ಪಯ್ಣಾರಿ.ಕೊಮ್ Poinnari.Com: Konkani Research, Konkani Study, Progressive Konkanni Literature, Konkani Writing, Konkani Poetry, Creative Writing, Konkani Books, Konkani Association, Konkani Work, Fiction Writing, Poetry Criticism, Poetry Contests, Writing C

[ಕವಿತಾ] ರಾತ್ (- ಸಖಾರಾಮ್ ಶೆಣ್ವಿ ಬೋರ್ಕರ್)

ಏಕ್ ರಾತ್ ಆನಿ ಏಕ್ ದೀಸ್ - ಹ್ಯಾ ದೋನ್ ಸಂಸಾರಾಚಿಂ ಕರ್ತುವಾಂ ತಶೆಂಚ್ ಅನ್ನಾಡಿ ಕರ್ತುವಾಂ ಕರವ್ನ್ ಕಸೊ ಮನಿಸ್ ವೆವೆಗಳ್ಯಾ ವೆಸಾರ್, ಫುಡಾರಿ, ಮಂತ್ರಿ, ತಶೆಂಚ್ ಹೆರ್ ಪ್ರಕಾರಾಚೆ ಮನಿಸ್ ಅಪ್ಲೆಂ ಹಡ್ಬೆಂಪಣ್ ಲಿಪಂವ್ಕ್ ಸೊಧ್ತಾ ಮ್ಹಳ್ಳೆಂ ಚಿಂತಪ್ ಹ್ಯಾ ಕವಿತೆಚೆಂ ಮೂಳ್ ಚಿಂತಪ್.

- ಸಂ

[ಕವಿತಾ] ರಾತ್ (- ಸಖಾರಾಮ್ ಶೆಣ್ವಿ ಬೋರ್ಕರ್)

ರಾತ್ ದಿಸ್ ಅಸ್ತಾಕ್ ವೆತ್ಗೀರ್ ಪೊಲ್ಯಾಂಕ್ ಲಾಲಿ ಆನಿ ಒಂಠಾಕ್ ಲಿಪ್ಶ್ಟಿಕ್ ಲಾವ್ನ್ ದಾರಾಂತ್ ಉಬಿಂ ರಾವಿಲ್ಯಾ ತ್ಯಾ ಶಿಂದ್ಳೆ ಭಶೆನ್ ರಾತ್ ಉದೆಲ್ಯಾ! ಹ್ಯಾ ರಾತೀಂನ್ ಕಿತೆಂ ಪಳೊವಂಕ್ ನಾಂ? ಸಕಾಳಚೆ ಉಜಳ್ ಮಾಥ್ಯಾನ್ ಭೊಂವ್ಪಿ ಸಮಾಜ್ ಸುದಾರಣೆಚೆರ್ ಭಾಶ್ಣಾಂ ಠೊಕ್ಪಿ ಧವೆ ತೊಪ್ಯೆವಾಲ್ಯಾಂಚ್ಯಾ ನಾಗ್ಡೆ ಕುಡೀಪೊಂದಾ ತರ್ಣ್ಯೊ ಕಳ್ಯೊ ಚಿಡ್ಡತನಾ ಹ್ಯಾ ರಾತೀನ್ ಪಳಯ್ಲಾಂ. ದಿಸಾಚೊ ವೆವ್ಹಾರ್ ಮ್ಹಳ್ಯಾರ್ ರಾತ್ಚಿಂ ನಾಡ್ಪೆನ್ನಾ, ಫಿತ್ರೀಸಾಂ ಆನಿ ದುಸ್ರ್ಯಾಂಚ್ಯಾ ಘರಾರ್ ಸುಣಿಂ ಚಡೊವ್ಪಾಚಿ ಜಿ ವೃತ್ತಿ ಆಸ್ತಾ ತೀಚೆಂ ಮುಳ್ ಹ್ಯಾ ರಾತೀಂನ್ ದೆಖ್ಲಾಂ. ದೀಸಾಚೆ ವಿರೊಧಿ ಪಕ್ಷಾಚೆ ಮ್ಹಣ್ಪಿ ರಾತ್ಚೆ ಸತ್ತಾಧಾರಿ ಪಕ್ಷಾಚೆ ಖಾಂದಾರ್ ಹಾತ್ ಘಾಲೂನ್ ಎಕಾಚ್ ಕೊಪಾಂತ್ ಸೊರೊ ಪಿಯೆತನಾ ಹ್ಯಾ ರಾತೀನ್ ಪಳಯ್ಲಾಂ. ಗಿರಾಯ್ಕಾಂಚಿ ಆಸ್ತ್ ಭಾಗೊವ್ನ್, ಪುರೊ ಜಾವ್ನ್ ಝಿಳ್ಮೀಳ್ಟ್ಯಾರ್ ನ್ಹಿದೂಂಕ್ ವಚ್ಪಿ ತ್ಯಾ ಶಿಂದ್ಳೆ ಭಶೆನ್ ರಾತ್ ಆತಾಂ ಅಸ್ತಾಕ್ ಗೆಲ್ಯಾ... ತುಮ್ಕಾಂ, ಆಮ್ಕಾಂ ಪರ್ಥೂನ್ ಎಕ್ದಾಂ ದಿಸಾಚೆ ಉಜಳ್ ಮಾಥ್ಯಾನ್ ಭೊಂವ್ಪಾಕ್ ಮೆಳ್ಚೆಂ ಮ್ಹಣ್! **** - ಸಖಾರಾಮ್ ಶೆಣ್ವಿ ಬೋರ್ಕರ್**. [ಜುಲಾಯ್, 2020]

