[ಖಬರ್:] ಮುಂಬಯಾಂತ್ ಭೋವ್ ಅಪುರ್ಭಾಯೆಚೊ ಕೊಂಕ್ಣಿ ಎಕ್ವಟ್

ಮುಂಬಯ್ (ಫೆಬ್ರೆರ್ 26): ಹೆಚ್ಚ್ ಫೆಬ್ರೆರಾಚ್ಯಾ 26 ತಾರಿಕೆರ್, ಆಯ್ತಾರಾ ಸಾಂಜೆರ್ 6 ವೊರಾಂಚೆರ್, ಅಂಧೇರಿಂತ್‌ಲ್ಯಾ ಆತ್ಮದರ್ಶನ್ ಹಾಂಗಾಸರ್, ಆಶಾವಾದಿ ಪ್ರಕಾಶನಾಚ್ಯಾ ಮುಖೇಲ್‌ಪಣಾಖಾಲ್ ಸುರ್ವಾತ್‌ಲ್ಲ್ಯಾ ಮುಂಬಯಾಂತ್ಲ್ಯಾ ಸರ್ವ್ ಕೊಂಕ್ಣಿ ಸಂಘಟನಾಂನಿ ಎಕ್ವಟಿತ್ ಜಾವ್ನ್ ಆಸಾ ಕೆಲ್ಲೆಂ ’ಕೊಂಕ್ಣಿ ಸಹಮಿಲನ್’ ಭೋವ್ ಅಪುರ್ಭಾಯೆನ್ ಚಲ್ಲೆಂ.

ಮಿರಾರೋಡ್ ಫಿರ್ಗಜೆಚಿ ಯಾಜಕ್ ಮಾ|ಬಾ|ಮೆಲ್ವಿನ್ ಡಿ’ಕುನ್ಹಾ ಹಾಂಚ್ಯಾ ಅಧ್ಯಕ್ಶ್‌ಪಣಾಖಾಲ್, ಖ್ಯಾತ್ ಉಧ್ಯಮಿ ಮಾನೆಸ್ತ್ ವಿ.ಪಿ. ಲೋಬೊ ಮುಖೇಲ್ ಸಯ್ರೊ ಜಾವ್ನ್ ಆಸ್‌ಲ್ಲ್ಯಾ ಹ್ಯಾ ಕಾರ್ಯಾಂತ್, ಕೊಂಕ್ಣೆಂತ್ ಪಂದ್ರಾ ವರ್ಸಾಂ ಸಂಪಯಿಲ್ಲ್ಯಾ ಆಶಾವಾದಿ ಪ್ರಕಾಶನಾಚೆ ಪಾಂಚ್ ನವೆ ಕೊಂಕ್ಣಿ ಬುಕಾಂಚಿ ಮೊಕ್ಳೀಕ್, ತಶೆಂಚ್ ’ಪಯ್ಣಾರಿ.ಕೊಮ್ ವಿಶೇಸ್ ಅಂಕೊ’ ಪರ್ಗಟ್ಲೆ, ತಶೆಂಚ್ ಕೊಂಕ್ಣೆಂತ್ ವೆವೆಗ್ಳ್ಯಾ ಶೆತಾಂತ್ ವಾವ್ರ್ ಕೆಲ್ಲ್ಯಾಂಕ್ ’ಜೀವ್‌ಅವ್ದೆಚೆಂ ಸಾಧನ್’ ಕೆಲ್ಲ್ಯಾ ಸರ್ವ್ ಮಾನೆಸ್ತ್; ಹ್ಯಾರಿಬೋಯ್ (ರಂಗ್‌ಮಂಚ್), ಹೆನ್ರಿ ಡಿ’ಸೋಜ್ (ಸಂಗೀತ್), ಲಾರೆನ್ಸ್ ಸಲ್ಡಾನ್ಹಾ (ಸಂಗೀತ್), ತಶೆಂಚ್ ಕೊಂಕ್ಣೆಂತ್ಲ್ಯಾ ವೆವೆಗ್ಳ್ಯಾ ಶೆತಾಂನಿ ’ವಿಶೇಸ್ ಸಾಧನ್’ ಕೆಲ್ಲ್ಯಾ ಸರ್ವ್ ಮಾನೆಸ್ತ್; ವಾಲ್ಟರ್ ಲಸ್ರಾದೊ ನಕ್ರೆ (ಅನುವಾದ್), ವಿ. ಡಿ’ಸಿಲ್ವಾ ಕಾಂಜೂರ್‌ಮಾರ್ಗ್ (ಸಾಹಿತ್), ಫ್ರಾನ್ಸಿಸ್ ಫೆರ್ನಾಂಡಿಸ್ ಕಾಸ್ಸಿಯಾ (ನಾಟಕ್), ಹೆನ್ರಿ ಡಿ’ಪಾವ್ಲಾ (ಪತ್ರಿಕೋಧ್ಯಮ್), ಲಾರೆನ್ಸ್ ಕುವೆಲ್ಹೊ (ಪತ್ರಿಕೋಧ್ಯಮ್), ಹ್ಯಾರಿ ಫೆರ್ನಾಂಡಿಸ್ ಬಾರ್ಕುರ್ (ಫಿಲ್ಮ್ ನಿರ್ದೇಶನ್), ಜೋಯ್ ಪಾಲಡ್ಕಾ (ನಾಟಕ್ ನಿರ್ದೇಶನ್), ಫ್ರಾನ್ಸಿಸ್ ಒಲಿವೆರಾ (ರಂಗ್‌ಮಂಚ್) ಹಾಂಕಾಂ ಮಾನ್‌ಪತ್ರ್, ಯಾದಿಸ್ತಿಕಾ ಆನಿ ಕಾಣಿಕೊ ದೀವ್ನ್ ಪರ್ಗಟ್ ಮಾನ್ ಕೆಲೊ.

