ಖಲ್ಲಾ ಎಕ - ದೋ ಗ್ಯಾರಾ (ಪಂಜಾಬ ಪ್ರವಾಸ ಕಥನ) : ಸಾಹಿತ್ಯಾಂತ್ ಆಸ್ಚ್ಯಾ ಸಭಾರ್ ಪ್ರಕಾರಾಂ ಪಯ್ಕಿಂತ್ ’ಪಯ್ಣಾ ಸಾಹಿತ್’ ಏಕ್. ಪಯ್ಣಾ ಸಾಹಿತ್ ಮ್ಹಳ್ಯಾರ್ ಫಕತ್ ಭಂವುಂಕ್ ಗೆಲ್ಲ್ಯಾ ಜಾಗ್ಯಾಚೆಂ ವರ್ಣನ್ ಆನಿ ಪಿಂತುರಾಂ ಮಾತ್ರ್ ನ್ಹಯ್, ಬಗರ್ ಬರವ್ಪ್ಯಾಚೊ ಅನ್ಭವ್ ಆನಿ ತೊ ಅನ್ಭವ್ ಎಕಾ ನಿರ್ದಿಶ್ಟ್ ರುಪಾನ್ ವಾಚಪ್ಯಾಂಕ್ ಪಾವಯಿಲ್ಲೊ ಜಾವ್ನಾಸ್ತಾ ದೆಕುನ್ ವಾಚ್ಪಿ ತೆಂ ವಾಚ್ತಾನಾಂಚ್ ಕಾಂಯ್ ಅಪುಣ್ ಸ್ವತಾ ತ್ಯಾ ಜಾಗ್ಯಾಕ್ ಭಂವುನ್ ಅಯಿಲ್ಲೆಪರಿಂ ಭಗ್ತಾ.

ವೆಂಕಟೇಶ್ ನಾಯಕ್ ವೃತ್ತೆನ್ ಪ್ರಾಧ್ಯಾಪಕ್ ಪುಣ್ ಪ್ರವೃತ್ತೆನ್ ಏಕ್ ಕವಿ, ಲೇಖಕ್. ಕನ್ನಡ್ ತಶೆಂಚ್ ಕೊಂಕಣಿ ಭಾಶೇಂತ್ ತೊ ಬರಯ್ತಾ. ಪತ್ರಾಂ-ಅಂತರ್‌ಜಾಳಿಂಚೆರ್ ತಾಚಿಂ ಬರಪಾಂ ಪರ್ಗಟ್ಲ್ಯಾಂತ್. ಸಾಹಿತ್ ಅಕಾಡೆಮಿಚ್ಯಾ ಅನುದಾನಾಂತ್ ತಾಣೆಂ ಕೆಲ್ಲ್ಯಾ ಪಂಜಾಬ್ ಪಯ್ಣಾಚೊ ಅನ್ಭವ್ ಹಾಂಗಾಸರ್ ದಿಲಾ.

- ಸಂ.

