ನಾಮ್ಣೆಚೊ ಕೊಂಕ್ಣಿ ಕವಿ, ಸಾಹಿತಿ, ಸಂಘಟಕ್ ತಶೆಂಚ್ ಥಕಾನಾತ್‌ಲ್ಲೊ ವಾವ್ರಾಡಿ ಮಾನೆಸ್ತ್ ಮೆಲ್ವಿನ್ ರೊಡ್ರಿಗಸಾಕ್ ಸತ್ರಾಚೊ ಪ್ರತಿಶ್ಟಿತ್ ದಾಯ್ಜಿ ದುಭಾಯ್ (ದುಭಯಾಂತ್ಲ್ಯಾ ಕೊಂಕ್ಣಿ ಲೇಖಕಾಂಚೊ ಎಕ್ತಾರ್) ಸಾಹಿತ್ಯ್ ಪುರಸ್ಕಾರ್ - 2016 ಫಾವೊ ಜಾತಾ. ದಸೆಂಬ್ರ್ 17 ತಾರಿಕೆರ್ ಚಲ್‌ಲ್ಲ್ಯಾ ಮಹಾ-ಸಭೆಂತ್ ದಾಯ್ಜಿ ದುಭಾಯ್ ಸಂಸ್ಥ್ಯಾನ್ ಹಾಚೆಂ ಘೋಶಣ್ ಕೆಲಾಂ.

ಜುಲಾಯ್ 8, 1962 ವೆರ್ ದೆ|ಚಾರ್ಲ್ಸ್ ರೊಡ್ರಿಗಸ್ ಅನಿ ದೆ|ತೆರೆಜಾ ರೊಡ್ರಿಗಸ್ ಹಾಂಚ್ಯಾ ಚ್ಯಾರ್ ಭುರ್ಗ್ಯಾಂಚ್ಯಾ ಕುಟ್ಮಾಂತ್, ಮಂಗ್ಳುರ್‌ಚ್ಯಾ ದೆರೆಬೈಲ್ ಫಿರ್ಗಜೆಂತ್ ಜಲ್ಮ್ ಘೆತ್‌ಲ್ಲ್ಯಾ ಮಾನೆಸ್ತ್ ಮೆಲ್ವಿನಾನ್ ಆಪ್ಲೆಂ ಪ್ರಾಥಮಿಕ್ ಶಿಕಾಪ್ ಹೊಲಿ ಫೆಮಿಲಿ ಪ್ರೈಮರಿ ಇಸ್ಕೊಲಾಂತ್ ಕರುನ್, ಪದ್ವಾ ಹಾಯ್ ಸ್ಕೂಲಾಂತ್ ಆಪ್ಲೆಂ ಮಾಧ್ಯಮಿಕ್ ಶಿಕಾಪ್ ಸಂಪಯ್ಲೆಂ. ಉಪ್ರಾಂತ್ ಆಪ್ಲೆಂ ಪಿ.ಯು.ಸಿ. ಶಿಕಾಪ್ ಸಾಂತ್ ಲುವಿಸ್ ಕೊಲೆಜಿಂತ್ ಸಂಪವ್ನ್ ಎಸ್.ಡಿ.ಎಮ್. ಕೊಲೆಜಿ ಥಾವ್ನ್ ಬಿ.ಬಿ.ಎಮ್ ತಶೆಂಚ್ ಮೈಸೂರ್ ವಿಧ್ಯಾಲಯ್ ಥಾವ್ನ್ ಸಮಾಜ್‌ಶಾಸ್ತ್ರಾಂತ್ ಎಮ್.ಎ, ಪದ್ವ್ಯೊ ಆಪ್ಣಾಯ್ಲ್ಯಾತ್. ಪ್ರಸ್ತುತ್ "ದಾಯ್ಜಿವರ್ಲ್ಡ್ ಮಿಡಿಯಾ" ಹಾಂತುಂ ಒಪರೇಶನ್ಸ್ ದಿರೆಕ್ತೊರ್ ಜಾವ್ನ್ ವಾವ್ರ್ ದೀವ್ನ್ ಅಸಾ. ಆವ್ರೆಲಾ ಸಂಗಿಂ ಲಗ್ನಾ ಭಾಂದಾಂತ್ ಎಕ್ವಟ್‌ಲ್ಲ್ಯಾ ಹ್ಯಾ ಜೊಡ್ಯಾಕ್ ಏಕ್ ಚೆರ್ಕೊ ದೆವಾನ್ ಫಾವೊ ಕೆಲಾ; ಗ್ಯಾವಿನ್ ರೊದ್ರಿಗಸ್, ಜೊ ನೃತ್ಯ್ ಸಂಸಾರಾಂತ್ ಅಪ್ಲೆಂಚ್ ಮ್ಹಳ್ಳೆಂ ನಾಂವ್ ಕರುನ್ ಆಸಾ.