ಸಾಂಜೆರ್ 5:30 ಚೆರ್ ಕಾಫಿ ಫಳಾರ್ ಆನಿ ನೊಂದಾವ್ಣಿಸವೆಂ 6 ವೊರಾಕ್ ಸುರ್ವಾತ್ ಜಾಲ್ಲ್ಯಾ ಹ್ಯಾ ಕಾರ್ಯಾಂತ್ ಕೊಂಕಣ್‌ತಾರಾಂ (ಜೆರಿಮೆರಿ) ಪಂಗ್ಡಾಥಾವ್ನ್, ಮಾನೆಸ್ತ್ ಜೋನ್ ಮಸ್ಕರೇನ್ಹಸಾನ್ ಬರವ್ನ್, ಸಂಗೀತ್ ದಿಲ್ಲೆಂ ’ಸ್ವಾಗತ್ ಗೀತ್’, ಪಂಗ್ಡಾಚ್ಯಾ ಸಾಂದ್ಯಾಂನಿ ಗಾಯನ್ ಕರ್ತಚ್, ಕಾರ್ಯೆಂ ನಿರ್ವಾಹಕ್ ಮಾನೆಸ್ತ್ ಫ್ರಾನ್ಸಿಸ್ ಒಲಿವೆರಾನ್ ಲೊಕಾಕ್ ಯೆವ್ಕಾರ್ ಮಾಗೊನ್, ’ಕೊಂಕ್ಣಿ ಎಕ್ವಟ್ 2017’ ಹಾಚ್ಯಾ ಪ್ರಧಾನ್ ಸಂಚಾಲಕ್ ಮಾನೆಸ್ತ್ ರಿಚಾರ್ಡ್ ಡಿ’ಸೋಜ್ (ಕೊಂಕಾಣ - ನವಿಮುಂಬಯ್), ತಶೆಂಚ್ ಸಂಚಾಲಕಿ ಮಾನೆಸ್ತಿಣ್ ಗ್ಲೆಂಡಾ ಅಲ್ಮೇಡಾ (ದಹಿಸರ್) ಹಾಂಕಾಂ, ಸಯ್ರ್ಯಾಂಕ್ ವೆದಿಚೆರ್ ಆಪವ್ನ್ ಹಾಡುಂಕ್ ಉಲೊ ದಿಲೊ. ಕಾರ್ಯಾಚೆಂ ಉಧ್ಘಾಟನ್ ಕರುನ್ ಮಾ|ಬಾ|ಜೋಕಿಮ್ ಫೆರ್ನಾಂಡಿಸಾನ್ ಹ್ಯಾ ಅಪುರ್ಭಾಯೆಚ್ಯಾ ಕಾರ್ಯಾಕ್ ಬರೆಂ ಮಾಗ್ಲೆಂ.

ಮಾನೆಸ್ತ್ ರಿಚಾರ್ಡ್ ಡಿ’ಸೋಜಾನ್ ಅಪ್ಲ್ಯಾ ಸ್ವಾಗತ್ ಉಲವ್ಪಾಂತ್, ವೆದಿಚೆರ್ ಆಸ್‌ಲ್ಲ್ಯಾ ಮುಖೆಲ್ ಸಯ್ರ್ಯಾಂಚಿ ವಳೊಕ್ ಕರುನ್, ’ಹೊ ಎಕ್ವಟ್, ಏಕ್ ಸುರ್ವಾತ್ ಮಾತ್, ಪಯ್ಲೆಂ ಮೇಟ್ ಸಾಹಿತಿಕ್ ಮೇಟ್, ಫುಡ್ಲೆಂ ಮೇಟ್ ಸಾಂಸ್ಕೃತಿಕ್ ಮೇಟ್ ಆಮಿ ಅಶೆಂಚ್ ಎಕ್ವಟಿತ್ ಥರಾನ್ ಕಾಡುಂಕ್ ಆಸಾ, ದೆಕುನ್ ಎಕ್ವಟಿಕ್ ಚಿಂತ್ಪಾಚ್ಯಾ ಸರ್ವಾಂಕ್ ಲಾಗಿಂ ಯೇವ್ನ್, ಮುಂಬಯಾಂತ್ ಕೊಂಕ್ಣಿ ಬೊಂದೆರ್ ಉಭೊಚ್ಚ್ ಆಸ್ಚೆಪರಿಂ ಕರುಂಕ್ ಉಲೊ ದಿಲೊ’.

’ಆಶಾವಾದಿ ಪ್ರಕಾಶನಾಚೊ ಪಂದ್ರಾ ವರ್ಸಾಂಚೊ ವಾವ್ರ್’ - ಮಾನೆಸ್ತ್ ಹಿಲರಿ ಡಿ’ಸಿಲ್ವಾ (ಪ್ರಸನ್ನ ನಿಡ್ಡೋಡಿ) ಹಾಣೆಂ ವಳೊಕ್ ಕರ್ನ್ ದಿತಚ್ಚ್, ಮಾನೆಸ್ತ್ ಅನಂತ್ ಅಮೆಂಬಳಾನ್, ಮೊಕ್ಳೀಕ್ ಜಾಂವ್ಕ್ ಆಸ್ಚ್ಯಾ ಪಾಂಚ್ ಬುಕಾಂಚಿ ವಳೊಕ್ ಕರುನ್ ದಿಲಿ. ಮಾನೆಸ್ತ್ ಸಿರಿಲ್ ಕ್ಯಾಸ್ತಲಿನೊನ್ ಹ್ಯಾ ಪಾಂಚ್ ಬುಕಾಂಚ್ಯಾ ಬರವ್ಪ್ಯಾಂಚಿ ಮಟ್ವ್ಯಾನ್ ವಳೊಕ್ ಕರುನ್ ದಿಲಿ.

