ಸಪ್ಟೆಂಬರ್ ಆಟ್ ತಾರಿಕೆರ್ ಆಯ್ತಾರಾ, ಸಾಂ. ಜುಜೆ ಕೊಂಕಣಿ
ವೆಲ್ಫೇರ್ ಎಸೊಶಿಯೆಶನ್ ಮಿರಾರೋಡ್, ಹಾಣಿಂ ಮೊಂತಿ ಫೆಸ್ತ್
ಸಕಾಳಿಂ 8.15ವರಾರ್, ಮಾನಾಧಿಕ್ ಬಾಪ್ ದೊತೊರ್ ಡೊಮಿನಿಕ್
ವಾಸ್, ವಿಗಾರ್ ಬಾಪ್ ಮೆಲ್ವಿನ್ ಡಿ’ಕುನ್ಹಾ ಆನಿ ಸಹಾಯಕ್
ವಿಗಾರ್ ಬಾಪ್ ವಾಲ್ಟರ್ ಡಿ’ಸೊಜ್ ಹಾಂಚ್ಯಾ ಹಾಜ್ರೆಂತ್
ಮಿಸಾಸವೆಂ ಸುರ್ವಾತ್ ಕೆಲೆಂ. ಮಿಸಾಉಪ್ರಾಂತ್ ಲೊಕಾಕ್
ಬೆಂಜಾರ್ ಕೆಲ್ಲಿ ’ಕಣ್ಶಿ ಆನಿ ’ವೋರ್ನ್’ ವಾಂಟ್ಲೆಂ.
ತ್ಯಾಚ್ ಸಾಂಜೆರ್ 6.30 ವರಾರ್ ’ಕೊಂಕಣಿ ಮಾನ್ಯತಾ ದಿವಸ್
ಆನಿ ನೊವೆಂ ಜೆವಣ್’ ಕಾರ್ಯೆಂ ಸಾಂ. ಜುಜೆ ಕೊಂಕಣಿ
ವೆಲ್ಫೇರ್ ಎಸೊಶಿಯೆಶನಾಚ್ಯಾ ಸಾಂದ್ಯಾನಿಂ ಇಗರ್ಜೆ
ಸಾಲಾಂತ್ ಮಾಂಡುನ್ ಹಾಡ್ಲೆಂ. ಕಾರ್ಯಾಚಿ ಸುರ್ವಾತ್
ಭುರ್ಗ್ಯಾಂಚ್ಯಾ ಮಾಗ್ಣ್ಯಾ ಆನಿ ಸ್ವಾಗತ್ ನಾಚಾ ಸವೆಂ
ಆರಂಭ್ ಕೆಲಿ. ಸುರ್ವೆರ್ ಆಧ್ಯಕ್ಶ್ ಮಾನೆಸ್ತ್ ಜೋನ್
ಕ್ರಾಸ್ತಾನ್ ಸರ್ವಾಂಕ್ ಯೆವ್ಕಾರ್ ಮಾಗ್ಲೊ, ಉಪ್ರಾಂತ್
ಮಾನೆಸ್ತ್ ಹೆನ್ರಿ ಸಲ್ಡಾನ್ಹಾನ್ ’ಪಾನ್ಪೊಡ್ ಉದಕ್’
ದೀವ್ನ್ ಸರ್ವಾಂಚೊ ಸ್ವಾಗತ್ ಕೆಲೊ.
ವೆದಿರ್ ಮುಖೆಲ್ ಸಯ್ರೊ ಜಾವ್ನ್ ಮಾನಾಧಿಕ್ ದೊತೊರ್ ಬಾಪ್
ಡೊಮಿನಿಕ್ ವಾಸ್ (ದಿರೆಕ್ತೊರ್-ಧ್ಯಾನವನ ಮಯ್ಸೂರ್),
ವಿಗಾರ್ ಬಾಪ್ ಮೆಲ್ವಿನ್ ಡಿ ಕುನ್ಹಾ, ’ಮಾನ್ ಮನಿಸ್’
ಮಾನೆಸ್ತ್ ಜೋಯ್ ಪಾಲಡ್ಕಾ (ಖ್ಯಾತ್
ಲೇಖಕ್/ನಿರ್ದೆಶಕ್/ನಟ್), ಅಧ್ಯಕ್ಶ್ ಜೋನ್ ಕ್ರಾಸ್ತಾ,
ಕಾರ್ಯದರ್ಶಿ ಮಾನೆಸ್ತ್ ಜೆರಾಲ್ಡ್ ಡಿ’ಸೊಜ್, ಖಜನ್ದಾರ್
ಮನೆಸ್ತ್ ವಿಕ್ಟರ್ ಮಸ್ಕರೆನ್ಹಸ್, ಸಾಂಸ್ಕ್ರತಿಕ್
ಕಾರ್ಯದರ್ಶಿ ಮಾನೆಸ್ತ್ ಹಿಲರಿ ಡಿ’ಸಿಲ್ವ ಹಾಜರ್ ಆಸ್ಲೆ.