ಕವಿಂಕ್ ರಸ್ಚೊ ಕವಿ ಮ್ಹಣುಂಚ್ ನಾಂವಾಡ್‌ಲ್ಲೊ ಮಾನೆಸ್ತ್ ಮೆಲ್ವಿನ್ ರೊಡ್ರಿಗಸ್ ಆಪ್ಲ್ಯಾ ಮಯ್ಪಾಸಿ ಸ್ವಭಾವಾಕ್, ಮೊವಾಳ್ ಉಲವ್ಣ್ಯಾಕ್ ಆನಿ ಹೆರಾಂಕ್ ಕುಮೊಕ್ ಕರ್ಚ್ಯಾ ಗುಣಾಂಕ್ ಲಾಗೊನ್ ಸರ್ವಾಂಚ್ಯಾ ಮೊಗಾಕ್ ತಶೆಂಚ್ ಗೌರವಾಕ್ ಪಾತ್ರ್ ಜಾಲಾ. ಕೊಂಕ್ಣೆಂತ್ ತಾಣೆಂ ದಿಂವ್ಚ್ಯಾ ಸೆವೆಕ್ ಆಜ್ ತಾಕಾ ಸರಿ ಜಾಲ್ಲೊ ಕೊಂಕ್ಣೆಂತ್ ಕೊಣ್‌ಂಚ್ ನಾ ಮ್ಹಣಾಜಯ್. ಮೆಲ್ವಿನಾನ್ ಕೊಂಕ್ಣೆಚ್ಯಾ ವಿವಿಧ್ ಪ್ರಕಾರಾಂನಿ ಸಭಾರ್ ಬೂಕ್ ಲಿಖ್ಲ್ಯಾತ್. ತಾಂತ್ಲ್ಯಾ ಥೊಡ್ಯಾ ಬುಕಾಂಚೊ ಉಲ್ಲೇಕ್ ಕರ್ಚೊ ತರ್;

ಭೆಸಾಂ ಜಾಲ್ಲಿಂ ಕಾಳಿಜ್ (ಕಾದಂಬರಿ), ಮೊಗಾ ಪೆಳೊ (ಮೊಗಾ ಕವಿತೆಂಚೊ ಸಂಗ್ರಹ್), ಕಾಣಿ ಜಾಲ್ಲಿ ಚಲಿ (ಸಾಹಿತ್ಯ್ ಅಕಾಡೆಮಿ ನವಿ ದೆಲ್ಲಿ ಹಾಣಿಂ ಪರ್ಗಟ್ ಕೆಲ್ಲ್ಯಾ ಯಶವಂತ್ ಚಿತ್ತಾಲ ಹಾಚ್ಯಾ ಮಟ್ವ್ಯಾ ಕಾಣಿಯೆಂಚೊ ತರ್ಜುಮೊ), ಫಿಂತಾಂ (ಕವಿತಾ ಜಮೊ), ಶಬ್ಧುಲಿಂ (ಪ್ರಭಂಧ್ ಸಂಗ್ರಹ್), ವಾಟ್ (ಕವಿತಾ ಜಮೊ), ದಿಣಿ-ದಿಣಿ (ನಿರ್ಮಾಪಕ್ ಆನಿ ಸಾಹಿತ್ಯ್ - ಕೊಂಕ್ಣಿ ಆಡಿಯೊ ಸಿ.ಡಿ.), ಪ್ರಕೃತಿಚೊ ಪಾಸ್ (ಕವಿತಾ ಜಮೊ), ವಿಂಚ್ಣಾರ್ ಕವಿತಾ (ಉಂಚ್ಲ್ಯಾ ಕವಿತೆಂಚೊ ಜಮೊ), ದೇವಿ ನಿನ್ಕಾಸಿ (ಕವಿತಾ ಜಮೊ). ಕೆ.ಎಸ್.ನರಸಿಂಹ ಸ್ವಾಮಿ ಹಾಚೊ ಕನ್ನಡ ಸಂಗ್ರಹ್ "ತೆರೆದ ಬಾಗಿಲು" ತರ್ಜುಮೊ ಕರುನ್ ವೆಗಿಂಚ್ ಉಜ್ವಾಡಾಕ್ ಯೆಂವ್ಚ್ಯಾರ್ ಆಸಾ.

