[ಖಬರ್:] ಮುಂಬಯಾಂತ್ ಕೊಂಕ್ಣಿ ಕವಿತಾವಾಚನ್ ಸ್ಪರ್ಧೊ

ಕೊಂಕಣಿ ಕವಿತಾ ಸಾದರ್ ಸರ್ತ್ - 1

ಕೊಂಕ್ಣಿ ಭಾಸೆಕ್ ಜಿವಾಳಾಂವ್ಚ್ಯಾ ಇರಾದ್ಯಾನ್ ಮೆಲ್ವಿನ್ ಲುದ್ರಿಕಾಚ್ಯಾ ಮುಖೇಲ್‌ಪಣಾಚ್ಯಾ ’ಕವಿತಾ ಟ್ರಸ್ಟ್’ಚ್ಯಾ ಸಾಂಗೊಡ್ಯಾಂನಿ ವರ್ಸಾನ್ ವರಸ್ ಆಸಾ ಕರ್ಚ್ಯಾ ’ಅಖಿಲ್ ಭಾರತೀಯ್ ಮಟ್ಟಾಚ್ಯಾ ಕೊಂಕ್ಣಿ ಕವಿತಾವಾಚನ್ ಸ್ಪರ್ಧೊ’ ಹಾಂತುಂ ಹ್ಯೇ ಪಾವ್ಟಿಂ ಮುಂಬಯಾಂತ್ಲ್ಯಾ ಕೊಂಕ್ಣಿ ತಾಲೆಂತಾಂಕ್ ಸಯ್ತ್ ವಾಂಟೆಲಿ ಕರ್ಚೆಂ ಪ್ರೇತನ್, ಆಶಾವಾದಿ ಪ್ರಕಾಶನ್ ಆನಿ ಮುಂಬಯಾಂತ್ಲ್ಯಾ ಕೊಂಕ್ಣಿ ಸಂಘಟನಾಂಚ್ಯಾ ಮುಖೇಲ್‌ಪಣಾಖಾಲ್ ಸುರ್ವಾತ್ ಜಾಲಿ.

ಸಪ್ತೆಂಬರ್ 3 ತಾರಿಕೆರ್ (ಆಯ್ತಾರಾ) ಸಾಂಜೆರ್ ಸ ವೊರಾಂಚೆರ್, ನವಿಮುಂಬಯಾಂತ್ಲ್ಯಾ ಸಾನ್‌ಪಾಡಾಂತ್ ’ಕೊಂಕಾಣ’ ಹಾಂಚ್ಯಾ ಮುಖೇಲ್‌ಪಣಾಖಾಲ್, ನವಿಮುಂಬಯಾಂತ್ಲ್ಯಾ ಕೊಂಕ್ಣಿ ತಾಲೆಂತಾಂಕ್ ಕೊಂಕ್ಣಿ ಕವಿತಾವಾಚನ್ ಸ್ಪರ್ಧೊ ಆಸಾ ಕೆಲೊ. ಸ್ಪರ್ಧ್ಯಾಕ್ ಸ್ವಾಗತ್ ಕರುನ್, ಆಪ್ಲ್ಯಾ ಸ್ವಾಗತ್ ಉತ್ರಾಂನಿ ಅಧ್ಯಕ್ಷ್ ಮಾನೆಸ್ತ್ ರಿಚಾರ್ಡ್ ಡಿ’ಸೋಜ್ ತೊಟ್ಟಾಮ್ ಹಾಣೆಂ ’ಹಿ ಏಕ್ ಸುರ್ವಾತ್ ಮಾತ್ರ್, ಹ್ಯಾ ಸುರ್ವಾತೆಚೆಂ ಪ್ರೇರಣ್ ಘೆವ್ನ್ ಫುಡಿಲ್ಯಾ ದಿಸಾಂನಿ ಜಾಯ್ತಿಂ ಕೊಂಕ್ಣಿ ಭುರ್ಗಿಂ ಅಸಲ್ಯಾ ಕೊಂಕ್ಣಿ ಸ್ಪರ್ಧ್ಯಾಂನಿ ವಾಂಟೆಲಿ ಜಾತೆಲಿಂ’ ಮ್ಹಳ್ಳೊ ಅಪ್ಲೊ ಆಶಾವಾದ್ ವೆಕ್ತ್ ಕೆಲೊ.

