[ಖಬರ್:] ವಸಯಾಂತ್ ಅಪುರ್ಭಾಯೆಚೊ ಕವಿತಾವಾಚನ್ ಸ್ಪರ್ಧೊ

ಕೊಂಕಣಿ ಕವಿತಾ ಸಾದರ್ ಸರ್ತ್ - 2

ಮೆಲ್ವಿನ್ ಲುದ್ರಿಗಾಚ್ಯಾ ’ಕವಿತಾ ಟ್ರಸ್ಟ್’ ಮುಖೇಲ್‌ಪಣಾಖಾಲ್ ಅಖಿಲ್ ಭಾರತೀಯ್ ಮಟ್ಟಾರ್ ಚಲ್ಚ್ಯಾ ಕೊಂಕ್ಣಿ ಕವಿತಾ ವಾಚನ್ ಸ್ಪರ್ಧ್ಯಾಚಿ ಮುಂಬಯಾಂತ್ಲಿ ದುಸ್ರಿ ಸರ್ತಿ ಹೆಚ್ಚ್ ಸಪ್ತೆಂಬ್ರಾಚ್ಯಾ 17 ತಾರಿಕೆರ್ ಸಕಾಳಿಂ 11 ವೊರಾಂಚೆರ್ ವಸಯ್ ಕೊಂಕ್ಣಿ ವೆಲ್‌ಫೇರ್ ಎಸೋಸಿಯೇಶನ್ ಸಂಚಾಲನಾಚ್ಯಾ ಮುಖೆಲ್ಯಾಂಚ್ಯಾ ಸಹಯೋಗಾಂತ್ ಆಶಾವಾದಿ ಪ್ರಕಾಶನಾಚ್ಯಾ ಮುಖೆಲ್‌ಪಣಾಖಾಲ್ ಚಲ್ಲಿ.

ಕುಟ್ಮಾಫೆಸ್ತ್ ಆಚರಣ್ ಕರುನ್ ಆತಾಂ ಕೊಂಕ್ಣಿ ಕವಿತಾವಾಚನ್ ಸ್ಪರ್ಧೊ ಆಸಾ ಕೆಲ್ಲೆವರ್ವಿಂ ಖರೆಂಚ್ ಜಾವ್ನ್ ಕಾಳ್ಜಾಂತ್ ಕೊಂಕ್ಣಿ ಮೊಗಾಚೆಂ ನವೆಂ ಭೀಂ ಕಿರ್ಲತೆಲೆಂ ಮ್ಹಣುನ್, ಅಪ್ಲ್ಯಾ ಸ್ವಾಗತ್ ಉತ್ರಾಂನಿ ವಸಯ್ ಕೊಂಕ್ಣಿ ವೆಲ್‌ಫೇರ್ ಅಸೋಸಿಯೇಶನಾಚೊ ಅಧ್ಯಕ್ಷ್ ಮಾನೆಸ್ತ್ ರೆಜಿನಾಲ್ಡ್ ಸಾಂತುಮಾಯೆರ್ ಮ್ಹಣಾಲೊ. ಬಾಯ್ ಹಿಲ್ಡಾನ್ ಮಾಗ್ಣ್ಯಾಂತ್ ಸುರ್ವಾತ್ ಕೆಲ್ಲ್ಯಾ ಹ್ಯಾ ಕಾರ್ಯಾಂತ್ ಮಾನೆಸ್ತ್ ಜೋನಾನ್ ಸಯ್ರ್ಯಾಂಕ್; ಸರ್ವ್ ಮಾನೆಸ್ತ್ ಅನಂತ್ ಅಮೆಂಬಳ್, ಹಿಲರಿ ಡಿ’ಸಿಲ್ವಾ, ವಲ್ಲಿ ಕ್ವಾಡ್ರಸ್ ಹಾಂಕಾಂ ಸ್ವಾಗತ್ ಕೆಲೊ.

ಭುರ್ಗಿಂ ತಶೆಂಚ್ ಯುವಜಣ್ ಮ್ಹಣುನ್ ದೋನ್ ಪಂಗ್ಡಾಂತ್ ಚಲ್‌ಲ್ಲ್ಯಾ ಕವಿತಾವಾಚನ್ ಸ್ಪರ್ಧ್ಯಾಂತ್ ತೆರಾ ಸ್ಪರ್ಧಿಕಾಂನಿ ಭಾಗ್ ಘೆತ್ಲೊ ಆನಿ ಹಿಂ ಸಕಯ್ಲಿಂ, ಮುಂಬಯ್ ಮಟ್ಟಾಚ್ಯಾ ದುಸ್ರ್ಯಾ ಹಂತಾಕ್ ಪಾವ್ಲಿಂ;

ಯುವಜಣಾಂಚೊ ವರ್ಗ್: (ಪಂದ್ರಾ ಥಾವ್ನ್ ತೀಸ್ ವರ್ಸಾಂ ಪ್ರಾಯೆಚಿಂ)

