1. ಡಯಾನ್
ಡಿಸೋಜ್ ಮುಕಾಮಾರ್ ಏಕ್ ಮುಖೆಲಿ, ಏಕ್ ಉಧ್ಯಮಿ, ಏಕ್
ಸಮಾಜ್ ಸೆವಕ್, ಏಕ್ ಚಿಂತ್ಪಿ, ಏಕ್ ಬರವ್ಪಿ, ಏಕ್
ನಟ್, ಏಕ್ ಸಂಘಟಕ್ ಅಶೆಂ ಕೊಂಕಣಿ ಸಮಾಜೆಂತ್
ಒಳ್ಕಿಚೊ. ಪುಣ್ ಡಯಾನ್ ಡಿಸೋಜ್ ಪ್ರಕಾರ್ ತುಂ ಕೊಣ್?
’ಹಾಂವ್’ ಮ್ಹಳ್ಳೊ ಸಬ್ಧ್ ಭೋವ್ ಮಾರೆಕಾರ್.
ಹಾಂವ್ ಮ್ಹಳ್ಯಾರ್ ಕೊಣ್ ಮ್ಹಣುಂಕ್ ಗೆಲೊಂ ತರ್
ಮ್ಹಜ್ಯೆಥಂಯ್ ’ಹಾಂವ್, ಅಪುಣ್’ ಅಸಲಿಂ ಭಗ್ಣಾಂ
ರುತಾಂ ಜಾವ್ನ್ ಸ್ವಾರ್ಥಿ ಜಾತಾಂ ಜಶೆಂ ಕುಂಕ್ಡಾನ್
ಅಪ್ಲ್ಯಾಚ್ ಪಾಂಯಾಪಂದ್ಲೆಂ ಉಸ್ತುಂಚೆಪರಿಂ ಹಾಂವ್
ಅಪ್ಣಾಚಿಚ್ ಬಡಾಯ್ ಉಲಂವ್ಚಿ ಸಾರ್ಕಿ ನ್ಹಯ್.
’ತುಂ ಸರ್ಗಾಕ್ ವೆತಾಯ್‌ಗಿ?’ ಅಶೆಂ
ಕನಕದಾಸಾಚ್ಯಾ ಗುರುನ್ ಕನಕದಾಸಾಕ್ ವಿಚಾರ್ಲೆಂ ಕಂಯ್.
ತಾಚಿ ಜಾಪ್ ಜಾವ್ನ್ ಕನಕದಾಸಾನ್ ಮ್ಹಳೆಂ ’ಹಾಂವ್
(ಅಹಂ)’ ಗೆಲ್ಯಾರ್ ವಚೊನ್. ಕಿತ್ಯಾಕ್ ಮ್ಹಳ್ಯಾರ್
’ಹಾಂವ್’ ಮ್ಹಳ್ಳೊ ಸಬ್ಧ್ ಹಂಕಾರಾಚೆಂ ಪಯ್ಲೆಂ ಮೇಟ್
ಮ್ಹಣುನ್ ಹಾಂವ್ ಚಿಂತಾಂ, ದೆಕುನ್ ಹಾಂವ್ ಕೊಣ್
ಮ್ಹಳ್ಳೆಂ ಮ್ಹಜ್ಯಾ ವಾವ್ರಾಂತ್/ಕಾಮಾಂತ್/ಸೆವೆಂತ್
ಮ್ಹಜ್ಯಾ ಚಿಂತ್ಪಾಪ್ರಕಾರ್ ಕರುನ್ ಆಯ್ಲಾಂ ಶಿವಾಯ್
’ಹಾಂವ್’ ಕೊಣ್ ಮ್ಹಣುನ್ ಉಲಂವ್ಕ್, ವ ಗಾಜಂವ್ಕ್
ವಚಾನಾ. ದಿವೊ ಕೆದ್ನಾಂಯ್ ಅಪ್ಲಿ ಬಡಾಯ್ ಉಲಯ್ನಾ
ಬಗರ್ ಉಜ್ವಾಡ್ ಫಾಂಕಯ್ತ್ ವೆತಾ. ಹಾಂವ್ ಕೊಣ್
ಮ್ಹಣುನ್ ಹೆರಾಂನಿ ಸಾಂಗಾಜೆ. ಹಾಂವೆಂ ಕೆಲ್ಲ್ಯಾ
ಕಾಮಾಚೊ ಫಳ್ ಜರ್ ಹೆರಾಂಕ್ ಲಾಭ್ಲೊ ಆನಿ ಹೆರಾಂಚ್ಯಾ
ತೊಂಡಾರ್ ಸಂತೊಸಾಚ್ಯೊ ಹಾಸೊ ಹಾಡುಂಕ್ ಸಕ್ಲೊಂ ತರ್
ತೆಂಚ್ ಮ್ಹಾಕಾ ದಾಧೊಸ್ಕಾಯೆಚೆಂ.
2. ಮನ್ಶಾಕ್
ಅಪ್ಲೊ ಗಾಂವ್ ಸೊಡುನ್ ಪಯ್ಸ್ ಗೆಲ್ಲೆತಿತ್ಲೊ
ಗಾಂವ್ಚೊ ಉಡಾಸ್ ತಶೆಂಚ್ ಮಾಯ್‌ಭಾಸೆಚೊ ಮೋಗ್ ಚಡ್.
ಹೆಂ ಕಿತ್ಲೆಂ ಸತ್?
ಜೆರಾಲ್ ರಿತಿನ್
ಸಾಂಗ್ಚೆಂ ತರ್ ಹೆಂ ಸರ್ವಾಂಕ್ ಲಾಗು ಜಾತಾ ವಾ ನಾ
ಮ್ಹಣ್ ನೆಣಾಂ ಪುಣ್ ಏಕ್ ನಖ್ಖೆಂ ಸಾಂಗುಂಕ್ ಸಕ್ತಾಂ.
