|
|
|
ಕವಿ ಆನಿ ಹಕ್ಕ್-ಮಾನ್ -
2.
ನಾಗೇಶ್ ಬಾಬ್ ಕಾರ್ಮಲಿ ಸ್ಮಾರಕ್
ಮಯ್ನ್ಯಾಚಿ ಕವಿತಾ |
|
ಸಾಂಪ್ರದಾಯಿಕ್ ಎಕ್ಚಾರಾಚಿ ಪರಂಪರಾ ಭಾರ್ತಾಚ್ಯಾ
ಗಿರೆಸ್ತ್ ಸಾಹಿತ್ಯ್ ದಾಯ್ಜಾಂತ್ ಖೊಲಾಯೆನ್ ರುಜ್ಲ್ಯಾ.
ಎಕ್ಚಾರ್, ಸಹಿಶ್ಣುತಾಯ್, ಧರ್ಮೀಕ್ ಸಮ್ರಸತಾಯ್ ಹೆ
ಆದ್ರ್ಶ್ ಉಕ್ತಾವಪಾಖಾತೀರ್ ಭಾರ್ತೀಯ್ ಕಾವ್ಯಾನ್ ಎಕ್
ಪ್ರಭಾವಿ ಮಾಧ್ಯಮ್ ಮ್ಹಣೂನ್ ಕಾಮ್ ಕೆಲಾಂ. ವೆಗ್ವೆಗ್ಳ್ಯಾ
ಕಾಳಾಂತ್ಲ್ಯಾ ಆನಿ ಪ್ರದೆಶಾಂತ್ಲ್ಯಾ ಕವೀಂನಿ
ಭಾರ್ತಾಂತ್ಲ್ಯಾ ವಿವಿಧತಾಯೆಚಿ ಪರಬ್ ಮನಯ್ಲ್ಯಾ ಆನಿ
ಧರ್ಮೀಕ್ ಶಾಂತ್ತಾಯೆಚೊ ಪುರ್ಸ್ಕಾರ್ ಕೆಲಾ.
6
ವ್ಯಾ ತೆ ಸತ್ರಾವ್ಯಾ ಶೆಂಕ್ಡ್ಯಾಂಮದಿಂ ಫುಲ್ಪಿ ಭಕ್ತಿ
ಚಳವ್ಳೀಂತ್ಲ್ಯಾನ್ ವೆಗ್ವೆಗ್ಳ್ಯಾ ಪ್ರಾದೆಶಿಕ್ ಭಾಶಾಂನಿ
ಭಕ್ತಿಕಾವ್ಯಾಚಿ ಗಿರೆಸ್ತಕಾಯ್ ನಿರ್ಮಾಣ್ ಜಾಲಿ. ಕಬೀರ್,
ಗುರು ನಾನಕ್, ಮೀರಾಬಾಯಿ ಹ್ಯಾ ಭಕ್ತಿಕವೀಂನಿ ಸಗ್ಳ್ಯಾ
ಧರ್ಮಾಂಚ್ಯಾ ಎಕ್ಚಾರಾಚೆರ್ ಆನಿ ಮೊಗ್ ಆನಿ ಭಕ್ತೀಚ್ಯಾ
ಸಾರ್ವತ್ರಿಕ್ ಸ್ವರುಪಾಚೆರ್ ಭರ್ ದಿಲ್ಲೊ. ತಾಂಚ್ಯಾ
ಉತ್ರಾಂನಿ ಧರ್ಮೀಕ್ ಮರ್ಯಾದಾ ಹುಂಪೂನ್ ವೆಗ್ವೆಗ್ಳ್ಯಾ
ಧರ್ಮಾಂಚ್ಯಾ ಅನುಯಾಯಾಂಮದಿಂ ಎಕ್ಚಾರ್ ವಾಡೊವ್ಪಾಚೊ
ಸಂದೆಶ್ ದಿಲೊ.
ರೂಮಿ, ಬುಲ್ಲೆಹಶಾಹ್, ಅಮೀರ್
ಖುಸ್ರೊ ಹ್ಯಾ ಸುಫಿ ಕವೀಂನಿ ಆಪ್ಲೆ ಗೂಢ್ ಅಣ್ಭವ್
ಉಕ್ತಾವಪಾಖಾತೀರ್ ಆನಿ ಆಂತರಧ್ರ್ಮೀಯ್ ಸಮ್ಜೂತೀಕ್ ಚಾಲ್ನಾ
ದಿವ್ಪಾಚೆಂ ಸಾಧನ್ ಮ್ಹಣೂನ್ ಕಾವ್ಯಾಚೊ ಉಪೆಗ್ ಕೆಲೊ.
