ಪಯ್ಣಾರಿ.ಕೊಮ್ Poinnari.Com: Konkani Research, Konkani Study, Progressive Konkanni Literature, Konkani Writing, Konkani Poetry, Creative Writing, Konkani Books, Konkani Association, Konkani Work, Fiction Writing, Poetry Criticism, Poetry Contests, Writing C

ಕವಿ ಆನಿ ಹಕ್ಕ್-ಮಾನ್ - 1.

ಪ್ರಕಾಶ್ ಬಾಬ್ ಪಡ್ಗಾಂವ್‌ಕಾರ್ ಸ್ಮಾರಕ್ ಮಯ್ನ್ಯಾಚಿ ಕವಿತಾ

ಹ್ಯಾ ಮ್ಹಯ್ನ್ಯಾಚ್ಯಾ ಸ್ಮೃತಿಶೆಶ್ ಕವಿ ಬಾಬ್ ಪ್ರಕಾಶ್ ಪಾಡ್ಗಾಂವಕರ್ ಸ್ಮಾರಕ್ ಕವಿ ಆನಿ ಹಕ್ಕ್-ಮಾನ್ ಪುರಸ್ಕಾರಾಖಾತೀರ್ ‘ಕಿಂಕ್ರಾಟಿ’ ಹಿ ಕವಿತಾ ಜೈತಿವಂತ್ ಜಾಲ್ಯಾ. ಹ್ಯಾ ವರ್ಸಾ ಪರತ್ ಸುರು ಕೆಲ್ಲ್ಯಾ ಪಯ್ಣಾರೀಚ್ಯಾ ಹ್ಯಾ ಮ್ಹಯ್ನಾಳ್ಯಾ ಉಪ್ಕ್ರಮಾಕ್ ಬರೊ ಪ್ರತಿಸಾದ್ ಲಾಬ್ಲಾ ಹಿ ಆಮ್ಚ್ಯಾಖಾತೀರ್ ವ್ಹಡಾ ಖೊಶೆಚಿ ಗಜಾಲ್. ಸರ್ತೀಖಾತೀರ್ ವಿಂಗಡ್ ವಿಂಗಡ್ ಕವೀಂನಿ ಧಾಡಿಲ್ಲ್ಯಾ ಕವಿತಾಂಚೊ ದರ್ಜೊಯ್ ದಿಸಾನ್ ದಿಸ್ ವಾಡ್ಟಾ ಹಿ ಕೊಂಕ್ಣಿ ಸಾಹಿತ್ಯಾಖಾತೀರ್ ಎಕ್ ಉರ್ಬಾ ದಿವ್ಪಿ ಗಜಾಲ್. ‘ಕಿಂಕ್ರಾಟಿ' ಕವಿತಾ ಜೈತಿವಂತ್ ಥಾರಾಯ್ತನಾ ಪರೀಕ್ಷಕ್ ಮಂಡ್ಳಾನ್ ತೆ ಕವಿತೆಚಿಂ ಕಾಂಯ್ ಖಾಶೆಲಪಣಾಂ ವಿಚಾರಾಂತ್ ಘೆತ್ಲ್ಯಾಂತ್.

ಬಾಯ್ಲಾಂ ಆಡ್ ವಾಡ್ಪಿ ಹಿಂಸಾಚಾರ್ ಹೊ ಫಕತ್ ದುಖ್ಖಾಚೊಚ್ ನ್ಹಯ್ ತರ್ ಚಿಂತೆಚೊ ವಿಶಯ್. ಲೈಂಗೀಕ್ ಹಿಂಸಾಚಾರ್ ಭಾರ್ತಾಸಯತ್ ಸಂವ್ಸಾರಾಂತ್ಲ್ಯಾ ಜಾಯ್ತ್ಯಾ ದೆಶಾಂನಿ ಜಾತಾ. ಪೂಣ್ ಭಾರ್ತಾಂತ್ ಹ್ಯಾ ಹಿಂಸಾಚಾರಾಚಿ ಕಾರ್ಣಾಂ ಹೆರ್ ದೆಶಾಂಪ್ರಮಾಣ್ ಆಸಾತ್ ಅಶೆಂ ನಾ. ಕಿಂಕ್ರಾಟಿ ಹಿ ಕವಿತಾ ಹ್ಯಾ ಹಿಂಸಾಚಾರಾಚೆರ್ ಎಕ್ ಖರ್ ಭಾಶ್ಯ್. ಲೈಂಗಿಕ್ ಅತ್ಯಾಚಾರಾಂಕ್ ಬಳಿ ಪಡಿಲ್ಲ್ಯಾ ಅಸ್ತುರ್ಯಾಂಚೊ ಆವಾಜ್ ಹೆ ಕವಿತೆಂತ್ಲ್ಯಾನ್ ಸ್ಪಶ್ಟಪಣಾನ್ ಆಯ್ಕೂಂಕ್ ಯೆತಾ. ಉತ್ಕಟ್ ಆನಿ ಜಿತ್ಯೊ- ಜಿವ್ಯೊ ಪ್ರತಿಮಾ ಆನಿ ವರ್ಣನ್ ಹಾತೂಂತ್ಲ್ಯಾನ್ ಕವಿ ಹೊ ದಾಮೂನ್ ಆನಿ ಚಿಡ್ಡೂನ್ ದವ್ರಿಲ್ಲೊ ಆವಾಜ್ ವಾಚ್ಪ್ಯಾಮೆರೆನ್ ಪಾವ್ಯ್ತಾ.

