[ಖಬರ್:] ಅಖಿಲ್ ಭಾರತೀಯ್ ಕೊಂಕ್ಣಿ ಕವಿತಾವಾಚನ್ ಸರ್ತೆಕ್ ಮುಂಬಯ್ ಥಾವ್ನ್ 8 ಜಣಾಂ

ಮುಂಬಯ್ (1 ಅಕ್ತೋಬರ್ 2017): ಮೆಲ್ವಿನ್ ಲುದ್ರಿಕಾಚ್ಯಾ ಮುಖೇಲ್‌ಪಣಾಚ್ಯಾ ’ಕವಿತಾ ಟ್ರಸ್ಟ್’ ತಶೆಂಚ್ ಆಶಾವಾದಿ ಪ್ರಕಾಶನಾಚ್ಯಾ ಜೋಡ್ ಮುಖೇಲ್‌ಪಣಾಖಾಲ್, ಮುಂಬಯಾಂತ್ಲ್ಯಾ ಕೊಂಕ್ಣಿ ಸಂಘಟನಾಂಚ್ಯಾ ಸಹಯೋಗಾಂತ್ ಚಲ್‌ಲ್ಲ್ಯಾ ಪಾಂಚ್ ವೆವೆಗ್ಳ್ಯಾ ಸರ್ತೆಂನಿ ಜಿಕುನ್ ಆಯಿಲ್ಲ್ಯಾಂಕ್, ಮುಂಬಯ್ ಮಟ್ಟಾರ್ ’ಫೈನಲ್ಸ್’, ಆಯ್ತಾರಾ, ಅಕ್ತೋಬರ್ 1 ತಾರಿಕೆರ್ ಜೆರಿಮೆರಿಂತ್ಲ್ಯಾ ಸಾಂ|ಜೂಡ್ ಇಸ್ಕೊಲಾಚ್ಯಾ ಹೊಲಾಂತ್, ಮಾನೆಸ್ತ್ ಜೋನ್ ಮಸ್ಕರೇನ್ಹಸ್ ಆನಿ ಪಂಗ್ಡಾಚ್ಯಾ ಮುಖೇಲ್‌ಪಣಾಖಾಲ್ ಭೋವ್ ಅಪುರ್ಭಾಯೆನ್ ಚಲ್ಲೆಂ.

ಸಕಾಳಿಂ 10 ವೊರಾಂಕ್ ಸುರು ಜಾಲ್ಲ್ಯಾ ಹ್ಯಾ ಕಾರ್‍ಯಾಚಿ ಸುರ್‍ವಾತ್, ಹೆಚ್ಚ್ ದಿಸಾ ಸರ್‌ಲ್ಲೊ ಕೊಂಕ್ಣೆಚೊ ನಾಮ್ಣೆಚೊ ಕವಿ ಯುಸೂಫ್ ಅಬ್ದುಲ್ಲಾ ಶೇಖ್ ಹಾಂಚ್ಯಾ ಅತ್ಮ್ಯಾಕ್ ಶಾಂತಿ ಮಾಗುಂಕ್ ಏಕ್ ಮಿನುಟ್ ಮವ್ನಾಂತ್ ಸುರು ಜಾತಚ್, ಕಾರ್‍ಯೆಂ ನಿರ್‍ವಾಹಕ್ ಬಾಬ್ ಹಿಲರಿ ಡಿ’ಸಿಲ್ವಾನ್ ಕಾರ್‍ಯಾಚೊ ಅಧ್ಯಕ್ಷ್; ಬಾಬ್ ಮೆಲ್ವಿನ್ ರೊಡ್ರಿಗಸ್, ಮುಖೆ ಸಯ್ರೊ ಬಾಬ್ ವಲೇರಿಯನ್ ಪಿ. ಲೋಬೊ, ಬಾಬ್ ಚಂದ್ರಶೇಖರ್ ಶೆಣಯ್, ಬಾಬ್ ಅನಂತ್ ಅಮೆಂಬಳ್ ಆನಿ ಬಾಬ್ ಜೋನ್ ಮಸ್ಕರೇನ್ಹಸ್ ಹಾಂಕಾಂ ವೆದಿಕ್ ಆಪಯ್ತಚ್, ಜೋನ್ ಮಸ್ಕರೇನ್ಹಸಾನ್ ಮಾಗ್ಣ್ಯಾಮುಖಾಂತ್ರ್ ಕಾರ್‍ಯಾಚಿ ಸುರ್‍ವಾತ್ ಕೆಲಿ ಅನಿ ವೆದಿಚೆರ್ ಆಸ್‌ಲ್ಲ್ಯಾ ಸಯ್ರ್ಯಾಂಚಿ ಮಟ್ವಿ ವ್ಹಳೊಕ್ ಕರುನ್ ದೀವ್ನ್ ಸ್ವಾಗತ್ ಮಾಗ್ಲೊ.