ಮನ್ಶಾನ್ ತೀನ್ ಸಂಗ್ತೆಂಕ್ ಕೆದಿಂಚ್ ವಿಸ್ರನಾಯೆ;
ಪಯ್ಲಿ - ಅಪ್ಲಿಂ ಆವಯ್-ಬಾಪುಯ್,
ದುಸ್ರಿ - ಅಪ್ಲೊ
ಜಲ್ಮಲ್ಲೊ ಗಾಂವ್, ಆನಿ ತಿಸ್ರಿ - ಆಪ್ಲಿ ಆವಯ್
ಭಾಸ್. ’ಕುಡ್ಡ್ಯಾ ಸುಣ್ಯಾಕ್ ಸುಕೊ ಗೂ’
ಮೆಳ್‌ಲ್ಲ್ಯಾ ಕಾಣಿಯೆಪರಿಂ, ಥೊಡ್ಯಾಂಕ್ ದೋನ್ ಸಬ್ಧ್
ಇಂಗ್ಲಿಶ್ ಶಿಕ್ತಚ್ ಅಪ್ಲ್ಯಾ ಮಾಯ್‍ಭಾಸೆಚೆರ್
ತಾತ್ಸಾರ್ ಉದೆತಾ. ಆಮಿ ಗರ್ಜೆಕ್ ಹೆರ್ ಭಾಸೊ
ಉಲವ್ಯೆತ್ ಪುಣ್ ಮರ್ಜೆಕ್ ಆಮ್ಚಿ ಆವಯ್ ಭಾಸ್
ಸಾಂಡ್ಚಿ ನ್ಹಯ್. ಆಮ್ಚಿ ಭಾಸ್, ಆಮ್ಚಿ ಸಂಸ್ಕೃತಿ
ವಿಸರ್ಚಿಂ ಅಪ್ಣಾಥಂಯ್ ಪೊಕೊಳ್ ವ್ಹಡ್‌ಪಣಾಚಿಂ.
3.
ಕೊಂಕಣಿ ಸಮಾಜೆಕ್ ಘೆಂವ್ಕ್ ಮಾತ್ರ್ ಕಳಿತ್ ಆಸ್ಚೆಂ
ಶಿವಾಯ್ ದೀಂವ್ಕ್ ನ್ಹಯ್, ಕೆಲ್ಲ್ಯಾ ಧಾ ಬರೆಪಣಾಕ್
ವಿಸರ್ತಿತ್ ಪುಣ್ ಘಡ್‌ಲ್ಲ್ಯಾ ಎಕಾ ಚುಕಿಕ್ ವಾ
ಫರಾಮಸೆಕ್ ಖೆಂಡುಂಕ್ ವಿಸರ್ನಾ. ಹೆಂ ಕಿತ್ಲೆಂ ಸತ್?
ಹಿ ಏಕ್ ಖರಿ
ಗಜಾಲ್. ಹಿ ಎಕಾ ರಿತಿಚಿ ಪಿಡಾ ಮ್ಹಣ್ಯೆತ್, ಆನಿ
ಹ್ಯಾ ಪಿಡೆಕ್ ಕಸಲೆಂ ಓವರ್‌ಡೋಸ್ ಆನಿ ಕಸಲೆಂ ಒಕೊತ್
ಮ್ಹಣುನ್ ಮ್ಹಾಕಾ ಕಳಿತ್ ತಾ. ಇಂಗ್ಲಿಶಾಂತ್ಲ್ಯಾ "No
one notice your tears , No one notice your
sadness,No one notice your pain but they all
noticed your mistakes"
ಸಾಂಗ್ಣೆಪರಿಂ, ಹ್ಯಾ ಸಂಸಾರಾಂತ್ ಸಲೀಸಾಯೆಚೆಂ ಕಾಮ್
ಮ್ಹಳ್ಯಾರ್ ಕಿತೆಂಚ್ ಕರಿನಾಸ್ತಾಂ ಹಾತ್ ಭಾಂದುನ್
ಬೊಸ್ಚೆಂ ಆನಿ ಹೆರಾಂಚ್ಯೊ ಖೊಡಿ ಕಾಡ್ಚ್ಯೊ. ಹ್ಯಾ
ದಳ್ದಿರ್ ಸಮಾಜಿಕ್ ಪಿಡೆಕ್ ಲಾಗುನ್ ನಾಕ್ಶಿ
ಕಾತರ್ಚ್ಯೆ ಬದ್ಲಾಕ್ ಬೋಟ್‌ಚ್ ಕಾತರ್ತಾಂವ್. ಹಾಂತುಂ
ಮನ್ಶಾಂಚಿ ಹುಮೆದ್, ಉರ್ಭಾ ಆನಿ ಹೆರಾಂಕ್ ಬರೆಂ
ಕರ್ಚೊ ಸ್ವಭಾವ್‌ಚ್ ಕೊಸ್ಳೊನ್ ವೆತಾ. ಝಡಾಚಿ ಏಕ್
ಆಂಖ್ರಿ ಮೊಡ್ನ್ ಕಾಡ್‌ಲ್ಲೆಪರಿಂ ಜಾತಾ. ಮ್ಹಾಕಾ ಹೆಂ
ಆವಡ್ನಾ, ದೆಕುನ್ ಕೊಣ್‌ಯೀ ಚೂಕ್ ಕರ್ತಾ ತರ್ ತಾಕಾ
ಮೆಳುನ್ ತಾಚೆಲಾಗಿಂ ಉಲಂವ್ಚೆಂ ಸೊಡ್ಣ್ ತಾಚೆಂ ನಾಂವ್
ಪಾಡ್ ಕರ್ಚೆಂ ಆನಿ ಸಂಸಾರಾಕ್ ಗಾಜವ್ನ್ ತಾಚ್ಯಾ
ತೊಂಡಾರ್ ಕರಿ ಪುಸ್ಚ್ಯಾ ಆಣ್ವೆಂಪಣಾಚೆರ್ ಮ್ಹಾನಾ
ಕಾಂಠಾಳೊ ಆಸಾ. ದೆಕುನ್ ಎ.ಟಿ.ಲೊಬೊನ್ ಅಪ್ಲ್ಯಾ ’ತುಂ
ಬರೊ ಜಾ’ ಕಾದಂಬರೆಂತ್ ಸಾಂಗ್‌ಲ್ಲೆಪರಿಂ ’ಆಮಿ
ಹಾಸುಂಕ್ ಮಾತ್ರ್ ಜಾಣಾಂವ್, ಸೊಸುಂಕ್ ನ್ಹಯ್’.
