ಪಯ್ಣಾರಿ.ಕೊಮ್ Poinnari.Com: Konkani Research, Konkani Study, Progressive Konkanni Literature, Konkani Writing, Konkani Poetry, Creative Writing, Konkani Books, Konkani Association, Konkani Work, Fiction Writing, Poetry Criticism, Poetry Contests, Writing C

[ಕವಿತಾ] ಜೈತ್ (- ಸಖಾರಾಮ್ ಶೆಣ್ವಿ ಬೋರ್ಕರ್)

ಜೀವ್ ಆಸ್ಚ್ಯಾ ಸರ್ವಾಂಕ್ ಭುಕ್ ಮ್ಹಳ್ಳಿ ಆಸಾ. ಜಾಂವ್ ತಿ ಜಾನ್ವಾರ್ ವಾ ಮನಿಸ್. ಹಾಂಗಾಸರ್ ಏಕ್ ಮಾರ್ಮಿಕ್ ಕಾಣಿ ಆಸಾ; ಎಕಾ ಮನ್ಶಾನ್ ಪೊಟ್ ಭರುನ್ ಜಾತಚ್ ಖಚ್ರ್ಯಾ ಡಬ್ಬ್ಯಾಕ್ ಉಡಯಿಲ್ಲೊ ಏಕ್ ಉಂಡೊ ಆಸಾ ಆನಿ ತೊ ಉಂಡೊ ಏಕ್ ಪೆಟೊ ಖಾಂವ್ಕ್ ಮ್ಹಣುನ್ ತೊಂಡ್ ಘಾಲ್ತಾನಾ ಭುಕೆಲ್ಲೊ ಅನ್ಯೇಕ್ಲೊ ಮನಿಸ್ ತ್ಯಾ ಉಂಡ್ಯಾಚೆರ್ ಹಾತ್ ಘಾಲುಂಕ್ ಯೆತಾನಾ ತೊ ಪೆಟೊ ತೊ ಉಂಡೊ ಘೆವ್ನ್ ಧಾಂವ್ತಾ. ಏಕ್ ಕಥಾಪರಿಂ ದಿಸ್ಚ್ಯಾ ಹ್ಯಾ ಕವಿತೆಂತಲೆಂ ರಾಜಾಂವ್ ಸಮ್ಜುಂಕ್ ಪ್ರೇತನ್ ಕೆಲೆಂ ತರ್ ಸಮಾಜಿತ್ ವೆವಸ್ತಾ, ನಯ್ತಿಕ್ ಮೌಲ್ಯಾಂ ಸರ್ವ್ ಭುಕೆಸಮೊರ್ ಸಲ್ವತಾತ್. ಭುಕ್ ಜಯ್ತೆವಂತ್ ಜಾತಾ ದೆಕುನ್ ಸಮಾಜೆಂತ್ ಜಾನ್ವಾರ್ ಕೆದ್ನಾಂಯ್ ಜಯ್ತೆವಂತ್ ಜಾತಾ ಮ್ಹಳ್ಳೆಂ ಮಾರ್ಮಿಕ್ ಚಿಂತಪ್ ಉಟಂವ್ಚಿ ಭೋವ್ ಸುಂದರ್ ಕವಿತಾ.

- ಸಂ

[ಕವಿತಾ] ಜೈತ್ (- ಸಖಾರಾಮ್ ಶೆಣ್ವಿ ಬೋರ್ಕರ್)