ಭಾರ್ತೀಯ್ ಸಮಾಜಾಂತ್ ಖೊಲಾಯೆನ್ ರುಜಿಲ್ಲೆ ಸಂಸ್ಕೃತೀಕ್ ನೆಮ್ ಆನಿ ಲೈಂಗಿಕ್ ಅಸ್ಮಾನತಾಯ್ ಹಾಕಾ ಲಾಗೂನ್ ಬಾಯ್ಲಾಂಚೆರ್ ಜಾವ್ಪಿ ಹಿಂಸಾಚಾರಾಕ್ ಸೊಂಸಪ್ ವಾ ಮಾನ್ಯ್ ಕರಪ್ ಹಿ ವೃತ್ತಿ ಬಾಳ್ಗೂನ್ ಬರೆಚ್ ಫಾವ್ಟ್ ಹ್ಯಾ ಪ್ರಸ್ನಾಚೆರಆಡನದರ್ ಜಾತಾ. ಪೂಣ್ ಕವೀಚ್ಯಾನ್ ಕಾನಾರ್ ಪಡ್ಪಿ ಹ್ಯೊ ಕಿಂಕ್ರಾಟಿ ಸಹನ್ ಕರೂಂಕ್ ಜಾಯ್ನಾ ದೆಖೂನ್,
ಪಾತಾಳಾಕ್ ಹಾಲವ್ನ್ ಮಳ್ಬಾಕ್ ಕಾಂಪವ್ನ್
ಕಾಂಯ್ ಕೆನ್ನಾಂ ಕಾನಾ ಕಾನ್ಪ್ಯಾಂಕಿ
ಫುಟಯ್ಲ್ಯಾತ್
ದೆಶಾಂತ್ ಮ್ಹಜ್ಯಾ ಕಿಂಕ್ರಾಟಿ ಆವಾಜ್ಲ್ಯಾತ್
ಅಶಾ ಪ್ರತಿಮಾಂನಿ ಕವಿತೆಚಿ ಸುರ್ವಾತ್ ಕರೂನ್ ಕವಿ ಫುಡೆಂ ಕಿತೆಂ ಸಾಂಗುಂಕ್ ಸೊದ್ತಾ ಹಾಚಿ ಸುಲೂಸ್ ವಾಚ್ಪ್ಯಾಕ್ ದಿತಾ.