ಪ್ರಸ್ತಾವಿಕ್ ಉತ್ರಾಂನಿ ಉಲಯಿತ್ತ್, ಆಶಾವಾದಿ ಪ್ರಕಾಶನಾಚೊ ವಲ್ಲಿ ಕ್ವಾಡ್ರಸ್ ಮ್ಹಣಾಲೊ; ’ಆಮ್ಚೊ ಕೊಂಕ್ಣಿ ಲೋಕ್ ಕಶ್ಟ್-ಮಿನತ್ ಕಾಡ್ತಾ, ಅಪ್ಲ್ಯಾ ಭುರ್ಗ್ಯಾಂಕ್ ಬರೊ ಫುಡಾರ್ ದಿಂವ್ಚಾಕ್, ತಶೆಂಚ್ ಆಸ್ತಾಂ - ಅಮ್ಚಿ ಮಾಂಯ್‌ಭಾಸೆಚೊ ಮೋಗ್ ತ್ಯಾ ಭುರ್ಗ್ಯಾಂಚ್ಯಾ ಕಾಳ್ಜಾಂತ್ ವೊಂಪ್ಚಾಂತ್ ಆಮಿ ಸಲ್ವಲ್ಯಾಂವ್ ದೆಕುನ್ ಆಜ್ ಆಮ್ಚ್ಯಾ ಭುರ್ಗ್ಯಾಂಕ್ ಆಮ್ಚಾ ಮಾಂಯ್‌ಭಾಸೆಚೆರ್ ವೋಡ್ ನಾ, ಆನಿ ಆಜ್ ’ಆಮ್ಚಿಂ ಭುರ್ಗಿಂ ಕೊಂಕ್ಣಿ ಉಲಯ್ನಾಂತ್’ ಮ್ಹಣುನ್ ಆಮ್ಚೊ ಗುನ್ಯಾಂವ್ ಆಮಿ ತಾಂಚೆರ್ ಥಾಪುಂಕ್ ಜಾಯ್ನಾ, ಬಗಾರ್ ಆಮಿಂಚ್ ತೊ ಗುನ್ಯಾಂವ್ ಮಾಂದುನ್ ಘೆಂವ್ಕ್ ಜಾಯ್. ಆಮ್ಚ್ಯಾ ಭುರ್ಗ್ಯಾಂಕ್ ಆಮಿ ತಾಂಚಿಂ ತಾಲೆಂತಾಂ ಮುಕಾರ್ ಹಾಡುಂಕ್ ಏಕ್ ವೆದಿ ಕರುನ್ ದಿಲ್ಯಾರ್ ಖಂಡಿತ್ ಜಾವ್ನ್ ಕೊಂಕ್ಣಿ ತಾಲೆಂತಾಂಚೊ ಬೊರ್ಗೊಳ್ ನಾ, ಫುಡೆಂ ಹಿಂಚ್ ತಾಲೆಂತಾಂ ಕೊಂಕ್ಣಿ ಭಾಸೆಚೊ ಬೊಂದೆರ್ ಉಭಾರುನ್ ಧರ್ಚ್ಯಾಂತ್ ಕಸ್ಲೊಚ್ ದುಭಾವ್ ನಾ’ ಮ್ಹಣಾಲೊ.

ತ್ಯೇ ಉಪ್ರಾಂತ್ ಆಸಾ ಕೆಲ್ಲ್ಯಾ ಕವಿತಾವಾಚನ್ ಸ್ಪರ್ಧ್ಯಾಂತ್ ಹಿಂ ಚೊವ್ಗಾಂ ಜಿಕೊನ್ ಆಯ್ಲಿಂ;

[ಪಯ್ಲೆಂ ಸ್ಥಾನ್: ಡರಾಯಸ್ ಸುವಾರಿಸ್, ದುಸ್ರೆಂ ಸ್ಥಾನ್: ಡ್ಯಾನೆಲಿ ಸುವಾರಿಸ್]

ಪಯ್ಲೆಂ: ಡರಾಯಸ್ ಸುವಾರಿಸ್ (ಕವಿತಾ: ಎಕಾ ಫೊಂಡಾಚಿ ಕಥಾ - ಕವಿ: ವಾಲ್ಟರ್ ದಾಂತಿಸ್)
ದುಸ್ರೆಂ: ಡನೆಲ್ಹಿ ಸುವಾರಿಸ್ (ಕವಿತಾ: ಚೊರಿ ಜಾಲಾಂ - ಕವಿ: ಮೌರಿಸ್ ಶಾಂತಿಪುರ್
ತಿಸ್ರೆಂ: ಕ್ರಿಸ್ ಡಿ’ಕೋಸ್ತಾ (ಕವಿತಾ: ಪಾಟಿಂ ಪಳೆನಾಕಾ - ಕವಿ: ವಲ್ಲಿ ಕ್ವಾಡ್ರಸ್)
ತಿಸ್ರೆಂ: ವೆಲುಶಾ ಪತ್ರಾವೊ (ಕವಿತಾ: ಪಯ್ಸಿಲ್ಯಾನ್ ಪಳೆತಾನಾ - ಕವಿ: ನೆರಿ ನಜ್ರೆತ್ ತಾಕೊಡೆ)