ತಾಂಚ್ಯಾ ಕಾವ್ಯಾಂತ್ ಮೊಗ್, ಭಕ್ತಿ ಆನಿ ಸಗ್ಳ್ಯಾ
ಪ್ರಾಣ್ಯಾಂಚೊ ಎಕವ್ಟ್ ಹ್ಯಾ ವಿಶ್ಯಾಂಚೊ ಅಭ್ಯಾಸ್
ಕೆಲ್ಲೊ. ಸೂಫಿ ಕಾವ್ಯಾಂತ್ ಧರ್ಮೀಕ್ ವಿಭಾಜನಾಂಕ್ ಪಯ್ಸ್
ಕರೂನ್ ದರ್ ಎಕಾ ವ್ಯಕ್ತೀಂತ್ಲ್ಯಾ ದೈವಿ ತತ್ತ್ವಾಕ್
ವಳ್ಖೂನ್ ಘೆವ್ಪಾಚೆ ಕಲ್ಪನೆಚೆರ್ ಭರ್ ದಿಲ್ಲೊ.
ಸ್ವಾತಂತ್ರ್ಯ್ ಸಂಘ್ರ್ಶಾಂತ್ ಆನಿ ಸ್ವಾತಂತ್ರ್ಯಾ
ಉಪ್ರಾಂತ್ಚ್ಯಾ ಕಾಳಾಂತ್ ಫೈಜ್ ಅಹ್ಮದ್ ಫೈಜ್, ಸಾಹಿರ್
ಲುಧಿಯ್ನವಿ, ಅಲಿ ಸರ್ದಾರ್ ಜಾಫ್ರಿ ಹ್ಯಾ ಪುರೊಗಾಮಿ
ಕವೀಂನಿ ಸಾಂಪ್ರದಾಯಿಕ್ ಸಮ್ರಸತಾಯ್ ಆನಿ
ಧರ್ಮನಿರಪೆಕ್ಷತಾಯೆಚೆಂ ಮ್ಹತ್ವ್ ಉಕ್ತೆಂ ಕೆಲೆಂ.
ಸಮ್ಕಾಲೀನ್ ಭಾರ್ತೀಯ್ ಕವಿ ಹಿ ಪರಂಪರಾ ತಿಗೊವ್ನ್
ದವ್ರತಾತ್. ಗುಲ್ಜಾರ್, ಜಾವೆದ್ ಅಖ್ತರ್, ಕೆಕಿ
ಎನ್.ದರುವ್ಲ್ಲಾ ಸಾರ್ಕಿಲೆ ಕವಿ ಸಹಅಸ್ತಿತ್ವ್, ವಾಂಟೂನ್
ಘೆತಿಲ್ಲೆಂ ಮನೀಸಪಣ್ ಆನಿ ವೆಗ್ವೆಗ್ಳ್ಯಾ ಧರ್ಮೀಕ್
ಸಮಾಜಾಂ ಮದಿಂ ಸಮ್ಜೂನ್ ಘೆವ್ಪಾಚಿ ಗರಜ್ ಹ್ಯಾ
ವಿಶ್ಯಾಂಚೆರ್ ಸಂಶೊಧನ್ ಕರ್ತಾತ್. ವೆಗ್ವೆಗ್ಳ್ಯಾ
ಫಾಟ್ಭೂಂಯಚೆ ಲೊಕ್ ಜೆನ್ನಾ ಸುಸಂವಾದಾನ್ ಎಕ್ಠಾಂಯ್
ರಾವ್ತಾತ್ ತೆನ್ನಾ ದೆಶ್ ಘಟ್ಮೂಠ್ ಜಾತಾ ಆನಿ ಎಕ್ಚಾರಾಚಿ
ಭಾವ್ನಾ ನಿರ್ಮಾಣ್ ಜಾತಾ.
ಕೊಂಕ್ಣಿ ಕವಿತೆಂತ್
ಧರ್ಮೀಕ್ ಎಕ್ಚಾರಾಚೊ ಪುರ್ಸ್ಕಾರ್ ಹಿ ಸಂಕ್ಲ್ಪನಾ ನವಿ
ನ್ಹಯ್ ಪೂಣ್ ಸದ್ಯಾಚ್ಯಾ ಕಾಳಾಂತ್ ರಾಜ್ಕಿ
ಫಾಯ್ದ್ಯಾಪಾಸತ್ ಜಂಯ್ ಎಕ್ಮೆಕಾಂಆಡ್ ಅವಿಸ್ವಾಸಾಚೆಂ
ವಾತಾವ್ರಣ್ ನಿರ್ಮಾಣ್ ಕರ್ಪಾಚೆ ಯತ್ನ್ ಚಾಲು ಆಸಾತ್ ತೆ
ಫಾಟ್ಭುಂಯೆರ್ ಹ್ಯಾ ಮ್ಹಯ್ನಾಚೆ ಸ್ಮೃತಿಶೆಶ್ ಬಾಬ್
ನಾಗೆಶ್ ಕರ್ಮಲಿ ಯಾದ್ಸ್ತೀಕ್ ಕವಿ ಹಕ್ಕ್ ಮಾನ್
ಪುರ್ಸ್ಕಾರಾಖಾತೀರ್ ಜೈತಿವಂತ್ ಜಾಲ್ಲೆ ಕವಿತೆಚೆಂ ಖಾಸ್
ಮ್ಹತ್ವ್ ಆಸಾ.
ರಹಿಮಾಗೆರ್ ದಿವಾಳಿ ರಾಮಾಗೆರ್
ನಾತಾಳ್
ರೆಮೀಗೆರ್ ಈದ್ ಮುಬಾರಕ್
ಅಶಿ ಜಾವ್ಚಿ
ಆಮ್ಚಿ ಪಾರಖ್.
