[ಖಬರ್] ಕಥಾಪಾಠ್ II - ಕಥಾಪಾಠ್ ರಾಶ್ಟ್ರೀಯ್ ವೆಬಿನಾರಾಂತ್ ’ವಿಲ್ಫಿ ರೆಬಿಂಬಸಾಚ್ಯೊ ವಿಂಚ್ಣಾರ್ ಕಥಾ’ ಇ-ಬೂಕ್ ಮೊಕ್ಳಿಕ್

29 ಮಾಯ್ 2021: ಆಶಾವಾದಿ ಪ್ರಕಾಶನ್, ಅಖಿಲ್ ಭಾರತೀಯ್ ಕೊಂಕಣಿ ಪರಿಶದ್ ಆನಿ ಉಜ್ವಾಡ್ ಪಂದ್ರಾಳೆ ಹಾಂಚ್ಯಾ ಜೋಡ್ ಪಾಲವಾಂತ್ ಚಲ್‌ಲ್ಲ್ಯಾ ಕಥಾಪಾಠ್ ದುಸ್ರ್ಯಾ ಶಿಂಕಳೆಂತ್, ವಿಲ್ಫಿ ರೆಬಿಂಬಸಾನ್ 1970-ವ್ಯಾ ದಾಕ್ಡ್ಯಾಂತ್ ಬರಯಿಲ್ಲ್ಯಾ ’ಪಿಂತ್ರಾಂ’, ’ಮೂಗುತಿ’ ಆನಿ ’ಫಾತಿಮಾಚೆಂ ಕಾಜಾರ್’ ಕಾಣಿಯಾಂಚೆರ್ ರಾಶ್ಟ್ರೀಯ್ ಮಟ್ಟಾಚೆಂ ಅಧ್ಯಯನ್ ಕಾಮಾಸಾಳ್ ’ಕಥಾಪಾಠ್ ದುಸ್ರ್ಯಾ ಶಿಂಕಳೆಚೆಂ ಸಂಪ್ಣೆಂ ಕಾರ್ಯೆಂ’ ಮಾಯ್ ಮಯ್ನ್ಯಾಚ್ಯಾ 29 ತಾರಿಕೆಚ್ಯಾ ಸನ್ವಾರಾ ಸಾಂಜೆರ್ 4:30 ಥಾವ್ನ್ 6:30 ಪರ್ಯಾಂತ್ ಡಿಜಿಟಲ್ ಮಾಧ್ಯಮಾಂತ್ ಚಲ್ಲೆಂ. ವಲ್ಲಿ ಕ್ವಾಡ್ರಸಾನ್ ಕನ್ನಡ, ನಾಗರಿ ತಶೆಂಚ್ ರೋಮಿ ಲಿಪಿಯೆಂನಿ ಲಿಪಿಯಂತರ್ ಕರುನ್, ಸಂಪಾದನ್ ಕರುನ್ ಆಶಾವಾದಿ ಪ್ರಕಾಶನಾಖಾಲ್ ಡಿಜಿಟಲ್ ಪ್ರಕಾಶನ್ ಕೆಲ್ಲೊ ’ವಿಲ್ಫಿ ರೆಬಿಂಬಸಾಚ್ಯೊ ವಿಂಚ್ಣಾರ್ ಕಥಾ’ ಇ-ಬುಕಾಚೆಂ ಮೊಕ್ಳಿಕ್ ಕಾರ್ಯೆಂ ಹೆಚ್ ಸಂಧರ್ಭಾರ್ ಚಲ್ಲೆಂ.

ಕಾರ್ಮೆಲ್ ಕೊಲೆಜ್ ಗೊಂಯ್‌ಚಿ ಶಿಕ್ಷಕಿ ಬಾಯ್ ಸಿಯಾಲಿನಿ ಫೆರ್ನಾಂಡಿಸಾನ್ ಜೆರಾಲ್ ಯೆವ್ಕಾರ್ ಮಾಗುನ್ ಕಶೆಂ ಕಾಣಿ ಆನಿ ಜಿಣಿ ಎಕಾಮೆಕಾ ಸಾವ್ಳಿ ಧರುನ್ ಸಮಾಜಿಕ್ ರುಪಾಂ ಆನಿ ಮವ್ಲ್ಯಾಂಕ್ ಆಟಾಪ್ತಾತ್ ಮ್ಹಣುನ್ ಭುರ್ಗ್ಯಾಪಣಾಥಾವ್ನ್ ಮನಿಸ್ ಜಾಣ್ತೊ ಜಾತಾಸರ್ ಕಥಾ ತಾಚ್ಯಾ ಜಿವಿತಾಂತ್ ಏಕ್ ನಾ ಏಕ್ ರಿತಿನ್ ಉಪ್ಕಾರಾಕ್ ಪಡ್ತಾ ಮ್ಹಣಾಲಿ. ಉಗ್ತಾವಣ್ ಉಲವ್ಪ್ ಜಾವ್ನ್ ಕೊಂಕಣ್ ಮಯ್ನಾ ಬಾಯ್ ಮೀನಾ ರೆಬಿಂಬಸಾನ್ ಅಜೀಕ್ ಚಾಳೀಸ್ ವರ್ಸಾಂ ಪಯ್ಲೆಂ ಬರಯಿಲ್ಲ್ಯಾ ಕಾಣಿಯಾಂಚೊ ಉಡಾಸ್ ಕಾಡುನ್, ತ್ಯಾ ಕಾಳಾಕ್ ಪರತ್ ಆಪವ್ನ್ ವೆಲ್ಲೊ ಅನ್ಭೋಗ್ ಕರುನ್ ದಿಲ್ಲೆಪರಿಂ ಜಾಲೆಂ. ವಿಲ್ಫಿ ರೆಬಿಂಬಸಾಚ್ಯಾ ಗಿತಾಂಕ್ ಕಶೆಂ ಸಮಾಜೆನ್ ವರ್ತ್ಯಾ ಮೊಗಾನ್ ಸ್ವಿಕಾರ್ ಕೆಲ್ಲೊಕಿ, ತೆಚ್ ಮಾಪಾನ್ ತಾಚ್ಯಾ ಕಾಣಿಯಾಂಕ್ ಸಯ್ತ್ ಲೊಕಾನ್ ಖಾಯ್ಸ್ ಕೆಲ್ಲ್ಯಾಕ್ ಖಾಲ್ತೆಪಣಿಂ ಧಿನ್ವಾಸ್ ಪಾಟಯ್ಲೊ.

