ವಾಲ್ಟರ್ ಲಸ್ರಾದೊ ನಕ್ರೆ, ಕೊಂಕ್ಣೆಂತ್ ಅಪ್ರೂಪಾನ್ ಬರಯ್ತಾ ತರ್‌ಯೀ ಅಪುರ್ಭಾಯೆಚೆಂ ಬರಯ್ತಾ. ಕೊಂಕ್ಣೆಭಾಯ್ಲೆಂ ಸಾಹಿತ್ಯ್ ಸಯ್ತ್ ವಾಸ್ಚಾ ಹಾಣೆಂ ಸಭಾರ್ ಉಂಚ್ಲ್ಯೊ ಕೃತಿಯೊ ಕೊಂಕ್ಣೆಕ್ ಅನುವಾದಿತ್ ಕೆಲ್ಯಾತ್. ಚಡ್ತಾವ್ ಜಾವ್ನ್ ಸಕಾಳಿಕ್ ಲೇಖನಾಂ ತಶೆಂಚ್ ಸಮಾಜಿಕ್ ಸಂಗ್ತೆಚೆರ್ ಘಾಲ್ಚಿ ಹಾಚಿ ವಿಡಂಬನಾತ್ಮಕ್ ನದರ್, ಖರಿಚ್ ಜಾವ್ನ್ ಸಮಾಜಿಕ್ ಸ್ಪಂದನ್ ಕರ್ಚೆತಸ್ಲಿ. ದೆಕುನ್ ಹೊ ಕಾಣ್ಯೆಗಾರ್ ಕೊಂಕ್ಣೆಂತ್ಲ್ಯಾ ವಿಂಚ್ಣಾರ್ ಕಾಣ್ಯೆಗಾರಾಂ ಪಯ್ಕಿಂತ್ಲೊ ಎಕ್ಲೊ ಮ್ಹಣ್ ಭರ್ವಸ್ತೆಲ್ಯಾಂತ್ಲೊ ಹಾಂವ್‌ಯೀ ಎಕ್ಲೊಂ. ಸದ್ದ್ಯಾಕ್ ಮುಂಬಯಾಂತ್ಲ್ಯಾ ಮಲಾಡಾಂತ್ ಆಪ್ಲ್ಯಾ ಪತಿಣೆಸವೆಂ ವಸ್ತಿ ಕರುನ್ ಆಸಾ.

ಆಸ್ವೆಲಾಚೊ ಉಮೊ [ ಮೂಳ್ ಲೇಖಕ್: ರೊಬರ್ಟ್ ಬ್ಲೊಚ್, ತರ್ಜಣ್: ವಾಲ್ಟರ್ ಲಸ್ರಾದೊ, ನಕ್ರೆ]

[ಕಾಣ್ಯೆಚೊ ಆಧ್ಲೊ ಭಾಗ್]

ಲೀಜಾಚ್ಯಾ ಘರಾ ಪಾಟ್ಲ್ಯಾನ್ ರುಕಾಚ್ಯಾ ಮುಳಾಂತ್ ತಾಕಾ ಹಾಂವ್ ಮೆಳೊಂಕ್ ವೆತಾನಾ ಚಂದ್ರೆಮ್ ಉದೆವ್ನ್ ವಯ್ರ್ ಸರೊನ್ ಜಾಲ್ಲೊ. ಸಾವ್ಳೆಂತ್ ತೆಂ ಮ್ಹಾಕಾ ರಾಕ್ತಾಲೆಂ. ಪಯ್ಲೆ ಪಾವ್ಟಿಂ ತೆಂ ಮ್ಹಜ್ಯಾ ದಿಷ್ಟಿಕ್ ಪಡ್ತಾನಾ ಆಸ್ವೆಲ್ ಮ್ಹಣ್ ಚಿಂತುನ್ ಹಾಂವೆ ಆಂಗ್ ಕಾಡ್ಲೆಂ ತರೀ ತೆಂ ಸ್ತ್ರೀಯೆಚ್ಯೆ ರೂಪಾಂತ್ ಆಸ್ ಲ್ಲೆಂ ಪಳೆವ್ನ್ ಮ್ಹಾಕಾ ಸಮಾಧಾನ್ ಜಾಲೆಂ. ಮ್ಹಾಕಾ ಪಳೆವ್ನ್ ತೆಂ ಹಾಸ್ತಾನಾ ಮ್ಹಾಕಾ ಧಯ್ರ್ ಮೆಳ್ಳೆಂ.

“ತುಂ ಯೆತಲೊಯ್ ಮ್ಹಣ್ ಹಾಂವ್ ಜಾಣಾ ಆಸ್ ಲ್ಲಿಂ.” ತೆಂ ಮ್ಹಣಾಲೆಂ. “ಆತಾಂ ಆಮಿ ಸಾಂಗಾತಾ ರಾವ್ಯೆತ್. ಓಹ್, ಚಾರ್ಲ್ಸ್ ಮ್ಹಾಕಾ ಭ್ಯೆ ದಿಸ್ತಾ.”

“ಭ್ಯೆಂ ದಿಸ್ತಾ?”