ಹ್ಯಾ ಒಳೀಂನಿ ಸುರ್ವಾತ್ ಜಾಲ್ಲಿ
ಹಿ ಕವಿತಾ ಆಮ್ಚ್ಯಾ ಧರ್ಮೀಕ್ ಸಮಾಜೀಕ್ ಎಕ್ಚಾರಾಚ್ಯಾ
ಗಿರೆಸ್ತ್ ಪರಂಪರೆಚೆಂ ದಾಯ್ಜ್ ಅಧೊರೆಖಿತ್ ಕರೂನ್ ತೆಂ
ದಾಯ್ಜ್ ತಿಗೊವ್ನ್ ದವ್ರಪಾಚೆಂ ಆವಾಹನ್ ಕರ್ತಾ. ಧರ್ಮೀಕ್
ಎಕ್ಚಾರಾಂತ್ಲ್ಯಾನ್ ಶಾಂತ್ತಾಯೆಚ್ಯಾ ಸಹಅಸ್ತಿತ್ವಾಚಿ
ಖಾತ್ರಿ ಜಾತಾ. ತಣಾವ್, ಸಂಘ್ರ್ಶ್ ಆನಿ ಹಿಂಸಾ ಸೊಂಪ್ತಾ.
ಸಮಾಜಾಂ ಮದಿಂ ಸಮ್ಜೂತ್, ಆದರ್ ಆನಿ ಸಹಿಶ್ಣುತಾಯ್
ವಾಡ್ಪಾಕ್ ಶಾಂತ್ತಾಯೆನ್ ಸಂವಾದ್, ಸಂವಾದ್ ಆನಿ
ಸಹ್ಕಾರ್ಯಾಚಿ ವಾಟ್ ಮೆಕ್ಳಿ ಜಾತಾ. ದೆಖೂನ್
'ದರ್ ಘರಾಂತ್ ಶ್ರಧ್ದೆಚೊ ಸರ್ಗ್ ನಾಕಾ ಭೆದಾಂಚೊ
ನರಕ್...'
ಅಶೆಂ ಸಾಂಗೂನ್, ದರೆಕ್ ಧರ್ಮಾಂತ್ಲ್ಯಾ
ಉತ್ಸವಾಂಚಿ, ಪರ್ಬಾಂಚಿ ದೆಖ್ ದಿವ್ನ್ ಕವಿ ವಾಚ್ಪ್ಯಾಚೆ
ಭಾವ್ನೆಕ್ ಹಾತ್ ಘಾಲ್ತಾ. ಜೆನ್ನಾ ಸಮಾಜ್ ಎಕ್ಠಾಂಯ್
ಯೆವ್ನ್ ಎಕ್ಚಾರಾನ್ ಕಾಮ್ ಕರ್ತಾತ್ ತೆನ್ನಾ ತೆ
ಸಾಮುಹೀಕಪಣಾನ್ ಸಮಾಜೀಕ್ ಆವ್ಹಾನಾಂಕ್ ತೊಂಡ್ ದಿವಂಕ್
ಶಕ್ತಾತ್ ಆನಿ ದೆಶಾಚೆ ಉದ್ರಗತೀಂತ್ ಯೊಗ್ದಾನ್ ದಿವಂಕ್
ಶಕ್ತಾತ್. ತಾತೂಂತ್ ಸಹ್ಕಾರ್ಯ್, ಪರ್ಸ್ಪರ್ ಆದಾರ್ ಆನಿ
ಸಂಸಾಧನಾಂ, ಗಿನ್ಯಾನ್ ಆನಿ ಕುಶ್ಳಟಾಯ್ ವಾಂಟಪ್ ಸೊಂಪೆಂ
ಜಾತಾ, ಜಾಕಾ ಲಾಗೂನ್ ಸಮಾವೆಶಕ್ ವಾಡ್ ಜಾತಾ.
ರೆಮಿಗೆರ್ ಶಿರ್ಖುರ್ಮಾ, ರಹಿಮಾಗೆರ್ ಸಾನ್ನಾಂ
ರಾಮಾಗೆರ್ ದೊದೊಲ್ ಕೊಣಾಕ್ ಕಾಂಯ್ ನಾ ಮಾರಕ್
ಅಶಿ
ಜಾವ್ಚಿ ಆಮ್ಚಿ ಪಾರಖ್
ಸಣಾ ಪರ್ಬಾಂಕ್ ತಯಾರ್
ಜಾಲ್ಲಿಂ, ತೊಂಡ್ ಗೊಡ್ ಕರ್ಪಿ ಖಾಸ್ ಗೊಯಾಂತ್ ಕೆಲ್ಲಿಂ
ರಾಂದ್ಪಾಂ ಹಿ ಪರಂಪರಾ ಎಕ್ಮೆಕಾಂಮದಿಂ ವಾಂಟೂನ್ ಘೆಪಾಚೆಂ
ವರ್ಣನ್ ಕರ್ಪಿ ಹಿ ಗೊಡ್ ಉತ್ರಾಂ ಖಂಯ್ಚ್ಯಾ ಗೊಂಯ್ಕಾರಾಕ್
ಪರ್ಕಿ ದಿಸತ್?