ಭಾರ್ತಾಂತ್ ಬಾಯ್ಲಾಂಕ್ ರಾಖಣ್ ದಿವ್ಪಾಖಾತೀರ್ ವೆಗ್ವೆಗಳೆ ಕಾಯ್ದೆ ಆಸಾತ್, ಜಶೆ ಕಿ ಘರ್ಗುತಿ ಹಿಂಸೆಪಸೂನ್ ಬಾಯ್ಲಾಂಕ್ ರಾಖಣ್ ದಿವ್ಪಾಚೊ ಕಾಯ್ದೊ ಆನಿ ಕಾಮಾಚ್ಯಾ ಸುವಾತೆರ್ ಬಾಯ್ಲಾಂಕ್ ಲೈಂಗೀಕ್ ತ್ರಾಸ್ ದಿವ್ಪಾಚೊ ಕಾಯ್ದೊ. ಪೂಣ್ ಹ್ಯಾ ಕಾಯ್ದ್ಯಾಂಚಿ ಅಂಮಲಬಜಾವಣಿ ವಿಸಂಗತ್ ಆಸುಂ ಯೆತಾ, ಜಾಕಾ ಲಾಗೂನ್ ಗುನ್ಯಾಂವಕಾರ್ ಜಾಪ್ಸಾಲದಾರಕೆಚ್ಯಾ ಉಣಾವಾಚೊ ಫಾಯ್ದೊ ಘೆತಾ. ಅರ್ಥೀಕ್ ವಿಸಂಗತಿ ಆನಿ ಅರ್ಥೀಕ್ ಅವ್ಲಂಬನ್ ಹಾಂಕಾಂಯ್ ಲಾಗೂನ್ ಬಾಯ್ಲಾಂಕ್ ಅಸುರ್ಕ್ಷೀತತಾಯ್ ನಿರ್ಮಾಣ್ ಜಾತಾ, ಜಾಕಾ ಲಾಗೂನ್ ತ್ಯೊ ಹಿಂಸಾಚಾರ್ ಆನಿ ಶೊಶ್ಣಾಕ್ ಚಡ್ ಬಳಿ ಪಡುಂ ಯೆತಾತ್. ಘರಾಚ್ಯಾ ಚಾರ್ ವಂಟೀಂಆಡ್ ಜಾವ್ಪಿ ಆನಿ ಘರಾಭಾಯರ್ ಜಾವ್ಪಿ ಅತ್ಯಾಚಾರ್ ಪಳೊವ್ನ್ ಆನಿ ಆಯ್ಕೂನ್ ಲೆಗೀತ್ ಕೊಡ್ಗೆಪಣಾನ್ ಕಾಂಯ್ಚ್ ಘಡೂಂಕ್ ನಾಶಿಲ್ಲೆವರಿ ಸಮಾಜಾಚಿ ಕವೀಕ್ ತಿಡಕ್ ಯೆತಾ. ಘಡ್ಯೆ ಅಶಾ ಪ್ರಸಂಗಾಂಚಿ ಆಮ್ಕಾಂ ಸಂವ್ಯ್ ಜಾಲ್ಯಾ ಆನಿ ಪುರಾಯ್ ಸಮಾಜ್ ಗೆಂಡ್ಯಾಚ್ಯಾ ಕಾತೀಚೊ ಜಾಲಾ ಕಾಯ್ ? ಅಸೊ ಪ್ರಸ್ನ್ ಮನಾಂತ್ ಉಬೊ ಕರ್ಪಿ ದುಸ್ರ್ಯಾ ಕಡ್ವ್ಯಾಂತಲ್ಯೊ ಒಳಿ ಪ್ರಭಾವೀಪಣಾನ್ ವಾಚ್ಪ್ಯಾಚ್ಯಾ ಕಾಳ್ಜಾಕ್ ಹಾತ್ ಘಾಲ್ತಾತ್.
ಬಾಯ್ಲ್ಭ್ರೂಣ್ ಹತ್ಯಾ ಹೀಯ್ ಆಮ್ಚ್ಯಾ ಸಮಾಜಾಂತಲಿ ಎಕ್ ಗಂಭೀರ್ ಸಮ್ಸ್ಯಾ. ವಂಶಾಕ್ ದಿವೊ ಜಾಯ್ ಹೆ ಪಿತೃಸತ್ತಾಕ್ ಮನೊವೃತ್ತೀಕ್ ಲಾಗೂನ್ ಆವ್ಯ್ಚ್ಯಾ ಗರ್ಭಾಂತ್ ಆಸ್ತನಾಚ್ ಚಲ್ಯೆಚೊ ಜೀವ್ ಘೆವ್ಪ್ ಹಿ ಪದ್ದತ್, ಖಾಸ್ ಕರೂನ್ ಉತ್ತರ್ ಭಾರ್ತಾಂತ್ ಚಡ್ ಪ್ರಚ್ಲಿತ್ ಆಸಾ. ಶಿಕ್ಷಣಾಚೊ ಉಣಾವ್, ದಾದ್ಲೆಪಣಾಚೊ ಫಾಜೀಲ್ ಆನಿ ಫಟ್ ಅಭಿಮಾನ್ ತಶೆಂಚ್ ಧರ್ಮೀಕ್ ಪರಂಪರೆಚ್ಯೊ ಸರಪ್ಳ್ಯೊ ಹಾತೂಂತ್ ಬಾಂದೂನ್ ಗೆಲ್ಲೊ ಸಮಾಜ್, ದುಶ್ಟ್ ಆನಿ ಮನೀಸಪಣಾಕ್ ನಾನ್ಪಯತ್ ಕರ್ಪಿ ಪ್ರಥಾಂಕ್ ವೆಂಗ್ ಮಾರೂನ್ ಬಶಿಲ್ಲ್ಯಾನ್ ಹ್ಯೊ ಘಡ್ಣುಕೊ ಘಡ್ಟಾತ್. ಪುರಾಯ್ ಸಂವ್ಸಾರ್ ಆಮ್ಕಾಂ ಹಾಂಸ್ತಾ ಆನಿ ಆಮ್ಚ್ಯಾ ಅಮಾನವೀಪಣಾಕ್ ಲಾಗೂನ್ ಆಮ್ಕಾಂ ನೀಚ್ ಲೆಖ್ತಾ ತರಿ ಕಸ್ಲೀಚ್ ಲಜ್ ನಾಸ್ತಾನಾ ಆಮ್ಚೊ ಸಮಾಜ್ ಹ್ಯೊ ಕಿಂಕ್ರಾಟಿ ಆಯ್ಕೂನ್ ಕಾನಾರ್ ಕೆಂಸ್ ಒಡ್ಟಾ ಹಾಚೆರ್ ಕವಿ ಖರ್ ನಿಶೆಧಾಚೊ ಸೂರ್ ಉಕ್ತಾಯತಾ.