2. ಖಲ್ಲಾ ಎಕ - ದೋ ಗ್ಯಾರಾ [ವೆಂಕಟೇಶ್ ನಾಯಕ್, ಮಂಗ್ಳುರ್]

ಪಂಜಾಬ ಭಾಯರ ಸರಲೆ - ಸಂಪರ್ಕ ಕ್ರಾಂತಿ

ಆಮಕಾ ಸುರವೇ ದಿವಸು ಚಂಢೀಗಡಾಕ ವಚಾಕ ಆಶಿಲೆ ಕಾರಣ ಆನಿ ಆಮೀ ಯೋಜನಾ ಗಾಲೇಲ ವರೀ ಚಂಢೀಗಡ - ಪಟಿಯಾಲಾ - ಅಮೃತಸರ ಭೇಟ ನಿರ್ಧರಿತ ಕೆಲೆಲ ಕಾರಣ ಆಮೀ ಸೀದಾ ಚಂಢೀಗಡಾಕ ವಚೆ ಮ್ಹಣ ನಿರ್ಧಾರ ಕೆಲೆಲ ಪ್ರಮಾಣೇ, ರೈಲ ಶೋಧೀತನಾ ಆಮಕಾ ಕೊಚ್ಚುವಲಿ- ಚಂಢೀಗಡ ರೈಲ ಮೆಳೇ ಹಾಜೆ ನಾಂವ ಸಂಪರ್ಕ ಕ್ರಾಂತಿ ಕಿತ್ಯಾಕ ಮ್ಹಳ್ಯಾರ ಸಭಾರ ರಾಜ್ಯ ದಾಟೂನ ಹ್ಯಾ ರೈಲ ಎಕ ಸಾಂಕಳೀ ಜಾವನು ಆಸೂನ ಲೋಕಾಂಕ ಸಂಚಾರಾಕ ಪ್ರತಿಕೂಲ ಜಾವನು ಆಸಾ. ಕೊಡಿಯಾಲಾಚೆ ಜಂಕ್ಷನ್ ಸ್ಟೇಷನ ಮ್ಹಣ ನಾವಾಂಕಿತ ಜಾಲೇಲ ಕಂಕನಾಡಿ ಸ್ಟೇಷನ ದಾಕೂನ ಹ್ಯಾ ರೈಲ ಆಮಕಾ ಮೆಳೆ. ಪುಡೆ ಆಮೀ ಉಲಯತನಾ ಅತ್ತಾವರ ರೈಲ ಸ್ಟೇಷನ್ ಆನೀ ಕಂಕನಾಡಿ ರೈಲ ಸ್ಟೇಷನ್ ಜಾಲ್ಯಾರಿ ಆರತಾ, ಹಾಕಾ ಸೆಂಟ್ರಲ ಆನಿ ಜಂಕ್ಷನ್ ಮ್ಹಣ ನಾವಾಂಕಿತ ಕೋರನು ಸಾಬಾರ ಜನಾಕ ಗೊಂದೋಳ ಜಾಲೇಲ ಮಿಗೇಲ ಗಮನಾಕ ಆಯಲಾ. ನಿತ್ಯಾ ಕಾಮ ಜಾವನು ಮಡಂತ್ಯಾರಾ ದಾಕೂನ ಧರ್ಮಸ್ಥಳಾ ಎಕ್ಸಪ್ರೆಸ್ ಬಸಾರ ಯೆತನಾ ಯಾತ್ರಿ ಲೋಕ ಚದಾವತ ಜಾವನು ಕೇರಳಾಕ ವಚಾಕ ಮಂಗಳೂರು ರೈಲ ಸ್ಟೇಷನ ಮ್ಹಣತಾಂಚಿ ತಾಂಕಾ ಕಂಕನಾಡಿ ಆನೀ ಅತ್ತಾವರಾ ಮಧೇಂತು ಗೋಂದೋಳ ಜಾವನು ಥೊಡೆ ಪಂತಾ ಪಂಪವೆಲಾಂತು ದೆಂವತಾಚೀ. ಎಕ ಪ್ರಚಲಿತ ಆಶೀಲೆ ನಾಂವ ಬದಲ ಜಾಲ್ಯಾರಿ ಲೋಕ ತಾಕಾ ಪುಡಲೆ ನಾವಾನಚೀ ಆಪೋವಚೆ ಆಮೀ ಪಳೋವೇತ ಆಜೀಕ ಪಂಪವೆಲ - ಮಹಾವೀರ ವೃತ್ತ ಜಾಲ್ಯಾರಿಯ ಕೊಡಿಯಾಲಾಚೆ ಲೋಕಾಂಕ ಆನೀ ಭಾಯಲೆ ಗಾಂವಾ ದಾಕೂನ ಯೆತಲೇಂಕ ತೆ ಪಂಪವೆಲಚೀ ಜಾವನು ರಾಬತಾ.