ಆಯ್ಜ್ ಧರ್ಮೀಕ್ ಎಕ್ಚಾರಾಂತ್ ಬಾದಾ
ಹಾಡ್ಪಿ ಕಾಂಯ್ ಸಂದ್ಸಾಧು ಜಾಲ್ಲ್ಯಾ ಸಮಾಜಾಚ್ಯಾ
ದುಸ್ಮಾನಾಂನಿ ರಂಗ್ ಲೆಗೀತ್ ವಾಂಟೂನ್ ಘಾಲ್ಯಾತ್. ಅಶಾ
ವೆಳಾರ್ ಹೆ ರಂಗ್ ಎಕ್ಚಾರಾಚೆಂ ಪ್ರತೀಕ್ ಕಶೆಂ ಜಾಂವ್
ಯೆತಾ ಹೆಂ ಸಾದ್ಯಾ, ಸರಳ್ ಉತ್ರಾಂನಿ ಸಾಂಗ್ತಾ.
ರೆಮಿಗೆರ್ ಪಾಚ್ವೊ ರಹಿಮಾಗೆರ್ ಭಗ್ವೊ
ರಾಮಾಗೆರ್ ಧವೊ
ರಂಗ್ ಸಗ್ಳೆ ಸಗ್ಳ್ಯಾಂಕ್ ಪೂರಕ್
ಅಶಿ ಜಾವ್ಚಿ ಆಮ್ಚಿ
ಪಾರಖ್
ನಿಮ್ಣ್ಯಾ ಕಡ್ವ್ಯಾಂತ್ ಕವಿ ಆಮ್ಚಿ ಖರಿ
ಪಾರಖ್ ಸೊಬೀತ್, ಸಗ್ಳ್ಯಾಂಕ್ ವೆಂಗಾವ್ಪಿ ಉತ್ರಾಂನಿ
ವ್ಯಕ್ತ್ ಕರ್ತಾ ಆನಿ ದುಸ್ವಾಸಾಆಡ್ ಮೊಗಾಚೊ ಸಂದೆಶ್
ದಿತಾ.
ನಾತಾಳಾಂತ್ ನಕೆತ್ರಾಂನಿ ಸಂವ್ಸಾರ್
ಭರ್ಲಾ.
ಕೊಜಾಗಿರೀಚೊ ಚಂದ್ರ್ ಜಾಲಾ ರಹಿಮಾಚೊ ಅಲ್ಲಾ,
ವಾಟೂನ್ ಘೆವ್ಯಾ ಖುಶಿ, ಸೊಪೊವ್ಯಾ ದುಸ್ವಾಸಾಂಚೊ ರಖ್ರಖ್.
ಅಶೀಚ್ ಜಾವ್ಚಿ ಆಮ್ಚಿ ಪಾರಖ್
ಅಶೀಚ್ ಜಾವ್ಚಿ ಆಮ್ಚಿ
ಪಾರಖ್
ವಿಂಗಡ್ ವಿಂಗಡ್ ಸಂಸ್ಕೃತಾಯೊ, ಪರಂಪರಾ
ಆನಿ ಪದ್ದತೀಂಚೊ ಉತ್ಸವ್ ಮನೊವ್ಪಾಕ್ ಪ್ರೊತ್ಸಾಹನ್
ಮೆಳಿಲ್ಲ್ಯಾನ್ ಲೊಕಾಂಕ್ ಎಕಾಮೆಕಾಂ ಕಡ್ಲ್ಯಾನ್ ಶಿಕ್ಪಾಕ್
ಮೆಳ್ಟಾ, ವೆಗ್ವೆಗ್ಳ್ಯಾ ನದ್ರಾಂಚಿ ಕದರ್ ಕರ್ಪಾಕ್
ಮೆಳ್ಟಾ ಆನಿ ಸಾಂಸ್ಕೃತೀಕ್ ಆದಾನ್-ಪ್ರದಾನ್ ಕರ್ಪಾಕ್
ಮೆಳ್ಟಾ ಅಶೆಂ ವಾತಾವ್ರಣ್ ತಯಾರ್ ಜಾತಾ. ಹಿ ಸಾಂಸ್ಕೃತೀಕ್
ಸಮೃಧ್ದಿ ಸೃಜನಶೀಲತಾ, ನವ್ನಿರ್ಮಾಣ್ ಆನಿ ಸಮಾಜೀಕ್
ಪ್ರಗ್ತಿ ಹಾಂಕಾಂ ಚಾಲ್ನಾ ದಿತಾ. ನಾಗ್ರಿಕಾಂಖಾತೀರ್ ಚಡ್
ಸಮಾವೆಶಕ್, ಸಮೃಧ್ದ್ ಆನಿ ಸುಸಂವಾದಾತ್ಮಕ್ ಸಮಾಜ್ ತಯಾರ್
ಕರ್ಪಾಚಿ ಗರಜ್ ಆಸಾ ಅಶೆ ಆಯಚೆ ಘಡ್ಯೆಕ್ ಹಿ ಕವಿತಾ
ಸಾಮ್ಕಿ ಸಮರ್ಪಕ್.
