ಪಯ್ಣಾರಿ.ಕೊಮ್ Poinnari.Com: Konkani Research, Konkani Study, Progressive Konkanni Literature, Konkani Writing, Konkani Poetry, Creative Writing, Konkani Books, Konkani Association, Konkani Work, Fiction Writing, Poetry Criticism, Poetry Contests, Writing C

[ಕವಿತಾ] ಮ್ಹಜಿ ಜೀಣ್ ಕೊಣಾಕ್ ಜಾಯ್? (- ಉರ್ಜಿತಾ ಭೊಬೆ)

ಹೊ ಸಂಸಾರ್ ಏಕ್ ಪಯ್ಣ್ ಮ್ಹಳ್ಳೊ ಅರ್ಥ್ ಕರ್ನ್ ಹಿ ಕವಿತಾ ವಾಚ್ಲಿ ತರ್ ಹ್ಯಾ ಕವಿತೆಚ್ಯಾ ಎಕೆಕಾ ಕಡ್ವ್ಯಾಂನಿ ತಾತ್ವಿಕ್ ಚಿಂತಪ್ ದಿಸುನ್ ಯೆತಾ, ಜಾಂವ್ ಹಿ ಕವಿತಾ ಆಯ್ಲೆವಾರ್ ಪರ್ಗಾಂವಾಂನಿ ಪರ್ಕಿ ಜಾವ್ನ್, ಅಪ್ಲ್ಯಾ ಗಾಂವಾಕ್ ಪಯ್ಸಿಲೊ ಜಾವ್ನ್ ವ್ಹಳ್ವಳೆ ಭಗ್ಚ್ಯಾ ಮನಶಾಚೆ ಕಳ್ವಳೆ ಆಸುಯೆತಾ. ಅಸಲ್ಯಾ ಮನ್ಶಾನ್ ಪರ್ಗಾಂವಾಂತ್ ಜೊಡ್ತಾನಾ ತೊ ಸಗಳ್ಯಾಂಕ್ ಗರ್ಜೆಚೊ ಪುಣ್ ಜೆದನಾ ತೊ ಅಪ್ಲೆಂ ಸಗಳೆಂ ಹೊಗ್ಡಾವ್ನ್ ಘೆತಾ ತೆದನಾ ತೊ ಕೊಣಾಕ್‌ಚ್ ನಾಕಾ ಮ್ಹಳ್ಳೆಂ ಹ್ಯಾ ಕವಿತೆಚೆಂ ಮೂಳ್ ಚಿಂತಪ್.

- ಸಂ

[ಕವಿತಾ] ಮ್ಹಜಿ ಜೀಣ್ ಕೊಣಾಕ್ ಜಾಯ್? (- ಉರ್ಜಿತಾ ಭೊಬೆ)

ಮ್ಹಜಿ ಜೀಣ್ ಕೊಣಾಕ್ ಜಾಯ್? ಮ್ಹಜೆ ಸಾರ್ಕಿಲ್ಯಾಂಚಿಂ ಹಾಂಗಾ ಘರಾಂ ಆಸ್ತಾತ್ ಖಂಯ್? ಗಾಂವ್ ಸೊಡುನ್ ಭೊಂವ್ತಾಂ ಹಾಂವ್ ಕಾಮ್ ಮೆಳತ್ ಥಂಯ್ ದೊಳ್ಯಾಂತ್ ಘೆವ್ನ್ ಸಪನ್ ಬರೆ ದಿಸ್ ಯೆತ್ ಕಾಯ್ ಎಕಾ ದಿಸಾಕ್ ಲೆಗೀತ್ ಮ್ಹಜಿ ಜೀಣ್ ಕೊಣಾಕ್ ಜಾಯ್? ರಸ್ತೆ ಬಾಂದ್ತಾಂ ಕಡಕ್ ವತಾನ್ ಘರಾಂ ಉಬಿಂ ಕರ್ತಾಂ ಚಿರೆ ಉಬಾರೂನ್ ಬಾಯ್ಲ್ ಭುರ್ಗಿಂ ಲೆಗೀತ್ ಮ್ಹಜಿಂ ವತ್ಲಿಂ ಕಾಯ್ ಅಶೀಂಚ್ ಝುರೂನ್ ಆನಿ ಕಿತ್ಲ್ಯೊ ಪೀಳ್ಗ್ಯೊ ಹಾಂವೆಂ ಅಸೊಚ್ ಝರೂಂಕ್ ಜಾಯ್ ಎಕಾಚ್ ದಿಸಾಕ್ ಲೆಗೀತ್ ಮ್ಹಜಿ ಜೀಣ್ ಕೊಣಾಕ್ ಜಾಯ್ ಆಯ್ಜ್ ಹೆ ಶಾರಾಂತ್ ಫಾಲ್ಯಾಂ ಥಂಯ್ ಕಾಮಾಂ ವ್ಯಾಪಾಕ್ ಕಸ್ಲೀಚ್ ನಾ ವಂಯ್ ಮಾಥ್ಯಾರ್ ನಾ ಪಾಖೆ ನಾ ತೆಕುಂಕ್ ವಣತ್ ಘಾಮ್ ಗಳುನ್ ಗೆಲಾಂ ಆಟುನ್ ರಗತ್ ಕೊಣಾಕ್ ಮ್ಹಣೂನ್ ದಾಖೊಂವ್ ವಚುನ್ ಕಾಳ್ಜಾವೆಲೆ ಘಾಯ್ ಎಕಾಚ್ ದಿಸಾಕ್ ಲೆಗೀತ್ ಮ್ಹಜಿ ಜೀಣ್ ಕೊಣಾಕ್ ಜಾಯ್ ಯೊಜ್ಣ್ಯೊ ಹಾಂಗಾ ಅಶೆ ತರೆನ್ ಕೆಲ್ಯಾತ್ ಜಗುಂ ಪೂಣ್ ಹಾಂವ್ ಸಂಕ್ಟಾನಿ ಉರುಂ ಉದ್ರಗತಿ ನಾವಾಖಾಲ್ ಆಧೊಗತಿ ಜಾಲ್ಯಾ ಜಾಪ್ ಹಾಜಿ ರೆ ಕೊಣಾಕ್ ವಿಚಾರುಂ ಖಂಯ್ಚೆಕಡೆಂ ಮಾಗುಂಕ್ ವಚುಂ ಮ್ಹಜೆ ಖಾತೀರ್ ನ್ಯಾಯ್ ಎಕಾಚ್ ದಿಸಾಕ್ ಲೆಗೀತ್ ಮ್ಹಜಿ ಜೀಣ್ ಕೊಣಾಕ್ ಜಾಯ್ ಶಿಕ್ಷೀಣಾಚಿ ಮ್ಹಾಕಾ ಕಸ್ಲಿ ಗರಜ್ ತಾಜೆರ್ ತುಮ್ಚೀಚ್ ಮಕ್ತೆದಾರಿ ಮಜೂರ್ ಹಾಂವ್ ಮಜೂರಚ್ ಉರ್ಚೊಂ ಹಾತುಂತಚ್ ತುಮ್ಚಿ ಹುಶಾರಿ ಪೀಳ್ಗ್ಯಾನ್ ಪೀಳ್ಗಿ ಚಲತ್ ಆಯ್ಲ್ಯಾ ತುಮ್ಚಿ ಹುಕೂಮಶಾಯ್ ಎಕಾಚ್ ದಿಸಾಕ್ ಲೆಗೀತ್ ಮ್ಹಜಿ ಜೀಣ್ ಕೊಣಾಕ್ ಜಾಯ್ ಶಿಕುನ್ ಹಾಂವ್ ಸರ್ಲ್ಯಾರ್ ವಯ್ರ್ ಕೊಣ್ ತುಮ್ಚೊ ಕಾಡ್ಟಲೊ ಕೊಯ್ರ್ ವಜಿಂ ಉಬಾರುಂಕ್ ಯೆತ್ಲೊ ಕೊಣ್ ಕೊಣ್ ಮಾರ್ತಲೊ ರಸ್ತ್ಯಾರ್ ಫೊಂಡ್ ನಾಸ್ತನಾ ಹಾಂವ್ ಜಾಣವ್ಲಿ ಜರಿ ತುಮ್ಕಾಂ ಮ್ಹಜಿ ಉಣಾಯ್ ಎಕಾಚ್ ದಿಸಾಕ್ ಲೆಗೀತ್ ಮ್ಹಜಿ ಜೀಣ್ ಕೊಣಾಕ್ ಜಾಯ್ ಫೊಲ್ಗಿ ಆಪ್ಲ್ಯಾ ಘರಾನಿ ಬಸುನ್ ಮ್ಹಜೆರ್ ಸಗ್ಳೊ ಒಗ್ ಕಾಡಾತ್ ಪಾಂಯ್ ಧರೂನ್ ಮ್ಹಜೊ ಚಡಾತ್ ಮ್ಹಾಕಾ ಮಾತ್ ಸಕಯ್ಲ್ ಒಡಾತ್ ವಚತ್ ಥಂಯ್ ಕರತ್ ರಾವಾತ್ ಮ್ಹಜಿ ಬಕ್ತ್ಶಾಯ್ ಎಕಾಚ್ ದಿಸಾಕ್ ಲೆಗೀತ್ ಮ್ಹಜಿ ಜೀಣ್ ಕೊಣಾಕ್ ಜಾಯ್ ಖಟಾಟೊಪ್ ತುಮ್ಚೊ ಸಗ್ಳೊ ಪೀಳ್ಗ್ಯೊ ಮ್ಹಜ್ಯೊ ಅಶೊಚ್ ಉರುಂ ಮಜೂರ್ ಮ್ಹಣೂನ್ ಝರೂನ್ ವಚುಂ ಮಜೂರ್ ಮ್ಹಣಚ್ ಮರುಂ ಘಡೊಂವ್ಕ್ ಮ್ಹಾಕಾ ದಿವಂ ನಾಕಾ ಮ್ಹಜಿ ಅಸ್ಮಿತಾಯ್ ಎಕಾಚ್ ದಿಸಾಕ್ ಲೆಗೀತ್ ಮ್ಹಜಿ ಜೀಣ್ ಕೊಣಾಕ್ ಜಾಯ್ ಶಾರಾಂಕ್ ತುಮ್ಚ್ಯಾ ಹಾಂವ್ ಆತಾಂ ಜಡ್ ಜಾಲಾಂ ಗಾಂವಾಂತ್ ವಚುನ್ ಮರ್ತಾಂ ಹಾಂವೆಂ ಥಾರಾಯ್ಲಾಂ ಮರ್ಣಾಕ್ ಲೆಗೀತ್ ಮ್ಹಜೆ ಘಾಲ್ಯಾ ತುಮಿ ಮನಾಯ್ ಎಕಾಚ್ ದಿಸಾಕ್ ಲೆಗೀತ್ ಮ್ಹಜಿ ಜೀಣ್ ಕೊಣಾಕ್ ಜಾಯ್ ಜೀವೊ ದವ್ರುಂಕ್ ಧಡ್ಪಡ್ ತುಮ್ಚಿ ಜೀಣ್ ಸುಧಾರುಂಕ್ ದಿಂವ್ ನಾಕಾತ್ ಜೀವಾಕ್ ವಿಟುನ್ ಗೆಲ್ಯಾರ್ ಹಾಂವ್ ಮರುಂಕ್ ಲೆಗೀತ್ ದಿವಂ ನಾಕಾತ್ ಜಗ್ಪಾ ನಾವಾರ್ ದೀತ್ ರಾವಾತ್ ಜಿವೀತ್ ಮರಣ್ಪ್ರಾಯ್ ಎಕಾಚ್ ದಿಸಾಕ್ ಲೆಗೀತ್ ಮ್ಹಜಿ ಜೀಣ್ ಕೊಣಾಕ್ ಜಾಯ್ **** - ಉರ್ಜಿತಾ ಭೊಬೆ**. [ಜ್ಯೂನ್, 2020]

