[ಖಬರ್] ಕಥಾಪಾಠ್ 3 - ಮುಂಬಯ್‌ಚ್ಯೊ ಕಥಾ

ನವೆಂಬ್ರ್ 22: ಕೊಂಕಣಿಂತಲ್ಯೊ ಮುಂಬಯ್‌ಚ್ಯೊ ಕಥಾ

ಆಶಾವಾದಿ ಪ್ರಕಾಶನ್ ಆನಿ ಉಜ್ವಾಡ್ ಪಂದ್ರಾಳೆಂ ಹಾಣಿಂ ಡಿಜಿಟಲ್ ಮಾಧ್ಯಮಾಚೆರ್ ಮಾಂಡುನ್ ಹಾಡ್‌ಲ್ಲ್ಯಾ ರಾಶ್ಟ್ರೀಯ್ ಮಟ್ಟಾಚ್ಯಾ ಕಥಾ-ಅಧ್ಯಯನ್ ಶಿಂಕಳೆಚಿ ತಿಸ್ರಿ ಶಿಂಕಳ್ (ವೆಬಿನಾರ್) ನವೆಂಬ್ರ್ 22 ತಾರಿಕೆಚ್ಯಾ ಆಯ್ತಾರಾ ಸಾಂಜೆರ್ 4:30 ಥಾವ್ನ್ 6:00 ಪರ‍್ಯಾಂತ್; ಕೊಂಕಣಿಂತ್ಲ್ಯೊ ಮುಂಬಯ್ ಕಥಾ ತಶೆಂಚ್ ’ಸಾಂಕವ್’ ಕಥಾಸಂಗ್ರಹಾಚೆರ್ ಸಮೀಕ್ಷಾ ಚಲ್ಲಿ. ಉಜ್ವಾಡ್ ಪತ್ರಾಚ್ಯಾ ಸಂಪಾದಕ್ ಮಾ|ಬಾ|ರೋಯ್ಸನ್ ಫೆರ್ನಾಂಡಿಸಾನ್ ಯೆವ್ಕಾರ್ ಉಲವ್ಪ್ ಕರುನ್ ಕಾರ್ಯಾಚೆಂ ಸುಂಕಾಣ್ ಘೆತ್‌ಲ್ಲ್ಯಾ ದೊ|ಪೂರ್ಣಾನಂದ್ ಚ್ಯಾರಿ ಹಾಂಚಿ ಮಟ್ವಿ ವಳೊಕ್ ಕರುನ್ ದಿತಚ್ ಮಾ|ಬಾ|ಜೇಸನ್ ಪಿಂಟೊ ಉದ್ಯಾವರ್ ಹಾಣಿಂ ಮುಂಬಯ್ ಜಿವಿತ್ ಆನಿ ಕಶೆಂ ಮುಂಬಯ್ ಜಿವಿತಾನ್ ಕೊಂಕಣಿ ಭಾಸ್, ಲೋಕ್, ಸಂಸ್ಕೃತಿ ತಶೆಂಚ್ ಫುಡಾರಾಚೆರ್ ಘಾಲ್ಲ್ಯಾ ಪ್ರಭಾವಾಚೆರ್ ಉಲವ್ನ್ ಮುಂಬಯ್ ಜಿವಿತಾಚ್ಯಾ ಎಕೆಕಾ ಸಂಗ್ತೆಚೆರ್ ವಾಚುಂಕ್ ಮೆಳ್ಚ್ಯಾ ತಶೆಂಚ್ ವಾಚುಂಕ್ ಮೆಳುಂಕ್ ಜಾಯ್ ಜಾಲ್ಲ್ಯಾ ಸಂಗ್ತೆಂಚೆರ್ ಉಪನ್ಯಾಸ್ ದಿಲೆಂ.