ಉಪ್ರಾಂತ್ ಹೆ ಪಾಂಚ್ ಬೂಕ್ ಮೊಕ್ಳೀಕ್ ಕರುಂಕ್ ಆಯಿಲ್ಲ್ಯಾ ಸಯ್ರ್ಯಾಂಚಿ ಮಟ್ವಿ ವಳೊಕ್ ಫ್ರಾನ್ಸಿಸ್ ಒಲಿವೆರಾನ್ ಕರುನ್ ದಿತಚ್ಚ್, ತಾಂಕಾಂ ವೆದಿಚೆರ್ ಆಪವ್ನ್ ಕಾಡುಂಕ್ ಬುಕಾಂಚ್ಯಾ ಬರವ್ಪ್ಯಾಂಕ್ ಉಲೊ ದಿಲೊ;

ಬಂಧ್ (ವಲ್ಲಿ ಕ್ವಾಡ್ರಸಾಚ್ಯೊ ಮಟ್ವ್ಯಾ ಕಾಣ್ಯಾಂಚೊ ಜಮೊ) ಬುಕಾಚಿ ಮೊಕ್ಳೀಕ್ ಮಾನೆಸ್ತ್ ಚಾರ್ಲ್ಸ್ ಡಿ’ಮೆಲ್ಲೊ ಪಾಂಗ್ಳಾ ಹಾಣೆಂ ಕೆಲೆಂ, ಸರ್ಗಾವಯ್ಲಿ ಮಾಂಯ್ (ರೊನಾಲ್ಡ್ ಒಲಿವೆರಾ ಪಡುಕೋಣೆಚೊ ಮಟ್ವ್ಯಾ ಕಾಣ್ಯಾಂಚೊ ಜಮೊ) ಬುಕಾಚಿ ಮೊಕ್ಳೀಕ್ ಮಾನೆಸ್ತಿಣ್ ಜಾನೆಟ್ ಡಿ’ಸೋಜಾನ್ ಕೆಲೆಂ, ಅಪವಿತ್ರ್ ಸಂಬಂಧ್ (ವಾಲ್ಟರ್ ಲಸ್ರಾದೊ ನಕ್ರೆಚೊ ಮಟ್ವ್ಯಾ ಕಾಣ್ಯಾಂಚೊ ಜಮೊ) ಬುಕಾಚಿ ಮೊಕ್ಳಿಕ್ ಮಾನೆಸ್ತ್ ಆಂಡ್ರು ಮೆಂಡೊನ್ಸಾನ್ ಕೆಲೆಂ, ಬಜಾರ್ (ವಲ್ಲಿ ಕ್ವಾಡ್ರಸಾಚ್ಯಾ ಕವಿತೆಂಚೊ ಜಮೊ) ಬುಕಾಚಿ ಮೊಕ್ಳೀಕ್ ಮಾನೆಸ್ತಿಣ್ ಫಿಲೋಮೆನಾ ಸಾಂಫ್ರಾನ್ಸಿಸ್ಕೊ (ಗೊಂಯ್‌ಚಿ ಫಾಮಾದ್ ಕವಯತ್ರಿ) ಹಿಣೆಂ ಕೆಲೆಂ, ಮುಗ್ದನಾತ್‌ಲ್ಲಿಂ ಗಿತಾಂ (ವಲ್ಲಿ ಕ್ವಾಡ್ರಸಾಚ್ಯಾ ಕವಿತಾ ವಿಶ್ಲೇಷಣಾಂಚೊ ಜಮೊ) ಬುಕಾಚಿ ಮೊಕ್ಳೀಕ್ ಮಾನೆಸ್ತ್ ಜಿಯೋ ಆಗ್ರಾರ್ ಹಾಣೆಂ ಕೆಲೆಂ.

ಬುಕಾಂಚೆಂ ಮೊಕ್ಳೀಕ್ ಕಾರ್ಯೆಂ ಜಾವ್ನ್, ಅಪ್ಲ್ಯಾ ಉಲವ್ಪಾನ್ ಬಾಯ್ ಫಿಲೊಮೆನಾ ಸಾಂಫ್ರಾನ್ಸಿಸ್ಕೊನ್ ವಲ್ಲಿ ಕ್ವಾಡ್ರಸಾಚ್ಯಾ ಕವಿತೆಂಚೆರ್, ಚಿಂತ್ಪಾಚೆರ್, ತಶೆಂಚ್ ಸಂಸಾರಿ ಬಜಾರಿ ಚಿಂತ್ಪಾಚೆರ್ ಅಪ್ಲಿಂ ಭಗ್ಣಾಂ ಉಚಾರುನ್, ಅಪ್ಲಿ ಕವಿತಾ ಪ್ರಸ್ತುತ್ ಕೆಲಿ.

