[ಖಬರ್] ಕಥಾಪಾಠ್ (ಅಂತರ್‌ರಾಷ್ಟ್ರೀಯ್ ವೆಬಿನಾರ್) ಶಿಂಕಳ್ - 5

ಕಥಾಪಾಠ್ (ಅಂತರ್‌ರಾಷ್ಟ್ರೀಯ್ ವೆಬಿನಾರ್) ಶಿಂಕಳ್ - 5. ’ಮೃಗ್‌ಜಳ್’ ಕಥಾ ಅಧ್ಯಯನಾಚಿಂ ಡಿಜಿಟಲ್ ಪುಸ್ತಕಾಂಚೆಂ ವಿಮೋಚನ್

ಆಶಾವಾದಿ ಪ್ರಕಾಶನಾನ್ 2005 ಇಸ್ವೆ ಥಾವ್ನ್ ಚಲವ್ನ್ ಆಯಿಲ್ಲೆಂ ಕಥೆಂಚೆರ್ ಅಧ್ಯಯನ್ ವೆಬಿನಾರ್, 2020 ಇಸ್ವೆಥಾವ್ನ್ ಅಂತರ್‌ರಾಷ್ಟ್ರೀಯ್ ವೆಬಿನಾರ್, ಆಶಾವಾದಿ ಪ್ರಕಾಶನ್ ಆನಿ ಧೆಂಪೆ ಕೊಲೆಜ್ ಗೊಂಯ್ ಹಾಂಚ್ಯಾ ಮುಖೇಲ್ಪಣಾಖಾಲ್ ಶ್ರೀ ಮಲ್ಲಿಕಾರ್ಜುನ ಕೊಲೆಜ್, ಫಾ.ಆಗ್ನೆಲ್ ಕೊಲೆಜ್ ಪಿಲಾರ್, ಕಾರ್ಮೆಲ್ ಕೊಲೆಜ್ ನುವೆಂ, ರೋಸರಿ ಕೊಲೆಜ್ ನಾವೆಲಿಂ, ಝೇವಿಯರ್ಸ್ ಕೊಲೆಕ್ ಮಾಪ್ಸಾ, ಸರ್ಕಾರಿ ಕೊಲೆಜ್ ಪೆರ್ಣೆಂ, ಕೊಲೆಜ್ ಆಫ್ ಆರ್ಟ್ಸ್ ದೆಳೆಂ, ಗೋವಾ ಕೊಲೆಜ್ ಆಫ್ ಆರ್ಟ್ಸ್ ಆಲ್ಟಿನ್ಹೊ ತಶೆಂಚ್ ದಲ್ಗಾದೊ ಕೊಂಕಣಿ ಅಕಾಡೆಮಿಚ್ಯಾ ಸಹಯೋಗಾಂತ್ ಕಥಾಪಾಠಾಚಿ ಪಾಂಚ್ವಿ ಶಿಂಕಳ್ 5 ಜುಲಾಯ್ ಥಾವ್ನ್ 10 ಅಗೋಸ್ತ್ ಪರ್ಯಾಂತ್ ಚಲ್ಲಿ. ಪಯ್ಣಾರಿ 2024 ವರ್ಸಾಚೊ ಕಥಾಕಾರ್ ’ಡೊ.ಎಡ್ವರ್ಡ್ ಎಲ್. ನಜ್ರೆತಾಚ್ಯೊ ಕಥಾ’ ಹ್ಯಾ ಶಿಂಕಳೆಂತ್ ಅಧ್ಯಯನಾಕ್ ವಿಂಚ್‌ಲ್ಲ್ಯೊ.

ಉಗ್ತಾವಣ್: ಕೊಂಕಣಿ ಕಥೆಂಚೆರ್ ಅಧ್ಯಯನಾಚಿ ಅಂತರ್‌ರಾಶ್ಟ್ರೀಯ್ ವೆಬಿನಾರ್ ಶಿಂಕಳ್ ಕಥಾಪಾಠ್ ಶಿಂಕಳ್ 5 ಉಗ್ತಾವಣ್

6 ಜುಲಾಯ್: ಆಶಾವಾದಿ ಪ್ರಕಾಶನ್ ಆನಿ ಧೆಂಪೆ ಕೊಲೆಜ್ ಗೊಂಯ್ ಹಾಣಿಂ ಶ್ರೀ ಮಲ್ಲಿಕಾರ್ಜುನ ಕೊಲೆಜ್ ಕಾಣಕೊಣ, ಫಾ.ಆಗ್ನೆಲ್ ಕೊಲೆಜ್ ಪಿಲಾರ್, ಕಾರ್ಮೆಲ್ ಕೊಲೆಜ್ ನುವೆಂ, ರೋಸರಿ ಕೊಲೆಜ್ ನಾವೆಲಿಮ್, ಸೈಂಟ್ ಝೇವಿಯರ್ಸ್ ಕೊಲೆಜ್ ಮಾಪ್ಸಾ, ಸರ್ಕಾರಿ ಕೊಲೆಜ್ ಪೆರ್ನೆಂ, ಕೊಲೆಜ್ ಆಫ್ ಆರ್ಟ್ಸ್ ಅಲ್ಟೀನ್ಹೊ ಆನಿ ದಾಲ್ಗಾದೊ ಕೊಂಕಣಿ ಅಕಾಡೆಮಿಚ್ಯಾ ಮಜತೆನ್ ಚಲಂವ್ಚ್ಯಾ ಕೊಂಕಣಿ ಕಥೆಚೆರ್ ಅಧ್ಯಯನಾಚಿ ’ಕಥಾಪಾಠ್ - ಪಾಂಚ್ವಿ ವೆಬಿನಾರ್ ಶಿಂಕಳೆಚೆಂ ಉಗ್ತಾವಣ್ ಸನ್ವಾರಾ 6 ಜುಲಾಯ್ 2024 ತಾರಿಕೆರ್ ದೆಂಪೆ ಕೊಲೆಜಿಚಿ ಪ್ರಿನ್ಸಿಪಾಲ್ ಡೊ.ಸ್ವಾತಿ ಪವಾರ್ ಹಿಣೆಂ ಕೆಲೆಂ. ಅಪ್ಲ್ಯಾ ಉಗ್ತಾವಣ್ ಉಲವ್ಪಾಂತ್ ಡೊ.ಪವಾರ್ ಮ್ಹಣಾಲಿ; ’ಕೊಂಕಣಿ ತಸಲ್ಯಾ ರಾಶ್ಟ್ರೀಯ್ ಭಾಸೆಂತ್ ಆಸ್ಚ್ಯೊ ಲಿಪಿಚ್ಯೊ ಬಂಧಡ್ಯೊ ಹ್ಯಾ ಡಿಜಿಟಲ್ ಮಾಧ್ಯಮಾನ್ ಕಾಡ್ನ್ ಉಡಯ್ಲ್ಯೊ ದೆಕುನ್ ಆಮ್ಕಾಂ ಸಮೆಸ್ತಾಂಕ್ ಕನ್ನಡ್ ಲಿಪಿಂತ್ ಆಸ್ಚ್ಯಾ ಅಪುರ್ಭಾಯೆಚ್ಯಾ ಕೊಂಕಣಿ ಕಥೆಂಚೆರ್ ಅಭ್ಯಾಸ್ ಕರುಂಕ್ ಏಕ್ ಸಂಧಿ ಕರುನ್ ದಿಂವ್ಚೆಂ ಹೆಂ ಭೋವ್ ಉಪ್ಕಾರಿ ಉಪಕ್ರಮ್, ತ್ಯಾ ಪಾಸತ್ ವಾವ್ರ್ ಕರ್ಪಿ ಸಮೆಸ್ತಾಂಚಿ ಥೊಕ್ಣಾಯ್ ಕೆಲಿ.

