[ಸಂಪಾದಕೀಯ್ - 35]  ಕಾಣಿ ಜಾಲೊ ಕಾಣಿಯೆಗಾರ್ ಕೆವಿನ್ ಡಿ'ಮೆಲ್ಲೊ 

ಸಂತೋಷ್ ಆನಂದಾನ್ 1972 ಇಸ್ವೆಂತ್ ’ಶೋರ್’ ಫಿಲ್ಮಾಂತ್ಲ್ಯಾ ಎಕಾ ಕಾಂತಾರಾಚ್ಯೊ ಥೊಡ್ಯೊ ವಳಿ ಅಶ್ಯೊ ಆಸಾತ್;

’ದೋ ಪಲ್ ಕೆ ಜೀವನ್ ಸೆ
ಎಕ್ ಉಮ್ರ್ ಚುರಾನಿ ಹೈ
ಜಿಂದಗಿ ಔರ್ ಕುಛ್ ಭಿ ನಹಿಂ
ತೆರಿ ಮೇರಿ ಕಹಾನಿ ಹೈ’

(ದೋನ್ ಘಡಿಯಾಂಚ್ಯಾ ಜಿವಿತಾಂತ್ಲೆಂ ಏಕ್ ಆವ್ಕ್ ಚೊರ‍್ಚೆಂ ಜಾವ್ನಾಸಾ, ಜಿವಿತ್ ಹೆರ್ ಕಿತೆಂಚ್ ನ್ಹಯ್, ತುಜಿ ಮ್ಹಜಿ ಕಾಣಿ ಜಾವ್ನಾಸಾ’)

ಪುಣ್ ಹ್ಯಾ ದೋನ್ ಘಡಿಯಾಂಚ್ಯಾ ಜಿವಿತಾಕ್ ಲಾಗುನ್ ಹ್ಯಾ ಸಂಸಾರಾಕ್ ಆಯಿಲ್ಲೊ ದರೇಕ್ ಮನಿಸ್ ’ಅಪುಣ್ ಶಾಶ್ವಿತ್ ಜಿವಿತ್ ಜಿಯೆಂವ್ಕ್ ಆಯಿಲ್ಲೊಂ, ಅಪ್ಣಾಕ್ ಅಂತ್ಯ್ ನಾ’ ಮ್ಹಳ್ಳ್ಯಾ ಭೃಮಿದೆಂತ್ ಜಿಯೆತಾ ದೆಕುನ್ ಮನ್ಶಾಪಣಾಕ್ ಬಗ್ಲೆಕ್ ಲೊಟುನ್ ವ್ಹಡಾ ಮಸ್ತೆನ್ ಜಿಯೆತಾನಾ ಸತ್ತ್ಯಾನಾಸ್ ಜಾತಾ ಮನ್ಶಾ-ಭಾಂದ್. ಜಾಂವ್ ತೆ ಕುಟ್ಮಿಕ್ ವಾ ಸೆಜ್-ಸಂಬಾರ್. ಪುಣ್ ಸಂಸಾರಾಂತ್ ಜಿಯೆತಲೊ ದರೇಕ್ಲೊ ಹ್ಯಾ ವರ್ಗಾಂತ್ಲೊ ನ್ಹಯ್, ದರೇಕ್ಲೊ ಅಪ್ಣಾಚೊ ಫಾಯ್ದೊ ಮಾತ್ರ್ ಚಿಂತುನ್ ಜಿಯೆನಾ, ಕಾಂಯ್ ಥೊಡೆ ಸಮಾಜೆಚ್ಯಾ ವಿಕಾಸಾಕ್ ವೆಗ್-ವೆಗಳ್ಯಾ ರಿತಿಚೊ ತೆಂಕೊ ದಿವುನ್ ಅಪ್ಲ್ಯಾ ಜಿವಿತಾಕ್ ಝರಯ್ತಾ; ಜಾಂವ್ ಏಕ್ ಸಮಾಜ್ ಸೆವಕ್, ಜಾಂವ್ ಏಕ್ ಕಲಾಕಾರ್. ಎಕಾ ಸಮಾಜೆಚೆಂ ವಿಕಾಸನ್ ಜಾಂವ್ಕ್ ಫಕತ್ ಖಾಂವ್ಚೆಂ-ಪಿಯೆಂವ್ಚೆಂ ಮಾತ್ರ್ ನ್ಹಯ್, ಜಾಯ್ತೆಂ ಆಸಾ. ಆನಿ ತ್ಯಾ ಜಾಯ್ತ್ಯಾಂತ್ ಏಕ್ ಪ್ರಮುಕ್ ಜಾವ್ನಾಸಾ ಸಮಾಜಿಕ್ ಚಿಂತ್ಪಾಚಿ ಭಲಾಯ್ಕಿ. ಆನಿ ತಿ ಭಲಾಯ್ಕಿ ಲಾಭಂವ್ಚ್ಯಾ ದಿಶೆನ್ ಏಕ್ ಕಲಾ ಪ್ರಮುಕ್ ಪಾತ್ರ್ ಘೆತಾ ಮ್ಹಳ್ಳೆಂ ನೆಗಾರಿನಾಯೆ. ಜಾಗತಿಕ್ ಸ್ಥರಾರ್ ಸಯ್ತ್ ಜೆಮೆಲ್ಲ್ಯಾ ಸಮಾಜೆಕ್ ಕುಟ್ಟುನ್ ಜಾಗಂವ್ಚೆಂ ಕಾಮ್ ವೆಗ್-ವೆಗಳ್ಯಾ ಕಲೆಧ್ವಾರಿಂ ಸಭಾರಾಂನಿ ಕೆಲಾಂ. ಜಾವ್ಯೆತ್ ಸಂಗೀತ್, ವಾ ನಾಟಕ್, ವಾ ಸಾಹಿತ್ಯ್ ಮ್ಹಣುನ್ ಚರಿತ್ರೆಚಿಂ ಪಾನಾಂ ಗವಾಯ್ ದಿತಿತ್.

ಕೊಂಕಣಿ (ಪ್ರತ್ಯೇಕ್ ಜಾವ್ನ್ ಮಂಗ್ಳುರಿ) ಸಮಾಜ್ ಖಂಚ್ಯಾ ವರ್ಗಾಂತ್ ಆಸಾ ಮ್ಹಳ್ಳೆಂ ಪ್ರಶ್ನ್ ಉಭೆಂ ಕರುನ್ ಆಮ್ಚ್ಯೆ ಭಂವಾರಿಂ ಎಕೊಡಿ ನದರ್ ಚರಯ್ಲಿ ತರ್ ಜಾಪಿ ಅಪ್ಶ್ಯೊಚ್ ಉಭ್ಯೊ ಜಾತಾತ್. ಜೆರಾಲ್ ರಿತಿನ್ ಮಂಗ್ಳುರಿ ಕೊಂಕಣಿ ಸಮಾಜ್ ದುಬ್ಳಿ. ಹಿ ದುಬ್ಳಿಕಾಯ್ ದುಡ್ವಾಚಿ ನ್ಹಯ್, ಚಿಂತ್ಪಾಚಿ, ವಯ್ಚಾರಿಕತೆಚಿ. ಆಮ್ಚೆಲಾಗಿಂ ವೆಗ್-ವೆಗಳ್ಯಾ ಪೆಟ್ಯಾಂಚಿ ಚಾಕ್ರಿ ಕರುಂಕ್ ಆನಿ ಭಂವ್ಡಾಂವ್ಕ್ ವೇಳ್ ಆಸಾ ಪುಣ್ ಆಮ್ಚ್ಯಾಚ್ ಘರಾಂತ್ಲ್ಯಾ ಪ್ರಾಯ್ವಂತಾಂಕ್ ಸೊಸ್ಚಿ ತಾಂಕ್ ಆಮ್ಚೆಲಾಗಿಂ ನಾ.