ಜಿಯೋ ಅಗ್ರಾರ್ ಅಪ್ಲ್ಯಾ ಉಲವ್ಪಾಂತ್, ವಲ್ಲಿಚ್ಯಾ ಕೊಂಕ್ಣಿ ಮಿಸಾಂವಾವಿಶಿಂ, ಕಠೀಣ್ ಹಟ್ ಅನಿ ಪರಿಶ್ರಮಾಸವೆಂ, ಕೊಣಾಚ್ಯಾ ಖೊಡಿ-ಕುಲ್ಪಾಂಚೊ ಸಯ್ತ್ ಬೆಪರ್ವಾ ಕರುನ್ ಕರ್ಚ್ಯಾ ವಾವ್ರಾಚೆರ್ ಎಕೊಡೊ ಉಜ್ವಾಡ್ ಫಾಂಕಯ್ಲೊ, ತಶೆಂಚ್ ಎಕಾ ಲ್ಹಾನ್ ಕವಿತೆಚೆರ್ ಅಪ್ಲ್ಯಾ ಜಿಣ್ಯೆಂತ್ ಗಳ್ಸಿಲ್ಲ್ಯಾ ಅನ್ಭೋಗಾನಿಮ್ತಿಂ ಸವಿಸ್ತಾರ್ ರಿತಿನ್ ಕೆಲ್ಲಿಂ ಎಕೇಕ್ ವಿಶ್ಲೇಷಣಾಂ, ಖಂಡಿತ್ ಜಾವ್ನ್ ಕವಿ ಜಾಲ್ಲ್ಯಾನಿಂಚ್ ವಾಚುಂಕ್ ತಶೆಂಚ್ ಶಿಕುಂಕ್ ಜಾಯ್ತೆಂ ಆಸಾ ಮ್ಹಣಾಲೊ. ಬರವ್ಪಿ ರೊನಾಲ್ಡ್ ಒಲಿವೆರಾ ಅಪ್ಲ್ಯಾ ಬುಕಾಕ್ ಪರತ್ ಏಕ್ ಪಾವ್ಟಿಂ ಪರ್ಗಟುನ್ ಯೇಂವ್ಕ್ ಕಾರಣ್ ಜಾಲ್ಲ್ಯಾ ಸರ್ವಾಂಕ್ ಉಪ್ಕಾರಿ ಮನಾನ್ ಧಿನ್ವಾಸ್ಲೆಂ.

ಉಪ್ರಾಂತ್ ’ಪಯ್ಣಾರಿ ವಿಶೇಸ್ ಅಂಕೊ 2017’ ಹಾಚೆಂ ಉಗ್ತಾವಣ್ ಮಾ|ಬಾ|ಮೆಲ್ವಿನ್ ಡಿ’ಕುನ್ಹಾನ್ ಕೆಲೆಂ, ಬುಕಾಚೆಂ ಉಗ್ತಾವಣ್ ಜಾತಚ್ಚ್, ವಲ್ಲಿ ಕ್ವಾಡ್ರಸಾನ್ ಅಪ್ಲ್ಯಾ ಸಂಪಾದಕಾಚ್ಯಾ ಉತ್ರಾಂನಿ ಹ್ಯಾ ಬುಕಾಕ್ ಹಕೀಗತೆಂತ್ ಯೇಂವ್ಕ್ ಕಾರಣ್ ಜಾಲ್ಲ್ಯಾ ಸರ್ವಾಂಕ್ ಧಿನ್ವಾಸುನ್, ಹೆಂ ಮೇಟ್ ಏಕ್ ಲ್ಹಾನ್ ಸುರ್ವಾತ್ ಮಾತ್, ಫುಡೆಂ ಜಾಯ್ತಿಂ ಕಾಮಾಂ ಕರುಂಕ್ ಆಸ್ಚೆವಿಶಿಂ ಮಾಹೆತ್ ದಿಲಿ, ತಶೆಂಚ್ T3 ಪ್ರಾಯೋಜಿತ್ ’ಪಯ್ಣಾರಿ ಸಾಹಿತಿಕ್ ಸ್ಪರ್ಧೊ’ ಚೆಂ ಘೋಷಣ್ ಕೆಲೆಂ.

ಕಾರ್ಯಾಚ್ಯಾ ಪಯ್ಲ್ಯಾ ಭಾಗಾಚೆಂ ನಿರ್ವಾಹಣ್ ಫ್ರಾನ್ಸಿಸ್ ಒಲಿವೆರಾ ಪಡುಕೋಣೆನ್ ಭೋವ್ ಅಪುರ್ಭಾಯೆನ್ ಕರ್ತಚ್, ಕೊಂಕಣ್ ತಾರಾಂ ಪಂಗ್ಡಾಥಾವ್ನ್ ಅಪುರ್ಭಾಯೆಚೊ ನಾಚ್ ಪ್ರಸ್ತುತ್ ಜಾಲೊ.

ಕಾರ್ಯಾಚ್ಯಾ ದುಸ್ರ್ಯಾ ಭಾಗಾಂತ್ ಸುರ್ವಾತೆರ್ ವಲ್ಲಿ ಕ್ವಾಡ್ರಸಾನ್, ಕೊಂಕ್ಣೆಂತ್ ವೆವೆಗ್ಳ್ಯಾ ಶೆತಾಂನಿ ಜಾಯ್ತೊ ವಾವ್ರ್ ಕರುನ್, ಖಬರ್ ನಾಸ್ತಾನಾಂಚ್ ಆಮ್ಕಾಂ ಸಾಂಡುನ್ ಗೆಲ್ಲ್ಯಾಂಚೊ ಉಡಾಸ್ ಕಾಡುನ್, ಪ್ರತ್ಯೇಕ್ ಜಾವ್ನ್ ದೆ|ವಿಕ್ಟರ್ ಕೊನ್ಸೆಸೊ, ಆನಿ ದೆ|ಗಿಬ್ಬಾ ಕುಲ್ಶೇಕರ್ ಹಾಂಚ್ಯಾ ಅತ್ಮ್ಯಾಕ್ ಶಾಂತಿ ಮಾಗುನ್, ಸರ್ವಾಂನಿ ಅರ್ಧೆಂ ಮಿನುಟ್ ಉಭೆಂ ರಾವುನ್ ಮಾಗ್ತಚ್,