4.
ಕೊಂಕಣಿಚ್ಯಾ ನಾಂವಾರ್ ಗಾಂವಾಂತ್ ತಶೆಂಚ್
ಪರ್ಗಾಂವಾಂನಿ ಜಾಯ್ತಿಂ ಸಂಘಟನಾಂ ಆಸಾತ್, ಪುಣ್
ಕೊಂಕಣಿಚ್ಯಾ ಬರೆಪಣಾಪಾಸತ್ ಶೃದ್ದೆನ್ ಆನಿ ಎಕಾ
ಮನಾನ್ ವಾವ್ರ್ ಕರ್ಚಿಂ ಸಂಘಟನಾಂ ಕಿತ್ಲಿಂ ಆಸಾತ್
ಮ್ಹಣ್ತಾಯ್?
ಸಂಘಟನ್
ಮ್ಹಳ್ಯಾರ್ ಹೆರಾಂಕ್ ಸಾಂಗಾತಾ ಹಾಡುನ್ ಕೆಲ್ಲೆಂ
ಘಟನ್, ಮ್ಹಳ್ಯಾರ್ ಹಾಂತುಂ ಎಕ್ಲ್ಯಾಚ್ಯಾಕೀ ಚಡ್
ಮನಿಸ್ ಆಸ್ತಾತ್ ಮ್ಹಣ್ ಜಾಲೆಂ. ಹಾಂಕಾಂ ಏಖ್
ನಿರ್ದಿಶ್ಟ್ ಶೆವೊಟ್ ಆಸ್ತಾ ಆನಿ ಚಡ್ತಾವ್ ಸಂಘಟನಾಂ
ಉದೆಂವ್ಚಿಂ ಸೆವೆಚ್ಯಾ ಸ್ಪಿರಿತಾನ್ ಶಿವಾಯ್
ಕೊಣಾಯ್ಕ್‌ಚ್ ಕಸ್ಲಿಚ್ ಕೂಲ್ ಮೆಳಾನಾ. ಪ್ರತ್ಯೇಕ್
ಕರುನ್ ಪರ್ಗಾಂವಾಂತ್ ಆಸ್ಚ್ಯಾ ಸಂಘಟನಾಂಚಿ ಪುರ್ತಿ
ಮಾಹೆತ್ ಮ್ಹಾಕಾ ಆಸಾ, ಅಪ್ಲೊ ದಿಸ್ಪಡ್ತೊ ಗ್ರಾಸ್
ಜೊಡ್ಚ್ಯಾ ಇರಾದ್ಯಾನ್ ಪರ್ಗಾಂವಾಂತ್ ಯೆವ್ನ್
ಘೊಳ್ತಾಸ್ತಾಂ, ಸಮಾಜೆಚ್ಯಾ ಬರೆಪಣಾಪಾಸತ್ ಇಲ್ಲೊ
ವೇಳ್, ಮಿನತ್, ದುಡು, ಆಟೊವ್ ಘಾಲುನ್ ಕೆಲ್ಲಿಂ
ಸಭಾರ್ ಕಾಮಾಂ ಸಭಾರ್ ರಿತಿನ್ ಕೊಂಕಣಿ ಸಮಾಜೆಕ್
ಉಪ್ಕಾರ್ಚಿಂಚ್ ಜಾತಾತ್. ಪುಣ್ ಜಶೆಂ ಎಕ್ಲ್ಯಾ
ಪ್ರಾಸ್ ಚಡ್ ಮನಿಸ್ ಸಾಂಗಾತಾ ಆಯ್ಲೆ ಮ್ಹಣ್ತಚ್
ಥಂಯ್ಚರ್ ಭಿನ್ನ್ ಅಭಿಪ್ರಾಯ್ ಯೆಂವ್ಚೊ ಸಹಜ್, ಆನಿ
ಅಸಲೆ ಅಭಿಪ್ರಾಯ್ ಜೆದ್ನಾಂ ಸ್ವಾರ್ಥಾತೆವ್ಶಿನ್
ಮಾಲ್ವತಿತ್ ತರ್ ತೆದ್ನಾಂ ಮಾರೆಕಾರ್. ತೆದ್ನಾಂ
ವೆಕ್ತಿ ವೆಕ್ತಿ ಮಧೆಂ, ಸಂಘ್ಟನ್ ಸಂಘಟನಾಂ ಮಧೆಂ
ಘರ್ಷಣ್ ಉದೆತಾ ಆನಿ ತೆದ್ನಾಂ ತಾಂಚೊ ಪ್ರಮುಕ್
ಶೆವೊಟ್ ಎಕಾಮೆಕಾ ಮಾರ್ನ್ ಕಾಡ್ಚೊ ಜಾತಾ - ಹೆಂ
ಸಮಾಜೆಕ್ ಮಾರೆಕಾರ್. ಸಮಾಜೆಕ್ ಂಆತ್ರ್ ನ್ಹಯ್,
ಕೊಣಾಕ್‌ಚ್ ಉಪ್ಕಾರಾಕ್ ಪಡ್ಚೆಂ ನ್ಹಯ್.
