ವಾಲ್ಟರ್ ಲಸ್ರಾದೊ ನಕ್ರೆ, ಕೊಂಕ್ಣೆಂತ್ ಅಪ್ರೂಪಾನ್ ಬರಯ್ತಾ ತರ್‌ಯೀ ಅಪುರ್ಭಾಯೆಚೆಂ ಬರಯ್ತಾ. ಕೊಂಕ್ಣೆಭಾಯ್ಲೆಂ ಸಾಹಿತ್ಯ್ ಸಯ್ತ್ ವಾಸ್ಚಾ ಹಾಣೆಂ ಸಭಾರ್ ಉಂಚ್ಲ್ಯೊ ಕೃತಿಯೊ ಕೊಂಕ್ಣೆಕ್ ಅನುವಾದಿತ್ ಕೆಲ್ಯಾತ್. ಚಡ್ತಾವ್ ಜಾವ್ನ್ ಸಕಾಳಿಕ್ ಲೇಖನಾಂ ತಶೆಂಚ್ ಸಮಾಜಿಕ್ ಸಂಗ್ತೆಚೆರ್ ಘಾಲ್ಚಿ ಹಾಚಿ ವಿಡಂಬನಾತ್ಮಕ್ ನದರ್, ಖರಿಚ್ ಜಾವ್ನ್ ಸಮಾಜಿಕ್ ಸ್ಪಂದನ್ ಕರ್ಚೆತಸ್ಲಿ. ದೆಕುನ್ ಹೊ ಕಾಣ್ಯೆಗಾರ್ ಕೊಂಕ್ಣೆಂತ್ಲ್ಯಾ ವಿಂಚ್ಣಾರ್ ಕಾಣ್ಯೆಗಾರಾಂ ಪಯ್ಕಿಂತ್ಲೊ ಎಕ್ಲೊ ಮ್ಹಣ್ ಭರ್ವಸ್ತೆಲ್ಯಾಂತ್ಲೊ ಹಾಂವ್‌ಯೀ ಎಕ್ಲೊಂ. ಸದ್ದ್ಯಾಕ್ ಮುಂಬಯಾಂತ್ಲ್ಯಾ ಮಲಾಡಾಂತ್ ಆಪ್ಲ್ಯಾ ಪತಿಣೆಸವೆಂ ವಸ್ತಿ ಕರುನ್ ಆಸಾ.

ಆಸ್ವೆಲಾಚೊ ಉಮೊ [ ಮೂಳ್ ಲೇಖಕ್: ರೊಬರ್ಟ್ ಬ್ಲೊಚ್, ತರ್ಜಣ್: ವಾಲ್ಟರ್ ಲಸ್ರಾದೊ, ನಕ್ರೆ]

[ಕಾಣ್ಯೆಚೊ ಆಧ್ಲೊ ಭಾಗ್]

ಉಪ್ರಾಂತ್ಲಿಂ ಘಡಿತಾಂ ವಾರ್ಯಾ ವೇಗಾನ್ ಘಡ್ಲಿಂ. ಸುಣ್ಯಾಂ ಸಾಂಗಾತಾ ಶಿಕಾರೆಗಾರ್ ಆಯ್ಲೆ. ಅರ್ಧಿ ಸ್ತ್ರೀ ಆನಿ ಅರ್ಧಿ ಮನ್ಜಾತ್ ಜಾವ್ನ್ ಆಸ್ ಲ್ಲ್ಯಾ ತ್ಯಾ ವಸ್ತು ಥಂಯ್ ದೊ| ಮೆರೊಕ್ಸ್ ಬಾಗ್ವಾಲೊ. ಹಾಂವ್ ಮತಿಹೀನ್ ಜಾವ್ನ್ ಪಡ್ ಲ್ಲೊಂ.

ದುಸ್ರೆ ದಿಸಾ ದೊನ್ಫಾರಾಂ ಉಪ್ರಾಂತ್ ಹಾಂವ್ ಮತಿರ್ ಯೆತಾನಾ ದೊ| ಮೆರೊಕ್ಸ್ ವಾಯ್ಲೆಟಾಚ್ಯಾ ಘಾಯಾಕ್ ಬೆಂಡೆಜ್ ಬಾಂದ್ತಾಲೊ. ತೆಂ ಆತಾಂ ಬರೆಂ ಜಾಲ್ಲೆಂ. ತಾಣೆ ಮ್ಹಾಕಾ ಸೂಪ್ ಹಾಡ್ನ್ ದಿಲೊ. ಮ್ಹಾಕಾ ಪರ್ತುನ್ ನೀದ್ ಪಡ್ಲಿ.