ಯೆವ್ಕಾರ್ ಉಲವ್ಪಾಂತ್ ಬಾಬ್ ವಲ್ಲಿ ಕ್ವಾಡ್ರಸಾನ್ ಅಪ್ಲ್ಯಾ ಥೊಡ್ಯಾ ವಾವ್ರಾಂತ್ ಭೋವ್ ಥೊಡೆಪಾವ್ಟಿಂ ಅಪ್ಣಾನ್ ಕೆಲ್ಲ್ಯಾ ಕಾಮಾಚೆರ್ ಅಭಿಮಾನ್ ಭಗ್ಲಾ ಆನಿ ತ್ಯಾ ಭೋವ್ ಥೊಡ್ಯಾ ಕಾಮಾಂ ಪಯ್ಕಿಂತ್ ಹೆಂ ಏಕ್ ಕಥಾಪಾಠ್ ವೆಬಿನಾರ್ ಶಿಂಕಳ್ ಆನಿ ಹೆ ಇ-ಬೂಕ್ ಮ್ಹಣುನ್ ಕಶೆಂ ಅಪುಣ್ ಮಂಗ್ಳುರಾಕ್ ಆಯಿಲ್ಲ್ಯಾ ಸುರ್ವೆರ್ ಥಾವ್ನ್ ಆಜ್ ಪಾರ್ಯಾಂತ್ ಬಾಬ್ ಅವಿಲ್ ರಾಸ್ಕಿನ್ಹ್ ಆನಿ ವಿಲ್ಫಿ ರೆಬಿಂಬಸಾಕ್ ಋಣಿ ಜಾವ್ನ್ ಆಸಾಂ ಮ್ಹಣುನ್ ವಿಲ್ಫಿ ರೆಬಿಂಬಸಾಚ್ಯೊ ಕಥಾ ಆಡಿಯೊ ಬುಕಾರುಪಾರ್ ಫುಡ್ಲ್ಯಾ ಮಯ್ನ್ಯಾಂನಿ ಪ್ರಚಾರಿತ್ ಕರ್ಚೆವಿಶಿಂ ಮಾಹೆತ್ ದಿವುನ್, ಫುಡ್ಲ್ಯಾ ಕಥಾಪಾಠಾಂನಿ ಕೊಂಕಣಿಚ್ಯಾ ವಿಂಚ್ಣಾರ್ ಕಥಾಕಾರಾಂಚ್ಯೊ ಕಥೆಂಚೆರ್ ಅಧ್ಯಯನ್ ಚಲಂವ್ಚೆವಿಶಿಂ ಮಾಹೆತ್ ದಿಲಿ.

ಸಾಹಿತ್ಯ್ ಅಕಾಡೆಮಿ ಪುರಸ್ಕೃತ್ ಕವಿ ಬಾಬ್ ಮೆಲ್ವಿನ್ ರೊಡ್ರಿಗಸಾನ್ ವಿಲ್ಫಿ ರೆಬಿಂಬಸಾಚ್ಯಾ ಬರಪಾಂವಿಶಿಂ ಉಲವ್ನ್, ತಾಚ್ಯಾ ಬರ್ಪಾಂಚೆರ್ ರಾಶ್ಟ್ರೀಯ್ ಮಟ್ಟಾಚೆಂ ಅಧ್ಯಯನ್ ಚಲಂವ್ಚೆ ಮಾರಿಫಾತ್ ಸರ್‌ಲ್ಲ್ಯಾ ಅತ್ಮ್ಯಾಕ್ ಸುಂರ್ಗಾರಾಯಿಲ್ಲೆಪರಿಂ ಮ್ಹಣಾಲೊ ತಶೆಂಚ್ ವಿಲ್ಫಿ ರೆಬಿಂಬಸಾಚ್ಯಾ ಸಮಾಜಿಕ್ ಕಾಳ್ಜಿ, ಸಂವೇದನಾತ್ಮಕ್ ಚಿಂತಪ್ ಕಶೆಂ ತಾಚ್ಯಾ ದರೇಕಾ ಬರಪಾಂತ್ ನಿಶೆತಾಲೆಂ ಮ್ಹಣಾಲೊ. ಗೊಂಯ್ಚೊ ಬಾಬ್ ದಾಮೋದರ್ ಮಾವ್ಜೊ ಅಪ್ಲ್ಯಾ ಉಲವ್ಪಾಂತ್ ’ವೆಳಾಕ್ ಸರಿ ಜಾವ್ನ್ ಮಾತ್ಯಾರ್ ಚೆಪೆಂ’ ಮ್ಹಣ್ಚೆಪರಿಂ, ಆಯ್ಚೊ ಕಾಳ್ ಡಿಜಿಟಲ್ ಜಾಲಾಸ್ತಾಂ, ಆಮಿಂ ಆಸ್ಲೆಕಡೆಚ್ ಉರಾನಾಸ್ತಾಂ, ಡಿಜಿಟಲ್ ಸಂಸಾರಾತೆವ್ಶಿನ್ ಪಾವ್ಲಾಂ ಕಾಡುಂಕ್ ಫಾವೊ ಆನಿ ಗೊಂಯಾಂತ್ ಸಯ್ತ್ ಡಿಜಿಟಲ್ ಸಂಸಾರಾಂತ್ ಜಾಂವ್ಚ್ಯಾ ಕೊಂಕಣಿ ಸಾಹಿತಿಕ್ ಕಾಮಾಂಚೊ ಉಲ್ಲೇಕ್ ಕರಿಲಾಗ್ಲೊ. ಕಾಣಿಕ್ ಪತ್ರಾಚೊ ಆಧ್ಲೊ ಸಂಪಾದಕ್ ಬಾಬ್ ಅವಿಲ್ ರಾಸ್ಕಿನ್ಹ್ ಅಪ್ಲ್ಯಾ ಉಲವ್ಪಾಂತ್ ವಿಲ್ಫಿ ರೆಬಿಂಬಸಾಕ್ ಕಶಿ ಬರೆಂ ಸಾಹಿತ್ಯ್ ಆನಿ ತೆಂ ಸಾಹಿತ್ಯ್ ಪರ್ಗಟ್ ಕರ್ಚ್ಯಾ ಪತ್ರಾಚೆರ್ ಆಸ್ಚ್ಯಾ ಅಭಿಮಾನಾವಿಶಿಂ ಉಲವ್ನ್, ಅಪ್ಣಾನ್ ಬರಯಿಲ್ಲ್ಯೊ ಸರ್ವ್ ಕಥಾ ಕಾಣಿಕ್ ಪತ್ರಾಚೆರ್ ಪರ್ಗಟ್ ಕರುಂಕ್ ದಿಲ್ಲೊ ಉಡಾಸ್ ಕಾಡುನ್, 2005 ಇಸ್ವೆಂತ್ ಪಯ್ಲೆಪಾವ್ಟಿಂ ವಿಲ್ಫಿ ರೆಬಿಂಬಸಾಚಿ ’ಮೂಗುತಿ’ ಕಥಾ ವಲ್ಲಿ ಕ್ವಾಡ್ರಸಾನ್ ದಾಯ್ಜ್.ಕೊಮ್‌ಚೆರ್ ಪರ್ಗಟ್ ಕೆಲ್ಲಿ ಮ್ಹಣಾಲೊ. ಬಾಬ್ ಎಡ್ಡಿ ಸಿಕೇರಾನ್ ವಿಲ್ಫಿ ರೆಬಿಂಬಸಾಚ್ಯಾ ಆನಿ ತಾಚ್ಯಾ ಸುರ್ವಾತೆಚ್ಯಾ ಇಶ್ಟಾಗತೆಚ್ಯಾ ದಿಸಾಂನಿ ವಿಲ್ಫಿ ರೆಬಿಂಬಸಾಚೆಂ ಸಮಾಜಿಕ್ ಸ್ಪಂದನಾಚೆಂ ಚಿಂತಪ್ ತೊ ಕಶೆಂ ಪದಾಂ/ಕವಿತೆಂನಿ ಜಾಂವ್, ಕಥಾ/ನಾಟಕ್ ಜಾಂವ್ ಪುಣ್ ಸಾದ್ಯಾ ಲೊಕಾಕ್ ಪಾವಾಶೆಂ ಕರುಂಕ್ ಕಸಲಿ ಮಿನತ್ ಕರ್ತಾಲೊ ಮ್ಹಳ್ಳೊ ವಿವರ್ ದಿಲೊ.