ಪುಣ್ ಜೆರಾಲ್
ಥರಾನ್ ಸಾಂಗ್ಚೆಂ ತರ್, ಕಿತ್ಲಿಂ ಸಂಘಟನಾಂಯ್
ಆಸುಂದಿ, ಎಕಾ ಸಂಘಟನಾನ್ ಏಕ್ ಬರೆಂ ಕಾಮ್ ಕೆಲೆಂ ತರ್
ಆನಿ ತಾಚೊ ಫಾಯ್ದೊ ಕೊಂಕಣಿ ಸಮಾಜೆಕ್ ಲಾಭ್ಲೊ ತರ್,
ಜಿತ್ಲಿಂ ಸಂಘಟನಾಂ ಆಸಾತ್ ತಿತ್ಲೆಂ ಬರೆಂಪಣ್
ಕೊಂಕಣಿಕ್ ಜಾಲ್ಲೆಪರಿಂ ನ್ಹಯ್?
5.
ದಾಯ್ಜಿದುಭಯ್ ಸಂಘತನ್ ಪಂಚ್ವೀಸ್ ವರ್ಸಾಂ
ಸಂಪಂವ್ಚ್ಯಾ ಸಂಧರ್ಭಾರ್ ಹ್ಯಾ ಸಂಚಾಲನಾಚೆಂ ಸುಂಕಾಣ್
ಘೆತ್‌ಲ್ಲ್ಯಾ ತುಜಿಂ ಯೋಜನಾಂ ಕಸ್ಲಿಂ ಮ್ಹಣ್
ಸಾಂಗ್ಯೆತ್?
ಡೊ. ಅಬ್ಧುಲ್
ಕಲಾಮಾಚ್ಯಾ ಉತ್ರಾಂನಿ ಸಾಂಗ್ಚೆಂ ತರ್ ’ಸಪಣ್ ತೆಂ
ನ್ಹಯ್, ತೆಂ ಫಕತ್ ರಾತಿಕ್ ಪಳೆಂವ್ಚೆಂ, ಸಪಣ್ ತೆಂ -
ಜ್ಯೆಂ ಆಮ್ಕಾಂ ನಿದುಂಕ್ ಸೊಡಿನಾಸ್ಚೆಂ’. ವ್ಹಯ್
ಕೊಂಕಣಿ ಭಾಸೆಕ್ (ಪ್ರತ್ಯೇಕ್ ಜಾವ್ನ್ ಸಾಹಿತ್ಯಾಕ್)
ತೆಂಕೊ ಲಾಭಂವ್ಚ್ಯಾ ದಿಶೆನ್ ಪಂಚ್ವೀಸ್ ವರ್ಸಾದಿಂ
ಪೆಟಯಿಲ್ಲಿ ಲ್ಹಾಣ್ ದಿವ್ಟಿ ಕಿತ್ಲೆಶ್ಯಾಂಕಿ ಘರಾಂನಿ
ರಾಂದಣ್ ಝಳಂವ್ಕ್ ಕಾರಣ್ ಜಾಲ್ಲಿ ತೃಪ್ತಿ ಆಮ್ಕಾಂ
ಆಸಾ. ಹ್ಯಾ ಸಮೇಸ್ತ್ ವಾವ್ರಾಚೊ ಉಡಾಸ್ ಕಾಡ್ಚಿ
ಗರ್ಜ್ ಆಸಾ. ಕೊಂಕಣಿಚೊ ಹುಸ್ಕೊ ಆಸ್ಚ್ಯಾ ಸಭಾರಾಂನಿ
ಆಮ್ಕಾಂ ತೆಂಕೊ ದಿಲಾ ಆನಿ ತಾಂಚೊ ಉಪ್ಕಾರ್ ಬಾವುಡ್ಚೊ
ಆಮ್ಚೊ ಕಾಯ್ದೊ. ದಾಯ್ಜಿದುಭಾಯ್ ಸಾಹಿತ್ಯಿಕ್
ಪುರಸ್ಕಾರ್ ಫುಡೆಂಯ್ ಆಮಿ ದಿವುನ್ ವೆತಲ್ಯಾಂವ್. ಆಮಿ
ಕೊಂಕಣಿ ವಾಚ್ಪಿ ಚಡಂವ್ಚ್ಯಾ ದಿಶೆನ್ ಮುಳಾವೊ ವಾವ್ರ್
ಕರ್ಚಿ ಗರ್ಜ್ ಮ್ಹಣುನ್ ದಿಸ್ತಾ, ಹರ್ ಘರಾಂತ್ ಏಕ್
ಕೊಂಕಣಿ ನೆಮಾಳೆಂ ಹಾಡಂವ್ಚಿ ಪಯ್ಲಿ ಸವಯ್ ಕೆಲಿ ತರ್,
ಹಳ್ತಾರ್ ವಾಚ್ಪಿ ಚಡ್ತೆಲೆ. ಹ್ಯಾ ದಿಶೆಣ್ ಆಮಿ
ಸರ್ವಾಂನಿ ಪ್ರಾಮಾಣಿಕ್ ರಿತಿನ್ ಮಾಯ್‌ಭಾಸೆಚ್ಯಾ
ಅಭಿಮಾನಾನ್ ಚಿಂತಪ್ ಆಟಂವ್ಚಿ ಗರ್ಜ್ ಆಸಾ. ತ್ಯಾ
ದಿಶೆನ್ ವಾವ್ರ್ ಕರ್ತೆಲ್ಯಾಂಕ್ ಸಾಂಗಾತಾ ಘೆವ್ನ್
ಆಮಿ ವಾವ್ರ್ ಕರ್ಚಿ ಆಲೋಚನ್ ಆಸಾ. ’ದಾಯ್ಜಿದುಭಯ್
ಯುವ ಪುರಸ್ಕಾರ್’ ಆಮಿ ಸುರ್ವಾತ್ ಕೆಲ್ಲಿ ಪುಣ್
ಕಾರಣಾಂತರ್ ಪಾಟಿಂ ಘಾಲಿಜಯ್ ಪಡ್ಲೊ,
ದಾಯ್ಜಿ-ಮಂಗ್ಳುರ್ ಹಾಂಚ್ಯಾ ಫುಡಾರ್ಪಣಾಖಾಲ್ ಪರತ್
ತೊ ಸುರ್ವಾತ್ ಕರ್ಚಿ ಯೆವ್ಜಣ್ ಆಸಾ.