ಜೈತ್ ಮ್ಹಜ್ಯಾ ಫ್ಲೆಟಾಚ್ಯಾ ಗೆಲ್ರೀಂತ್ ರಾವ್ನ್ ಹಾಂವ್ ಪಳಯ್ತಾಂ ರಸ್ತ್ಯಾರ್ ಚಲಿಲ್ಲೆಂ ಎಕ್ ಝಗ್ಡೆಂ ಎಕಾ ಸುಣ್ಯಾಚೆಂ ಆನಿ ಎಕಾ ಮನ್ಶಾಚೆಂ ಕೊಣೆತರಿ ಸಕಾಳೀಂಚ್ ಕೊಯ್ರಾ ಬಲ್ಲಾಂತ್ ಉಡ್ಯಿಲ್ಲ್ಯಾ ಶೆಳ್ಯಾ ಉಂಡ್ಯಾಖಾತೀರ್! ಸುಣೊ ಆನಿ ತೊ ಭುಕೆಲ್ಲೊ ಮನೀಸ್ ತ್ಯಾ ಶೆಳ್ಯಾ ಉಂಡ್ಯಾಕ್ ತೆಳೀತ್ ಆಸ್ತಾತ್ ಆಪ್ಲ್ಯಾಕಚ್ ತೊ ಉಂಡೊ ಮೆಳ್ಚೊ ಹ್ಯಾ ಆಶೆನ್ ಎಕಾಮೆಕಾಂಚೆರ್ ದೊಳ್ಯಾಂತ್ ಇಂಗ್ಳೆ ಘಾಲೂನ್ ಉಂಡ್ಯಾಚೆರ್ ಝೊಂಪಯ್ ಮಾರುಂಕ್ ಸೊದ್ತಾತ್. ಶೆಕಿಂ ಭೂಕ್ ಸೊಂಸೂಂಕ್ ನಜ್ ಜಾವ್ನ್ ತೊ ಮನಿಸ್ ಕೊಯ್ರಾ ಬಲ್ಲಾಂತಲೊ ಉಂಡೊ ಕಾಡ್ಪಾಕ್ ಹಾತ್ ಘಾಲ್ತಾ ಆನಿ ಉಂಡ್ಯಾಚೆರ್ ಆಪ್ಲೊಚ್ ಹಕ್ಕ್ ಆಸಾ ಅಶೆಂ ಸಮ್ಜುಪಿ ತೊ ಸುಣೊ ಝಪಾಯಂಚ್ ಕರುನ್ ತ್ಯಾ ಮನ್ಶಾಚ್ಯಾ ಹಾತಾಕ್ ಘಾಂಸ್ ಮಾರ್ತಾ. ಜೀವ್ ಆಸ್ಲ್ಯಾರ್ ಭಿಕ್ ಮಾಗೂನ್ ಖಾಯ್ನ್ ಮ್ಹಣೀತ್ ತೊ ಮನಿಸ್ ಉಂಡೊ ಥಂಯ್ಚ್ ಸೊಡೂನ್ ಹುಯೆಲಿ ಮಾರೀತ್ ಧಾಂವ್ತ್ ಸುಟ್ಟಾ. ಆನಿ ಮಾಗೀರ್, ತೊ ಸುಣೊ, ಉಂಡೊ ತೊಂಡಾತ್ ಧರುನ್ ಹುಯೆಲಿ ಮಾರೀತ್ ಗೆಲ್ಲ್ಯಾ ಮನ್ಶಾವಟೆನ್ ಎಕ್ ತಿರ್ಶಿ ನದರ್ ಘುಂವ್ಡಾವನ್ ಲಾಗೀಂಚ್ ಆಶಿಲ್ಲ್ಯಾ ಲಾಯ್ಟಿ ಖಾಂಬ್ಯಾಚೆರ್ ಆಪ್ಲೊ ದೊಂಕೊ ವಯ್ರ್ ಕರ್ತಾ. ಆನಿ ಹಾಂವ್ ಎಕ್ ಗವಾಯ್ ಆಸ್ತಾಂ ಮೊನ್ಜಾತೀನ್ ಮೆಳ್ಯಿಲ್ಲ್ಯಾ ಮನೀಸ್ ಜಾತೀವೆಲ್ಯಾ ಜೈತಾಚೊ! **** - ಸಖಾರಾಮ್ ಶೆಣ್ವಿ ಬೋರ್ಕರ್**. [ಸಪ್ತೆಂಬ್ರ್, 2020]