	ಉರ್ಜಿತಾ ಭೊಬೆ: ಸಾಹಿತಿಕ್ ಅಭಿರುಚ್ ಆಸ್ಚಿ ಗೊಂಯ್ಚಿ ಉರ್ಭೆವಂತ್ ಕವಯತ್ರಿ ಹಿ. ಕವಿಸಮ್ಮೇಳನಾಂನಿ ತಿ ಕಾರ್ಯಾಳ್. ಹೆರ್ ಭಾಸೆಂತ್ಲಿಂ ಕವಿತಾ ಸಯ್ತ್ ವಾಸ್ಚಿ ಅಭಿರುಚ್ ಆಸ್ಚ್ಯಾ ಹಿಚೊ ಫುಡ್ಲದ್ ಕವಿತಜಮೊ ’ಉರ್ಜಾಸ್ರೋತ್’ ಪರ್ಗಟ್ ಜಾಲಾ. ಕೊಂಕಣಿ ಕವಿತೆಂನಿ ನವಿ ಸಕತ್ ಭರ್ಚೆ ದಿಶೆನ್ ಬಾಯ್ ಉರ್ಜಿತಾ ವಾವ್ರ್ ಕರುನ್ ಆಸಾ. ಪಯ್ಣಾರಿ-ವೀಜ್ ಸಾಹಿತಿಕ್ ಸ್ಪರ್ಧೊ 2018 ಚೆರ್ ಹಿಚ್ಯಾ ಕವಿತೆಕ್ ದುಸ್ರೆಂ ಇನಾಮ್, ಪಯ್ಣಾರಿ-ವೀಜ್ ಸಾಹಿತಿಕ್ ಸ್ಪರ್ಧೊ 2019 ಚೆರ್ ಪಯ್ಲೆಂ ಇನಾಮ್ ಲಾಭ್ಲಾಂ.
[kovita] Mhoji jinn konnak zai? (- Urjitha Bhobe)
Ho somsar ek poinn mholl'llo orth korn hi kovita vachli tor hea kovitechea ekeka koddveamni tatvik chintop disun yeta, zamv hi kovita ailevar porgamvamni porki zaun, oplea gamvak poisilo zaun vhollvolle bhogchea monoxache kollvolle asuyeta. Osolea monxan porgamvant zoddtana to sogolleank gorjecho punn jedona to oplem sogollem hogddaun gheta tedona to konnak‌ch naka mholl'llem hea kovitechem mull chintop. - Som
[kovita] Mhoji jinn konnak zai? (- Urjitha Bhobe)
Mhoji jinn konnak zai? mhoje sarkileanchim hanga ghoram astat khoim? gamv soddun bhomvtam hamv kam' mellot thoim dolleant gheun sopon bore dis yet kai eka disak legit mhoji jinn konnak zai? roste bandtam koddok votan ghoram ubim kortam chire ubarun bail bhurgim legit mhojim votlim kai oxinch zhurun ani kitleo pillgeo hamvem osoch zhorunk zai ekach disak legit mhoji jinn konnak zai aiz he xarant faleam thoim kamam veapak koslich na vom-i mathear na pakhe na tekunk vonnot gham' gollun gelam attun rogot konnak mhonnun dakhomv vochun kallzavele ghai ekach disak legit mhoji jinn konnak zai yojnneo hanga oxe toren keleat zogum punn hamv sonkttani urum udrogoti navakhal adhogoti zalea zap haji re