ಮೆಲ್ವಿನ್ ರೊಡ್ರಿಗಸ್ ಹಾಚ್ಯಾ ಸಂಪಾದಕ್‌ಪಣಾಖಾಲ್ "ಕುಪಾಂ ಮಧ್ಲಿಂ ಮುಖಾಂ" (ಪನ್ನಾಸ್ ವಿಂಚ್ಣಾರ್ ಕವಿಂಚ್ಯಾ ಉಂಚ್ಲ್ಯಾ ಕವಿತೆಂಚೊ ಜಮೊ), ಚಿಂದಿಯಾಚೆಂ ಗೊಂಬೆ (ಬ್ಯಾರಿ ಕವಿ ಶಬ್ಬೀರ್ ಬೈದಾ ಹಾಚೊ ಜವಿತಾ ಜಮೊ), ವಿಸಾವ್ಯಾ ಸೆಕ್ಡ್ಯಾಂತ್ಲ್ಯೊ ಕೊಂಕ್ಣಿ ಕವಿತಾ (ಕರ್ನಾಟಕ್ ಕೊಂಕ್ಣಿ ಸಾಹಿತ್ಯ್ ಅಕಾಡೆಮಿನ್ ಪರ್ಗಟ್ ಕೆಲ್ಲ್ಯಾ ಉಂಚ್ಲ್ಯಾ 107 ಕೊಂಕ್ಣಿ ಕವಿಂಚೊ ಕವಿತಾ ಜಮೊ), ಆಂಕ್ರಿ (ಮ್ಯಾಕ್ಸಿಮ್ ಲೋಬೊ ಹಾಚೊ ಕವಿತಾ ಜಮೊ), ಕಾವ್ಳ್ಯಾ ಪಾವ್ಲಾಚಿಂ ನವ್ಲಾಂ (ಖ್ಯಾತ್ 45 ಕವಿಂಚ್ಯಾ ಉಂಚ್ಲ್ಯಾ ಕವಿತೆಂಚೊ ಜಮೊ), ಗೀತ್ ಆನಿ ಕವಿತಾ (ಗೋವಾ ಕೊಂಕಣಿ ಅಕಾಡೆಮಿನ್ ಪರ್ಗಟ್ ಕೆಲ್ಲ್ಯಾ ದೆ|ವಿಲ್ಫಿ ರೆಬಿಂಬಸಾಚಿಂ ಪದಾಂ ಆನಿ ಉತ್ರಾಂ) ಅನಿ ದೆ|ಎ.ಟಿ.ಲೊಬೊ ಏಕ್ ಕಾವ್ಯಾಳ್ ಜೀಣ್ (ದೆ|ಎ.ಟಿ.ಲೊಬೊ ಹಾಚಿಂ ಕವಿತಾ ತಶೆಂಚ್ ಉತ್ರಾಂ)