ದುಸ್ರೆ ದೀಸ್ ಸಕಾಳಿಂ ಮೆರೊಕ್ಸ್ ಪರ್ತುನ್ ಆಯ್ಲೊ. ಹಾಂವ್ ಆತಾಂ ಉಟೊನ್ ಬಸೊಂಕ್ ಆನಿ ತಾಕಾ ಸವಾಲಾಂ ವಿಚಾರುಂಕ್ ಸಕ್ತಾಲೊಂ. ತಾಚೆಂ ಸಾಂಗ್ಣೆಂ ಆಯ್ಕೊನ್ ಮ್ಹಾಕಾ ಸಮಾಧಾನ್ ಜಾಲೆಂ.

ದೊ| ಮೆರೊಕ್ಸಾನ್ ಆಪ್ಲಿ ತಕ್ಲಿ ಬರಿ ವಾಪರ್ಲೆಲಿ. ವಿಯೆರ್ ವುಲ್ಫಾಚಿ ಕಾಣಿ ಖರಿ ಮ್ಹಣ್ ತೊ ಕಬೂಲ್ ಜಾಲೊ. ಪುಣ್ ತಿ ಮೆಲ್ಲಿ ವಸ್ತ್ ಲೀಜಾ ಮ್ಹಣ್ ತಾಣೆ ಕೊಣಾಕೀ ಸಾಂಗ್ಲೆಂನಾ. ಪೊಲಿಸ್ ಅಧಿಕಾರಿ ಗ್ರೆಗರಿಚ್ಯೆ ಮಜತಿನ್ ತಿ ಸಂಗತ್ ಲಿಪಯ್ಲಿ. ಕಿತೆಂ ಮ್ಹಳ್ಯಾರೀ ತನ್ಕಿ ಮುಕಾರ್ಸುಂಚ್ಯಾಂತ್ ಕಾಂಯ್ ಅರ್ಥ್ ನಾತ್ಲೊ. ಗಾಂವ್ಚ್ಯಾ ಲೊಕಾಚ್ಯಾ ಬರೆಂಪಣಾಚೆ ನದ್ರೆನ್ ಚಡ್ ಆವಾಜ್ ಉಟಂವ್ಚೆಂ ಬರೆಂ ನ್ಹಯ್ ಆಸ್ಲೆಂ.

ವಾಯ್ಲೆಟ್ ಆತಾಂ ಪಯ್ಲೆಂಚೆ ಪರಿಂ ಬರೆಂ ಜಾಲ್ಲೆಂ.

ಗೆಲೆತ್ಯೆ ರಾತಿಂ ಹಾಂವ್ ತಾಚೆಕಡೆಂ ಸುಟಾವೆಂ ಕುಮ್ಸಾರ್ ಜಾಲ್ಲೊಂ.

ಆಯ್ಕೊನ್ ತೆಂ ಫಕತ್ ಹಾಸ್ಲೆಂ. ಆಮಿ ಪಾಟಿಂ ಶಹರಾಕ್ ಗೆಲ್ಯಾ ಉಪ್ರಾಂತ್ ತೆಂ ಮ್ಹಾಕಾ ವೆಗ್ಳಾಚಾರ್ ದೀಂವ್ಕೀ ಪುರೊ. ಹಾಂವ್ ನೆಣಾ. ಮ್ಹಾಕಾ ಭಗ್ಸಿಲಾ ಮ್ಹಣ್ ತಾಣೆ ಸಾಂಗೊಂಕ್ ನಾ. ಪುಣ್ ತೆಂ ಭಿತರ್ಲ್ಯಾ ಭಿತರ್ ಕಳ್ವಳ್ತಾ ಮ್ಹಳ್ಳೆಂ ಮ್ಹಜ್ಯಾ ಗುಮಾನಾಕ್ ಗೆಲ್ಲೆಂ.

ಆಜ್ ತೆಂ ಭಾಯ್ರ್ ಭಂವ್ಡೆಕ್ ಗೆಲಾಂ.

ಆನಿ ಹಾಂವ್ ಸಗ್ಳ್ಯಾ ದನ್ಫಾರಾಂ ಉಪ್ರಾಂತ್ ಹಿ ನೀಜ್ ಕಾಣಿ ಬರಂವ್ಚ್ಯಾಂತ್ ಮಗ್ನ್ ಜಾವ್ನ್ ಬಸ್ಲಾಂ. ಆತಾಂ ದೀಸ್ ಬುಡ್ಲ್ಯಾ ಉಪ್ರಾಂತ್ ತೆಂ ವೆಗಿಂ ಪಾಟಿಂ ಆಯ್ಲ್ಯಾರ್ ಬರೆಂ ಆಸ್ ಲ್ಲೆಂ ಮ್ಹಣ್ ಹಾಂವ್ ಚಿಂತಾಂ. ತೆಂ ರಾಗಾನ್ ಶೀದಾ ಪಾಟಿಂ ಶಹರಾಕ್ ಗೆಲಾಂ ಜಾಂವ್ಕ್ ಯೀ ಪುರೊ. ಜಾಲ್ಯಾರೀ ಅರ್ಧೊ ಗೂಣ್ ಜಾಲ್ಲೊ ತೊ ಗೊಮ್ಟ್ಯಾಚೊ ಘಾಯ್ ಘೆವ್ನ್ತೆಂ ಚಡ್ ಪಯ್ಸ್ ವಚೊಂಕ್ ಸಕ್ಚೆಂನಾ.