’ಅಪ್ಲ್ಯಾ ಎದೊಳ್‌ಚ್ಯಾ ತೆತ್ತೀಸ್ ವರ್ಸಾಂಚ್ಯಾ ಸಾಹಿತಿಕ್ ಕಾಳಾರ್, ಭೊವ್ ಥೊಡೆ ದೀಸ್ ಅಪ್ಲ್ಯಾ ಜಿಣ್ಯೆಆವ್ದೆಂತ್ ಉಡಾಸಾಕ್ ಉರ್ಚೆತಸಲೆ ಜಾವ್ನಾಸಾತ್, ತಾಂತುಂ ಆಯ್ಚೊ ದೀಸ್ ಖಂಡಿತ್ ಮಹತ್ವಾಚೊ, ಕಿತ್ಯಾಕ್ ಮ್ಹಳ್ಯಾರ್, ಅಪ್ಲ್ಯಾ ಸಾಹಿತಿಕ್ ಭುರ್ಗ್ಯಾಪಣಾರ್ ಜ್ಯಾ ಕಲಾಕಾರಾಂಕ್, ಸಂಗೀತ್‌ಕಾರಾಂಕ್, ಸಾಹಿತ್‌ಕಾರಾಂಕ್ ಹಾಂವ್ ವಳ್ಕುನ್ ಆಯಿಲ್ಲೊಂ, ಆಜ್ ತಸಲ್ಯಾಂಕ್ ಹಾಂಗಾಸರ್ ವೆದಿಚೆರ್ ಪರ್ಗಟ್ ಮಾನ್ ಆಸಾ ಆನಿ ಹ್ಯಾ ಕಾರ್ಯಾಂತ್ ವಾಂಟೆಲಿ ಜಾಂವ್ಚೆಂ ಭಾಗ್ ದೆವಾನ್ ಮ್ಹಾಕಾ ಫಾವೊ ಕೆಲಾಂ, ಆನಿ ಅಸಲ್ಯಾಂಕ್ ದಿಲ್ಲೊ/ದಿಂವ್ಚೊ ಮಾನ್, ಫಕತ್ತ್ ತಾಂಕಾಂ ದಿಲ್ಲೊ ಮಾನ್ ನ್ಹಯ್, ಬಗಾರ್ ಅಮ್ಕಾಂಚ್ ಆಮಿ ದಿಂವ್ಚೊ ಮಾನ್. ಜಾಂವ್ಕ್ ಪುರೊ ಕೊಂಕ್ಣಿ ವಾವ್ರ್ ಕೆಲ್ಲ್ಯಾ ಹ್ಯಾ ಮಹಾನ್ ಕಲಾಕಾರಾಂನಿ ಸಂಸಾರಿ ವಿಲಾಸಿ ಧನ್-ದಿರ್ವೆಂ ಪುಂಜಾಂವ್ಕ್ ನಾ, ಪುಣ್ ಅಪ್ಲ್ಯಾ ಮಾಯಾಮೊಗಾನಿಮ್ತಿಂ ಆಜ್ ಸಯ್ತ್ ಕೊಂಕ್ಣೀ ಲೋಕ್ ತಾಂಚೆರ್ ಅಭಿಮಾನ್ ಪಾವ್ತಾ ಆನಿ ತಾಂಕಾಂ ಮಾನ್ ಕರ್ತಾ’ ಮ್ಹಣಾಲೊ.

’ಜಿಣ್ಯೆಆವ್ದೆಚೆಂ ಸಾಧನ್’ ಕೆಲ್ಲ್ಯಾ ಹ್ಯಾರಿಬೋಯ್, ಹೆನ್ರಿ ಡಿ’ಸೋಜ್, ಲಾನ್ರೆನ್ಸ್ ಸಲ್ಡಾನ್ಹಾ ಹಾಂಚಿಂ ಮಾನ್‌ಪತ್ರಾಂ; ನೆರಿ ನಜ್ರೆತ್ ತಾಕೊಡೆ, ಹಿಲ್ಡಾ ಪಾಂಗ್ಳಾ, ಹಿಲರಿ ಡಿ’ಸಿಲ್ವಾ ಹಾಣಿಂ ವಾಚುನ್ ಜಾತಚ್, ಮಾ|ಮೆಲ್ವಿನ್ ಡಿ’ಕುನ್ಹಾ ಆನಿ ಮಾನೆಸ್ತ್ ವಿ.ಪಿ.ಲೋಬೊ ಹಾಂಚೆಸವೆಂ ಮಾನೆಸ್ತಿಣ್ ಜ್ಯೋತಿ ಲೋಬೊ ಹಾಣಿಂ ಮಾನ್‌ಪತ್ರ್, ಯಾದಿಸ್ತಿಕಾ, ಆನಿ ಕಾಣಿಕೊ ದಿವುನ್ ಪರ್ಗಟ್ ಮಾನ್ ಕೆಲೊ.

ತ್ಯೇ ಉಪ್ರಾಂತ್, ’ವಿಶೇಸ್ ಸಾಧನ್’ ಕೆಲ್ಲ್ಯಾಂಕ್, ಮುಂಬಯಾಂತ್ಲ್ಯಾ ಕೊಂಕ್ಣಿ ಸಂಘಟನಾಚೆ ಮುಖೆಲಿಂನಿ ಪರ್ಗಟ್ ಮಾನ್ ಕೆಲೊ; ವಾಲ್ಟರ್ ಲಸ್ರಾದೊ ನಕ್ರೆಕ್ ಮಾಲ್ವಾಣಿ ಸಂಘಟನಾಚೊ ಅಧ್ಯಕ್ಷ್ ಫೆಲಿಕ್ಸ್ ಮಾಲ್ವಾಣಿನ್ ಮಾನ್ ಕೆಲೊ, ವಿ. ಡಿ’ಸಿಲ್ವಾಕ್ ಥಾಣೆ ಸಂಘಟನಾಚೊ ಕಾರ್ಯದರ್ಶಿ ಮಾನೆಸ್ತ್ ಕ್ರಿಸ್ಟೋಫರ್ ಡಿ’ಸೋಜಾನ್ ಮಾನ್ ಕೆಲೊ,

