ಪಯ್ಣಾರಿ.ಕೊಮ್ Poinnari.Com: Konkani Research, Konkani Study, Progressive Konkanni Literature, Konkani Writing, Konkani Poetry, Creative Writing, Konkani Books, Konkani Association, Konkani Work, Fiction Writing, Poetry Criticism, Poetry Contests, Writing C

[ಕವಿತಾ] ಗಾಂಧಿ ಮ್ಹಳ್ಯಾರ್...! (- ಸಖಾರಾಮ್ ಶೆಣ್ವಿ ಬೋರ್ಕರ್)

ಗಾಂಧಿ ಮ್ಹಳ್ಯಾರ್ ಕೊಣ್? ಹೆಂ ಪ್ರಶ್ನ್ ಕಾಂಯ್ ದರೇಕಲ್ಯಾಕ್ ಇಸ್ಕೊಲಾಚ್ಯಾ ದಿಸಾಥಾವ್ನ್ ಆಯ್ಕುಂಕ್, ವಾಚುಂಕ್, ಸಮ್ಜುಂಕ್ ತಶೆಂಚ್ ಪಳೆಂವ್ಕ್ ಮೆಳ್ಚೊ ವಿಶಯ್ ವ ವೆಕ್ತಿ. ಸತಾಚಿ ಪಾಡ್ತ್ ಘೆವ್ನ್, ನಿತಿಖಾತಿರ್ ಶಾಂತಿ ಆನಿ ಅಹಿಂಸೆಚಿ ವಾಟ್ ದಾಕಯಿಲ್ಲೊ ವೆಕ್ತಿ. ಆಯ್ಚ್ಯಾ ಸಮಾಜೆಂತ್ ಗಾಂಧಿ ಕಿತ್ಲೊ ಪ್ರಸ್ತುತ್? ಆಯ್ಚೆ ವಿಚಾರ್, ಆಯ್ಚಿ ಜಿಣ್ಯೆರೀತ್ ಹ್ಯಾ ಗಾಂಧಿವಾದಾಕ್ ಕಿತ್ಲಿ ಪೂರಕ್ ವಾ ಕಿತ್ಲಿ ವ್ಯತಿರಿಕ್ತ್ ಜಾಲ್ಯಾ ಹ್ಯಾ ಚಿಂತ್ನಾಂಕ್ ಮನಾಂತ್ ಉಭ್ಜಾಂವ್ಚಿ ಸೊಭಿತ್ ಕವಿತಾ ಹಿ.

- ಸಂ

[ಕವಿತಾ] ಗಾಂಧಿ ಮ್ಹಳ್ಯಾರ್...! (- ಸಖಾರಾಮ್ ಶೆಣ್ವಿ ಬೋರ್ಕರ್)

ಗಾಂಧಿ ಮ್ಹಳ್ಯಾರ್...! ಗಾಂಧಿ ಮ್ಹಳ್ಯಾರ್... ಖಂಯ್ಚ್ಯಾಯ್ ತರಿ ಪರಿಕ್ಷೆಚ್ಯಾ ಪೆಪ್ರಾಂತ್ ಕಾಂಯ್ ಗೂಣ್ ಆಶಿಲ್ಲೊ ಸದಾಂಚ್ ಯೆವ್ಪಿ ಎಕ್ ಪ್ರಸ್ನ್! ಗಾಂಧಿ ಮ್ಹಳ್ಯಾರ್... ಜಾತೀಯ್ ದಂಗ್ಲಿ, ಹಿಂಸಾಚಾರ್ ಜಾಳ್ಪೊಳ್, ಮಾರಾಮರಿ ಥಂಡಾವ್ಪಾಕ್ ಸರ್ಕಾರಾನ್ ದಿಲ್ಲೊ ಶಾಂತೀಚೊ ಮಂತ್ರ್! ಗಾಂಧಿ ಮ್ಹಳ್ಯಾರ್... ದೊನ್ ಅಕ್ಟೊಬರ್, ಸವ್ವೀಸ್ ಜಾನೆರ್ ಪಂದ್ರಾ ಅಗೊಸ್ತ್, ತೀಸ್ ಜಾನೆರ್ ಹ್ಯಾ ದಿಸಾಂನಿಂ ಗಾಂಧಿ ತೊಪ್ಯೊ ಘಾಲೂನ್ ಮಿರೊವ್ಪಾಚೊ ಎಕ್ ಸುವಾಳೊ! ಗಾಂಧಿ ಮ್ಹಳ್ಯಾರ್... ಶಾಳಾಂನಿಂ, ಕೊಲೆಜೀಂನಿಂ ವಾದಾವಾದೀಂತ್, ಪರಿಸಂವಾದಾನಿಂ ಯೆವ್ಪಿ ಸದ್ಚೊಚ್ ಎಕ್ ವಿಶಯ್! ಗಾಂಧಿ ಮ್ಹಳ್ಯಾರ್... ಸರ್ಕಾರಿ ಎಫಿಸಾಂನಿಂ, ನ್ಯಾಯಾಲಯಾಂನಿಂ ಜುವಿಜಾಂಚ್ಯಾ ಕದೆಲಾಂ ಫಾಟ್ಲ್ಯಾನ್ ಹುಮ್ಕಳಾಯಿಲ್ಲೆಂ ಧುಲ್ಲಾನ್ ಮಾಖಿಲ್ಲೆಂ ಎಕ್ ಪಾಂಯ್ಜೆಲ್! ಗಾಂಧಿ ಮ್ಹಳ್ಯಾರ್... ರಾಜ್ಕಾರಣಿಂ, ಪತ್ರಕಾರ್ ಕವಿ, ಸಾಹಿತ್ಯೀಕ್, ವಿದ್ವಾನ್ ಹಾಂಕಾ ಸದಾಕಾಳ್ ಖಾವ್ಡ್ ದಿವ್ಪಿ ತಾಂಚೆ ಘೊಸ್ತಾಚೊ ಎಕ್ ವಿಶಯ್! ಆನಿ ನಿಮ್ಣೆಂ... ಗಾಂಧಿ ಮ್ಹಳ್ಯಾರ್... ದರ್ ವೆಳಾ ಲೊಕ್ಶಾಯೆಚೊ ಖೂನ್ ಜಾವ್ನ್ ಲೆಗೀತ್ ತಿಕಾ ತಿಗೊವ್ನ್ ದವ್ರಪಿ ಎಕ್ ಸಂಜಿವ್ನಿ ಮಂತ್ರ್! **** - ಸಖಾರಾಮ್ ಶೆಣ್ವಿ ಬೋರ್ಕರ್**. [ನವೆಂಬ್ರ್ರ್, 2020]

