಾಂ A, B, C, D ಚಿಂತ್ಪಾಚಿಂ ನ್ಹಯ್? ಇತ್ಲೆಂಚ್ ನ್ಹಯ್, ಅಪ್ಲ್ಯಾ ಭುರ್ಗ್ಯಾಂಕ್ ಬರೆಂ ಶಿಕಪ್, ಬರಿ ವಿಧ್ಯಾ ದಿಂವ್ಚೆಪ್ರಾಸ್, ತೆಚ್ಚ್ A, B, C, D ಚಿಂತ್ಪಾಕ್ ಲೊಟ್ಚೆಂ, ಅಪ್ಣಾನ್ ಅಂಬಾಸಿಡರ್ ಕಾರ್ ಸೊಡ್ಲಾಂ, ದೆಕುನ್ ಅಪ್ಲ್ಯಾ ಪುತಾನ್ ಬಿ.ಎಮ್.ಡಬ್ಲ್ಯೂ ಕಾರಾಚೊ ಡ್ರಾಯ್ವರ್ ಜಾಯ್ಜಯ್, ಅಪ್ಣಾನ್ ಪಾರ್ಶ್ಯಾಂಗೆರ್ ಕಾಮ್ ಕೆಲಾಂ ದೆಕುನ್ ಅಪ್ಲ್ಯಾ ಭುರ್ಗ್ಯಾಂನಿ ಅಮೆರಿಕಾ/ಯುರೋಪಿಯನಾಂಗೆರ್ ಕಾಮ್ ಕರುಂಕ್ ಜಾಯ್ ಮ್ಹಳ್ಳಿಂಚ್ ಚಿಂತ್ನಾಂ. ಸಮಾಜೆಂತ್ ಮಾನ್-ಸಮ್ಮಾನ್ ಪ್ರತಿಶ್ಟಾ ಆಸ್ಚೆ ಗಾಡಿಯೆರ್ ಭಂವ್ತಾತ್, ಬಂಗ್ಲ್ಯಾಂನಿ ರಾವ್ತಾತ್ ಮ್ಹಣುನ್, ತೊ ಪ್ರತಿಶ್ಟಾ ಜೊಡುಂಕ್ ಕಸಲ್ಯಾ ಚಿಂತ್ಪಾಚೊ ಮ್ಹಣ್ ಸಮ್ಜುಂಕ್ ಕೊಣಕ್‍ಯೀ ನಾಕಾ, ಬಗಾರ್ ಅಪ್ಣಾಕ್‌ಯೀ ಗಾಡಿ ಬಂಗ್ಲೆ ಜಾಯ್ ದೆಕುನ್ ಶಿಕಾಪ್ ಕೊಣಾಕ್‌ಯೀ ನಕಾ, ಆಜ್ ಆಮ್ಚ್ಯಾ ಸಮಾಜೆಂತ್ ಕಿತ್ಲೆ ಶಿಕ್ಪಿ ಆಸಾತ್? ಕಿತ್ಲೆ IAS/IPS ಆಸಾತ್? ಕಿತ್ಯಾಕ್ ಎಕ್ಲೆ-ದೋಗ್ ಮಾತ್? ಹ್ಯಾ ಸಂಗ್ತೆಂಚೆರ್ ವರ್ಸಾಕ್ ಏಕ್ ಪಾವ್ಟಿಂ ಪುಲ್ಪುತ್ರಾರ್ ಚಡುನ್ ಶೆರ್ಮಾಂವ್ ದಿತಚ್ಚ್ ಪಾವ್ತಾ?