	ಸಖಾರಾಮ್ ಶೆಣ್ವಿ ಬೋರ್ಕರ್: ಫಾಟ್ಲಿಂ ಸಾಬಾರ್ ವರ್ಸಾಂ ತೆ ಸಾತ್ತ್ಯಾನ್ ಕವಿತಾ, ಲೆಖ್, ನಿಬಂದ್, ಕಥಾ, ಪುಸ್ತಕ್ ಪರಿಕ್ಷಣಾಂ ಕರೀತ್ ಆಯ್ಲ್ಯಾತ್. ತಾಂಕಾ ಆತಾಂ ಮೆರೆನ್ ಸರ್ಸ್ವತಿ ವಾಚ್ನಮಂದೀರ್, ಪಣ್ಜಿ, ಗೊವಾ ಸೆಕ್ಯುಲರ್ ಸೆಲ್, ರಾಮಾನಂದ್ ಪ್ರಕಾಶನ್, ಕಲಾಮಂಥನ್ ಆಮೊಣೆ, ಕೊಂಕಣ್ ಟಾಯ್ಮ್ಸ್, ಗೊಂಯ್ ವಿಧ್ಯಾಪೀಠ್, ಕೊಂಕ್ಣಿ ಸೆವಾ ಕೆಂದ್ರ್ ಕುಡ್ಚಡೆ, ಕೊಂಕ್ಣಿ ಭಾಶಾ ಮಂಡಳ್ ಹಾಂಚೆ ಪುರಸ್ಕಾರ್ ಫಾವೊ ಜಾಲ್ಯಾತ್. ತಾಂಚೆ ಲಿಖಾಣ್ ಭಾಂಗ್ರಭೂಂಯ್, ಬಿಮ್ಬ್, ಜಾಗ್ ಆದಿ ನೆಮಾಳ್ಯಾಂನಿಂ ಉಜ್ವಾಡಾಕ್ ಯೆತಾ. ಆಕಾಶವಾಣಿ ಪಣ್ಜಿ ಕೆಂದ್ರಾಚೆರ್ ತಾಂಚೆ ಕವಿತಾ ವಾಚ್ನಾಚೆ ಕಾರ್ಯಕ್ರಮ್ ಜಾತಾತ್. ಬೊರ್ಕಾರ್ ಹಾಂಣಿ ಮುಂಬಯ್ ವಿಧ್ಯಾಪೀಠಾಚಿ ರಸಾಯ್ನಶಾಸ್ತ್ರ್ ಆನಿ ಕಾಯ್ದ್ಯಾಚಿ ಪದ್ವಿ ಘೆತ್ಲ್ಯಾ. ತ್ಯಾಭಾಯ್ರ್ ತಾಣಿಂ ಗೊಂಯ್ ವಿದ್ಯಾಪೀಠಾಂತ್ಲ್ಯಾನ್ ಕೊಂಕ್ಣಿ ವಿಶ್ಯಾಂತ್ ಪದ್ವ್ಯುತ್ತರ್ ಪದ್ವಿ(M.A.) ಆಣಿ ವ್ಯವ್ಸ್ಥಾಪನ್, ಕಾಮ್ಗಾರ್ ಕಾಯ್ದೊ ಆನಿ ಕರ್ (Taxation) ಹ್ಯಾ ವಿಶ್ಯಾಂತ್ ಪದ್ವೀಕಾ ಘೆತ್ಲ್ಯಾತ್. ತೆ ಹಾಲೀಂಚ್ ಎಕಾ ಬಹುರಾಷ್ಟ್ರೀಯ್ ಕಂಪ್ನೀತ್ಲ್ಯಾನ್ ಅಧಿಕಾರಿ ಪದಾವೆಲ್ಯಾನ್ ನಿವೃತ್ತ್ ಜಾಲ್ಯಾತ್. ಆತಾಂ ಮೆರೆನ್ ತಾಂಚೆ ದೊನ್ ಕವಿತಾ ಸಂಗ್ರಹ್ 'ಅಥ್ರೆಕ್' ಆನಿ 'ತುಂ' ಹೆ ಉಜ್ವಾಡಾಕ್ ಆಯ್ಲ್ಯಾತ್ ಆನೀಕ್ ದೊನ್ ಕವಿತಾ ಸಂಗ್ರಹ್ ಆನಿ ಎಕ್ ಕಥಾ ಸಂಗ್ರಹಾಚೆರ್ ಕಾಮ್ ಚಾಲು ಆಸಾ.
[kovita] Rat* (- Sakharam Shennvi Borkar)*
Ek rat ani ek dis - hea don somsarachim kortuvam toxench on'naddi kortuvam koroun koso monis vevegollea vesar, fuddari, montri, toxench her prokarache monis oplem hoddbemponn lipounko sodhta mholl'llem chintop hea kovitechem mull chintop. - Som
[kovita] Rat* (- Sakharam Shennvi Borkar)*
Rat dis ostak vetgir poleank lali ani ontthak lipxttik laun darant ubim ravilea tea xindlle bhoxen rat udelea! hea ratimn kitem pollounk nam? sokalloche uzoll mathean bhomvpi somaz sudaronnecher bhaxnnam tthokpi dhove topyevaleanchea nagdde kuddiponda tornneo kolleo chidd'ddotona hea ratin polloilam. Disacho veuhar mhollear ratchim naddpen'na, fitrisam ani dusreanchea ghorar sunnim choddoupachi ji vrit'ti asta tichem mull hea ratimn dekhlam. Disache virodhi pokxache mhonnpi ratche sot'tadhari pokxache khandar hat ghalun ekach kopant soro pietona hea ratin polloilam. Giraikanchi ast bhagoun, puro zaun jhillmillttear nhidunk vochpi tea xindlle bhoxen rat atam ostak gelea... Tumkam, amkam porthun ekdam disache uzoll mathean bhomvpak mellchem mhonn! **** - Sakharam Shennvi Borkar.** [Jul, 2020]