“ವ್ಹಯ್. ಖಬಾರ್ ನಾಂಗಿ ತುಕಾ? ತೊ ಪೊಲಿಸಾಂಚೊ ಗ್ರೆಗರಿ ಮ್ಹಜೆಕಡೆ ಉಲಂವ್ಕ್ ಆಯಿಲ್ಲೊ. ಆಸ್ವೆಲಾ ವಿಶಿಂ ಮ್ಹಾಕಾ ಕಾಂಯ್ ಕಳಿತ್ ಆಸಾಗಿ ಮ್ಹಣ್ ವಿಚಾರ್ತಾಲೊ. ರಾತಿಚ್ಯಾ ವೆಳಾರ್ ಕಶೆಂ ಹಾಂವ್ ಭಾಯ್ರ್ ಭವೊಂಕ್ ವೆತಾಂ ಮ್ಹಣ್ ಮ್ಹಾತಾರ್ಯಾ ಬಾಯ್ಲಾಂಪರಿಂ ಲಿಯಾಂವ್ ಉಲಂವ್ಕ್ ಲಾಗ್ಲಾ. ತ್ಯಾಶಿವಾಯ್ ಆಸ್ವೆಲಾಚೆಂ ರೂಪ್ ಘೆಂವ್ಚ್ಯಾ ಮನ್ಶಾ ವಿಶ್ಯಾಂತೀ ತೊ ಕಾಣಿಯೊಂ ಗುಂತುಂಕ್ ಲಾಗ್ಲಾ.”

“ತುಂವೆ ಭಿಯೆಂವ್ಚೆಂ ನಾಕಾ,” ಹಾಂವೆ ತಾಕಾ ಸಮಧಾನ್ ಕೆಲೆಂ. ಗ್ರೆಗರಿಲಾಗಿಂ ಜಾಲ್ಲೆಂ ಮ್ಹಜೆಂ ಉಲೊಣೆ ತಾಕಾ ಹಾಂವೆ ಮಟ್ವ್ಯಾನ್ ಸಾಂಗ್ಲೆಂ.

“ಪುಣ್ ಆಜ್ ತೆ ರಾನಾಂತ್ ಬೋಂಟ್ ಆಂಬುಡ್ತಾತ್,” ಲೀಜಾನ್ ಹಟ್ ಧರ್ಲೆಂ. “ಲಿಯಾಂವಾನ್ ಆಜ್ ಜಾಗೊ ಬಂಧ್ ದವರ್ಲಾ. ಆನಿ ಚಡಿತ್ ದಾದ್ಲೆ ಗ್ರೆಗರಿಚೊ ಪಾಟ್ಲಾವ್ ಕರ್ನ್ ಗೆಲ್ಯಾತ್. ಪೀಟರಾಚ್ಯಾ ಘರಾಥಾವ್ನ್ ತೆ ಸುರು ಕರ್ತಲೆ ಆನಿ ಆಸ್ವೆಲಾಕ್ ಸೊಧುನ್ ಕಾಡ್ತಲೆ.”

“ಪುಣ್ ತುಕಾ ಕಿತ್ಯಾಕ್ ಖಂತ್”, ಹಾಂವೆ ಸವಾಲ್ ಕೆಲೆಂ, ಹಾಸೊನ್. “ತಾಂಕಾಂ ಆಸ್ವೆಲ್ ಮೆಳ್ಚೊನಾ. ಆಜ್ ಆಮಿ ದೊಗಾಂಯ್ ಸಾಂಗಾತಾ ಆಸ್ತೆಲ್ಯಾಂವ್.”

“ತೆಂ ಖರೆಂ,” ಲೀಜಾನ್ ಜಾಪ್ ದಿಲಿ. “ಹಾಂವ್ ತುಜೆ ಸಾಂಗಾತಾ ಆಸ್ತಾ ಪಾರ್ಯಾಂತ್ ಸುರಕ್ಷಿತ್ ಉರ್ತಲಿಂ. ತ್ಯಾ ಖಡ್ಪಾ ಮುಳಾಂತ್ ಬಸೊನ್ ಉಲಯಾಂಗಿ ಆಮಿ?” ತಾಣೆ ಮ್ಹಳೆಂ. “ಲಿಯಾಂವಾಚೊ ಜಾಗೊ ಬಂಧ್ ಆಸಾ. ಪುಣ್ ದಿಸಾಚೆಂ ಥಂಯ್ಸರ್ ವಚೊನ್ ಹಾಂವೆ ವಾಯ್ನ್ ಹಾಡ್ನ್ ದವರ್ಲಲೊ. ತುಕಾ ವಾಯ್ನ್ ಬರೊ ಲಾಗ್ತಾ ವ್ಹಯ್ಮೂ?”

ತಾಣೆ ಏಕ್ ಬೋತ್ಲ್ ಮ್ಹಜೆ ಹಾತಿಂ ದಿಲಿ. ಆಮಿ ತಣಾರ್ ಪಾತಾಳ್ಳ್ಯಾಂವ್.

ವಾಯ್ನ್ ಗೊಡ್ ಆನಿ ಕಠಿಣ್ ಆಸ್ ಲ್ಲೊ. ಮುಡ್ಲಾ ಚಂದ್ರ್ ವಯ್ರ್ ಚಡೊನ್ ಆಯಿಲ್ಲೆಪರಿಂ ಹಾಂವ್ ಪಿಯೆಲೊಂ. ಸಟ್ಟ್ ಕರ್ನ್ ತಾಣೆ ಮ್ಹಜ್ಯಾ ಬಾವ್ಳ್ಯಾಕ್ ಧರ್ಲೆಂ.

“ಆಯ್ಕ್!”

ಸರೋವರ್ ಉತ್ರೊನ್ ಪಯ್ಸ್ ಥಾವ್ನ್ ಯೆಂವ್ಚಿ ಲೊಕಾಚಿ ತಶೆಂ ಸುಣ್ಯಾಂಚಿ ಬೊಬ್ ಹಾಂವೆ ಆಯ್ಕಾಲಿ.

“ತೆ ಬೋಂಟ್ ಆಂಬುಡ್ತಾತ್. ತಾಂಚೆ ಸಾಂಗಾತಾ ಚಾಬ್ಕರ್ ಸುಣಿಂಯ್ ಆಸಾತ್.”

ಲೀಜಾಚೆಂ ಆಂಗ್ ಕಾಂಪ್ಲೆಂ. ಹಾಂವ್ ಆನಿಕಿ ಪಿಯೆಲೊಂ ಆನಿ ತಾಕಾ ಲಾಗಿಂ ಆರಾಯ್ಲೆಂ.

