[ಖಬರ್:] "ಮಮ್ಮಾ ರಿಟಾಯರ್ಡ್ ಜಾತಾ" - ದಾಯ್ಜಿ ಸಾಂದ್ಯಾಂ ಥಾವ್ನ್ ಕೊಂಕ್ಣಿ ನಾಟಕ್

"ದಾಯ್ಜಿದುಬಾಯ್" - ಯು.ಎ.ಇ.ಂತ್ಲ್ಯಾ ಕೊಂಕ್ಣಿ ಲೇಖಕಾಂಚೊ ಎಕ್ತಾರ್ ಹಾಣಿಂ ಆಪ್ಲ್ಯಾ 20ವ್ಯಾ ವಾರ್ಸುಗೆಚ್ಯಾ ದಭಾಜಿಕ್ ಸಂಭ್ರಮಾಚೆಂ ಘೋಷಣ್ ಕರುನ್ ಯು.ಎ.ಇ ಂತ್ಲ್ಯಾ ಹರ್ಯೆಕ್ ಮಂಗ್ಳುರಿಯನ್ ಮುಳಾಚ್ಯಾ ಕೊಂಕ್ಣಿ ಪರ್ಜೆಕ್ ಹ್ಯಾ ಮಹಾನ್ ಕಾರ್ಯಾಚೊ ವಾಂಟೊ ಜಾಂವ್ಕ್ ಉಲೊ ದಿಲಾ.

"Maestro Events" ದುಬಾಯ್ ಹಾಂಚ್ಯಾ ಪ್ರಾಯೊಜಕ್ಪಣಖಾಲ್ ಸಾಧರ್ ಜಾಂವ್ಚೆಂ ಹೆಂ ಭೋವ್ ಆತುರಿತ್ ಕಾರ್ಯೆಂ ಹ್ಯಾಚ್ ಎಪ್ರಿಲಾಚ್ಯಾ 26 ತಾರಿಕೆರ್ ಜುಸ್ತ್ 5:30 ವ್ಹರಾರ್ Emirates International School Auditorium Dubai, ಹಾಂಗಾಸರ್ ಸಾಧರ್ ಜಾತೆಲೆಂ. ಪಾಟ್ಲೆ ದೋನ್ ವರ್ಸುಗ್ಯೊ ಮಂಗ್ಳೂರ್ ಆನಿ ಉಡುಪಿಂತ್ ಆಚರಣ್ ಕೆಲ್ಲ್ಯಾ ಉಪ್ರಾಂತ್ ದಾಯ್ಜಿದುಬಾಯ್ ಪಾಟಿಂ ಆಪ್ಲಿ ಕರ್ಮಭೂಮಿ ಜಾವ್ನಾಸ್ಚ್ಯಾ ದುಬಾಯಾಂತ್ ಆಪ್ಲಿ ವಾರ್ಸುಗಿ ಆಚರ್ಸುಂಕ್ ತಯಾರ್ ಜಾಲ್ಯಾ.