ಕಾರ್ಯಚೆಂ ಉದ್ಘಾಟನ್ ನೊವೆಸಾಂವ್ ಜಾವ್ನ್, ಗಾಂವ್ಚೊ
ಉಕ್ಡೊ ತಾಂದುಳ್ ಮೊಡ್ಕೆಂತ್ ಶಿಜವ್ನ್ ಪೇಜ್ ಕರುನ್ ಆನಿ
ಕಾರೆಣ್ಯಾಚಿ ಚೆಟ್ಣಿ ವಾಟುನ್ ಮಾಲ್ತೆಂನಿ ಸಯ್ರ್ಯಾಂಕ್
ವಾಡ್ಲಿ, ಆನಿ ಭುರ್ಗ್ಯಾಂಕ್ ಮಂಗ್ಳುರಿ ಸಂಸ್ಕ್ರತೆಚಿ
ದಾಕವ್ಣಿ ಕೆಲಿ. ಉಪ್ರಾಂತ್ ಕೊಂಕ್ಣೆಚ್ಯಾ ಆಂತರ್ಲೆಲ್ಯಾ
ಫುಡ್ಯಾರ್ಯಾಂಚೊ ಉಗ್ಡಾಸ್ ಕಾಡುನ್, ಮಾನ್ ಬಾಗವ್ನ್ ಏಕ್
ಮಿನುಟಾಚೆಂ ಮೌನ್ ಸಾಂಬಾಳ್ಳೆಂ.
ಮಾನ್ ಮನಿಸ್ ಜೋಯ್ ಪಾಲಡ್ಕಾಕ್ ಶಾಲ್, ಫುಲಾಂ-ಫಳಾಂ, ಹಾರ್
ಆನಿ ಮಾನ್ಪತ್ರ್ ದೀವುನ್ ಸನ್ಮಾನ್ ಕೆಲೊ. ತಾಚ್ಯಾ
ಸಂದೇಶಾಂತ್ ತೊ ಮ್ಹಣಾಲೊ "ಕೊಂಕ್ಣಿ ಭಾಸ್ ಗೋಡ್ ಭಾಸ್,
ಪುಣ್ ಆಜ್ಕಾಲ್ ಆಮಿಂ ಕೊಂಗ್ಲಿಶ್ ಉಲಯ್ತಾಂವ್. ಕೊಂಕಣಿ
ಭಾಸೆಂತ್ ಏಕ್ ಸಬ್ದ್ ಆಮಿಂ ಎಕೆಕಾ ವಾಕ್ಯಾಂತ್ ವಿವಿಧ್
ಥರಾನಿಂ ವಾಪಾರ್ತಾಂವ್; ತರೀ ತಾಚೊ ಆರ್ಥ್ ಎಕ್ಚ್ ಆಸ್ತಾ,
ಇಂಗ್ಲಿಶ್ ಭಾಸೆ ಬರಿಂ ನ್ಹಯ್. ಕೊಂಕ್ಣಿ ಭಾಸೆಕ್ ಘರಾನಿಂ
ವಾಪಾರ್ಲಿ ತರ್ ಭುರ್ಗ್ಯಾ ಥಂಯ್ ತಾಚಿ ರೂಚ್ ಚಡ್ತಾ"
ಬಾಪ್ ಡೊಮಿನಿಕ್ ಮ್ಹಣಾಲೆ "ತುಮ್ಚೊ ಮೋಗ್ ಕೊಂಕಣಿ ಭಾಸೆ
ಥಂಯ್ ಆಸಾ ತೆಂ ತುಮ್ಚ್ಯಾ ವ್ಹಡ್ ಸಂಖ್ಯಾಚ್ಯಾ ಉಪಸ್ತೆಂತ್
ಕಳಿತ್ ಜಾತಾ. ಸರ್ವ್ ಭಾಸೊ ಶಿಕೊಂಕ್ ಜಾಯ್ ಆನಿ ಬರ್ಯೊ,
ತರೀ ಕೊಂಕಣಿ ಆಮ್ಚಿ ಮಾಂಯ್ ಭಾಸ್ ಘರಾನಿ ಉಲಂವ್ಕ್ ಜಾಯ್,
ತೀಯ್ ಉಲಂವ್ಕ್ ಜಾಯ್"
ಬಾಪ್ ಮೆಲ್ವಿನಾನ್
ಎಸೊಶಿಯೆಶನಾಚ್ಯಾ ಕಾರ್ಬಾರ್ಯಾಂಕ್ ಶಾಭಸ್ಕಿ ಪಾಟಯ್ಲಿ
ಆನಿ ಆಸಲಿಂ ಕೊಂಕಣಿ ಕಾರ್ಯಿಂ ಕರುಂಕ್ ತಾಂಚೊ ಸದಾಂಚ್
ಪಾಟಿಂಬೊ ಭಾಸಾಯ್ಲೊ. ಉಪ್ರಾಂತ್ ಕೊಂಕಣಿ ತಾಲೆಂತ್
ಸ್ಪರ್ಧ್ಯಾನಿಂ ಜಿಕ್ಲ್ಲ್ಯಾ ಸ್ಪರ್ಧಿಕಾಂಕ್ ತಸೆಂಚ್
ಧಾವಿ, ಭರಾವಿ ಆನಿ ಉಂಚ್ಲ್ಯಾ ಶಿಕ್ಶಣಾಂತ್ ಉತ್ತೀರ್ಣ್
ಜಾಲ್ಲ್ಯಾ ಸಾಂದ್ಯಾಂಚ್ಯಾ ಭುರ್ಗ್ಯಾಂಕ್ ಸನ್ಮಾನ್ ಕೆಲೊ.