ಸಪ್ತೆಂಬರ್ 3 ತಾರಿಕೆರ್ ನವಿಮುಂಬಯಾಂತ್ಲ್ಯಾ ಸಾನ್‌ಪಾಡಾಂತ್ ಸುರ್‍ವಾತ್ ಜಾಲ್ಲ್ಯಾ ’ಕವಿತಾವಾಚನ್ ಮುಂಬಯ್ ಸರ್ತಿ’ ಥಾವ್ನ್ ವಸಯ್, ಮಿರಾರೋಡ್, ಜೆರಿಮೆರಿ ಆನಿ ಕಾಂದಿವಲಿ ಫಿರ್‍ಗಜೆಂತ್ ಚಲ್‌ಲ್ಲ್ಯಾ ಸರ್ತೆಂತ್ ವಾಂಟೊ ಘೆತ್‌ಲ್ಲ್ಯಾ ಕೊಂಕ್ಣಿ ತಾಲೆಂತಾವಿಶಿಂ ಮಟ್ವ್ಯಾನ್ ಉಲಯಿತ್ತ್ ಮ್ಹಣಾಲೊ; ’ಆಯ್ಚಾ ಕಾಳಾರ್ ಆಮ್ಚಿಂ ಭುರ್‍ಗಿಂ ಕೊಂಕ್ಣಿ ಉಲಯ್ನಾಂತ್ ಮ್ಹಣ್ ದುರ್‍ಸತಾತ್, ಪುಣ್ ಜಾಯ್ತಿಂ ಭುರ್‍ಗಿಂ ಕೊಂಕ್ಣಿ ಭಾಸ್ ಆನಿ ಕವಿತಾ ಬರಂವ್ಕ್ ಶಿಕ್ಚಿ ಸಯ್ತ್ ಉರ್‍ಭಾ ಧಾಖಯ್ತಾತ್ ಮ್ಹಳ್ಳಿ ಭೋವ್ ಸಂತೊಸಾಚಿ ಗಜಾಲ್, ಆನಿ ಹ್ಯಾದಿಶೆನ್ ಕೊಂಕ್ಣಿ ಭಾಸ್/ಕವಿತಾ ಶಿಕಂವ್ಚೆಂ ಕಾಮ್‌ಯೀ ಸುರು ಜಾಲ್ಯಾರ್ ಭೋವ್ ಬರೆಂ ಮ್ಹಣಾಲೊ. ಅಪ್ಣಾಕ್ ಕೊಂಕ್ಣಿ ಕವಿತೆಂಚೆರ್ ಮೊಗಾರ್ ಪಡುಂಕ್ ಕಾರಣ್ ಜಾಲ್ಲ್ಯಾ ಬಾಬ್ ಮೆಲ್ವಿನ್ ಲುದ್ರಿಕಾಚೊ, ತಶೆಂಚ್ ಕೊಂಕ್ಣಿಚೆರ್ ಮೊಗಾರ್ ಪಡುಂಕ್ ಪ್ರೇರಿತ್ ಜಾಲ್ಲ್ಯಾ ದೊ|ಚಂದ್ರಶೇಖರ್ ಶೆಣಯ್ ಹಾಂಚೊ ಉಪ್ಕಾರ್ ಆಟವ್ನ್, ಬಾಬ್ ವಲ್ಲಿ ಕ್ವಾಡ್ರಸ್ ಮಂಗ್ಳುರಾಕ್ ಮುಂಬಯಾಕ್ ಘೆವ್ನ್ ಆಯ್ಲೊ ಆಸ್ತಾಂ, ಆತಾಂ ತಾಚೆಸವೆಂ ಕೊಂಕ್ಣಿ ಮಿಸಾಂವಾಂತ್ ವಾಂಟೆಲಿ ಜಾತಲೊಂಚ್ ಮ್ಹಣುನ್ ಸಾಂಗ್ಲೆಂ.

