[ಖಬರ್:] ಜೆರಿಮೆರಿಂತ್ ಅಪುರ್ಭಾಯೆಚಿ ಕೊಂಕ್ಣಿ ಕವಿಗೋಶ್ಟಿ

ಕೊಂಕಣಿ ಕವಿತಾ ಸಾದರ್ ಸರ್ತ್ - 4

ಜೆರಿಮೆರಿ (ಸಪ್ತೆಂಬರ್ 23): ಮೆಲ್ವಿನ್ ಲುದ್ರಿಕಾಚ್ಯಾ ’ಕವಿತಾ ಟ್ರಸ್ಟ್’ ತರ್ಫೆನ್ ಅಖಿಲ್ ಭಾರತೀಯ್ ಮಟ್ಟಾರ್ ವರ್ಸಾನ್ ವರಸ್ ಚಲ್ಚಾ ’ಕೊಂಕ್ಣಿ ಕವಿತಾವಾಚನ್ ಸ್ಪರ್ಧೊ’ ಹಾಚಿ ಮುಂಬಯಾಂತ್ಲಿ ಚೊವ್ತಿ ಸರ್ತಿ ಸಪ್ತೆಂಬರಾಚ್ಯಾ 23 ತಾರಿಕೆರ್ ಸನ್ವಾರಾ ಸಾಂಜೆರ್ 6:00 ವೊರಾಂಚೆರ್, ಜೆರಿಮೆರಿಂತ್ಲ್ಯಾ ಸಾಂ|ಜೂಡ್ ಇಸ್ಕೊಲಾಚ್ಯಾ ಸಾಲಾಂತ್, ಆಶಾವಾದಿ ಪ್ರಕಾಶನ್ ಆನಿ ಕೊಂಕಣ್ ತಾರಾಂ ಜೆರಿಮೆರಿ ಹಾಣಿಂ ಚಲವ್ನ್ ವೆಲಿ. ಹೆಚ್ಚ್ ಸಂಧರ್ಭಾರ್ ಫಾಮಾದ್ ಕೊಂಕ್ಣಿ ಕಾಣ್‌ಯೆಗಾರ್, ಕವಿ ವಲ್ಲಿ ವಗ್ಗ ಮಯ್ಸೂರ್ ಹಾಂಚ್ಯಾ ಅಧ್ಯಕ್ಷ್‌ಪಣಾಖಾಲ್ ಕವಿತಾಗೋಶ್ಟಿ ಸಯ್ತ್ ಚಲ್ಲಿ.

ಸ ವೊರಾಂಚೆರ್ ಸುರು ಜಾಲ್ಲ್ಯಾ ಹ್ಯಾ ಕಾರ್ಯಾಚಿ ಸುರ್ವಾತ್ ಕೊಂಕ್ಣಿ ಸಾಹಿತ್ಯಾಕ್ ಜಾಯ್ತಿ ದೇಣ್ಗಿ ದೀವ್ನ್ ಆಯ್ಲೆವಾರ್ ಅಂತರ್‌ಲ್ಲ್ಯಾ ರೊನಾಲ್ಡ್ ಪಿರೇರಾ ಆಂಜೆಲೊರ್ ಹಾಚ್ಯಾ ಅತ್ಮ್ಯಾಕ್ ಶಾಂತಿ ಮಾಗುನ್ ಏಕ್ ಮಿನುಟಾಚೆಂ ಮಾವ್ನ್ ಜಾತಚ್ಚ್, ಜೆರಿಮೆರಿ ಫಿರ್ಗಜೆಚೆ ಯಾಜಕ್ ಮಾ|ಬಾ|ಎಲಿಯಾಸ್ ಪಿಂಟೊ, ಸರ್ವ್ ಮಾನೆಸ್ತ್ ವಲ್ಲಿ ವಗ್ಗ ಮಯ್ಸೂರ್, ಲುವಿಸ್ ರೊಡ್ರಿಗಸ್ (ಎಕ್ವಟಾವರ್ವಿಂ ಉಜ್ವಾಡ್ ಪತ್ರಾಚೆ ಸಂಪಾದಕ್), ಸಂಗೀತ್ ಸಾಮ್ರಾಟ್ ಹೆನ್ರಿ ಡಿ’ಸೋಜ್, ಕೊಂಕಣ್ ತಾರಾಂ ಜೆರಿಮೆರಿ ಸಂಘಟನಾಚೊ ಅಧ್ಯಕ್ಷ್ ಜೋಸೆಫ್ ಡಿ’ಸೋಜ್ ತಶೆಂಚ್ ಹ್ಯಾ ಕವಿತಾವಾಚನ್ ಸರ್ತೆಕ್ ಮಿನತ್ ಕೆಲ್ಲೊ ಜೋನ್ ಆರ್. ಮಸ್ಕರೇನ್ಹಸ್ ಹಾಂಕಾಂ ವೆದಿಕ್ ಆಪಯ್ಲೆಂ.