ಹೆನ್ರಿ ಡಿ’ಪಾವ್ಲಾಚೊ ಮಾನ್ ಸ್ವೀಕಾರ್ ಕೆಲ್ಲ್ಯಾ ಮಾನೆಸ್ತ್ ಫಿಲಿಫ್ ವಿ’ ಡಿ’ಸೋಜಾಕ್ ಕೊಂಕಣ್‌ತಾರಾಂ ಸಂಘಟನಾಚೊ ಅಧ್ಯಕ್ಷ್ ಜೋನ್ ಮಸ್ಕರೇನ್ಹಸಾನ್ ಮಾನ್ ಕೆಲೊ. ಫ್ರಾನ್ಸಿಸ್ ಫೆರ್ನಾಂಡಿಸಾಕ್ ಬೊರಿವ್ಲಿ ಸಂಘಟನಾಚೊ ಪ್ರತಿನಿಧಿ ಜೋಸೆಫ್ ಬೊರಿವ್ಲಿನ್ ಮಾನ್ ಕೆಲೊ,

ಲಾರೆನ್ಸ್ ಕುವೆಲ್ಹೊಚೊ ಮಾನ್ ಸ್ವೀಕಾರ್ ಕೆಲ್ಲ್ಯಾ ಸಿಪ್ರಿ ಸಂಪಿಗೆಕ್ ಕಾಂದಿವಲಿ ಸಂಘಟನಾಚೊ ಅಧ್ಯಕ್ಷ್ ವಲೇರಿಯನ್ ಪಾಯ್ಸ್ ಹಾಣೆಂ ಮಾನ್ ಕೆಲೊ, ಹ್ಯಾರಿ ಫೆರ್ನಾಂಡಿಸ್ ಬಾರ್ಕುರ್ ಹಾಕಾ ಮಲಾಡ್ ಕೊಂಕ್ಣಿ ಸಂಘಟನಾಚೊ ಪ್ರತಿನಿಧಿ ಸಿರಿಲ್ ಕ್ಯಾಸ್ತಲಿನೊನ್ ಮಾನ್ ಕೆಲೊ,

ಜೋಯ್ ಪಾಲಡ್ಕಾಕ್ ವಸಯ್ ಕೊಂಕ್ಣಿ ಸಂಘಟನಾಚೊ ಅಧ್ಯಕ್ಷ್ ರೆಜಿನಾಲ್ಡ್ ಸಾಂತುಮಾಯೆರಾನ್ ಮಾನ್ ಕೆಲೊ, ಫ್ರಾನ್ಸಿಸ್ ಒಲಿವೆರಾಕ್ ಬಾರ್ಕುರ್‌ಗಾರಾಂಚ್ಯಾ ಸಂಘಟನಾಚೊ ಅಧ್ಯಕ್ಷ್ ಐವನ್ ರೆಬೆಲ್ಲೊನ್ ಮಾನ್ ಕೆಲೊ.

ಸರ್ವಾಂಕ್ ಮಾನ್‌ಪತ್ರ್, ಯಾದಿಸ್ತಿಕಾ ಆನಿ ಕಾಣಿಕೊ ದಿವುನ್ ಮಾನ್ ಕೆಲ್ಲ್ಯಾ ಅಧ್ಯಕ್ಷ್/ಪ್ರತಿನಿಧಿಂಕ್ ’ಯಾದಿಸ್ತಿಕಾ ಆನಿ ಕಾಣಿಕೊ’ ದಿವುನ್ ರಿಚಾರ್ಡ್ ಡಿ’ಸೋಜ್ ಅನಿ ಗ್ಲೆಂಡಾ ಅಲ್ಮೇಡಾ ಹಾಣಿಂ ಧಿನ್ವಾಸ್ಲೆಂ. ಇತ್ಲೆಂ ಅಪುರ್ಭಾಯೆಚೆಂ ಕಾರ್ಯೆಂ ಮಾಂಡುನ್ ಹಾಡ್‌ಲ್ಲೆಪಾಸತ್ ಪ್ರಧಾನ್ ಸಂಚಾಲಕ್ ರಿಚಾರ್ಡ್ ಡಿ’ಸೋಜಾ ಆನಿ ಸಂಚಾಲಕಿ ಗ್ಲೆಂಡಾ ಅಲ್ಮೇಡಾ ಹಾಂಕಾಂ ಮಾ|ಬಾ|ಮೆಲ್ವಿನ್ ಡಿ’ಕುನ್ಹಾನ್ ಯಾದಿಸ್ತಿಕಾ ದಿವುನ್ ಮಾನ್ ಕೆಲೊ.

ತೆಚ್ಚ್‌ಪರಿಂ ಮುಂಬಯಾಂತ್ಲ್ಯಾ ಸರ್ವ್ ಕೊಂಕ್ಣಿ ಸಂಘಟನಾಚ್ಯಾ ಮುಖೆಲ್ಯಾಂಕ್/ಪ್ರತಿನಿಧಿಂಕ್ ವೆದಿಚೆರ್ ಆಪವ್ನ್, ಮಾ|ಬಾ|ಮೆಲ್ವಿನ್ ಡಿ’ಕುನ್ಹಾನ್ ಸರ್ವಾಂಕ್ ಬುಕಾಂಚಿ ಮಾನ್‌ಪ್ರತಿ ದಿಲಿ.