ಸಮಾಜ್ ಮ್ಹಳ್ಯಾರ್ ಇಟೆ-ಫಾತೊರ್-ಸಿಮೆಂಟಿಚೆಂ ಭಾಂದಪ್ ನ್ಹಯ್, ಮ್ಹಜ್ಯೆ-ತುಜ್ಯೆ ತಸಲ್ಯಾ ಸಭಾರಾಂನಿ ಜಿಯೆಂವ್ಚೆಂ ಪರಿಸರ್. ಹಾಂಗಾಸರ್ ಪರಿಸರ್ ಮ್ಹಳ್ಯಾರ್ ಪ್ರಾಕೃತಿಕ್ ಭಂವಾರ್ ನ್ಹಯ್, ಬಗಾರ್ ಮ್ಹಜ್ಯಾ ತುಜ್ಯಾ ಮತಿಂತ್ಲೆ ವಿಚಾರ್, ಹಾಂವೆಂ ತುವೆಂ ಸಮ್ಜುನ್ ಘೆಂವ್ಚಿ ಆನಿ ಪಾಳ್ಚಿ ಜಿಣ್ಯೆ ರೀತ್. ಹಾಂಗಾಸರ್ ಹಾಂವ್-ತುಂ ಎಕಾ ಥರಾಚೆಂ ಸಂಕೀರ್ಣ್ ಚಿಂತಪ್ ಉಭ್ಜಯ್ತಾ ತರ್ ಮ್ಹಜಿಂ-ತುಜಿಂ, ತಾಂಚಿಂ-ಹಾಂಚಿಂ ಮನ್ಶಾಂಕ್ ಸಯ್ತ್ ಲೆಕಾಕ್ ಧರುಯಾಂ. ಜೆರಾಲ್ ರಿತಿನ್ ಸಮಾಜ್ ಮ್ಹಳ್ಯಾರ್ ಏಕ್ ವೆವಸ್ತಾ (System) ಮ್ಹಣಾ, ಪ್ರಕ್ರಿಯಾ (Process) ಮ್ಹಣಾ, ವಾ ಏಕ್ ಮನೋಗತ್ (Mentality) ಮ್ಹಣಾ. ಪುಣ್ ಎಕಾ ಪ್ರಾಂತ್ಯಾಂತ್ ಜಿಯೆತೆಲ್ಯಾ ವೆಗ್-ವೆಗಳ್ಯಾ ವಿಚಾರ್-ಧಾರೆಚ್ಯಾ ಮನ್ಶಾಂನಿ ಸ್ವಾರ್ಥಿ/ಸ್ವ-ಹಿತೆಚ್ಯಾ ಇರಾದ್ಯಾಕ್ ಆಸಾ ಕೆಲ್ಲಿ ಏಕ್ ವೆದಿ. ಹಾಂಗಾಸರ್ ಸಮಾಜೆಚ್ಯಾ ದಿಸ್ಪಡ್ತ್ಯಾ ಸಂಗ್ತೆಂತ್ ಎಕಾ ನಾ ಎಕಾ ರಿತಿನ್ ಹೆರಾಂಚ್ಯಾ ಜಿಣ್ಯೆಚೆರ್, ಚಿಂತ್ಪಾಚೆರ್ ಗರ್ಜೆಭಾಯ್ರ್ ಮೆತೆರ್ ಜಾವ್ನ್ ಎಕಾ ರಿತಿಚೊ ಸಮಾಜಿಕ್ ದಭಾವ್ (Pressure) ಘಾಲ್ಚಿ ನಿರಂತರ್ ಚೂಕ್ ಆಧಾರುನ್, ಉಪ್ರಾಂತ್ ಅಪುಣ್ ನಿರ್ದೋಸ್ ಮ್ಹಣುನ್ ಪಿಲಾತಾನ್ ಅಪ್ಲೆ ಹಾತ್ ಧುಲ್ಲೆಪರಿಂ ಹಾತ್ ಧುಂವ್ನ್ ಹೆರಾಂಚ್ಯಾ ದುಕಿ/ಪಡ್ನೆಚಿ ಸೊಭಾಯ್ ಪಳೆಂವ್ಚಿಚ್ ಸಮಾಜೆಚಿ ಮುಳಾವಿ ದಸ್ತೂರ್ (ರಿವಾಜ್).

ಎಕಾ ಸಮಾಜೆಚಿ ಭಲಾಯ್ಕಿ ತ್ಯಾ ಸಮಾಜೆಂತ್ ಜಿಯೆತೆಲ್ಯಾಂಚ್ಯಾ ಕುಡಿಚೆರ್ ವಾ ಖಾಣಾ-ಜೆವ್ಣಾಚೆರ್ ನ್ಹಯ್ ಬಗಾರ್ ಮತಿಚ್ಯಾ ಭಲಾಯ್ಕೆಚೆರ್ ಹೊಂದ್ವೊನ್ ಆಸ್ತಾ. ಮತಿಚಿ ಭಲಾಯ್ಕಿ ವಯ್ಚಾರಿಕ್ ಚಿಂತ್ಪಾಚ್ಯಾ ಬುನ್ಯಾದಿಚೆರ್ ಆಸ್ತಾ. ಆತಾಂಚೊ ಕಾಳ್ ಫಾಸ್ಟ್‌ಲಾಯ್ಫ್, ಅಪ್ಲ್ಯಾ ಖಾಣಾ-ನ್ಹೆಸ್ಪಾವಿಶಿಂ ಸಯ್ತ್ ಚಿಂತುಂಕ್ ವೇಳ್ ನಾಸ್ಚೊ ಲೋಕ್, ಚಡ್ ಜಾವ್ನ್ ದಾಕವ್ಪಾಚೆಂ ಜಿವಿತ್ ಜಿಯೆಂವ್ಕ್ ಲಾಗ್ಲಾ. ಹೊ ಸಯ್ತ್ ಎಕಾ ಥರಾಚೊ ಸಮಾಜಿಕ್ ದಭಾವ್. ಹಾಂವ್/ಆಮಿಂಚ್ ಉಂಚ್ಲೆ/ವರ್ತೆ ಮ್ಹಣ್ ಹೆರಾಂಕ್ ರುಜು ಕರ್ಚ್ಯಾಕ್ ಹಿ ದಾಕವ್ಣಿ. ಆನಿ ಹ್ಯಾ ದಾಕವ್ಣೆಚ್ಯಾ ಧಾಂವ್ಣೆಂತ್ ಕೊಣಾಕ್‌ಚ್ ಸುಶೆಗ್ ನಾ. ಕೊಣ್ ಜಿಕ್ತಾ ತರ್ ಕೊಣ್ ಪಡ್ತಾ, ಹೆಂ ಪ್ರಾಕೃತಿಕ್ ನೇಮ್. ಅಶೆಂ ಮ್ಹಣುನ್ ಜಿಕ್ಲಲೊ ಸಾಸ್ಣಿಕ್ ಜಯ್ತೆವಂತ್ ನ್ಹಯ್, ಪಡ್ಲಲೊ ಸಾಸ್ಣಿಕ್ ಸಲ್ವೊತಲೊ ನ್ಹಯ್. ಹೆಂಚ್ ವೆಗ್-ವೆಗಳಿಂ ಧರ್ಮಿಕ್ ಪುಸ್ತಕಾಂ ದರೇಕಲ್ಯಾಂಕ್ ಉಡಾಸ್ ಕರುನ್ ದಿತಾತ್ ಪುಣ್ ತೆಂ ವಾಚುಂಕ್, ಸಮ್ಜುಂಕ್, ಪಾರ್ಕುನ್ ಪಳೆಂವ್ಕ್ ಗರ್ಜ್ ಆಸ್ಚ್ಯಾ ಆಮ್ಚ್ಯಾ ಮತಿಚ್ಯಾ ಚಿಂತ್ಪಾ ಶಿರೆಂಚೆರ್ ಝಾಂಟಾಂ ಮಾಂಡ್ಲ್ಯಾಂತ್. ದೆಕುನ್ ಮುಕ್ಲ್ಯಾನ್ ಗೆಲ್ಲ್ಯಾ ಬೊಕ್ರ್ಯಾಚೊ ಪಾಟ್ಲಾವ್ ಕರುನ್ ಆಮಿ ವೆಚೆಂ. ಆನಿ ಉಪ್ರಾಂತ್ ಭಾಡ್ಯಾಕ್ ದಿಲ್ಲ್ಯಾ ಮತಿಕ್ ಘೆವ್ನ್ ಮೀಸ್-ರೆತಿರೊ ಕರ್ನ್ ವ ಗಂಗಾ ನ್ಹಂಯ್ತ್ ಉಡ್ಕಿ ಮಾರುನ್ ಆಮ್ಚೆಂ ’ಪಾಪ್/ಪಾತಕ್ ಧುಂವ್ಚೆಂ’ - ಆಸುಂ.