ಮಾ|ಬಾ|ಎಲಿಯಾಸ್ ಪಿಂಟೊ ಹಾಣಿಂ ಮಾಗ್ಣ್ಯಾಂತ್ ಸುರ್ವಾತ್ ಕೆಲ್ಲ್ಯಾ ಹ್ಯಾ ಕವಿತಾವಾಚನ್ ಸರ್ತೆಂತ್ ವಾಂಟೊ ಘೆತ್‌ಲ್ಲ್ಯಾ ಜೆರಿಮೆರಿ, ಸಾಕಿನಾಕಾ, ಕುರ್ಲಾ, ಮರೋಳ್, ಮಹಾಕಾಳಿ ಪಿರ್ಗಜೆಚ್ಯಾ ಉರ್ಭೆವಂತ್ ಭುರ್ಗ್ಯಾಂಕ್ ಬರೆಂ ಮಾಗ್ಲೆಂ. ಉಪ್ರಾಂತ್ ಚಲ್‌ಲ್ಲ್ಯಾ ಕವಿತಾವಾಚನ್ ಸರ್ತೆಂತ್ ಹಿಂ ಜಿಕುನ್ ಆಯ್ಲಿಂ;

ಪಂದ್ರಾ ವರ್ಸಾಂ ಸಕಯ್ಲೊ ವಿಭಾಗ್;
ಪಯ್ಲೆಂ ಇನಾಮ್: ಮ್ಯಾಗ್ನುಸ್ ನಜರೆತ್ [ಕವಿತಾ: ವೇಳ್ ಮ್ಹಾಕಾ ನಾ, ಕವಿ: ಪ್ರಸನ್ನ ನಿಡ್ಡೋಡಿ]
ದುಸ್ರೆಂ ಇನಾಮ್: ಮಿಶೆಲ್ ಡಿ’ಸೋಜ್ [ಕವಿತಾ: ಕ್ರಾಫರ್‍ಡ್ ಮಾರ್ಕೆಟ್, ಕವಿ: ವಲ್ಲಿ ಕ್ವಾಡ್ರಸ್]
ತಿಸ್ರೆಂ ಇನಾಮ್: ಸಾರ ಮಥಾಯಸ್ [ಕವಿತಾ: ಭಾರತ್ ಸ್ವಚಂದ್, ಕವಿ: ಎರಿಕ್ ಸೋನ್ಸ್ ಬಾರ್ಕುರ್]

ಪಂದ್ರಾ ವರ್ಸಾಂ ವಯ್ಲೊ ವಿಭಾಗ್;
ಪಯ್ಲೆಂ ಇನಾಮ್: ಜೆನಿಶಾ ಡಿ’ಸೋಜ್ [ಕವಿತಾ: ಆಜ್ ಹಾಂವ್ ಸ್ವತಂತ್ರ್, ಕವಿ: ವಲ್ಲಿ ಕ್ವಾಡ್ರಸ್]
ದುಸ್ರೆಂ ಇನಾಮ್: ರೋಶ್ನಿ ಆರ್. ಕ್ರಾಸ್ತಾ [ಕವಿತಾ: ರಾಯಾಚಿ ಫಿರ್‍ಯಾದ್, ಕವಿ: ವಲ್ಲಿ ಕ್ವಾಡ್ರಸ್]
ತಿಸ್ರೆಂ ಇನಾಮ್: ಸೋನಿಯಾ ರೊಡ್ರಿಗಸ್ [ಕವಿತಾ: ಅಸ್ಲಿ ವಾ ನಕ್ಲಿ, ಕವಿ: ಆಂಡ್ರು ಎಲ್. ಡಿ’ಕುನ್ಹಾ]

ಬಾಯ್ ಫಿಲೊಮೆನಾ ಸಾಂಫ್ರಾನ್ಸಿಸ್ಕೊ, ಅನಂತ್ ಅಮೆಂಬಳ್ ಅನಿ ವಲ್ಲಿ ಕ್ವಾಡ್ರಸ್ ಹ್ಯಾ ಸ್ಪರ್ದ್ಯಾಚೆ ವೊರಯ್ಣಾರ್ ಜಾವ್ನ್ ಹಾಜರ್ ಆಸ್ಲೆ.