- ಶೈಲೇಂದ್ರ ಮೆಹ್ತಾ
| |
|
[ಕವಿತಾ]
ರಹೀಮಾಗೆರ್
ದಿವಾಳಿ (ಡಾ|ಪೂರ್ಣಾನಂದ ಚಾರಿ) |
|
|
|
ರಹೀಮಾಗೆರ್ ದಿವಾಳಿ
ರಹಿಮಾಗೆರ್ ದಿವಾಳಿ
ರಾಮಾಗೆರ್ ನಾತಾಳ್
ರೆಮೀಗೆರ್ ಈದ್ ಮುಬಾರಕ್
ಅಶಿ ಜಾವ್ಚಿ ಆಮ್ಚಿ
ಪಾರಖ್
ರಾಮಾಗೆರ್ ನಮಾಜ್
ರೆಮಿಗೆರ್ ಭಜನ್
ರಹಿಮಾಗೆರ್ ಲಾದಿನಾಂ
ಭಾವಾರ್ಥಾನ್ ನಾ ಫರಕ್
ಅಶಿ ಜಾವ್ಚಿ ಆಮ್ಚಿ
ಪಾರಖ್
ರಾಮಾಗೆರ್ ಯೆಶು
ಸರ್ವೆಶ್ವರ್, ರೆಮಿಗೆರ್ ಪೈಗಂಬರ್
ರಹಿಮಾಗೆರ್ ದತ್ತ್
ದಿಗಂಬರಾ
ದರ್ ಘರಾಂತ್ ಶ್ರಧ್ದೆಚೊ
ಸರ್ಗ್ ನಾಕಾ ಭೆದಾಂಚೊ ನರಕ್
ಅಶಿ ಜಾವ್ಚಿ ಆಮ್ಚಿ
ಪಾರಖ್
ರೆಮಿಗೆರ್ ಶಿರ್ಖುರ್ಮಾ,
ರಹಿಮಾಗೆರ್ ಸಾನ್ನಾಂ
ರಾಮಾಗೆರ್ ದೊದೊಲ್
ಕೊಣಾಕ್ ಕಾಂಯ್ ನಾ ಮಾರಕ್
ಅಶಿ ಜಾವ್ಚಿ ಆಮ್ಚಿ
ಪಾರಖ್
ರೆಮಿಗೆರ್ ಪಾಚ್ವೊ
ರಹಿಮಾಗೆರ್ ಭಗ್ವೊ
ರಾಮಾಗೆರ್ ಧವೊ ರಂಗ್
ಸಗ್ಳೆ ಸಗ್ಳ್ಯಾಂಕ್ ಪೂರಕ್
ಅಶಿ ಜಾವ್ಚಿ ಆಮ್ಚಿ
ಪಾರಖ್
ನಾತಾಳಾತ್ಯಾ ನಕೆತ್ರಾಂನಿ
ಸಂವ್ಸಾರ್ ಭರ್ಲಾ
ಲಕ್ಷ್ಮೀಚೆ ಕೊಜಾಗಿರೀಚೊ
ಚಂದ್ರ್ ಜಾಲಾ ಸಹಿಮಾಚೊ ಅಲ್ಲಾ
ವಾಟೂನ್ ಘೆವ್ಯಾ ಖುಶಿ
ಸೊಪೊವ್ಯಾ ದುಸ್ವಾಸಾಂಚೊ ರಖ್ರಖ್
ಅಶೀಚ್ ಜಾವ್ಚಿ ಆಮ್ಚಿ
ಪಾರಖ್
ಅಶೀಚ್ ಜಾವ್ಚಿ ಆಮ್ಚಿ
ಪಾರಖ್
******
-
ಡಾ|ಪೂರ್ಣಾನಂದ ಚಾರಿ, ಗೊಂಯ್ [
ಜುಲಾಯ್, 2023] |
|
|
|
|
ಕವಿ ಆನಿ
ಹಕ್ಕ್-ಮಾನ್
|
|
Kovi ani hokk-man - 2.
Nagesh Bab Karmali smarok Moineachi
Kovita |
|
Samprodayik ekcharachi
porompora bhartachea girest sahity daizant
kholayen rujlea. Ekchar, sohixnnutai, dhormik
somrosotai he adrx uktaupakhatir bharti-i kavean
ek probhavi madhyom' mhonnun kam' kelam.
Vegvegllea kallantlea ani prodexantlea kovimni
bhartantlea vividhotayechi porob monoilea ani
dhormik xant'tayecho purskar kela.
6 vea
te sotravea xenkddeam'modim fulpi bhokti
cholloullintlean vegvegllea pradexik bhaxamni
bhoktikaveachi girestokai nirmann zali. Kobir,
guru nanok, mirabai hea bhoktikovimni sogllea
dhormanchea ekcharacher ani mog ani bhoktichea
sarvotrik svorupacher bhor dil'lo. Tanchea
utramni dhormik moreada humpun vegvegllea
dhormanchea onuyayam'modim ekchar vaddoupacho
sondex dilo.
Rumi, bul'lehoxah, omir
khusro hea sufi kovimni aple guddh onnbhou
uktaupakhatir ani antorodhrmi-i somzutik chalna
divpachem sadhon mhonnun kaveacho upeg kelo.