ದಾಯ್ಜಿ ವಾರ್ಸುಗೆಚೆಂ ಆಚರಣ್, ಆಪ್ಲ್ಯಾ ವೈಶಿಷ್ಟತಾ ಲಾಗೊನ್ ದುಬಾಯಾಂತ್ ಜಾಂವ್ಚ್ಯಾ ಕೊಂಕ್ಣಿ ಕಾರ್ಯಾಂ ಪಯ್ಕಿ ಉಂಚ್ಲ್ಯಾ ವೃತ್ತಿಪರೆಂತ್ ತಶೆಂಚ್ ಭೊವ್ ಗದ್ದಳಾಯೆನ್ ಜಾಂವ್ಚೆಂ ಕಾರ್ಯೆಂ ಮ್ಹಣೊನ್ ಯೆದೊಳ್‍ಚ್ ನಾಂವಾಡ್ಲಾಂ. ಹ್ಯಾ ವೈಶಿಷ್ಟತೆಕ್ ಲಾಗೊನ್ ಯು.ಎ.ಇಂತ್ಲಿ ಮಂಗ್ಳೂರಿಯನ್ ಮುಳಾಚಿ ಕೊಂಕ್ಣಿ ಪರ್ಜಾ ದಾಯ್ಜಿದುಬಾಯ್‍ಚ್ಯಾ ಕೊಂಕ್ಣಿ ಕಾರ್ಯಾಂ ಲಾಗೊನ್ ಭೊವ್ ಆತುರಾಯೆನ್ ರಾಕೊನ್ ಆಸ್ತಾ.ಹ್ಯಾ ಕಾರ್ಯಾವೆಳಿಂ ಪಾಟ್ಲ್ಯಾ 19 ವರ್ಸಾಂನಿ ಕೆಲ್ಲ್ಯಾಬರಿ ಪ್ರತಿಷ್ಟಿತ್ "ದಾಯ್ಜಿ ಪುರಸ್ಕಾರ್", ಕೊಂಕ್ಣೆಂತ್ ಖಳ್ಮಿತ್ ನಾಸ್ತಾನಾ ಕೊಂಕ್ಣಿ ಸಾಹಿತಿಕ್ ವಾವ್ರ್ ಕೆಲ್ಲ್ಯಾ ಸಾಹಿತಿಕ್ ಪ್ರಧಾನ್ ಜಾತಲೊ. ಹ್ಯಾ ಪಾವ್ಟಿಂಚ್ಯಾ ಪುರಸ್ಕಾರಾಕ್ ಪ್ರಖ್ಯಾತ್ ಕೊಂಕ್ಣಿ ಸಾಹಿತಿ ತಶೆಂಚ್ ವಾವ್ರಾಡಿ ಮಾನೆಸ್ತ್ ವಲ್ಲಿ ವಗ್ಗ ಮೈಸೂರು ಹೊ ವಿಂಚುನ್ ಆಯ್ಲಾ.

ಆದ್ಲ್ಯಾ ಸರ್ವ್ ವಾರ್ಸುಗೆಂಚ್ಯಾನಿ ಹಿ ವಿಸಾವಿ ವಾರ್ಸುಗಿ ಚಡ್ ದಭಾಜಿಕ್ ಜಾವ್ನಾಸ್ತಾಲಿ.ಹ್ಯಾ ಮಹಾನ್ ಆಚರಣಾಚೊ ಎಕ್ ವಾಂಟೊ ಜಾವ್ನ್ ಭೊವ್‍ಚ್ ಯಶಸ್ವಿ ಜೊಡುನ್ ಲಗ್ಭಗ್ 8000 ಚ್ಯಾಕಿ ಚಡ್ತಿಕ್ ಪ್ರದರ್ಶನಾಂ ದೆಖ್‍ಲ್ಲೊ ಆಶೋಕ್ ಪಾಟೊಳೆ ಹಾಣೆಂ ಮೂಳ್ ಮರಾಠೆಂತ್ ಲಿಖ್‍ಲ್ಲೊ "ಮಮ್ಮಾ ರಿಟಾಯರ್ಡ್ ಜಾತಾ" ನಾಟಕ್ ಪ್ರದರ್ಶಿತ್ ಜಾತೊಲೊ. ಹ್ಯಾ ಮಹಾನ್ ನಾಟಕಾಚಿಂ ಕೊಂಕ್ಣಿ ತರ್ಜುಮೆಚಿಂ ಆನಿ ಕೊಂಕ್ಣೆಂತ್ ಖೆಳೊಂವ್ಚಿಂ ಹಕ್ಕಾಂ ಮಾನೆಸ್ತ್ ಮ್ಯಾಕ್ಶಿಮ್ ರೋಡ್ರಿಗಸ್ ಹಾಣೆಂ ಆಮಾನತ್ ಕೆಲ್ಯಾಂತ್. ದುಬಾಯಾಂತ್ಲೊ ಲೊಕಾ ಮೊಗಾಳ್ ಕೊಂಕ್ಣಿ ವಾವ್ರಾಡಿ ತಶೆಂಚ್ ದಾಯ್ಜಿದುಬಾಯ್ ಸಂಸ್ಥ್ಯಾಚ್ಯಾ ಸ್ಥಾಪಕಾಂ ಪಯ್ಕಿ ಎಕ್ಲೊ, ನಾಮ್ನೆಚೊ ಕಲಾಕರ್ ಡಯಾನ್ ಡಿ’ಸೊಜಾ ಮುಕಾಮರ್ ಹ್ಯಾ ಮಹಾನ್ ನಾಟಕಾಚೆಂ ನಿರ್ದೇಶನ್ ಕರ್ತಲೊ. ತಾಚ್ಯಾ ಮುಖೆಲ್ಪಣಾಖಾಲ್ ದಾಯ್ಜಿದುಬಾಯ್‍ಚೊ ಸಹ ಸಂಸ್ಥೊ "ದಾಯ್ಜಿ ರಂಗ್‌ಮಂದಿರ್" ಹಾಚೆ ಆನ್ಭೊಗಿ ಕಲಾಕರ್ ಹೊ ನಾಟಕ್ ಖೆಳವ್ನ್ ದಾಕಯ್ತಲೆ.