ಆಮಿ ಭೌತಿಕ್ ಉದ್ರಗತ್ ಕೆಲ್ಯಾ ಪೂಣ್ ಎಕ್ ಸಮಾಜ್ ಮ್ಹಣ್ ಆಮ್ಚಿ ಸಂವೆದನಾ ಮಾರೂನ್ ಉಡಯ್ಲ್ಯಾ ಅಶಿ ಖಂತ್ ಪ್ರಗಟ್ ಕರೂನ್ ಕವಿ ಹೆ ಕವಿತೆಚ್ಯಾ ನಿಮ್ಣ್ಯಾ ಕಡ್ವ್ಯಾಂಚ್ಯಾ ಒಳೀಂತ್ಲ್ಯಾನ್ ಅಪ್ರತ್ಯಕ್ಷಪಣಾನ್ ಸಮಾಜಾಚ್ಯಾ ಮನೊವೃತ್ತೀಚೆರ್ ಬಡಿ ಮಾರೂನ್ ಸಮಾಜಾಚಿ ಅಧೊಗತಿ ದಾಖಯ್ತಾ. ದಾದ್ಲೆ ಆನಿ ಚಲೆ ಹಾಂಕಾಂ ತಾಂಚೊ ಬಾಯ್ಲಾಂವಿಶಿಂ ದೃಶ್ಟೀಕೊನ್ ಬದ್ಲಾಚ್ಯಾಪಾಸತ್ ಶಿಕ್ಷಣ್ ದಿವ್ಪ್, ಸಕಾರಾತ್ಮಕ್ ಪುರುಶ್ತ್ವ್ ವಾಡೊವ್ಪ್ ಆನಿ ಸಮಾಜಾಂತ್ಲ್ಯಾ ಸಗ್ಳ್ಯಾ ವಾಂಗ್ಡ್ಯಾ ಮದಿಂ ಸಹಾನುಭೂತಿ, ಆದರ್ ಆನಿ ಲೈಂಗಿಕ್ ಸಮಾನತಾಯ್ ವಾಡೊವ್ಪಾಕ್ ಮದತ್ ಕರಪ್ ಹಾಚೆ ಬದ್ಲಾಕ್ ಸಮಾಜ್ ಹೆರ್ ಉಪ್ಭೊಗ್ ಘೆವ್ಪಾಚ್ಯಾ ಗಜಾಲೀಂಕ್ ಚಡ್ ಮ್ಹತ್ವ್ ದಿತಾ. ಲಿಂಗಾಚಿ ಪರ್ವಾ ಕರಿನಾಸತನಾ ಸಗ್ಳ್ಯಾ ವ್ಯಕ್ತಿಂ ಖಾತೀರ್ ಸುರ್ಕ್ಷೀತ್ ಆನಿ ಸಮಾವೆಶಕ್ ಸಮಾಜ್ ತಯಾರ್ ಕರ್ಪಾ ಖಾತೀರ್ ಯತ್ನ್ ಕರಪ್ ಭೊವ್ ಗರ್ಜೆಚೆಂ, ಪೂಣ್ ಆಮ್ಚೊ ಸಮಾಜ್ ವೆಗ್ಳ್ಯಾಚ್ ಗಜಾಲೀಂಕ್ ಪ್ರಾಧಾನ್ಯ್ ದಿತಾ ದೆಖೂನ್ ತಾಳೊ ಪಿಂಜೂನ್ ಆಯಿಲ್ಲ್ಯೊ ಬಾಯ್ಲಜಾತೀಚ್ಯೊ ಕಿಂಕ್ರಾಟಿ ತಾಚ್ಯಾ ಕಾನಾಭಾಯರೂಚ್ ಉರ್ತಾತ್ ಅಶಿ ತಿಡಕ್ ವ್ಯಕ್ತ್ ಕರೂನ್ ಕವಿ ಹೆ ಕವಿತೆಚೊ ಸಮಾರೊಪ್ ಕರ್ತಾ.

ವರ್ತಮಾನ್ ಪರೀಸ್ಥಿತಿ ಆನಿ ಬಾಯ್ಲಜಾತೀಕ್ ಉಣಾಕ್ ಲೆಖೂನ್ ಸಂವೆದನಶೂನ್ಯ್ ಸಮಾಜಾಕಡ್ಲ್ಯಾನ್ ತಿಚೆರ್ ಜಾವ್ಪಿ ಅತ್ಯಾಚಾರಾಂಚೆರ್ ಉಜ್ವಾಡ್ ಘಾಲ್ಪಿ ಹಿ ಕವಿತಾ ವಾಚ್ಪ್ಯಾಕ್ ಅಸ್ವಸ್ಥ್ ಕರೂನ್ ಸೊಡ್ಟಾ.

- ಶೈಲೇಂದ್ರ ಮೆಹ್ತಾ

[ಕವಿತಾ] ಕಿಂಕ್ರಾಟಿ (- ಫೆಲ್ಸಿ ಲೋಬೊ ದೆರೆಬಯ್ಲ್)