“ಭಿಯೆಂವ್ಕ್ ಕಾಂಯ್ ಕಾರಣ್ ನಾ,” ತಾಕಾ ಹಾಂವೆ ಭುಜಯ್ಲೆಂ.

ತೊ ಲೋಕ್ ವಿಯೆರ್ ವುಲ್ಫಾಕ್ ಸೊದ್ತಾತ್ ಆನಿ ತೆಂ ಮ್ಹಜ್ಯೆ ವೆಂಗೆಂತ್ ಆಸ್ ಲ್ಲೆಂ. ಚಂದ್ರೆಮ್ ಆನಿಕಿ ವಯ್ರ್ ಸರ್ ಲ್ಲೊ. ತಾಚ್ಯಾ ಉಜ್ವಾಡಾಕ್ ಲೀಜಾಚೆಂ ತೊಂಡ್ ಗಂಬೀರ್ ದಿಸ್ತಾಲೆಂ. ಚೆಡ್ವಾಚೆಂ ತೊಂಡ್ ಆನಿ ಚಂದ್ರೆಮಾಚೆಂ ತೊಂಡ್ ಎಕಾಮೆಕಾ ಪಳೆತಾಲಿಂ ಆನಿ ಹಾಂವ್ ದೊಗಾಂಕೀ ಪಳೆಂವ್ಕ್ ಸಕ್ತಾಲೊಂ.

ಚಂದ್ರ್ ಉದೆವ್ನ್ ವಯ್ರ್ ಸರ್ತಾನಾ ಲೀಜಾಚೆರ್ ಜಾಂವ್ಚೊ ಪರಿಣಾಮ್ ಹಾಂವ್ ಜಾಣಾ ಆಸ್ ಲ್ಲೊಂ. ಮ್ಹಜೆಂ ಆಂಗ್ ಶಿರ್ಶಿರ್ಲೆಂ.

“ಲೀಜಾ, ತುಕಾ ಬರೆಂ ಲಾಗ್ತಾಮೂ?” ಹಾಂವ್ ಪುಸ್ಪುಸ್ಲೊಂ.

“ಖಂಡಿತ್ ಜಾವ್ನ್ ಚಾರ್ಲ್ಸ್. ಘೆ ಪಿಯೆ!”

“ಮ್ಹಜೊ ಮತ್ಲಾಬ್, ತುಜೆರ್ ಕಾಂಯ್ ಪರಿಣಾಮ್ ಜಾಂವ್ಚೆಪರಿಂ ಭಗ್ತಾಗಿ ತುಕಾ?”

“ನಾ, ಆಜ್ ರಾತಿಂ ಕಾಂಯ್ ಜಾಂವ್ಚೆಂ ನಾ. ಹಾಂವ್ ಬರಿಂ ಆಸಾಂ. ಆತಾಂ ಹಾಂವ್ ತುಜೆ ಸಾಂಗಾತಾ ಆಸಾಂ ನ್ಹಂಯ್ಗಿ?”

ತೆಂ ಹಾಸ್ಲೆಂ ಆನಿ ಮ್ಹಾಕಾ ಉಮೆ ದಿಲೆ. ಪಯ್ಸ್ ವಚೊಂಕ್ ಆಯ್ಕಾನಾತ್ಲಿ ಕಾವ್ಜೆಣಿ ಜಿರಂವ್ಕ್ ಹಾಂವ್ ಆನಿಕಿ ಪಿಯೆಂವ್ಕ್ ಲಾಗ್ಲೊಂ.

“ಆನಿ ಮುಕಾರ್ ತುಂ ವಾಯ್ಲೆಟಾಚ್ಯಾ ಪಾಟಿಕ್ ಲಾಗ್ಚೆಂನಾಂಯ್ಮೂ? ಆತಾಂಚೆಂ ವಾತಾವರಣ್ ನಿವ್ತಾ ಪರ್ಯಾಂತ್ ತಾಚೆ ದಿಷ್ಟಿಕ್ ಪಡ್ಚೆಂನಾಂಯ್ಮೂ”

“ಖಂಡಿತ್ ನಾ,” ತಾಣೆ ಬೋತ್ಲ್ ಮ್ಹಜ್ಯಾ ತೊಂಡಾಕ್ ತೆಂಕಯ್ಲಿ.

“ತುಂ ಸೊಸ್ಣಿಕಾಯೆನ್ ರಾಕ್ತಲೆಂಯ್ಮೂ”

“ತುಂವೆ ಸಾಂಗ್ ಲ್ಲೆ ಪರಿಂ ಕರ್ತಾಂ, ಮ್ಹಜ್ಯಾ ಮೊಗಾ.”

ಹಾಂವೆ ತಾಕಾ ತೊಂಡ್ ಕೆಲೆಂ. “ಹಾಕಾ ವೇಳ್ ಲಾಗೊಂಕ್ ಪುರೊ. ಆಮಿ ಆಶೆಲ್ಲೆ ತಿತ್ಲೆಂ ವೆಗಿಂ ಆಮ್ಕಾಂ ಸಾಂಗಾತಾ ಮೆಳೊಂಕ್ ಜಾಯ್ನಾಸ್ತಾಂ ರಾವತ್. ವೆಗ್ಳಾಚಾರ್ ಘೆಂವ್ಚೆ ಶಿವಾಯ್ ದುಸ್ರಿ ವಾಟ್ ನಾಸ್ತಾಂ ವಚೊಂಕೀ ಪುರೊ. ಅಸಲ್ಯಾ ಸಂಗ್ತಿಂನಿ ವಾಯ್ಲೆಟ್ ಕಠಿಣ್ಆಸಾ. ಆನಿ ತೆಂ ಝುಜ್ಲ್ಯಾ ಶಿವಾಯ್ ರಾಂವ್ಚೆಂನಾ. ನ್ಯಾಯಾಲಯಾಚೆಂ ತೀರ್ಪ್ ಯೇವ್ನ್ ಮ್ಹಾಕಾ ತಾಚೆ ಥಾವ್ನ್ ಸುಟ್ಕಾ ಲಾಭ್ತಾನಾ ಸಭಾರ್ ವರ್ಸಾಂ ವಚೊಂಕೀ ಪುರೊ. ತಿತ್ಲೊ ತೇಂಪ್ ತುಂ ಮ್ಹಾಕಾ ರಾಕ್ತೆಲೆಂಯ್?”

