ಪಯ್ಣಾರಿ.ಕೊಮ್ Poinnari.Com: Konkani Research, Konkani Study, Progressive Konkanni Literature, Konkani Writing, Konkani Poetry, Creative Writing, Konkani Books, Konkani Association, Konkani Work, Fiction Writing, Poetry Criticism, Poetry Contests, Writing C

[ಕವಿತಾ] ಸೂಂಯೆರ್ (- ಅತಿಶಾ ಸುರ್ಲೇಕರ್)

ಎಕಾ ವಯ್ರಸಾನ್ ಸಂಸಾರ್‌ಭರ್ ಲೊಕಾಂಕ್ ಭಿರಾಂತೆನ್ ಜಿಯೆಂವ್ಕ್ ಶಿಕಯ್ಲೆಂ. ಹ್ಯಾ ವಯ್ರಸಾನ್ ಜಾತ್-ಧರ್ಮ್ ಲೆಕ್ಲೊನಾ, ಗ್ರೇಸ್ತ್ ದುಬ್ಳೊ ಮ್ಹಣ್ ಲೆಕ್ಲೆಂ ನಾ, ದಾದ್ಲೊ ಬಾಯ್ಲ್ ಮ್ಹಣ್ ಲೆಕ್ಲೆಂ ನಾ. ಪುಣ್ ಹೆಚ್ ವೆಳಾರ್ ಕಾಂಯ್ ಯುಗಾಂನಿ ಸಮಾಜಿಂತ್ ಜಿಯೆವ್ನ್ ಆಸ್ಚ್ಯಾ ವೆಗ್-ವೆಗಳ್ಯಾ ವಾಯ್ರಸಾಂಚೆರ್ ಹಿ ಕವಿತಾ ಅಪುರ್ಭಾಯೆನ್ ಅರ್ಸೊ ಧರ್ತಾ. ಲೋಕ್ ಕಿತ್ಲೊ ಶಿಕ್ಪಿ ಜಾಲ್ಯಾರೀ ಸಭಾರ್ ಸಂಗ್ತೆಂನಿ ತಾಚ್ಯಾ ಗಿನ್ಯಾನಾಚೆಂ ದಾರ್ ಅಜೂನ್ ಬಂದ್ ಆಸಾ ಮ್ಹಳ್ಳೆಂ ಹಿ ಕವಿತಾ ಸೊಭಿತ್ ರಿತಿನ್ ಸಾಂಗ್ತಾ.

- ಸಂ

[ಕವಿತಾ] ಸೂಂಯೆರ್ (- ಅತಿಶಾ ಸುರ್ಲೇಕರ್)

ಸೂಂಯೆರ್ ಹಾಂವ್ ಅಸ್ಪೃಶ್ಯ್ ನ್ಹಂಯ್ ಅಸ್ತೂರೆಚಿ ಜಾತ್ ಮ್ಹಜಿ ಮಾಸೀಕ್ ಪರಿಕ್ರಮಾ ಹಿ ಅಸ್ಮಿತಾಯ್ ಮ್ಹಜಿ.... ಸಮಾಜಾಚಿ ರೀತ್ ನಿರಾಳಿ, ಅಸ್ಮಿತಾಯ್ ಸಾಂಭಾಳೂಂಕ್ ಪಾಳ್ಚ್ಯೊ ಪಡ್ಟಾ ನಿಯ್ಮ್ ಆನಿ ಅಟಿ... ಮಾಸಿಕ್ ಪಾಳ್ಯೆಂತ್ ವಿಲಗ್ ಥಾಳ್ಯೆಂತ್ ಜೆವ್ತಾ "ಸೊಶಿಯೆಲ್ ಡಿಸ್ಟನ್ಸ್ " ಪಾಳೀತ್ ಖಾಂಚ್ಕೊನಶಾಕ್ ಬಸಯ್ತಾತ್. ಆಚಾಂವಾತಲೆ ಲೊಣ್ಚೆ ಚಡ್ನಾಕಾ ದೆವ್ಳಾಚೆ ಪಾಂವ್ಡೆ ಕಿತ್ಲೆಚ್ ಕೆಲೆ ಖಟ್ಲೆ ನಶ್ಟೆಂ ಆಳ್ ಭಶ್ಟೆಂಪಣಾಚೆ. ಶಿಕ್ಷೀತ್ ಪಿಳ್ಗಿ ಉಗ್ತೆಂಪಣಾಂತ್ ಉಲಯ್ನಾ "ಸೆನಿಟೆರಿ ನೆಪ್ಕೀನ್ "ಮಾಗೂಂಕ್, ವಾಚಾ ತಾಂಕಾ ಫುಟ್ನಾ... ನರ್ - ನಾರಿ ಸಮಾನ್ ಮ್ಹಣ್ಟಾ ಫರ್ಮಾಸೀಂತ್ಲ್ಯಾನ್ ಭಾಯ್ರ್ ಸರ್ತಾಚ್ ತೀಚ್ "ನರ್ಜಾತ್", ಫುತ್ಫುತೊನ್ ಹಾಸ್ತಾ. ಸಾಂಗೂನ್ ಮನ್ ಥಕ್ಲಾ ಆರೆ ಪಾಪ್ಯಾ! "ಹಿ ಮಹಾಮಾರಿ ನ್ಹಂಯ್, ಮಾಸಿಕ್ ಪರಿಕ್ರಮಾ ದಿತಾ ಗವಾಯ್ ಪಾನ್ವೆಲ್ ಕುಳಾಚಿ ಗರ್ಭಾಂತ್ ಫುಲಯ್ತಾ ಪಿಕಾಳ್ ಕುಳಾಚ್ಯಾ ಪೊರ್ಸಾಂತ್ ಕಳೆ - ಕಳ್ಯೊ ಖೆಳಯ್ತಾ"... ಜಾತ್ - ಪಾತೀಚೆ ಬಂಧನ್ ನಾ ಗರೀಬ್ - ಶ್ರೀಮ್ತಾಂಚೊ ಭೆದ್ ನಾ ದಾಳೀಲ್ಲಿ ಶೀಮ್ ಹಾಂವೆಚ್ ಕಿದ್ಯಾಕ್ ಹುಪಪ್ ನಾ? ಹ್ಯಾ ಸಂವ್ಸಾರಾಂತ್, ಕೊಣ್ ಆಸಾ ವ್ಹಯ್'ರೆ ಸವ್ಳೊ? ಹೊ "ಸುಂಯೆರ್" ಹಾಂವೆಚ್ ಕಿದ್ಯಾಚ್ ಪಾಳ್ಚೊ? **** - ಅತಿಶಾ ಸುರ್ಲೀಕಾರ್**. [ಅಕ್ಟೊಬ್ರ್, 2020]

