[ಖಬರ್:] ಕಾಂದಿವ್ಲಿಂತ್ ಕವಿತಾವಾಚನ್ ಸರ್ತಿ - ೫

ಕೊಂಕಣಿ ಕವಿತಾ ಸಾದರ್ ಸರ್ತ್ - 5

ಕಾಂದಿವ್ಲಿ (ಸಪ್ತೆಂಬರ್ 24): ಮೆಲ್ವಿನ್ ಲುದ್ರಿಕಾಚ್ಯಾ ’ಕವಿತಾ ಟ್ರಸ್ಟ್’ ತರ್ಫೆನ್ ಅಖಿಲ್ ಭಾರತೀಯ್ ಮಟ್ಟಾರ್ ವರ್ಸಾನ್ ವರಸ್ ಚಲ್ಚಾ ’ಕೊಂಕ್ಣಿ ಕವಿತಾವಾಚನ್ ಸ್ಪರ್ಧೊ’ ಹಾಚಿ ಮುಂಬಯಾಂತ್ಲಿ ಪಾಂಚ್ವಿ/ಅಖ್ರೇಚಿ ಸರ್ತಿ ಸಪ್ತೆಂಬರಾಚ್ಯಾ 24 ತಾರಿಕೆರ್ ಸನ್ವಾರಾ ಸಾಂಜೆರ್ 4:00 ವೊರಾಂಚೆರ್, ಚಾರ್‌ಕೊಪಾಂತ್ ಅಪ್ನಾ ಬಜಾರ್ ಹೊಲಾಂತ್; ಆಶಾವಾದಿ ಪ್ರಕಾಶನ್ ಆನಿ ಅಸುಂಪ್ಸಾಂವ್ ಕೊಂಕ್ಣಿ ಸಂಘಟನ್ ಹಾಣಿಂ ಚಲವ್ನ್ ವೆಲಿ. ಹೆಚ್ಚ್ ಸಂಧರ್ಭಾರ್ ಸಂಘಟನಾಚ್ಯಾ ಸ್ಥಾಪಕ್ ಅಧ್ಯಕ್ಷ್ ಮಾನೆಸ್ತ್ ಎ.ಜೆ.ಪಿರೇರಾ ಹಾಂಚೊ ಜಲ್ಮಾದಿವಸ್ ಆಚರಣ್ ಕೆಲೊ.

ಚ್ಯಾರ್ ವೊರಾಂಚೆರ್ ಸುರು ಜಾಲ್ಲ್ಯಾ ಹ್ಯಾ ಕಾರ್ಯಾಚಿ ಸುರ್ವಾತೆಚೆರ್ ಎ.ಕೆ.ಎಸ್. ಹಾಚೊ ಕಾರ್‍ಯದರ್‍ಶಿ ಮಾನೆಸ್ತ್ ವಲೇರಿಯನ್ ಪಾಯ್ಸ್ ಹಾಣೆಂ ಲ್ಹಾನ್ ಮಾಗ್ಣ್ಯಾಂತ್ ಸುರ್ವಾತ್ ಕರ್ತಚ್, ಮಾನೆಸ್ತ್ ಮೆಲ್ವಿನ್ ಡಿ’ಸೋಜಾನ್ ಸಯ್ರ್ಯಾಂಕ್; ಮುಖೆಲ್ ಸಯ್ರೊ ಜಾವ್ನ್ ಮಾನೆಸ್ತ್ ಹೆನ್ರಿ ಡಿ’ಸೋಜ್ (ಸಂಗೀತ್ ಸಾಮ್ರಾಟ್), ವಲ್ಲಿ ಕ್ವಾಡ್ರಸ್, ಪ್ರಸನ್ನ ನಿಡ್ಡೋಡಿ, ಎ.ಜೆ.ಪಿರೇರ್ ತಶೆಂಚ್ ವಲೇರಿಯನ್ ಪಾಯ್ಸ್ ಹಾಂಕಾಂ ವೆದಿಕ್ ಆಪವ್ನ್ ಫುಲಾಂ ತುರೊ ದೀವ್ನ್ ಸ್ವಾಗತ್ ಕೆಲೊ.