ಕಿಂಕ್ರಾಟಿ ದೇಶಾಂತ್ ಮ್ಹಜ್ಯಾ ಕೆನ್ನಾಂ ಕೆನ್ನಾಂ ಕಿಂಕ್ರಾಟಿ ಆವಾಜ್ಲ್ಯಾತ್ ಪಾತಾಳಾಕ್ ಹಾಲವ್ನ್ ಮಳ್ಬಾಕ್ ಕಾಂಪವ್ನ್ ಕಾಂಯ್ ಕೆನ್ನಾಂ ಕಾನಾ ಕಾನ್ಪ್ಯಾಂಕಿ ಫುಟಯ್ಲ್ಯಾತ್ ದೇಶಾಂತ್ ಮ್ಹಜ್ಯಾ ಕಿಂಕ್ರಾಟಿ ಆವಾಜ್ಲ್ಯಾತ್ ದೇಶಾ ಗಡಿರ್ ಸೊಜೆರಾ ಕಾಳ್ಜಾಂಕ್ ಗುಳ್ಯಾಂನಿ ಉಮೆ ದಿತಾನಾ ತಾಚ್ಯಾ ಘರಾಂತ್ಲಿ ಕಿಂಕ್ರಾಟ್, ರಾನಾ , ಶ್ಹೆರಾಂ ಮಯ್ದಾನಾಂನಿ ಸಯ್ತ್ ಮಾಸೂಮಾಂಚೊ ಮಾನ್ ಲುಟ್ತಾನಾ, ಫುಮಾರ್ಲೆಲ್ಯಾ ಗಳ್ಯಾಂನಿ ಪುರೊನ್ ಗೆಲ್ಲ್ಯೊ ಕಿಂಕ್ರಾಟಿ ಆಮ್ಕಾಂ ಸವಯೆರ್ ಪಡ್ಲ್ಯಾತ್ ದೇಶಾಂತ್ ಮ್ಹಜ್ಯಾ ಕೆನ್ನಾ ಕೆನ್ನಾಂ ಕಿಂಕ್ರಾಟಿ ಆವಾಜ್ಲ್ಯಾತ್. ಚಲಿಯೆಕ್ ಕಾಂಠಾಳ್ಳೆಲ್ಯಾ ಸಮಾಜೆನ್ ಆವಯ್ ಗರ್ಭಾಂತ್ ತಿಚೊ ಗಳೊ ಕಾಪ್ತಾನಾ ಲಿಪ್ಲೆಲಿ ಕಿಂಕ್ರಾಟ್ ಅಸ್ಕತ್ ಕುಡಿನಿಂ ಆಸ್ರ್ಯಾ ಜನೆಲಾ ಥಾವ್ನ್ ಸುಸ್ಕಾರೊನ್ ಫುಂಕ್ ಲ್ಲ್ಯೊ ಕಿಂಕ್ರಾಟಿ, ಆಮ್ಚ್ಯಾ ಗುಮಾನಾ ಭಾಯ್ರ್ ಚ್ ಉರ್ಲ್ಯಾತ್ ತರಿ ದೇಶಾಂತ್ ಮ್ಹಜ್ಯಾ ಕೆನ್ನಾಂ ಕೆನ್ನಾಂ ಕಿಂಕ್ರಾಟಿ ಆವಾಜ್ಲ್ಯಾತ್ ರೂಂದ್ ರಸ್ತೆ , ಆಕಾಸಿಂ ತೊಪ್ಚ್ಯಾ ಕಟ್ಟೊನಾಂಕ್ ರುಕಾಂ ಮುಳಾಂ ಕಾಪ್ತಾನಾ ವಾರ್ಯಾಂತ್ ಖಿರ್ ಲ್ಲ್ಯೊ ಕಿಂಕ್ರಾಟಿ ದಾಂತ್ , ನಾಕ್ಶಿ, ಲೋಂವ್ ಚಾಮ್ಡೆಂ ಮ್ಹಣ್ ಮೊನ್ಯಾ ಜಿವಿಂಚಿ ಬಲಿ ದಿತಾನಾ ತಾಳೆ ಪಿಂಜುನ್ ಭಾಯ್ರ್ ಆಯಿಲ್ಲ್ಯೊ ಕಿಂಕ್ರಾಟಿಯಿ ಕರ್ಮಿ ಮನ್ಶ್ಯಾಚ್ಯಾ ಗುಡ್ದಿ ಚೆಪ್ ಲ್ಲ್ಯಾ ಕಾನಾ ಭಾಯ್ರ್ ಚ್ ಉರ್ಲ್ಯಾತ್ ಕಾಂಯ್ ಕೆನ್ನಾಂ ದೇಶಾಂತ್ ಮ್ಹಜ್ಯಾ ಕಿಂಕ್ರಾಟಿ ಆವಾಜ್ಲ್ಯಾತ್. **** - ಫೆಲ್ಸಿ ಲೋಬೊ ದೆರೆಬಯ್ಲ್** [ ಜ್ಯೂನ್, 2023]