	Sakharam Shennvi Borkar: fattlim sabar vorsam te sat'tean kovita, lekh, nibond, kotha, pustok porikxonnam korit aileat. Tanka atam meren sorsvoti vachnomondir, ponnji, gova sekyulor sel, ramanond prokaxon, kolamonthon amonne, konkonn ttaims, Gõy vidheapitth, konknni seva kendr kuddchodde, konknni bhaxa monddoll hanche purskar favo zaleat. Tanche likhann bhangrobhum-i, Bimb, Jag adi nemalleamnim ujvaddak yeta. Akaxovanni ponnji kendracher tanche kovita vachnache karyokrom' zatat. Borkar hamnni mumboi vidheapitthachi rosainoxastr ani kaideachi podvi ghetlea. Teabhair tannim gõy videapitthantlean konknni vixeant podvyut'tor podvi(M.A.) anni vyousthapon, kamgar kaido ani kor (Taxation) hea vixeant podvika ghetleat. Te halinch eka bohuraxttri-i kompnitlean odhikari podavelean nivrit't zaleat. Atam meren tanche don kovita songroh 'othrek' ani 'tum' he ujvaddak aileat anik don kovita songroh ani ek kotha songrohacher kam' chalu asa.
[कविता] रात (- सखाराम शेण्वी बोर्कार)
एक रात आनी एक दीस - ह्या दोन संसाराचीं कर्तुवां तशेंच अन्नाडी कर्तुवां करवन कसो मनीस वेवेगळ्या वेसार, फुडारी, मंत्री, तशेंच हेर प्रकाराचे मनीस अपलें हडबेंपण लिपवंक सोधता म्हळ्ळें चिंतप ह्या कवितेचें मूळ चिंतप. - सं
[कविता] रात (- सखाराम शेण्वी बोर्कार)
रात दिस अस्ताक वेतगीर पोल्यांक लाली आनी ओंठाक लिपश्टिक लावन दारांत उबीं राविल्या त्या शिंदळे भशेन रात उदेल्या! ह्या रातींन कितें पळोवंक नां? सकाळचे उजळ माथ्यान भोंवपी समाज सुदारणेचेर भाशणां ठोकपी धवे तोपयेवाल्यांच्या नागडे कुडीपोंदा तरण्यो कळयो चिड्डतना ह्या रातीन पळयलां. दिसाचो वेव्हार म्हळ्यार रातचीं नाडपेन्ना, फ़ित्रीसां आनी दुसऱ्यांच्या घरार सुणीं चडोवपाची जी वृत्ती आसता तीचें मुळ ह्या रातींन देखलां. दीसाचे विरोधी पक्षाचे म्हणपी रातचे सत्ताधारी पक्षाचे खांदार हात घालून एकाच कोपांत सोरो पियेतना ह्या रातीन पळयलां. गिरायकांची आस्त भागोवन, पुरो जावन झिळमीळट्यार न्हिदूंक वचपी त्या शिंदळे भशेन रात आतां अस्ताक गेल्या... तुमकां, आमकां परथून एकदां दिसाचे उजळ माथ्यान भोंवपाक मेळचें म्हण! **** - सखाराम शेण्वी बोर्कार.** [जुलाय, २०२०]