ದೆಕುನ್ ಆಮ್ಚೆ ಚಡ್ತಾವ್ ಯುವಜಣ್ ಚಡಿತ್ ಶಿಕಾಪ್ ಜೊಡುಂಕ್ ತ್ರಾಸ್ ಘೆನಾಂತ್, ಫಕತ್ತ್ ವೆಗ್ಗಿಂ ದುಡು ಕಮಾಂವ್ಚ್ಯಾ ಧಾಂವ್ಣೆಂತ್ ಆಸಾತ್, ದೆಕುನ್ ನೈತಿಕ್ ಮೌಲ್ಯಾಂ, ಮಾಯಾಮೊಗ್ ಮಾಯಾಗ್ ಜಾವ್ನ್ ಯೆತಾ. ಉಪ್ರಾಂತ್ ಗಲ್ಫಾಂತ್ ಅನಿ ಆತಾಂ ಇಸ್ರೇಲಾಂತ್ ಕಾಮ್ ಕರ್ತಾತ್. ಕಾಮ್ ಕರ್ಚೆಂ ಬರೆಂಚ್, ಚೂಕ್ ನ್ಹಯ್, ಪುಣ್ ಆಮ್ಚೊ ಶೆವೊಟ್ ಫಕತ್ತ್ ಗಾಡಿ/ಬಂಗ್ಲ್ಯಾಚೆರ್ ಅಸಾನಾಸ್ತಾಂ ಆಮ್ಚ್ಯಾ ಚಿಂತ್ಪಾಚೆರ್, ಆಮ್ಚ್ಯಾ ವಿಚಾರಾಂಚೆರ್ ಆಸ್ಲೆಂ ತರ್ ಆಜ್ ಆಮ್ಚಿ ಸಮಾಜ್ ಕಿತ್ತುನ್ ಪಾವ್ತಿ?

ದೆಕುನ್ ಆಮ್ಚೆ ಮಧೆಂ ವಕೀಲ್ ಆಸುಂ, ದೊತೊರ್ ಆಸುಂ, ಆಫಿಸರ್ ಅಸುಂ - ಸರ್ವ್ ಹೆಚ್ಚ್ A, B, C, D ಚಿಂತ್ಪಾಚೆ, ಸಗ್ಳೆ ಹೆಚ್ಚ್ ಚಿಂತ್ಪಾಚೆಚ್ಚ್, ಎಕಾಮೆಕಾಚಿಂ ನಕ್ಲಾಂ ಕಾಡ್ಚೆಂ ಎಕಾಮೆಕಾಚಿಂ ಖೆಳ್ಕುಳಾಂ ಕರ್ಚೆ ನಾಲಿಸ್ ಚಿಂತ್ಪಾಚೆ. ಚಿಂತ್ಪಾಚಿ ಬಂಧಡ್ ಆಸ್ಚೆ, ದೆಕುನ್ ಚಡಿತ್ ಚಿಂತುಂಕ್ ವಚಾನಾಂತ್. ಎಕಾ ನಿರ್ದಿಶ್ಟ್ ಚೌಕಟ್ಟಾಂತ್ (ಬಾಂಯ್ತ್) ಉರೊನ್, ಅಪ್ಲಿ ಬಾಂಯ್‌ಚ್ಚ್ ದರ್ಯೊ ಮ್ಹಣ್ತಾತ್ ಆನಿ ಬಾಸ್ತಾತ್.

5. ಫಿರ್ಗಜ್ ಪಾದ್ರಿ ಚಡ್ತಾವ್ ಗೆಲ್ಲೆ ಗೆಲ್ಲೆ ಫಿರ್ಗಜೆಂನಿ ಭಾಂದ್ಪಾಂ ಭಾಂದುನ್ ತಾಂಚಿಂ ನಾಂವಾಂ ಅಮರ್ ಕರುಂಕ್ ಪೆಚಾದ್ತಾತ್, ಹ್ಯೇವಿಶಿಂ ತುಮ್ಚೆ ವಿಚಾರ್ ಕಸಲೆ?