ಪಯ್ಲೆಂ ಇನಾಮ್: ಜ್ಯೋತಿ ಅಲ್ವಾರಿಸ್ (ಕವಿತಾ: ಪಯ್ಸ್ ಪಯ್ಸ್, ಕವಿ: ವಲ್ಲಿ ಕ್ವಾಡ್ರಸ್)
ದುಸ್ರೆಂ ಇನಾಮ್: ಎಲ್ವಿಟಾ ಮೆಂಡೊನ್ಸಾ (ಕವಿತಾ: ಹಾಂವ್ ಸ್ವತಂತ್ರ್, ಕವಿ: ವಲ್ಲಿ ಕ್ವಾಡ್ರಸ್)
ತಿಸ್ರೆಂ ಇನಾಮ್: ಜೋಸ್ನಾ ಆಬ್ರೆವ್ (ಕವಿತಾ: ವ್ಹಯ್ ಸಂಸಾರ್ ಬದಲ್ಲಾ, ಕವಿ: ಗ್ಲೇನಿಶ್ ಮಾರ್ಟಿಸ್, ಅಲಂಗಾರ್)

ಭುರ್ಗ್ಯಾಂಚೊ ವರ್ಗ್: (ಪಂದ್ರಾ ವರ್ಸಾ ಸಕಯ್ಲಿಂ)

ಪಯ್ಲೆಂ ಇನಾಮ್: ರಿಯೋನಾ ಮಸ್ಕರೇನ್ಹಸ್ (ಕವಿತಾ: ಪಯ್ಸ್ ಪಯ್ಸ್, ಕವಿ: ವಲ್ಲಿ ಕ್ವಾಡ್ರಸ್)
ದುಸ್ರೆಂ ಇನಾಮ್: ಲಿಶಾ ಡಿ’ಸೋಜಾ (ಕವಿತಾ: ಉದ್ಯೋಗಾಚ್ಯಾ ವಾಟೆರ್, ಕವಿ: ಇನಾಸ್ ಅಲಂಗಾರ್)
ತಿಸ್ರೆಂ ಇನಾಮ್: ವಿಯೋಲಾ ಫೆರ್ನಾಂಡಿಸ್ (ಕವಿತಾ: ಸೊಭಿತ್ ಫುಲ್, ಕವಿ: ಭಯ್ಣ್ ಆನೆಟ್ ಕೊರೆಯಾ)

ಕವಿತಾವಾಚನ್ ಸರ್ತೆಂತ್ ವಾಂಟೆಲಿ ಜಾಲ್ಲ್ಯಾ ಸರ್ವಾಂಕ್ ಇನಾಮಾಂ ವಾಂಟುನ್ ವಲ್ಲಿ ಕ್ವಾಡ್ರಸಾನ್, ಕೊಂಕ್ಣಿ ಭಾಸ್ ಆಮ್ಚ್ಯಾ ಮುಖ್ಲ್ಯಾ ಪಿಳ್ಗೆಕ್ ಪಾವಂವ್ಚಿ ಜವಾಭ್ದಾರಿ ಆಮ್ಚಿ ಜಾವ್ನಾಸಾ, ಆನಿ ಆಮಿ ತ್ಯಾ ಜವಾಭ್ದಾರೆಂತ್ ಚುಕಾರಿ ಮಾರಿನಾಯೆ, ಬಗಾರ್ ಆಮ್ಚ್ಯಾ ತಾಂಕಿಚಿ ಮಿನತ್ ಕರುಂಕ್ ಜಾಯ್. ಕವಿತಾವಾಚನ್ ಸ್ಪರ್ಧ್ಯಾಚೊ ಉದ್ದೇಶ್ ಕೊಂಕ್ಣಿ ಭಾಸೆಚಿ ಸೊಭಾಯ್, ಕೊಂಕ್ಣಿ ಕವಿತಾ ಆನಿ ಕೊಂಕ್ಣಿ ಕವಿಂಕ್ ವಳ್ಕುಂಚೆಂ ಜಾವ್ನಾಸ್ತಾಂ, ಕೊಂಕ್ಣೆಚ್ಯಾ ಉಂಚ್ಲ್ಯಾ ಕವಿಂಚಿಂ ಕವಿತಾ ಘೆವ್ನ್ ತಿಂ ವಾಚನ್ ಕೆಲ್ಯಾರ್ ಬರೆಂ ಮ್ಹಣಾಲೊ. ಆನಿ ಅಪುರ್ಭಾಯೆಚೊ ಸ್ಪರ್ಧೊ ಆಸಾ ಕರುಂಕ್ ಜಾಯ್ತಿ ಮಿನತ್ ಕೆಲ್ಲ್ಯಾ ವಸಯ್ ಕೊಂಕ್ಣಿ ವೆಲ್‌ಫೇರ್ ಅಸೋಸಿಯೇಶನಾಚ್ಯಾ ಸರ್ವ್ ಕಾರ್ಭಾರಿಂಕ್ ಉಲ್ಲಾಸ್ ಪಾಟಯ್ಲೆ. ಸಯ್ರೊ ಮಾನೆಸ್ತ್ ಅನಂತ್ ಅಮೆಂಬಳಾನ್ ’ಹಾಂವ್ ಕೊಂಕ್ಣೆಚ್ಯಾ ಮೊಗಾರ್ ಪಡ್ಲಾಂ, ಆನಿ ತೊ ಖತ್ಕತೊ ಮೋಗ್ ಮ್ಹಾಕಾ ಆಮ್ಚ್ಯಾ ಮಂಗ್ಳುರಿ ಕೊಂಕ್ಣಿ ಲೊಕಾಂ ಥಂಯ್ ದಿಸ್ತಾ’ ಮ್ಹಣಾಲೊ.