	ಸಖಾರಾಮ್ ಶೆಣ್ವಿ ಬೋರ್ಕರ್: ಫಾಟ್ಲಿಂ ಸಾಬಾರ್ ವರ್ಸಾಂ ತೆ ಸಾತ್ತ್ಯಾನ್ ಕವಿತಾ, ಲೆಖ್, ನಿಬಂದ್, ಕಥಾ, ಪುಸ್ತಕ್ ಪರಿಕ್ಷಣಾಂ ಕರೀತ್ ಆಯ್ಲ್ಯಾತ್. ತಾಂಕಾ ಆತಾಂ ಮೆರೆನ್ ಸರ್ಸ್ವತಿ ವಾಚ್ನಮಂದೀರ್, ಪಣ್ಜಿ, ಗೊವಾ ಸೆಕ್ಯುಲರ್ ಸೆಲ್, ರಾಮಾನಂದ್ ಪ್ರಕಾಶನ್, ಕಲಾಮಂಥನ್ ಆಮೊಣೆ, ಕೊಂಕಣ್ ಟಾಯ್ಮ್ಸ್, ಗೊಂಯ್ ವಿಧ್ಯಾಪೀಠ್, ಕೊಂಕ್ಣಿ ಸೆವಾ ಕೆಂದ್ರ್ ಕುಡ್ಚಡೆ, ಕೊಂಕ್ಣಿ ಭಾಶಾ ಮಂಡಳ್ ಹಾಂಚೆ ಪುರಸ್ಕಾರ್ ಫಾವೊ ಜಾಲ್ಯಾತ್. ತಾಂಚೆ ಲಿಖಾಣ್ ಭಾಂಗ್ರಭೂಂಯ್, ಬಿಮ್ಬ್, ಜಾಗ್ ಆದಿ ನೆಮಾಳ್ಯಾಂನಿಂ ಉಜ್ವಾಡಾಕ್ ಯೆತಾ. ಆಕಾಶವಾಣಿ ಪಣ್ಜಿ ಕೆಂದ್ರಾಚೆರ್ ತಾಂಚೆ ಕವಿತಾ ವಾಚ್ನಾಚೆ ಕಾರ್ಯಕ್ರಮ್ ಜಾತಾತ್. ಬೊರ್ಕಾರ್ ಹಾಂಣಿ ಮುಂಬಯ್ ವಿಧ್ಯಾಪೀಠಾಚಿ ರಸಾಯ್ನಶಾಸ್ತ್ರ್ ಆನಿ ಕಾಯ್ದ್ಯಾಚಿ ಪದ್ವಿ ಘೆತ್ಲ್ಯಾ. ತ್ಯಾಭಾಯ್ರ್ ತಾಣಿಂ ಗೊಂಯ್ ವಿದ್ಯಾಪೀಠಾಂತ್ಲ್ಯಾನ್ ಕೊಂಕ್ಣಿ ವಿಶ್ಯಾಂತ್ ಪದ್ವ್ಯುತ್ತರ್ ಪದ್ವಿ(M.A.) ಆನಿ ವ್ಯವ್ಸ್ಥಾಪನ್, ಕಾಮ್ಗಾರ್ ಕಾಯ್ದೊ ಆನಿ ಕರ್ (Taxation) ಹ್ಯಾ ವಿಶ್ಯಾಂತ್ ಪದ್ವೀಕಾ ಘೆತ್ಲ್ಯಾತ್. ತೆ ಹಾಲೀಂಚ್ ಎಕಾ ಬಹುರಾಷ್ಟ್ರೀಯ್ ಕಂಪ್ನೀತ್ಲ್ಯಾನ್ ಅಧಿಕಾರಿ ಪದಾವೆಲ್ಯಾನ್ ನಿವೃತ್ತ್ ಜಾಲ್ಯಾತ್. ಆತಾಂ ಮೆರೆನ್ ತಾಂಚೆ ದೊನ್ ಕವಿತಾ ಸಂಗ್ರಹ್ 'ಅಥ್ರೆಕ್' ಆನಿ 'ತುಂ' ಹೆ ಉಜ್ವಾಡಾಕ್ ಆಯ್ಲ್ಯಾತ್ ಆನೀಕ್ ದೊನ್ ಕವಿತಾ ಸಂಗ್ರಹ್ ಆನಿ ಎಕ್ ಕಥಾ ಸಂಗ್ರಹಾಚೆರ್ ಕಾಮ್ ಚಾಲು ಆಸಾ.
[kovita] Gandhi mhollear...!* (- Sakharam Shennvi Borkar)*
Gandhi mhollear konn? hem proxn kaim dorekoleak iskolachea disathaun aikunk, vachunk, somzunk toxench polleunko mellcho vixoi vo vekti. Sotachi paddt gheun, nitikhatir xanti ani ohimsechi vatt dakoyil'lo vekti. Aichea somajent gandhi kitlo prostut? aiche vichar, aichi jinnyerit hea gandhivadak kitli purok va kitli vyotirikt zalea hea chintnank monant ubhzamvchi sobhit kovita hi. - Som
[kovita] Gandhi mhollear...!* (- Sakharam Shennvi Borkar)*
Gandhi mhollear...! Gandhi mhollear... Khoinchyai tori porikxechea peprant kaim gunn axil'lo sodanch yeupi ek prosn! gandhi mhollear... Zati-i dongli, himsachar zallpoll, maramori thonddaupak sorkaran dil'lo xanticho montr! gandhi mhollear... Don okttobor, souvis zaner pondra agxtt, tis zaner hea disamnim gandhi topeo ghalun miroupacho ek suvallo! gandhi mhollear... Xallamnim, kolejimnim vadavadint, porisomvadanim yeupi sodchoch ek vixoi! gandhi mhollear... Sorkari efisamnim, neayaloyamnim zuvizanchea kodelam fattlean humkollayil'lem dhul'lan makhil'lem ek pamyjel! gandhi mhollear... Rajkaronnim, potrokar kovi, sahityik, vidvan hanka sodakall khaudd divpi tanche ghostacho ek vixoi! ani nimnnem... Gandhi mhollear... Dor vella lokxayecho khun zaun legit tika tigoun douropi ek sonjivni montr! **** - Sakharam Shennvi Borkar.** [Nov, 2020]