	ಸಖಾರಾಮ್ ಶೆಣ್ವಿ ಬೋರ್ಕರ್: ಫಾಟ್ಲಿಂ ಸಾಬಾರ್ ವರ್ಸಾಂ ತೆ ಸಾತ್ತ್ಯಾನ್ ಕವಿತಾ, ಲೆಖ್, ನಿಬಂದ್, ಕಥಾ, ಪುಸ್ತಕ್ ಪರಿಕ್ಷಣಾಂ ಕರೀತ್ ಆಯ್ಲ್ಯಾತ್. ತಾಂಕಾ ಆತಾಂ ಮೆರೆನ್ ಸರ್ಸ್ವತಿ ವಾಚ್ನಮಂದೀರ್, ಪಣ್ಜಿ, ಗೊವಾ ಸೆಕ್ಯುಲರ್ ಸೆಲ್, ರಾಮಾನಂದ್ ಪ್ರಕಾಶನ್, ಕಲಾಮಂಥನ್ ಆಮೊಣೆ, ಕೊಂಕಣ್ ಟಾಯ್ಮ್ಸ್, ಗೊಂಯ್ ವಿಧ್ಯಾಪೀಠ್, ಕೊಂಕ್ಣಿ ಸೆವಾ ಕೆಂದ್ರ್ ಕುಡ್ಚಡೆ, ಕೊಂಕ್ಣಿ ಭಾಶಾ ಮಂಡಳ್ ಹಾಂಚೆ ಪುರಸ್ಕಾರ್ ಫಾವೊ ಜಾಲ್ಯಾತ್. ತಾಂಚೆ ಲಿಖಾಣ್ ಭಾಂಗ್ರಭೂಂಯ್, ಬಿಮ್ಬ್, ಜಾಗ್ ಆದಿ ನೆಮಾಳ್ಯಾಂನಿಂ ಉಜ್ವಾಡಾಕ್ ಯೆತಾ. ಆಕಾಶವಾಣಿ ಪಣ್ಜಿ ಕೆಂದ್ರಾಚೆರ್ ತಾಂಚೆ ಕವಿತಾ ವಾಚ್ನಾಚೆ ಕಾರ್ಯಕ್ರಮ್ ಜಾತಾತ್. ಬೊರ್ಕಾರ್ ಹಾಂಣಿ ಮುಂಬಯ್ ವಿಧ್ಯಾಪೀಠಾಚಿ ರಸಾಯ್ನಶಾಸ್ತ್ರ್ ಆನಿ ಕಾಯ್ದ್ಯಾಚಿ ಪದ್ವಿ ಘೆತ್ಲ್ಯಾ. ತ್ಯಾಭಾಯ್ರ್ ತಾಣಿಂ ಗೊಂಯ್ ವಿದ್ಯಾಪೀಠಾಂತ್ಲ್ಯಾನ್ ಕೊಂಕ್ಣಿ ವಿಶ್ಯಾಂತ್ ಪದ್ವ್ಯುತ್ತರ್ ಪದ್ವಿ(M.A.) ಆಣಿ ವ್ಯವ್ಸ್ಥಾಪನ್, ಕಾಮ್ಗಾರ್ ಕಾಯ್ದೊ ಆನಿ ಕರ್ (Taxation) ಹ್ಯಾ ವಿಶ್ಯಾಂತ್ ಪದ್ವೀಕಾ ಘೆತ್ಲ್ಯಾತ್. ತೆ ಹಾಲೀಂಚ್ ಎಕಾ ಬಹುರಾಷ್ಟ್ರೀಯ್ ಕಂಪ್ನೀತ್ಲ್ಯಾನ್ ಅಧಿಕಾರಿ ಪದಾವೆಲ್ಯಾನ್ ನಿವೃತ್ತ್ ಜಾಲ್ಯಾತ್. ಆತಾಂ ಮೆರೆನ್ ತಾಂಚೆ ದೊನ್ ಕವಿತಾ ಸಂಗ್ರಹ್ 'ಅಥ್ರೆಕ್' ಆನಿ 'ತುಂ' ಹೆ ಉಜ್ವಾಡಾಕ್ ಆಯ್ಲ್ಯಾತ್ ಆನೀಕ್ ದೊನ್ ಕವಿತಾ ಸಂಗ್ರಹ್ ಆನಿ ಎಕ್ ಕಥಾ ಸಂಗ್ರಹಾಚೆರ್ ಕಾಮ್ ಚಾಲು ಆಸಾ.
[kovita] Zoit* (- Sakharam Shennvi Borkar)*
Jivo aschea sorvank bhuk mholl'lli asa. Zamv ti zanvar va monis. Hangasor ek marmik kanni asa; eka monxan pott bhorun zatoch khochrea ddobbeak uddoyil'lo ek unddo asa ani to unddo ek petto khaunko mhonnun tondd ghaltana bhukel'lo onyeklo monis tea unddeacher hat ghalunk yetana to petto to unddo gheun dhamvta. Ek kothaporim dischea hea kovitentolem razamv somzunk preton kelem tor somajit veusta, noitik mouleam sorv bhukesomor solvotat. Bhuk zoiteunt zata dekun somajent zanvar kednam-i zoiteunt zata mholl'llem marmik chintop uttomvchi bhovo sundor kovita. - Som
[kovita] Zoit* (- Sakharam Shennvi Borkar)*
Zoit mhojea flettachea gelrint raun hamv polloitam rostear cholil'lem ek zhogddem eka sunneachem ani eka monxachem konnetori sokallinch koira bol'lant uddyil'lea xellea unddeakhatir! sunno ani to bhukel'lo monis tea xellea unddeak tellit astat apleakoch to unddo mellcho hea axen ekamekancher dolleant inglle ghalun unddeacher zhompoi marunk sodtat. Xekim bhuk somsunk noz zaun to monis koira bol'lantolo unddo kaddpak hat ghalta ani unddeacher aploch hokk asa oxem somzupi to sunno zhopainch korun tea monxachea hatak ghams marta. Jivo aslear bhik magun khain mhonnit to monis unddo thoinch soddun huyeli marit dhamvt sutt'tta. Ani magir, to sunno, unddo tonddat dhorun huyeli marit gel'lea monxautten ek tirxi nodor ghumvddaun laginch axil'lea laitti khambeacher aplo donko voir korta. Ani hamv ek govai astam monzatin mellyil'lea monis zativelea zoitacho! **** - Sakharam Shennvi Borkar.** [Sep, 2020]