ದೊ|ಪೂರ್ಣಾನಂದ ಚ್ಯಾರಿನ್ ಉಪನ್ಯಾಸಾಕಾಂಚಿಂ ವಳೊಕ್ ತಶೆಂಚ್ ’ಸಾಂಕವ್’ ಪುಸ್ತಕಾಚಿ ವಳೊಕ್ ಕರುನ್ ದಿಲಿ. ಗೊಂಯ್ಚ್ಯಾ ಕೊಲೆಜಿಂತ್ ಪ್ರಾಧ್ಯಾಪಕ್ ಜಾವ್ನ್ ವಾವ್ರ್ ಕರ್ಪಿ ಬಾಯ್ ಯೋಗಿತಾ ವೆರ್ಣೇಕರ್ ಹಿಣೆಂ 2020 ವರ್ಸಾಂತ್ ಕೊಂಕಣ್‌ಗಾರ್ ಪ್ರಕಾಶನಾನ್ ಪ್ರಕಾಶಿತ್ ಕೆಲ್ಲ್ಯಾ ವಲ್ಲಿ ಕ್ವಾಡ್ರಸಾಚ್ಯಾ ಪಾಂಚ್ವ್ಯಾ ಕಥಾಸಂಗ್ರಹ್ ’ಸಾಂಕವ್’ ಪುಸ್ತಕಾಂತಲ್ಯಾ 25 ಕಥೆಂಚೆರ್ ಅಭ್ಯಾಸ್ ಕರುನ್ ಸಮೀಕ್ಷಾ ಕೆಲಿ. ಕಥೆಂತ್ ಆಟಾಪ್ಚೆ ವೆಗ್-ವೆಗಳೆ ವಿಶಯ್, ಮನ್ಶಾಮೊಲಾಂ, ಸಂಬಂಧ್-ನಾತಿಂ, ವಯ್ಚಾರಿಕತಾ, ತತ್ವಾಂ, ಮನ್ಶಾ ಜಿವಿತ್ ಅಶೆಂ ವೆಗ್-ವೆಗಳ್ಯಾ ಕಥೆಂಚೆರ್ ಆಸ್ಚ್ಯಾ ದರೇಕಾ ಸಂಗ್ತೆಂಚೆರ್ ಕೆಲ್ಲೆಂ ವಿಶ್ಲೇಷಣ್ ಭೋವ್ ಅಪುರ್ಭಾಯೆನ್ ಪ್ರಸ್ತುತ್ ಕೆಲೆಂ. ದಲ್ಗಾದೊ ಕೊಂಕಣಿ ಅಕಾಡೆಮಿಚೆ ಅಧ್ಯಕ್ಷ್ ಬಾಬ್ ವಿನ್ಸಿ ಕ್ವಾಡ್ರೊಸ್ ಹಾಣಿಂ ಅಪ್ಲೆ ವಿಚಾರ್ ಮಂಡನ್ ಕರ್ತಚ್ ಕಾರ್ಯೆಂ ಚಲವ್ಪಿ ದೊ|ಪೂರ್ಣಾನಂದ ಚ್ಯಾರಿನ್ ’ಕಥಾಪಾಠ್ - ದುಸ್ರಿ ಶಿಂಕಳ್’ ವಿಶಿಂ ಮಾಹೆತ್ ದಿವುನ್, ಕೊಂಕಣಿಂತ್ಲ್ಯಾ ಕಥೆಂಚೆರ್ ತುಲನಾತ್ಮಕ್ ಅಭ್ಯಾಸ್ (Comparative analysis) ಚಲಂವ್ಚಿಂ ಕಥಾಪಾಠ್ ಜನೆರ್-ಫೆಬ್ರೆರ್ ಮಯ್ನ್ಯಾಂನಿ ಚಲಂವ್ಚೆವಿಶಿಂ ಉಲ್ಲೇಕ್ ಕೆಲೊ.

ಬಾಬ್ ಶೈಲೇಂದ್ರ ಮೆಹ್ತಾನ್ ಧಿನ್ವಾಸ್ ಪಾಠಯ್ಲೆ.  ಗೊಂಯ್, ಕರ್ನಾಟಕ್, ಮುಂಬಯ್, ಕೇರಳಾ ಆನಿ ವಿದೇಶ್ ಥಾವ್ನ್ ಶೆಂಭೊರ್ ವಿಧ್ಯಾರ್ಥಿಂನಿ ಹ್ಯಾ ಕಥಾಪಾಠಾಂತ್ ಹಾಜರ್ ಆಸ್ಲಿಂ.

 ಖಬರ್: ಆಮ್ಚೊ ಭಾತ್ಮಿ

[खबर] कथापाठ - 3: मुंबय‌च्यो कथा

कथापाठ -३: कोंकणिंतल्यो मुंबय‌च्यो कथा

आशावादी प्रकाशन आनी उज्वाड पंद्राळें हाणीं डिजिटल माध्यमाचेर मांडून हाड‌ल्ल्या राश्ट्रीय मट्टाच्या कथा-अध्ययन शिंकळेची तिस्री शिंकळ (वेबिनार) नवेंबर २२ तारिकेच्या आयतारा सांजेर ४:३० थावन ६:०० पर‍्यांत; कोंकणिंतल्यो मुंबय कथा तशेंच ’सांकव’ कथासंग्रहाचेर समीक्षा चल्ली. उज्वाड पत्राच्या संपादक मा|बा|रोयसन फेर्नांडिसान येवकार उलवप करून काऱ्याचें सुंकाण घेत‌ल्ल्या दो|पूर्णानंद च्यारी हांची मटवी वळोक करून दितच मा|बा|जेसन पिंटो उद्यावर हाणीं मुंबय जिवीत आनी कशें मुंबय जिवितान कोंकणी भास, लोक, संसकृती तशेंच फुडाराचेर घाल्ल्या प्रभावाचेर उलवन मुंबय जिविताच्या एकेका संग्तेचेर वाचुंक मेळच्या तशेंच वाचुंक मेळुंक जाय जाल्ल्या संग्तेंचेर उपन्यास दिलें.