ಜ: ಹಾಂವ್ ಜೆದ್ನಾಂಯ್ ಮ್ಹಾಕಾ ಸೊಧುನ್ ಯೆಂವ್ಚ್ಯಾ ವೆವೆಗ್ಳ್ಯಾ ಫಿರ್ಗಜೆಚ್ಯಾ ಪಾದ್ರಿಂಕ್ ಸವಾಲ್ ಕರ್ತಾಂ; ತುಮ್ಚ್ಯಾ ಫಿರ್ಗಜೆಂನಿ ಕಿತ್ಲೆ ಬೆಕಾರಿ ಯುವಜಣ್ ಆಸಾತ್? ಕಿತ್ಲೆ ಗರೀಬ್ ಜಿಯೆತಾತ್? ಕಿತ್ಲೆಶ್ಯಾ ಚೆಡ್ವಾಂಕ್ ಕಜರ್ ಕರುಂಕ್ ದುಡು ನಾಸ್ತಾನ ಆಸಾತ್? ಕಿತ್ಲೆಶ್ಯಾ ಪ್ರಾಯೆಸ್ತಾಂಕ್ ಗತ್-ಆಧಾರ್ ನಾಸ್ತಾನಾ ಕಶ್ಟಾಂತ್ ಆಸಾತ್? ಆನಿ ಭೋವ್ ಥೊಡ್ಯಾಂನಿ ಮಾತ್ ಹ್ಯಾ ಸವಾಲಾಂಕ್ ಜವಾಬ್ ದಿಂವ್ಚೆಂ ಪ್ರೇತನ್ ಕೆಲಾಂ. ಭಾಂದ್ಪಾಂ ಭಾಂದ್ಚ್ಯಾಕೀ ಪಯ್ಲೆಂ ಫಿರ್ಗಜ್ ಕುಟ್ಮಾಂ ಭಾಂದುಂಕ್ ಆಧಾರ್ ದೀಂವ್ದಿ. ಹಿ ಜವಾಭ್ದಾರಿ ಪಾದ್ರಿಂಚಿ ಮ್ಹಣುಂಕ್ ಹಾಂವ್ ಧಯ್ರ್ ಘೆತಾಂ, ತೊ ಫಕತ್ತ್ ಧಾರ್ಮಿಕ್ ಮುಖೆಲಿ ಮಾತ್ರ್ ನ್ಹಯ್, ಬಗಾರ್ ಸಮಾಜೆಚೊ ಮುಖೆಲಿ ಜಾಂವ್ಕ್ ಜಾಯ್. ತವಳ್ ಮಾತ್ರ್ ಆಮ್ಚಿ ಸಮಾಜ್ ಉನ್ನತೆಕ್ ಪಾವುಂಕ್ ಸಾಧ್ಯ್.

6. ಕೊಂಕ್ಣಿ ಕಾರ್ಯಾಂನಿ ಮಾನಾಚಿ ಬಸ್ಕಾ ಘೆಂವ್ಕ್, ಕೊಂಕ್ಣಿ ಸಂಸ್ಥ್ಯಾಂಕ್ ದುಡು ದೀವ್ನ್ ಹುದ್ದೆ ಘೆಂವ್ಕ್, ಆನಿ ಕೊಂಕ್ಣಿ ಪತ್ರಾಂನಿ ಮುಖೆಲ್ ಸಯ್ರೊ ಮ್ಹಣುನ್ ತಸ್ವೀರೊ ಛಾಪ್ಚ್ಯಾ ಧಾಂವ್ಣೆಂತ್ ತುಮಿ ದಿಸಾನಾಂತ್ ಕಿತ್ಯಾಕ್? ಕೊಂಕ್ಣೆಂತ್, ಪ್ರತ್ಯೇಕ್ ಜಾವ್ನ್ ಮುಂಬಯಾಂತ್ ’ಕೊಂಕ್ಣಿ’ ನಾಂವಾಖಾಲ್ ಜಾಂವ್ಚ್ಯಾ ಡೊಂಬರಾಟಂತ್ ತುಮ್ಕಾಂ ಆಸಕ್ತ್ ನಾ?

ಜ: ಸತ್ ಸಾಂಗ್ಚೆಂ ತರ್, ಮ್ಹಾಕಾ ಮ್ಹಜ್ಯಾ ಘರಾಂನಿ ಅಸಲ್ಯಾ ಮಾನ್-ಸಮ್ಮಾನಾಚ್ಯೊ ತಸ್ವೀರೊ ದವರ್ಚೊ ಹೊರ್ಭೊಸ್ ನಾ. ತಿ ಪಿಸಾಯ್ ಸಯ್ತ್ ನಾ. ದೆಕುನ್ ಹಾಂವ್ ಚಡ್ತಾವ್ ಕೊಂಕ್ಣಿ ವೆದಿಚ್ಯಾ ಕಾರ್ಯಾಂನಿ ಆಸಾನಾ, ಪುಣ್ ವೃತ್ತಿ-ತರ್ಭೆತಿಚೆಂ ಕಾಮಾಸಾಳ್ ಹಾಂವ್ ಚಲವ್ನ್ ಆಯ್ಲಾಂ, ಆನಿ ಮ್ಹಜೊ ಇರಾದೊಯ್ ಹೊಚ್ಚ್, ಚಡಿತ್ ಆನಿ ಚಡಿತ್ ಆಮ್ಚ್ಯಾ ಭುರ್ಗ್ಯಾಂನಿ ಮುಖಾರ್ ಯೇಂವ್ಕ್ ಜಾಯ್, ಉಂಚ್ಲೆಂ ಶಿಕಪ್ ಜೊಡುಂಕ್ ಜಾಯ್. ಹಾಂವ್ ಕಾಂಯ್ 133 ಭುರ್ಗ್ಯಾಂಚ್ಯಾ ಶಿಕ್ಪಾಕ್ ಪ್ರಾಯೋಜನ್ ಕರುನ್ ಆಸಾಂ, ಮ್ಹಜೆಂ ಸ್ವಪಾಣ್ ಹಿಂ ಭುರ್ಗಿಂ ಹಜಾರ್ ಜಾಯ್ಜಯ್ ಮ್ಹಳ್ಳೆಂ.