	Sakharam Shennvi Borkar: fattlim sabar vorsam te sat'tean kovita, lekh, nibond, kotha, pustok porikxonnam korit aileat. Tanka atam meren sorsvoti vachnomondir, ponnji, gova sekyulor sel, ramanond prokaxon, kolamonthon amonne, konkonn ttaims, Gõy vidheapitth, konknni seva kendr kuddchodde, konknni bhaxa monddoll hanche purskar favo zaleat. Tanche likhann bhangrobhum-i, Bimb, Jag adi nemalleamnim ujvaddak yeta. Akaxovanni ponnji kendracher tanche kovita vachnache karyokrom' zatat. Borkar hamnni mumboi vidheapitthachi rosainoxastr ani kaideachi podvi ghetlea. Teabhair tannim gõy videapitthantlean konknni vixeant podvyut'tor podvi(M.A.) anni vyousthapon, kamgar kaido ani kor (Taxation) hea vixeant podvika ghetleat. Te halinch eka bohuraxttri-i kompnitlean odhikari podavelean nivrit't zaleat. Atam meren tanche don kovita songroh 'othrek' ani 'tum' he ujvaddak aileat anik don kovita songroh ani ek kotha songrohacher kam' chalu asa.
[कविता] गांधी म्हळ्यार...! (- सखाराम शेण्वी बोर्कार)
गांधी म्हळ्यार कोण? हें प्रश्न कांय दरेकल्याक इसकोलाच्या दिसाथावन आयकुंक, वाचुंक, समजुंक तशेंच पळेवंक मेळचो विशय व वेक्ती. सताची पाडत घेवन, नितिखातीर शांती आनी अहिंसेची वाट दाकयिल्लो वेक्ती. आयच्या समाजेंत गांधी कितलो प्रसतूत? आयचे विचार, आयची जिण्येरीत ह्या गांधिवादाक कितली पूरक वा कितली व्यतिरिक्त जाल्या ह्या चिंत्नांक मनांत उभजांवची सोभीत कविता ही. - सं
[कविता] गांधी म्हळ्यार...! (- सखाराम शेण्वी बोर्कार)
गांधी म्हळ्यार...! गांधी म्हळ्यार... खंयच्याय तरी परिक्षेच्या पेपरांत कांय गूण आशिल्लो सदांच येवपी एक प्रस्न! गांधी म्हळ्यार... जातीय दंगली, हिंसाचार जाळपोळ, मारामरी थंडावपाक सरकारान दिल्लो शांतीचो मंत्र! गांधी म्हळ्यार... दोन अक्टोबर, सव्वीस जानेर पंदरा आगश्ट, तीस जानेर ह्या दिसांनीं गांधी तोपयो घालून मिरोवपाचो एक सुवाळो! गांधी म्हळ्यार... शाळांनीं, कॉलेजींनीं वादावादींत, परिसंवादानीं येवपी सदचोच एक विशय! गांधी म्हळ्यार... सरकारी ऑफ़िसांनीं, न्यायालयांनीं जुविजांच्या कदेलां फ़ाटल्यान हुमकळायिल्लें धुल्लान माखिल्लें एक पांयजेल! गांधी म्हळ्यार... राजकारणीं, पत्रकार कवी, साहित्यीक, विद्वान हांका सदाकाळ खावड दिवपी तांचे घोस्ताचो एक विशय! आनी निमणें... गांधी म्हळ्यार... दर वेळा लोकशायेचो खून जावन लेगीत तिका तिगोवन दवरपी एक संजिवनी मंत्र! **** - सखाराम शेण्वी बोर्कार.** [नवेंबर, २०२०]