ಸರೋವರಾ ವಯ್ರ್ ಮೊಳ್ಬಾರ್ ಚಂದ್ರೆಮ್ ವಯ್ರ್ ಯೇವ್ನ್ ಆಸಾ. ಪುಣ್ ತೆಂ ಪಳೆಂವ್ಕ್ ಮ್ಹಾಕಾ ನಾಕಾ. ಕಿತೆಂ ಘಡೊನ್ ಗೆಲಾಂ ತಾಚೊ ಉಡಾಸ್ ಕಾಡ್ಚೊ ಮ್ಹಾಕಾ ಪಸಂದ್ ನಾ. ಹೆಂ ಸಗ್ಳೆಂ ಬರವ್ನ್ ಮ್ಹಜಿ ಮತ್ ನಿತಳ್ ಜಾತಲಿ ಮ್ಹಣ್ ಹಾಂವ್ ಆಶೆತಾಂ.

ಬಹುಶ ಭವಿಷ್ಯಾಂತ್ ಮ್ಹಾಕಾ ಸಮಧಾನ್ ಮೆಳ್ತೆಲೆಂ. ವಾಯ್ಲೆಟ್ ಮ್ಹಾಕಾ ಆತಾಂ ಕಾಂಠಳ್ತಾ ಜಾಲ್ಲ್ಯಾನ್ ತೆಂ ಮ್ಹಾಕಾ ಡಿವೊರ್ಸ್ ದಿತಲೆಂ ಆನಿ ಮ್ಹಜಿ ಜಿಣಿ ಸುಲಭ್ ಜಾತಲಿ.

ವ್ಹಯ್, ಖಂಡಿತ್ ಜಾವ್ನ್ ತೆಂ ಮ್ಹಾಕಾ ಕಾಂಠಳ್ತಾ. ಕಿತ್ಯಾಕ್ ಮ್ಹಳ್ಯಾರ್ ತಾಕಾ ಜಿವ್ಶಿಂ ಮಾರುಂಕ್ ಹಾಂವೆ ಆಸ್ವೆಲಾಚೆಂ ರೂಪ್ ಘೆಂವ್ಚ್ಯಾ ಸ್ತ್ರೀಯೆಕ್ ಧಾಡ್ ಲ್ಲೆಂ.

ಹಾಂವ್ ಭೆಷ್ಟೆಂಚ್ ಬಡ್ಬಡ್ತಾಂ. ಹಾಂವೆ ತಶೆಂ ಚಿಂತುಂಕ್ ನಜೊ.

ಜಾಲ್ಯಾರೀ ಹಾಂವೆ ಕಿತೆಂ ತರೀ ಚಿಂತುಂಕ್ ಜಾಯ್. ಬರಂವ್ಚೆಂ ರಾವಂವ್ಕ್ ಮ್ಹಾಕಾ ನಾಕಾ.

ವ್ಹಯ್, ಆತಾಂ ಹಾಂವೆ ಹಾಂಗಾ ಬಸೊನ್ ಮೌನ್ ರಾತಿಕ್ ಕಾನ್ ದೀಂವ್ಕ್ ಜಾಯ್. ಸರೋವರಾ ವಯ್ಲ್ಯಾನ್ ವಯ್ರ್ ಸರೊನ್ ಯೆಂವ್ಚ್ಯಾ ಚಂದ್ರೆಮಾಕ್ ಹಾಂವೆ ಪಳೆಂವ್ಕ್ ಜಾಯ್ ಆನಿ ವಾಯ್ಲೆಟಾಚ್ಯಾ ಯೆಣ್ಯಾಕ್ ರಾಕೊಂಕ್ ಜಾಯ್.