konnak vicharum khoinchekoddem magunk vochum mhoje khatir nyai ekach disak legit mhoji jinn konnak zai xikxinnachi mhaka kosli goroz tajer tumchich moktedari mozur hamv mozuroch urchom hatuntoch tumchi huxari pillgean pillgi cholot ailea tumchi hukumoxai ekach disak legit mhoji jinn konnak zai xikun hamv sorlear voir konn tumcho kaddttolo koir vojim ubarunk yetlo konn konn martolo rostear fondd nastona hamv zannouli zori tumkam mhoji unnai ekach disak legit mhoji jinn konnak zai folgi aplea ghorani bosun mhojer sogllo og kaddat pam-i dhorun mhozo choddat mhaka mat sokoil oddat vochot thoim korot ravat mhoji boktxai ekach disak legit mhoji jinn konnak zai khottattop tumcho sogllo pillgeo mhojeo oxoch urum mozur mhonnun zhorun vochum mozur mhonnoch morum ghoddounko mhaka divom naka mhoji osmitai ekach disak legit mhoji jinn konnak zai xarank tumchea hamv atam zodd zalam gamvant vochun mortam hamvem tharailam mornnak legit mhoje ghalea tumi monai ekach disak legit mhoji jinn konnak zai jivo dourunk dhoddpodd tumchi jinn sudharunk dimv nakat jivak vittun gelear hamv morunk legit divom nakat zogpa navar dit ravat jivit moronnprai ekach disak legit mhoji jinn konnak zai **** - Urjita Bhobe.** [Jun, 2020]

	Urjita Bhobe: sahitik obhiruch aschi gõychi urbheunt kouyotri hi. Kovisom'mellonamni ti kareall. Her bhasentlim kovita soit vaschi obhiruch aschea hicho fuddlod kovitozomo ’urzasrot’ porgott zala. Konkonni kovitemni novi sokot bhorche dixen bai urjita vaur korun asa. Poinnari-viz sahitik spordho 2018 cher hichea kovitek dusrem inam' labhlam. Poinnari-viz sahitik spordho 2019 cher poilem inam' labhlam.