ಹಾಚೊ ಪರಿಣಾಮ್ ಕಿತೆಂ? ಹೆಂ ಸಮ್ಜುಂಕ್ ಚಡ್ ತ್ರಾಸ್ ನಾಕಾತ್. ಸಮಾಜೆಂತ್ ಜಿಂ ಅನ್ವಾರಾಂ ದಿಸಾನ್ ದೀಸ್ ಚಡುನ್ ಆಸಾತ್ ತರ್ ತಾಚೆಂ ಮುಳಾವೆಂ ಕಾರಣ್ ಹಿಚ್ ವಿಕಾಳ್ ಚಿಂತ್ಪಾಚಿ ಪಿಡೇಸ್ತ್ ಮನೋಗತ್, ಜಿ ಸುರಾತಿ ಅಬ್ಲೇಶಾನ್ ಅಮಿಂಚ್ ರಚ್ಲೆಲಿ ವೆವಸ್ತಾ. ಸಮಾಜೆಚ್ಯಾ ಎಕೆಕಾ ಉಣೆಂಪಣಾಕ್ (Shortcomings), ಎಕೆಕಾ ಪಡ್ಣೆಕ್, ಎಕೆಕಾ ದುಕಿಕ್ ಕಾರಣ್ ಸಮಾಜ್. ದೆಕುನ್ ಸಮಾಜೆಚ್ಯಾ ದರೇಕಾ ವಿಘ್ನಾಂಚೆ ಖರೆ ಚುಕಿದಾರ್/ಗುನ್ಯಾಂವ್ಕಾರ್ ಆಮಿಂಚ್. ಪುಣ್ ಕರ್ಚೆಂ ಸರ್ವ್ ಕರುನ್ ಆಮಿ ನಿರ್ದೋಶಿ, ಅಮಿ ಕಿತೆಂಚ್ ಕರುಂಕ್ ನಾ, ಆಮಿ ಕಿತೆಂಚ್ ಕೆಲ್ಲೆಂ ನಾ ಆನಿ ಆಮಿ ಕಿತೆಂಚ್ ಕರ್ಚೆಪರಿಂಯ್ ನಾ.

ಕೆವಿನ್ ಡಿ'ಮೆಲ್ಲೊ ಆನಿ ಹಾಂವ್ ಎಕಾಚ್ ವಾರಾಡ್ಯಾಂತ್ಲೆ ಆನಿ ಸಮಕಾಳೀನ್ ಕಥಾಕಾರ್. ಪ್ರಾಯೆನ್ ಕೆವಿನ್ ಮ್ಹಜ್ಯಾಕೀ ದೋನ್ ವರ್ಸಾಂ ವ್ಹಡ್. 1986 ಇಸ್ವೆಂತ್ ಹಾಂವ್ ನಿಟ್ಟೆಂತ್ಲ್ಯಾ ಕೊಲೆಜಿಂತ್ ’ಎಲೆಕ್ಟ್ರಿಕಲ್ ಇಂಜಿನಿಯರಿಂಗ್’ ಶಿಕುಂಕ್ ಲಾಗ್‌ಲ್ಲೊಂ ಪುಣ್ ಮ್ಹಜೊ ಹವೇಸ್ (ಪಿಸಾಯ್) ಸಾಹಿತ್ಯ್. ದೆಕುನ್ ಮ್ಹಜ್ಯೆತಸಲ್ಯಾ ಪಿಸಾಯೆಕ್ ಆಪ್ಣಾಯಿಲ್ಲ್ಯಾಂಚೊ ಸಂಪರ್ಕ್ ಕರ್ಚಿ ಸವಯ್ ತೆದ್ನಾಂಚ್ ಸುರು ಕೆಲ್ಲಿ. ’ಶ್ರೀರಾಮ್ ಆನಿ ತಾಚಿ ಅಹಲ್ಯ ಮ್ಯಾಡಮ್’ ಮ್ಹಳ್ಳಿ ಕಥಾ ಜೆದ್ನಾ 1986 ಇಸ್ವೆಂತ್ ಝೆಲೊ ಪತ್ರಾಚೆರ್ ಪರ್ಗಟ್ಲಿ, ತೆದ್ನಾಂ ಕನ್ನಡ ಲಿಪಿಯೆಂತ್ಲೆಂ ಸಾಹಿತ್ಯ್ ವಾಚ್ತೆಲ್ಯಾ ಸರ್ವಾಂಕ್ ವ್ಹಳ್ಕಿಚೊ ಜಾಲೊ. ಕಾರ್ಕಳ್ಚ್ಯಾ ಗುಮ್ಟ್ಯಾ ಫಾತ್ರಾಲಾಗ್ಶಿಲ್ಯಾ ರಾಮಸಮುದ್ರಲಾಗಿಂ ಆಸ್ಚ್ಯಾ ಕೆವಿನಾಚೆಂ ಘರ್ ಸೊಧುನ್ ಕಾಂಯ್ ಏಕ್-ದೋನ್ ಪಾವ್ಟಿಂ ತಾಚ್ಯಾ ಘರಾ ವಚೊನ್, ತಾಚ್ಯಾ ಘರ್ಚ್ಯಾ ದಾರಾಚೆರ್ ಆಸ್ಚೆಂ ಬೀಗ್ ಪಳೆವ್ನ್ ಪಾಟಿಂಚ್ ಗೆಲ್ಲೊಂ.