ಕನ್ನಡ, ನಾಗರಿ ಆನಿ ರೋಮಿ ಲಿಪಿಯೆಂನಿ ಅಶೆಂ ತೀನ್ ಇ-ಬುಕಾರುಪಾರ್ ಲಿಪಿಯಂತರ್ ಕರುನ್ ಸಂಪಾದನ್ ಕರುನ್ ಆಶಾವಾದಿ ಪ್ರಕಾಶನಾಮುಖಾಂತ್ರ್ ಡಿಜಿಟಲ್ ರುಪಾರ್ ಪ್ರಕಾಶಿತ್ ಜಾಲ್ಲ್ಯಾ ’ವಿಲ್ಫಿ ರೆಬಿಂಬಸಾಚ್ಯೊ ವಿಂಚ್ಣಾರ್ ಕಥಾ’ ಮ್ಹಳ್ಳೆ ತೀನ್ ಇ-ಬೂಕಾಂಚೆಂ ಮೊಕ್ಳಿಕ್ ಚಲ್ತಚ್; ಗೊಂಯ್ ಕೊಂಕಣಿ ಅಕಾಡೆಮಿಚೊ ಅಧ್ಯಕ್ಷ್ (ಸಾಹಿತ್ಯ್ ಅಕಾಡೆಮಿ ಪುರಸ್ಕೃತ್) ಬಾಬ್ ಅರುಣ್ ಸಾಖರ್‌ದಾಂಡೆನ್ ಅಪ್ಲ್ಯಾ ಉಲವ್ಪಾಂತ್ ಹ್ಯಾ ಮಾರೆಕಾರ್ ಕಾಳಾರ್ ಮನಿಸ್ ಭಿರಾಂತೆನ್ ಅಪ್ಲ್ಯಾ ಘರಾಂತ್ ಬೊಸ್ಲಾ ಪುಣ್ ಅಪ್ಲೆಂ ಸಪಣ್, ಅಪ್ಲ್ಯಾ ಆವಯ್ ಭಾಶೆಚೊ ಫುಡಾರ್ ಆನಿ ಹುಸ್ಕೊ ಧರುನ್ ಡಿಜಿಟಲ್ ಮಾಧ್ಯಮಾಂತ್ ಆಮಿ ಪಯ್ಸ್ ಆಸುನ್‌ಯೀ ಲಾಗಿಂ ಜಾಲ್ಯಾಂವ್ ಆನಿ ಅಸಲೊ ವಾವ್ರ್ ಮುಖಾರ್ ವಚುಂಕ್ ಜಾಯ್ ಆನಿ ಅಪ್ಣಾಚೊ ಹ್ಯಾ ವಾವ್ರಾಕ್ ಪಾಟಿಂಬೊ ಆಸ್ತಲೊ ಮ್ಹಣಾಲೊ. ಬಾಬ್ ಮಿಗೇಲ್ ಬ್ರಗಾಂಜ ಅಪ್ಲ್ಯಾ ಉಲವ್ಪಾಂತ್ ಜಾಗತಿಕ್ ಕೊಂಕಣಿ ಭಾಸ್ ಎಕಾ ಪ್ರಾಂತ್ಯಾಂತ್ ಸಯ್ತ್ ಸಭಾರ್ ಬೊಲಿಂನಿ ವಾಂಟುನ್ ಗೆಲ್ಯಾ ಪುಣ್ ಡಿಜಿಟಲ್ ಮಾತ್ರ್ ಏಕ್ ಸಕತ್ ಹ್ಯಾ ಸರ್ವ್ ಬೊಲಿಯಾಂಕ್, ಸರ್ವ್ ಲಿಪಿಯಾಂಕ್ ಎಕಾ ಸುತಾನ್ ಭಾಂದುಂಕ್ ಕರ್ಚಿ ಶ್ಯಾಥಿ ಆಸಾ ಮ್ಹಣಾಲೊ. ಬಾಬ್ ಆಸ್ಟಿನ್ ಪ್ರಭುನ್ ವಿಲ್ಫಿ ರೆಬಿಂಬಸ್ ಏಕ್ ಸಂಸ್ಥೊ ಮ್ಹಣುನ್ ತಾಚ್ಯಾ ಮಾನಾಕ್, ತಾಚ್ಯಾ ನಾಂವಾರ್ ಆಮಿ ಪಾಟ್ಲ್ಯಾ ತೀನ್ ವರ್ಸಾಂಥಾವ್ನ್ ರಾಶ್ಟ್ರೀಯ್ ಮಟ್ಟಾಚೆ ಕೊಂಕಣಿ ಸಾಹಿತಿಕ್ ಸ್ಪರ್ಧೊ ಚಲವ್ನ್ ವೆಲಾ ಆನಿ ಹ್ಯೇ ಪಾವ್ಟಿಂ ಪಯ್ಲೊ ಜಾಗತಿಕ್ ಮಟ್ಟಾಚೊ ಕೊಂಕಣಿ ಸಾಹಿತಿಕ್ ಸ್ಪರ್ಧೊ ಆಮಿ ಆಸಾ ಕೆಲಾ ಮ್ಹಣಾಲೊ. ಬಾಯ್ ವೀಣಾ ರೆಬಿಂಬಸ್ ಪಾಯ್ಸ್ ಖತಾರ್ ಅಪ್ಲ್ಯಾ ಉಲವ್ಪಾಂತ್ ’ಕಥಾಪಾಠಾಂತ್ ವಿಲ್ಫಿ ರೆಬಿಂಬಸಾಚ್ಯಾ ಕಥೆಂಚೆರ್ ಜ್ಯಾ ಮಾಪಾನ್ ಅಧ್ಯಯನ್/ಸಮೀಕ್ಷಾ ಚಲ್ಲಿ ತೆಂ ಪಳೆವ್ನ್ ಖರೊಚ್ ಜಾವ್ನ್ ಡ್ಯಾಡಿಚ್ಯಾ ಬರಪಾಂಚೆರ್ ಅಭಿಮಾನ್ ಚಡ್ಲೊ, ಆನಿ ಡ್ಯಾಡಿಚೆಂ ಸಾಹಿತ್ಯ್ ಡಿಜಿಟಲ್ ಸಂಸಾರಾಕ್ ಹಾಡ್ಚೆಂ ಅಪ್ಣಾಚೆಂಯ್ ಸಪಣ್ ಜಾವ್ನಾಸ್ಲೆಂ ಪುಣ್ ತೆಂ ಸಪಣ್ ಜ್ಯಾರಿಯೆರ್ ಹಾಡ್‌ಲ್ಲ್ಯಾ ಆಶಾವಾದಿ ಪ್ರಕಾಶನಾಕ್ ಆನಿ ತಾಕಾ ಪಾಟಿಂಬೊ ದಿಲ್ಲ್ಯಾ ಸಮೇಸ್ತಾಂಚೊ ಧಿನ್ವಾಸ್ ಪಾಟಯ್ಲೊ’. ಬಾಬ್ ವಿಶ್ವಾಸ್ ರೆಬಿಂಬಸಾನ್ ಕಶೆಂ ಏಕ್ ಭುರ್ಗೊ ಜಾವ್ನ್ ಆಸ್ಲೆವೆಳಾರ್ ವಿಲ್ಫಿಯಾಬ್ ಪದಾಂ ರಸ್ಚೆವೆಳಾರ್ ಕಶೆಂ ಸಾದಿಂ ಉತ್ರಾಂ ವಾಪಾರುಂಕ್ ಆನಿ ಮೀಟರಾಂನಿ ಬರಂವ್ಕ್ ಆನಿ ಸಾದ್ಯಾ ಲೊಕಾಂಚ್ಯಾ ಕಾಳ್ಜಾಕ್ ಪಾಂವ್ಚಿ ವಾಟ್ ಕಸಲಿ ಮ್ಹಳ್ಳೆವಿಶಿಂ ಉಲಯ್ಲೊ. ಬಾಬ್ ಜೆರಿ ಡಿಮೆಲ್ಲೊ ಬೆಂದುರ್ ಕೆನಡಾ ಥಾವ್ನ್ ಅಪುಣ್ ಏಕ್ ಸಂಗೀತ್‍ಕಾರ್, ಗಾವ್ಪಿ ಜಾವ್ನ್ ವಿಲ್ಫಿ ರೆಬಿಂಬಸಾಚ್ಯಾ ಪಂಗ್ಡಾಂತ್ ಗಾಯನ್ ಕರುಂಕ್ ಆವ್ಕಾಸ್ ಲಾಭ್‌ಲ್ಲೆವಿಶಿಂ ಅಪ್ಲೊ ಅನ್ಭೋಗ್ ವಾಂಟುನ್ ಘೆವ್ನ್ ವಿಲ್ಫಿ ರೆಬಿಂಬಸಾಚ್ಯಾ ತೀನ್ ಕಾಣಿಯಾಂಚೊ ಮಟ್ವೊ ಸಾರ್ ದಿಲೊ.