	ಕವಿ ಆನಿ ಹಕ್ಕ್-ಮಾನ್
Kovi ani hokk-man - 1. Prakash Bab Paddgaonkar smarok Moineachi Kovita
Hea mhoineachea smritixex kovi bab prokax paddgamvokor yadstik kovi hokk man purskarakhatir ‘kinkratti’ hi kovita zoitivont zalea. Hea vorsa porot suru kel'lea poinnarichea hea mhoinallea upkromak boro protisad labla hi amcheakhatir vhodda khoxechi gozal. Sortikhatir vingodd vingodd kovimni dhaddil'lea kovitancho dorzoi disan dis vaddtta hi konknni sahiteakhatir ek urba divpi gozal. ‘kinkratti ‘ kovita zoitivont tharaitona porikxok monddllan te kovitechim kaim khaxeloponnam vicharant ghetleant. Bailam add vaddpi himsachar ho fokot dukhkhachoch nhoi tor chintecho vixoi. Loingik himsachar bhartasoit somvsarantlea zaitea dexamni zata. Punn bhartant hea himsacharachi karnnam her dexampromann asat oxem na. Kinkratti hi kovita hea himsacharacher ek khor bhaxy. Loingik oteacharank bolli poddil'lea ostureancho avaz he kovitentlean spoxttoponnan aikunk yeta. Utkott ani jiteo- jiveo protima ani vornnon hatuntlean kovi ho damun ani chidd'ddun douril'lo avaz vachpeameren pauyta. Bharti-i somazant kholayen rujil'le somskritik nem' ani loingik osmanotai haka lagun bailancher zaupi himsacharak somsop va many korop hi vrit'ti ballgun borech fautt hea prosnacheraddonodor zata. Punn kovichean kanar poddpi heo kinkratti sohon korunk zaina dekhun, patallak haloun mollbak kampoun kaim ken'nam kana kanpeanki futtoileat dexant mhojea kinkratti avajleat oxa protimamni kovitechi survat korun kovi fuddem kitem sangunk sodta hachi sulus vachpeak dita. Bhartant bailank rakhonn divpakhatir vegvegolle kaide asat, zoxe ki ghorguti himseposun bailank rakhonn divpacho kaido ani kamachea suvater bailank loingik tras divpacho kaido. Punn hea kaideanchi om'molobozaunni visongot asum yeta, zaka lagun guneamvokar zapsalodarokechea unnavacho faido gheta. Orthik visongoti ani orthik ovlombon hankaim lagun bailank osurkxitotai nirmann zata, zaka lagun teo himsachar ani xoxnnak chodd bolli poddum yetat. Ghorachea char vonttimadd zaupi ani ghorabhair zaupi oteachar polloun ani aikun legit koddgeponnan kainch ghoddunk naxil'leuri somazachi kovik tiddok yeta. Ghoddye oxa prosonganchi amkam somvy zalea ani purai somaz genddeachea katicho zala kai ? oso prosn monant ubo korpi dusrea koddveantoleo olli probhaviponnan vachpeachea kallzak hat ghaltat. Bailbhrunn hotea hi-i amchea somazantoli ek gombhir somsea. Vonxak divo zai he pitrisot'tak monourit'tik lagun auychea gorbhant astonach cholyecho jivo gheup hi pod'dot, khas korun ut'tor bhartant chodd prochlit asa. Xikxonnacho unnavo, dadleponnacho fajil ani fott obhiman toxench dhormik poromporecheo soroplleo hatunt bandun gel'lo somaz, duxtt ani monisoponnak nanpoit korpi prothank veng marun boxil'lean heo ghoddnnuko ghoddttat. Purai somvsar amkam hamsta ani amchea omanoviponnak lagun amkam nich lekhta tori koslich loz nastana amcho somaz heo kinkratti aikun kanar kems oddtta hacher kovi khor nixedhacho sur uktaita. Ami bhoutik udrogot kelea punn ek somaz mhonn amchi somvedona marun uddoilea oxi khont progott korun kovi he kovitechea nimnnea koddveanchea ollintlean oprotyokxoponnan somazachea monourit'ticher boddi marun somazachi odhogoti dakhoita. Dadle ani chole hankam tancho bailamvixim drixttikon bodlacheapasot xikxonn divp, sokaratmok puruxtv vaddoup ani somazantlea sogllea vangddea modim sohanubhuti, ador ani loingik somanotai vaddoupak modot korop hache bodlak somaz her upbhog gheupachea gozalink chodd mhotv dita. Lingachi porva korinasotona sogllea vyoktim khatir surkxit ani somavexok somaz toyar korpa khatir yotn korop bhovo gorjechem, punn amcho somaz veglleach gozalink pradhany dita dekhun tallo pinzun ayil'leo bailozaticheo kinkratti tachea kanabhairuch urtat oxi tiddok vyokt korun kovi he kovitecho somarop korta. Vortoman poristhiti ani bailozatik unnak lekhun somvedonoxuny somazakoddlean ticher zaupi oteacharancher ujvadd ghalpi hi kovita vachpeak osvosth korun soddtta. - *Shailendra Mehta*
[kovita] Kinkratti* (- Felcy Lobo Derebail)*
Kinkratti dexant mhojea ken'nam ken'nam kinkratti avajleat patallak haloun mollbak kampoun kaim ken'nam kana kanpeanki futtoileat dexant mhojea kinkratti avajleat dexa goddir sojera kallzank gulleamni ume ditana tachea ghorantli kinkratt, rana , xheram moidanamni soit masumancho man lutt'tana, fumarlelea golleamni puron gel'leo kinkratti amkam souyer poddleat dexant mhojea ken'na ken'nam kinkratti avajleat. Choliek kantthall'llelea somajen auy gorbhant ticho gollo kaptana lipleli kinkratt oskot kuddinim asrea zonela thaun suskaron funk l'leo kinkratti, amchea gumana bhair ch urleat tori dexant mhojea ken'nam ken'nam kinkratti avajleat rund roste , akasim topchea kott'ttonank rukam mullam kaptana vareant khir l'leo kinkratti dant , nakxi, lomv chamddem mhonn monea jivinchi boli ditana talle pinzun bhair ayil'leo kinkrattiyi kormi monxeachea gudd'di chep l'lea kana bhair ch urleat kaim ken'nam dexant mhojea kinkratti avajleat. **** - Felcy Lobo Derebail** [June, 2023]