ಕೆವಿನಾಚೆಂ ಕುಟಮ್; ಆವಯ್-ಬಾಪುಯ್, ಭಯ್ಣಿಂ-ಭಾವ್ ಎಕಾ ರಸ್ತ್ಯಾ ಆವ್ಘಡಾಂತ್ ಸರ್‌ಲ್ಲಿಂ ದೆಕುನ್ ಕೆವಿನ್ ತ್ಯಾ ಘರಾಂತ್ ಎಕ್ಲೊಚ್ ವಸ್ತಿ ಕರ್ತಾಲೊ. ಪುಣ್ ಹಟ್ ಧರುನ್ ಪರತ್ ಹಾಂವ್ ಕೆವಿನಾಕ್ ಮೆಳುಂಕ್ ಗೆಲ್ಲೊಂ ಪುಣ್ ಪರತ್ ತಾಚ್ಯಾ ಘರ್ಚ್ಯಾ ದಾರಾಚೆರ್ ಆಸ್ಚೆಂ ಬೀಗ್ ಪಳೆವ್ನ್ ಪಾಟಿಂ ವೆತಾಸ್ತಾಂ, ತಾಚೊ ಎಕ್ಲೊ ಸೆಜಾರಿ ಮಿತ್ರ್ ಎಕ್ಲೊ ಬ್ರಾಹ್ಮಣ್ ತರ್ನಾಟೊ ಮ್ಹಾಕಾ ’ಹಾಂವ್ ಕೊಣ್ ಆನಿ ಕಂಯ್ ಥಾವ್ನ್ ಆಯ್ಲೊಂ’ ಮ್ಹಣುನ್ ವಿಚಾರ್ ಕರಿಲಾಗ್ಲೊ. ಹಾಂವೆಂ ತಾಕಾ ಜಾಪ್ ದಿವುನ್ ಮ್ಹಳೆಂ ’ಹಾಂವ್ ವಲ್ಲಿ ಕ್ವಾಡ್ರಸ್, ಅಜೆಕಾರ್ ಥಾವ್ನ್ ಆಯ್ಲಾಂ, ಕೆವಿನಾಕ್ ಮೆಳುಂಕ್’. ತೆದ್ನಾ ತೊ ಮ್ಹಣಾಲೊ ’ಓಹ್.. ಕೆವಿನಾನ್ ಏಕ್ ದೋನ್ ಪಾವ್ಟಿಂ ತುಜ್ಯೆವಿಶಿಂ ಉಲಯಿಲ್ಲೆಂ ಆಯ್ಕಲಾಂ, ರಾವ್ ಕೆವಿನ್ ತಾಚ್ಯಾ ತೊಟಾಂತ್ ಮಾಡಾಂಕ್ ಉದಕ್ ದಿವುನ್ ಆಸಾ ತುಂ ರಾವ್’ ಅಶೆಂ ಮ್ಹಣುನ್ ಮ್ಹಾಕಾ ರಾವಯ್ಲೆಂ.

ತರ್ನಾಟಿ ಪ್ರಾಯ್ ಆಮ್ಚಿ ದೆಕುನ್ ಕೆವಿನಾಕ್ ತುಕ್ಲಾಂವ್ಚ್ಯಾ ಇರಾದ್ಯಾನ್ ತ್ಯಾ ಸೆಜಾರಿ ಮಿತ್ರಾನ್ ಮ್ಹಾಕಾ ಸಾಂಗ್ಲೆಂ ’ಕೆವಿನಾಕ್ ಆಮಿ ಇಲ್ಲೊ ಮಾಂಕೊಡ್ ಕರ್ಯಾಂ, ತುಂ ವಲ್ಲಿ ಕ್ವಾಡ್ರಸ್ ಮ್ಹಣ್ ಪಯ್ಲೆಂ ಸಾಂಗಿನಾಕಾ, ಕೊಲೆಜಿಚೊ ಲೆಕ್ಚರರ್ ಮ್ಹಣ್’. ಮ್ಹಾಕಾ ಹಾಚ್ಯೆ ಪಾಟ್ಲೆಂ ಕಾರಣ್ ಕಿತೆಂ ಮ್ಹಣ್ ಸಮ್ಜಲೆಂ ನಾ, ಪುಣ್ ’ಹಾಂ’ ಮ್ಹಳೆಂ. ತ್ಯಾ ಸೆಜಾರಿ ತರ್ನಾಟ್ಯಾನ್ ಮ್ಹಾಕಾ ಕೆವಿನಾಚ್ಯಾ ತೊಟಾಕ್ ಆಪವ್ನ್ ವೆಲೆಂ ಆನಿ ಕೆವಿನಾಕ್ ಮ್ಹಜಿ ವಳೊಕ್ ಕರುನ್ ಅಶೆಂ ಮ್ಹಳೆಂ ’ಭುವನೇಂದ್ರ ಕೊಲೆಜಿಚೊ ಲೆಕ್ಚರರ್ ತುಕಾ ಮೆಳುಂಕ್ ಆಯ್ಲಾ’. ಹೆಂ ಆಯ್ಕುನ್ ಕೆವಿನಾನ್ ಪಯ್ಸ್ ಥಾವ್ನ್ ಮ್ಹಾಕಾ ವಯ್ರ್ ಥಾವ್ನ್ ಸಕ್ಲಾ ಪಳೆವ್ನ್, ಅಪ್ಲ್ಯಾ ಹಾತಾಂತ್ ಆಸ್ಚೊ ಉದ್ಕಾಚೊ ಪಾಯ್ಪ್ ಸಕ್ಲಾ ದವರುನ್, ಪಂಪ್ ಬಂದ್ ಕರುನ್ ಮ್ಹಾಕಾ ಮೆಳುಂಕ್ ಆಯ್ಲೊ ಆನಿ ಮ್ಹಜೆಂ ನಾಂವ್ ಕಿತೆಂ ಮ್ಹಣ್ ವಿಚಾರ್ತಾನಾ ಹಾಂವೆಂ ಸತ್‍ಚ್ ಸಾಂಗ್ಲೆಂ. ತೆದ್ನಾಂ ಕಳೊನ್ ಆಯ್ಲೆಂ, ಕೆವಿನಾಚಿ ’ಶ್ರೀ ರಾಮ್ ಆನಿ ತಾಚಿ ಅಹಲ್ಯಾ ಮ್ಯಾಡಮ್’ ಎಕಾ ಲೆಕ್ಚರರಾಚೆರ್ ಆಧಾರಿತ್ ಜಾವ್ನಾಸ್ಲಿ ಮ್ಹಳ್ಳೆಂ. ಅಶೆಂ ಕೆವಿನಾಕ್ ತಶೆಂ ಮ್ಹಾಕಾ ಪಯ್ಲೊ ಸಾಹಿತಿಕ್ ಮಿತ್ರ್ ಮೆಳ್ಳೊ.

