[ಖಬರ್] ಕಥಾಪಾಠ್ 2 - ಕೊಂಕಣಿಂತ್ಲ್ಯೊ ಘಾಟಾಚ್ಯೊ ಕಥಾ

ನವೆಂಬ್ರ್ 8: ಕೊಂಕಣಿ ಕಥೆಂಚೆರ್ ಅಧ್ಯಯನ್ ಕರ್ಚ್ಯಾ ಇರಾದ್ಯಾನ್ ಆಶಾವಾದಿ ಪ್ರಕಾಶನ್ ಆನಿ ಉಜ್ವಾಡ್ ಪಂದ್ರಾಳೆಂ ಹಾಣಿಂ ಡಿಜಿಟಲ್ ಮಾಧ್ಯಮಾಚೆರ್ ಮಾಂಡುನ್ ಹಾಡ್ಲೆಲೆಲ್ಯಾ ಪಾಂಚ್ ವೆಬಿನಾರಾಂಚೆಂ ದುಸ್ರೆಂ ವೆಬಿನಾರ್ ನವೆಂಬ್ರ್ 8 ತಾರಿಕೆರ್ (ಆಯ್ತಾರಾ) ಸಾಂಜೆರ್ 4:30 ಥಾವ್ನ್ 6:00 ಪರ್ಯಾಂತ್ ಚಲ್ಲೆಂ. ’ಕೊಂಕಣಿಂತ್ ಘಾಟಾಚ್ಯೊ ಕಥಾ’ ವಿಶ್ಯಾಚೆರ್ ಆಸಾ ಕೆಲ್ಲ್ಯಾ ಹ್ಯಾ ಅಧ್ಯಯನ್ ಕಾಮಾಸಾಳಾಂತ್ ಮಾ|ಬಾ|ಚೇತನ್ ಲೋಬೊ ತಶೆಂಚ್ ಕನ್ಸೆಪ್ಟಾ ಫೆರ್ನಾಂಡಿಸ್ ಆಳ್ವ ಹಾಣಿಂ ಉಪನ್ಯಾಸ್ ದಿಲೆಂ.

ಪ್ರೇಮ್ ಮೊರಸಾನ್ ಉಪನ್ಯಾಸಕಾಂಚಿ ಮಟ್ವಿ ವಳೊಕ್ ಕರುನ್ ದಿತಚ್ ವಲ್ಲಿ ಕ್ವಾಡ್ರಸಾನ್ ಸ್ವಾಗತ್ ಉಲವ್ಪಾಂತ್ ಕೊಂಕಣಿ ಸಾಹಿತ್ಯಾಂತ್, ಪ್ರತ್ಯೇಕ್ ಜಾವ್ನ್ ಕನ್ನಡ್ ಲಿಪಿಯೆಚ್ಯಾ ಕೊಂಕಣಿ ಸಾಹಿತ್ಯಾಂತ್ ಘಾಟಾಚ್ಯಾ ಮುಳಾಚ್ಯೊ ಸಭಾರ್ ಕಥಾ ಕಾಂಯ್ ತೆಂಪಾದಿಂ ಪರ್ಗಟುನ್ ಯೆತಾಲ್ಯೊ ಆನಿ ತಾಚಿ ಪಾಠ್‌ಭುಂಯ್ ತಶೆಂಚ್ ಸಮಾಜಿಕ್ ಕಾರಣಾಂವಿಶಿಂ ಉಲ್ಲೇಕ್ ಕರುನ್ ಘಾಟಾಚ್ಯೊ ಕಥಾ ಮ್ಹಳ್ಯಾರ್ ಫಕತ್ ಘಾಟಾಚಿಂ ನಾಂವಾಂ ಆಸ್ಚ್ಯೊ ನ್ಹಯ್ ಬಗರ್ ಘಾಟಾಚ್ಯಾ ಜಿಣ್ಯೆಚೆಂ ಚಿತ್ರಣ್ ದಿಂವ್ಚ್ಯೊ ಮ್ಹಣಾಲೊ.