ಆಮೀ ಶುಕ್ರಾರ ರಾತಿ ರೈಲ ಕಂಕನಾಡಿ ದಾಕೂನ ಕೊಚ್ಚುವಲಿ ದಾಕೂನ ಯೆವಚೆ ರೈಲ ತೇ, ಚಂಢಿಗಡಾಕ ಆಮೀ ಪಾವಚೆ ಸೋಮಾರ ಸಾಂಜವೇಳಾಕ ಮ್ಹಳೇಲ ಆಮಕಾ ಕಳೀತ ಆಶೀಲೆ. ಮ್ಹಳ್ಯಾರಿ ತೀನ ರಾತಿ ರೈಲಾರಿ! ಎಕ ನವೋ ಅನುಭವ. ಆಮೀ ೮/೦೧/೨೦೧೬ ರಾತಿ ಕೊಡಿಯಾಲಾ ದಾಕೂನ ಭಾಯರ ಸರಲೆ, ವಿಶ್ವಾಸಾಲೆ ಆನೂ ಆನೀ ಮ್ಹಾಲಗಡೊ ಭಾವು ವರಣ ಅಣ್ಣಾ ಆಮಕಾ ಸೊಡಚಾಕ ಆಯಲೆ. ರಾತಿ ಆಮೀ ಜೆವಣ ಕೊರನೂಚೀ ಭಾಯರ ಸರಲೆ, ಆನೀ ಉಲೋವನು ಬಸಲೆ ತೊಡೆ ವೇಳಾನ ನೀದ ಲಾಗಲೆ, ಮಧೇಂತು ಜಾಗ ಜಾತ್ತನಾ ಆಮೀ ಗೊಂಯಾ ಪಾವನು ಆಶಿಲೆ. ಸಾಧಾರಣ ಮಧ್ಯ ರಾತಿ ಆಮಿ ಗೊಂಯಾಂತು ಆಶಿಲೆ, ಮೊಬೈಲಾಂತು ಹರಯೇಕ ಪಂತಾ ಗಾಂವ ಬದಲತನಾ ನೆಟವರ್ಕ ಬದಲಚೆ ಸಂದೇಶ ಯೆತಾ ಆಶಿಲೆ, ಫಾಂತೇರ ಮ್ಹಣತನಾ, ರತ್ನಗಿರಿ, ಪನವೇಲ ಮುಂಬಯಿ ಪಾವತನಾ ತೇ ಶಹರಾಚೆ ಚಿತ್ರಣ ದೋಳ್ಯಾ ಮುಖಾರ ಆಯಲೆ, ಸಕಾಳೀಚೆ ದಾಂತ ಘಾಸೂನ ಕಂಡಿ ದಾಕೂನ ಪಳಯತನಾ ಕೋಣಾಯ ಸಾಂಗೂಕಾ ಮ್ಹಣ ನಾ ಆಮೀ ಮಂಬಯಿ ಪಾವಲೆ ಮ್ಹಣ, ತ್ಯಾ ಲೋಕಾಲೆ ಧಾಂವಡಿ ಸಕಾಳಿ ರೈಲ್ವೆ ಸ್ಟೇಷನಾಂತು ಲೋಕ ಬೋರನು ಕಾಮಾಕ ಸ್ಕೂಲಾಕ ಸಕಾಳಿ ಸಕಾಳಿ ರಾಕೂನ ರಾಬಿಲೆ, ರೈಲ ಆಯಲೆ ಸತಾಂ ಚಪ್ಪೂನ ಭರಚೆ ಹ್ಯಾ ಸಕ್ಕಡ ಪಳಯತನಾ, ಕನ್ನಡಾಚೊ ಕವಿ ಜಿ.ಎಸ್.