“ವೆಗ್ಳಾಚಾರ್? ಸಭಾರ್ ವರ್ಸಾಂ?”

“ತುಂ ಮ್ಹಾಕಾ ರಾಕೊನ್ ರಾವ್ತಲೆಂಯ್ ಮ್ಹಣ್ ತುಂವೆ ಮ್ಹಾಕಾ ಉತಾರ್ ದೀಂವ್ಕ್ ಜಾಯ್. ತ್ಯಾ ಶಿವಾಯ್ ವಾಯ್ಲೆಟಾಕ್ ಆನಿ ಹೆರ್ ಕೊಣಾಯ್ಕಿ ದುಕಂವ್ಚೆಂನಾಂಯ್ ಮ್ಹಣ್ ತುಂವೆ ನಿಚೆವ್ ಕರುಂಕ್ ಜಾಯ್.”

ತೆಂ ಮ್ಹಾಕಾ ಪಳೆಲಾಗ್ಲೆಂ. ತಾಚೆಂ ಮುಖಮಳ್ ಸಾವ್ಳೆಂತ್ ಲಿಪ್ ಲ್ಲೆಂ. ತಿತ್ಲ್ಯಾರ್ ತೆಂ ಬಾಗಾಲೆಂ ಆನಿ ತಾಚೆಂ ತೊಂಡ್ ಮ್ಹಜೆ ವೋಂಟ್ ಸೊಧಿಲಾಗ್ಲೆಂ.

“ಬೋವ್ ಬರೆಂ ಚಾರ್ಲ್ಸ್, ದುಸ್ರಿ ಖಂಚಿಯಿ ವಾಟ್ ನಾ ಜಾಲ್ಯಾರ್ ಹಾಂವ್ ರಾಕೊನ್ ರಾವ್ತಲಿಂ. ಹಾಂವ್ ತುಜೆ ಖಾತಿರ್ ರಾಕೊಂಕ್ ಸಕ್ತಾಂ.”

ಪರ್ತುನ್ ಹಾಂವ್ ಪಿಯೆಲೊಂ. ಸರ್ವ್ ಸಾರ್ಕೆಂ ಆಸ್ ಲ್ಲೆಂ. ತಿತ್ಲ್ಯಾರ್ ಮ್ಹಜಿ ದೀಷ್ಟ್ ಗಯ್ರಿ ಜಾಲಿ. ಆನಿ ಥೊಡ್ಯಾ ವೆಳಾನ್ ದೀಷ್ಟ್ ನಿತಳ್ಳಿ. ಘೊಂಕ್ಚ್ಯಾ ಸುಣ್ಯಾಂಚೊ ಆವಾಜ್ ಮ್ಹಜ್ಯಾ ಕಾನಾಂಕ್ ಜ್ಯೊರಾನ್ ಗಾಜೊಂಕ್ ಲಾಗ್ಲೊ. ಲೀಜಾಚೆಂ ತೊಂಡ್ ಮ್ಹಜ್ಯೆ ದಿಷ್ಟಿ ಮುಕಾರ್ ಉಪ್ಯೆಂವ್ಕ್ ಲಾಗ್ಲೆಂ ಆನಿ ಸವ್ಕಾಸ್ ಮಾಯಾಕ್ ಜಾಲೆಂ.

ಹಾಂವೆ ಪಿಯೆಲ್ಲ್ಯಾ ವಾಯ್ನಾಚೊ ಪರಿಣಾಮ್. ಪುಣ್ ಮ್ಹಾಕಾ ಪರ್ವಾ ನಾತ್ಲಿ. ಲೀಜಾನ್ ಮ್ಹಾಕಾ ಉತಾರ್ ದಿಲ್ಲೆಂ. ಲೀಜಾಚೆ ವೋಂಟ್ ಮ್ಹಜ್ಯೆ ತಾಬೆಂತ್ ಆಸ್ ಲ್ಲೆ. ಹಾಂವ್ ಆನಿಕೀ ಪಿಯೆಲೊಂ. ಥೊಡ್ಯಾ ವೆಳಾನ್ ನಿದೆನ್ ಮ್ಹಾಕಾ ಆಪ್ಲ್ಯೆ ತಾಬೆಂತ್ ಘೆತ್ಲೆಂ. ಹಾಂವ್ ನಿದ್ಲೊಂ...

“ಊಟ್!” ಗಡ್ಬಡಿ ತಾಳೊ ಮ್ಹಜ್ಯಾ ಕಾನಾಂಕ್ ಮಾರ್ಲೊ. ಕೊಣ್ ತರಿ ಮ್ಹಜ್ಯೆ ಗೊಮ್ಟೆಕ್ ಧರ್ನ್ ಉಕಲ್ತಾಲೆ.

“ಊಟ್, ಚಾರ್ಲ್ಸ್, ವೆಗಿಂ ಕರ್!”