ಶಯ್ಲೇಂದ್ರ ಮೆಹ್ತಾನ್ ’ಕಥಾಪಾಠ್ ದುಸ್ರಿ ಶಿಂಕಳ್’ ಹಾಂತುಂ ಪಾಟಿಂಭೊ ದಿಲೆಲ್ಯಾ ಕೊಲೆಜಿಚ್ಯಾ ಪ್ರಾಧ್ಯಾಪಕ್/ಮುಖೇಸ್ತಾಂಕ್; ಬಾಯ್ ಅಂಜು ಸಾಖರ್‌ದಾಂಡೆ (ಧೆಂಪೆ ಕೊಲೆಜ್ ಗೊಂಯ್), ಬಾಬ್ ಪೂರ್ಣಾನಂದ ಚ್ಯಾರಿ (ಶ್ರೀ ಮಲ್ಲಿಕಾರ್ಜುನ ಕೋಲೆಜ್ ಗೊಂಯ್), ಬಾಯ್ ರಾಜಶ್ರೀ ಸೈಲ್ (ಫಾ|ಆಗ್ನೆಲ್ ಕೊಲೆಜ್ ಪಿಲಾರ್ ಗೊಂಯ್), ಬಾಯ್ ಪೂಜಾ ರತ್ನಾಕರ್, ಬಾಯ್ ಯೋಗಿತಾ ವರ್ಣೇಕರ್, ಬಾಯ್ ಸಿಯಾಲಿನಿ ಫೆರ್ನಾಂಡಿಸ್ (ಕಾರ್ಮೆಲ್ ಕೊಲೆಜ್ ಗೊಂಯ್) ಹಾಂಕಾಂ ಡಿಜಿಟಲ್ ಶಿಫಾರಸ್ ಪತ್ರ್ ದಿವುನ್ ಉಲ್ಲಾಸ್ ಪಾಟಯ್ಲೆಂ.