गोंयच्या कोलेजिंत प्राध्यापक जावन वावर कर्पी बाय योगिता वेर्णेकर हिणें २०२० वर्सांत कोंकण‌गार प्रकाशनान प्रकाशीत केल्ल्या वल्ली क्वाड्रसाच्या पांचव्या कथासंग्रह ’सांकव’ पुसतकांतल्या २५ कथेंचेर अभ्यास करून समीक्षा केली. कथेंत आटापचे वेग-वेगळे विशय, मनशामोलां, संबंध-नातीं, वयचारिकता, तत्वां, मनशा जिवीत अशें वेग-वेगळ्या कथेंचेर आसच्या दरेका संग्तेंचेर केल्लें विशलेषण भोव अपुर्भायेन प्रसतूत केलें. दल्गादो कोंकणी अकाडेमिचे अध्यक्ष बाब विन्सी क्वाड्रोस हाणीं अपले विचार मंडन कर्तच काऱ्यें चलवपी दो|पूर्णानंद च्यारीन ’कथापाठ - दुस्री शिंकळ’ विशीं माहेत दिवून, कोंकणिंतल्या कथेंचेर तुलनात्मक अभ्यास (Comparative analysis) चलंवचीं कथापाठ जनेर-फेबरेर मयन्यांनी चलंवचेविशीं उल्लेक केलो.
बाब शैलेंद्र मेहतान धिन्वास पाठयले.

गोंय, कर्नाटक, मुंबय, केरळा आनी विदेश थावन शेंभोर विध्यार्थिंनी ह्या कथापाठांत हाजर आसलीं.

आमचो भात्मी

[Khobor] Kothapatth - 3: Mumboicheo Kotha

November 22: Konkonnintoleo Mumboi‌cheo Kotha

Ashawadi Prakashan ani Ujvaad pondrallem hannim ddijittol madhyomacher manddun hadd‌l'lea raxttri-i mott'ttachea kotha-odhyoin xinkollechi tisri xinkoll (vebinar) novembr 22 tarikechea aitara sanjer 4:30 thaun 6:00 poro‍eant; konkonnintleo mumboi kotha toxench ’sankou’ kothasongrohacher somikxa chol'li. Ujvadd potrachea sompadok Ma|Ba|Roysen Fernandisan yeukar uloup korun kareachem sunkann ghet‌l'lea Do|Purnanand Chari hanchi mottvi vollok korun ditoch Ma|Ba|Jason Pinto Udyavar hannim mumboi jivit ani koxem Mumboi jivitan konkonni bhas, lok, somskriti toxench fuddaracher ghal'lea probhavacher uloun mumboi jivitachea ekeka songtecher vachunk mellchea toxench vachunk mellunk zai zal'lea songtencher uponeas dilem.

Gõychea kolejint pradheapok zaun vaur korpi Bai Yogita Vernekar hinnem 2020 vorsant Konkonn‌gar Prokaxonan prokaxit kel'lea Valley Quadrosachea panchvea kothasongroh ’Sankou’ pustokantolea 25 kothencher obheas korun somikxa keli. Kothent attapche veg-vegolle vixoi, monxamolam, sombondh-natim, voicharikota, totvam, monxa jivit oxem veg-vegollea kothencher aschea doreka songtencher kel'lem vixlexonn bhovo opurbhayen prostut kelem. Dalgado Konkonni Akademiche odhyokx Bab Vincy Quadros hannim ople vichar monddon kortoch karyem choloupi Do|Purnanand Charin ’kothapatth - dusri xinkoll’ vixim mahet divun, konkonnintlea kothencher tulonatmok obheas (Comparative analysis) cholomvchim kothapatth zoner-febrer moineamni cholomvchevixim ul'lek kelo.

Bab Shailendra Mehtan dhinvas patthoile. Gõy, Karnatak, Mumbai, Kerala ani videx thaun xembhor vidhearthimni hea kothapatthant hazor aslim.

Amcho Bhatmi