ಮುಖೆಲ್ ಸಯ್ರೊ ಮಾನೆಸ್ತ್ ವಿ.ಪಿ.ಲೋಬೊನ್ ಕಶೆಂ ’(International Baccalaureate (I.B.))’ ಸಂಸ್ಥ್ಯಾನ್ ಚಲಯಿಲ್ಲ್ಯಾ ಸಂಸೋಧಾಪ್ರಕಾರ್, ಜೊ ಮನಿಸ್ ಅಪ್ಲ್ಯಾ ಆವಯ್ ಭಾಶೆಂತ್ ಉಲಯ್ತಾ, ತೊ ಜಿಣ್ಯೆಂತ್ ಜೊ ಅಪ್ಲ್ಯೆ ಆವಯ್‌ಭಾಶೆಂತ್ ಉಲಯ್ನಾತ್‌ಲ್ಲ್ಯಾಂಚ್ಯಾಕೀ ಮುಕಾರ್ ಪಾವುಂಕ್ ಸಕ್ತಾ’ ಅಶೆಂ ಆಸ್ತಾಂ, ಆಮಿ ಪರ್‍ಗಾಂವಾಂತ್ ಆಸಾಂವ್ ತರ್‌ಯೀ, ಆಮ್ಚಿ ಆವಯ್‌ಭಾಸ್ ವಿಸ್ರುಂಕ್ ನ್ಹಜೊ. ವೆವ್ಹಾರಾಕ್ ಆಮಿ ಕಸ್ಲೀಯ್ ಭಾಸ್ ವ್ಹಾಪಾರುಯಾಂ, ಪುಣ್ ಆಮ್ಚ್ಯಾ ಆವಯ್‌ಭಾಸೆಕ್ ಮಾತ್ರ್ ಕೆದಿಂಚ್ ಪಯ್ಸ್ ಕರ್ಚೆಂ ನಾಕಾ ಮ್ಹಣಾಲೊ.

’ಕೊಂಕ್ಣಿ ಚಳ್ವಳ್ (Movement) ಸುರು ಜಾಲ್ಲಿಚ್ಚ್ ಮುಂಬಯಾಂತ್, ಜಾಂವ್ ಸಾಹಿತ್, ರಂಗ್‌ಮಾಂಚಿ/ನಾಟಕ್ ವಾ ಸಂಗೀತ್, ಮುಂಬಯ್ ಥಾವ್ನ್ ಸುರ್‍ವಾತ್ ಜಾಲ್ಯಾರೀ, ಉಪ್ರಾಂತ್ ಗಾಂವಾಂತ್ ತಶೆಂ ವೆವೆಗ್ಳ್ಯಾ ಪ್ರಾಂತ್ಯಾಂನಿ ಕೊಂಕ್ಣಿ ವಾವ್ರ್ ವಿಸ್ತಾರ್‌ಲ್ಲೆ ದಾಕ್ಲೆ ಆಮಿ ಆಯ್ಕುನ್ ಆಯ್ಲ್ಯಾಂವ್ ಆಸ್ತಾಂ, ಆತಾಂ ಮುಂಬಯಾಂತ್ಲ್ಯಾ ಕೊಂಕ್ಣಿ ತಾಲೆಂತಾಂಕ್ ಮುಕಾರ್ ಹಾಡುಂಕ್ ಕೊಂಕ್ಣೆಚೊ ಮೋಗ್ ಆಸ್ಚ್ಯಾ ಸರ್‍ವ್ ಸಂಘಟನಾಂನಿ ಮುಖೇಲ್‌ಪಣ್ ಘೆತ್ಲ್ಯಾರ್, ಆಮ್ಚಿ ಕೊಂಕ್ಣಿಭಾಸ್ ಕೆದಿಂಚ್ ಆಳ್ವೊಂಚಿನಾ ಮ್ಹಣುನ್, ಅಧ್ಯಕ್ಷ್ ಬಾಬ್ ಮೆಲ್ವಿನ್ ಲುದ್ರಿಕಾನ್ ಕವಿತಾವಾಚನಾಚ್ಯೊ ರೆಗ್ರೊ ವಿವರುನ್ ಸಾಂಗುನ್, ಕವಿತಾವಾಚನ್ ಕರುಂಕ್ ಆಯಿಲ್ಲ್ಯಾ ಸರ್ವಾಂಕ್ ಬರೆಂ ಮಾಗ್ಲೆಂ.