ಸೂತ್ರ್ ಸಂಚಾಲಕ್, ದೆಂಪೆ ಕೊಲೆಜಿಚಿ ಪ್ರಾಧ್ಯಾಪಕಿ ಬಾಯ್ ವಿಧಿತಾ ಶೇಟ್ ಹಿಣೆಂ ವೆಬಿನಾರಾಚಿ ಸುರ್ವಾತೆರ್ ಆಯ್ಲೆವಾರ್ ಸರ್‌ಲ್ಲ್ಯಾ ಕೊಂಕಣಿ ಕಥಾಕಾರ್ ಪಂಚು ಬಂಟ್ವಾಳಾಚ್ಯಾ ಅತ್ಮ್ಯಾಕ್ ಶಾಂತಿ ಮಾಗೊನ್ ಏಕ್ ಮಿನುಟಾಚೆಂ ಮೌನ್ ಪ್ರಾರ್ಥನಾಂತ್ ಸುರ್ವಾತ್ ಕರ್ತಚ್ ದೆಂಪೆ ಕೊಲೆಜಿಚಿ ಕೊಂಕಣಿ ವಿಭಾಗಾಚಿ ಮುಖೆಸ್ತ್ ಬಾಯ್ ಡೊ.ಅಂಜು ಸಾಖರ್‌ದಾಂಡೆನ್ ಸರ್ವ್ ಮಾನೆಸ್ತಾಂಚಿ ಒಳೊಕ್ ಕರುನ್ ಆಶಾವಾದಿ ಪ್ರಕಾಶನ್ ಆನಿ ದೆಂಫೆ ಕೊಲೆಜಿಚ್ಯಾ MOU ವಿಶಿಂ ತಶೆಂಚ್ ಪಾಟ್ಲ್ಯಾ ದೇಡ್ ವರ್ಸಾಂನಿ ಚಲ್‌ಲ್ಲ್ಯಾ ವಾವ್ರಾವಿಶಿಂ ಮೊಟ್ವೊ ವಿವರ್ ದಿಲೊ.

ಪ್ರಸ್ತಾವಿಕ್ ಉಲವ್ಪಿ ಮಾನೆಸ್ತ್ ಬಾಲಾಜಿ ಸುತಾರ್ (ನಾಮ್ನೆಚೊ ಮರಾಠಿ ಕಥಾಕಾರ್) ಹಾಣೆಂ ಕೊಂಕಣಿ ತಸಲಿ ಭಾಸ್ ಇತ್ಲಿ ಸೊಭಿತ್ ಆನಿ ಇತ್ಲಿ ಮುಕಾರ್ ಪಾವ್‌ಲ್ಲಿ ಗಜಾಲ್ ಭೋವ್ ಸಂತೊಸಾಚಿ. ಮನಿಸ್ ಕಾಳಾಥಾವ್ನ್ ಅಭಿವ್ಯಕ್ತ್ ಕರುನ್ ಜಿಯೆವ್ನ್ ಆಯ್ಲಾ, ಜಾಂವ್ ತೆಂ ಮೌಕಿಕ್ ಆನಿ ಉಪ್ರಾಂತ್ ಲಿಖಿತ್, ಆನಿ ಹ್ಯಾ ಕಾಳಾರ್ ಮನಿಸ್ ಅಪ್ಲೊ ಆವಾಜ್ ಸಯ್ತ್ ಹ್ಯಾ ಸಾಹಿತ್ಯಾಸವೆಂ ಜೊಗಾವ್ನ್ ದವರುಂಕ್ ಸಕ್ತಾ. ಖಿಣಾನ್ ಪಾಂತ್ರಿಕ್ ಪ್ರಗತಿ ಜೊಡ್ಚ್ಯಾ ಹ್ಯಾ ಆಧುನಿಕ್ ಕಾಳಾರ್ ಸಯ್ತ್ ಆಮಿ ಸಾಹಿತ್ಯಾಂತ್ ಪಾಟಿಂ ಉರೊಂಕ್ ನ್ಹಜೊ ಮ್ಹಳ್ಳ್ಯಾ ಇರಾದ್ಯಾನ್ ಅಸಲಿಂ ಅಧ್ಯಯನಾಂ ಖೂಪ್ ಮಹತ್ವಾಚಿಂ ಮ್ಹಣಾಲೊ.