Tanchea kaveant mog, bhokti ani sogllea
pranneancho ekoutt hea vixeancho obheas kel'lo.
Sufi kaveant dhormik vibhazonank pois korun dor
eka vyoktintlea doivi tot'tvak vollkhun
gheupache kolponecher bhor dil'lo.
Svatontry songhrxant ani svatontrea uprantchea
kallant foiz ohmod foiz, sahir ludhiynovi, oli
sordar zafri hea purogami kovimni samprodayik
somrosotai ani dhormoniropekxotayechem mhotv
uktem kelem.
Somkalin bharti-i kovi hi
porompora tigoun dourotat. Gulzar, zaved okhtor,
keki en.Doruvl'la sarkile kovi sohostitv,
vanttun ghetil'lem monisoponn ani vegvegllea
dhormik somazam modim somzun gheupachi goroz hea
vixeancher sonxodhon kortat. Vegvegllea
fattbhumyoche lok jen'na susomvadan ekttham-i
rautat ten'na dex ghottmutth zata ani ekcharachi
bhauna nirmann zata.
Konknni kovitent
dhormik ekcharacho purskar hi sonklpona novi
nhoi punn sodeachea kallant rajki faideapasot
zom-i ekmekamadd ovisvasachem vatauronn nirmann
korpache yotn chalu asat te fattbhumyer hea
mhoinache smritixex bab nagex kormoli yadstik
kovi hokk man purskarakhatir zoitivont zal'le
kovitechem khas mhotv asa.
Rohimager
divalli ramager natall
remiger id mubarok
oxi zauchi amchi parokh.
Hea ollimni
survat zal'li hi kovita amchea dhormik somajik
ekcharachea girest poromporechem daiz odhorekhit
korun tem daiz tigoun douropachem avahon korta.
Dhormik ekcharantlean xant'tayechea
sohostitvachi khatri zata. Tonnavo, songhrx ani
himsa sompta. Somazam modim somzut, ador ani
sohixnnutai vaddpak xant'tayen somvad, somvad
ani sohkareachi vatt meklli zata. Dekhun
'dor ghorant xrodhdecho sorg naka
bhedancho norok...'
oxem sangun,
dorek dhormantlea utsovanchi, porbanchi dekh
divn kovi vachpeache bhaunek hat ghalta. Jen'na
somaz ekttham-i yeun ekcharan kam' kortat ten'na
te samuhikoponnan somajik auhanank tondd divonk
xoktat ani dexache udrogotint yogdan divonk
xoktat. Tatunt sohkary, porspor adar ani
somsadhonam, ginean ani kuxllottai vanttop
sompem zata, zaka lagun somavexok vadd zata.
Remiger xirkhurma, rohimager san'nam
ramager dodol konnak kaim na marok
oxi zauchi
amchi parokh
sonna porbank toyar
zal'lim, tondd godd korpi khas goyant kel'lim
randpam hi porompora ekmekam'modim vanttun
ghepachem vornnon korpi hi godd utram khoinchea
gõykarak porki disot?
aiz dhormik ekcharant
bada haddpi kaim sondsadhu zal'lea somazachea
dusmanamni rong legit vanttun ghaleat. Oxa
vellar he rong ekcharachem protik koxem zamv
yeta hem sadea, soroll utramni sangta.
Remiger pachvo rohimager bhogvo
ramager
dhovo rong soglle soglleank purok
oxi zauchi
amchi parokh
nimnnea koddveant kovi
amchi khori parokh sobit, soglleank vengaupi
utramni vyokt korta ani dusvasaadd mogacho
sondex dita.
Natallant noketramni
somvsar bhorla.
Kozagiricho chondr zala
rohimacho ol'la,
vattun ghevea khuxi, sopovea
dusvasancho rokhrokh.
Oxich zauchi amchi
parokh
oxich zauchi amchi parokh
vingodd vingodd somskritayo, porompora ani
pod'dotincho utsou monoupak protsahon
mellil'lean lokank ekamekam koddlean xikpak
melltta, vegvegllea nodranchi kodor korpak
melltta ani samskritik adan-prodan korpak
melltta oxem vatauronn toyar zata. Hi samskritik
somridhdi srizonoxilota, nounirmann ani somajik
progti hankam chalna dita. Nagrikankhatir chodd
somavexok, somridhd ani susomvadatmok somaz
toyar korpachi goroz asa oxeaiche ghoddyek hi
kovita samki somrpok.
- Shailendra Mehta |
|
[kovita]
Rohimager Divalli
(-
Dr.Purnanda Chari) |
|
Rohimager Divalli
Rohimager divalli Ramager natall
remiger id
mubarok
oxi zauchi amchi parokh
ramager nomaz remiger bhozon
rohimager
ladinam bhavarthan na forok
oxi zauchi amchi
parokh
ramager yexu sorvexvor, remiger
poigombor
rohimager dot't digombora
dor
ghorant xrodhdecho sorg naka bhedancho norok
oxi zauchi amchi parokh
remiger
xirkhurma, rohimager san'nam
ramager dodol
konnak kaim na marok
oxi zauchi amchi parokh
remiger pachvo rohimager bhogvo
ramager
dhovo rong soglle soglleank purok
oxi zauchi
amchi parokh
natallatea noketramni
somvsar bhorla
lokxmiche kozagiricho chondr
zala sohimacho ol'la
vattun ghevea khuxi
sopovea dusvasancho rokhrokh
oxich zauchi
amchi parokh
oxich zauchi amchi parokh
******
- Dr.Purnananda
Chari, Goa [July,
2023] |
|
|
|
|
Kovi Ani Hokk-Man
|
|
कवी आनी हक्क-मान -
२.