ಶಿವರುದ್ರಪ್ಪ ಹಾಂಗೆಲೆ ಮುಂಬಯಿ ಜಾತಕ ಮ್ಹಳೇಲ ಕವನ ದೊಳ್ಯಾ ಮುಖಾರ ಯೆತಾ, ಯಾಂತ್ರಿಕ ಜಾಲೇಲ ಜೀವನ ನಿರಂತರ ಚಲಚೆ ವ್ಯಾವಸಾಯಿಕ ಕ್ಷೇತ್ರ ಹ್ಯಾ ಸಕ್ಕಡ ಪಳಯತನಾ ಆಮಕಾ ದೋಗಾಂಕಯ ಮನಾಂತು ಆಯಿಲೆ ಆಮಗೆಲೆ ಕೊಡಿಯಾಚೀ ಜಾವೇತ, ಮುಂಬಯಿಂತು ಪಾಯ ಗಾಲನಿ ಜಾಲ್ಯಾರೀಯ ವಾಡೂನ ರಾಬಿಲೆ ಉಂಚಾಯಿಚೆ ಬಿಲ್ಡಿಂಗ ಸಾಂಗಾತ ಸ್ಲಮ್ ಆನೀ ಜನ ಜೀವನ. ತ್ಯಾಚ ವೇಳಾಕ ಆಮಗೆಲೆ ರೈಲಾಂತು ಭೋರನು ಗೆತಿಲೆ ಲೋಕ, ಹಾಜೆ ಮಧೇಂತು ಆಯಿಲೆ ವಡಾ ಪಾವ ಖಾವನು ಕಂಡಿ ದಾಕೂನ ಭಾಯರ ಪಳಯತಾಚೀ ಎಕ ಮಿರ್ಸಾಂಗ ಚಾಬೂನ ಕಶೀ ಜಾತಾ ಮ್ಹಣ ಪ್ರಯತ್ನ ಕೊರನು ತೀಕ ಜಾವನು ಉದಾಕ ಪೀವನು ಸಮಾಧಾನ ಕೊರನು ಗೆತಲೆ. ತಾರೀಕ ೯/೦೧/೨೦೧೬ ರೈಲಾರ ಸಗಳೋ ದೀಸ ಕಾಡಕಾ, ಅಶೀ ಜಾಂಕಿ ಪರಡೀ ಉಲೋನು ಹಾಜೆ ಮಧೇಂತು ಮುಂಬಯಿಂತು ಎಕಳೋ ಅಂಬಾಲಾಕ ವತ್ತಲೊ ಆಮಗೆಲೆ ಲಾಗಿ ಮೆಳೊ ಆನೀ ತಾಣೆ ಖರಟೆ ಕಾಂತೂಚಾಕ ಪ್ರಾರಂಭ ಕೆಲೆ. ಗಾಂವಾನ ಗಾಂವ ದೊಳ್ಯಾಮುಖಾರ ಧಾಂವಚೆ ಮಾಡೊ ಜಾಡ ರೂಕ ಘರ ಶಹರ ಉದಾಕ ನ್ಹಂಯ ತಾಜೆ ಮಧೇಂತು ನೀದ ವೆಲೆಲ ತೊಡೆ ಖಾಣ ಖಾವನು ಆಶೀಲೆ, ದನಪಾರಾ ಜೆವಣ ಮ್ಹಣತನಾ ಎಕಲೋ ನಿಮಗೂನ ಆಯಲೊ, ಆಮೀ ದೋನ ಜೆವಣ ಸಾಂಗಲೆ, ಆಮಕಾ ಥೋಡೆ ವೇಳಾನ ಜೆವಣ ಆಯಲೆ ಆನೀ ಮುಂಬಯಿಂತು ಆಯಿಲ್ಯಾನ ಹಗೂರ ಪೋಟಲಿ ಮೆಕಳೂಂಕ ಶುರು ಕೆಲೆ ತಾಂತು ಚಪಾತಿ ಆನೀ ಸುಕೆ ಭಾಜಿ ಆಶಿಲೆ ತ್ಯಾ ಖಾವನು ತಾಣೆ ವರಲೇಲ ಬಾಂದೂನ ದವರಲೆ, ಸಾಂಜವೇಳ ವಡೋದರಾಕ ಪಾವಲೆ - ಗುಜರಾತ ಎಕ ವೇಳಾರ ಗಾಂಧಿಲೆ ಗಾಂವ ಜಾವನು ಆಶಿಲೆ ಆಜ ಮೋದಿಲೆ ನಾಂವಾರ ವ್ಹಳಕ ತಾಜೆ, ಥಂಯ ವಡಾ -ವಡಾ ಮ್ಹಣ ವಿಕೂನ ಆಶಿಲೊ, ಸಾನ ಸಾನ ತೆಲಾಂತು ತಳೇಲ ಪೋಡಿ. ತೆಲಾ ಖಾಣ ಕಂಚೆ ತೇಲ ಗೊತನಾ, ಪೊಟ ಸಮ ನಾ ಜಲ್ಯಾರಿ, ಆನೀಕಯ ದೋನ ದೀವಸ ಕಾಡಚಾಕ ಆಸಾ, ಮ್ಹಣ ಜಾಲ್ಯಾರಿ ಆಮಕಾ, ಗೆಲೆಲ ಕಡೇನ ಕಸನೆ ಸ್ಪೇಷಲ ಆಸಕೀ ತೇ ಖಾವಚೆ ಉಮೇದಿ, ಎಕ ವಡಾ ಮಿರ್ಚಿ ಗೆತಲೆ, ತಾಂತು ಕಸಲೆ ಆಶಿಲೆ ಗೊತನಾ ಕಸಕೀ ಪಾಲ್ಲೋ ಕೊಚೋಲ ಕೊರನು ಸಾನ ಸಾನ ಆಂಬಡೋ ಶೀ ಆಶಿಲೆ ಎಕ ಪ್ಲೇಟಾಂತು ಚಾರ, ದೋನ ದೋನ ಖಾಲೆ ಮಿರ್ಸಾಂಗ ಉಡಯಲೆ. ಗುಜರಾತ ಜಾವನು ರೈಲ ಮದ್ಯ ಪ್ರದೇಶಾಕ ವತಾನ ರಾತಿ ಜೆವಣ, ಆಮೀ ಮೊಟ್ಟೆಚೆ ಬಿರಯಾನಿ ಸಾಂಗಲೆ, ತಾಣೆ ತಾಗೆಲೆ ಪೊಟಲಿ ಮೆಕಳೆ ದೋನ ಚಪಾತಿ ಖಾಲೋ ಆನೀ ಥಂಯ ಆಡ ಸರಲೊ, ಆಮೀ ಸಗಳೆ ಹಾತ ಪಾಯ ಸೊಡೂನ ನಿದ್ದಲೆ. ರಾಜಸ್ತಾನ ರಾತಿ ನಿದ್ದಾಂತು ಗೆಲೆಲ ಗೊತ್ತು ಜಾಲೇಲ ನಾ ಸಕಾಳಿ ದೊಳೋ ಸೊಡತನಾ, ೧೦/೦೧/೨೦೧೬ ಉತ್ತರ ಪ್ರದೇಶ - ಶೀಂಯ ಆನಿಕಯ ಧಾ ವಾಂಟೇನ ಚಡ, ಸಕ್ಕಡ ಕಡೇನ ಧೊವ ಪಡೂನ ಎಕ ಅಲೌಕಿಕ ಸೌಂದರ್ಯ, ಸ್ತಬ್ದ ಚಿತ್ರಣ ದುಸರೆ ಎಕ ಪ್ರಪಂಚಾಕ ಗೆಲೆಲೆ ಅನುಭವ, ಭಾಯರ ಭಂಗಿ ಮಾರಚೆ ಸಾಧೂ ಲೋಕ, ಶಿಂಯ ಧೋವ ಆನೀ ಭಂಗಿ ದುವಾರೋ ಎಕಮೆಳಲೆ ಅದ್ಬುತ ದೃಶ್ಯ. ಬಾವಜಿನ ಸಾಂಗಿಲೆ, ಮಥುರಾಂತು ಇಲಾಯಚೀ ಚಾ ಮೆಳತಾ, ತೇ ಉಡಗಾಸಾನ ಟೆಸ್ಟಕರಿ ಮ್ಹಣೂನ, ಬಾವಜೀ ಹರಿದ್ವಾರ ಕೆದಾರ ಆನೀ ಬದರಿನಾಥ ಮ್ಹಣು ಸಾಭಾರ ಪಂತಾ ಪ್ರಯಾಣ ಕೆಲಾ ತಶೇ ತಾನಿ ಸಾಂಗಿಲೆ ಉಡಗಾಸ ಆಶಿಲೆ. ಮಥುರಾಂತು ರೈಲ ರಾಬಲೆ ಸತಾ ದಾಡ ಬಡ ಲೋಕ ಹಾತಾಂತು ಕಿಟಲಿ ಗೆವನು ಚಡಲೆ, ತ್ಯಾ ಕಡಕಡ ಯೆವಚೆ ಶೀಂಯಾಕ ಮಥುರಾಚೆ ಇಲಾಯಚೀ ಚಾ ನ ಜೀವಾಕ ಸಮಾಧಾನ ದಿಲೆ, ವಾಟೇರ ಚಾರ ಪಾಂಚ ಬಡ್ಡಿ ಬಾಂದೂನ ಸಕಲ ಇಂಗಾಳೋ ಗಾಲನು ಕಿಟಲಿ ಲಾಂಬೋನ ಹೂನ ಕರಚೆ ಆನೀ ತ್ಯಾ ಉಜೇಕ ಆಂಗ ತಾಪೋವನು ತಾಜೆ ಸುತ್ತು ಲೋಕ ಪಾಂಗರೂನ ಬಶೀಲೆ ಪಳೋವಚಾಕ ಮೆಳತಾ. ಮುಖಾರ ಉತ್ತರ ಪ್ರದೇಶ ಜಾವನು ತ್ಯಾ ಶೀಂಯ ದೆವನು ಸಾಂಜವೆಳ ಮ್ಹಣತನಾ ಪರತ ಶೀಂಯ ವಾರೆ ಪ್ರಾರಂಭ ಜಾಲೆ. ದೋನ ದೀಸ ಜಾಲೆ, ಪಾಯಿ ಸಾಂಜವೇಳ ಆಮೀ ಚಂಡಿಗಡ ಬಯಸೂನ ಬಯಸೂನ ಪುರೋ ಜಾವನು ಆಶಿಲೆ, ಆನೀ ಎಕ ದಿವಸ ಮ್ಹಳೆಲ ಎಕ ಆಲೋಚನ ಮಾತೆಂತು, ೧೧/೦೧/೨೦೧೬ ಉತ್ತರ ಪ್ರದೇಶ ದಾಕೂನ ಹರಯಾಣ, ಥಂಯ ಮುರ್‍ಯಾ ಪಾತೋರ ನಾ, ಸಕ್ಕಡ ಇಮಾರತ ಇಟ್ಟಿಗೆಚೆ ಪಳೋವನು,  ರೈಲಾರ ಆಯಿಲೆ ಖಾವನು ಘುರಕಡೆ ಪೋನ ಕೋರನು ಉಲೋವನು ತಶೀಚ ಚಂಢಿಗಡಾಂತು ಅಶ್ವಿನಿ ಕುಮಾರ ಸಿಂಗ ಹಾಂಕಾ ಆಮೀ ಸಾಂಜವೇಳ ಪಾವಚೆ ವಿಚಾರ ಸಾಂಗೂನ ೧೨/೦೧/೨೦೧೬ ಕ ಸಕಾಳಿ ಮೆಳಚಾಕ ಯೆತಾಂಚೀ ಮ್ಹಣ ಸಾಂಗಲೆ. ತ್ಯಾಚ ವೇಳಾರ ಕಾಶೀಮಠಾಚೆ ಹೋಡ ಸ್ವಾಮೇ ಶ್ರೀಮದ ಸುಧೀಂದ್ರ ತೀರ್ಥಾಂಗೆಲೆ ಆರೋಗ್ಯ ಬರೆ ನಾ ಮ್ಹಳೇಲ ಖಬರ ಗಾಂವಾಂತು ಆಶಿಲೆ, ಆಮೀ ಹರ್ಯಾಣಾ ದಾಕೂನ ದೆಹಲಿ ತ್ಯಾ ಶೀಂಯಾ ವಾರೆ ಆನೀ ತ್ಯಾ ಸಗಳೋ ದೀಸ ಆಮೀ ವತ ಪಳಯಲೆಲೆ ನಾ ಮ್ಹಣೇತ, ಸಾಸಮಾಚೆ ತೋಟ ಆನೀ ರೈಲ್ವೆ ಸ್ಟೇಷನಾಂತು ದಾಕೂನ ದಿಶಚೆ ಬೃಹತ ಆಕಾರಾಚೆ ದೇಶಾಚೆ ಬಾವಟೊ ಸಕ್ಕಡ ಪಳೋವನು ದೆಹಲಿ ಜಾವನು ಅಂಬಾಲಾ ವಚೂನ ಸಾಂಜವೆಳ ಶೀಂಯ ಚಡತಾ ಆಸತಾನ ಆಮೀ ದೊಗಯ ರೈಲಾ ದಾಕೂನ ದೇಂವಲೆ.