ಭಾಗ್ ಘೆತ್‌ಲ್ಲ್ಯಾ ಸರ್ವಾಂಕ್ ಇನಾಮಾಂ ವಾಂಟುನ್ ಜಾತಚ್ಚ್, ಪ್ರಸನ್ನ ನಿಡ್ಡೋಡಿನ್ ವಲ್ಲಿ ವಗ್ಗಚಿ ತಶೆಂಚ್ ವಲ್ಲಿ ಕ್ವಾಡ್ರಸಾನ್ ಲುವಿಸ್ ರೊಡ್ರಿಗಸ್ ಹಾಂಚಿ ವಳೊಕ್ ಕರುನ್ ದಿಲಿ. ಉಪ್ರಾಂತ್ ಚಲ್‌ಲ್ಲ್ಯಾ ಕವಿಗೋಶ್ಟಿಂತ್ ಹಾಣಿಂ ವಾಂಟೊ ಘೆತ್ಲೊ;

ಬಾಯ್ ವಸುಧಾ ಪ್ರಭು (ಕವಿತಾ: ಎಕ್ಲೊಚ್ಚ್), ಬಾಬ್ ನೆರಿ ನಜ್ರೆತ್ ತಾಕೊಡೆ (ಕವಿತಾ: ದಂಗೊ), ಬಾಯ್ ಫಿಲೊಮೆನಾ ಸಾಂಫ್ರಾನ್ಸಿಸ್ಕೊ (ಕವಿತಾ: ಹಾಂವ್ ತುಕಾ ಪಳೆವ್ನ್ ಘೆತೆಲಿಂಚ್), ಬಾಬ್ ಫಿಲಿಪ್ ವಿ. ಡಿ’ಸೋಜ್ ಕಾಂಜುರ್‌ಮಾರ್‍ಗ್ (ಕವಿತಾ: ಸಂಸಾರ್ ದೆಖುಂಕ್ ಮ್ಹಾಕಾ ಸೊಡ್ಲೆಂನಾ), ಬಾಯ್ ಪದ್ಮಜಾ ಕುಂದಾಜೆ (ಕವಿತಾ: ಮುಖಾಂ ಆನಿ ಮುಖೊಟಾಂ), ಬಾಬ್ ಪ್ರಸನ್ನ ನಿಡ್ಡೋಡಿ (ಕವಿತಾ: ಕಾಡಿ ಆನಿ ವಾತ್, ದುಸ್ರಿ ಕವಿತಾ: ಆವಯ್ಚೊ ದೀಸ್), ಬಾಬ್ ವಲ್ಲಿ ಕ್ವಾಡ್ರಸ್ (ಕವಿತಾ: ಮ್ಹಜ್ಯಾ ಗಾಂವಾರ್), ವಲ್ಲಿ ವಗ್ಗ (ಕವಿತಾ: ಆಮ್ಚ್ಯಾ ಗಾಂವ್ಚೊ ಪಾವ್ಸ್). ಕವಿತಾಗೋಶ್ಟಿಚೆಂ ಅಧ್ಯಕ್ಷ್ ಉಲವ್ಪಾಂತ್ ’ಹಾಂವ್ ಮುಂಬಯಾಂತ್ ಜಿಯೆಲಾಂ ತರ್‌ಯೀ, ಆಯ್ಚೆ ದೀಸ್ ವೆಗ್ಳೆಚ್ಚ್, ಆಯ್ಚೆ ಸಂಘರ್ಶ್ ವೆಗ್ಳೆಚ್. ದೆಕುನ್ ಮ್ಹಾಕಾ ಭಗ್ತಾ, ಮುಂಬಯಾಂತ್ ದೀಸ್ ಕಾಡ್ತೆಲ್ಯಾಂಕ್ ’ಪುಲ್ಗತ್ರ್’ ಮ್ಹಣುನ್ ನಾ, ಬಗಾರ್ ಶೀದಾ ಸರ್ಗಾಕ್‌ಚ್ ವೆತಾತ್’ ಮ್ಹಣಾಲೊ, ಕೊಂಕ್ಣಿ ಕವಿತಾಶೆತಾಕ್ ಅಪ್ಲ್ಯಾ ಜಿಣ್ಯೆಚೊ ಜಾಯ್ತೊ ವೇಳ್, ಮಿನತ್, ದುಡು ಘಾಲ್ತೆಲ್ಯಾ ಮೆಲ್ವಿನ್ ರೊಡ್ರಿಗಸ್ ಆನಿ ವಲ್ಲಿ ಕ್ವಾಡ್ರಸಾಕ್ ಕಿತ್ಲೊ ಉಲ್ಲಾಸ್ ಪಾಟಯ್ಲ್ಯಾರೀ ಉಣೆಂಚ್’ ಮ್ಹಣಾಲೊ.