ತ್ಯೇ ಉಪ್ರಾಂತ್ ಆಮ್ಚಿ ಸಳಾವಳ್ ದಾಟ್ ಜಾಲಿ, ತೊ ಎಕ್ಲೊಚ್ ರಾವ್ತಾಲೊ ದೆಕುನ್ ಹಾಂವ್ ಸಯ್ತ್ ಕೆವಿನಾಚ್ಯಾ ಘರಾ ಸಭಾರ್ ಪಾವ್ಟಿಂ ಯೇವ್ನ್ ರಾವ್ಲಾಂ, ಪುಣ್ ಆಮ್ಕಾಂ ದೊಗಾಂಯ್ಕೀ ಆಸ್ಲಿ ಪಿಸಾಯ್ ಸಾಹಿತ್ಯಾಚಿ. ಮಯೂರ, ತುಶಾರ, ತಶೆಂಚ್ ಪಯ್ಣಾರಿ, ಝೆಲೊ, ರಾಕ್ಣೊ, ಕಾಣಿಕ್, ಸೆವಕ್ ಅಶೆಂ ವೆಗ್-ವೆಗಳ್ಯಾ ನೇಮಾಳ್ಯಾಂನಿ ಪರ್ಗಟ್ ಜಾಲ್ಲ್ಯಾ ಕಾಣಿಯಾಂಕ್ ವಾಚುನ್ ಆಮಿ ಸಂವಾದ್ ಕರ್ಚೊ ಆಸ್ಲೊ. ತಿತ್ಲೆಂಚ್ ನ್ಹಯ್, ತವಳ್ ತವಳ್ ಆಮಿ ದೊಗಾಂಯ್ನೀ ’ಝೆಲೊ’ ಪತ್ರಾಚ್ಯಾ ದಫ್ತರಾಕ್ (ವಾಮಂಜೂರ್) ವಚೊನ್ ಸಂಪಾದಕ್ ಡೊಲ್ಫಿ ಕಾಸ್ಸಿಯಾಕ್ ಮೆಳ್ಚಿ ಸವಯ್ ಕೆಲ್ಲಿ. ಎಕಾ 'ಮಿತ್ರ್' ಲೇಖಕಾಂಚ್ಯಾ ಸಹಮಿಲನಾಕ್ ಗೆಲ್ಲ್ಯಾಂವ್ ಆನಿ ಥಂಯ್ಚರ್ ಸಭಾರ್ ಲೇಖಕ್ ಮಿತ್ರಾಂಚಿ ವಳೊಕ್ ಜಾಲ್ಲಿ.

ಕೆವಿನಾಚೆಂ ಆನಿ ಮ್ಹಜೆಂ ವೆಕ್ತಿತ್ವ್, ಚಿಂತಪ್ ಏಕ್ ಸಾರ್ಕೆಂ ನ್ಹಯ್ ತರ್‌ಯೀ ಎಕಾಮೆಕಾಚ್ಯಾ ವಿಚಾರಾಂಕ್ ಗವ್ರವ್ ದಿಂವ್ಚಿ ಶ್ಯಾಥಿ ಆಮ್ಕಾಂ ಆಸ್ಲಿ. ಕೆವಿನ್ ಚಡ್ ಜಾವ್ನ್ ಪ್ರಾಕ್ಟಿಕಲ್ ಚಿಂತ್ಪಾಚೊ ಜಾಲ್ಲ್ಯಾನ್ ಫಕತ್ ಸಾಹಿತಿಕ್ ವಾವ್ರಾಚೆರ್ ತಾಚೆಂ ಗಮನ್ ಆಸ್ಲೆಂ. ಹಾಂವ್ ಕೊಂಕ್ಣಿ ಪತ್ರಾಂಚ್ಯಾ ಪ್ರಚಾರಾಕ್ ಲಾಗುನ್ ಘರಾಂ, ಗಾಂವ್ ಭಂವೊನ್, ಪತ್ರಾಂಕ್ ವರ್ಗಣ್ಯೊ ಜಮಂವ್ಚ್ಯಾ ವಾವ್ರಾಂತ್ ಲಾಗ್ತಾಲೊಂ ಬಿಲ್ಕುಲ್ ಏಕ್ ಕಾಸಾಚೊ ಫಾಯ್ದೊ ನಾಸ್ತಾಂ. ಕೊಣಾಚಿಂಗೀ ಪತ್ರಾಂ ಆನಿ ಕೊಣೆಂಗೀ ವರ್ಗಣಿ ಘೆಂವ್ಚಿ ಪುಣ್ ಮ್ಹಜ್ಯಾಚ್ ಮಿನತೆನ್, ಮ್ಹಜ್ಯಾಚ್ ಖರ್ಚಾನ್, ಮ್ಹಜ್ಯಾಚ್ ವೆಳಾನ್ ಹ್ಯಾ ಪಾಸತ್ ವಾಂವ್ಟ್ ಕಾಡ್ಚ್ಯಾಕ್ ಕೆವಿನಾನ್ ಏಕ್ ದೋನ್ ಪಾವ್ಟಿಂ ಜಾಗ್ವಣಿ ದಿಲ್ಲಿ ಆಸಾ.

ತೆಚ್ ಕಾಳಾರ್ ಪಂಚು ಬಂಟ್ವಾಳ್ ’ಕಾಣಿಕ್’ ಪತ್ರಾಚೊ ಸಹ-ಸಂಪಾದಕ್ ಜಾವ್ನಾಸ್ಲೊ, ಪಂಚುಲಾಗಿಂ ಹೆರ್ ಬರವ್ಪ್ಯಾಂಕ್ ಮೆಳ್ಚಿ ಏಕ್ ಸೊಭಿತ್ ರಿವಾಜ್ ಆಸ್ಲಿ, ಆನಿ ಕೆವಿನಾಕ್ ತಶೆಂಚ್ ಮ್ಹಾಕಾ ಮೆಳುಂಕ್ ತೊ ಯೇವ್ನ್ ಆಮ್ಚೊ ಇತ್ಲೊ ಖಾಸ್ ಮಿತ್ರ್ ಜಾಲೊ ಮ್ಹಳ್ಯಾರ್ ಆಮ್ಚ್ಯಾ ಕಾಜಾರಾಚೊ ಎಮ್ಸಿ ಸಯ್ತ್ ಪಂಚು ಬಂಟ್ವಾಳ್. ಕೆವಿನಾಚೆಂ ಕಾಜರ್ ಲೊಲಿಟಾಸವೆಂ ಜಾಲೆಂ, ಆನಿ ತಾಂಚ್ಯಾ ಕಾಜರಾಕ್ ಸ್ಟೇನ್‌ರೊ ಆಜೆಕಾರ್ ಆನಿ ಹಾಂವ್ ಗೆಲ್ಲ್ಯಾಂವ್. ಪುಣ್ ತ್ಯೇ ಉಪ್ರಾಂತ್ ಹಾಂವ್ ಕಾಣಿಕ್ ಪತ್ರಾಚೊ ಸಹ-ಸಂಪಾದಕ್ ಜಾವ್ನ್ ಮಂಗ್ಳುರ್ ಪಾವ್ಲೊಂ. ಪುಣ್ ಕೆವಿನ್ ಆನಿ ಮ್ಹಜಿ ಸಳಾವಳ್, ಪತ್ರ್-ವೆವ್ಹಾರ್ ಚಾಲುಚ್ ಆಸ್ಲೊ.