ಏಕ್ ಬಿಜ್ನೆಸ್‌ಮೇನ್ ದೆಕುನ್ ಪ್ರಚಾರ್ ಮ್ಹಾಕಾ ಖಾಯ್ಸ್ ಆಸಾ ಪುಣ್ ತ್ಯೇ ಪ್ರಚಾರಾ ಖಾತಿರ್ ಹಾಂವ್ ಮನ್ಶಾಂಕ್ ಮೊಲಾಕ್ ಘೆಂವ್ಕ್ ವಚಾನಾ, ಮಾನ್-ಸಮ್ಮಾನ್-ಹುದ್ದೆ ಘೆಂವ್ಚೊ ಹೊರ್ಭೊಸ್ ಮ್ಹಾಕಾ ನಾ. ಪುಣ್ ಏಕ್ ಸಂಗತ್ ಮಹತ್ವಾಚಿ - ಅಶೆಂ ನಾಂವ್/ಮಾನ್/ಹುದ್ದ್ಯಾಚೆ ಹೊರ್ಭೊಸಾಂತ್ ಮುಂಬಯಾಂತ್ ಜಾಯ್ತೆ ಆವ್ಕಾಸ್‌ವಾದಿ ಜಾವ್ನ್ ರಾಕುನ್ ಆಸಾತ್, ಆನಿ ಎಕಾಮೆಕಾ ಪಂಗಡ್ ಭಾಂದುನ್ ಪಯ್ಲಿಚ್ಚ್ ತುಟ್‌ಲ್ಲ್ಯಾ ಸಮಾಜೆಕ್ ಪರತ್ ಪರತ್ ಮೊಡ್ತಾತ್, ದೆಕುನ್ ಕೊಂಕ್ಣಿ ಲೋಕ್ ಪಯ್ಸ್ ವೆತೆ ಆಸಾ, ಅಸಲ್ಯಾಂಕ್ ಲಾಗಿಂ ಹಾಡುಂಕ್ ಪ್ರೇತನ್ ಕರಿಜಾಯ್ ಆಸ್ಲೆ ಹೆ ಸಂಸ್ಥ್ಯಾಚೆ ಹುದ್ದೇದಾರ್ ಎಕಾಮೆಕಾ ವೀಕ್ ವಾಂಟ್ತಾತ್ ಆನಿ ಲೊಕಾಂನಿ ಕೊಂಕ್ಣೆಚೊ ಕಾಂಠಾಳೊ ಕರ್ಶೆಂ ಕರ್ತಾತ್. ಪುಣ್ ಥೊಡೆ ಪ್ರಾಮಾಣಿಕ್ ಕೊಂಕ್ಣಿ ವಾವ್ರ್ ಕರುನ್ ಆಸಾತ್, ಎಕ್ಲ್ಯಾ ದೊಗಾಂಚೊ ಉಲ್ಲೇಕ್ ಕರ್ಚೊ ತರ್; ಜೆರಿಮೆರಿಚೊ ಲೀಯೊ ಫೆರ್ನಾಂಡಿಸ್ ತಾಂತುಂ ಎಕ್ಲೊ, ಜಾಯ್ತೊ ಕೊಂಕ್ಣಿ ವಾವ್ರ್ ತೊ ಕರುನ್ ಆಸಾ, ಪುಣ್ ತೊಚ್ಚ್ ವಾವ್ರ್ ಜರ್ ಸಂಸ್ಥೆ/ಸಂಘಟನಾಂನಿ ಕೆಲ್ಲೊ ತರ್ ಆಮ್ಚ್ಯಾ ಸಮಾಜೆಕ್ ಜಾಯ್ತೊ ಫರಕ್ ಪಡ್ತೊ ಮ್ಹಣ್ ಮ್ಹಾಕಾ ಭಗ್ತಾ.