ಮುಖೆಲ್ ಸಯ್ರೊ ಜಾವ್ನ್ ಹಾಜರ್ ಆಸ್‌ಲ್ಲ್ಯಾ ಮಾನೆಸ್ತ್ ಅನಂತ್ ಅಮೆಂಬಳ್ ಹಾಣಿಂ, ಕಶೆಂ ಅಪುಣ್ ಏಕ್ ಕೊಂಕ್ಣಿ ಜಾವ್ನ್ ಸಯ್ತ್, ಮರಾಠಿ, ಹಿಂದಿ, ಇಂಗ್ಲಿಶಾಂತ್‌ಚ್ಚ್ ಅಪ್ಲೊ ಚಡ್ತಾವ್ ವೇಳ್ ಖರ್ಚಿಲ್ಲೊ, ಆನಿ ಜೆದ್ನಾಂ ಹಾಂವ್ ಬಾಬ್ ಮೆಲ್ವಿನ್ ರೊಡ್ರಿಗಸಾಕ್ ಮೆಳ್ಳೊಂ ಆನಿ ತಾಚೊ ’ಪ್ರಕೃತಿಚೊ ಪಾಸ್’ ಬೂಕ್ ವಾಚ್ಲೊ, ಹಾಂವ್ ಕೊಂಕ್ಣೆಚ್ಯಾ ಮೊಗಾರ್ ಪರತ್ ಪಡ್ಲೊಂ, ಆನಿ ದೋನ್ ವರ್ಸಾಧಿಂ ಜೆದ್ನಾಂ ಗೊಯಾಂತ್ ಹಾಂವ್ ಬಾಬ್ ವಲ್ಲಿ ಕ್ವಾಡ್ರಸಾಕ್ ಮೆಳ್ಳೊಂ, ತಾಚ್ಯೊ ಕವಿತಾ/ಕಾಣ್ಯೊ ವಾಚ್ಲ್ಯೊ ಮ್ಹಳ್ಯಾರ್ ಆತಾಂ ಮ್ಹಾಕಾ ತಾಚ್ಯೊ ಕಾಣ್ಯೊ ಚಡುಣೆಂ ತೋಂಡ್‌ಪಾಠ್ ಆಸಾತ್. ಆನಿ ತಾಚ್ಯಾ ವಾವ್ರಾಚೆರ್ ಅಭಿಮಾನ್ ಭಗುನ್ ತುಮ್ಚೆಸಮೊರ್ ಉಭೊ ಆಸಾಂ, ಆನಿ ಹ್ಯಾ ಪಾಸತ್ ಹಾಂವ್ ತುಮ್ಕಾಂ ಸಮೇಸ್ತಾಂಕ್ ಉಲ್ಲಾಸ್ ಪಾಠಯ್ತಾಂ, ತುಮ್ಚೆಥಂಯ್ ಆಸ್ಚೊ ಕೊಂಕ್ಣಿ ಮೋಗ್, ಹಾಂವ್ ಖರೆಂಪಣಿಂ ಹೆರ್ ಖಂಚ್ಯಾಯ್ ಪಂಗ್ಡಾಥಂಯ್ ದೆಖುಂಕ್ ಸಕಾನಾ. ಮ್ಹಣಾಲೊ.

ಹ್ಯಾ ಸ್ಪರ್ಧ್ಯಾಂತ್ ವಾಂಟೆಲಿ ಜಾಲೆಲ್ಯಾ ಸರ್ವ್ ಭುರ್ಗ್ಯಾಂಕ್ ’ಆಶಾವಾದಿ ಪ್ರಕಾಶನಾ’ ತರ್ಫೆನ್ ಮಾನೆಸ್ತ್ ಅನೆಂತ್ ಅಮೆಂಬಳ್ ಹಾಣೆಂ ’ಕೊಂಕ್ಣಿ ಬೂಕ್’ ಇನಾಮಾಂ ಜಾವ್ನ್ ವಾಂಟ್ಲಿಂ. ತಶೆಂಚ್ ಸ್ಪರ್ಧ್ಯಾಂತ್ ವಾಂಟೆಲಿ ಜಾಲೆಲ್ಯಾ ಸರ್ವ್ ಭುರ್ಗ್ಯಾಂಕ್ ’ಉಜ್ವಾಡ್ ಪಂದ್ರಾಳೆಂ’ ಚಿ ಎಕಾ ವರ್ಸಾಚಿ ವರ್ಗಣಿ ತಶೆಂಚ್ ’ಕವಿತಾ ಟ್ರಸ್ಟ್’ ಥಾವ್ನ್ ’ಶಿಫಾರಸ್ ಪತ್ರ್’ ಘೋಶಿತ್ ಕೆಲೆಂ.