Middle East
Life Time Achievement Award
ಜೊ ಪರ್ಗಂವಾಂತ್ ವಾವ್ರ್ ಕೆಲ್ಲ್ಯಾ
ಪರ್ಗಾಂವ್/ಗಲ್ಫಾಂತ್ಲ್ಯಾ ಎಕ್ಲ್ಯಾಕ್ ವಿಂಚುನ್ ತೊ
ಗವ್ರವ್ ದಿಂವ್ಚಿ ಅಲೋಚನ್ ಕರುನ್ ಆಸಾಂವ್. ಆಲೋಚನ್ಯೊ
ಸಭಾರ್ ಆಸಾತ್ ದೆಕುನ್ ಫುಡ್ಲ್ಯಾ ದಿಸಾಂನಿ ಆಮಿ
ಜಾಯ್ತೆಂ ಕಾಮ್ ಕರುಂಕ್ ಆಸಾ.
6.
ದಾಯ್ಜಿದುಭಯ್ ಸಂಸ್ಥ್ಯಾನ್ ಕೊಂಕಣಿಕ್ ಇತ್ಲೆಂ ಸರ್ವ್
ಕೆಲೆಂ, ವೆಗ್-ವೆಗಳ್ಯಾ ರಿತಿಂನಿ ಸಾಹಿತಿಂಕ್,
ಕೊಂಕಣಿ ಸಂಸ್ಥ್ಯಾಂಕ್, ಕೊಂಕಣಿ ನೆಮಾಳ್ಯಾಂಕ್
ಆರ್ಥಿಕ್ ತೆಂಕೊ ದಿಲೊ, ಮಾನ್ ದಿಲೊ. ಪುಣ್
ದಾಯ್ಜಿದುಭಯ್ ಸಂಸ್ಥ್ಯಾಕ್ ಜೊಕ್ತೊ ಮಾತ್
ಹಾಂಚೆಥಾವ್ನ್ ಲಾಭ್ಲಾಗಿ?
ದಾಯ್ಜಿದುಭಯ್ಚೊ
ಮುಳಾವೊ ಶೆವೊಟ್ ಕೊಂಕಣಿ ಸಾಹಿತಿಂಕ್ ಮಾನ್-ತೆಂಕೊ
ದಿಂವ್ಚೊ ಶಿವಾಯ್ ಕೊಣಾಯ್ ಥಾವ್ನ್ ಘೆಂವ್ಚೊ ನ್ಹಯ್.
ಪುಣ್ ಹೆರಾಂ ಥಾವ್ನ್ ಮಾನ್ ಮೆಳ್ತಾನಾ ಖರೆಂಚ್
ಜಾವ್ನ್ ಅಭಿಮಾನ್ ಭಗ್ತಾ, ಆಮಿ ತೊ ಮಾನ್ ಆಶೆಂವ್ಕ್
ನಾಂವ್ ತರ್‌ಯೀ ಆಮಿ ಕೆಲ್ಲ್ಯಾ ಕಾಮಾಚೆರ್ ವಿಶೇಸ್
ತೃಪ್ತಿ ಭಗ್ತಾ. ಕುವೆಯ್ಟ್‌ಗಾರಾಂನಿ ದಾಯ್ಜಿದುಭಯ್ಕ್
ಮಾನ್ ಕೆಲ್ಲೊ ಆಸಾ, ಮಸ್ಕತ್‌ಗಾರಾಂನಿ
ದಾಯ್ಜಿದುಭಯ್ಕ್ ಮಾನ್ ಕೆಲ್ಲೊ ಆಸಾ. ಗಲ್ಫಾಂತ್
ಸರ್ವ್ ರಾಶ್ಟ್ರಾಂನಿ ದಾಯ್ಜಿದುಭಯ್ಕ್ ವ್ಹಡಾ
ಗವ್ರವಾನ್ ಲೆಕ್ಲಾಂ. ಪುಣ್ ಏಕ್ ನಿರಾಶೆಚಿ ಗಜಾಲ್
ಮ್ಹಳ್ಯಾರ್ ಗಾಂವಾಂತ್ ಆಸ್ಚ್ಯಾಂಕ್
’ಪರ್ಗಾಂವಾಂತ್ಲ್ಯಾ ವಾವ್ರಾಕ್ ಮಾನ್’ ನಾ.
ಪರ್ಗಾಂವಾಂತ್ ವಾವ್ರ್ ಕೆಲ್ಲೆ ವೆಕ್ತಿ ಜಾಂವ್
ಸಂಸ್ಥೆ ಜಾಂವ್ ತಾಂಕಾಂ ಗರ್ಜೆಕ್ ಪಡ್ತಾನಾ ಮಾತ್ರ್
ಯಾದ್ ಸೊಡ್ಲ್ಯಾರ್ ಉಪ್ರಾಂತ್ ತಾಂಚೊ ಉಡಾಸ್ ಆಸಾನಾ.
ಆಮ್ಚಿ ಸೆವಾ ನಿಶ್ಶರ್ಥ್ Unconditional
ದೆಕುನ್ ಆಮ್ಕಾಂ ಹೆಂ ಆಮ್ಚ್ಯಾ ಶೆವೊಟಾಕ್ ಭಾದಕ್
ಹಾಡಿನಾ ಪುಣ್ ಅಶೆಂ ಕರ್ಚೆಂ ಬರೆಂ ನ್ಹಯ್. ಹೆರಾಂಚೆಂ
ಬರೆಂಪಣ್ ಒಳ್ಕೊಂಚೆಂ ಬರೆಂ ಮನ್ ಆಮ್ಚೆಥಂಯ್ ಆಸುಂಕ್
ಜಾಯ್.