[कविता] म्हजी जीण कोणाक जाय? (- उर्जिता भोबे)
हो संसार एक पयण म्हळ्ळो अर्थ कर्न ही कविता वाचली तर ह्या कवितेच्या एकेका कडव्यांनी तात्वीक चिंतप दिसून येता, जांव ही कविता आयलेवार पर्गांवांनी पर्की जावन, अपल्या गांवाक पयसिलो जावन व्हळवळे भगच्या मनशाचे कळवळे आसुयेता. असल्या मनशान पर्गांवांत जोडताना तो सगळ्यांक गर्जेचो पूण जेदना तो अपलें सगळें होगडावन घेता तेदना तो कोणाक‌च नाका म्हळ्ळें ह्या कवितेचें मूळ चिंतप. - सं
[कविता] म्हजी जीण कोणाक जाय? (- उर्जिता भोबे)
म्हजी जीण कोणाक जाय? म्हजे सारकिल्यांचीं हांगा घरां आसतात खंय? गांव सोडुन भोंवतां हांव काम मेळत थंय दोळ्यांत घेवन सपन बरे दिस येत काय एका दिसाक लेगीत म्हजी जीण कोणाक जाय? रस्ते बांदतां कडक वतान घरां उबीं करतां चिरे उबारून बायल भुरगीं लेगीत म्हजीं वतलीं काय अशींच झुरून आनी कितल्यो पीळग्यो हांवें असोच झरूंक जाय एकाच दिसाक लेगीत म्हजी जीण कोणाक जाय आयज हे शारांत फाल्यां थंय कामां व्यापाक कसलीच ना वंय माथ्यार ना पाखे ना तेकुंक वणत घाम गळुन गेलां आटुन रगत कोणाक म्हणून दाखोंव वचुन काळजावेले घाय एकाच दिसाक लेगीत म्हजी जीण कोणाक जाय योजण्यो हांगा अशे तरेन केल्यात जगूं पूण हांव संकटानी उरूं उदरगती नावाखाल आधोगती जाल्या जाप हाजी रे कोणाक विचारूं खंयचेकडें मागुंक वचुं म्हजे खातीर न्याय एकाच दिसाक लेगीत म्हजी जीण कोणाक जाय शिक्षीणाची म्हाका कसली गरज ताजेर तुमचीच मक्तेदारी मजूर हांव मजूरच उरचों हातुंतच तुमची हुशारी