ಮಂಗ್ಳುರ್ ಯುನಿವರ್ಸಿಟಿಚ್ಯಾ ಕೊಂಕಣಿ ಆಧ್ಯಯನ್ ಪೀಠಚೊ ಸಂಯೋಜಕ್ ಡೊ.ಜಯವಂತ ನಾಯ್ಕಾನ್ ಕೊಂಖಣಿಕ್ ಡಿಜಿಟಲ್ ಮಾಧ್ಯಮಾಕ್ ವರುನ್ ತಶೆಂಚ್ ಡಿಜಿಟಲ್ ಮಾಧ್ಯಮಾಂನಿ ಕೊಂಕಣಿ ವಾಡೊಂಕ್ ಮಿನತ್ ಕರ್ಚ್ಯಾ ಆಶಾವಾದಿ ಪ್ರಕಾಶನಾಚಿ ಥೊಕ್ಣಾಯ್ ಕೆಲಿ. ಮುಖೆಲ್ ಸಯ್ರೊ ಜಾವ್ನ್ ಹಾಜರ್ ಆಸ್ಲೊ ಪಯ್ಣಾರಿ ೨೦೨೪ ವರ್ಸಾಚೊ ಕವಿ ಬಾಬ್ ಪ್ರಕಾಶ್ ದ ನಾಯ್ಕಾನ್ ಕೊಂಕಣಿ ಚಳ್ವಳೆಚಿ ಗರ್ಜ್ ಆಮ್ಕಾಂ ಕಿತ್ಯಾಖ್ ಪಡ್ಲಿ ಆನಿ ಕೊಂಕಣೀ ರಾಜ್ಯ್‌ಭಾಸ್ ಜಾತಚ್ ಆಮ್ಚಿ ಜವಾಭ್ದಾರಿ ಸಂಪೊಂಕ್ ನಾ, ಬಗಾರ್ ಚಡ್ಲಿ, ದೆಕುನ್ ತ್ಯಾ ದಿಶೆನ್ ಆಮಿ ಸಮೆಸ್ತಾಂನಿ ಎಕಾ ಮನಾನ್ ವಾವ್ರ್ ಕರ್ಚಿ ಗರ್ಜ್ ಆಸಾ ಮ್ಹಣಾಲೊ. ಡೊ.ಆಸ್ಟಿನ್ ಪ್ರಭುನ್ ಅಪ್ಲ್ಯಾ ಉಲವ್ಪಾಂತ್ ಕಥಾಪಾಠ್ ಪಯ್ಲ್ಯಾ ಶಿಂಕಳೆಥಾವ್ನ್ ಹಾಂವ್ ಸರಾಗ್ ಭಾಗ್ ಘೆವ್ನ್ ಆಯ್ಲಾಂ ಆನಿ ಹಿಮ್ ಅಧ್ಯಯನಾಂ ಕಸಲ್ಯಾಚ್ ಬಂಧಡೆವಿಣೆಂ ಫಕತ್ ಕೊಂಕಣಿಚ್ಯಾ ಗ್ರೇಸ್ತ್ ಸಾಹಿತ್ಯಾಚಿ ಒಳೊಕ್ ಕರುನ್ ದಿತಾತ್ ಆನಿ ವಿಧ್ಯಾರ್ಥಿಂ ಹ್ಯಾ ವೆಬಿನಾರಾಂಚೊ ಫಾಯ್ದೊ ಜೊಡುಂಕ್ ಸಕೊಂದಿ ಮ್ಹಣಾಲೊ. ದೆಂಪೆ ಕೊಲೆಜಿಚಿ ನವೊ ಪ್ರಿನ್ಸಿಪಾಲ್ ಡೊ.ರಾಮು ಮೂರ್ತಿ ಅಪ್ಲ್ಯಾ ಉಲವ್ಪಾಂತ್ ’ಕೊಂಕಣಿ ಸಮಗ್ರ್ ಸಾಹಿತ್ಯಾಚಿ ಒಳೊಕ್ ತಶೆಂಚ್ ತ್ಯಾ ಸಾಹಿತ್ಯಾಕ್ ಲಿಪಿ-ಬೊಲಿಂ ಮಧೆಂ ಎಕಾಂಎಕಾ ಪಾವಂವ್ಚೆಂ ಡಿಜಿಟಲ್ ಸಾಧನ್ ಖರೆಂಚ್ ಥೊಕ್ಣಾಯೆಚೆಂ, ಹ್ಯಾ ದಿಶೆನ್ ವಾವ್ರ್ ಕರ್ಪಿ ಸಮೆಸ್ತಾಂಕ್ ಉಲ್ಲಾಸ್ ಮ್ಹಣಾಲೊ.

ಡೊ.ಎಡ್ವರ್ಡ್ ಎಲ್ ನಜ್ರೆತಾನ್, ಏಕ್ ಕಥಾಕಾರ್ ಜಾವ್ನ್ ಅಪ್ಣಾಕ್ ಅಪ್ಣಾಚ್ಯೊ ಕಥಾ ಚಡ್ ಲೊಕಾಂಕ್ ಪಾವ್ಲ್ಯಾರ್ ಆನಿ ತಾಂಚಿ ಅಭಿಪ್ರಾಯ್ ಕಳ್ಳ್ಯಾರ್ ತೊಚ್ ಭೋವ್ ವ್ಹಡ್ ಪುರಸ್ಕಾರ್. ದೆಕುನ್ ಹ್ಯಾ ಪಾಶತ್ ಆಶಾವಾದಿ ಪ್ರಕಾಶನ್ ಆನಿ ಸಮೇಸ್ತ್ ಕೊಲೆಜಿಚ್ಯಾ ಕಾರ್ಭಾರಿಂಕ್ ಧಿನ್ವಾಸ್ ಪಾಠಯ್ಲೆ. ಬಾಬ್ ಶೈಲೇಂದ್ರ ಮೆಹ್ತಾನ್ ಧಿನ್ವಾಸ್ ಪಾಠಯ್ಲೆ,

ವೆಬಿನಾರ್ - 2: ಜುಲಾಯ್ 13 ತಾರಿಕೆರ್ ಚಲ್‌ಲ್ಲ್ಯಾ ದುಸ್ರ್ಯಾ ವೆಬಿನಾರಾಂತ್ ದೋನ್ ಪ್ರಪತ್ರಾಂ ಸಾದರ್ ಜಾಲಿಂ.

ಪಯ್ಲೆಂ ಪ್ರಪತ್ರ್ ಶೈಲೇಂದ್ರ ಮೆಹ್ತಾನ್ ಸಾದಾರ್ ಕೆಲೆಂ: ’ಡೊ.ಎಡ್ವರ್ಡ್ ಎಲ್ ನಜ್ರೆತಾಚ್ಯಾ ಕಥೆಂತ್ಲಿಂ ಮನ್ಶಾ ಮೌಲ್ಯಾಂ’
ದುಸ್ರೆಂ ಪ್ರಪತ್ರ್ ಲವಿ ಗಂಜಿಮಠನ್ ಸಾದಾರ್ ಕೆಲೆಂ: ’ಡೊ.ಎಡ್ವರ್ಡ್ ಎಲ್ ನಜ್ರೆತಾಚ್ಯಾ ಕಥೆಂತ್ಲಿಂ ಸ್ತ್ರೀಯಾಂಚಿಂ (ಅಸ್ತುರೆಚಿಂ) ವೆಗ್-ವೆಗಳಿ ರುಪಾಂ’
ಗೌರಂಗ್ ಭಾಂದ್ಯೆನ್ ಹ್ಯಾ ವೆಬಿನಾರಾಚೆಂ ಸೂತ್ರ್ ಸಂಚಾಲನ್ ಕೆಲೆಂ.

ವೆಬಿನಾರ್ - 3: ಜುಲಾಯ್ 20 ತಾರಿಕೆರ್ ಚಲ್‌ಲ್ಲ್ಯಾ ದುಸ್ರ್ಯಾ ವೆಬಿನಾರಾಂತ್ ದೋನ್ ಪ್ರಪತ್ರಾಂ ಸಾದರ್ ಜಾಲಿಂ.

ಪಯ್ಲೆಂ ಪ್ರಪತ್ರ್ ಮಾನ್ಸಿ ಧಾವುಸ್ಕಾರಾನ್ ಸಾದಾರ್ ಕೆಲೆಂ: ’ಡೊ.ಎಡ್ವರ್ಡ್ ಎಲ್ ನಜ್ರೆತಾಚ್ಯಾ ಕಥೆಂತ್ಲಿಂ ಸಾಮಾಜಿಕ್ ಮೌಲ್ಯಾಂ’
ದುಸ್ರೆಂ ಪ್ರಪತ್ರ್ ಡೊ.ರೇಶ್ಮಾ ಖೊಲ್ಕಾರಾನ್ ಸಾದಾರ್ ಕೆಲೆಂ: ’ಡೊ.ಎಡ್ವರ್ಡ್ ಎಲ್ ನಜ್ರೆತಾಚ್ಯಾ ಕಥೆಂತ್ಲಿಂ ಸಂಬಂಧ್ (ನಾತಿಂ)’
ದೀಪಾ ರಾಯ್ಕಾರಾನ್ ಹ್ಯಾ ವೆಬಿನಾರಾಚೆಂ ಸೂತ್ರ್ ಸಂಚಾಲನ್ ಕೆಲೆಂ.