	Sakharam Shennvi Borkar: fattlim sabar vorsam te sat'tean kovita, lekh, nibond, kotha, pustok porikxonnam korit aileat. Tanka atam meren sorsvoti vachnomondir, ponnji, gova sekyulor sel, ramanond prokaxon, kolamonthon amonne, konkonn ttaims, Gõy vidheapitth, konknni seva kendr kuddchodde, konknni bhaxa monddoll hanche purskar favo zaleat. Tanche likhann bhangrobhum-i, Bimb, Jag adi nemalleamnim ujvaddak yeta. Akaxovanni ponnji kendracher tanche kovita vachnache karyokrom' zatat. Borkar hamnni mumboi vidheapitthachi rosainoxastr ani kaideachi podvi ghetlea. Teabhair tannim gõy videapitthantlean konknni vixeant podvyut'tor podvi(M.A.) anni vyousthapon, kamgar kaido ani kor (Taxation) hea vixeant podvika ghetleat. Te halinch eka bohuraxttri-i kompnitlean odhikari podavelean nivrit't zaleat. Atam meren tanche don kovita songroh 'othrek' ani 'tum' he ujvaddak aileat anik don kovita songroh ani ek kotha songrohacher kam' chalu asa.
[कविता] जैत (- सखाराम शेण्वी बोर्कार)
जीव आसच्या सर्वांक भूक म्हळ्ळी आसा. जांव ती जान्वार वा मनीस. हांगासर एक मार्मीक काणी आसा; एका मनशान पोट भरून जातच खचऱ्या डब्ब्याक उडयिल्लो एक उंडो आसा आनी तो उंडो एक पेटो खावंक म्हणून तोंड घाल्ताना भुकेल्लो अन्येकलो मनीस त्या उंड्याचेर हात घालुंक येताना तो पेटो तो उंडो घेवन धांवता. एक कथापरीं दिसच्या ह्या कवितेंतलें राजांव समजुंक प्रेतन केलें तर समाजीत वेवसता, नयतीक मौल्यां सर्व भुकेसमोर सलवतात. भूक जयतेवंत जाता देकून समाजेंत जान्वार केदनांय जयतेवंत जाता म्हळ्ळें मार्मीक चिंतप उटंवची भोव सुंदर कविता. - सं
[कविता] जैत (- सखाराम शेण्वी बोर्कार)
जैत म्हज्या फ़्लॅटाच्या गॅलरींत रावन हांव पळयतां रस्त्यार चलिल्लें एक झगडें एका सुण्याचें आनी एका मनशाचें कोणेतरी सकाळींच कोयरा बल्लांत उडयिल्ल्या शेळ्या उंड्याखातीर! सुणो आनी तो भुकेल्लो मनीस त्या शेळ्या उंड्याक तेळीत आसतात आपल्याकच तो उंडो मेळचो ह्या आशेन एकामेकांचेर दोळ्यांत इंगळे घालून उंड्याचेर झोंपय मारुंक सोदतात. शेकीं भूक सोंसूंक नज जावन तो मनिस कोयरा बल्लांतलो उंडो काडपाक हात घालता आनी उंड्याचेर आपलोच हक्क आसा अशें समजुपी तो सुणो झपायंच करुन त्या मनशाच्या हाताक घांस मारता. जीव आसल्यार भिक मागून खायन म्हणीत तो मनीस उंडो थंयच सोडून हुयेली मारीत धांवत सुट्टा. आनी मागीर, तो सुणो, उंडो तोंडात धरुन हुयेली मारीत गेल्ल्या मनशावटेन एक तिरशी नदर घुंवडावन लागींच आशिल्ल्या लायटी खांब्याचेर आपलो दोंको वयर करता. आनी हांव एक गवाय आसतां मोनजातीन मेळयिल्ल्या मनीस जातीवेल्या जैताचो! **** - सखाराम शेण्वी बोर्कार.** [सप्तेंबर, २०२०]