ಕಥಾಪಾಠ್ ದುಸ್ರಿ ಶಿಂಕಳ್ ಬರೆ ರಿತಿನ್ ಚಲಯಿಲ್ಲೆವಿಶಿಂ ಉಲಯಿತ್ ಆಯೋಜಕಾಂ ಪಯ್ಕಿಂತ್ ಪಯ್ಲೆಂ ಅಭಿಲ್ ಭಾರತೀಯ್ ಕೊಂಕಣಿ ಪರಿಶದೆಚಿ ಅಧ್ಯಕ್ಷ್ ಬಾಯ್ ಉಶಾ ರಾಣೆನ್ ಉಲವ್ನ್ ಸಮೇಸ್ತ್ ವಿಧ್ಯಾರ್ಥಿಂಚಿ ಥೊಕ್ಣಾಯ್ ಕೆಲಿ. ಬಾಯ್ ಅಂಜು ಸಾಖರ್‌ದಾಂಡೆನ್ ಸಯ್ತ್ ಹ್ಯಾ ಕಥಾಪಾಠ್ ಮುಖಾಂತ್ರ್ ಮಂಗ್ಳುರಿ ಮುಳಾಚ್ಯೊ ಕಥಾ ಮಾತ್ರ್ ನ್ಹಯ್, ಕೊಂಕಣಿ ಭಾಶೆಚ್ಯಾ ಹೆರ್ ಬೊಲಿಂಚಿಂ ಸಭಾರ್ ಉತ್ರಾಂ ಸಯ್ತ್ ಶಿಕುಂಕ್ ಏಕ್ ಬರಿ ಸಂಧಿ ಮೆಳ್ಳಿ ಮ್ಹಣಾಲಿ. ಬಾಬ್ ಗೌರೀಶ್ ವೆರ್ಣೇಕರಾನ್ ಹ್ಯಾ ಕಥಾಪಾಠ್ ಮುಖಾಂತ್ರ್ ಕೊಂಕಣಿ ಕಥೆಂಚಿ ಸಕತ್ ಸರ್ವಾಂಕ್ ಸಮ್ಜುಂಕ್ ಏಕ್ ಆವ್ಕಾಸ್ ಕರುನ್ ದಿಲೊ ಮ್ಹಣಾಲೊ.

ಉಜ್ವಾಡ್ ಪಂದ್ರಾಳ್ಯಾಚ್ಯಾ ಸಂಪಾದಕಾನ್ ಮಾ|ರೋಯ್ಸನ್ ಫೆರ್ನಾಂಡಿಸಾನ್ ಧಿನ್ವಾಸ್ ಪಾಟವ್ನ್, ಜಶೆಂ ದೋನ್ ’ಕಥಾಪಾಠ್’ ವೆಬಿನಾರ್ ಶಿಂಕಳೆಂಕ್ ಭೋವ್ ಬರೆ ರಿತಿನ್ ಕೆಲ್ಲೆಪರಿಂಚ್ ಫುಡೆಂಯ್ ಹಾಚ್ಯಾಕೀ ಬರೆ ರಿತಿನ್ ಆಮಿ ವೆಬಿನಾರಾಂ ಆಯೋಜಿತ್ ಕರ್ತೆಲ್ಯಾಂವ್ ಮ್ಹಣಾಲೊ.

ಬಾಯ್ ಕ್ಯಾರಲ್ ವೇಗಸ್ ಮುಂಬಯ್, ಕೊನ್ಸೆಪ್ಟಾ ಫೆರ್ನಾಂಡಿಸ್ ಆಳ್ವಾ ಬೆಂಗ್ಳುರ್, ಎಚ್ಚೆಮ್ ಪೆರ್ನಾಲ್, ಸ್ಮಿತಾ ಶೆಣಯ್ ಮಂಗ್ಳುರ್, ಬಾಬ್ ಆರ್. ಎಸ್.ಭಾಸ್ಕರ್ ಕೊಚ್ಚಿನ್, ಮೊನಿಕಾ ಡೆಸಾ ಡಬ್ಲಿನ್, ಲಾರೆನ್ಸ್ ವಿ. ಬಾರ್ಬೋಜ್ ಮ್ಯಾಂಚೆಸ್ಟರ್ ಯುಕೆ, ನಾನು ಮರೋಳ್ ದುಭಯ್ ಆನಿ ಸಭಾರ್ ಹೆರಾಂನಿ ಹ್ಯಾ ವೆಬಿನಾರಾಂತ್ ಭಾಗ್ ಘೆತ್ಲೊ.

ಬಾಯ್ ಸಿಯಾಲಿನಿ ಫೆರ್ನಾಂಡಿಸಾನ್ ಹೆಂ ವೆಬಿಬಾರ್ ಚಲವ್ನ್ ವ್ಹೆಲೆಂ.

ಖಬರ್: ಆಮ್ಚೊ ಭಾತ್ಮಿ

[खबर] कथापाठ II - कथापाठ राश्ट्रीय वेबिनारांत ’विलफी रेबिंबसाच्यो विंचणार कथा’ ई-बूक मोकळीक

कथापाठ राश्ट्रीय वेबिनारांत ’विलफी रेबिंबसाच्यो विंचणार कथा’ ई-बूक मोकळीक

२९ माय २०२१: आशावादी प्रकाशन, अखील भारतीय कोंकणी परिशद आनी उज्वाड पंद्राळे हांच्या जोड पालवांत चल‌ल्ल्या कथापाठ दूसऱ्या शिंकळेंत, विलफी रेबिंबसान १९७०-व्या दाकड्यांत बरयिल्ल्या ’पिंत्रां’, ’मूगुती’ आनी ’फातिमाचें काजार’ काणियांचेर राश्ट्रीय मट्टाचें अध्ययन कामासाळ ’कथापाठ दूसऱ्या शिंकळेचें संपणें काऱ्यें’ माय मयन्याच्या २९ तारिकेच्या सन्वारा सांजेर ४:३० थावन ६:३० पऱ्यांत डिजिटल माध्यमांत चल्लें. वल्ली क्वाड्रसान कन्नड, नागरी तशेंच रोमी लिपियेंनी लिपियंतर करून, संपादन करून आशावादी प्रकाशनाखाल डिजिटल प्रकाशन केल्लो ’विलफी रेबिंबसाच्यो विंचणार कथा’ ई-बुकाचें मोकळीक काऱ्यें हेच संधर्भार चल्लें.