ವೆಬಿನಾರ್ - 4: ಅಗೋಸ್ತ್ 3 ತಾರಿಕೆರ್ ಚಲ್‌ಲ್ಲ್ಯಾ ದುಸ್ರ್ಯಾ ವೆಬಿನಾರಾಂತ್ ದೋನ್ ಪ್ರಪತ್ರಾಂ ಸಾದರ್ ಜಾಲಿಂ.

ಪಯ್ಲೆಂ ಪ್ರಪತ್ರ್ ಮೆಗಾನ್ ಡೆ ಸೋಜಾನ್ ಸಾದಾರ್ ಕೆಲೆಂ: ’ಡೊ.ಎಡ್ವರ್ಡ್ ಎಲ್ ನಜ್ರೆತಾಚ್ಯಾ ಕಥೆಂತ್ ಧರ್ಮ್ ಆನಿ ಸಮಾಜ್’
ದುಸ್ರೆಂ ಪ್ರಪತ್ರ್ ರಿಯಾ ವೆರೊನಿಕಾನ್ ಸಾದಾರ್ ಕೆಲೆಂ: ’ಡೊ.ಎಡ್ವರ್ಡ್ ಎಲ್ ನಜ್ರೆತಾಚ್ಯಾ ಕಥೆಚೆರ್ ಏಕ್ ಜೆರಾಲ್ ಅಭ್ಯಾಸ್’
ಡೊ.ಜೂಡಿ ಪಿಂಟೊ ಹ್ಯಾ ವೆಬಿನಾರಾಚಿ ಸಂಚಾಲಕಿ ಜಾವ್ನಾಸುನ್, ಸಾದಾರ್ ಜಾಲ್ಲ್ಯಾ ಪ್ರಪತ್ರಾಂಚೆರ್ ಉಲಯ್ಲಿ.
ವಿಧಿತಾ ಶೇಟ್ ಹಿಣೆಂ ಹ್ಯಾ ವೆಬಿನಾರಾಚೆಂ ಸೂತ್ರ್ ಸಂಚಾಲನ್ ಕೆಲೆಂ.

ವೆಬಿನಾರ್ - 5: (ನಿರೋಪ್ ವೆಬಿನಾರ್) ಅಗೋಸ್ತ್ 10 ತಾರಿಕೆರ್ ಚಲ್ಲೆಂ. ಸೂತ್ರ್ ಸಂಚಾಲಕ್ ಶೈಲೇಂದ್ರ ಮೆಹ್ತಾನ್ ಪರಿಚಯಾತ್ಮಕ್ ಉಲವ್ಪ್ ಕರುನ್ ಮ್ಹಣಾಲೊ; ಕೊಂಕಣಿ ಭಾಸ್ ಏಕ್, ಜಾಂವ್ ಹಾಂತುಂ ಕಿತ್ಲ್ಯೊ ಲಿಪಿ,ಬೊಲಿ,ಧರ್ಮ್,ಜಾತಿ ಆಸುಂ, ಪುಣ್ ಎಕಾ ಮನಾಂತ್ ಕರ್ಚ್ಯಾ ವಾವ್ರಾಕ್ ಡಿಜಿಟಲ್ ಮಾಧ್ಯಮ್ ಏಕ್ ಬರೊಚ್ ಉಪಕ್ರಮ್ ಘಡುನ್ ದಿತಾ ದೆಕುನ್ ಆಮ್ಚೆಂ ಅಶೆಂಚ್ ಮಿಸಾಂ ಫುಡೆಂ ವೆತೆಲೆಂ ಮ್ಹಣಾಲೊ.

ಬಾಯ್ ಅಂಜು ಸಾಖರ್‌ದಾಂಡೆನ್ ಯೆವ್ಕಾರಾಚೆಂ ಉಲವ್ಪ್ ಕೆಲೆಂ. ಡೊ.ಪೂರ್ಣಾನಂದ ಚ್ಯಾರಿನ್ ಕಥಾಪಾಠ್ ಮಿಸಾಂವಾಚ್ಯಾ ಉರ್ವಾತೆರ್ ಥಾವ್ನ್ ಆಜ್ ಮೆರೆನ್ ಆಶಾವಾದಿ ಪ್ರಕಾಶನಾನ್ ವೆಗ್-ವೆಗಳ್ಯಾ ದೆಶಾಂನಿ, ಪ್ರಾಂತ್ಯಾಂನಿ ಮುಖೆಲ್ಪಣ್ ಚಲವ್ನ್ ಕೆಲ್ಲ್ಯಾ ಆನಿ ಆತಾಂ ಡಿಜಿಟಲ್ ಆಧ್ಯಮಾಂತ್ ಖಳ್ಮಿತ್ ನಾಸ್ತಾಂ ಕರುನ್ ಆಯಿಲ್ಲ್ಯಾ ವಾವ್ರಾಚಿ ಥೋಕ್ಣಾಯ್ ಕೆಲಿ. ತಶೆಂಚ್ ಡಿಜಿಟಲ್ ಇ-ಪುಸ್ತಕಾಂ, ಡಿಜಿಟಲ್ ಆಡಿಯೊ ಪುಸ್ತಕಾಂಚಿ ಒಳೊಕ್ ಕರುನ್ ಮ್ಹಣಾಲೊ; 2005 ಥಾವ್ನ್ ಆಜ್ ಪರ್ಯಾಂತ್ ೪೨ ಡಿಜಿಟಲ್ ಇ-ಪುಸ್ತಕಾಂ, ಆನಿ 2018 ಥಾವ್ನ್ ಆಜ್ ಪರ್ಯಾಂತ್ 175 ಕೊಂಕಣಿ ಕಥಾ ಯೂಟ್ಯೂಬಾಂತ್ಲ್ಯಾ ಆಶಾವಾದಿ ಪ್ರಕಾಶನ್ ಚ್ಯಾನಲಾಂತ್ ಪ್ರಸಾರ್ ಕರ್ಚ್ಯಾ ಪಾಟ್ಲ್ಯಾನ್ ಖಳ್ಮಿತ್ ನಾಸ್ಚೊ ವಾವ್ರ್ ಕೆಲ್ಲ್ಯಾ ಆಶಾವಾದಿ ಪ್ರಕಾಶನಾಸವೆಂ ಕೊಂಕಣಿ ಸಾಹಿತ್ಯಾಚೆರ್ ಆಧ್ಯಯನ್ ಚಲಂವ್ಚ್ಯಾ ಇರಾದ್ಯಾನ್ 2018 ಇಸ್ವೆಂತ್ ಶ್ರೀ ಮಲ್ಲಿಕಾರ್ಜುನ ಕೊಲೆಜಿನ್ ಆಶಾವಾದಿ ಪ್ರಕಾಶನಾಸವೆಂ ಪಯ್ಲೆಂ MOU (Memorandum of Understanding) ಕರುನ್ ಕೊಂಕಣಿ ಸಾಹಿತ್ಯ್, ಕಥಾ-ಕವಿತಾ, ಪತ್ರಿಕುಧ್ಯಮಾಚೆರ್ ಸಭಾರ್ ಕಾರ್ಯಿಂ ತಶೆಂಚ್ ಸೆಮಿನಾರ್ ಮಾಂಡುನ್ ಹಾಡುಂಕ್ ಸಕ್ಲೆಂ. ತ್ಯೇ ಉಪ್ರಾಂತ್ 2022 ಇಸ್ವೆಂತ್ ಧೆಂಪೆ ಕೊಲೆಜಿನ್ ಆಶಾವಾದಿ ಪ್ರಕಾಶನಾಸವೆಂ MOU (Memorandum of Understanding) ಕೆಲೆಂ. ಆನಿ ಆತಾಂ ಕಾಂಯ್ ಗೊಂಯ್ಚ್ಯಾ ಇಕ್ರಾ ಕೊಲೆಜಿಚಿಂ ಕೊಂಕಣಿ ಭುರ್ಗಿಂ ಹ್ಯಾ ವೆಬಿನಾರಾಂಚೊ ಫಾಯ್ದೊ ಜೊಡ್ತಾತ್ ತಿ ಕೊಂಕಣಿಚ್ಯಾ ಫುಡಾರಾಕ್ ಏಕ್ ಬರಿ ಗಜಾಲ್ ಮ್ಹಣಾಲೊ.