	सखाराम शेण्वी बोर्कार: फाटलीं साबार वर्सां ते सात्त्यान कविता, लेख, निबंद, कथा, पुसतक परिक्षणां करीत आयल्यात. तांका आतां मेरेन सर्स्वती वाचनमंदीर, पणजी, गोवा सेक्युलर सेल, रामानंद प्रकाशन, कलामंथन आमोणे, कोंकण टायम्स, गोंय विध्यापीठ, कोंकणी सेवा केंद्र कुडचडे, कोंकणी भाशा मंडळ हांचे पुर्स्कार फावो जाल्यात. तांचे लिखाण भांग्रभूंय, बिमब, जाग आदी नेमाळ्यांनीं उज्वाडाक येता. आकाशवाणी पणजी केंद्राचेर तांचे कविता वाचनाचे काऱ्यक्रम जातात. बोर्कार हांणी मुंबय विध्यापीठाची रसायनशासत्र आनी कायद्याची पद्वी घेतल्या. त्याभायर ताणीं गोंय विद्यापीठांतल्यान कोंकणी विश्यांत पद्व्युत्तर पद्वी (M.A.) आणी व्यवस्थापन, कामगार कायदो आनी कर (Taxation) ह्या विश्यांत पद्वीका घेतल्यात. ते हालींच एका बहुराषट्रीय कंपनीतल्यान अधिकारी पदावेल्यान निवृत्त जाल्यात. आतां मेरेन तांचे दोन कविता संग्रह 'अथ्रेक' आनी 'तूं' हे उज्वाडाक आयल्यात आनीक दोन कविता संग्रह आनी एक कथा संग्रहाचेर काम चालू आसा.


ದಾಯ್ಜ್.ಕೊಮ್

2004 ಥಾವ್ನ್ 2011 ಪರ್ಯಾಂತ್ ಕಾರ್ಯಾಳ್ ಆಸ್‌ಲ್ಲ್ಯಾ ದಾಯ್ಜ್.ಕೊಮ್ ಚೆರ್ ಪರ್ಗಟ್‌ಲ್ಲ್ಯಾ ವಿಂಚ್ಣಾರ್ ಸಾಹಿತಾಕ್ ಆಮಿ ಫುಡಿಲ್ಯಾ ದಿಸಾಂನಿ ಪಯ್ಣಾರಿ ವಾಚ್ಪ್ಯಾಂಕ್ ಲಾಭಯ್ತೆಲ್ಯಾಂವ್.