	Kovi Ani Hokk-Man
कवी आनी हक्क-मान - १. प्रकाश बाब पडगांव‌कार स्मारक मयन्याची कविता
ह्या म्हयन्याच्या स्मृतिशेश कवी बाब प्रकाश पाडगांवकर यादस्तीक कवी हक्क मान पुरस्काराखातीर ‘किंक्राटी’ ही कविता जैतिवंत जाल्या. ह्या वर्सा परत सुरू केल्ल्या पयणारीच्या ह्या म्हयनाळ्या उपक्रमाक बरो प्रतिसाद लाबला ही आमच्याखातीर व्हडा खोशेची गजाल. सर्तीखातीर विंगड विंगड कवींनी धाडिल्ल्या कवितांचो दर्जोय दिसान दिस वाडटा ही कोंकणी साहित्याखातीर एक उर्बा दिवपी गजाल. ‘किंक्राटी ‘ कविता जैतिवंत थारायतना परीक्षक मंडळान ते कवितेचीं कांय खाशेलपणां विचारांत घेतल्यांत. बायलां आड वाडपी हिंसाचार हो फकत दुख्खाचोच न्हय तर चिंतेचो विशय. लैंगीक हिंसाचार भारतासयत संवसारांतल्या जायत्या देशांनी जाता. पूण भारतांत ह्या हिंसाचाराची कारणां हेर देशांप्रमाण आसात अशें ना. किंक्राटी ही कविता ह्या हिंसाचाराचेर एक खर भाश्य. लैंगिक अत्याचारांक बळी पडिल्ल्या अस्तुऱ्यांचो आवाज हे कवितेंतल्यान स्पश्टपणान आयकूंक येता. उत्कट आनी जित्यो- जिव्यो प्रतिमा आनी वर्णन हातूंतल्यान कवी हो दामून आनी चिड्डून दवरिल्लो आवाज वाचप्यामेरेन पावयता. भारतीय समाजांत खोलायेन रुजिल्ले संस्कृतीक नेम आनी लैंगिक असमानताय हाका लागून बायलांचेर जावपी हिंसाचाराक सोंसप वा मान्य करप ही वृत्ती बाळगून बरेच फावट ह्या प्रस्नाचेरआडनदर जाता. पूण कवीच्यान कानार पडपी ह्यो किंक्राटी सहन करूंक जायना देखून, पाताळाक हालवन मळबाक कांपवन कांय केन्नां काना कानप्यांकी फुटयल्यात देशांत म्हज्या किंक्राटी आवाजल्यात अशा प्रतिमांनी कवितेची सुरवात करून कवी फुडें कितें सांगुंक सोदता हाची सुलूस वाचप्याक दिता. भारतांत बायलांक राखण दिवपाखातीर वेगवेगळे कायदे आसात, जशे की घरगुती हिंसेपसून बायलांक राखण दिवपाचो कायदो आनी कामाच्या सुवातेर बायलांक लैंगीक त्रास दिवपाचो कायदो. पूण ह्या कायद्यांची अंमलबजावणी विसंगत आसूं येता, जाका लागून गुन्यांवकार जापसालदारकेच्या उणावाचो फायदो घेता. अर्थीक विसंगती आनी अर्थीक अवलंबन हांकांय लागून बायलांक असुरक्षीतताय निर्माण जाता, जाका लागून त्यो हिंसाचार आनी शोशणाक चड बळी पडूं येतात. घराच्या चार वंटींआड जावपी आनी घराभायर जावपी अत्याचार पळोवन आनी आयकून लेगीत कोडगेपणान कांयच घडूंक नाशिल्लेवरी समाजाची कवीक तिडक येता. घडये अशा प्रसंगांची आमकां संवय जाल्या आनी पुराय समाज गेंड्याच्या कातीचो जाला काय ? असो प्रस्न मनांत उबो करपी दुसऱ्या कडव्यांतल्यो ओळी प्रभावीपणान वाचप्याच्या काळजाक हात घालतात. बायलभ्रूण हत्या हीय आमच्या समाजांतली एक गंभीर समस्या. वंशाक दिवो जाय हे पितृसत्ताक मनोवृत्तीक लागून आवयच्या गर्भांत आसतनाच चलयेचो जीव घेवप ही पद्दत, खास करून उत्तर भारतांत चड प्रचलित आसा. शिक्षणाचो उणाव, दादलेपणाचो फाजील आनी फट अभिमान तशेंच