	सखाराम शेण्वी बोर्कार: फाटलीं साबार वर्सां ते सात्त्यान कविता, लेख, निबंद, कथा, पुसतक परिक्षणां करीत आयल्यात. तांका आतां मेरेन सर्स्वती वाचनमंदीर, पणजी, गोवा सेक्युलर सेल, रामानंद प्रकाशन, कलामंथन आमोणे, कोंकण टायम्स, गोंय विध्यापीठ, कोंकणी सेवा केंद्र कुडचडे, कोंकणी भाशा मंडळ हांचे पुर्स्कार फावो जाल्यात. तांचे लिखाण भांग्रभूंय, बिमब, जाग आदी नेमाळ्यांनीं उज्वाडाक येता. आकाशवाणी पणजी केंद्राचेर तांचे कविता वाचनाचे काऱ्यक्रम जातात. बोर्कार हांणी मुंबय विध्यापीठाची रसायनशासत्र आनी कायद्याची पद्वी घेतल्या. त्याभायर ताणीं गोंय विद्यापीठांतल्यान कोंकणी विश्यांत पद्व्युत्तर पद्वी (M.A.) आणी व्यवस्थापन, कामगार कायदो आनी कर (Taxation) ह्या विश्यांत पद्वीका घेतल्यात. ते हालींच एका बहुराषट्रीय कंपनीतल्यान अधिकारी पदावेल्यान निवृत्त जाल्यात. आतां मेरेन तांचे दोन कविता संग्रह 'अथ्रेक' आनी 'तूं' हे उज्वाडाक आयल्यात आनीक दोन कविता संग्रह आनी एक कथा संग्रहाचेर काम चालू आसा.


ದಾಯ್ಜ್.ಕೊಮ್

2004 ಥಾವ್ನ್ 2011 ಪರ್ಯಾಂತ್ ಕಾರ್ಯಾಳ್ ಆಸ್‌ಲ್ಲ್ಯಾ ದಾಯ್ಜ್.ಕೊಮ್ ಚೆರ್ ಪರ್ಗಟ್‌ಲ್ಲ್ಯಾ ವಿಂಚ್ಣಾರ್ ಸಾಹಿತಾಕ್ ಆಮಿ ಫುಡಿಲ್ಯಾ ದಿಸಾಂನಿ ಪಯ್ಣಾರಿ ವಾಚ್ಪ್ಯಾಂಕ್ ಲಾಭಯ್ತೆಲ್ಯಾಂವ್.