ಕೆವಿನ್ ಕಾಬೆಟ್ಟು (ಕಾರ್ಕಳ್) ಎಕಾ ಪ್ಲಾಸ್ಟಿಕ್ ಫ್ಯಾಕ್ಟರಿಂತ್ ಸುಪರ್‌ವೈಜರ್ ಜಾವ್ನ್ ಕಾಮ್ ಕರ್ತಾಲೊ ಆನಿ ಕೆದ್ನಾಂಯ್ ಕೆವಿನಾಕ್ ಮೆಳುಂಕ್ ಆಸ್ಲ್ಯಾರ್ ಹಾಂವ್ ಥಂಯ್ ವಚುನ್ ಮೆಳ್ತಾಲೊಂ. ಬಗ್ಲೆನ್ ಎಕಾ ಕೊಂಕ್ಣ್ಯಾಚೆಂ ದೋನ್ ಬಾಂಕಾಂಚೆಂ ಹೊಟೆಲ್ ಆಸ್ತಾಲೆಂ, ಥಂಯ್ ವಚುನ್ ಸ್ಟೀಲಾಚ್ಯಾ ಕಪ್ಪಾಂನಿ ಚಾ ಪಿಯೆಂವ್ಚಿ ರಿವಾಜ್ ಆಸ್ಲಿ. ಪುಣ್ ಎಕಾಮೆಕಾಚ್ಯಾ ಸಾಹಿತ್ಯಾವಿಶಿಂ ಮಟ್ವಿ ಚರ್ಚಾ ಕರ್ಚಿ ಆಸ್ಲಿ. ಕೆವಿನ್ ಏಕ್ ವಯ್ಚಾರಿಕ್ ಚಿಂತ್ಪಾಚೊ ಕಥಾಕಾರ್. ದೆಕುನ್ ತಾಚೆಂ ಚಿಂತಪ್ ಉಂಚ್ಲೆಂ ಪುಣ್ ಜಿವಿತ್ ಭೋವ್ ಸಾದೆಂ ಜಾವ್ನಾಸ್ಲೆಂ. ಫುಡಾರಾಕ್ ಲಾಗುನ್ ಹಾಂವ್ 1993 ಇಸ್ವೆಂತ್ ಬೊಂಬೊಯ್ ಪಾವ್ತಾನಾ ಸಯ್ತ್ ಕೆವಿನಾನ್ ಬರಯಿಲ್ಲ್ಯಾ ಪತ್ರಾಚಿಂ ಉತ್ರಾಂ ಅಜೂನ್ ಮ್ಹಜ್ಯಾ ಯಾದಿಂತ್ ಆಸಾತ್; ’ವಲ್ಲಿ, ಬೊಂಬೊಯ್ ಗೆಲಾಯ್, ಥಂಯ್ಚೊ ಖಚ್ರೊ ಉಸ್ತುನ್ ತಾಂತ್ಲಿ ಕಥಾವಸ್ತ್ ಸೊಧುನ್ ಏಕ್ ಕಾಣಿ ಬರಯ್’. ಪುಣ್ ಬೊಂಬೊಯ್ ಗೆಲ್ಲ್ಯಾ ಮ್ಹಾಕಾ ಸಾಹಿತ್ಯಾಚ್ಯಾಕೀ ವರ್ತಿ ಗರ್ಜ್ ಆಸ್ಲಿ; ’ಪೋಟ್ ಭರ್ಚಿ’, ದೆಕುನ್ ಎಕಾ ಇಸ್ಕೊಲಾಂತ್ ಕಂಪ್ಯೂಟರ್ ಶಿಕಂವ್ಚೆಂ ಕಾಮ್ ಕರುನ್ ಆಸ್ತಾನಾ ಅನ್ಯೇಕ್ ಮಿತ್ರ್ ’ಮಾವ್ರಿಸ್ ಶಾಂತಿಪುರ್ ಆನಿ ಪಂಚು ಬಂಟ್ವಾಳ್’ ಹಾಣಿಂ ಕಾಣಿ ಬರವ್ನ್ ಧಾಡ್ ಮ್ಹಣುನ್ ಮ್ಹಾಕಾ ಕಾಗದ್ ಬರಯಿಲ್ಲೆಂ ದೆಕುನ್ ’ಶನಿ’, ’ಎಕಾ ಪಿಂದೆಲ್ಯಾ ಪಾನಾಚಿ ಕಥಾ’ ಮ್ಹಳ್ಳ್ಯೊ ದೋನ್ ಕಾಣಿಯೊ ಕಾಂಯ್ ಸಾತ್ ವರ್ಸಾಂನಿ ಬರಯಿಲ್ಲ್ಯೊ ಭೋವ್ ಥೊಡ್ಯೊ ಕಾಣಿಯೊ. ಪುಣ್ ಹ್ಯಾ ಸಂಧರ್ಭಾರ್ ಕೆವಿನ್ ಆನಿ ಮ್ಹಜಿ ಸಳಾವಳ್ ಆಸ್ಲಿ.

2001 ಇಸ್ವೆಂತ್ ಹಾಂವ್ ಕುವೆಯ್ಟ್ ಪಾವ್ಲೊಂ ಆನಿ ಕೆವಿನಾಚಿ ಪತಿಣ್ ಲೊಲಿಟಾ ಕುವೆಯ್ಟಾಂತ್ ಆಸ್ಲಿ. ಕಶೆಂ ಪುಣಿ ಕೆವಿನಾಕ್ ಕುವೆಯ್ಟ್ ಹಾಡಂವ್ಚೆವಿಶಿಂ ಆಮಿ ಉಲವ್ನ್ ಆಸ್ಲ್ಯಾಂವ್. 2003 ಇಸ್ವೆಂತ್ ಹಾಂವ್ ದಾಯ್ಜ್.ಕೊಮ್ ಚಲವ್ನ್ ಆಸ್ಲೊಂ ದೆಕುನ್ ಕೆವಿನಾಕ್ ಕಾಣಿ ಬರಂವ್ಕ್ ಪರತ್ ಪರತ್ ಸಾಂಗ್ತಾಲೊಂ, ಕಾರ್ಕಳ್ಚೊಚ್ ಮಿತ್ರ್ ವಿತೊರಿನ್ ಸಾಂಗಾತಿ ಮೀಡಿಯಾ ಮುಖಾಂತ್ರ್ ಮಿತ್ರ್ ಪತ್ರಾಚಿ ಪರ್ಗಟ್ಣಿ ಸುರು ಕೆಲಿ ಆನಿ ದಾಯ್ಜ್ ಸಾಹಿತಿಕ್ ಸ್ಪರ್ಧ್ಯಾಕ್ ಕಾಣಿ ಧಾಡುಂಕ್ ಕೆವಿನಾಕ್ ಮಾಗ್ಲೆಂ. ಕೆವಿನಾಚಿ ’ಚಂಡ ಆನಿ ಗರ್ಭ್’ ಕಾಣಿ ತ್ಯಾ ಸ್ಪರ್ಧ್ಯಾಂತ್ ಪಯ್ಲೆಂ ಇನಾಮ್ ಆಪ್ಣಾಯಿಲ್ಲಿ ಕಾಣಿ.