धर्मीक परंपरेच्यो सरपळ्यो हातूंत बांदून गेल्लो समाज, दुश्ट आनी मनीसपणाक नानपयत करपी प्रथांक वेंग मारून बशिल्ल्यान ह्यो घडणुको घडटात. पुराय संवसार आमकां हांसता आनी आमच्या अमानवीपणाक लागून आमकां नीच लेखता तरी कसलीच लज नासताना आमचो समाज ह्यो किंक्राटी आयकून कानार केंस ओडटा हाचेर कवी खर निशेधाचो सूर उक्तायता. आमी भौतिक उदरगत केल्या पूण एक समाज म्हण आमची संवेदना मारून उडयल्या अशी खंत प्रगट करून कवी हे कवितेच्या निमण्या कडव्यांच्या ओळींतल्यान अप्रत्यक्षपणान समाजाच्या मनोवृत्तीचेर बडी मारून समाजाची अधोगती दाखयता. दादले आनी चले हांकां तांचो बायलांविशीं दृश्टीकोन बदलाच्यापासत शिक्षण दिवप, सकारात्मक पुरुशत्व वाडोवप आनी समाजांतल्या सगळ्या वांगड्या मदीं सहानुभूती, आदर आनी लैंगिक समानताय वाडोवपाक मदत करप हाचे बदलाक समाज हेर उपभोग घेवपाच्या गजालींक चड म्हत्व दिता. लिंगाची पर्वा करिनासतना सगळ्या व्यक्तीं खातीर सुरक्षीत आनी समावेशक समाज तयार करपा खातीर यत्न करप भोव गरजेचें, पूण आमचो समाज वेगळ्याच गजालींक प्राधान्य दिता देखून ताळो पिंजून आयिल्ल्यो बायलजातीच्यो किंक्राटी ताच्या कानाभायरूच उरतात अशी तिडक व्यक्त करून कवी हे कवितेचो समारोप करता. वर्तमान परीस्थिती आनी बायलजातीक उणाक लेखून संवेदनशून्य समाजाकडल्यान तिचेर जावपी अत्याचारांचेर उजवाड घालपी ही कविता वाचप्याक अस्वस्थ करून सोडटा. - शैलेंद्र मेहता
[कविता] किंक्राटी (- फेल्सी लोबो देरेबयल)
किंक्राटी देशांत म्हज्या केन्नां केन्नां किंक्राटी आवाजल्यात पाताळाक हालवन मळबाक कांपवन कांय केन्नां काना कानप्यांकी फुटयल्यात देशांत म्हज्या किंक्राटी आवाजल्यात देशा गडीर सोजेरा काळजांक गुळ्यांनी उमे दिताना ताच्या घरांतली किंक्राट, राना , श्हेरां मयदानांनी सयत मासूमांचो मान लुटताना, फुमारलेल्या गळ्यांनी पुरोन गेल्ल्यो किंक्राटी आमकां सवयेर पडल्यात देशांत म्हज्या केन्ना केन्नां किंक्राटी आवाजल्यात. चलियेक कांठाळ्ळेल्या समाजेन आवय गर्भांत तिचो गळो काप्ताना लिपलेली किंक्राट असकत कुडिनीं आसऱ्या जनेला थावन सुसकारोन फुंक ल्ल्यो किंक्राटी, आमच्या गुमाना भायर च उरल्यात तरी देशांत म्हज्या केन्नां केन्नां किंक्राटी आवाजल्यात रूंद रसते , आकासीं तोपच्या कट्टोनांक रुकां मुळां काप्ताना वाऱ्यांत खीर ल्ल्यो किंक्राटी दांत , नाक्षी, लोंव चामडें म्हण मोन्या जिविंची बली दिताना ताळे पिंजून भायर आयिल्ल्यो किंक्राटियी कर्मी मनश्याच्या गुडदी चेप ल्ल्या काना भायर च उरल्यात कांय केन्नां देशांत म्हज्या किंक्राटी आवाजल्यात. **** - फेल्सी लोबो देरेबयल.** [ज्यून, २०२३]

	कवी आनी हक्क-मान


ದಾಯ್ಜ್.ಕೊಮ್

2004 ಥಾವ್ನ್ 2011 ಪರ್ಯಾಂತ್ ಕಾರ್ಯಾಳ್ ಆಸ್‌ಲ್ಲ್ಯಾ ದಾಯ್ಜ್.ಕೊಮ್ ಚೆರ್ ಪರ್ಗಟ್‌ಲ್ಲ್ಯಾ ವಿಂಚ್ಣಾರ್ ಸಾಹಿತಾಕ್ ಆಮಿ ಫುಡಿಲ್ಯಾ ದಿಸಾಂನಿ ಪಯ್ಣಾರಿ ವಾಚ್ಪ್ಯಾಂಕ್ ಲಾಭಯ್ತೆಲ್ಯಾಂವ್.