ಹ್ಯಾ ಕವಿತಾವಚನ್ ಸರ್ತೆಚಿ ತಯಾರಾಯ್ ಕರುಂಕ್ ನೆರಿ ನಜ್ರೆತ್ ತಾಕೊಡೆ, ಹೆಲೆನ್ ಗೊಡಿನ್ಹೊ ಆನಿ ಒಲಿವರ್ ಡಿ’ಸೋಜಾ ಹಾಣಿಂ ಜಾಯ್ತಿ ಮಿನತ್ ಕೆಲ್ಲಿ ದೆಕುನ್ ತಾಂಚೊಯ್ ಉಪ್ಕಾರ್ ಆಟಯ್ಲೊ. ಲಗ್‌ಬಗ್ ಪಾಂತೀಸ್ ಲೋಕ್ ಹ್ಯಾ ಸ್ಪರ್ಧ್ಯಾಕ್ ಪಳೆಂವ್ಕ್ ಹಾಜರ್ ಆಸ್ಲೊ, ಹೊ ಆಮ್ಕಾಂ ಪಯ್ಲೊ ಅನ್ಬೋಗ್, ಫುಡೆಂ ಖಂಡಿತ್ ಜಾವ್ನ್ ಹಾಚ್ಯಾಕೀ ಬರೆ ರಿತಿನ್ ಆಮಿ ಕವಿತಾವಚನ್ ಸ್ಪರ್ಧೊ ಮಾಂಡುನ್ ಹಾಡುಂಕ್ ಪ್ರೇತನ್ ಕರ್ತೆಲ್ಯಾಂವ್ ಮ್ಹಣುನ್ ಹಾಜರ್ ಆಸ್ಚ್ಯಾ ಲೊಕಾಂನಿ ಆಪ್ಲಿ ಉರ್ಭಾ ವೆಕ್ತ್ ಕೆಲಿ.

ವಸಯ್ ಸಂಚಾಲನಾಚ್ಯಾ ಮುಖೇಲ್ಯಾಂನಿ ಕಾಫಿ-ಫಳಾರಾಚಿ ವಿಲೇವಾರಿ ಕೆಲ್ಲಿ.

ಹೆರ್ ಸರ್ತೆಂಚೊ ವಿವರ್:
ಸಪ್ತೆಂಬರ್ 23 (ಸನ್ವಾರ್: ಸಾಂಜೆರ್ 6:00 ): ಜೆರಿಮೆರಿ (ಮುಖೇಲ್‌ಪಣ್: ಕೊಂಕಣ್ ತಾರಾಂ)
ಸಪ್ತೆಂಬರ್ 24 (ಆಯ್ತಾರ್: ಸಾಂಜೆರ್ 4:30 ): ಕಾಂದಿವಲಿ (ಮುಖೇಲ್‌ಪಣ್: ಕಾಂದಿವಲಿ ಕೊಂಕ್ಣಿ ಸಂಘಟನ್)

ಸರ್ವ್ ಫಿರ್ಗಜೆಂಚ್ಯಾ ಸರ್ತೆಂನಿ ಜಿಕೊನ್ ಆಯಿಲ್ಲ್ಯಾಂಕ್, ಮುಂಬಯ್ ಮಟ್ಟಾಚ್ಯಾ ದುಸ್ರ್ಯಾ ಹಂತಾಚೊ ಸ್ಪರ್ಧೊ:

ಅಕ್ತೋಬರ್ 1 (ಆಯ್ತಾರ್: ಸಕಾಳಿಂ 10:30 ): ಜೆರಿಮೆರಿ ಫಿರ್ಗಜ್ (ಮುಖೇಲ್‌ಪಣ್: ಕೊಂಕಣ್ ತಾರಾಂ)
- ಆಮ್ಚೊ ಭಾತ್ಮಿ