’ಸಾಹಿತ್ಯಾಮುಖಾಂತ್ರ್ ಸಮಾಜ್‌ಸೆವಾ’ - ಹೊಚ್ಚ್ ಧ್ಯೇಯ್ ಆಶಾವಾದಿ ಪ್ರಕಾಶನಾಚೊ, ದೆಕುನ್ ’ಕುವೇಯ್ಟ್‌ಗಾರಾಂಚೊ ಝೆಲೊ ವಿಶೇಸ್ ಅಂಕೊ (2003), ದಿವೊ-ದಾಯ್ಜ್ ವಿಶೇಸ್ ಅಂಕೊ (2005), ಮಿತ್ರ್-ದಾಯ್ಜ್ ವಿಶೇಸ್ ಅಂಕೊ (2007) ಆನಿ ಪಯ್ಣಾರಿ.ಕೊಮ್ ವಿಶೇಸ್ ಅಂಕೊ (2017)’ ಮುಖಾಂತ್ರ್ ಫಕತ್ತ್ ಗರ್ಜೆಂತ್ ಆಸ್ಚ್ಯಾಂಕ್ ಆರ್ಥಿಕ್ ಕುಮೊಕ್ ಕೆಲ್ಯಾ.

ಆನಿ ಹೆಂಚ್ ಚಿಂತಾಪ್ ಆಮ್ಚೆಂ ಫುಡೆಂಯ್ ಜ್ಯಾರಿ ಆಸ್ತಲೆಂ, ಆಧ್ಲ್ಯಾ ವರ್ಸಾಂತ್ ಪಯ್ಣಾರಿ.ಕೊಮ್ ಸುರ್ವಾತೆರ್ ಅಪ್ಲ್ಯಾ ಭಲಾಯ್ಕಿ ಹೊಗ್ಡಾವ್ನ್ ಭೋವ್ ಕಶ್ಟಾಂತ್ ಆಸ್‌ಲ್ಲ್ಯಾ ಫಾಮಾದ್ ಕೊಂಕ್ಣಿ ಬರವ್ಪಿ ರೊನಾಲ್ಡ್ ಪಿರೇರಾ ಆಂಜೆಲೋರಾಕ್ ’ರೊನಾಲ್ಡ್ ಪಿರೇರಾ ನಿಧಿ’ ಸ್ಥಾಪಿತ್ ಕರುನ್ ಲಗ್ಬಗ್ ದೇಡ್ ಲಾಖ್ ರುಪ್ಯಾಂಚಿ ಮಜತ್ ಕೆಲ್ಲಿ. ಪುಣ್ ಆಜ್ ಹೊಚ್ಚ್ ಬರವ್ಪಿ, ಉಟೊನ್ ಬಸುಂಕ್ ಸಕಾನಾ, ವಖ್ತಾತ್ ಸಯ್ತ್ ತಾಚೆಲಾಗಿಂ ದುಡು ನಾ ದೆಕುನ್ ಆಜ್ ಪರ್ಗಟ್‌ಲ್ಲ್ಯಾ ಪಾಂಚ್ ಬುಕಾಂಚ್ಯಾ ವಿಖ್ರ್ಯಾಚೊ ಅರ್ಧೊ ಹ್ಯಾ ಮಿಸಾಂವಾಖಾತಿರ್ ಆಮಿ ಕಾಮ್ ಕರ್ತೆಲ್ಯಾಂವ್, ದೆಕುನ್ ಹ್ಯಾ ಪಾಂಚ್ ಬುಕಾಂಚೆಂ ಮೋಲ್ ರು.875 ಪುಣ್ ಅಮಿ ರು.600 ಲೆಕಾನ್ ತುಮ್ಕಾಂ ಪಾವಿತ್ ಕರ್ತೆಲ್ಯಾಂವ್, ಆನಿ ಹಾಂತ್ಲೊ ಅರ್ಧೊ ಐವಜ್ ಆಮಿ ರೊನಾಲ್ಡ್ ಪಿರೇರಾಚ್ಯಾ ವಖ್ತಾಂಚ್ಯಾ ಖರ್ಚಾಕ್ ದಿತೆಲ್ಯಾಂವ್ ದೆಕುನ್ ಬರೆ ಮನಾಚ್ಯಾ ಕೊಂಕ್ಣಿ ಲೊಕಾಂನಿ ಅಪ್ಲೆಂ ಉದಾರ್ ಮನ್ ಧಾಖಂವ್ಕ್ ಉಲೊ ದಿಲೊ.

ಮುಖೆಲ್ ಸಯ್ರೊ ಜಾವ್ನ್ ಹಾಜರ್ ಆಸ್‌ಲ್ಲೊ ಖ್ಯಾತ್ ಉಧ್ಯಮಿ ತಶೆಂಚ್ T3 ಸಂಸ್ಥ್ಯಾಚೊ ಮಾಲ್ಹಕ್ ಮಾನೆಸ್ತ್ ವಿ. ಪಿ. ಲೋಬೊನ್, ಕೊಂಕ್ಣಿ ಪತ್ರಿಕೋಧ್ಯಮಾಚೆ ಉದರ್ಗತೆಖಾತಿರ್ ವಾವುರ್ತಾನಾ, ಫಕತ್ತ್ ಸಿಂತಿಮೆಂತಾಂ ಮಾತ್ರ್ ಮತಿಂತ್ ದವರಿನಾಸ್ತಾನಾ, ಆರ್ಥಿಕ್ ರಿತಿನ್ ಸಯ್ತ್ ಚಿಂತಾಪ್ ಆಟಂವ್ಚೆಂ ಗರ್ಜ್ ಆಸ್ತಾಂ, ಕೊಂಕ್ಣೆಚೊ ಜಾಯ್ತೊ ಉಧ್ಯಮಿ ಆಜ್ ಮುಂಬಯಾಂತ್ ಆಸಾ ಪುಣ್ ಕೊಂಕ್ಣಿ ಪತ್ರಾಂನಿ ಜಾಹೀರಾತಾಂ ದಿಸೊನ್ ಯೆಂವ್ಚಿಂ ಭೋವ್ ಥೊಡಿಂ, ದೆಕುನ್ ಕೊಂಕ್ಣಿ ಅಭಿವೃದ್ದೆಚಿ ಜವಾಭ್ದಾರಿ ಸರ್ವಾಂನಿ ಮ್ಹಣುನ್ ಸಾಂಗಾಲಾಗ್ಲೊ.