	सखाराम शेण्वी बोर्कार: फाटलीं साबार वर्सां ते सात्त्यान कविता, लेख, निबंद, कथा, पुसतक परिक्षणां करीत आयल्यात. तांका आतां मेरेन सर्स्वती वाचनमंदीर, पणजी, गोवा सेक्युलर सेल, रामानंद प्रकाशन, कलामंथन आमोणे, कोंकण टायम्स, गोंय विध्यापीठ, कोंकणी सेवा केंद्र कुडचडे, कोंकणी भाशा मंडळ हांचे पुर्स्कार फावो जाल्यात. तांचे लिखाण भांग्रभूंय, बिमब, जाग आदी नेमाळ्यांनीं उज्वाडाक येता. आकाशवाणी पणजी केंद्राचेर तांचे कविता वाचनाचे काऱ्यक्रम जातात. बोर्कार हांणी मुंबय विध्यापीठाची रसायनशासत्र आनी कायद्याची पद्वी घेतल्या. त्याभायर ताणीं गोंय विद्यापीठांतल्यान कोंकणी विश्यांत पद्व्युत्तर पद्वी (M.A.) आणी व्यवस्थापन, कामगार कायदो आनी कर (Taxation) ह्या विश्यांत पद्वीका घेतल्यात. ते हालींच एका बहुराषट्रीय कंपनीतल्यान अधिकारी पदावेल्यान निवृत्त जाल्यात. आतां मेरेन तांचे दोन कविता संग्रह 'अथ्रेक' आनी 'तूं' हे उज्वाडाक आयल्यात आनीक दोन कविता संग्रह आनी एक कथा संग्रहाचेर काम चालू आसा.


ದಾಯ್ಜ್.ಕೊಮ್

2004 ಥಾವ್ನ್ 2011 ಪರ್ಯಾಂತ್ ಕಾರ್ಯಾಳ್ ಆಸ್‌ಲ್ಲ್ಯಾ ದಾಯ್ಜ್.ಕೊಮ್ ಚೆರ್ ಪರ್ಗಟ್‌ಲ್ಲ್ಯಾ ವಿಂಚ್ಣಾರ್ ಸಾಹಿತಾಕ್ ಆಮಿ ಫುಡಿಲ್ಯಾ ದಿಸಾಂನಿ ಪಯ್ಣಾರಿ ವಾಚ್ಪ್ಯಾಂಕ್ ಲಾಭಯ್ತೆಲ್ಯಾಂವ್.