कार्मेल कोलेज गोंय‌ची शिक्षकी बाय सियालिनी फेर्नांडिसान जेराल येवकार मागून कशें काणी आनी जिणी एकामेका सावळी धरून समाजीक रुपां आनी मवल्यांक आटाप्तात म्हणून भुर्ग्यापणाथावन मनीस जाणतो जातासर कथा ताच्या जिवितांत एक ना एक रितीन उपकाराक पडता म्हणाली. उग्तावण उलवप जावन कोंकण मयना बाय मीना रेबिंबसान अजीक चाळीस वर्सां पयलें बरयिल्ल्या काणियांचो उडास काडून, त्या काळाक परत आपवन वेल्लो अनभोग करून दिल्लेपरीं जालें. विलफी रेबिंबसाच्या गितांक कशें समाजेन वर्त्या मोगान स्विकार केल्लोकी, तेच मापान ताच्या काणियांक सयत लोकान खायस केल्ल्याक खाल्तेपणीं धिन्वास पाटयलो.

येवकार उलवपांत बाब वल्ली क्वाड्रसान अपल्या थोड्या वावरांत भोव थोडेपावटीं अपणान केल्ल्या कामाचेर अभिमान भगला आनी त्या भोव थोड्या कामां पयकिंत हें एक कथापाठ वेबिनार शिंकळ आनी हे ई-बूक म्हणून कशें अपूण मंगळुराक आयिल्ल्या सुर्वेर थावन आज पाऱ्यांत बाब अवील रासकिन्ह आनी विलफी रेबिंबसाक ऋणी जावन आसां म्हणून विलफी रेबिंबसाच्यो कथा आडियो बुकारुपार फुडल्या मयन्यांनी प्रचारीत कर्चेविशीं माहेत दिवून, फुडल्या कथापाठांनी कोंकणिच्या विंचणार कथाकारांच्यो कथेंचेर अध्ययन चलंवचेविशीं माहेत दिली.

साहित्य अकाडेमी पुरसकृत कवी बाब मेलवीन रोड्रिगसान विलफी रेबिंबसाच्या बरपांविशीं उलवन, ताच्या बर्पांचेर राश्ट्रीय मट्टाचें अध्ययन चलंवचे मारिफात सर‌ल्ल्या अत्म्याक सुंर्गारायिल्लेपरीं म्हणालो तशेंच विलफी रेबिंबसाच्या समाजीक काळजी, संवेदनात्मक चिंतप कशें ताच्या दरेका बरपांत निशेतालें म्हणालो. गोंयचो बाब दामोदर मावजो अपल्या उलवपांत ’वेळाक सरी जावन मात्यार चेपें’ म्हणचेपरीं, आयचो काळ डिजिटल जालासतां, आमीं आसलेकडेच उरानासतां, डिजिटल संसारातेवशीन पावलां काडुंक फावो आनी गोंयांत सयत डिजिटल संसारांत जांवच्या कोंकणी साहितीक कामांचो उल्लेक करिलागलो. काणीक पत्राचो आधलो संपादक बाब अवील रासकिन्ह अपल्या उलवपांत विलफी रेबिंबसाक कशी बरें साहित्य आनी तें साहित्य पर्गट कर्च्या पत्राचेर आसच्या अभिमानाविशीं उलवन, अपणान बरयिल्ल्यो सर्व कथा काणीक पत्राचेर पर्गट करुंक दिल्लो उडास काडून, २००५ इस्वेंत पयलेपावटीं विलफी रेबिंबसाची ’मूगुती’ कथा वल्ली क्वाड्रसान दायज.कोम‌चेर पर्गट केल्ली म्हणालो. बाब एड्डी सिकेरान विलफी रेबिंबसाच्या आनी ताच्या सुर्वातेच्या इश्टागतेच्या दिसांनी विलफी रेबिंबसाचें समाजीक स्पंदनाचें चिंतप तो कशें पदां/कवितेंनी जांव, कथा/नाटक जांव पूण साद्या लोकाक पावाशें करुंक कसली मिनत कर्तालो म्हळ्ळो विवर दिलो.

कन्नड, नागरी आनी रोमी लिपियेंनी अशें तीन ई-बुकारुपार लिपियंतर करून संपादन करून आशावादी प्रकाशनामुखांत्र डिजिटल रुपार प्रकाशीत जाल्ल्या ’विलफी रेबिंबसाच्यो विंचणार कथा’ म्हळ्ळे तीन ई-बूकांचें मोकळीक चल्तच; गोंय कोंकणी अकाडेमिचो अध्यक्ष (साहित्य अकाडेमी पुरसकृत) बाब अरूण साखर‌दांडेन अपल्या उलवपांत ह्या मारेकार काळार मनीस भिरांतेन अपल्या घरांत बोसला पूण अपलें सपण, अपल्या आवय भाशेचो फुडार आनी हुसको धरून डिजिटल माध्यमांत आमी पयस आसून‌यी लागीं जाल्यांव आनी असलो वावर मुखार वचुंक जाय आनी अपणाचो ह्या वावराक पाटिंबो आसतलो म्हणालो. बाब मिगेल ब्रगांज अपल्या उलवपांत जागतीक कोंकणी भास एका प्रांत्यांत सयत सभार बोलिंनी वांटून गेल्या पूण डिजिटल मात्र एक सकत ह्या सर्व बोलियांक, सर्व लिपियांक एका सुतान भांदुंक कर्ची श्याथी आसा म्हणालो. बाब आसटीन प्रभून विलफी रेबिंबस एक संस्थो म्हणून ताच्या मानाक, ताच्या नांवार आमी पाटल्या तीन वर्सांथावन राश्ट्रीय मट्टाचे कोंकणी साहितीक स्पर्धो चलवन वेला आनी ह्ये पावटीं पयलो जागतीक मट्टाचो कोंकणी साहितीक स्पर्धो आमी आसा केला म्हणालो. बाय वीणा रेबिंबस पायस खतार अपल्या उलवपांत ’कथापाठांत विलफी रेबिंबसाच्या कथेंचेर ज्या मापान अध्ययन/समीक्षा चल्ली तें पळेवन खरोच जावन ड्याडिच्या बरपांचेर अभिमान चडलो, आनी ड्याडिचें साहित्य डिजिटल संसाराक हाडचें अपणाचेंय सपण जावनासलें पूण तें सपण ज्यारियेर हाड‌ल्ल्या आशावादी प्रकाशनाक आनी ताका पाटिंबो दिल्ल्या समेसतांचो धिन्वास पाटयलो’. बाब विश्वास रेबिंबसान कशें एक भुर्गो जावन आसलेवेळार विलफियाब पदां रसचेवेळार कशें सादीं उत्रां वापारुंक आनी मीटरांनी बरवंक आनी साद्या लोकांच्या काळजाक पांवची वाट कसली म्हळ्ळेविशीं उलयलो. बाब जेरी डिमेल्लो बेंदूर केनडा थावन अपूण एक संगीत‍कार, गावपी जावन विलफी रेबिंबसाच्या पंगडांत गायन करुंक आवकास लाभ‌ल्लेविशीं अपलो अनभोग वांटून घेवन विलफी रेबिंबसाच्या तीन काणियांचो मटवो सार दिलो.