पीळग्यान पीळगी चलत आयल्या तुमची हुकूमशाय एकाच दिसाक लेगीत म्हजी जीण कोणाक जाय शिकुन हांव सरल्यार वयर कोण तुमचो काडटलो कोयर वजीं उबारुंक येतलो कोण कोण मारतलो रस्त्यार फोंड नासतना हांव जाणवली जरी तुमकां म्हजी उणाय एकाच दिसाक लेगीत म्हजी जीण कोणाक जाय फोल्गी आपल्या घरानी बसुन म्हजेर सगळो ओग काडात पांय धरून म्हजो चडात म्हाका मात सकयल ओडात वचत थंय करत रावात म्हजी बकत्शाय एकाच दिसाक लेगीत म्हजी जीण कोणाक जाय खटाटोप तुमचो सगळो पीळग्यो म्हज्यो अशोच उरूं मजूर म्हणून झरून वचुं मजूर म्हणच मरूं घडोंवक म्हाका दिवं नाका म्हजी अस्मिताय एकाच दिसाक लेगीत म्हजी जीण कोणाक जाय शारांक तुमच्या हांव आतां जड जालां गांवांत वचुन मरतां हांवें थारायलां मरणाक लेगीत म्हजे घाल्या तुमी मनाय एकाच दिसाक लेगीत म्हजी जीण कोणाक जाय जीवो दवरुंक धडपड तुमची जीण सुधारुंक दिंव नाकात जीवाक विटुन गेल्यार हांव मरुंक लेगीत दिवं नाकात जगपा नावार दीत रावात जिवीत मरणप्राय एकाच दिसाक लेगीत म्हजी जीण कोणाक जाय **** - उर्जिता भोबे.** [ज्यून, २०२०]

	उर्जिता भोबे: साहितीक अभिरूच आसची गोंयची उर्भेवंत कवयत्री ही. कविसम्मेळनांनी ती काऱ्याळ. हेर भासेंतलीं कविता सयत वासची अभिरूच आसच्या हिचो फुडलद कवितजमो ’उर्जास्रोत’ पर्गट जाला. कोंकणी कवितेंनी नवी सकत भर्चे दिशेन बाय उर्जिता वावर करून आसा. पयणारी-वीज साहितीक स्पर्धो २०१८ चेर हिच्या कवितेक दुस्रें इनाम लाभलां. पयणारी-वीज साहितीक स्पर्धो २०१९ चेर पयलें इनाम लाभलां.


ದಾಯ್ಜ್.ಕೊಮ್

2004 ಥಾವ್ನ್ 2011 ಪರ್ಯಾಂತ್ ಕಾರ್ಯಾಳ್ ಆಸ್‌ಲ್ಲ್ಯಾ ದಾಯ್ಜ್.ಕೊಮ್ ಚೆರ್ ಪರ್ಗಟ್‌ಲ್ಲ್ಯಾ ವಿಂಚ್ಣಾರ್ ಸಾಹಿತಾಕ್ ಆಮಿ ಫುಡಿಲ್ಯಾ ದಿಸಾಂನಿ ಪಯ್ಣಾರಿ ವಾಚ್ಪ್ಯಾಂಕ್ ಲಾಭಯ್ತೆಲ್ಯಾಂವ್.