ಕೊಂಕ್ಣೆಂತ್ ಇತ್ಲೆಂ ಸರ್ವ್ ವಾವ್ರ್ ಮಾನೆಸ್ತ್ ಮೆಲ್ವಿನ್ ರೊಡ್ರಿಗಸ್ಹಾಣೆಂ ಕೆಲಾ ತರ್‌ಯೀ, ಪ್ರಶಸ್ಥಿ ಆನಿ ಗೌರವಾ ಪಾಟ್ಲ್ಯಾನ್ ತೊ ಕೆದಿಂಚ್ ಗೆಲ್ಲೊನಾ. ಬದ್ಲಾಕ್, ತೆ ಸರ್ವ್ ಮೆಲ್ವಿನ್ ರೊಡ್ರಿಗಸಾಕ್ ಎಕಾ ಪಾಟ್ಲ್ಯಾನ್ ಏಕ್ ಮ್ಹಳ್ಳೆಪರಿಂ ಸೊಧುನ್ ಆಯ್ಲೆ. 1986 ಇಸ್ವೆಂತ್ ಕೊಂಕಣಿ ಭಾಷಾ ಮಂಡಳ್ ಗೋವಾ ಹಾಂಚಿ ಪ್ರಶಸ್ಥಿ, 2006 ಇಸ್ವೆಂತ್ ಕೊಂಕ್ಣಿ ಕುಟಾಮ್ ಬಾಹ್ರೇಯ್ನ್ ಪ್ರಸಸ್ಥಿ, 2005 ಇಸ್ವೆಂತ್ ಕರ್ನಾಟಕ್ ಕೊಂಕ್ಣಿ ಸಾಹಿತಿ ಅಕಾಡೆಮಿ ಪ್ರಶಸ್ಥಿ, 2009 ಇಸ್ವೆಂತ್ ಡಾ|ಟಿ.ಎಮ್.ಎ.ಪೈ ಸಂಸ್ಥ್ಯಾನ್ ಪ್ರಶಸ್ಥಿ ತಶೆಂಚ್ ಆರ್ವಿಲ್ಯಾ ಮಹಿನ್ಯಾಂನಿ ಭಿಂಭ್ ಪ್ರಕಾಶನ್ ಗೋವಾ ಹಾಂಚೆ ಥಾವ್ನ್ ಪಾಂಡುರಂಗ್ ಭಾಂಗುಯಿ ಪ್ರಶಸ್ಥಿ. ’ಪ್ರಕೃತಿಚೊ ಪಾಸ್’ ಬುಕಾಕ್ 2011 ವರ್ಸಾಚಿ ಕೇಂದ್ರಿಯ್ ಸಾಹಿತ್ಯ್ ಅಕಾಡೆಮಿಚಿ ಪ್ರಶಸ್ಥಿ ಆಪ್ಣಾಂವ್ಚೆ ಮಾರಿಫಾತ್ ಕೊಂಕ್ಣೆಚೊ ಮಾನ್ ತಾಣೆಂ ಭೋವ್ ಉತ್ತುಂಗಾಕ್ ಪಾವಯ್ಲೊ.

ಮಾನೆಸ್ತ್ ಮೆಲ್ವಿನ್ ರೊಡ್ರಿಗಸ್ ಹಾಣೆಂ ಕವಿತಾ ಶೆತಾಚಿ ಸೆವಾ ಭೋವ್ ವರ್ತ್ಯಾ ರಿತಿನ್ ಕರ್ಚ್ಯಾ ಪಾಸೊನ್ 2006 ಇಸ್ವೆಂತ್ "ಕವಿತಾ ಟ್ರಸ್ಟ್" ಘಡುನ್, ತಾಚೊ ಸ್ಥಾಪಕ್ ಅಧ್ಯಕ್ಷ್ ಜಾವ್ನ್ ಸೆವಾ ದೀವ್ನ್ ಆಸಾ. 2001 ಇಸ್ವೆಂತ್ ಸಂಪೂರ್ಣ್ ಕವಿತಾಂಕ್ ಲಾಗುನ್ ಸಮರ್ಪಿತ್ ಕೆಲ್ಲಿ www.kavitaa.com ಅಂತರ್‌ಜಾಳ್ ತೊ ಭೋವ್ ಉಂಚ್ಲ್ಯಾ ರಿತಿನ್ ಚಲವ್ನ್ ಆಸಾ.

ಕೊಂಕ್ಣಿ ಸಾಹಿತ್ಯ್ ಸಂಸಾರಾಂತ್ ಭೋವ್ ಘನಾನ್ ಆನಿ ಮಾನಾನ್ ಲೆಖ್ಚಿ "ದಾಯ್ಜಿ ದುಭಾಯ್ ಸಾಹಿತಿಕ್ ಪ್ರಶಸ್ಥಿ - 2016", ಹಿ ಮೆಲ್ವಿನ್ ರೊಡ್ರಿಗಸ್ ಹಾಕಾ ದಾಯ್ಜಿ ದುಭಾಯ್ ಹಾಂಚ್ಯಾ ಸತ್ರಾವ್ಯಾ ವರ್ಸುಗೆಚ್ಯಾ ಸಂದರ್ಭಿಂ, ಮ್ಹಳ್ಯಾರ್ ಎಪ್ರಿಲ್ 8, 2016 ವೆರ್ ದುಭಯಾಂತ್ ಪ್ರಾಧನ್ಯ್ ಜಾತೆಲಿ. ಹ್ಯಾ ಪುರಸ್ಕಾರಾ ರುಪಾರ್ ರುಪಯ್ 75 ಹಜಾರ್ ನಗದ್, ಮಾನ್‌ಪತ್ರ್ ಆನಿ ಯಾದಿಸ್ತಿಕಾ ವಿಜೇತಾಕ್ ಫಾವೊ ಜಾತಾ.

ಭಾತ್ಮಿ - ನಾನು ಮರೋಳ್