ಮಾ|ಚೇತನ್ ಲೋಬೊನ್ ಅಪ್ಲ್ಯಾ ಉಪನ್ಯಾಸಾಂತ್ ಘಾಟಾಚಿ ಸಂಕ್ಷಿಪ್ತ್ ವಳೊಕ್ ದಿವುನ್ ಘಾಟಾಚೆಂ ಚಿತ್ರಣ್, ನೈಸರ್ಗಿಕ್/ಪ್ರಾಕಿತಿಕ್ ವಿವರ್ ದಿವುನ್ ಘಾಟಾಚ್ಯಾ ದೀಸ್ಪಡ್ತ್ಯಾ ಜಿಣ್ಯೆಚಿ ವಳೊಕ್ ಕರುನ್ ದಿವುನ್ ಸಮಕಾಳಿನ್ ಸಾಹಿತ್ಯಾಂತ್ ಕಸಲ್ಯೊ ಘಾಟಾಚ್ಯೊ ಕಥಾ ಆಮ್ಕಾಂ ವಾಚುಂಕ್ ಮೆಳ್ತಾತ್ ತಶೆಂಚ್ ಕೊಂಕಣಿಂತ್ ಸಯ್ತ್ ಎಕಾ ತೆಂಪಾದಿಂ ವಾಚುಂಕ್ ಮೆಳ್ಚೆ ತಸಲ್ಯಾ ಕಾಣಿಯಾಂಚೆರ್ ವಿವರ್ ದಿತಚ್ ಕನ್ಸೆಪ್ಟಾ ಫೆರ್ನಾಂಡಿಸಾನ್ ಕೊಂಕಣಿಂತ್ಲ್ಯಾ ಘಾಟಾಚ್ಯಾ ಕಾಣಿಯಾಂಚೊ ಸವಿಸ್ತಾರ್ ವಿವರ್ ದಿಲೊ;

ಎ.ಟಿ.ಲೋಬೊಚ್ಯಾ ’ಹರ್ಧ್ಯಾರ್ ಖುರಿಸ್’ ಕಾಣಿಯೆಚೆರ್, ಮನು ಬಾಹ್ರೇಯ್ನಾಚ್ಯಾ ’ಅರಣ್ಯಾಂತ್ಲೊ ತಾಳೊ’ ಕಾಣ್ಯೆಚೆರ್ ಗುಂಡಾಯೆನ್ ಉಲವ್ನ್ ಹೆರ್ ಕಾಣಿಯೆಗಾರಾಂಚಿ; ಜೆರಿ ಕುಲ್ಶೇಕರ್, ವಿಕ್ಟರ್ ರೊಡ್ರಿಗಸ್, ಮನು ಬಾಹ್ರೇಯ್ನ್ ಆನಿ ಹೆರ್ ಲೇಖಕಾಂಚೊ ವಿವರ್ ದಿಲೊ.

ಡಾ|ಆಸ್ಟಿನ್ ಡಿ’ಸೋಜ್ ಪ್ರಭುನ್ ಉಪ್ಕಾರ್ ಆಟಯ್ಲೊ. ಪ್ರೇಮ್ ಮೊರಾಸಾನ್ ಹೆಂ ಕಾರ್ಯೆಂ ಚಲವ್ನ್ ವ್ಹೆಲೆಂ.

ಮಂಗ್ಳುರ್, ಮುಂಬಯ್, ಗೊಂಯ್‌ಚ್ಯಾ ಕೊಜೆಲಿಚ್ಯಾ ಸುಮಾರ್ ಶೆಂಭೊರ್ ಯುವಜಣಾಂನಿ ಹ್ಯಾ ಕಥಾಪಾಠಾಂತ್ ವಾಂಟೊ ಘೆತ್ಲೊ.

 ಖಬರ್: ಆಮ್ಚೊ ಭಾತ್ಮಿ

[खबर] कथापाठ २ - कोंकणिंतल्यो घाटाच्यो कथा

नवेंबर ८: कोंकणी कथेंचेर अध्ययन कर्च्या इराद्यान आशावादी प्रकाशन आनी उज्वाड पंद्राळें हाणीं डिजिटल माध्यमाचेर मांडून हाडलेलेल्या पांच वेबिनारांचें दुस्रें वेबिनार नवेंबर ८ तारिकेर (आयतारा) सांजेर ४:३० थावन ६:०० पऱ्यांत चल्लें. ’कोंकणिंत घाटाच्यो कथा’ विश्याचेर आसा केल्ल्या ह्या अध्ययन कामासाळांत मा|बा|चेतन लोबो तशेंच कन्सेपटा फेर्नांडीस आळव हाणीं उपन्यास दिलें.

