ಯಂತ್ರಾಂಚಿಂ ಸೊಧ್ನಾಂ ಕರುನ್, ಯಂತ್ರಾಂ ಕರ್ನಾಂ ಕಾಮಾಂ ಕರವ್ನ್ ಮನಿಸ್ ಕಾಂಯ್ ದೊಡೆಂ ಜಿವಿತ್ ಜಿಯೆಂವ್ಕ್ ಲಾಗ್ಲಾ ಜಾಯ್ಜಯ್. ದೆಕುನ್ ಮನ್ಶಾಚ್ಯಾ ದಿಸ್ಪೊಡ್ತ್ಯಾ ಜಿವಿತಾಂತ್ ದಾಕವ್ಪಾಕ್ ಏಕ್ ಜಿವಿತ್ ಪುಣ್ ಪಾಳುಂಕ್ ಅನ್ಯೇಕ್ ಜಿವಿತ್ ಜಾಲಾಂ. ಹೆಂ ಫಕತ್ ವಿಗ್ಯಾನ್ ವ ಶಿಕ್ಪಾ ಶೆತಾಂತ್ ಮಾತ್ರ್ ನ್ಹಯ್, ಹರೇಕಾ ಶೆತಾಂತ್ ಆಮಿ ಪಳೆತಾಂವ್ ಅಸಲೆಂಚ್ ದೊಡೆಂಪಣ್. ಸಾಂಗ್ಚೆಂ ಏಕ್ ಆನಿ ಕರ್ಚೆಂ ಬೊಲ್ತೆಂಚ್. ಜಾಂವ್ ಆಮ್ಚೆ ಆಚಾರ್-ವಿಚಾರ್, ಆಮ್ಚೆ ಸಂಬಂಧ್, ಆಮ್ಚೊ ಧರ್ಮ್, ಆಮ್ಚೆ ದೇವ್..... ಹರೇಕಾ ಶೆತಾಂತ್ ಸಮಾಜಿಕ್ ಅನೀತ್ ಆನಿ ಗುನ್ಯಾಂವ್ ಚಡುನ್ ಆಸಾ ತರ್ ಹೆಂಚ್ ದೊಡೆಂಪಣ್ ಕಾರಣ್ ಮ್ಹಣ್ಚ್ಯಾಂತ್ ದುಭಾವ್ ನಾ.

ಸಂಸಾರಾಂತ್ ಭಾರತ್ ದೇಶ್ ನಾಂವ್ ವೆಲ್ಲೊ ಜಾವ್ನಾಸಾ ವೈವಿಧ್ಯತೆಕ್ ಲಾಗುನ್, ಪುಣ್ ಆಮಿ ಆಮ್ಚೆಭಿತರ್ ಕಿತ್ಲಿಂ ವೆಗ್ಳಿಂ ಜಾವ್ನ್ ಆಸಾಂವ್, ವೆಗ್ಳಿಂ ಜಾವ್ನ್ ಜಿಯೆತಾಂವ್ ಮ್ಹಳ್ಳ್ಯಾಚೆರ್ ಆಮಿ ಎಕೊಡೊ ನಿಯಾಳ್ ಕೆಲೊ ತರ್ ಆಮ್ಚೆಭಿತರ್ಲೆಂ ದೊಡೆಂಪಣ್ ಅಮ್ಕಾಂಚ್ ಸುಡಾಳ್ ಜಾವ್ನ್ ದಿಸ್ತಾ. ಆಮ್ಚೊ ಧರ್ಮ್ ಸಯ್ತ್ ದಾಕವ್ಪಾಕ್ ಏಕ್ ಪುಣ್ ಪಾಳುಂಕ್ ಅನ್ಯೇಕ್ ಜಾಲಾ. ಮನಿಸ್ ಎಕಾಮೆಕಾಚಿಂ ಮಾಸಾಂ ಖಾಂವ್ಕ್ ನಿಬಾಂ ಸೊದುನ್ ಜಿಯೆತಾ, ಮನ್ಶಾಪಣಾಚಿಂ ಮುಲ್ಯಾಂ ಚಡಂವ್ಚಿಂ ಯಂತ್ರಾಂ ಯೆದೊಳ್ ಯೆಂವ್ಕ್ ನಾಂತ್. ಆನಿ ಹ್ಯಾ ಸರ್ವಾಚೊ ಶೆವೊಟ್ ಎಕ್‌ಚ್; ನಿರ್ನಾಮ್. ಪುಣ್ ತಿತ್ಲೆಂ ಚಿಂತುಂಕ್ ಮನ್ಶಾಕ್ ಕಂಯ್ ಪುರ್ಸೊತ್ ಆಸಾ.