ಕೆವಿನ್ ಆನಿ ಹಾಂವ್ ಕೆದ್ನಾಂಯ್ ಎಕಾಮೆಕಾಚ್ಯಾ ಕಥೆಂಚೆರ್ ಎಕಾಮೆಕಾಚಿ ಅಭಿಪ್ರಾಯ್ ಉಗ್ತ್ಯಾನ್ ಉಚಾರ್ ಕರ್ತಾಲ್ಯಾಂವ್. ಕೆವಿನಾಚ್ಯಾ ಎಕಾಚ್ ಕಥಾವಸ್ತುಚೆರ್ ಸಭಾರ್ ಕಥೆಂಕ್ ರಚ್ಲೆಲೆವಿಶಿಂ ಹಾಂವೆಂ ಕೆಲ್ಲ್ಯಾ ಪ್ರಸ್ತಾವಾಕ್ ಅಪ್ಲಿ ಸಹಮತಿ ದಿವುನ್ ಅಪ್ಣಾಕ್ ಜಾಲ್ಲೊ ಅನ್ಭವ್ ಮ್ಹಜ್ಯೆಸವೆಂ ವಾಂಟುನ್ ಘೆತಾಲೊ. ಹೆಚ್ ಕಥಾವಸ್ತುಂಕ್ ಅರ್ಥ್ ಕರ್ಚ್ಯಾ ಬದ್ಲಾಕ್ ಅಪಾರ್ಥ್ ಕರುನ್ ಕಶೆಂ ತಾಚಿಂ ಸಯ್ರಿಂ ಆನಿ ಲಾಗ್ಶಿಲಿಂ ಕೆವಿನಾವಿಶಿಂ ಅಪಾರ್ಥ್ ಕರ್ತಾಲಿಂ ಆನಿ ಹಾಚೊ ಪರಿಣಾಮ್ ಜಾವ್ನ್ ಕೆವಿನಾನ್ ಕಥಾ ಬರಂವ್ಚ್ಯೊಚ್ ರಾವಯಿಲ್ಲ್ಯೊ.

2005 ಇಸ್ವೆಂತ್ ಮಿತ್ರ್-ದಾಯ್ಜ್ ಸಾಂಗಾತ್‌ಪಣಾಖಾಲ್ ಕಾರ್ಕಳ್ ವಾರಾಡ್ಯಾಚೆಂ ಸಹ-ಮಿಲನ್ ಕಾರ್ಕಳ್ ಇಗರ್ಜೆಚ್ಯಾ ಸಭಾಸಾಲಾಂತ್ ಮಾಂಡುನ್ ಹಾಡ್‌ಲ್ಲೆಂ, ಆನಿ ತ್ಯಾ ಸಹಮಿಲನಾಂತ್ ಮೊಟ್ವ್ಯಾ ಕಾಣಿಯೆಂಚೆರ್ ಉಲಂವ್ಕ್ ಕೆವಿನಾಕ್ ಆವ್ಕಾಸ್ ದಿಲ್ಲೊ. ಪುಣ್ ಕೆವಿನ್ ವೆದಿಚೆರ್ ಚಡ್ಚೊ ವಾ ಮುಕಾರ್ ಯೆಂವ್ಚ್ಯಾ ವರ್ಗಾಂತ್ಲೊ ನ್ಹಯ್. ತಾಕಾ ದಾಕವ್ಪ್ ವಾ ಅಪ್ಲ್ಯಾ ಜಾಣ್ವಾಯೆಚಿ ಪರ್ಗಟ್ಣಿ ಕರುಂಕ್ ಆವಡ್ನಾತ್ಲೆಂ ಜಾಲ್ಲ್ಯಾನ್ ತೊ ಕೆದ್ನಾಂಯ್ ಪಾಟಿಂ ರಾವ್ತಾಲೊ. 2006 ಇಸ್ವೆಂತ್ ಕೆವಿನ್ ಕುವೆಯ್ಟಾಕ್ ಪಾವ್ಲೊ ಆನಿ ’ಹನಿವೆಲ್’ ಕಂಪ್ಣೆಂತ್ ಕಾಮಾಕ್ ಲಾಗ್ಲೊ ಪುಣ್ ಮಯ್ನ್ಯಾಕ್ ಏಕ್ ಪಾವ್ಟಿಂ ಆಮಿ ಆಸಾ ಕರ್ಚ್ಯಾ ’ಕವಿತಾಪಾಠ್/ಕಥಾಪಾಠ್’ ಕಾಮಾಸಾಳಾಂನಿ ತೊ ಹಾಜರ್ ಜಾಂವ್ಕ್ ಲಾಗ್ಲೊ ಪುಣ್ ಜೆದ್ನಾಂಯ್ ಉಲಂವ್ಚಿ ಸರ್ತ್ ಯೆತಾನಾ ತೊ ಭೋವ್ ಉಣ್ಯಾ ಉತ್ರಾಂಕ್ ವಿಂಚ್ತಾಲೊ.

ಥೊಡ್ಯಾ ವರ್ಸಾಂನಿ ತೊ ಅಪ್ಲ್ಯಾ ಪತಿಣ್ ಲೊಲಿಟಾಸವೆಂ ಕುವೆಯ್ಟ್ ಸೊಡುನ್ ಗಾಂವಾಕ್ ಪಾವ್ಲೊ ಆನಿ ಜೆದ್ನಾಂಯ್ ಹಾಂವ್ ರಜೆರ್ ಗಾಂವಾಕ್ ಗೆಲ್ಲೆವೆಳಾರ್ ತಾಕಾ ಮೆಳ್ತಾಲೊಂ, ಆಮಿ ತೆಚ್ ಕೊಂಕ್ಣ್ಯಾಚ್ಯಾ ದೋನ್ ಬಾಂಕಾಂಚ್ಯಾ ಹೊಟೆಲಾಂತ್ ಬಸುನ್ ಆಮಿ ಸ್ಟೀಲಾಚ್ಯಾ ಲ್ಹಾನ್ ಕಪ್ಪಾಂನಿ ಚಾ ಪಿಯೆಂವ್ಚಿ ಆಸ್ಲಿ ಆನಿ ಸಾಹಿತಿಕ್ ಚರ್ಚಾ ಕರ್ಚಿ ಆಸ್ಲಿ. ಪುಣ್ ಕೆವಿನ್ ದಿಸಾನ್ ದೀಸ್ ಸಾಹಿತ್ಯಾಥಾವ್ನ್ ಪಯ್ಸ್ ಗೆಲ್ಲೊ ಪುಣ್ ಆಮ್ಚಿ ಎಕಾಮೆಕಾ ಸಳಾವಳ್ ಆನಿ ಸಂಪರ್ಕ್ ಚಾಲು ಆಸ್ಲೊ. ಹಾಂವ್ ಸಯ್ತ್ ಮಾಂಯ್‌ಗಾಂವಾಕ್ ಗೆಲ್ಲೆವೆಳಾರ್ ಕೆವಿನಾಚ್ಯಾ ಘರಾ ವಚೊನ್ ರಾವ್ಲಾಂ, ತಾಚೆಂ ಕುಟಮ್ ಸಯ್ತ್ ಮ್ಹಾಕಾ ಮಯ್ಪಾಸಾನ್ ಲೆಕ್ತಾ.