शयलेंद्र मेहतान ’कथापाठ दुस्री शिंकळ’ हांतूं पाटिंभो दिलेल्या कोलेजिच्या प्राध्यापक/मुखेसतांक; बाय अंजू साखर‌दांडे (धेंपे कोलेज गोंय), बाब पूर्णानंद च्यारी (श्री मल्लिकार्जून कोलेज गोंय), बाय राजश्री सैल (फा|आग्नेल कोलेज पिलार गोंय), बाय पूजा रत्नाकर, बाय योगिता वर्णेकर, बाय सियालिनी फेर्नांडीस (कार्मेल कोलेज गोंय) हांकां डिजिटल शिफारस पत्र दिवून उल्लास पाटयलें.

कथापाठ दुस्री शिंकळ बरे रितीन चलयिल्लेविशीं उलयीत आयोजकां पयकिंत पयलें अभील भारतीय कोंकणी परिशदेची अध्यक्ष बाय उशा राणेन उलवन समेसत विध्यार्थिंची थोकणाय केली. बाय अंजू साखर‌दांडेन सयत ह्या कथापाठ मुखांत्र मंगळुरी मुळाच्यो कथा मात्र न्हय, कोंकणी भाशेच्या हेर बोलिंचीं सभार उत्रां सयत शिकुंक एक बरी संधी मेळ्ळी म्हणाली. बाब गौरीश वेर्णेकरान ह्या कथापाठ मुखांत्र कोंकणी कथेंची सकत सर्वांक समजुंक एक आवकास करून दिलो म्हणालो.

उज्वाड पंद्राळ्याच्या संपादकान मा|रोयसन फेर्नांडिसान धिन्वास पाटवन, जशें दोन ’कथापाठ’ वेबिनार शिंकळेंक भोव बरे रितीन केल्लेपरिंच फुडेंय हाच्याकी बरे रितीन आमी वेबिनारां आयोजीत कर्तेल्यांव म्हणालो.

बाय क्यारल वेगस मुंबय, कोन्सेपटा फेर्नांडीस आळवा बेंगळूर, एच्चेम पेर्नाल, स्मिता शेणय मंगळूर, बाब आर. एस.भासकर कोच्चीन, मोनिका डेसा डबलीन, लारेन्स वी. बारबोज म्यांचेसटर युके, नानू मरोळ दुभय आनी सभार हेरांनी ह्या वेबिनारांत भाग घेतलो.

बाय सियालिनी फेर्नांडिसान हें वेबिबार चलवन व्हेलें.

आमचो भात्मी

[Khobor] Kothapatth - II. Kothapatth Raxttri-i Vebinarant ’Wilfy Rebimbosacheo Venchik Kotha’ i-buk Mokllik

22 Mai 2021: Ashawadi Prakashan, Okhil bharoti-i Konkonni Porixod ani Ujvaad Pondralle hanchea zodd palovant chol‌l'lea Kothapatth dusrea xinkollent, Wilfy Rebimbosan 1970-vea dakddeant boroyil'lea ’Pintram’, ’Muguti’ ani ’Fatimachem kazar’ kanniancher raxttri-i mott'ttachem odhyoin kamasall ’kothapatth dusrea xinkollechem sompnnem karyem’ Mai moineachea 29 tarikechea sonvara sanjer 4:30 thaun 6:30 poreant ddijittol madhyomant chol'lem. Valley Quadrosan kon'noddo, nagori toxench romi lipiemni lipiyontor korun, sompadon korun axavadi prokaxonakhal ddijittol prokaxon kel'lo ’Wilfy Rebimbusacheo vinchnnar kotha’ i-bukachem mokllik karyem hech sondhorbhar chol'lem.

Carmel College Gõy‌chi xikxoki Bai Cialini Fernanddisan jeral yeukar magun koxem kanni ani jinni ekameka saulli dhorun somajik rupam ani mouleank attaptat mhonnun bhurgeaponnathaun monis zannto zatasor kotha tachea jivitant ek na ek ritin upkarak poddta mhonnali. Ugtaunn uloup zaun konkonn moina Bai Meena Rebibosan ojik challis vorsam poilem boroyil'lea kanniancho uddas kaddun, tea kallak porot apoun vel'lo onbhog korun dil'leporim zalem. Wilfy Rebimbusachea gitank koxem somajen vortea mogan svikar kel'loki, tech mapan tachea kanniank soit lokan khais kel'leak khalteponnim dhinvas pattoilo.

Yeukar uloupant Bab Valley Quadrosan oplea thoddea vaurant bhovo thoddepauttim opnnan kel'lea kamacher obhiman bhogla ani tea bhovo thoddea kamam poikint hem ek kothapatth vebinar xinkoll ani he i-buk mhonnun koxem opunn mongllurak ayil'lea surver thaun az pareant bab ovil raskinh ani Wilfy Rebimbusak rinni zaun asam mhonnun Wilfy Rebimbusacheo kotha addio bukarupar fuddlea moineamni procharit korchevixim mahet divun, fuddlea kothapatthamni konkonnichea vinchnnar kothakarancheo kothencher odhyoin cholomvchevixim mahet dili.