ದಾಯ್ಜಿದುಬಾಯ್ ಸಂಸ್ಥ್ಯಾಚ್ಯಾ ಕಾರ್ಯಾಕಾರಿ ಸಮಿತಿ ತಶೆಂಚ್ ಸಾಂದ್ಯಾನಿ ಸರ್ವ್ ಕೊಂಕ್ಣಿ ಪರ್ಜೆ ಲಾಗಿಂ ವಿನಂತಿ ಕೆಲ್ಯಾಕಿ ಸಗ್ಳ್ಯಾಂನಿ ಹ್ಯಾ ಕಾರ್ಯಾಕ್ ಹಾಜರ್ ಜಾವ್ನ್ ತಾಂಕಾ ಖಂಚ್ಯಾ ರಿತಿಚೊ ಸಹಕಾರ್ ದೀಂವ್ಕ್ ತಾಂಕ್ ಆಸಾ ತ್ಯಾ ರಿತಿನ್ ಸಹಕಾರ್ ದಿಂವ್ಕ್. ಆಮ್ಕಾಂ ಸಗ್ಳ್ಯಾಂಕ್ ಕಳಿತ್ ಆಸ್‍ಲ್ಲ್ಯಾ ಪರ್ಮಾಣೆಂ ದಾಯ್ಜಿದುಬಾಯ್ ಫಕತ್ ಮನೋರಂಜನ್, ಸಾಹಿತಿಕ್ ಆನಿ ಕಲಾದೃಷ್ಟಿನ್ ಮಾತ್ರ್ ನ್ಹಯ್ ಆಸ್ತಾಂ ಜಾಯ್ತೆ ಸಮಾಜಿಕ್ ವಾವ್ರ್ ಕರುನ್ ಹೆರ್ ಲೊಕಾಕ್ ಮಾತ್ರ್ ನ್ಹಯ್ ಆಸ್ತಾಂ ಸಂಸಾರ್‌ಭರ್ ಶಿಂಪ್ಡಲ್ಲ್ಯಾ ಮಂಗ್ಳುರಿಯನ್ ಮುಳಾಚ್ಯಾ ಕೊಂಕ್ಣಿ ಸಂಸ್ಥ್ಯಾಂಕ್ ಮಾರ್ಗದರ್ಶಿತ್ ಜಾಂವ್ಕ್ ಪಾವ್ಲಾಂ.

ಹ್ಯಾ ಕಾರ್ಯಾಚೊ ಚಡ್ತಿಕ್ ವಿವರ್ ತುಮ್ಕಾಂ ಮುಖ್ಲ್ಯಾ ದಿಸಾಂನಿ ವಾಚುಂಕ್ ಮೆಳ್ತಲೊ.

ಹ್ಯಾ ಕಾರ್ಯಾಚಿಂ ಪ್ರವೇಶ್ ಪತ್ರಾಂ ಹಾಂಗಾ ಕಾಣ್ಸಿಲ್ಲ್ಯಾಂ ಲಾಗಿಂ ಮೆಳ್ತಾತ್:

ಕರಮಾ: ಆಲ್ವೀನ್ ಪಿಂಟೊ - 050 4583930

ಬರ್‌ದುಬಾಯ್: ರೊಬರ್ಟ್ ಫೆರ್ನಾಂಡಿಸ್ - 055 1065023, ಸಂದೀಪ್ ಡಿ’ಸೋಜಾ - 055 697 8707

ಆಲ್ಕೂಜ್: ರೊಬಿನ್ ನಿರುಡೆ - 056 822 0617

ಶಾರ್ಜಾ: ಆರ್ಥರ್ ಪಿರೇರಾ - 055 647 8578, ನಾನು ಮರೊಲ್ - 050 840 2207

- ಭಾತ್ಮಿ: ನಾನು ಮರೊಲ್