ಹಾಂವೆ ದೊಳೆ ಉಗ್ತೆ ಕೆಲೆ ಆನಿ ಉಟೊನ್ ಬಸ್ಲೊಂ. ಚಂದ್ರೆಮ್ ವಯ್ರ್ ಪಾವ್ ಲ್ಲೊ ಆನಿ ತಾಚ್ಯಾ ಉಜ್ವಾಡಾಕ್ ಮ್ಹಜೆ ಕುಶಿನ್ ಬಾಗ್ವಲ್ಲೆಂ ತೊಂಡ್ ಮ್ಹಾಕಾ ದಿಸ್ಲೆಂ. ತೊಂಡ್ ದೊತೊರ್ ಮೆರೊಕ್ಸಾಚೆಂ.

“ಮ್ಹಾಕಾ ಜೆಮ್ ಆಯ್ಲಿ,” ಹಾಂವ್ ಗುಣ್ಗುಣ್ಲೊಂ. “ಲೀಜಾ ಖಂಯ್ ಆಸಾ?”

“ಲೀಜಾ? ಹಾಂಗಾ ತುಜೆ ಶಿವಾಯ್ ಹೆರ್ ಕೊಣೀ ನಾಂತ್. ಊಟ್ ಪಾಪ್ಯಾ ಆನಿ ಮ್ಹಜೆ ಸಾಂಗಾತಾ ಯೇ.”

ಹಾಂವ್ ಉಟ್ಲೊಂ. ಘಡಿಭರ್ ಲಕ್ಲೊಂ ಆನಿ ಉಪ್ರಾಂತ್ ಸಾರ್ಕೊ ಜಾಲೊಂ. “ಬರೊ ಆಸಾಯ್ಮೂ ತುಂ?”, ವಿಚಾರಿ ದೊತೊರ್.

“ವ್ಹಯ್, ಡೊಕ್ಟರ್. ಕಿತೆಂ ಗಜಾಲ್?”

“ಹಾಂವ್ ಸಾರ್ಕೆಂ ನೆಣಾ...”

ತಾಣೆ ತಶೆಂ ಉಲಂವ್ಕ್ ಪಾಟಿಂ ಸರ್ಚೆಂ ಪಳೆವ್ನ್ ಪರಿಸ್ಥಿತಿ ಗಂಭೀರ್ ಆಸಾ ಮ್ಹಣ್ ಹಾಂವ್ ಸಮ್ಜಾಲೊಂ. ಸಟ್ಟ್ ಕರ್ನ್ ಮ್ಹಜಿ ಮತ್ ನಿತಳ್ಳಿ ಆನಿ ಹಾಂವೆ ತಾಳೊ ಪಿಂದ್ಲೊ.

“ಸಾಂಗ್ ಮ್ಹಾಕಾ ಡೊಕ್ಟರ್, ಕಿತೆಂ ಗಜಾಲ್?”

“ತುಜಿ ಬಾಯ್ಲ್,” ತೊ ಮ್ಹಣಾಲೊ ಸವ್ಕಾಸ್. “ತುಂ ನಾತ್ ಲ್ಲ್ಯಾ ವೆಳಾರ್ ರಾತಿಂ ತುಜ್ಯಾ ಕೆಬಿನಾಕ್ ಆಸ್ವೆಲ್ ಆಯ್ಲೊ. ತ್ಯಾ ಆಯಿನ್ನ್ ವೆಳಾರ್ ಹಾಂವ್ ಥಂಯ್ ಪಾವ್ತಾನಾ ಆಸ್ವೆಲ್ ಧಾಂವ್ಲೊ. ಪುಣ್...”

“ಪುಣ್ ಕಿತೆಂ?”

“ಆಸ್ವೆಲಾನ್ ವಾಯ್ಲೆಟಾಚ್ಯೆ ಗೊಮ್ಟೆಕ್ ಘಾಸ್ ಮಾರ್ಲಾ!”

ಕಾಳೊಕಾಂತ್ಲ್ಯಾ ಆಮಿ ಧಾಂವೊಂಕ್ ಲಾಗ್ಲ್ಯಾಂವ್.

ಲೀಜಾನ್ ಫಟ್ ಮಾರ್ ಲ್ಲಿ. ತಾಣೆ ಮ್ಹಾಕಾ ವಾಯ್ನ್ ಭರಯ್ಲೊ. ಹಾಂವ್ ನಿದ್ತಾ ಪಾರ್ಯಾಂತ್ ತೆಂ ರಾಕ್ಲೆಂ ಆನಿ ಉಪ್ರಾಂತ್ ಘರಾ ವಚೊನ್ ತಾಣೆ ಆಕ್ರಮಣ್ ಕೆಲೆಂ.

ಮ್ಹಜಿ ತಕ್ಲಿ ಗಿರ್ಗಿರೊಂಕ್ ಲಾಗ್ಲಿ.

ಆಮಿ ಕೆಬಿನಾಕ್ ಪಾವ್ಲ್ಯಾಂವ್. ದೊತೊರ್ ಮೆರೊಕ್ಸ್ ವಾಯ್ಲೆಟ್ ನಿದ್ ಲ್ಲ್ಯೆ ಖಾಟಿಥಂಯ್ ಬಾಗಾಲೊ. ತೆಂ ಮ್ಹಜೆಥಂಯ್ ಗುಂವೊನ್ ಆಸ್ಕತ್ಕಾಯೆನ್ ಹಾಸ್ಲೆಂ.

“ತೆಂ ಬರೆಂ ಆಸಾಮು?” ಹಾಂವ್ ಖರ್ಶೆಲೊಂ.

“ವ್ಹಯ್. ತಾಚ್ಯೆ ಗೊಮ್ಟೆಕ್ ಮಾರ್ ಜಾಲಾ. ಪುಣ್ ರಗಾತ್ ವ್ಹಾಳ್ಚೆಂ ಹಾಂವೆ ರಾವಯ್ಲಾಂ. ಘಾಯ್ ಚಡ್ ನಾ. ಪುಣ್ ತೆಂ ಕಠಿಣ್ ಭಿಂಯೆಲಾಂ. ಏಕ್ ದೊನ್ ದೀಸ್ ತಾಕಾ ಬರೆಂ ಆರಾಮ್ ಮೆಳೊಂಕ್ ಜಾಯ್.

ಹಾಂವೆ ಬಾಗ್ವೊನ್ ಮ್ಹಜ್ಯೆ ಬಾಯ್ಲೆಚ್ಯಾ ಕಪಾಲಾಚೊ ಉಮೊ ಕಾಣ್ಘೆಲೊ.

“ತ್ಯಾ ಖಾತಿರ್ ದೆವಾಕ್ ಅರ್ಗಾಂ,” ಹಾಂವ್ ಪುಸ್ಪುಸ್ಲೊಂ.

“ತಾಕಾ ಆತಾಂ ಸವಾಲಾಂ ವಿಚಾರ್ನ್ ಧೊಶಿನಾಕಾ,” ಮೆರೊಕ್ಸಾನ್ ಸತ್ರಾಯ್ ದಿಲಿ. “ತೆಂ ಆತಾಂ ಆರಾಮ್ ಕರುಂಧಿ. ಆಕ್ರಮಣ್ ಕೆಲ್ಲ್ಯಾ ತಕ್ಷಣ್ ಹಾಂವ್ ಆಯಿಲ್ಲೊಂ ಮ್ಹಣ್ ದಿಸ್ತಾ. ಆಸ್ವೆಲ್ ಬಹುಶ ಜನೆಲಾಂತ್ಲ್ಯಾನ್ ಭಿತರ್ ಆಯ್ಲೊ. ಆರ್ಸೆ ಫುಟ್ ಲ್ಲೆ ದಿಸ್ತಾತ್. ಹಾಂವ್ ಕೆಬಿನಾಚ್ಯೆ ಭಿತರ್ ಸರ್ ಲ್ಲೆ ಕೂಡ್ಲೆ ತಾಣೆ ಭಾಯ್ರ್ ಉಡ್ಕಿ ಮಾರ್ಲಿ. ಕೆಬಿನಾಚ್ಯೆ ಭಂವಾರಿಂ ತಾಚಿಂ ಮೆಟಾಂ ಆಸಾತ್.”

ಹಾಂವ್ ತಾಚ್ಯೆ ಸಾಂಗಾತಾ ಕೆಬಿನಾ ಭಾಯ್ರ್ ಗೆಲೊಂ. ತಾಣೆ ಸಾಂಗ್ ಲ್ಲೆಪರಿಂ ಆಸ್ವೆಲಾಚಿಂ ಮೆಟಾಂ ಸ್ಪಷ್ಟ್ ದಿಸ್ತಾಲಿಂ.

“ಶಿಕಾರೆಗಾರಾಂಚೊ ಪಂಗಡ್ ಆನಿ ಥೊಡ್ಯಾಚ್ ವೆಳಾನ್ ಹಾಂಗಾ ಯೇವ್ನ್ ಪಾವ್ತಲೊ,” ತಾಣೆ ಮ್ಹಳೆಂ. “ಆಸ್ವೆಲಾಚಿ ಪಾಟ್ ಧರ್ನ್ ವಚೊಂಕ್ ತಾಂಕಾಂ ಸಲೀಸ್ ಜಾತಲೆಂ.”

ಹಾಂವೆ ಮಾತೆಂ ವಯ್ರ್ ಸಕಯ್ಲ್ ಕೆಲೆಂ.

ಸಟ್ಟ್ ಕರ್ನ್ ರಾನಾಂತ್ಲ್ಯಾನ್ ಬೋಬ್ ಆಯ್ಕೊಂಕ್ ಲಾಗ್ಲಿ. ಮನ್ಶಾಂಚಿ ತಶೆಂಚ್ ಸುಣ್ಯಾಂಚಿ.

ದೊ| ಮೆರೊಕ್ಸ್ ಮಿಶಿಯೊ ವೊಳಾವ್ನ್ ಮ್ಹಜ್ಯೆ ಥಂಯ್ ಗುಂವ್ಲೊ. “ಆಸ್ವೆಲ್ ಮೆಳ್ಳೊ ಆಸ್ತಲೊ!,” ಉತ್ಸಾಹಾನ್ ತೊ ಮ್ಹಣಾಲೊ. “ಆಯ್ಕ್!” ಜಡಾಂ ಮಧ್ಲ್ಯಾನ್ ಧಾಂವ್ಚೊ ಆವಾಜ್. ಬೋಬ್ ಆನಿ ತಿತ್ಲ್ಯಾರ್...

ಬಂದೂಕೆಂಚ್ಯಾ ಫಾರಾಂಚೊ ಆವಾಜ್.

“ತೆ ಯಶಸ್ವಿ ಜಾಲೆ!” ದೊತೊರ್ ಉದ್ಗಾರ್ಲೊ.

ಆನಿ ತಿತ್ಲ್ಯಾರ್ ಕೆಬಿನಾ ಮುಕಾರ್ ಆಸ್ ಲ್ಲ್ಯಾ ಉಗ್ತ್ಯಾ ಜಾಗ್ಯಾಂತ್ಲ್ಯಾನ್ ಧಾಂವೊನ್ ಯೆಂವ್ಚಿ ತಿ ಬ್ರಹತ್ ಮನ್ಜಾತ್ ಆಮ್ಕಾಂ ದಿಸ್ಲಿ. ಮೊಡೊನ್ ಗೆಲ್ಲೆಂ ಆಪ್ಲೆಂ ಆಂಗ್ ವೋಡ್ನ್ ಘೆವ್ನ್ ಖರ್ಶೆತಾಲಿ ತಿ. ತಿಚ್ಯೆ ಆಂಗಾಂತ್ಲ್ಯಾನ್ ರಗಾತ್ ದೆಂವ್ತಾಲೆಂ. ತಿಚೆಂ ತೊಂಡ್ ಉಗ್ತೆಂ ಆಸ್ ಲ್ಲೆಂ. ಮಾತೆಂ ಧಲ್ತಾಲೆಂ. ಆಮ್ಚೆ ಕುಶಿನ್ ತಿ ದುಕಿನ್ ಧಾಂವೊನ್ ಯೆತಾಲಿ.