ಆಮ್ಚೊ ಶೆವೊಟ್
ಕೊಂಕಣಿ ಸಾಹಿತಿಂಕ್ ತೆಂಕೊ ದಿಂವ್ಚೊ ತರ್‌ಯೀ
ಪಾಟ್ಲ್ಯಾ ಪಂಚ್ವೀಸ್ ವರ್ಸಾಂನಿ ಆಮಿ ಸಂಸ್ಥ್ಯಾ
ಮುಖಾಂತ್ರ್ ತಶೆಂಚ್ ವಯಕ್ತಿಕ್ ರಿತಿನ್ ಜಾಯ್ತ್ಯೆ
ರಿತಿನ್ ಸಾಹಿತಿಂಕ್ ಆರ್ಥಿಕ್ ತೆಂಕೊ ದಿಲಾ. ಹೊ
ಸಗ್ಳೊ ವಿವರ್ ಸವಿಸ್ತಾರ್ ಜಾವ್ನ್ ಹಾಂವ್ ಸಾಂಗುಂಕ್
ವಚಾನಾ, ಕಿತ್ಯಾಕ್ ಮ್ಹಳ್ಯಾರ್ ಆಮ್ಚೊ ಇರಾದೊ ಫಕತ್
ಮಜತ್ ಕರ್ಚೊ. ವರ್ಸಾಕ್ ಏಕ್ ಪಾವ್ಟಿಂ ಪುಣಿಂ ಬರವ್ಪಿ
ಕುಟ್ಮಾಚೆಂ ಸಹಮಿಲನ್ ಆಸಾ ಕರುನ್ ಎಕಾಮೆಕಾ ಒಳೊಕ್
ಜಾಂವ್ಚೆಪರಿಂ ಕರ್ಚೆಂ ಏಕ್ ಪ್ರೇತನ್ ಆಮಿ ಕೆಲ್ಲೆಂ
ಪುಣ್ ತೆಂ ಮುಖಾರುನ್ ವರುಂಕ್ ಜಾಲೆಂ ನಾ. ಫುಡೆಂ ಆಮಿ
ಅಸಲೆಂಚ್ ಸಹ-ಮಿಲನ್ ಆಸಾ ಕರ್ಚಿ ಯೆವ್ಜಣ್ ಆಸಾ.
7.
ಅಜೀಕ್ ಪಂಚ್ವೀಸ್ ವರ್ಸಾಧ್ಲಿ ಪರಿಗತ್ ಬದಲ್ಲ್ಯಾ.
ಪುಣ್ ಪರ್ಗಾಂವಾಂತ್ ಕೊಂಕಣಿ ಕಾರ್ಯಿಂ ಕರ್ಚೆಂ ಆತಾಂ
ಸಲೀಸಾಯೆಚೆಂ ಜಾಲಾಂ ವಾ ತ್ರಾಸಾಚೆಂ?
ದೀಸ್
ಗೆಲ್ಲೆಪರಿಂಚ್ ಆಮಿ ನವ್ಯಾ ಸಮಸ್ಸ್ಯಾಂಕ್ ಫುಡ್
ಕರುಂಕ್ ಪಡ್ಲಾಂ. ಎಕಾ ತೆಂಪಾರ್ ಕೊಂಕಣಿ ಲೊಕಾಕ್
ಕೊಂಕಣಿ ಕಾರ್ಯಾಂನಿ ಉರ್ಭಾ ಆಸ್ಲಿ ಆನಿ ಕೊಂಕಣಿ
ಲೊಕಾಂ ಥಂಯ್ ಹುಮೆದ್ ಆನಿ ಉರ್ಭಾ ಹಾಡಂವ್ಚ್ಯಾ
ದಿಶೆನ್ ವಾವ್ರ್ ಕರ್ಚಿಂ ಜಾಯ್ತಿಂ ಆಸ್ಲಿಂ. ತಾಣಿಂ
ಜಾಯ್ತಿ ಮಿನತ್, ತ್ಯಾಗ್ ಕರುನ್ ಎಕೇಕ್ ಕಾರ್ಯಿಂ
ಮಾಂಡುನ್ ಹಾಡ್‌ಲ್ಲಿಂ ಆಸಾತ್. ದುಡ್ವಾಚೊ ತೆಂಕೊ
ಸಲೀಸಾಯೆನ್ ಲಾಭಾನಾತ್ಲೊ ಕಾಳ್ ಆಸ್ಲೊ. ಪುಣ್ ಆಯ್ಚಿ
ಪರಿಗತ್ ವೆಗ್ಳಿ. ಆಜ್ ದುಡು ದಿತಲೆ ಬರ್ಯಾಮನಾಚೆ
ಆಸಾತ್ ಪುಣ್ ಲೊಕಾಂಥಂಯ್ ಉರ್ಭಾ ಹಾಡಂವ್ಚ್ಯಾ ದಿಶೆನ್
ವಾವ್ರ್ ಕರ್ತೆಲಿಂ ನಾಂತ್ ಜಾಲ್ಯಾಂತ್.
ಎಕಾ ತೆಂಪಾದಿಂ
ಫಿರ್ಗಜೆಚಿಂ ಸಂಘಟನಾಂ ಸಯ್ತ್ ಪರ್ಗಾಂವಾಂನಿ
ಅಪುರ್ಭಾಯೆಚಿಂ ಕೊಂಕಣಿ ಕಾರ್ಯಿಂ ಮಾಂಡುನ್
ಹಾಡ್ತಾಲಿಂ ಪುಣ್ ಆತಾಂ ಕಾಂಯ್ ಪಾಂಚ್ ಸಂಘಟನಾಂ
ಜಿವಾಳ್ ಉರ್ಲ್ಯಾಂತ್. ನವೆ ಮುಖೆಲಿ ತಯಾರ್ ಜಾಂವ್ಕ್
ನಾಂತ್ ವಾ ತ್ಯಾ ದಿಶೆನ್ ಕಾಮಾಂ ಜಾಂವ್ಕ್ ನಾಂತ್.