ಮುಖೆಲ್ ಸಯ್ರೊ ಜಾವ್ನ್ ಹಾಜರ್ ಆಸ್ಲೊ ಬೆಳ್‌ಗಾಂವ್‌ಚೊ ಫಾಮಾದ್ ಕೊಂಕ್ಣಿ ಪತ್ರ್ ’ಎಕ್ವಟಾವರ್‍ವಿಂ ಉಜ್ವಾಡ್’ ಚೊ ಸಂಪಾದಕ್ ಮಾನೆಸ್ತ್ ಲುವಿಸ್ ರೊಡ್ರಿಗಸ್ ಮ್ಹಣಾಲೊ, ಆಜ್ ಆಮಿ ಪ್ರಾಂತ್ಯ್, ಲಿಪಿ, ಜಾತ್, ಬೊಲಿ ಮ್ಹಣುನ್ ಆಮ್ಚೆಂ ಚಿಂತಾಪ್ ಅಶೀರ್ ಕರ್ಚೆಪ್ರಾಸ್ ಆಮ್ಚಿ ಭಾಸ್ ಕೊಂಕ್ಣಿ ಆನಿ ತ್ಯೇ ಪಾಸತ್ ಆಮಿ ಅಭಿಮಾನ್ ಪಾವುಂಕ್ ಜಾಯ್. ಆಮ್ಚ್ಯಾ ದೇಸಾಂತ್ ಹಜಾರಾಂನಿ ಭಾಸೊ ಆಸಾತ್, ಶೆಂಭೊರಾಂನಿ ಭಾಸೊ ಪ್ರಮುಖ್ ಭಾಸೊ, ತಿಸಾಂ ವಯ್ರ್ ಭಾಸೊ ಸಂವಿದಾನಾಂತ್ ಮಾನ್ಯತಾ ಲಾಭ್‌ಲ್ಲ್ಯೊ ಭಾಸೊ ತರ್‌ಯೀ, ಫಕತ್ತ್ ಕೊಂಕ್ಣಿ ಏಕ್ ಮಾತ್ರ್ ಭಾಸ್ - ಪಾಂಚ್ ಲಿಪಿಯಾಂನಿ ಬರಂವ್ಚಿ ಭಾಸ್, ಕೊಂಕ್ಣಿ ಮಾತ್ರ್ ಏಕ್ ಭಾಸ್ ಜಿ ಚ್ಯಾರ್ ರಾಜ್ಯಾಂನಿ ಉಲಂವ್ಚಿ ಭಾಸ್. ಅಶೆಂ ಆಸ್ತಾನಾ ಆಮಿ ಕೊಂಕ್ಣಿ ಭಾಸೆಕ್ ಆಮ್ಚ್ಯಾ ತಾಂಕಿಚಿ ಪಾಟಿಂಭೊ ದಿಂವ್ಚೊ ಆಮ್ಚೊ ಕಾಯ್ದೊ ಮ್ಹಣ್ತಾನಾ ಜಮೊ ಆಸ್‌ಲ್ಲ್ಯಾ ಸರ್ವ್ ಲೊಕಾಂನಿ ಆಪ್ಲೆ ಹಾತ್ ಉಭೆ ಕರುನ್ ತಾಚ್ಯಾ ಉತ್ರಾಂಕ್ ಆಪ್ಲಿ ಕಬ್ಲಾತ್ ದಿಲಿ.