ಗೊಂಯ್ಚ್ಯಾ ವಿಧ್ಯಾಪಿಠಾಚಿ ಆಧ್ಲಿ ಕೊಂಕಣಿ ವಿಭಾಗಾಚಿ ಮುಖೆಸ್ತ್ ಡೊ.ಚಂದ್ರಲೇಖ ಡಿಸೋಜಾನ್ ಕಥಾಪಾಠಾಚಿ ಗರ್ಜ್ ಕಿತ್ಯಾಕ್ ಮ್ಹಳ್ಳ್ಯಾ ವಿಶ್ಯಾಚೆರ್ ಉಲವ್ಪ್ ಕೆಲೆಂ. ಕೊಂಕಣಿ ಸಾಹಿತ್ಯಾಕ್ ಜೆರಾಲ್ ನದ್ರೆನ್ ಪಳೆಲೆಂ ತರ್ ಕನ್ನಡ್ ಆನಿ ರೋಮಿ ಲಿಪಿಯೆಂನಿ ಉತ್ಕೃಶ್ಟ್ ಸಾಹಿತ್ಯ್ ಆಸಾ ಆನಿ ಅಸಲೆಂ ಸಾಹಿತ್ಯ್ ಲಿಪ್ಯಂತರ್ ಜಾಲೆಂ ತರ್ ತೆಂ ಲಿಪಿಚ್ಯೊ ಗಡಿ ಉತ್ರೊನ್ ಹೆರ್ ಲಿಪಿಚ್ಯಾ ವಾಚ್ಪ್ಯಾಂಕ್ ಪಾವ್ತಾ. ಆನಿ ಕಥಾಪಾಠ್ ತಸಲಿಂ ಅಧ್ಯಯನಾಂ ಜಾಲಿಂ ತರ್, ತ್ಯಾ ಸಾಹಿತ್ಯಾಚ್ಯಾ ಗ್ರೆಸ್ತ್‌ಕಾಯೆಚಿ ಒಳೊಕ್ ಹೆರಾಂಕ್ ಮೆಳ್ತಾ. ಡಿಜಿಟಲ್ ವೆಬಿನಾರಾಂನಿ ಕಥಾಪಾಠಾಚ್ಯಾ ಸುರ್ವಾತೆರ್ ಥಾವ್ನ್ ಹಾಂವ್ ಹಾಜರ್ ಜಾವ್ನ್ ಆಯ್ಲ್ಯಾಂ ದೆಕುನ್ ಕಥಾಪಾಠಾಂತ್ ಸಾದರ್ ಜಾಂವ್ಚಿಂ ಪ್ರಪತ್ರಾಂ ಸಯ್ತ್ ಗುಣ್‌ಮಟ್ಟಾಚಿಂ ಮ್ಹಣಾಲಿ.

ಡೊ.ರೇಶ್ಮಾ ಅಮಿತ್ ಖೊಲ್ಕಾರಾನ್ ಡೊ.ಎಡ್ವರ್ಡ್ ಎಲ್. ನಜ್ರೆತಾಚ್ಯಾ ಎಕೆಕಾ ಕಥೆಂಚೆರ್ ಅಭ್ಯಾಸ್ ಕರ್ಚೊ ಏಕ್ ಬರೊಚ್ ಅನ್ಭೋಗ್, ಆನಿ ಹ್ಯಾ ಕಥೆಂನಿ ಆಸ್ಚ್ಯಾ ಸಾದ್ಯಾ ಮನ್ಶಾಚೆಂ ಚಿತ್ರಣ್,ಜಿವಿತ್ ಆನಿ ಮಾನವೀಯ್ ಮೌಲ್ಯಾಂ ಖರಿಂಚ್ ಆಮಿ ಜಿಯೆಲ್ಲ್ಯಾ ಸಮಾಜೆಚೆಂ ಖರೆಂ ದರ್ಶನ್ ದಿತಾ ಅಶೆಂ ಮ್ಹಣಾಲಿ.

ಬಾಬ್ ಇಸಿದೊರ್ ದಾಂತಾಸಾನ್ ಕೊಂಕಣಿ ಸಾಹಿತ್ಯ್, ಪ್ರತ್ಯೇಕ್ ಜಾವ್ನ್ ರೋಮಿ ಲಿಪಿಂತ್ ಸುರ್ವಾತ್ ಜಾಲ್ಲ್ಯಾ ಪತ್ರಿಕುಧ್ಯಮಾವಿಶಿಂ ಉಲವ್ನ್ ಆಜ್ ಆಮ್ಚೆಸಮೊರ್ ಆಸ್ಚ್ಯಾ ವೆಗ್-ವೆಗಳ್ಯಾ ಶರ್ಥಾಂಚೆರ್ ಮೊಟ್ವ್ಯಾನ್ ಉಲವ್ಪ್ ಕೆಲೆಂ.