ಮೇಘಾ ನಾಯ್ಕ್ ಹಿಣೆಂ ಕವಿತಾವಾಚನಾಚೆಂ ಮುಖೇಲ್‌ಪಣ್ ಘೆತ್ಲೆಂ, ಭುರ್ಗಿಂ (ಪಂದ್ರಾ ವರ್ಸಾ ಪರ್‍ಯಾಂತ್ಲಿಂ) ತಶೆಂಚ್ ಯುವಜಣ್ (ಪಂದ್ರಾ ಥಾವ್ನ್ ತೀಸ್ ವರ್ಸಾಂ ಪರ್‍ಯಾಂತ್ಲಿಂ) ಅಶೆಂ ದೋನ್ ವಿಭಾಗಾಂನಿ ಚಲ್‌ಲ್ಲ್ಯಾ ಕವಿತಾವಾಚನ್ ಸ್ಪರ್ಧ್ಯಾಂತ್ ಹಿಂ ಸಕಯ್ಲಿಂ ಜಿಕೊನ್ ಆಯ್ಲಿಂ;

ಪಂದ್ರಾ ವರ್ಸಾಂ ಸಕಯ್ಲೊ ವಿಭಾಗ್;
ಪಯ್ಲೆಂ ಇನಾಮ್: ಆನ್ಸಿಯಾ ಪಿರೇರಾ [ಕವಿತಾ: ವೇಳ್ ನಾ ಮ್ಹಾಕಾ, ಕವಿ: ಪ್ರಸನ್ನ ನಿಡ್ಡೋಡಿ]
ದುಸ್ರೆಂ ಇನಾಮ್: ಅಲಿಸ್ಟರ್ ಡಿ’ಸೋಜ್ [ಕವಿತಾ: ಕಿತೆಂಚ್ ದಿಸ್ಲೆಂನಾ, ಕವಿ: ವಲ್ಲಿ ಕ್ವಾಡ್ರಸ್]
ತಿಸ್ರೆಂ ಇನಾಮ್: ರೀವ್ ನೊರೊನ್ಹಾ [ಕವಿತಾ: ಕವಿತಾ ಮ್ಹಜಿ, ಕವಿ: ಮೆಲ್ವಿನ್ ರೊಡ್ರಿಗಸ್]

ಪಂದ್ರಾ ವರ್ಸಾಂ ವಯ್ಲೊ ವಿಭಾಗ್;
ಪಯ್ಲೆಂ ಇನಾಮ್: ಶಾರಲ್ ಡಿ’ಸೋಜ್ [ಕವಿತಾ: ಪಯ್ಸ್ ಪಯ್ಸ್, ಕವಿ: ವಲ್ಲಿ ಕ್ವಾಡ್ರಸ್]
ದುಸ್ರೆಂ ಇನಾಮ್: ಹೆಜೆಲ್ ಆಬ್ರೆವ್ [ಕವಿತಾ: ಕವಿತಾ ಮ್ಹಜಿ, ಕವಿ: ಮೆಲ್ವಿನ್ ಲುದ್ರಿಕ್]
ತಿಸ್ರೆಂ ಇನಾಮ್: ಕ್ಯಾರಲ್ ಡಿ’ಸೋಜ್ [ಕವಿತಾ: ಆಜ್ ಹಾಂವ್ ಸ್ವತಂತ್ರ್, ಕವಿ: ವಲ್ಲಿ ಕ್ವಾಡ್ರಸ್]

ಪ್ರಸನ್ನ ನಿಡ್ಡೋಡಿ ಅನಿ ವಲ್ಲಿ ಕ್ವಾಡ್ರಸ್ ಹ್ಯಾ ಸ್ಪರ್ದ್ಯಾಚೆ ವೊರಯ್ಣಾರ್ ಜಾವ್ನ್ ಹಾಜರ್ ಆಸ್ಲೆ.