ಹಾಜರ್ ಆಸ್ಲ್ಲ್ಯಾ ಆನಿ ಹ್ಯಾ ಕಾರ್ಯಾಕ್ ಸಹಾಯ್
ದಿಲ್ಲ್ಯಾ ದಾನಿಂಕ್ ಆನಿ ಹಿತಚಿಂತಕಾಂಕ್ ಫುಲಾಂ ತುರೆ ಆನಿ
ಪ್ರಸನ್ನ್ ನಿಡ್ಡೊಡಿಚೊ ’ತಾನ್’ ಕವಿತಾ ಬೂಕ್ ದೀವ್ನ್
ಮಾನ್ ಕೆಲೊ. ಕಾರ್ಯದರ್ಶಿ ಮಾನೆಸ್ತ್ ಜೆರಿನ್ ಧನ್ಯವಾದ್
ಆರ್ಪಿಲೆ.
ಉಪ್ರಾಂತ್ ದೋನ್ ಘಂಟೆಭರ್ ವಿವಿಧ್
ಮನೊರಂಜನ್ ಕಾರ್ಯಕ್ರಮ್, ಭುರ್ಗ್ಯಾಂ ಥಾವ್ನ್ ಆನಿ
ಸಂಘಟನಾಚ್ಯಾ ಸಾಂದ್ಯಾ ಥಾವ್ನ್ ನಾಚ್, ಪದಾಂ, ಹಾಸ್ಯ್
ನಾಟ್ಕುಳೆ ಸಾದರ್ ಕೆಲೆ ಆನಿ ಜಮ್ಲ್ಲ್ಯಾ ಲೊಕಾಕ್
ಪೋಟ್ಭರ್ ಹಾಸಾಯ್ಲಾಗ್ಲೆ.
ಪಾಂಯ್ಶಿಂ ಜಣಾ
ವಯ್ರ್ ಲೊಕಾಕ್, ವಿವಿಧ್ ರಾಂದ್ವಾಯೆನಿಂ ರಾಂದ್ಲ್ಲೆಂ
’ನೊವೆಂ ಜೆವಾಣ್’ ಗಾಂವ್ಚ್ಯಾ ರಿವಾಜಿ ಫರ್ಮಾಣೆ ಶಿರೊತೆರ್
ವಾಡ್ಲೆಂ. ಜೆವ್ಣಾ ಉಪ್ರಾಂತ್ ಸಾಂದ್ಯಾನಿಂ ಸಾಂಗಾತಾ
’ಲಾವ್ದಾತೆ’ ಗೀತ್ ಗಾವ್ನ್ ಕಾರ್ಯೆಂ ಸಂಪಯ್ಲೆಂ.
ಮಾನೆಸ್ತ್ ಹೆನ್ರಿ ಸಿಕ್ವೆರಾನ್ ಹೆಂ ಸಗ್ಳೆಂ ಕಾರ್ಯೆಂ
ಅಪುರ್ಬಾಯೆನ್ ಚಲವ್ನ್ ವೆಲೆಂ.
- ಭಾತ್ಮಿ: ಹಿಲರಿ ಡಿ’ಸಿಲ್ವಾ,
ತಸ್ವೀರೊ:
ಕೆನ್ಯುಟ್ ಮಿನೆಜೆಸ್ |