ಡೊ. ಎಡ್ವರ್ಡ್ ಎಲ್. ನಜ್ರೆತಾಚ್ಯಾ ವೀಸ್ ಕಥೆಂಚೆಂ ತಶೆಂಚ್ ಸ ಪ್ರಪತ್ರಾಚೆಂ ಡಿಜಿಟಲ್ ಪುಸ್ತಕ್ (ನಾಗರಿ ಲಿಪಿಚೆಂ) ’ಮೃಗ್‌ಜಳ್’ ಡಿಜಿಟಲ್ ವಿಮೋಚನ್ ಕರುನ್ ಅಪ್ಲ್ಯಾ ಉಲವ್ಪಾಂತ್ ಗೊಂಯ್ ಕೊಂಕಣಿ ಅಕಾಡೆಮಿಚೆಂ ಸಾಹಿತ್ಯಿಕ್ ಜರ್ನಲ್ ’ಅನನ್ಯ’ಚಿ ಸ್ಥಾಪಕ್ ಸಂಪಾದಕ್ ಡೊ.ಜಯಂತಿ ನಾಯ್ಕಾನ್ ಅಪ್ಲ್ಯಾ ಉಲವ್ಪಾಂತ್ ವೆಗ್-ವೆಗಳ್ಯಾ ವಠಾರಾಂತ್ಲ್ಯೊ ಕೊಂಕಣಿಂತ್ಲ್ಯೊ ಕಾಣಿಯೊ ಕಶ್ಯೊ ಆಮ್ಕಾಂ ಕೊಂಕಣಿಂತ್ ಆಸ್ಚ್ಯಾ ಗ್ರೇಸ್ತ್ ಸಾಹಿತ್ಯಾಚಿ ಗವಾಯ್ ದಿತಾ, ಆನಿ ಹ್ಯಾ ದಿಶೆನ್ ಲಿಪ್ಯಂತರ್ ಜಾವ್ಪಾಚಿ ಖೂಪ್ ಗರ್ಜ್ ಆಸಾ ಮ್ಹಣಾಲಿ.

ಡೊ. ಎಡ್ವರ್ಡ್ ಎಲ್. ನಜ್ರೆತಾಚ್ಯಾ ವೀಸ್ ಕಥೆಂಚೆಂ ತಶೆಂಚ್ ಸ ಪ್ರಪತ್ರಾಚೆಂ ಡಿಜಿಟಲ್ ಪುಸ್ತಕ್ (ಕನ್ನಡ ಲಿಪಿಚೆಂ) ’ಮೃಗ್‌ಜಳ್’ ಡಿಜಿಟಲ್ ವಿಮೋಚನ್ ಕರುನ್ ಅಪ್ಲ್ಯಾ ಉಲವ್ಪಾಂತ್ ಸ್ಟೀಫನ್ ಮಸ್ಕರೇನ್ಹಸಾನ್ ’ಜಶೆಂ ವಲ್ಲಿ ಕ್ವಾಡ್ರಸಾಚ್ಯಾ ಪ್ರಸ್ತಾವನಾಂತ್’ ಬರಯಿಲ್ಲೆಪರಿಂ ದೋನ್ ವರ್ಗಾಚೊ ಲೋಕ್ ಕೊಂಕಣಿಂತ್ ಆಸಾ. ಡೊ.ಎಡ್ವರ್ಡ್ ಎಲ್. ನಜ್ರೆತ್, ವಲ್ಲಿ ಕ್ವಾಡ್ರಸ್ ದುಸ್ರ್ಯಾ ಪ್ರಕಾರಾಚೆ ಮ್ಹಣ್ಚ್ಯಾಂತ್ ಕಸಲೊಚ್ ದುಭಾವ್ ನಾ. ಪುಣ್ ಹಾಂವ್ ಪಯ್ಲ್ಯಾ ಪ್ರಕಾರಾಚೊ. ಹಾಂವ್ ದುಡು ದಿಲ್ಲೆಶಿವಾಯ್ ಬರಯ್ನಾ ಅಶೆಂ ಮ್ಹಣಾಲೊ.

ಡೊ.ಎಡ್ವರ್ಡ್ ಎಲ್. ನಜ್ರೆತ್ ಅಪ್ಲ್ಯಾ ಉಲವ್ಪಾಂತ್ ’ಅಜೀಕ್ ಪನ್ನಾಸ್ ವರ್ಸಾಧಿಂ, ಹಾಂವ್ ಏಕ್ ಕಥಾಕಾರ್ ಜಾವ್ನ್ ಉದೆಲ್ಲೊಂ, ಪುಣ್ ಹ್ಯಾ ಪನ್ನಾಸ್ ವರ್ಸಾಂನಿ ಕೆದಿಂಚ್, ಎಕಾ ದಿಸಾ ಮ್ಹಜ್ಯೊ ಕಥಾ ಅಧ್ಯಯನಾಕ್ ಘೆತಲಿಂ, ಆನಿ ತಾಂಚೆರ್ ಪ್ರಪತ್ರಾಂ ಸಾಡರ್ ಜಾತಲಿಂ ಮ್ಹಣುನ್ ಚಿಂತುಂಕ್ ನಾ ವಾ ತ್ಯಾ ಇರಾದ್ಯಾನ್ ಹಾಂವೆಂ ಬರಯಿಲ್ಲೆಂ ಸಯ್ತ್ ನಾ. ಪುಣ್ ಹ್ಯಾ ಪಾಸತ್ ಮಿನತ್ ಕೆಲ್ಲ್ಯಾ ಸಮೆಸ್ತಾಂಕ್ ಹಾಂವ್ ಧಿನ್ವಾಸ್ ಪಾಠಯ್ತಾಂ. ಪ್ರತ್ಯೇಕ್ ಜಾವ್ನ್ ಮ್ಹಜ್ಯೊ ಕಥಾ ಡಿಜಿಟಲ್ ಆಡಿಯೊ ಪುಸ್ತಕ್ ತಶೆಂಚ್ ಇ-ಪುಸ್ತಕಾರುಪಾರ್ ಹಾಡ್‌ಲ್ಲ್ಯಾ ಆಶಾವಾದಿ ಪ್ರಕಾಶನಾಕ್ ಮ್ಹಜೆ ಧಿನ್ವಾಸ್’ ಮ್ಹಣಾಲೊ.

ಡೊ.ಆಸ್ಟಿನ್ ಡಿಸೋಜ್ ಪ್ರಬುನ್ ಫ್ರೆಡ್ರಿಕ್ ಕ್ವಾಡ್ರಸ್ ಸ್ಮಾರಕ್ ಆಶಾವಾದಿ ಪ್ರಕಾಶನಾಚೆ ಡಿಜಿಟಲ್ ಪುರಸ್ಕಾರ್ ಜಿಕ್ಪ್ಯಾಂಚಿಂ ನಾಂವಾಂ ಘೋಷಣ್ ಕೆಲಿಂ, ಕಥಾಪಾಠ್ ಪಾಂಚ್ಯಾ ಶಿಂಕಳೆಂತ್ ಸಾದರ್ ಜಾಲ್ಲ್ಯಾ ಸ ಪ್ರಪತ್ರಾಂಕ್ ಇನಾಮಾಂ ಫಾವೊ ಜಾಲಿಂ.