ಉಪ್ರಾಂತ್ ಚಲ್‌ಲ್ಲ್ಯಾ ಕವಿತಾವಾಚನಾಂತ್, ಮುಂಬಯಾಂತ್ಲ್ಯಾ ವೆವೆಗ್ಳ್ಯಾ ಫಿರ್‍ಗಜೆಥಾವ್ನ್ ಆಯಿಲ್ಲ್ಯಾ 21 ಭುರ್ಗ್ಯಾಂನಿ ತಶೆಂಚ್ ಯುವಜಣಾಂನಿ ಭಾಗ್ ಘೆತ್ಲೊ ಆನಿ ಹಿಂ ಸಕಯ್ಲಿಂ ಜಿಕುನ್ ಆಯ್ಲಿಂ:

ಯುವಜಣಾಂಚೊ ವಿಭಾಗ್;

ಪಯ್ಲೆಂ ಇನಾಮ್: (30) ಶಾರಲ್ ಡಿ’ಸೋಜ್ (ಕಾಂದಿವಲಿ) [ಕವಿತಾ: ಪಯ್ಸ್ ಪಯ್ಸ್, ಕವಿ: ವಲ್ಲಿ ಕ್ವಾಡ್ರಸ್]
ದುಸ್ರೆಂ ಇನಾಮ್: (22) ರೋಶ್ನಿ ಆರ್. ಕ್ರಾಸ್ತಾ (ಮಹಾಕಾಳಿ) [ಕವಿತಾ: ರಾಯಾಚಿ ಫಿರ್‍ಯಾದ್, ಕವಿ: ವಲ್ಲಿ ಕ್ವಾಡ್ರಸ್]
ತಿಸ್ರೆಂ ಇನಾಮ್: (31) ಸೋನಿಯಾ ರೊಡ್ರಿಗಸ್ (ಜೆರಿಮೆರಿ) [ಕವ್ತಾ: ಅಸ್ಲಿ ವ ನಕ್ಲಿ, ಕವಿ:ಆಂಡ್ರು ಎಲ್. ಡಿ’ಕುನ್ಹಾ]

ಭುರ್‍ಗ್ಯಾಂಚೊ ವಿಭಾಗ್;

ದೋನ್ ಪಯ್ಲಿಂ ಇನಾಮಾಂ:
1. (08) ಮ್ಯಾಗ್ನಸ್ ನಜರೆತ್ (ಜೆರಿಮೆರಿ) [ಕವಿತಾ: ವೇಳ್ ನಾ ಮ್ಹಾಕಾ, ಕವಿ: ಪ್ರಸನ್ನ ನಿಡ್ಡೋಡಿ]
2. (04) ಸಾರಾ ಮಥಾಯಸ್ (ಜೆರಿಮೆರಿ) [ಕವಿತಾ: ಭಾರತ್ ಮಾತ್ರ್ ಸ್ವಚ್ಚ್ ಆಸುಂ, ಕವಿ: ಎರಿಕ್ ಸೋನ್ಸ್ ಬಾರ್‍ಕುರ್]

ತೀನ್ ದುಸ್ರಿಂ ಇನಾಮಾಂ:
1. (02) ರಿಯೋನಾ ಮಸ್ಕರೇನ್ಹಸ್ (ವಸಯ್) [ಕವಿತಾ: ಪಯ್ಸ್ ಪಯ್ಸ್, ಕವಿ: ವಲ್ಲಿ ಕ್ವಾಡ್ರಸ್]
2. (07) ಮಿಶೇಲ್ ಡಿ’ಸೋಜ (ಜೆರಿಮೆರಿ) [ಕವಿತಾ: ಕ್ರಾಫರ್‍ಡ್ ಮಾರ್ಕೆಟ್, ಕವಿ: ವಲ್ಲಿ ಕ್ವಾಡ್ರಸ್]
3. (10) ಡರಾಯಸ್ ಸುವಾರಿಸ್ (ನವಿಮುಂಬಯ್) [ಕವಿತಾ: ಎಕಾ ಫೊಂಡಾಚಿ ಕಥಾ, ಕವಿ: ವಾಲ್ಟರ್ ದಾಂತಿಸ್]