ಸನ್ಮಾನಿತಾಂ ತರ್ಫೆನ್ ಉಲಯಿಲ್ಲ್ಯಾ ಮಾನೆಸ್ತ್ ಹೆನ್ರಿ ಡಿ’ಸೋಜಾನ್ ’ಎದೊಳ್ ಮ್ಹಣಾಸರ್ ಕೊಂಕ್ಣೆಂತ್ ಖಂಯ್ಚರ್‌ಯೀ ಅಸಲೆಂ ಏಕ್ ಅಪುರ್ಭಾಯೆಚೆಂ ಕಾರ್ಯೆಂ ಜಾಂವ್ಕ್ ನಾ, ದೆಕುನ್ ಹೊ ಮಾನ್ ಖರೊಚ್ಚ್ ಜಾವ್ನ್ ಭೋವ್ ಮಹತ್ವಾಚೊ ತಶೆಂಚ್ ಕಾಳ್ಜಾಂತ್ ಸದಾಂಚ್ ಉಡಾಸಾಕ್ ಉರ್ಚೆತಸಲೊ, ಆನಿ ಅಸಲೆಂ ಏಕ್ ಕಾರ್ಯೆಂ ಮುಂಬಯಾಂತ್ ಉಭೆಂ ಕರ್ಚೆಂ ತಿತ್ಲೆಂ ಸಲೀಸಾಯೆಚೆಂ ನ್ಹಯ್ ತರ್‌ಯೀ, ಪಾಟ್ಲ್ಯಾನ್ ಜಾಯ್ತಿ ಮಿನತ್ ಕೆಲ್ಲ್ಯಾ ಎಕ್ವಟ್ ಪಂಗ್ಡಾಕ್ ತಶೆಂಚ್ ಆಶಾವಾದಿ ಪ್ರಕಾಶನಾಕ್ ಉಲ್ಲಾಸ್ ಪಾಟಯ್ಲೊ.

ಕಾರ್ಯಾಚೊ ಅಧ್ಯಕ್ಷ್ ಮಾ|ಬಾ|ಮೆಲ್ವಿನ್ ಡಿ’ಕುನ್ಹಾನ್ ಅಪ್ಲ್ಯಾ ಉಲವ್ಪಾಂತ್; ’ದೆವಾನ್ ಸರ್ವಾಂಕ್ ವೆವೆಗ್ಳಿಂ ದೆಣಿಂ ದಿಲ್ಯಾಂತ್ ಆನಿ ತಿಂ ದೆಣಿಂ ಹರ್ಯೆಕ್ಲ್ಯಾಂನಿ ಸಮಾಜೆಚ್ಯಾ ಬರೆಪಣಾಪಾಸತ್ ಗಳ್ಸುಂಚಿ ಭೋವ್ ಗರ್ಜ್ ಆಸಾ, ದೆಕುನ್ ಸಾಹಿತ್ಯಾಮುಖಾಂತ್ರ್ ಸಮಾಜ್‌ಸೆವಾ ಕರ್ಚ್ಯಾ ಆಶಾವಾದಿ ಪ್ರಕಾಶನಾಚ್ಯಾ ಮಿಸಾಂವಾಕ್ ಲೊಕಾಂಚೊ ಭರ್ಪೂರ್ ಪಾಟಿಂಬೊ ಮೆಳುಂದಿ ತಶೆಂಚ್ ಸರ್ವೆಸ್ಪರಾಚಿಂ ಆಶೀರ್ವಾದಾಂ ಪಡುಂದಿ ಮ್ಹಣಾಲೊ’

ಮಾನೆಸ್ತಿಣ್ ಗ್ಲೆಂಡಾ ಅಲ್ಮೇಡಾನ್ ಉಪ್ಕಾರ್ ಆಟವ್ಣಿ ಕೆಲಿ. ದುಸ್ರ್ಯಾ ಭಾಗಾಚೆಂ ಕಾರ್ಯೆಂ ನಿರ್ವಾಹಣ್ ವಲ್ಲಿ ಕ್ವಾಡ್ರಸಾನ್ ಕೆಲ್ಲೆಂ.

ಭಾತ್ಮಿ: ’ಕೊಂಕ್ಣಿ ಎಕ್ವಟ್ ಭಾತ್ಮಿ’

[ಕೊಂಕಣ - ನವಿಮುಂಬಯಾಂತ್ಲೆಂ ಕೊಂಕ್ಣಿ ಸಂಘಟನಾನ್, ಕೊಂಕಣ್‌ತಾರಾಂ ಜೆರಿಮೆರಿ ಹಾಣಿಂ ಅಪ್ಲ್ಯಾ ಸಂಘಟನಾಚ್ಯಾ ತರ್ಫೆನ್ ರೊನಾಲ್ಡ್ ಪಿರೇರಾಕ್ ಕುಮೊಕ್ ಕರ್ಚ್ಯಾ ಆಶಾವಾದಿ ಪ್ರಕಾಶನಾಚ್ಯಾ ಮಿಸಾಂವಾಂತ್ ವಾಂಟೆಲಿ ಜಾಂವ್ಚೊ ಭರ್ವಸೊ ದಿಲೊ]