- ಸಂ

ಚಿತ್ರಾಂ ವಿಚಿತ್ರಾಂ ಆಂಕ್ಡೊ - 5

ಮಯ್ನ್ಯಾಚೆಂ ಚಿತ್ರ್ | मयन्याचें चित्र | moineachem chitr

[ ಮಯ್ನ್ಯಾಚಿ ಕವಿತಾ ]

ಯೇ ಕೃಷ್ಣಾ ಯೇ

ಮಾ ಮಾತೆಚಿ ಕರ್ತಾತ್ ರಕ್ಷಾ
ದಿತಾತ್ ತಿಕಾ ಅಗ್ನಿ ಪರೀಕ್ಷಾ
ರಾಮ್ ರಾಜ್ಯ್ ಕೆದಾಳಾ ಯೆತಾ
ರಾಕೊನ್ ಅಸಾ ಸೀತಾ
ಯೇ ಕೃಷ್ಣಾ ಯೇ...... ವೇಳ್ ಅಯ್ಲಾ

ಅಸಾತ್ ಕುಮೊಕ್ ಕರ್ತೆಲೆ
ಭ್ಯೆಂ ದಿಸ್ತಾ! ಬರೊ ವಾ ಬೊಲ್ಪೊ
ಹಾತ್ ದಿಲ್ಯಾರ್ ಧರ್ತಾತ್ ಭುಜಾಂ
ಜಾತಾ ಕುಮ್ಕೆಚೊಯ್ ಸೊಲ್ಲೊ
ಯೇ ಕೃಷ್ಣಾ ಯೇ...... ವೇಳ್ ಅಯ್ಲಾ

ಅಲ್ತಾರಿರ್ ಜಾತಾ ಪುಜಾ
ನಾ ಸುಶೇಗ್ ನಾ ರಜಾ
ಜಗತ್ ಜನನಿ ಮಾನ್ ಮರ್ಯಾದ್
ಕೋಣ್ ಅಯ್ಕಾತ್ ಮ್ಹಜಿ ಫಿರ್ಯಾದ್
ಯೇ ಕೃಷ್ಣಾ ಯೇ...... ವೇಳ್ ಅಯ್ಲಾ

ನೆಂಟಿ ಪಾಕ್ಳಿ ತರ್ನೊ ಫಾಂಟೊ ಪಿಕಲ್ಲಿ ಖೊಲಿ
ಮಝಾ ಚಿಡ್ಡುನ್ ಮೊಡುಂಕ್
ಭಳ್ ಖೊಟ್ತಾ ಜುಗಾರಿ ವಿಕ್ತಾ
ಅಧಿಕಾರ್ ಬೊಬಾಟ್ತಾ ಫಕತ್ ಮತ್ಲಾಬ್
ಯೇ ಕೃಷ್ಣಾ ಯೇ...... ವೇಳ್ ಅಯ್ಲಾ

ಅಸಾತ್ ಇಚ್ಚಾ ಅಶಾ
ಉಭೊಂಕ್ ಅಸಾ ಉಪ್ಯೆಂವ್ಕ್ ಅಸಾ
ಫುಲ್ ಭಾಂಗಾರಾ ಸವೆಂ ಸಜಂವ್ಕ್ ಅಸಾ
ಯೇ ಕೃಷ್ಣಾ ಯೇ..... ರಾಕೊನ್ ಅಸಾತ್
ಯಶೋಧಾ, ರಾಧಾ, ರುಕ್ಮಿಣಿ...

ಯೇ ಕೃಷ್ಣಾ ಯೇ..... ವೇಳ್ ಅಯ್ಲಾ
ತುವೆಂಚ್ ಸಾಂಗಿಲ್ಲೆಂಯ್
ಸಂಭಾವಾಮಿ ಯುಗೇ ಯುಗೇ
ಸಂಭಾವಾಮಿ ಯುಗೇ ಯುಗೇ

[ ಮಯ್ನ್ಯಾಚೊ ಕವಿ ]

ಲಾರೆನ್ಸ್ ವಿನೋದ್ ಬಾರ್ಬೋಜ್

चित्रां विचित्रां आंकडो - ५

यंत्रांचीं सोधनां करून, यंत्रां कर्नां कामां करवन मनीस कांय दोडें जिवीत जियेवंक लागला जायजय. देकून मनशाच्या दिस्पोडत्या जिवितांत दाकवपाक एक जिवीत पूण पाळुंक अन्येक जिवीत जालां. हें फकत विग्यान व शिकपा शेतांत मात्र न्हय, हरेका शेतांत आमी पळेतांव असलेंच दोडेंपण. सांगचें एक आनी कर्चें बोल्तेंच. जांव आमचे आचार-विचार, आमचे संबंध, आमचो धर्म, आमचे देव..... हरेका शेतांत समाजीक अनीत आनी गुन्यांव चडून आसा तर हेंच दोडेंपण कारण म्हणच्यांत दुभाव ना.