नागॆश बाब कार्मली स्मारक मयन्याची कविता |
|
साम्प्रदायिक एकचाराची परंपरा भारताच्या गिरेस्त
साहित्य दायजांत खोलायेन रुजल्या. एकचार,
सहिश्णुताय, धर्मीक समरसताय हे आदर्श
उक्तावपाखातीर भारतीय काव्यान एक प्रभावी माध्यम
म्हणून काम केलां. वेगवेगळ्या काळांतल्या आनी
प्रदेशांतल्या कवींनी भारतांतल्या विविधतायेची परब
मनयल्या आनी धर्मीक शांततायेचो पुरस्कार केला.
६ व्या ते सतराव्या शेंकड्यांमदीं फुलपी भक्ति
चळवळींतल्यान वेगवेगळ्या प्रादेशिक भाशांनी
भक्तिकाव्याची गिरेस्तकाय निर्माण जाली. कबीर,
गुरू नानक, मीराबाई ह्या भक्तिकवींनी सगळ्या
धर्मांच्या एकचाराचेर आनी मोग आनी भक्तीच्या
सार्वत्रिक स्वरुपाचेर भर दिल्लो. तांच्या उतरांनी
धर्मीक मर्यादा हुंपून वेगवेगळ्या धर्मांच्या
अनुयायांमदीं एकचार वाडोवपाचो संदेश दिलो.
रूमी, बुल्लेहशाह, अमीर खुसरो ह्या सुफी कवींनी
आपले गूढ अणभव उक्तावपाखातीर आनी आंतरधर्मीय
समजूतीक चालना दिवपाचें साधन म्हणून काव्याचो उपेग
केलो. तांच्या काव्यांत मोग, भक्ती आनी सगळ्या
प्राण्यांचो एकवट ह्या विशयांचो अभ्यास केल्लो.
सूफी काव्यांत धर्मीक विभाजनांक पयस करून दर एका
व्यक्तींतल्या दैवी तत्त्वाक वळखून घेवपाचे
कल्पनेचेर भर दिल्लो.
स्वातंत्र्य
संघर्शांत आनी स्वातंत्र्या उपरांतच्या काळांत फैज
अहमद फैज, साहिर लुधियनवी, अली सरदार जाफ्री ह्या
पुरोगामी कवींनी सांप्रदायिक समरसताय आनी
धर्मनिरपेक्षतायेचें म्हत्व उक्तें केलें.
समकालीन भारतीय कवी ही परंपरा तिगोवन दवरतात.
गुलजार, जावेद अख्तर, केकी एन.दरुवल्ला सारकिले
कवी सहअस्तित्व, वांटून घेतिल्लें मनीसपण आनी
वेगवेगळ्या धर्मीक समाजां मदीं समजून घेवपाची गरज
ह्या विशयांचेर संशोधन करतात. वेगवेगळ्या
फाटभूंयचे लोक जेन्ना सुसंवादान एकठांय रावतात
तेन्ना देश घटमूठ जाता आनी एकचाराची भावना निर्माण
जाता.
कोंकणी कवितेंत धर्मीक एकचाराचो
पुरस्कार ही संकल्पना नवी न्हय पूण सद्याच्या
काळांत राजकी फायद्यापासत जंय एकमेकांआड
अविस्वासाचें वातावरण निर्माण करपाचे यत्न चालू
आसात ते फाटभुंयेर ह्या म्हयनाचे स्मृतिशेश बाब
नागेश करमली यादस्तीक कवी हक्क मान पुरस्काराखातीर
जैतिवंत जाल्ले कवितेचें खास म्हत्व आसा.
रहिमागेर दिवाळी रामागेर नाताळ
रॅमीगेर ईद
मुबारक
अशी जावची आमची पारख.
ह्या
ओळींनी सुरवात जाल्ली ही कविता आमच्या धर्मीक
समाजीक एकचाराच्या गिरेस्त परंपरेचें दायज
अधोरेखित करून तें दायज तिगोवन दवरपाचें आवाहन
करता. धर्मीक एकचारांतल्यान शांततायेच्या
सहअस्तित्वाची खात्री जाता. तणाव, संघर्श आनी
हिंसा सोंपता. समाजां मदीं समजूत, आदर आनी
सहिश्णुताय वाडपाक शांततायेन संवाद, संवाद आनी
सहकार्याची वाट मेकळी जाता. देखून
'दर
घरांत श्रध्देचो सर्ग नाका भेदांचो नरक...'
अशें सांगून, दरेक धर्मांतल्या उत्सवांची,
परबांची देख दिवन कवी वाचप्याचे भावनेक हात घालता.