ಕೆವಿನ್ ತ್ಯೇ ಉಪ್ರಾಂತ್ ಕ್ರೈಸ್ಟ್ ಚರ್ಚ್ ಕೊಲೆಜಿಚೊ ಎಡ್ಮಿನಿಸ್ಟ್ರೇಟಿವ್ ಮ್ಯಾನೆಜರ್ ಜಾವ್ನ್ ಕಾಮ್ ಕರುಂಕ್ ಲಾಗ್ಲೊ ಆನಿ ಥೊಡೆ ಪಾವ್ಟಿಂ ತಾಕಾ ಮೆಳುಂಕ್ ಹಾಂವ್ ಥಂಯ್ ಗೆಲ್ಲೊಂ. ಕೆವಿನ್ ಪರ್ದ್ಯಾ ಪಾಟ್ಲ್ಯಾನ್ ಜಾಯ್ತೊ ವಾವ್ರ್ ಕರುನ್ ಆಸ್ಲೊ, ಆಮಾಲ್ ಪಿಯೆಣ್ಯಾಚೆರ್ ಲಗ್ತಿ ಜಾಲ್ಲ್ಯಾ ಸಭಾರ್ ಸಾಹಿತ್ಯಾಕ್ ತಾಣೆಂ ತರ್ಜಣ್ ಕೆಲಾಂ. ಇತ್ಲೆಂಚ್ ನ್ಹಯ್ ಸಭಾರ್ ಗರ್ಜೆವಂತಾಂಕ್ ಮಜತ್ ತಾಣೆಂ ಲಾಭಾಯ್ಲ್ಯಾ. ಹ್ಯೇ ಪಾಸತ್ ಕೆವಿನ್ ಭೋವ್ ಥೊಡ್ಯಾಂಕ್ ಮಾತ್ರ್ ಸಂಪರ್ಕ್ ಕರ್ತಾಲೊ; ಎಕ್ಲೊ ಆಮ್ಚೊ ಖಾಸ್ ಮಿತ್ರ್ ಪ್ರಶಾಂತ್ ಅಲೆಕ್ಸಾಂಡರ್ ಮಿನೇಜಸ್ ತರ್ ದುಸ್ರೊ ಹಾಂವ್ ಅಶೆಂ ಭೋವ್ ಥೊಡ್ಯಾಂಲಾಗಿಂ ತೊ ಸಮಾಜಿಕ್ ಗರ್ಜೆಂವಿಶಿಂ ಉಲಯ್ತಾಲೊ ಆನಿ ಗುಪ್ತಿಂ ಕಸ್ಲೊಚ್ ದಭಾಜೊ ವ ಪ್ರಚಾರ್ ಆಶೆನಾಸ್ತಾಂ ಆರ್ಥಿಕ್ ಕುಮೊಕ್ ಕರ್ತಾಲೊ.

ಥೊಡ್ಯಾಚ್ ಮಯ್ನ್ಯಾದಿಂ ಕೆವಿನಾಕ್ ಮೆಳುಂಕ್ ಗೆಲ್ಲೊಂ. ತೆದ್ನಾಂ ಕೆವಿನಾನ್ ಅಪ್ಲೆಂ ಘರ್-ಜಾಗೊ ವಿಕ್ಚೊ ಪ್ರಸ್ತಾಪ್ ಕಾಡುನ್ ಮ್ಹಣಾಲೊ; ’ಮ್ಹಜ್ಯಾ ಮಾಂವಾಡೆ ವಚುನ್ ಘರ್ ಭಾಂದುನ್ ಥಂಯ್ ರಾಂವುಂಕ್ ಚಿಂತ್ಲಾಂ, ದೆಕುನ್ ಹೆಂ ಘರ್-ಜಾಗೊ ವಿಕ್ತಾಂ, ತುಜ್ಯಾ ಕೊಣಾಯ್ ಇಸ್ಟಾಂಕ್ ಜಾಯ್ ತರ್ ಮ್ಹಾಕಾ ಸಾಂಗ್’. ಹಾಂವ್ ಪಾಟಿಂ ಬೊಂಬೊಯ್ ಗೆಲೊಂ ಆನಿ ಫೊನಾರ್ ಆಮ್ಚೊ ಸಂಪರ್ಕ್ ಚಾಲುಚ್ ಆಸ್ಲೊ. ಅಕ್ತೋಬರಾಂತ್ ಹಾಂವೆಂ ಫೋನ್ ಕೆಲ್ಲೆವೆಳಾರ್ ತೊ ಹೊಸ್ಪಿಟ್ಲಾಕ್ ವೆಚ್ಯಾ ತಯಾರಾಯೆನ್ ಆಸ್ಲೊ ’ಪತಿಣ್ ಲೊಲಿಟಾ ಆನಿ ಭುರ್ಗೆಂ ದೊಗಾಂಯ್ ತಾಪಾನ್ ಆಸ್ಪತ್ರೆಂತ್ ಎಡ್ಮಿಟ್ ಆಸಾತ್, ತಾಂಕಾಂ ಜೆವಣ್ ವ್ಹರುನ್ ಆಸಾಂ, ದೆಕುನ್ ಅನ್ಯೇಕ್ ಪಾವ್ಟಿಂ ಉಲವ್ಯಾಂ’ ಅಶೆಂ ಮ್ಹಣುನ್ ಫೋನ್ ಡಿಸ್‌ಕನೆಕ್ಟ್ ಕೆಲೆಂ. ತ್ಯೇ ಉಪ್ರಾಂತ್ ಧಾ-ಪಂದ್ರಾ ದಿಸಾಂನಿ ಪರತ್ ಕೆವಿನಾಕ್ ಫೋನ್ ಕೆಲೊ ಪುಣ್ ಕೆವಿನಾಕ್ ಫೋನ್ ರಿಸೀವ್ ಕೆಲೊನಾ.

ಸಂತೋಷ್ ಆನಂದಾಚ್ಯಾ ಕಾಂತಾರಾಚ್ಯಾ ವಳಿಂನಿ ಸಂಪಂವ್ಚೆಂ ತರ್;

’ಕುಛ್ ಪಾಕರ್ ಖೋನಾ ಹೈ
ಕುಛ್ ಖೋಕರ್ ಪಾನಾ ಹೈ
ಜೀವನ್ ಕಾ ಮತ್ಲಭ್ ಹೈ ಯೇ
ಆನಾ ಔರ್ ಜಾನಾ ಹೈ’

(ಥೊಡೆಂ ಆಪ್ಣಾಂವ್ನ್ ಹೊಗ್ಡಾಂವ್ಕ್ ಆಸಾ
ಥೊಡೆಂ ಹೊಗ್ಡಾವ್ನ್ ಆಪ್ಣಾಂವ್ಕ್ ಆಸಾ
ಜಿವಿತಾಚೊ ಮತ್ಲಬ್ ಹೊಚ್
ಯೆಂವ್ಚೆಂ ಆನಿ ವ್ಹೆಚೆಂ)

ನವೆಂಬ್ರಾಚ್ಯಾ 24 ತಾರಿಕೆರ್ ಕೆವಿನ್ ಸರ್ಲೊ ಮ್ಹಣುನ್ ಮ್ಹಾಕಾ ಗಾಂವಾಥಾವ್ನ್ ಥೊಡ್ಯಾಂನಿ ವಾಟ್ಸಾಪ್ ಸಂಧೇಶ್ ಧಾಡ್ನ್ ವಿಚಾರ್ ಕರ್ತಾನಾ ಹಾಂವ್ ಮೊನೊ ಜಾಲ್ಲೊಂ. ಪಾತ್ಯೆಂವ್ಕ್ ತ್ರಾಸ್ ಜಾತಾತ್ ಕೆವಿನ್ ಆಜ್ ಆಮ್ಕಾಂ ಸಾಂಡುನ್ ಗೆಲಾ ಮ್ಹಣುನ್. ಕೆವಿನಾಚ್ಯಾ ಕುಟ್ಮಾಕ್ ಭುಜವ್ಣಿ ದಿತಾಸ್ತಾಂ ಕೆವಿನಾಚ್ಯಾ ಅತ್ಮ್ಯಾಕ್ ಶಾಂತಿ ಮಾಗ್ತಾಂ.

- ವಲ್ಲಿ ಕ್ವಾಡ್ರಸ್  [ದಸೆಂಬ್ರ್, 2022]