[ಕಳವ್ಣಿ:] 2018 ದಾಯ್ಜಿದುಬಾಯ್ ಪುರಸ್ಕಾರ್ ರೋನ್‌ರೊಚ್ ಕಾಸ್ಸಿಯಾಕ್

ಕೊಂಕ್ಣೆಂತ್ಲೊ ನಾಂವಾಡ್ದಿಕ್ ನಿಗೂಡ್ ಕಾಣಿಯೆಂಚೊ ಸಾಹಿತಿ ರೋನ್ ರೊಚ್ ಕಾಸ್ಸಿಯಾಕ್ 2018 ಇಸ್ವೆಚೊ ದಾಯ್ಜಿದುಭಾಯ್ ಪುರಸ್ಕಾರ್ ಫಾವೊ ಜಾಲಾ ಮ್ಹಣ್ ಅಧಿಕೃತ್ ಭಾತ್ಮೆಧ್ವಾರಿಂ ಕಳಿತ್ ಕೆಲಾಂ. 2017 ದಸೆಂಬರ್ 15 ತಾರಿಕೆರ್ ಸುಕ್ರಾರಾ ದುಭಾಯಾಂತ್ ಆಸಾ ಕೆಲ್ಲ್ಯಾ ಜೆರಾಲ್ ಜಮಾತೆಂತ್ ಹಿ ವಿಂಚವ್ಣ್ ಜಾಲಿ.

ಸಾದ್ಯಾ ಸ್ವಭಾವಾಚ್ಯಾ ರೋನ್‌ರೊಚ್ ಕಾಸ್ಸಿಯಾಚೆಂ ಜನನ್ 1947 ಇಸ್ವೆಚ್ಯಾ ಮಾಯ್ ಮಯ್ನ್ಯಾಚ್ಯಾ 15 ತಾರಿಕೆರ್ ಮಂಗ್ಳುರಾಂತ್ ಜಾಲ್ಲೆಂ. ತಾಚಿಂ ಆವಯ್-ಬಾಪಯ್ಕ್ ಕನ್ನಡ ಅನಿ ಕೊಂಕ್ಣಿ ಸಾಹಿತ್ಯಾಚೊ ಬಳ್ವಂತ್ ವೊಸೊ ಆಸ್‌ಲ್ಲ್ಯಾನ್ ಕೊಂಕ್ಣಿ ಸಾಹಿತಿಕ್ ಪಯ್ಣಾಚೆಂ ಆರಂಭ್ 1973 ಇಸ್ವೆಂತ್ ’ಸರಳಾಂ ಪಾಟ್ಲ್ಯಾನ್’ ಮ್ಹಳ್ಳ್ಯಾ ಕದಂಬರೆಸವೆಂ ಜಾಲೆಂ. ಹಿ ಸಾಂಕಳ್ ಕಾಣ್ಯೆರುಪಾರ್ ’ಕಾಣಿಕ್’ ಪತ್ರಾಚೆರ್ ಪರ್ಗಟ್ ಜಾಲ್ಲಿ. ಉಪ್ರಾಂತ್ 1974 ಇಸ್ವೆಂತ್ ಮಿತ್ರಾರ್ ವ್ಹಾಳೊನ್ ಆಯಿಲ್ಲ್ಯಾ ’ಆಮಿ ನೋವ್’ ಕಾದಂಬರೆಧ್ವಾರಿಂ ತೊ ವಾಚ್ಪ್ಯಾಂಕ್ ಮೊಗಾಚೊ ಜಾಲೊ. ಕೊಂಕ್ಣಿ ಸಾಹಿತ್ಯಾಂತ್ ತಾಣೆಂ ಎದೊಳ್‌ಚ್ ನೋವ್ ಕಾದಂಬರಿ, ಶೆಂಭೊರಾಂ ವಯ್ರ್ ಮಟ್ವ್ಯೊ ಕಾಣಿಯೊಂ, ಆನಿ ದೆಡ್ಶಾಂಪ್ರಾಸ್ ಚಡಿತ್ ಲೇಖನಾಂ ಬರಯ್ಲ್ಯಾಂತ್. ಕೊಂಕ್ಣಿ ಸಾಹಿತ್ಯಾಚ್ಯಾ ಪಾಟ್ಲ್ಯಾ ಚಾಳಿಸ್ ವರ್ಸಾಂಚಿ ಬದ್ಲಾವಣ್ ಆನಿ ವಾಡಾವಳೆಂತ್ ತೊ ವಾಂಟೊ ಜಾಲಾ. ಕಿತೆಂಚ್ ಇನಾಮಾಂ ಪುರಸ್ಕಾರ್ ಅಪೇಕ್ಶಿನಾಸ್ತಾನಾ ಹಾಚೆಥಾವ್ನ್ ಸಾಹಿತ್ಯಾಚಿ ಪ್ರಾಮಾಣಿಕ್ ಸೆವಾ ಜಾಲ್ಯಾ.