ವಲ್ಲಿ ಕ್ವಾಡ್ರಸಾನ್ ಮಥಾಯಸ್ ಕುಟಮ್ ಡಬ್ಲಿನ್ ಪ್ರಾಯೋಜಕ್‌ಪಣಾಚಿಂ (ಡಿಜಿಟಲ್ ಆಡಿಯೊ ಪುಸ್ತಕಾಚೆರ್ ಕಥಾ ಸಾದರೀಕರಣಾಚಿಂ) ಇನಾಮಾಂ ಘೋಷಿತ್ ಕೆಲಿಂ. ಪಯ್ಲೆಂ ಇನಾಮ್: ಶಾಂತಿ ನೊರೊನ್ಹಾ ಬಾಹ್ರೇಯ್ನ್, ದುಸ್ರೆಂ ಇನಾಮ್: ಪ್ರೀತಾ ಮಿರಾಂದಾ, ತಿಸ್ರೆಂ ಇನಾಮ್: ಲವಿ ಗಂಜಿಮಠ ಆನಿ ಲಿನೆಟ್ ಡಿಸೋಜಾಕ್. ಹೆರ್ ಚ್ಯಾರಾಂಕ್ ಹುಮೆದಿಚಿಂ ಇನಾಮಾಂ ಫಾವೊ ಜಾಲಿಂ.

ವಲ್ಲಿ ಕ್ವಾಡ್ರಸಾನ್ ಧಿನ್ವಾಸ್ ಉಲವ್ಪ್ ಕೆಲೆಂ. ಶೈಲೇಂದ್ರ ಮೆಹ್ತಾನ್ ಸೂತ್ರ್ ಸಂಚಾಲನ್ ಕೆಲೆಂ.

ಮೃಗ್‌ಜಳ್ - ಡಿಜಿಟಲ್ ಇ-ಪುಸ್ತಕ್ (ಕನ್ನಡ ಲಿಪಿಯೆಂತ್)

[खबर] कथापाठ (अंतर‌राषट्रीय वेबिनार) शिंकळ - ५.

 

KOTHPATTH (Ontor‌raxttri-i Webinar) xinkoll - 5.

’MRIGZOLL’ Kotha odhyoinachim digital pustokanchem vimochon

Ashawadi Prakashan 2005 isve thaun choloun ayil'lem kothencher odhyoin webinar, 2020 isvethaun ontor‌raxttri-i webinar, Ashawadi Prakashan ani Dhempe College Gõy hanchea mukhelponnakhal Shree Mallikarjuna College, Fr.AgnL College Pilar, CarmL College Nuvem, Rosary College Navelim, Xaviers College Mapsa, Govt College Pernem, College af Arts Dellem, Gõy College af Arts Altinho toxench Dalgado Konknni Akademichea sohoyogant Kothapatthachi panchvi xinkoll 6 July thaun 10 August poreant chol'li. Poinnari 2024 vorsacho kothakar ’Dr.Edward L Nazrethacheo kotha’ hea xinkollent odhyoinak vinch‌l'leo.

Ugtaunn: Konknni kothencher odhyoinachi ontor‌raxttri-i webinar xinkoll Kothapatth xinkoll 5 ugtaunn

6 July: Ashawadi Prakashan ani Dhempe College Gõy hannim Shree Mallikarjuna College Cancona, Fr.Agnel College Pilar, CarmL College Nuvem, Rosary College Navelim', St. Xaviers College Mapsa, Govt College pernem, College af Arts olttinho ani dalgado Konknni Akademichea mozoten cholomvchea Konknni kothecher odhyoinachi ’Kothapatth - panchvi webinar xinkollechem ugtaunn sonvara 6 July 2024 tariker Dhempe Collegichi prinsipal Dr.Swathi Pawar hinnem kelem. Oplea ugtaunn uloupant Dr.Pawar mhonnali; ’Konknni tosolea raxttri-i bhasent ascheo lipicheo bondhoDeo hea digital madhyoman kaddn uddoileo dekun amkam somestank kon'nodd lipint aschea opurbhayechea Konknni kothencher obheas korunk ek sondhi korun dimvchem hem bhovo upkari upokrom', tea pasot vaur korpi somestanchi thoknnai keli.

Sutr sonchalok, Dhempe Collegichi pradheapoki Bai Vidhita Shet hinnem webinarachi survater ailevar sor‌l'lea Konknni kothakar Panchu Bantwalachea otmeak xanti magon ek minuttachem moun prarthonant survat kortoch Dhempe Collegichi Konknni vibhagachi mukhest bai Anju Sakhardanden sorv manestanchi ollok korun Ashawadi Prakashan ani Dhempe Collegichea MOU vixim toxench pattlea dedd vorsamni chol‌l'lea vauravixim mottvo vivor dilo.

Prostavik uloupi manest Balaji Sutar (Namnecho Marathi kothakar) hannem Konknni tosoli bhas itli sobhit ani itli mukar pavoilley gozal bhovo sontosachi. Monis kallathaun obhivyokt korun jieun aila, zamv tem moukik ani uprant likhit, ani hea kallar monis oplo avaz soit hea sahiteasovem zogaun dourunk sokta. Khinnan pantrik progoti zoddchea hea adhunik kallar soit ami sahiteant pattim uronk nhozo mholl'llea iradean osolim odhyoinam khup mohotvachim mhonnalo.

Mangalore Universitichea Konknni adhyoin pitthocho somyozok Dr.Jayawanta Naikan konkhonnik digital madhyomak vorun toxench digital madhyomamni Konknni vaddonk minot korchea Ashawadi Prakashanachi thoknnai keli. MukhL soiro zaun hazor aslo poinnari 2024 vorsacho kovi bab Prakash D Naikan Konknni chollvollechi gorz amkam kiteakh poddli ani Konknni rajy‌bhas zatoch amchi zovabhdari somponk na, bogar choddli, dekun tea dixen ami somestamni eka monan vaur korchi gorz asa mhonnalo. Dr.Austin Prabhun oplea uloupant Kothapatth poilea xinkollethaun hamv sorag bhag gheun ailam ani him' odhyoinam kosoleach bondhoDevinnem fokot Konknnichea grest sahiteachi ollok korun ditat ani vidhearthim hea webinarancho faido zoddunk sokondi mhonnalo. Dhempe Collegicho novo prinsipal Dr.Ramu Murthy oplea uloupant ’Konknni somogr sahiteachi ollok toxench tea sahiteak lipi-bolim modhem ekameka paumvchem digital sadhon khorench thoknnayechem, hea dixen vaur korpi somestank ul'las mhonnalo.