ಮಾನೆಸ್ತ್ ರಿಚಾರ್ಡ್ ಡಿ’ಸೋಜಾನ್ ಉಪ್ಕಾರ್ ಆಟವ್ಣಿ ಕರುನ್, ಸಭಾರ್ ಚಟುವಟಿಕೊ ಆಸ್ಲ್ಯಾರೀ, ಉರ್ಭಾ ಆನಿ ಆಸಕ್ತ್ ಧಾಖವ್ನ್ ಆಯಿಲ್ಲ್ಯಾ ಸರ್ವಾಂಕ್ ಉಲ್ಲಾಸ್ ಪಾಟವ್ನ್, ಹೊ ಸ್ಪರ್ಧೊ ಬರೆ ರಿತಿನ್ ಮಾಂಡುನ್ ಹಾಡುಂಕ್ ಜಾಯ್ತಿ ಮಿನತ್ ಕೆಲ್ಲ್ಯಾ ಮಾನೆಸ್ತ್ ಜೋಸೆಫ್ ಪತ್ರಾವೊ ಅಜೆಕಾರ್ ಹಾಕಾ ಆನಿ ಹಾಚ್ಯಾ ಕುಟ್ಮಾಕ್ ಪ್ರತ್ಯೇಕ್‌ಪಣಿಂ ಉಲ್ಲಾಸ್ ಪಾಟವ್ನ್, ಅಕ್ತೋಬರ್ 1 ತಾರಿಕೆರ್ ಜೆರಿಮೆರಿ ಇಗರ್ಜೆಸಾಲಾಂತ್, ಸಕಾಳಿಂ ಧಾ ವೊರಾಂಕ್ ಜಾಂವ್ಕ್ ಆಸ್ಚ್ಯಾ ಮುಂಬಯ್ ಮಟ್ಟಾಚ್ಯಾ ಸ್ಪರ್ಧ್ಯಾಂತ್ ಭಾಗ್ ಘೆಂವ್ಕ್ ಆಸ್ಚ್ಯಾ ಸರ್ವಾಂಕ್ ಬರೆಂ ಮಾಗ್ಲೆಂ.

ಹೆರ್ ಸರ್ತೆಂಚೊ ವಿವರ್:
ಸಪ್ತೆಂಬರ್ 17 (ಆಯ್ತಾರ್: ಸಕಾಳಿಂ 10:30 ): ವಸಯ್ (ಮುಖೇಲ್‌ಪಣ್: ವಸಯ್ ಕೊಂಕಣಿ ಸಂಘಟನ್)
ಸಪ್ತೆಂಬರ್ 17 (ಆಯ್ತಾರ್: ದನ್ಪಾರಾಂ 4:30): ಮಿರಾರೋಡ್ (ಮುಖೆಲ್‌ಪಣ್: ಸಂ|ಜುಜೆ ಕೊಂಕ್ಣಿ ಸಂಘಟನ್)
ಸಪ್ತೆಂಬರ್ 23 (ಸನ್ವಾರ್: ಸಾಂಜೆರ್ 6:00 ): ಜೆರಿಮೆರಿ (ಮುಖೇಲ್‌ಪಣ್: ಕೊಂಕಣ್ ತಾರಾಂ)
ಸಪ್ತೆಂಬರ್ 24 (ಆಯ್ತಾರ್: ಸಾಂಜೆರ್ 4:30 ): ಕಾಂದಿವಲಿ (ಮುಖೇಲ್‌ಪಣ್: ಕಾಂದಿವಲಿ ಕೊಂಕ್ಣಿ ಸಂಘಟನ್)

ಸರ್ವ್ ಫಿರ್ಗಜೆಂಚ್ಯಾ ಸರ್ತೆಂನಿ ಜಿಕೊನ್ ಆಯಿಲ್ಲ್ಯಾಂಕ್, ಮುಂಬಯ್ ಮಟ್ಟಾಚ್ಯಾ ದುಸ್ರ್ಯಾ ಹಂತಾಚೊ ಸ್ಪರ್ಧೊ:

ಅಕ್ತೋಬರ್ 1 (ಆಯ್ತಾರ್: ಸಕಾಳಿಂ 10:30 ): ಜೆರಿಮೆರಿ ಫಿರ್ಗಜ್ (ಮುಖೇಲ್‌ಪಣ್: ಕೊಂಕಣ್ ತಾರಾಂ)
- ಆಮ್ಚೊ ಭಾತ್ಮಿ