ರಹಸ್ಯ್, ನಿಘೂಡ್ ಆನಿ ಕುತೂಹಲ್‌ಭರಿತ್ ಕಾಣಿಯೊಂ ಬರಂವ್ಚಿ ರೋನ್ ರೋಚ್ ಕಾಸ್ಸಿಯಾಚಿ ವಿಶೇಷತಾ ಆನಿ ಹೊ ವರ್ಗ್ ತಾಣೆಂ ಅಪ್ಲೊ ಕರ್ನ್ ಘೆತ್ಲಾ. ತಾಚೊ ಹೆರ್ ಲೊಕಾಮೊಗಾಳ್ ಕಾದಂಬರಿ ಜಾವ್ನಾಸಾತ್; ’ತಾಚಿಂ ಹಾಡಾಂ’, ’ಹಾಂವ್ ರಡ್ತಾಂ’, ’ಟೋಕನ್ ನಂಬರ್ 13’, ’ಹೊ ಹಾತ್ ಖುನಿಯೆಚೊ ಹಾತ್’, ’ಮ್ಹಾಕಾ ಜಿಯೆಂವ್ಕ್ ಸೊಡಾ’, ’ತಾಚ್ಯೆ ಸೊಧ್ನೆರ್’, ಆನಿ ’ಜರ್ ಹಾಂವ್ ಸಾಂಗಿನ್ ತರ್’. ವೆವೆಗ್ಳ್ಯಾ ತಾಲೆಂತಾಚೊ ರೋನ್ ರೊಚ್ ಕಾಸ್ಸಿಯಾನ್ ಸಂಗೀತಾಂತ್ ಸಯ್ತ್ ಅಪ್ಲಿ ಪ್ರತಿಭಾ ಧಾಖಯ್ಲ್ಯಾ. 65 ಪದಾಂನಿ ಉತ್ರಾಂಕ್ ತಾಳೊ ಬಸವ್ನ್ ಸಂಗೀತ್ ದಿಲಾಂ. ಹಾಚಿ ಹೆರ್ ಕಲಾಕಾರಾಂ ಸಂಗಿಂ ಸಂಯುಕ್ತ್ ಸಂಗೀತ್ ಸಾಂಜ್ ಡೋನ್ ಬೊಸ್ಕೊ ಹೊಲಾಂತ್ ಆನಿ ದೋನ್ ಕಾಸ್ಸಿಯಾ ಇಗರ್ಜೆಚ್ಯಾ ಮಯ್ದಾನಾರ್ ಸಾದರ್ ಜಾಲ್ಯಾತ್.

ರೋನ್ ರೊಚ್ ಕಾಸ್ಸಿಯಾಕ್ ದಾಯ್ಜಿದುಭಾಯ್ ಪುರಸ್ಕಾರ್, 2018 ಇಸ್ವೆಚ್ಯಾ ಜನೆರ್ ಮಯ್ನ್ಯಾಂತ್ ಮೆಳ್ತಲೊ. ಪುರಸ್ಕಾರ್ ಜಾವ್ನ್ 75000 ರುಪಯ್ ನಗದ್, ಮಾನ್‌ಪತ್ರ್ ಆನಿ ಯಾದಿಸ್ತಿಕಾ ಫಾವೊ ಜಾತೆಲಿ. ಎಮಿರೆತಾ ಥಾವ್ನ್ ದಾಯ್ಜಿದುಭಾಯ್ ಕೊಂಕ್ಣಿ ಬರವ್ಪ್ಯಾಂಚ್ಯಾ ಎಕ್ತಾರಾನ್ ಪಾಟ್ಲ್ಯಾ ಜಾಯ್ತ್ಯಾ ವರ್ಸಾಂ ಥಾವ್ನ್ ಕೊಂಕ್ಣಿ ಸಾಹಿತ್ಯ್, ಸಾಹಿತಿ, ಕಲಾ ಆನಿ ಕಲಾಕಾರಾಂಕ್ ಖಳಾನಾಸ್ತಾನಾ ಪಾಟಿಂಬೊ ದೀವ್ನ್ ಉಂಚ್ಲೆಂ ಸ್ಥಾನ್ ಆಪ್ಣಾಯ್ಲಾಂ.

ಭಾತ್ಮಿ: ಸ್ಟೇನ್ ಅಗೇರಾ, ದುಬೈ