ಮುಖೇಲ್ ಸಯ್ರೊ ಜಾವ್ನ್ ಆಯಿಲ್ಲ್ಯಾ ಮಾನೆಸ್ತ್ ಹೆನ್ರಿ ಡಿ’ಸೋಜಾನ್ ಆಪ್ಲ್ಯಾ ಉಲವ್ಪಾಂತ್, ಕೊಂಕ್ಣಿ ಲೊಕಾಂಚ್ಯಾ ಕಾಳ್ಜಾಂತ್ಲೊ ಕೊಂಕ್ಣಿ ಮೋಗ್ ಕೆದಿಂಚ್ ಪಾಲ್ವನಾ. ವೆಳಾಚೊ ಅಭಾವ್ ಆಸುಂ, ವಾ ಕಸ್ಲೇಯ್ ಸಮಸ್ಸೆ ಬಗ್ಲೆಕ್ ದವ್ರುನ್ ಕೊಂಕ್ಣಿ ಕಾರ್‍ಯಿಂ ಆಮಿ ಕೆದಿಂಚ್ ಚುಕಂವ್ಚಿಂ ನಾಕಾತ್, ಆನಿ ಕೊಂಕ್ಣಿ ಭಾಸ್ ವಿಸ್ತಾರಾಂವ್ಚ್ಯಾ ಮಿಸಾಂವಾಕ್ ದೆಂವ್‌ಲ್ಲ್ಯಾ ಸರ್‍ವಾಂಕ್ ಆಮಿ ಪಾಟಿಂಬೊ ದಿವ್ಯಾಂ ಮ್ಹಣಾಲೊ. ಉಪ್ರಾಂತ್ ಭಾಗ್ ಘೆತ್‌ಲ್ಲ್ಯಾ ಸರ್ವಾಂಕ್ ಇನಾಮಾಂ ವಾಂಟುನ್ ವಲ್ಲಿ ಕ್ವಾಡ್ರಸ್; ’ಇಂಗ್ಲಿಶ್ ಉಲಯ್ತಚ್ ಆಮಿ ಉಂಚ್ಲೆ ಜಾಯ್ನಾಂವ್, ವ ಕೊಂಕ್ಣಿ ಉಲಯ್ತಚ್ಚ್ ಆಮಿ ಲ್ಹಾನ್ ಜಾಯ್ನಾಂವ್, ಹೆಂ ಚಿಂತಪ್ ಆಮಿ ಚಿಂತ್ಚಿ ತಶೆಂಚ್ ಪಾತ್ಯೆಂವ್ಚಿ ಭೋವ್ ಗರ್ಜ್ ಆಸಾ, ವೆವ್ಹಾರಾಕ್ ಆಮಿ ಕಸ್ಲೀಯ್ ಭಾಸ್ ವಾಪಾಯ್ ಕರುಯಾಂ ಪುಣ್ ಆಮ್ಚ್ಯಾ ಕೊಂಕ್ಣಿ ಕಾರ್‍ಯಾಂನಿ ಕೊಂಕ್ಣಿ ಭಾಶೆಚೊ ವಾಪಾಚ್ ಚಡವ್ಯಾಂ ಮ್ಹಣಾಲೊ’

ಹಾಜರ್ ಆಸ್‌ಲ್ಲ್ಯಾ ಸಮೇಸ್ತಾಂಕ್, ಎ.ಕೆ.ಎಸ್ ತರ್ಫೆನ್ ಕಾಫಿ ಫಳಾರಾಚೆ ವೆವಸ್ತಾ ಆಸ್ಲಿ, ಲಗ್ಬಗ್ ಸಾಟ್ ಲೋಕ್ ಹ್ಯಾ ಕಾರ್‍ಯಾಕ್ ಹಾಜರ್ ಆಸುನ್, ಕೊಂಕ್ಣಿ ಕವಿತೆಂಚ್ಯಾ ಮೊಗಾರ್ ಪಡ್ಲೊ.

- ಆಮ್ಚೊ ಭಾತ್ಮಿ

ಹೆರ್ ಸರ್ತೆಂಚೊ ವಿವರ್:
ಸರ್ವ್ ಫಿರ್ಗಜೆಂಚ್ಯಾ ಸರ್ತೆಂನಿ ಜಿಕೊನ್ ಆಯಿಲ್ಲ್ಯಾಂಕ್, ಮುಂಬಯ್ ಮಟ್ಟಾಚ್ಯಾ ದುಸ್ರ್ಯಾ ಹಂತಾಚೊ ಸ್ಪರ್ಧೊ:

ಅಕ್ತೋಬರ್ 1 (ಆಯ್ತಾರ್: ಸಕಾಳಿಂ 10:30 ): ಜೆರಿಮೆರಿ ಫಿರ್ಗಜ್ (ಮುಖೇಲ್‌ಪಣ್: ಕೊಂಕಣ್ ತಾರಾಂ)
- ಆಮ್ಚೊ ಭಾತ್ಮಿ