संसारांत भारत देश नांव वेल्लो जावनासा वैविध्यतेक लागून, पूण आमी आमचेभितर कितलीं वेगळीं जावन आसांव, वेगळीं जावन जियेतांव म्हळ्ळ्याचेर आमी एकोडो नियाळ केलो तर आमचेभितरलें दोडेंपण अमकांच सुडाळ जावन दिसता. आमचो धर्म सयत दाकवपाक एक पूण पाळुंक अन्येक जाला. मनीस एकामेकाचीं मासां खावंक निबां सोदून जियेता, मनशापणाचीं मुल्यां चडंवचीं यंत्रां येदोळ येवंक नांत. आनी ह्या सर्वाचो शेवोट एक‌च; निर्नाम. पूण तितलें चिंतुंक मनशाक कंय पुर्सोत आसा.

- सं

[ मयन्याची कविता ]

ये कृषणा ये

मा मातेची कर्तात रक्षा
दितात तिका अग्नी परीक्षा
राम राज्य केदाळा येता
राकोन असा सीता
ये कृषणा ये...... वेळ अयला

असात कुमोक कर्तेले
भ्यें दिसता! बरो वा बोल्पो
हात दिल्यार धर्तात भुजां
जाता कुमकेचोय सोल्लो
ये कृषणा ये...... वेळ अयला

अल्तारीर जाता पुजा
ना सुशेग ना रजा
जगत जननी मान मऱ्याद
कोण अयकात म्हजी फीऱ्याद
ये कृषणा ये...... वेळ अयला

नेंटी पाकळी तर्नो फांटो पिकल्ली खोली
मझा चिड्डून मोडुंक
भळ खोटता जुगारी विक्ता
अधिकार बोबाटता फकत मतलाब
ये कृषणा ये...... वेळ अयला

असात इच्चा अशा
उभोंक असा उप्येवंक असा
फूल भांगारा सवें सजवंक असा
ये कृषणा ये..... राकोन असात
यशोधा, राधा, रुक्मिणी...

ये कृषणा ये..... वेळ अयला
तुवेंच सांगिल्लेंय
संभावामी युगे युगे
संभावामी युगे युगे

[ मयन्याचो कवी ]

लारेन्स विनॊद बार्बॊज

Chitram vichitram Ankddo - 5

Yontranchim sodhnam korun, yontram kornam kamam koroun monis kaim doddem jivit jieunko lagla zaizoi. Dekun monxachea dispoddtea jivitant dakoupak ek jivit punn pallunk onyek jivit zalam. Hem fokot vigean vo xikpa xetant matr nhoi, horeka xetant ami polletamv osolench doddemponn. Sangchem ek ani korchem boltench. Zamv amche achar-vichar, amche sombondh, amcho dhorm', amche devo..... Horeka xetant somajik onit ani guneamv choddun asa tor hench doddemponn karonn mhonncheant dubhavo na.

Somsarant bharot dex namv vel'lo zaunasa voividhyotek lagun, punn ami amchebhitor kitlim vegllim zaun asamv, vegllim zaun jietamv mholl'lleacher ami ekoddo niall kelo tor amchebhitorlem doddemponn omkanch suddall zaun dista. Amcho dhorm' soit dakoupak ek punn pallunk onyek zala. Monis ekamekachim masam khaunko nibam sodun jieta, monxaponnachim muleam choddomvchim yontram yedoll yeunko nant. Ani hea sorvacho xevott ek‌ch; nirnam'. Punn titlem chintunk monxak kom-i pursot asa.

- som

[ Moineachi kovita ]

ye krixnna ye

ma matechi kortat rokxa
ditat tika ogni porikxa
ram' rajy kedalla yeta
rakon osa sita
ye krixnna ye...... Vell oyla

osat kumok kortele
bhyem dista! boro va bolpo
hat dilear dhortat bhuzam
zata kumkechoi sol'lo
ye krixnna ye...... Vell oyla

oltarir zata puza
na suxeg na roza
zogot zononi man moread
konn oykat mhoji firead
ye krixnna ye...... Vell oyla

nentti paklli torno fantto pikol'li kholi
mozha chidd'ddun moddunk
bholl khott'ta zugari vikta
odhikar bobatt'ta fokot motlab
ye krixnna ye...... Vell oyla

osat ichcha oxa
ubhonk osa upyeunko osa
ful bhangara sovem sozounko osa
ye krixnna ye..... Rakon osat
yoxodha, radha, rukminni...

Ye krixnna ye..... Vell oyla
tuvench sangil'lem-i
sombhavami yuge yuge
sombhavami yuge yuge

[ Moineacho kovi ]

Lawrence Vinod Barboza