7. ಆಮ್ಚೆ ಕೊಂಕ್ಣಿ ಕಲಾಕಾರ್, ಲೇಖಕ್, ಪತ್ರಿಕೋಧ್ಯಮಿ, ಸಂಪಾದಕ್, ರಂಗ್‌ಮಂಚ್ ಕಲಾಕಾರ್, ನಾಟಕಿಸ್ತ್ ಚಡುಣೆ ಸರ್ವ್ ಕಿತ್ಲೆ ಮುಖಾರ್ ಪಾವ್ಲ್ಯಾತ್ ಮ್ಹಣ್ತಾತ್ ತುಮಿ?

ಜ: ಭೊವ್ ಸಂಪಿ ಜವಾಬ್ - A, B, C, D ಚಿಂತ್ಪಾಚೆ ಹೆ. ಆತಾಂ ಹೆ ಕಾಂಯ್ A, B, C, D ಕಾಮ್ ಕರಿನಾಂತ್ ಜಾವ್ಯೆತಾ ಪುಣ್ ಹಾಂಚಿಂ ಮುಳಾಂ/ಪಾಳಾಂ, ಹಾಂಚಿಂ ವ್ಹಡಿಲಾಂ, ಸಯ್ರಿಂ, ಸಂಭಂಧಿಕಾಂ ಭಿಲ್ಕುಲ್ A, B, C, D ವರ್ಗಾಂತ್ಲಿಂ. ಹಾಂಕಾಂ ಖೊಡಿ ಕಾಡ್ಚ್ಯೊ, ಹೆರಾಂಚಿಂ ನಕ್ಲಾಂ ಕರ್ಚಿಂ, ತಕ್ಲಿ ಭಾಡ್ಯಾಕ್ ದಿಲ್ಲೆ ವಾ ತಕ್ಲಿಚ್ಚ್ ನಾತ್ಲೆ ಹೆ ಖಂಚ್ಯಾ ಸಮಾಜೆಕ್ ಕಸ್ಲಿ ದೇಣ್ಗಿ ದಿತೆಲೆ ಮ್ಹಳ್ಳೆಂ ಮ್ಹಾಕಾ ತರ್‌ಯೀ ಸಮ್ಜನಾ. ಆಸುಂ - ತೊ ಏಕ್ ಅನ್ಯೇಕ್ ಮಹತ್ವಾಚೊ ವಿಷಯ್.

8. ವೃತ್ತಿಪರ್ ರಿತಿನ್ ತುಮ್ಕಾಂ ಪ್ರೇರಣ್ ದಿಲ್ಲೆ ಕೊಣ್?

ಜ: ಮ್ಹಾಕಾ ಇನ್ಫೋಸಿಸಾಚೊ ನಾರಾಯಣ್ ಮೂರ್ತಿ ತಶೆಂಚ್ ವಿಪ್ರೊಚೊ ಅಜೀಜ್ ಪ್ರೇಮ್‌ಜಿನ್ ಪ್ರೇರಿತ್ ಕೆಲಾಂ. ಅಶೆಂ ಪಯ್ಲೆಂ ಹಾಂವ್ ಧಿರುಭಯ್ ಅಂಬಾನಿ ಥಾವ್ನ್ ಜಾಯ್ತೊ ಪ್ರೇರಿತ್ ಜಾಲ್ಲೊಂ, ಎಕಾ ಪೆತ್ರೊಲ್ ಬಂಕಾಂತ್ ಕಾಮ್ ಕರುನ್ ಸಯ್ತ್ ಆಜ್ ಆಮ್ಚ್ಯಾ ದೇಸಾಚಿ ಉಂಚ್ಲಿ ಕಂಪ್ಣಿ ಆಸಾ ಕರುಂಕ್ ಕಾರಣ್ ಜಾಲ್ಲೊ ಜಾವ್ನಾಸಾ ಅಂಬಾನಿ.