ಆಮಿ ಕಾಮ್ ಕರ್ನ್
ಆಸ್ಚೊ ಗಾಂವ್ ಆಮ್ಚೊ ಗಾಂವ್ ನ್ಹಯ್ ಮ್ಹಣ್ತಚ್
ಸರ್ಕಾರಿ ಕಾನುನಾಂ ಸಯ್ತ್ ಥೊಡೆಪಾವ್ಟಿಂ ಆಮ್ಕಾಂ
ಸ್ವತಂತ್ರ್ ರಿತಿನ್ ಕಾರ್ಯಿಂ ಮಾಂಡುನ್ ಹಾಡುಂಕ್
ಥೊಡೆಪಾವ್ಟಿಂ ತ್ರಾಸ್ ದಿತಾತ್.
8.
ಗಲ್ಫಾಂತ್ ಮುಖ್ಲ್ಯಾ ವರ್ಸಾಂನಿ ಕೊಂಕಣಿಚೊ ಫುಡಾರ್
ಕಸೊ ರಾವತ್ ಮ್ಹಣ್ ತುಕಾ ಭಗ್ತಾ?
ಹಿ ಕಾಳ್ಜಿ
ತೆಂಪಾದ್ಲಿ, ಆನಿ ದಾಯ್ಜಿದುಭಯ್ ಸಂಘಟನಾಚಿ ಸುರ್ವಾತ್
ಕರ್ತಾನಾ ಸಯ್ತ್ ಆಮ್ಕಾಂ ಆಸ್ಲಿ. Journey for
1000 Miles begins with Single Step
ಮ್ಹಳ್ಳೆಪರಿಂ ಆಮಿ ಹ್ಯಾ ದಿಶೆನ್ ಏಕ್ ಮೇಟ್ ಕಾಡ್ಲೆಂ
ಆನಿ ಹೊ ಆಶಾವಾದ್ ಆಮಿ ಜಿವಾಳ್ ದವರ್ಚಿ ಗರ್ಜ್ ಆಸಾ.
ಕಿತ್ಯಾಕ್ ಮ್ಹಳ್ಯಾರ್ ಜೆರಾಲ್ ರಿತಿನ್ ಸಾಂಗ್ಚೆಂ
ತರ್ ಹರ್ಯೆಕಾ ವೀಸ್-ಪಂಚ್ವಿಸ್ ವರ್ಸಾಂನಿ ಏಕ್
ಜನಾಂಗ್ ಎಕೇಕ್ ಮೇಟ್ ಫುಡೆಂ ವೆತಾ, ಜಶೆಂ ಭುರ್ಗಿಂ
ತರ್ನಾಟಿಂ ಜಾತಾತ್, ತರ್ನಾಟೆ ಫುಡಾರಾಕ್ ಪಾವ್ತಾತ್,
ಫುಡಾರಾಕ್ ಪಾವ್‌ಲ್ಲಿಂ ಜಾಣ್ತಿಂ ಜಾತಾತ್,
ರಿಟಾಯರ್ಡ್ ಜಾತಾತ್. ಹೆಂ ಸ್ವಾಭಾವಿಕ್, ಪುಣ್ ಜಶೆಂ
ಏಕ್ ಜನಾಂಗ್ ಮುಕಾರ್ ಗೆಲ್ಲ್ಯೆಪರಿಂಚ್ ತಾಂಚ್ಯಾ
ಪಾಟ್ಲ್ಯಾನ್ ಯೆತಲ್ಯಾ ಜನಾಂಗಾಕ್ ತಯಾರ್ ಕರ್ಚಿ
ಸಯ್ತ್ ಜವಾಭ್ದಾರಿ ಘೆಂವ್ಕ್ ಜಾಯ್. ಚಡ್ತಾವಾಂಕ್
ಹ್ಯಾ ದಿಶೆನ್ ಚಿಂತಪ್ ಆಟಂವ್ಕ್ ಜಾಯ್ನಾ. ಕೊಣಾಯ್ಕೀ
ಜಬರ್‌ದಸ್ತೆನ್ ಮುಖೆಲಿ ಕರುಂಕ್ ಜಾಯ್ನಾ, ವಾ
ಅಪ್ಶೆಂಚ್ ಮುಖೆಲಿ ಉದೆತಿತ್ ಮ್ಹಣುನ್ ಆಶೆಂವ್ಕ್‌ಯೀ
ಜಾಯ್ನಾ. ಫುಡಾರಾಚ್ಯಾ ಮುಖೆಲಿಂಕ್ ವೆಳಾಕಾಳಾನುಸಾರ್
ಜೊಕ್ತಿ ಜವಾಭ್ದಾರಿ ದಿಲಿ ತರ್ ತಾಂಕಾಂ ಇತ್ಲೆಂಚ್
ಮಾರ್ಗ್‌ದರ್ಶನ್ ಪಾವ್ತಾ, ಆತಾಂಚಿ ಪಿಳ್ಗಿ ಬುಧ್ವಂತ್
ಆನಿ ವೆಗಿಂಚ್ ಶಿಕ್ಚಿ ಕ್ಷಮತಾ ಆಸ್ಚಿ. ದೆಕುನ್
ಫಾಲ್ಯಾಂ ಗಲ್ಫಾಂತ್ ಕಿತೆಂ ಜಾಯ್ತ್ ಮ್ಹಣ್ ಆತಾಂಚ್
ಸಾಂಗುಂಕ್ ಜಾಯ್ನಾ ಪುಣ್ ಆಮಿ ಭರ್ವಸೊ ಸಾಂಡಿನಾಸ್ತಾಂ
ಹ್ಯಾ ದಿಶೆನ್ ವಾವ್ರ್ ಮುಖಾರುನ್ ವಚುಂಕ್ ಜಾಯ್ ಅಶೆಂ
ಮ್ಹಾಕಾ ಭಗ್ತಾ.