Dr.Edward L Nazrethan, ek kothakar zaun opnnak opnnacheo kotha chodd lokank paulear ani tanchi obhiprai koll'llear toch bhovo vhodd puroskar. Dekun hea paxot Ashawadi Prakashan ani somest Collegichea karbharink dhinvas patthoile. Bab Shailendra Mehtan dhinvas patthoile,

Webinar - 2: July 13 tariker chol‌l'lea dusrea webinarant don propotram sador zalim.
Poilem propotr Shailendra Mehtan sadar kelem: ’Dr.Edward L Nazrethachea kothentlim monxa mouleam’
dusrem propotr Lavi Ganjimattan sadar kelem: ’Dr.Edward L Nazrethachea kothentlim striyanchim (osturechim) veg-vegolli rupam’
Gaurang Bhandyen hea webinarachem sutr sonchalon kelem.

Webinar - 3: July 20 tariker chol‌l'lea dusrea webinarant don propotram sador zalim.
Poilem propotr Mansi Dhauskaran sadar kelem: ’Dr.Edward L Nazrethachea kothentlim samajik mouleam’
dusrem propotr Dr.Reshma Amith Kholkaran sadar kelem: ’Dr.Edward L Nazrethachea kothentlim sombondh (natim)’
dipa raikaran hea webinarachem sutr sonchalon kelem.

Webinar - 4: August 3 tariker chol‌l'lea dusrea webinarant don propotram sador zalim.
Poilem propotr Megan De Souzan sadar kelem: ’Dr.Edward L Nazrethachea kothent dhorm' ani somaz’
dusrem propotr Reia Veronican sadar kelem: ’Dr.Edward L Nazrethachea kothecher ek jeral obheas’
Dr.Judy Pinto hea webinarachi sonchaloki zanasun, sadar zal'lea propotrancher uloili.
Vidhita Shet hinnem hea webinarachem sutr sonchalon kelem.

Webinar - 5: (Nirop Webinar) August 10 tariker chol'lem. Sutr sonchalok Shailendra Mehtan porichoyatmok uloup korun mhonnalo; Konknni bhas ek, zamv hantum kitleo lipi,boli,dhorm',zati asum, punn eka monant korchea vaurak digital madhyom' ek boroch upokrom' ghoddun dita dekun amchem oxench misam fuDem vetelem mhonnalo.

Bai Anju Sakhardanden yeukarachem uloup kelem. Dr.Purnananda Charin Kothapatth misamvachea urvater thaun az meren Ashawadi Prakashan veg-vegollea dexamni, pranteamni mukhelponn choloun kel'lea ani atam digital adhyomant khollmit nastam korun ayil'lea vaurachi thoknnai keli. Toxench digital i-pustokam, digital addio pustokanchi ollok korun mhonnalo; 2005 thaun az poreant 42 digital i-pustokam, ani 2018 thaun az poreant 175 Konknni kotha yuttyubantlea Ashawadi Prakashan cheanolant prosar korchea pattlean khollmit nascho vaur kel'lea Ashawadi Prakashanasovem Konknni sahiteacher adhyoin cholomvchea iradean 2019 isvent Shree Mallikarjuna Collegin Ashawadi Prakashanasovem poilem MOU (Memorandum of Understanding) korun Konknni sahity, kotha-kovita, potrikudhyomacher sobhar karyim toxench seminar manddun haddunk soklem. Tye uprant 2022 isvent Dhempe Collegin Ashawadi Prakashanasovem MOU (Memorandum of Understanding) kelem. Ani atam kaim Gõychea ikra Collegichim Konknni bhurgim hea webinarancho faido zoddtat ti Konknnichea fuddarak ek bori gozal mhonnalo.

Gõychea vidheapaitthachi adhli Konknni vibhagachi mukhest Dr.Chandralekha DSouzan Kothapatthachi gorz kiteak mholl'llea vixeacher uloup kelem. Konknni sahiteak jeral nodren pollelem tor kon'nodd ani romi lipiemni utkrixtt sahity asa ani osolem sahity lipyontor zalem tor tem lipicheo goddi utron her lipichea vachpeank pauta. Ani Kothapatth tosolim odhyoinam zalim tor, tea sahiteachea grest‌kayechi ollok herank mellta. digital webinaramni Kothapatthachea survater thaun hamv hazor zaun aileam dekun Kothapatthant sador zamvchim propotram soit gunn‌mott'ttachim mhonnali.

Dr.Reshma Amit Kholkaran Dr.Edward L Nazrethachea ekeka kothencher obheas korcho ek boroch onbhog, ani hea kothemni aschea sadea monxachem chitronn, jivit ani manovi-i mouleam khorinch ami jiel'lea somajechem khorem dorxon dita oxem mhonnali.

Bab Isidor Dantasan Konknni sahity, protyek zaun romi lipint survat zal'lea potrikudhyomavixim uloun az amchesomor aschea veg-vegollea xorthancher mottvean uloup kelem

Dr. Edward L Nazrethachea vis kothenchem toxench so propotrachem digital pustok (nagori lipichem) ’MRIGZOLL’ digital vimochon korun oplea uloupant Gõy Konknni Akademichem sahityik zornol ’ANANYA’chi sthapok sompadok Dr.Jayanti Naikan oplea uloupant veg-vegollea vottharantleo Konknnintleo kannio koxeo amkam Konknnint aschea grest sahiteachi Gõyi dita, ani hea dixen lipyontor zaupachi khup gorz asa mhonnali.

Dr. Edward L Nazrethachea vis kothenchem toxench so propotrachem digital pustok (kon'noddo lipichem) ’MRIGZOLL’ digital vimochon korun oplea uloupant sttifon moskorenhosan ’zoxem Valley Quadrosachea prostaunant’ boroyil'leporim don vorgacho lok Konknnint asa. Dr.Edward L Nazreth, Valley Quadros dusrea prokarache mhonncheant kosoloch dubhavo na. Punn hamv poilea prokaracho. Hamv duddu dil'lexivai boroina oxem mhonnalo.

Dr.Edward L Nazreth oplea uloupant ’ojik pon'nas vorsadhim, hamv ek kothakar zaun udel'lom, punn hea pon'nas vorsamni kedinch, eka disa mhojeo kotha odhyoinak ghetolim, ani tancher propotram saddor zatolim mhonnun chintunk na va tea iradean hamvem boroyil'lem soit na. Punn hea pasot minot kel'lea somestank hamv dhinvas patthoitam. Protyek zaun mhojeo kotha digital addio pustok toxench i-pustokarupar hadd‌l'lea Ashawadi Prakashanak mhoje dhinvas’ mhonnalo.

Dr.Austin DSouza Prabhun Fredrick Quadros smarok Ashawadi Prakashanache digital puroskar jikpeanchim namvam ghoxonn kelim, Kothapatth panchea xinkollent sador zal'lea so propotrank inamam favo zalim.

Valley Quadrosan Mathais Famiy Dublin prayozok‌ponnachim (digital audio pustokacher kotha sadorikoronnachim) inamam ghoxit kelim. Poilem inam': Shanthi Noronha Bahrain, dusrem inam': Preetha Miranda, tisrem inam': Lavi Ganjimatta ani Linet DSouzak. Her chearank humedichim inamam favo zalim.

Valley Quadrosan dhinvas uloup kelem. Shailendra Mehtan sutr sonchalon kelem.  

MRIGZOLL Digital e-Pustok