ಮಾನೆಸ್ತ್ ಹೆನ್ರಿ ಡಿ’ಸೋಜ್ ಅಪ್ಲ್ಯಾ ಉಲವ್ಪಾಂತ್ ’ಕೊಂಕ್ಣೆಕ್ ಆತಾ ಸುಗ್ಗೆಚೊ ಕಾಳ್, ಜಾಯ್ತಿಂ ಕೊಂಕ್ಣಿಂ ಪಿಂತುರಾಂ ಯೇವ್ನ್ ಅಸಾತ್, ಪರ್ಗಾಂವಾಂತ್ ಸಯ್ತ್ ಕೊಂಕ್ಣಿ ಜಿವಾಳಾಂವ್ಚಿಂ ಕಾಮಾಂ ಜಾವ್ನ್ ಆಸಾತ್ ಆನಿ ಹೆಂ ಸರ್ವ್ ಕೊಂಕ್ಣಿ ಲೊಕಾಕ್ ದಾಧೊಸ್ಕಾಯೆಚೆಂ. ದೆಕುನ್ ಹ್ಯಾ ಪಾಸತ್ ಮಿನತ್ ಕರ್ತೆಲ್ಯಾ ಸಮೇಸ್ತ್ ಕೊಂಕ್ಣಿ ಸಂಘಟನಾಂಕ್ ಉಲ್ಲಾಸ್ ಫಾವೊ, ಆಯ್ಚೆಂ ಕಾರ್‍ಯೆಂ ನಿಜಾಯ್ಕೀ ಭೋವ್ ಅಪುರ್ಭಾಯೆಚೆಂ ಕಾರ್‍ಯೆಂ, ಆನಿ ಹೆಂ ಮಾಂಡುನ್ ಹಾಡ್‌ಲ್ಲ್ಯಾ ಕೊಂಕಣ್ ತಾರಾಂ ಆನಿ ಆಶಾವಾದಿ ಪ್ರಕಾಶನಾಚ್ಯಾ ಕಾರ್ಭಾರಿಂಕ್ ಉಲ್ಲಾಸ್ ಪಾಟಯ್ತಾಂ’ ಮ್ಹಣಲೊ.

ಜೋನ್ ಆರ್‍. ಮಸ್ಕರೇನ್ಹಸಾನ್ ಉಪ್ಕಾರ್‍ ಆಟವ್ನ್, ಹೆಂ ಕಾರ್‍ಯೆಂ ಉಭೆಂ ಕರುಂಕ್ ಮಿನತ್ ಕೆಲ್ಲ್ಯಾ ಸಮೇಸ್ತಾಂಕ್ ಉಲ್ಲಾಸ್ ಪಾಟಯ್ಲೆ, ದಿವೊ ಪತ್ರಾಚೊ ಸಂಪಾದಕ್ ಮಾನೆಸ್ತ್ ಲಾರೆನ್ಸ್ ಕುವೆಲ್ಹೊ, ಬಾಯ್ ಸುಜಾನ್ಹಾ ಕುವೆಲ್ಹೊ, ಫಾಮಾದ್ ಕೊಂಕ್ಣಿ ನಾಟಕಿಸ್ತ್ ಮಾನೆಸ್ತ್ ಫ್ರಾನ್ಸಿಸ್ ಫೆರ್ನಾಂಡಿಸ್ ಕಾಸ್ಸಿಯಾ, ಮಾನೆಸ್ತ್ ಲಾರೆನ್ಸ್ ಡಿ’ಸೋಜ ಕಮಾನಿ ಆನಿ ಹೆರಾಂ ಹಾಜರ್ ಆಸ್‌ಲ್ಲ್ಯಾ ಹ್ಯಾ ಕಾರ್‍ಯಾಚೆಂ ನಿರ್ವಾಹಣ್ ವಲ್ಲಿ ಕ್ವಾಡ್ರಸಾನ್ ಕೆಲೆಂ.

ಹಾಜರ್ ಆಸ್‌ಲ್ಲ್ಯಾ ಸಮೇಸ್ತಾಂಕ್, ಕೊಂಕಣ್ ತಾರಾಂ ಜೆರಿಮೆರಿ ತರ್ಫೆನ್ ಫಳಾರ್ ಆನಿ ಥಂಡ್ ಪಿಯೊವ್ಣೆಂ ಆಸ್ಲೆಂ.

ಹೆರ್ ಸರ್ತೆಂಚೊ ವಿವರ್:
ಸಪ್ತೆಂಬರ್ 24 (ಆಯ್ತಾರ್: ಸಾಂಜೆರ್ 4:30 ): ಕಾಂದಿವಲಿ (ಮುಖೇಲ್‌ಪಣ್: ಕಾಂದಿವಲಿ ಕೊಂಕ್ಣಿ ಸಂಘಟನ್)

ಸರ್ವ್ ಫಿರ್ಗಜೆಂಚ್ಯಾ ಸರ್ತೆಂನಿ ಜಿಕೊನ್ ಆಯಿಲ್ಲ್ಯಾಂಕ್, ಮುಂಬಯ್ ಮಟ್ಟಾಚ್ಯಾ ದುಸ್ರ್ಯಾ ಹಂತಾಚೊ ಸ್ಪರ್ಧೊ:

ಅಕ್ತೋಬರ್ 1 (ಆಯ್ತಾರ್: ಸಕಾಳಿಂ 10:30 ): ಜೆರಿಮೆರಿ ಫಿರ್ಗಜ್ (ಮುಖೇಲ್‌ಪಣ್: ಕೊಂಕಣ್ ತಾರಾಂ)
- ಆಮ್ಚೊ ಭಾತ್ಮಿ