	ಅತಿಶಾ ಸುರ್ಲೀಕಾರ್: ವೃತ್ತೆನ್ ಶಿಕ್ಶಕಿ ಜಾವ್ನ್ ಕಾಮ್ ಕರ್ನ್ ಆಸ್ಚಿ ಬಾಯ್ ಆತಿಶಾ ಸುರ್ಲಿಕಾರ್ ಗೊಂಯಾಂತ್ ವಸ್ತಿ ಕರ್ಚಿ ಕೊಂಕಣಿ ಕವಿ. ತಿಚಿಂ ಕವಿತಾ, ಲೇಕಾಂ ’ಭಾಂಗಾರ್‌ಭುಂಯ್’ ಪತ್ರಾಚೆರ್ ಪ್ರಕಾಶಿತ್ ಜಾಲ್ಯಾಂತ್. ’ಪಾಯ್‌ವಾಟೊ’, ’ಬಿಲೂಬಯ್ ಚಲ್ಲೆಂ ಬಜರಾಂತ್’ ಹಿಚ್ಯಾ ಕವಿತೆಂಚೆ ದೋನ್ ಪುಸ್ತಕಾಂ ಪ್ರಕಾಶಿತ್ ಜಾಲ್ಯಾಂತ್. ಭುರಗ್ಯಾಂತ್ ಲೋಕ್‌ವೇದ್ ಗಿತಾಂ ಆನಿ ನಾಚ್ ಶಿಕಯ್ತಾ.
[kovita] Sumyer (- Atisha Surlekar)
Eka voirosan somsar‌bhor lokank bhiranten jieunko xikoilem. Hea voirosan zat-dhorm' leklona, grest dubllo mhonn leklem na, dadlo bail mhonn leklem na. Punn hech vellar kaim yugamni somajint jieun aschea veg-vegollea vairosancher hi kovita opurbhayen orso dhorta. Lok kitlo xikpi zaleari sobhar songtemni tachea gineanachem dar ozun bond asa mholl'llem hi kovita sobhit ritin sangta. - Som
[kovita] Sumyer (- Atisha Surlekar)
Sumyer hamv osprixy nhoim osturechi zat mhoji masik porikroma hi osmitai mhoji.... Somazachi rit niralli, osmitai sambhallunk pallcheo poddtta niym' ani otti... Masik pallyent vilog thallyent jeuta "soxiyl ddisttons " pallit khanchkonoxak bosoitat. Achamvatole lonnche choddnaka deullache pamvdde kitlech kele khottle noxttem all bhoxttemponnache. Xikxit pillgi ugtemponnant uloina "senitteri nepkin "magunk, vacha tanka futtna... Nor - nari soman mhonntta formasintlean bhair sortach tich "norzat", futfuton hasta. Sangun mon thokla are papea! "hi mohamari nhoim, masik porikroma dita govai panvel kullachi gorbhant fuloita pikall kullachea porsant kolle - kolleo khelloita"... Zat - patiche bondhon na gorib - xrimtancho bhed na dallil'li xim' hamvech kideak hupop na? hea somvsarant, konn asa vhoi re soullo? ho "sumyer" hamvech kideach pallcho? **** - Atisha Surlekar.** [Oct, 2020]