Sahity okaddemi puroskrit kovi Bab Melwyn Rodriguesan Wilfy Rebimbusachea boropamvixim uloun, tachea borpancher raxttri-i mott'ttachem odhyoin cholomvche marifat sor‌l'lea otmeak sumrgarayil'leporim mhonnalo toxench Wilfy Rebimbusachea somajik kallji, somvedonatmok chintop koxem tachea doreka boropant nixetalem mhonnalo. Gõycho Bab Damodor Mauzo oplea uloupant ’vellak sori zaun matear chepem’ mhonncheporim, aicho kall ddijittol zalastam, amim aslekoddech uranastam, ddijittol somsarateuxin paulam kaddunk favo ani Gõyant soit ddijittol somsarant zamvchea konkonni sahitik kamancho ul'lek korilaglo. Kannik potracho adhlo sompadok Bab Avil Rasquinh oplea uloupant Wilfy Rebimbusak koxi borem sahity ani tem sahity porgott korchea potracher aschea obhimanavixim uloun, opnnan boroyil'leo sorv kotha kannik potracher porgott korunk dil'lo uddas kaddun, 2005 isvent poilepauttim Wilfy Rebimbusachi ’muguti’ kotha Valley Quadrosas daaiz.com'‌cher porgott kel'li mhonnalo. Bab Eddie Sikeran Wilfy Rebimbusachea ani tachea survatechea ixttagotechea disamni Wilfy Rebimbusachem somajik spondonachem chintop to koxem podam/kovitemni zamv, kotha/nattok zamv punn sadea lokak pavaxem korunk kosoli minot kortalo mholl'llo vivor dilo.

Kon'noddo, nagori ani romi lipiemni oxem tin i-bukarupar lipiyontor korun sompadon korun axavadi prokaxonamukhantr ddijittol rupar prokaxit zal'lea ’Wilfy Rebimbusacheo vinchnnar kotha’ mholl'lle tin i-bukanchem mokllik choltoch; Gõy konkonni okaddemicho odhyokx (sahity okaddemi puroskrit) Bab Arun Sakhor‌danden oplea uloupant hea marekar kallar monis bhiranten oplea ghorant bosla punn oplem soponn, oplea auy bhaxecho fuddar ani husko dhorun ddijittol madhyomant ami pois asun‌yi lagim zaleamv ani osolo vaur mukhar vochunk zai ani opnnacho hea vaurak pattimbo astolo mhonnalo. Bab Miquel Braganza oplea uloupant zagotik konkonni bhas eka pranteant soit sobhar bolimni vanttun gelea punn ddijittol matr ek sokot hea sorv boliank, sorv lipiank eka sutan bhandunk korchi xeathi asa mhonnalo. Bab Austin Prabhu USA'n Wilfy Rebimbus ek somstho mhonnun tachea manak, tachea namvar ami pattlea tin vorsanthaun raxttri-i mott'ttache konkonni sahitik spordho choloun vela ani hye pauttim poilo zagotik mott'ttacho konkonni sahitik spordho ami asa kela mhonnalo. Bai Veena Rebimbus Pais khotar oplea uloupant ’kothapatthant Wilfy Rebimbusachea kothencher jea mapan odhyoin/somikxa chol'li tem polleun khoroch zaun ddeaddichea boropancher obhiman choddlo, ani ddeaddichem sahity ddijittol somsarak haddchem opnnachem-i soponn zaunaslem punn tem soponn jearier hadd‌l'lea Ashawadi Prakashan ani taka pattimbo dil'lea somestancho dhinvas pattoilo’. Bab Vishwas Rebimbusan koxem ek bhurgo zaun aslevellar Wilfiab podam roschevellar koxem sadim utram vaparunk ani mittoramni borounko ani sadea lokanchea kallzak pamvchi vatt kosoli mholl'llevixim uloilo. Bab Jerry Dmello Bendur Cadana thaun opunn ek songit‍kar, gaupi zaun Wilfy Rebimbusachea pongddant gain korunk aukas labh‌l'levixim oplo onbhog vanttun gheun Wilfy Rebimbusachea tin kanniancho mottvo sar dilo.

Bab Shailendra Mehtan ’kothapatth dusri xinkoll’ hantum pattimbho dilelea kolejichea pradheapok/mukhestank; Bai Anju Sakhor‌dandde (Dhempe College Gõy), Bab Purnnanonda Chari (Shree Mallikarjuna College Gõy), Bai Rajashree Sail (Fr|Agnel College Pilar Gõy), Bai Pooja Ratnakar, Bai Yogita Vernekar, Bai Cialini Fernandes (Carmel College Gõy) hankam ddijittol xifaros potr divun ul'las pattoilem.

Kothapatth dusri xinkoll bore ritin choloyil'levixim uloyit ayozokam poikint poilem obhil bharoti-i konkonni porixodechi odhyokx Bai Usha Ranen uloun somest vidhearthinchi thoknnai keli. Bai Anju Sakhardanden soit hea kothapatth mukhantr monglluri mullacheo kotha matr nhoi, konkonni bhaxechea her bolinchim sobhar utram soit xikunk ek bori sondhi mell'lli mhonnali. Bab gourix vernnekoran hea kothapatth mukhantr konkonni kothenchi sokot sorvank somzunk ek aukas korun dilo mhonnalo.

Ujvadd pondralleachea sompadokan Ma|Royson Fernandesan dhinvas pattoun, zoxem don ’kothapatth’ vebinar xinkollenk bhovo bore ritin kel'leporinch fuddem-i hacheaki bore ritin ami vebinaram ayojit korteleamv mhonnalo.

Bai Carol Veigas Mumbai, Concepta Fernanes Alva Bangalore, HM Pernal, Smitha Shennoy Mangalore, Bab R.S.Bhaskar Cochin, Monika Desa Dublin, Lawrence V. Barboza Manchester UK, Nanu Marol Dubai ani sobhar heramni hea vebinarant bhag ghetlo.

Bai Cialini Fernandesan hem vebibar choloun vhelem.

Amcho Bhatmi