ಮೆರೊಕ್ಸಾನ್ ಆಪ್ಲಿ ರಿವೊಲ್ವಾರ್ ಭಾಯ್ರ್ ಕಾಡ್ಲಿ ಆನಿ ಆಸ್ವೆಲಾಚೆರ್ ಜೊಕುನ್ ಧರ್ಲಿ. ಹಾಂವೆ ತಾಚೊ ಹಾತ್ ಧರ್ಲೊ.

“ನಾಕಾ,” ಹಾಂವ್ ಪುಸ್ಪುಸ್ಲೊಂ. “ನಾಕಾ”.

ಆಸ್ವೆಲಾ ಕುಶಿನ್ ಚಲಾಲಾಗ್ಲೊಂ ಹಾಂವ್. ತಾಚೆ ದೊಳೆ ಮ್ಹಜೆಥಂಯ್ ಏಕ್ ಜಾಲೆ. ಪುಣ್ ತ್ಯಾ ದೊಳ್ಯಾಂನಿ ವಳಕ್ ಝಳ್ಕಾನಾತ್ಲಿ. ಥಂಯ್ಸರ್ ಮೊರ್ನಾಚಿ ಸಾವ್ಳಿ ಮಾತ್ರ್ ದಿಸ್ತಾಲಿ.

“ಲೀಜಾ,” ಹಾಂವ್ ಪುಸ್ಪುಸ್ಲೊಂ. “ತುಜ್ಯಾನ್ ರಾಕೊಂಕ್ ಜಾಲೆಂನಾ.”

ದಾಕ್ತೆರಾಕ್ ಮ್ಹಜಿಂ ಉತ್ರಾಂ ಆಯ್ಕೊಂಕ್ ನಾಂತ್, ಆಸ್ವೆಲಾಕ್ ಆಯ್ಕಾಲಿಂ. ಘಡಿಭರ್ ಮಾತೆಂ ಉಕಲ್ಲೆಂ ತಾಣೆ. ತಾಳ್ಯಾಂತ್ಲ್ಯಾನ್ ಬಿಗ್ದಾಲ್ಲೊ ಆವಾಜ್ ಭಾಯ್ರ್ ಕಾಡ್ಚೆಂ ಪ್ರೇತನ್ ಕೆಲೆಂ ತಾಣೆ

ಉಪ್ರಾಂತ್ ಆಸ್ವೆಲಾನ್ ಜೀವ್ ಸೊಡ್ಲೊ.

ತಾಣೆ ಮೊರ್ತಾನಾ ಹಾಂವೆ ಪಳೆಲೆಂ. ತಾಚೆಂ ಮಾತೆಂ ಆಡ್ ಪಡ್ಲೆಂ. ಆಂಗ್ ರೂಕ್ ಜಾಲೆಂ. ಉಪ್ರಾಂತ್ ಕಿತೆಂ ಜಾಲೆಂ ತೆಂ ವಿವರ್ಸುಂಕ್ ಅಸಾಧ್ಯ್. ಕಿತ್ಯಾಕ್ ಮ್ಹಳ್ಯಾರ್ ಲೀಜಾ ಮೆಲೆಂ.

ಸ್ತ್ರೀ ಆವ್ವೆಲ್ ಜಾವ್ನ್ ಬದಲ್ತಾನಾ ಹಾಂವೆ ಮನ್ ಘಟ್ ಕರ್ನ್ ವೆಳಾಚೆರ್ ಧ್ಯಾನ್ ದಿಲ್ಲೆಂ. ಆತಾಂಯ್ ಹಾಂವೆ ಗಡಿಯಾಳ್ ಪಳೆಲೆಂ.

ಪುಣ್ ಆತಾಂ ಆಸ್ವೆಲ್ ಆಸ್ ಲ್ಲೊ ಏಕ್ ಸ್ತ್ರೀ ಜಾವ್ನ್ ಸವ್ಕಾಸ್ ಬದ್ಲಾಪ್ ಜಾತಾನಾ ಹಾಂವ್ ಶಿರಿಂ ಚುಕ್ಲೊಂ. ತೆಂ ಅದ್ಭುತ್ ದ್ರಶ್ಯ್ ಪಳೆವ್ನ್ ದಾಕ್ತೆರ್ ತೊಂಡಾಕ್ ಆಯಿಲ್ಲೆಪರಿಂ ಬೊಬಾಟ್ತಾಲೊ. ಆಸ್ವೆಲಾಚೆಂ ದೊರಗ್ ಆಂಗ್ ಸವ್ಕಾಸ್ ಮಾಯಾಕ್ ಜಾವ್ನ್ ತ್ಯಾ ಜಾಗ್ಯಾರ್ ಸೊಭಿತ್ ತರ್ನ್ಯೆ ವಿಣ್ಗ್ಯೆ ಚಲಿಯೆಚಿ ಕೂಡ್ ದಿಸೊಂಕ್ ಲಾಗ್ಲಿ. ಸೊಭಿತ್ ಲಿಲ್ಲಿ ಫುಲ್ ದೊಳ್ಯಾಂ ಮುಕಾರ್ ಫುಲುಲ್ಲೆಪರಿಂ ತೆಂ ದಿಸ್ಲೆಂ.

ಚಂದ್ರೆಮಾಚ್ಯಾ ಉಜ್ವಾಡಾಕ್ ಥಂಯ್ಸರ್ ತೆಂ ನಿರ್ಜೀವ್ ಜಾವ್ನ್ ಪಡೊನ್ ಆಸ್ಲೆಂ. ಹಾಂವ್ ರಡ್ಲೊಂ ಆನಿ ಥಂಯ್ ಥಾವ್ನ್ ಗುಂವ್ಲೊಂ.

“ನಾ, ಅಶೆಂ ಜಾಂವ್ಕ್ ಸಾಧ್ ನಾ!”

ದೊತೊರಾಚೊ ತೀಕ್ಷ್ಣ್ ತಾಳೊ ಮ್ಹಾಕಾ ಆಪಯ್ಲಾಗ್ಲೊ. ಆಮ್ಚೆ ಮುಕಾರ್ ಧರ್ಣಿರ್ ಪಡೊನ್ ಆಸ್ ಲ್ಲ್ಯೆ ನಿರ್ಜೀವ್ ಕುಡಿಕ್ ಕಾಂಪ್ಚೆಂ ಬೊಟ್ ದಾಕಯ್ಲೆಂ ತಾಣೆ.

ಹಾಂವ್ ಪಳೆಲಾಗ್ಲೊಂ – ಆನ್ಯೇಕ್ ಬದ್ಲಾವಣ್!

ಹಿ ಬದ್ಲಾವಣ್ ಹಾಂವ್ ವಿವರ್ಸುಂಕ್ ಸಕಾನಾ. ತೆದಾಳಾ ಮ್ಹಾಕಾ ಉಡಾಸ್ ಆಯ್ಲೊ. ತೆಂ ವಿಯೆರ್ ವುಲ್ಫ್ ಕೆದಾಳಾ ಜಾಲ್ಲೆಂ ಮ್ಹಣ್ ಲೀಜಾನ್ ಮ್ಹಾಕಾ ಸಾಂಗೊಂಕ್ ನಾತ್ಲೆಂ. ತಾಚಿ ನೀಜ್ ಪಿರಾಯ್ ಕಿತ್ಲಿ ಮ್ಹಣ್ ಮ್ಹಾಕಾ ಕಳಿತ್ ನಾತ್ಲೆಂ. ಆಸ್ವೆಲಾಚೆಂ ರೂಪ್ ಘೆಂವ್ಕ್ ಸಕ್ಚ್ಯಾ ಮನ್ಶ್ಯಾಚೆಂ ಅಸ್ವಾಭಾವಿಕ್ ತರ್ನಾಟ್ಪಣ್ ತಶೆಂಚ್ ಉರ್ತಾ ಮ್ಹಳ್ಳೆಂ ಹಾಂವ್ ಜಾಣಾ ಜಾಲೊಂ.

ಕಶೆಂ ಮ್ಹಳ್ಯಾರ್, ಆಮ್ಚೆ ಮುಕಾರ್ ಪಡೊನ್ ಆಸ್ ಲ್ಲಿ ತರ್ನಾಟಿ ಕೂಡ್ ಆಮ್ಚ್ಯಾ ದೊಳ್ಯಾಂ ಮುಕಾರ್ ಮ್ಹಾತಾರಿ ಜಾಲಿ.

ಸ್ತ್ರೀ ಆಸ್ ಲ್ಲಿ ಆಸ್ವೆಲ್ ಜಾವ್ನ್ ಬದ್ಲಾಪ್ ಜಾಂವ್ಚೆಂ ದ್ರಶ್ಯ್ ಭಯಂಕರ್. ಪುಣ್ ಹಿ ಅಖ್ರೇಚಿ ಬದ್ಲಾವಣ್ ಭಿಂಯಾನ್ ಕಾಂಠಾಳ್ಯಾನ್ ಕಾಳಿಜ್ ಬಸಯ್ತಾ. ಸೊಭಿತ್ ತರ್ನಾಟಿ ಚಲಿ ಆತಾಂ ಹಜಾರೊಂ ಮಿರಿಯಾಂನಿ ಭರ್ಲೆಲಿ ಮ್ಹಾತಾರಿ ಜಾವ್ನ್ ಬದ್ಲಾಲ್ಲಿ.

ಲೀಜಾ ತಾಚ್ಯೆ ಮೂಳ್ ರೂಪಾಕ್ ಬದ್ಲಿ ಜಾಲ್ಲೆಂ.

*******

[ಕಾಣ್ಯೆಚೊ ಮುಖ್ಲೊ ಭಾಗ್]

(- ವಾಲ್ಟರ್ ಲಸ್ರಾದೊ, ನಕ್ರೆ, ಎಪ್ರಿಲ್ 2016)

ವಾಲ್ಟರ್ ಲಸ್ರಾದೊ: ಕೊಂಕ್ಣೆಂತ್ ಆಸ್ಚ್ಯಾ ಭೋವ್ ಥೊಡ್ಯಾ ಅನುವಾದ್‌ಕಾರಾಂ ಪಯ್ಕಿಂತ್ಲೊ ಎಕ್ಲೊ. ’ಅಕ್ರಮ್ ಜಾಳ್’, ’ಚಲ್ಚೆಂ ಮೊಡೆಂ’, ’ಮೊರ್ನಾಚೊ ತಾಳೊ’, ’ಜುದಾಸಾಚಿ ಜುಗಾರ್’ ’ಮೊರ್ನಾಚೊ ತಾಳೊ’, ’ಮಾಫಿಯಾ ಪೊದೊರ್ನ್’ ಹಾಚ್ಯೊ ಪ್ರಮುಖ್ ಅನುವಾದಿತ್ ಕಾಣ್ಯೊ. ಕಾಣ್ಯಾಂ ಶಿವಾಯ್ ಲೇಕನಾಂ, ವಿಡಂಬನಾಂ ಸಯ್ತ್ ಬರಂವ್ಚೊ ಹೊ ಮುಂಬಯಾಂತ್ ವಸ್ತಿ ಕರುನ್ ಆಸಾ.