	Atisha Surlekar: Vrit'ten xikxoki zaun kam' korn aschi bai atixa surlikar gõyant vosti korchi konkonni kovi. Tichim kovita, lekam ’bhangar‌bhum-i’ potracher prokaxit zaleant. ’pai‌vatto’, ’biluboi chol'lem bazarant’ hichea kovitenche don pustokam prokaxit zaleant. Bhurogeant lok‌ved gitam ani nach xikoita.
[कविता] सूंयेर (- अतिशा सुरलेकर)
एका वयरसान संसार‌भर लोकांक भिरांतेन जियेवंक शिकयलें. ह्या वयरसान जात-धर्म लेकलोना, ग्रेसत दुबळो म्हण लेकलें ना, दादलो बायल म्हण लेकलें ना. पूण हेच वेळार कांय युगांनी समाजिंत जियेवन आसच्या वेग-वेगळ्या वायरसांचेर ही कविता अपुर्भायेन अर्सो धर्ता. लोक कितलो शिकपी जाल्यारी सभार संग्तेंनी ताच्या गिन्यानाचें दार अजून बंद आसा म्हळ्ळें ही कविता सोभीत रितीन सांग्ता. - सं
[कविता] सूंयेर (- अतिशा सुरलेकर)
सूंयेर हांव अस्पृश्य न्हंय अस्तूरेची जात म्हजी मासीक परिक्रमा ही अस्मिताय म्हजी.... समाजाची रीत निराळी, अस्मिताय सांभाळूंक पाळच्यो पडटा नियम आनी अटी... मासिक पाळयेंत विलग थाळयेंत जेवता "सोशियल डिस्टन्स " पाळीत खांचकोनशाक बसयतात. आचांवातले लोणचे चडनाका देवळाचे पांवडे कितलेच केले खटले नश्टें आळ भश्टेंपणाचे. शिक्षीत पिळगी उगतेंपणांत उलयना "सेनिटेरी नेपकीन "मागूंक, वाचा तांका फुटना... नर - नारी समान म्हणटा फर्मासींतल्यान भायर सरताच तीच "नरजात", फुतफुतोन हासता. सांगून मन थकला आरे पापया! "ही महामारी न्हंय, मासिक परिक्रमा दिता गवाय पानवेल कुळाची गर्भांत फुलयता पिकाळ कुळाच्या पोरसांत कळे - कळयो खेळयता"... जात - पातीचे बंधन ना गरीब - श्रीमतांचो भेद ना दाळील्ली शीम हांवेच किद्याक हुपप ना? ह्या संवसारांत, कोण आसा व्हय रे सवळो? हो "सुंयेर" हांवेच किद्याच पाळचो? **** - अतिशा सुर्लीकार.** [अकटोबर, २०२०]

	अतिशा सुर्लीकार: वृत्तेन शिक्षकी जावन काम कर्न आसची बाय आतिशा सुरलिकार गोंयांत वसती कर्ची कोंकणी कवी. तिचीं कविता, लेकां ’भांगार‌भुंय’ पत्राचेर प्रकाशीत जाल्यांत. ’पाय‌वाटो’, ’बिलूबय चल्लें बाजारांत’ हिच्या कवितेंचे दोन पुसतकां प्रकाशीत जाल्यांत. भुरग्यांत लोक‌वेद गितां आनी नाच शिकयता.


ದಾಯ್ಜ್.ಕೊಮ್

2004 ಥಾವ್ನ್ 2011 ಪರ್ಯಾಂತ್ ಕಾರ್ಯಾಳ್ ಆಸ್‌ಲ್ಲ್ಯಾ ದಾಯ್ಜ್.ಕೊಮ್ ಚೆರ್ ಪರ್ಗಟ್‌ಲ್ಲ್ಯಾ ವಿಂಚ್ಣಾರ್ ಸಾಹಿತಾಕ್ ಆಮಿ ಫುಡಿಲ್ಯಾ ದಿಸಾಂನಿ ಪಯ್ಣಾರಿ ವಾಚ್ಪ್ಯಾಂಕ್ ಲಾಭಯ್ತೆಲ್ಯಾಂವ್.