ಮುಂಬಯಾಂತ್ ಪಯ್ಲೆಪಾವ್ಟಿಂ ತರ್‌ಯೀ ಇತ್ಲ್ಯಾ ಅಪುರ್ಭಾಯೆನ್ ವೆವೆಗ್ಳ್ಯೊ ಸರ್ತ್ಯೊ ಮಾಂಡುನ್ ಹಾಡುಂಕ್ ಸಹಕಾರ್ ದೀವ್ನ್ ವಾವ್ರ್ ಕೆಲ್ಲ್ಯಾ ಸಂಘಟನಾಂಚ್ಯಾ ಮುಖೆಲ್ಯಾಂಕ್ ವೆದಿಚೆರ್ ಆಪವ್ನ್ ಮುಖೆಲ್ ಸಯ್ರ್ಯಾಥಾವ್ನ್ ಶಿಫಾರಸ್ ಪತ್ರ್, ಬೂಕ್ ಆನಿ ಲ್ಹಾನ್ ಕಾಣಿಕ್ ದಿವುನ್ ತಾಂಚೊ ಉಪ್ಕಾರ್ ಬಾವುಡ್ಲೊ; ಕೊಂಕಾಣ ತರ್ಫೆನ್ ಮಾನೆಸ್ತ್ ಜೋಸೆಫ್ ಪತ್ರಾವೊ, ವಸಯ್ ಕೊಂಕಣ್ ವೆಲ್‌ಫೇರ್ ಅಸೋಸಿಯೇಶನ್ ತರ್‍ಫೆನ್ ಮಾನೆಸ್ತ್ ರಿಚಾರ್ಡ್ ಸಾಂತುಮಾಯೆರ್, ಸಾಂ|ಜುಜೆ ಕೊಂಕ್ಣಿ ಸಂಸ್ಥೊ ತರ್ಫೆನ್ ಮಾನೆಸ್ತ್ ರಿಚಾರ್‍ಡ್ ಮಥಾಯಸ್, ಕಾಂದಿವ್ಲಿ ಅಸುಪ್ಸಾಂವ್ ಕೊಂಕ್ನಿ ಸಂಘಟನಾ ತರ್‍ಫೆನ್ ಮಾನೆಸ್ತ್ ಮೆಲ್ವಿನ್ ಡಿ’ಸೋಜ್, ಕೊಂಕಣ್ ತಾರಾಂ ಜೆರಿಮೆರಿ ತರ್‍ಫೆನ್ ಮಾನೆಸ್ತ್ ಜೋನ್ ಆರ್. ಮಸ್ಕರೇನ್ಹಸ್ ಹಾಣಿಂ ಹೊ ಮಾನ್ ಸ್ವೀಕಾರ್ ಕೆಲೊ.

ಮುಂಬಯಾಂತ್ ಚಲ್‌ಲ್ಲ್ಯಾ ಪ್ರಾಥಮಿಕ್ ಸರ್ತೆಂನಿ ಕವಿತಾವಾಚನ್ ಕೆಲ್ಲ್ಯಾ ಸರ್‍ವ್ ಭುರ್‍ಗ್ಯಾಂಕ್ ತಶೆಂಚ್ ಯುವಜಣಾಂಕ್ ಕವಿತಾ ಟ್ರಸ್ಟ್ ತರ್ಫೆನ್ ಶಿಫಾರಸ್ ಪತ್ರ್ ಆನಿ ಬೂಕ್ ಇನಾಮ್ ಜಾವ್ನ್ ವಾಂಟುನ್ ಜಾತಚ್ಚ್, ವಲ್ಲಿ ಕ್ವಾಡ್ರಸಾನ್ ಉಪ್ಕಾರ್ ಬಾವುಡ್ನ್, ಕವಿತಾವಚನ್ ಮುಂಬಯ್ ಸರ್ತೆಕ್ ಅಪುರ್ಭಾಯೆನ್ ಚಲಂವ್ಕ್ ಸುಯೋಗ್ ದಿಲ್ಲ್ಯಾಂಚೊ, ಭಾಗ್ ಘೆತ್‌ಲ್ಲ್ಯಾ ತಾಲೆಂತಾಂಚೊ ಆನಿ ತಾಂಕಾಂ ತರ್ಭೆತಿ ಆನಿ ಪ್ರೋತ್ಸಾವ್ ದಿಲ್ಲ್ಯಾ ವ್ಹಡಿಲಾಂಚೊ ಉಪ್ಕಾರ್ ಬಾವುಡ್ಲೊ.

ಮಾನೆಸ್ತ್ ಜೋನ್ ಆರ್. ಮಸ್ಕರೇನ್ಹಸ್ ಹ್ಯಾ ಕಾರ್‍ಯಾಚ್ಯಾ ಸಗ್ಳ್ಯಾ ಖರ್ಚಾಚೊ ಪ್ರಾಯೋಜಕ್ ಜಾವ್ನಾಸ್ಲೊ.

- ಆಮ್ಚೊ ಭಾತ್ಮಿ