|
Vasco xarant Konknni Vachunk Proxikxonn
Vasco : Lhan bhurgeank Romi lipintlean xikop
suru korpacho vell aila ani taka DKA-n fuddakar
gheunk zai oxem mot St. Andrew Igorjecho Padr
vigar Fr. Gabriel Coutinho hannem ugtailem.
Dalgado Konknni Akademin Vasco xarantlea kaim
venchik Konknni mogiank vachpa vixim margdorxon
kar’yaxalla 30 Setembr 2018 disa St. Andrew
Firgojechea vosreant ghoddoun haddli. Fr.
Gabriel Mukhel Soiro mhunn hajir aslo. Tache
borabor DKA-cho Odheokx Tomazinho Cardozo,
Chittnis Vincy Quadros ani Bhanddari Celso
Fernandes machier hajir asle.
Fr. Gabrielan mukhar sanglem ki apoilole
thodde punn pavle itlech, punn je pavle tannim
novem kitem tori xikpacho yotn kelo mhunn
firgozkarank xabaski dili. Hie karyaxallechem
mohotv somzun St. Andrew firgojecho padr vigar
Fr. Gabriel Mascarenhas hannem bhouch khuxalkai
veokt keli ani osli xikvonn zor amchea lhan
bhurgeank dili zalear bhurgim bore bhoxen
Konknni xikonk pavtolim oxe udgar kaddle. Jednam
Romi lipi Konknni amchea sogllea dhormik karyank
vaportat tednam bhurgeamni hi torechi Konknni
xikonk zai mhunn tannem DKA koddem agro dhorlo.
Tede vellar Odheokx Tomazinho Cardozo hannem hie
vixim toyari chalu asa mhunn sanglem.
Romi lipintlean vachpa vixim khas karyavollik
Fr. Gabriela borabor tacho patkur Fr. Camilui
hajir aslo. Vasco xarant karyavoll ghoddoun
haddunk Vavurpi somiticho Vangddi Daniel F. De
Souza hannem boroch pez ghetlo ani hi karyavoll
zoitivont keli. Sumar xembhor lok hie
karyavollik hajir asle.
Bhatmi: Vinsi Kvaddros | 