9.
ಚಾಳಿಸ್ ವರ್ಸಾಂಚ್ಯಾಕಿ ಚಡ್ ಕೊಂಕಣಿ ಸಂಗ್-ಸಂಸ್ಥ್ಯ್
ಸ್ಥಾಪನ್ ಕರ್ನ್, ಹೆರಾಂಕ್ ಮಾರ್ಗ್‌ದರ್ಶನ್ ದಿವ್ನ್
ಕೊಂಕ್ಣಿಚೊ ವಾವ್ರ್ ಕೆಲ್ಲ್ಯಾ ತುಕಾ ಆತಾಂಚ್ಯಾ
ಕಾಳಾಚ್ಯಾ ಯುವಜಣಾಂಕ್, ಯುವ ಮುಖೆಲಿಂಕ್ ಕಿತೆಂಯ್
ಸಾಂಗುಂಕ್ ಆಸಾ?
ಆಮ್ಚ್ಯಾ
ಪಾಂಯಾಂಚ್ಯೊ ವ್ಹಾಣೊ ಜರ್ಲ್ಯೊ ತರ್ ವಾ ಪರ್ನ್ಯೊ
ಜಾಲ್ಯೊ ತರ್ ನವ್ಯೊ ಘೆವ್ಯೆತ್. ಆಮಿ ನ್ಹೆಸ್ಚಿ
ಮುಸ್ತಾಯ್ಕಿ ಪರ್ನಿ ಜಾಲಿ ವಾ ಪಿಂಜ್ಲಿ ತರ್ ತಿ ನವಿ
ಘೆವ್ಯೆತ್, ಆಮ್ಚಿ ಆಸ್ತ್ ಹೊಗ್ಡಾಯ್ಲಿ ತರ್ ಪರತ್ ತಿ
ಕಮಾವ್ಯೆತ್. ಪುಣ್ ಅಮ್ಚಿ ಪ್ರಾಯ್ ಉತರ್ತಚ್ ತಿ ಪರತ್
ಹಾಡಂವ್ಕ್ ಜಾಂವ್ಚೆಂ ನಾ ದೆಕುನ್ ತರ್ನಾಟ್‌ಪಣಾರ್
ಆಮಿ ಕರ್ಯೆತ್ ಜಾಲ್ಲಿಂ ಜಾಯ್ತಿಂ ಸಮಾಜಿಕ್ ಕಾರ್ಯಿಂ
ಆಸಾತ್. ಆಮಿ ಮುಖೆಲ್ಪಣ್ ಘೆಂವ್ಕ್ ಶಿಕುಂಕ್ ಜಾಯ್,
ಹೆರಾಂಕ್ ಬರೆಂ ದಿಂವ್ಚ್ಯಾ ದಿಶೆನ್ ಬರೆಂ ಚಿಂತಪ್
ಆಮ್ಚೆಥಂಯ್ ಆಟಂವ್ಕ್ ಜಾಯ್.
Who is
Knows the Way , Shows the Way and Goes the
way ಮ್ಹಳ್ಳ್ಯಾ ತತ್ವಾಂನಿ ಚಲ್ಚೆಂ ಗರ್ಜೆಚೆಂ.
ಏಕ್ ಝಳ್ಚಿ ವಾತ್ ಕಶೆಂ ಸಭಾರ್ ವಾತಿಂಕ್ ಜೀವ್
ದಿಂವ್ಕ್ ಸಕ್ತಾ ತಶೆಂಚ್ ಏಕ್ ಖರೊ ಮುಖೆಲಿ ಸಭಾರ್
ಮುಖೆಲಿಂಕ್ ರಚುಂಕ್ ಸಕ್ತಾ. ಹರ್ಯೆಕಾ ಸಮಾಜೆಂತ್
ದೋನ್ ಥರಾಚೆ ಲೋಕ್ ಆಸಾತ್. ಏಕ್ ವರ್ಗಾಚೆ ಫಕತ್
ನಿಸ್ವಾರ್ಥಿ ಚಿಂತ್ಪಾನ್ ಕಾಮ್ ಕರ್ತೆಲೆ ತರ್ ದುಸ್ರೆ
ಫಕತ್ ನಾಂವ್ ಜೊಡ್ತೆಲೆ. ನಾಂವ್ ಜೊಡ್ಚಾಕ್ ಕಾಮ್
ಕರ್ತೆಲೆ ಥೊಡ್ಯಾಚ್ ತೆಂಪಾಚೆಂ ಜಯ್ತ್ ಜೊಡ್ತಾತ್
ಪುಣ್ ಲಾಂಬ್ ಕಾಳಾಕ್ ತೆ ಕಿತೆಂಚ್ ಸಾಧನ್ ಕರುಂಕ್
ಸಕಾನಾಂತ್. ಆಮಿ ಆಮ್ಚೊ ಶೆವೊಟ್ ಆನಿ ಚಿಂತಪ್ ಫಕತ್
ಕಾಮ್ ಕರ್ಚಾಂತ್ ದವರ್ಶೊ ಶಿವಾಯ್ ನಾಂವ್ ಜೊಡ್ಚಾಂತ್
ನ್ಹಯ್. ಆಮ್ಚೆಂ ಕಾಮ್ ಜರೀ ನಾಂವಾಕ್ ಫಾವೊ ಜಾಲ್ಲೆಂ
ತರ್, ಎಕಾ ದಿಸಾ ತೆಂ ಆಮ್ಕಾಂ ಸೊಧುನ್ ಯೆತಾಚ್ ಮ್ಹಣ್
ಉಡಾಸ್ ದವರ್ಚೆಂ.