ಹರಯೇಕ ರೈಲ್ವೆ ಸ್ಟೇಷನಾಂತುಲೆ ಕರಕರ ಆಶಚೆ ಹ್ಯಾ ರಿಕ್ಷಾ ಆನೀ ಟ್ಯಾಕ್ಸಿ ಡ್ರೈವರ್‍ಸ ಬೋಬ ಗಾಲನು ಆಪೋವಚೆ ಎಕಾ ದೋನ ಮೋಲ ಸಾಂಗೂನ ಸೊಲ್ಲಾಚೆ ಆಮಕಾ ಸುರವೇ ದಾಕೂನ ಕಳೀತ ಆಶೀಲೆ ಆಮಗೆಲೆ ಕೊಡಿಯಾಲಾಂತು ಹೆ ಪಳೋವನು ಗೊತ್ತಸ, ಎಕ ಪಂತಾ ಕೊಚ್ಚಿ ವತ್ತನಾ ಥಂಯ ವ್ಯವಸ್ಥಾ ದುಸರೆ ನಮುನೊ, ಪ್ರೀ ಪೇಡ್ ಟ್ಯಾಕಿ, ಆಮಕಾ ಖಂಯ ವಚೂಕಾ ತ್ಯಾ ಜಾಗೊ ಸಾಂಗಲೇರ ತೋ ಸುರವೇಕಚೀ ತಾಚೆ ಮೋಲ ಸಾಂಗತಾ ಆಮಿ ತೆ ದಿವನು ತಾನಿ ದಿಲೇಲ ರಿಕ್ಷಾರ ಆರಾಮೇರ ವಚೇತ ಆರತಾ ಅಸಲೆ ವ್ಯವಸ್ಥಾ ಸಾಬಾರ ಕಡೇನ ಪ್ರಾರಂಭ ಜಾಲಾ ಮ್ಹಣ ಆಯಕಲಾ. ನಾತ್ಲರೀ ಪರಗಾಂವತುಲೆ ಮ್ಹಣ ಕಳೇ ಸತಾಂ ಕೀಸೆಕ ಕಾತ್ತರಿ ಗಾಲಚೇಚ ಚಲತಾ. ಅಂತೂ ಅಸಲೆ ದೃಶ್ಯ ಥಂಯ ಆಶೀಲೆ ಥೋಡೆ ವೇಳಾಕ ಆಮೀ ದೋಗಾಯ ಕಾನ ಆಯಕಾ ನಾಶೀ ನಹೀ ಚಾಯಿಯೆ ನಹೀ ಚಾಯಿಯೆ ಮ್ಹಣತಚೀ ಮುಖಾರ ಮುಖಾರ ಯೆವನು ರಸ್ತೇರ ವತಾ ಆಸಚೆ ರಿಕ್ಷಾ ರಾಬೋನ ತಾಂತು ಬಸಲೆ.

[पयणा साहीत]: खल्ला एक - दो ग्यारा

ದಾಯ್ಜ್.ಕೊಮ್