जेन्ना समाज एकठांय येवन एकचारान काम करतात तेन्ना
ते सामुहीकपणान समाजीक आव्हानांक तोंड दिवंक शकतात
आनी देशाचे उदरगतींत योगदान दिवंक शकतात. तातूंत
सहकार्य, परस्पर आदार आनी संसाधनां, गिन्यान आनी
कुशळटाय वांटप सोंपें जाता, जाका लागून समावेशक
वाड जाता.
रॅमिगेर शिरखुर्मा, रहिमागेर
सान्नां
रामागेर दोदोल कोणाक कांय ना मारक
अशी जावची आमची पारख
सणा परबांक तयार
जाल्लीं, तोंड गोड करपी खास गोयांत केल्लीं
रांदपां ही परंपरा एकमेकांमदीं वांटून घेपाचें
वर्णन करपी ही गोड उतरां खंयच्या गोंयकाराक परकी
दिसत?
आयज धर्मीक एकचारांत बादा हाडपी कांय
संदसाधू जाल्ल्या समाजाच्या दुस्मानांनी रंग लेगीत
वांटून घाल्यात. अशा वेळार हे रंग एकचाराचें
प्रतीक कशें जांव येता हें साद्या, सरळ उतरांनी
सांगता.
रॅमिगेर पाचवो रहिमागेर भगवो
रामागेर धवो रंग सगळे सगळ्यांक पूरक
अशी जावची
आमची पारख
निमण्या कडव्यांत कवी आमची खरी
पारख सोबीत, सगळ्यांक वेंगावपी उतरांनी व्यक्त
करता आनी दुस्वासाआड मोगाचो संदेश दिता.
नाताळांत नकेत्रांनी संवसार भरला.
कोजागिरीचो
चंद्र जाला रहिमाचो अल्ला,
वाटून घेवया खुशी,
सोपोवया दुसवासांचो रखरख.
अशीच जावची आमची पारख
अशीच जावची आमची पारख
विंगड विंगड
संस्कृतायो, परंपरा आनी पद्दतींचो उत्सव मनोवपाक
प्रोत्साहन मेळिल्ल्यान लोकांक एकामेकां कडल्यान
शिकपाक मेळटा, वेगवेगळ्या नदरांची कदर करपाक मेळटा
आनी सांस्कृतीक आदान-प्रदान करपाक मेळटा अशें
वातावरण तयार जाता. ही सांस्कृतीक समृध्दी
सृजनशीलता, नवनिर्माण आनी समाजीक प्रगती हांकां
चालना दिता. नागरिकांखातीर चड समावेशक, समृध्द आनी
सुसंवादात्मक समाज तयार करपाची गरज आसा अशेआयचे
घडयेक ही कविता सामकी समर्पक.
-
शैलेंद्र मेहता |
|
[कविता]
रहीमागेर दिवाळी (डा।पूर्णानंद चारी) |
|
रहीमागेर दिवाळी
रहिमागेर दिवाळी रामागेर नाताळ
रॅमीगेर ईद
मुबारक
अशी जावची आमची पारख
रामागेर
नमाज रॅमिगेर भजन
रहिमागेर लादिनां भावार्थान
ना फरक
अशी जावची आमची पारख
रामागेर
येशु सर्वेश्वर, रॅमिगेर पैगंबर
रहिमागेर दत्त
दिगंबरा
दर घरांत श्रध्देचो सर्ग नाका भेदांचो
नरक
अशी जावची आमची पारख
रॅमिगेर
शिरखुर्मा, रहिमागेर सान्नां
रामागेर दोदोल
कोणाक कांय ना मारक
अशी जावची आमची पारख
रॅमिगेर पाचवो रहिमागेर भगवो
रामागेर धवो
रंग सगळे सगळ्यांक पूरक
अशी जावची आमची पारख
नाताळात्या नकेत्रांनी संवसार भरला
लक्ष्मीचे कोजागिरीचो चंद्र जाला सहिमाचो अल्ला
वाटून घेवया खुशी सोपोवया दुसवासांचो रखरख
अशीच
जावची आमची पारख
अशीच जावची आमची पारख
******
- डा।पूर्णानंद
चारी
[जुलाय, २०२३] |
| |
|
|
कवी आनी हक्क-मान |
|
|
|
 |
|
ದಾಯ್ಜ್.ಕೊಮ್
|
|
2004 ಥಾವ್ನ್
2011 ಪರ್ಯಾಂತ್ ಕಾರ್ಯಾಳ್ ಆಸ್‌ಲ್ಲ್ಯಾ
ದಾಯ್ಜ್.ಕೊಮ್ ಚೆರ್
ಪರ್ಗಟ್‌ಲ್ಲ್ಯಾ ವಿಂಚ್ಣಾರ್ ಸಾಹಿತಾಕ್ ಆಮಿ
ಫುಡಿಲ್ಯಾ ದಿಸಾಂನಿ ಪಯ್ಣಾರಿ ವಾಚ್ಪ್ಯಾಂಕ್
ಲಾಭಯ್ತೆಲ್ಯಾಂವ್. | |
| |
 |
|