9. ಕೊಂಕ್ಣಿ ಯುವಜಣಾಂಕ್ ತುಮ್ಚೆ ಸಂದೇಶ್ ಕಸಲೆ?

ಜ: ಜಾಯ್ತೆಂ ಶಿಕಪ್ ಜೊಡಾ, ಚಡಿತ್ ಭಾಸೊ ಶಿಕಾ, A, B, C, D ಚಿಂತ್ಪಾಂತ್ಲೊ ಸುಟಾ, ಜರ್ ತರ್ ಉಂಚ್ಲೊ ಫುಡಾರ್ ಜೊಡಿಜಾಯ್ ತರ್ A, B, C, D ಚಿಂತ್ಪಾಂತ್ಲೊ ಭಯ್ರ್ ಯೆಂವ್ಚಿ ಗರ್ಜ್ ಆಸಾ.

10. ದೇವ್ ಬರೆಂ ಕರುಂ ಬಾಬ್ ವಿ.ಪಿ.ಲೋಬೊ ತುಮಿ ದಿಲೆಲ್ಯಾ ವೆಳಾಕ್. ಪಯ್ಣಾರಿ ವಾಚ್ಪ್ಯಾಂಕ್ ತುಮ್ಚೆ ಸಂಧೇಶ್ ಆಸಾತ್?

ಜ: ತುಮ್ಕಾಂಯ್ ದೇವ್ ಬರೆಂ ಕರುಂ, ಸಮೇಸ್ತ್ ಕೊಂಕ್ಣಿ ವಾಚ್ಪ್ಯಾಂಕ್ ಮ್ಹಜೆ ಸಂಧೇಶ್ ಹೆಚ್ಚ್; ಬರೆಂ ಚಿಂತಪ್ ಚಿಂತ್ಯಾಂ, ಬರೆಂ ಶಿಕಾಪ್ ಜೊಡ್ಯಾಂ, ಆಮ್ಚಿಂ ಸ್ವಪ್ಣಾಂ ಉಂಚ್ಲಿಂ ಅಸುಂದಿತ್ ಆನಿ ಆಮ್ಚಿ ಮಿನತ್ ಸಯ್ತ್ ಉಂಚ್ಲಿ ಆಸುಂದಿ.

ವಾಚ್ಪ್ಯಾಂಚಿ ಅಭಿಪ್ರಾಯ್

ಹ್ಯಾ ಲೊಕಾಮೊಗಾಳ್ ’ಪಯ್ಣಾರಿ ಡೊಟ್ ಕೊಮ್’ ಜಾಳಿ ಸುವಾತೆರ್ ’ಕೊಂಕ್ಣಿ ಕಾರ್ಭಾರಿ’ ಮ್ಹಳ್ಳೆಂ ನವೆಂ ಅಂಕಣ್ ಆರಂಭ್ ಕೆಲ್ಲ್ಯಾ ವಲ್ಲಿ ಬಾಬಾಕ್ ಧನ್ಯವಾದ್. ಪಯ್ಲ್ಯಾ ಸಂಧರ್ಶನಾಕ್ ಮಂಗ್ಳುರಾಂತ್ಲೊ ನಾಂವಾಡ್ದಿಕ್ ಘರ್ ಬಾಂದ್ಪಿ ವಿ. ಪಿ. ಲೋಬೊಕ್ ವಿಂಚುನ್ ಕಾಡ್ಲಲಿ ಗಜಾಲ್ ಸಂತೊಸಾಚಿ. ಸಂಧರ್ಶಕ್ ಪ್ರಸನ್ನ ನಿಡ್ಡೊಡಿಕ್ ಅಭಿನಂದನ್.