प्रेम मोरसान उपन्यासकांची मटवी वळोक करून दितच वल्ली क्वाड्रसान स्वागत उलवपांत कोंकणी साहित्यांत, प्रत्येक जावन कन्नड लिपियेच्या कोंकणी साहित्यांत घाटाच्या मुळाच्यो सभार कथा कांय तेंपादीं पर्गटून येताल्यो आनी ताची पाठ‌भुंय तशेंच समाजीक कारणांविशीं उल्लेक करून घाटाच्यो कथा म्हळ्यार फकत घाटाचीं नांवां आसच्यो न्हय बगर घाटाच्या जिण्येचें चित्रण दिंवच्यो म्हणालो.

मा|चेतन लोबोन अपल्या उपन्यासांत घाटाची संक्षिप्त वळोक दिवून घाटाचें चित्रण, नैसर्गीक/प्राकितीक विवर दिवून घाटाच्या दीस्पडत्या जिण्येची वळोक करून दिवून समकाळीन साहित्यांत कसल्यो घाटाच्यो कथा आमकां वाचुंक मेळतात तशेंच कोंकणिंत सयत एका तेंपादीं वाचुंक मेळचे तसल्या काणियांचेर विवर दितच कन्सेपटा फेर्नांडिसान कोंकणिंतल्या घाटाच्या काणियांचो सविसतार विवर दिलो; ए.टी.लोबोच्या ’हर्ध्यार खुरीस’ काणियेचेर, मनू बाह्रेयनाच्या ’अरण्यांतलो ताळो’ काण्येचेर गुंडायेन उलवन हेर काणियेगारांची; जेरी कुलशेकर, विकटर रोड्रिगस, मनू बाह्रेयन आनी हेर लेखकांचो विवर दिलो.

डा|आसटीन डी’सोज प्रभून उपकार आटयलो. प्रेम मोरासान हें काऱ्यें चलवन व्हेलें.

मंगळूर, मुंबय, गोंय‌च्या कोजेलिच्या सुमार शेंभोर युवजणांनी ह्या कथापाठांत वांटो घेतलो.

आमचो भात्मी

[Khobor] Kothapatt - 2 : Konkonnintleo Ghattacheo Kotha

Novembr 8: konkonni kothencher odhyoin korchea iradean Ashawadi Prakashan ani Ujvadd pondrallem hannim ddijittol madhyomacher manddun haddlelelea panch vebinaranchem dusrem vebinar novembr 8 tariker (aitara) sanjer 4:30 thaun 6:00 poreant chol'lem. ’Konkonnint Ghattacheo Kotha’ vixeacher asa kel'lea hea odhyoin kamasallant Ma|Ba|Chetan Lobo toxench Concepta Fernandes Alva hannim uponeas dilem.

Prem Morasan uponeasokanchi mottvi vollok korun ditoch Valley Quadrosan svagot uloupant konkonni sahiteant, protyek zaun kon'nodd lipiechea konkonni sahiteant ghattachea mullacheo sobhar kotha kaim tempadim porgottun yetaleo ani tachi patth‌bhum-i toxench somajik karonnamvixim ul'lek korun ghattacheo kotha mhollear fokot ghattachim namvam ascheo nhoi bogor ghattachea jinnyechem chitronn dimvcheo mhonnalo.

Ma|Chetan Lobon oplea uponeasant ghattachi sonkxipt vollok divun ghattachem chitronn, noisorgik/prakitik vivor divun ghattachea dispoddtea jinnyechi vollok korun divun somokallin sahiteant kosoleo ghattacheo kotha amkam vachunk melltat toxench konkonnint soit eka tempadim vachunk mellche tosolea kanniancher vivor ditoch Concepta Fernandisan konkonnintlea ghattachea kanniancho sovistar vivor dilo; A.T.Lobochea ’Hordhear Khuris’ kanniecher, Manu Bahrainachea ’Oronneantlo Tallo’ kannyecher gunddayen uloun her kanniegaranchi; Jery Kulshekar, Victor Rodrigues ani her lekhokancho vivor dilo.

Dr.Austin DSouza Prabhun upkar attoilo. Prem Morasan hem karyem choloun vhelem.

Mongllur, mumboi, Gõy‌chea kojelichea sumar xembhor yuvozonnamni hea kothapatthant vantto ghetlo.

Amcho Bhatmi