ವಲೇರಿಯನ್ ಬಾಬಾನ್ ಯುವಜಣಾಂ ಖಾತಿರ್ ಚಲವ್ನ್ ವೆಲ್ಲ್ಯಾ ಥೊಡ್ಯಾ ತರ್ಬೆತಿ ಶಿಬಿರಾಂಕ್ ಹಾಜರ್ ಜಾಂವ್ಚೊ ಅವ್ಕಾಸ್ ಮ್ಹಾಕಾ ಮೆಳ್ಳಾ. ತಾಣೆ ಕೊಂಕಣಿಂತ್ ಉಲಂವ್ಚಿ ರೀತ್, ಶಿಬಿರಾಂತ್ ಹಾಜರ್ ಜಾಲ್ಲ್ಯಾ ಪೊಕ್ರಿ ಚೆಡ್ಯಾಂಕ್ ತಾಬ್ಯಾಂತ್ ದವರ್ಚೊ ನಮುನೊ ಹಾವೆಂ ಪಳೆಲಾ.

ವಲೇರಿಯನ್ ಬಾಬ್ ದಾಕ್ಷೆಣೆಕ್ ಪಡಾನಾತ್ಲೊ ಖಡಾಖಡ್ ಉತ್ರಾಂಚೊ ಮನಿಸ್. ಟೆಕ್ಸಿ ಧುಂವ್ಚ್ಯಾ ಮಾಮುಲಿ ಕಾಮಾಥಾವ್ನ್ ಸುರ್ವಾತುನ್ ಟಿ20 ನಾಂವಾಚ್ಯಾ ಪ್ರಸಿದ್ದ್ ಘರ್ ಬಾಂದಾಪ್ ಸಂಸ್ಥ್ಯಾಚೊ ಯಶಸ್ವಿ ಮ್ಹಾಲಕ್ ಜಾವ್ನ್ ವಯ್ರ್ ಪಾವ್ಲಲಿ ತಾಚಿ ಕಾಣಿ ಧಿರುಭಾಯ್ ಅಂಬಾನಿ ತಸಲಿಚ್ ಮ್ಹಣ್ಯೆತ್. ತಾಣೆ ಸಾಂಗ್ಚೆಬರಿ ಆಮ್ಚೊ ಲೋಕ್ ವಿಕಾಸಾಚ್ಯೆ ವಾಟೆನ್ ಪಿಕುಳಾಚಿಂ ಪಾವ್ಲಾಂ ಕಾಡ್ನ್ ಆಸಾ. ಇಲ್ಲೆ ಕಷ್ಟ್ ಆಯ್ಲ್ಯಾರ್ ಸಾಂತಾಂ ಭಕ್ತಾಂಚೊ ಆಧಾರ್ ಘೆತಾ ಶಿವಾಯ್ ಆಪ್ಲಿ ಚುಕ್ ವಳ್ಕುನ್ ಸುಧ್ರಾಪಾಚಿ ವಾಟ್ ಸೊಧುನ್ ವಚನಾ. ತಾಂಚಿಂ ಭುರ್ಗಿಂ ಉಂಚ್ಲೆಂ ಶಿಕಾಪ್ ಜೊಡ್ಚೆ ತ್ರಾಸ್ ಘೆನಾಸ್ತಾನಾ ಫಕತ್ ವೆಗಿಂ ದುಡು ಕಮಾಂವ್ಚೆ ಧಾಂವ್ಣೆರ್ ಆಸಾತ್. ಆಮ್ಚೆ ಪಾದ್ರಿ ಇತಿಹಾಸಿಕ್ ಪರ್ನ್ಯೊ ಇಗರ್ಜೊ ಕೊಸ್ಳಾವ್ನ್ ನವ್ಯೊ ಬಾಂಧುನ್ ಫಕತ್ ಅತ್ಮೆ ಸಾಲ್ವಾರ್ ಕರ್ಚ್ಯಾಂತ್ ಮಾತ್ರ್ ಮುಖಾರ್ ಆಸಾತ್ ಶಿವಾಯ್ ಸಮಾಜಿಚೆ ಮುಖೆಲ್ ಜಾವ್ನ್ ದುಬ್ಳ್ಯಾಂಚೆ ಕಷ್ಟ್ ಸಮ್ಜುನ್ ತಾಂಕಾಂ ವಯ್ರ್ ಕಾಡ್ಚೆಂ ಪ್ರೇತನ್ ಕರಿನಾಂತ್. ಫಟ್ಕಿರಿಂ ಆಚರ್ಯಿಂ ಪರ್ಗಟ್ ಕರ್ನ್ ಆಪ್ಲ್ಯಾ ಫಿರ್ಗಜೆಕ್ ಪುನ್ ಶೆತಾಚೊ ದರ್ಜೊ ಮೆಳ್ಚೆಬರಿ ಕರುಂಕ್ ಪೆಚಾಡ್ತಾತ್ ಶಿವಾಯ್ ಲೊಕಾಚ್ಯಾ ಮತಿಂತ್ ರಿಗೊನ್ ಬಸ್ಲಲೆಂ ಇತ್ಲೆಚ್ ಪಾವ್ಟಿಂ ನಮಾನ್ ಮರಿಯೆ ಸಾಂಗ್ಲ್ಯಾರ್ ಆಚರ್ಯೆಂ ಜಾತಾ, ಕಷ್ಟ್ ಪರಿಹಾರ್ ಜಾತಾತ್ ಮ್ಹಣ್ ಪಾತ್ಯೆಂವ್ಚೆಂ ಪಿತಿಸ್ಪಣ್ ಪಯ್ಸ್ ಕರುಂಕ್ ಮುಖಾರ್ ಸರಾನಾಂತ್.

ಯುವಜಣಾಂ ಖಾತಿರ್ ಮಾರ್ಗದರ್ಶನ್ ಶಿಬಿರಾಂ ಆಸಾ ಕೆಲ್ಲೆಬರಿ ವ್ಹಡಾಂ ಖಾತಿರೀ ಶಿಬಿರಾಂ ಚಲಯ್ಲ್ಯಾರ್ ಕಾಂಯ್ ತರಿ ಬರೆಂಪಣ್ ಜಾಯ್ತ್ ಮ್ಹಣ್ ಮ್ಹಾಕಾ ಭಗ್ತಾ. ಜಿಣ್ಯೆಂತ್ ಮುಖಾರ್ ಸರೊಂಕ್ ಧಾರ್ಮಿಕ್ ಪಿತಿಸ್ಪಣ್ ಸಾಂಡುನ್ ಚಡ್ ಮ್ಹಿನತ್ ಕರ್ಚಿ ಗರ್ಜ್ ಆಸಾ ಮ್ಹಳ್ಳೆಂ ಸತ್ ವ್ಹಡಾಂಚ್ಯೆ ಮತಿಂತ್ ಖಂಚಂವ್ಕ್ ಜಾಯ್.

ವಲೇರಿಯನ್ ಬಾಬ್ 133 ಭುರ್ಗ್ಯಾಂಚ್ಯಾ ಶಿಕ್ಪಾಕ್ ಪ್ರಾಯೋಜಕ್ ಜಾವ್ನ್ ಆಸ್ಲಲಿ ಸಂಗತ್ ಅಬಿಮಾನಾಚಿ ಜಾವ್ನಾಸಾ, ತಾಕಾ ಮ್ಹಜೆ ಅಭಿನಂದನ್.

-ವೊಲ್ಟರ್ ಲಸ್ರಾದೊ.

ಪ್ರಸನ್ನ ನಿಡ್ಡೋಡಿ: ನಿಡ್ಡೋಡಿ ಫಿರ್ಗಜೆಚಿ ಹಿಲರಿ ಡಿ’ಸಿಲ್ವಾ ಮುಂಬಯಾಂತ್ ಅಪ್ಲ್ಯಾ ಕೊಂಕ್ಣಿ ವಾವ್ರಾಕ್ ಲೊಕಾಮೊಗಾಳ್, ಏಕ್ ಲೇಖಕ್, ವಾವ್ರಾಡಿ, ನಾಟಕಿಸ್ತ್/ನಿರ್ದೇಶಕ್, ಕವಿ/ಕಾಣ್ಯೆಗಾರ್. ಮಿರಾರೋಡಾಂತ್ ಸಕ್ರಿಯ್ ರಿತಿನ್ ಕೊಂಕ್ಣಿ ವಾವ್ರ್ ಕರ್ತೆಲ್ಯಾಂ ಪಯ್ಕಿಂತ್ಲೊ ಎಕ್ಲೊ. ಕೊಂಕ್ಣಿ ಭಾಸೆಚೊ ಹುಸ್ಕೊ ಆನಿ ಖತ್ಕತೊ ಮೋಗ್ ಆಸ್ಚೊ ಕಲಾಕಾರ್.