ಆಜ್ ತೆಂ ಇತ್ಲೊ ವೇಳ್ ಪರ್ಯಾಂತ್ ಖಂಯ್ ಗೆಲಾಂಗಾಯ್- ಚಿಂತಾಂ ಹಾಂವ್. ಗೊಮ್ಟ್ಯಾಚೊ ತೊ ಜಿವೊ ಘಾಯ್ ಘೆವ್ನ್ ತಾಣೆ ಚಡ್ ವೇಳ್ ವಾರ್ಯಾಕ್ ಭಂವ್ಚೆಂ ತಾಚ್ಯೆ ಭಲಾಯ್ಕೆಕ್ ಬರೆಂ ನ್ಹಯ್.

ತಾಚ್ಯಾ ಗೊಮ್ಟ್ಯಾಚೊ ಘಾಯ್...ಲೀಜಾನ್ ಘಾಸ್ ಮಾರ್ನ್ ಜಾಲ್ಲೊ ಘಾಯ್...

ತ್ಯಾ ವಿಶಿಂ ಉಡಾಸ್ ಕರ್ಚೆಂ ಹಾಂವ್ ಪ್ರೇತನ್ ಕರ್ತಾಂ. ಸಾರ್ಕೆಂ ಚಿಂತುಂಕ್ ಹಾಂವ್ ಸಕಾನಾ. ಪುಣ್ ತ್ಯಾ ಘಾಯಾ ವಿಶಿಂ ಕಸಲೊ ತರೀ ಉಡಾಸ್ ಜಿವೊ ಕರುಂಕ್ ಹಾಂವ್ ಪ್ರೇತನ್ ಕರ್ತಾಂ. ಚಂದ್ರೆಮಾಚ್ಯಾ ಉಜ್ವಾಡಾಚಿ ಆನಿ ಎಕ್ಸುರ್ಪಣಾಚಿ ಭಿರಾಂತ್ ಧೊಸುಂಕ್ ತೊ ಘಾಯ್ ಕಾರಣ್ ಜಾವ್ನಾಸಾ.

ಕಿತ್ಯಾಕ್?

ಆತಾಂ ಮ್ಹಾಕಾ ಕಳ್ಳೆಂ.

ವ್ಹಯ್, ಆತಾಂ ಮ್ಹಾಕಾ ಉಡಾಸ್ ಆಯ್ಲೊ.

ಆನಿ ವಾಯ್ಲೆಟ್ ಹಾಂಗಾಚೆಂ ಪಯ್ಸ್ ವಚೊಂದಿ. ತೆಂ ಹಾಂಗಾ ಪಾಟಿಂ ಯೇನಾ ಜಾಂವ್ ಮ್ಹಣ್ ದೆವಾಲಾಗಿಂ ಹಾಂವ್ ಮಾಗ್ತಾಂ.

ಆಜ್ ಸಗ್ಳೊ ದೀಸ್ ತೆಂ ಅಶಾಂತ್ ಆಸ್ ಲ್ಲೆಂ ಆನಿ ತೆಂ ಎಕ್ಲೆಂಚ್ ಪಾಡಿಂತ್ ಭಂವೊನ್ ಗೆಲಾಂ. ತೆಂ ಕಿತ್ಯಾಕ್ ಗೆಲಾಂ ಮ್ಹಳ್ಳೆಂ ಹಾಂವ್ ಆತಾಂ ಜಾಣಾ.

ತಾಚ್ಯಾ ಘಾಯಾಚೊ ಪರಿಣಾಮ್ ತೊ. ತೊ ಘಾಯ್ ಆತಾಂ ಕಾಮ್ ಕರುಂಕ್ ಲಾಗ್ಲಾ.

ಪೀಟರಾಚಿ ಧುವ್ ಅನ್ನಾ ಮರಣ್ ಪಾವ್ಲಾಂ ಮ್ಹಣ್ ಸಾಂಗ್ತಾನಾ ಲೀಜಾನ್ ಸಾಂಗ್ ಲ್ಲ್ಯಾ ಉತ್ರಾಂಚೊ ಮ್ಹಾಕಾ ಉಡಾಸ್ ಆಯ್ಲೊ. ದೆವಾಕ್ ತಾಣೆ ಅರ್ಗಾಂ ದಿಲ್ಲಿಂ. ಕಿತ್ಯಾಕ್ ಮ್ಹಳ್ಯಾರ್ ತಾಣೆ ಚಾಬ್ ಲ್ಲೊ ಘಾಯ್ ಘೆವ್ನ್ ತೆಂ ವಾಂಚೊನ್ ಉರ್ಲ್ಯಾರ್ ತೆಂಯೀ ತಾಚೆ ಪರಿಂಚ್ ವಿಯೆರ್ ವುಲ್ಫ್ ಜಾತಲೆಂ.

ವಾಯ್ಲೆಟಾಕೀ ಲೀಜಾ ಚಾಬ್ ಲ್ಲೆಂ. ವಾಯ್ಲೆಟ್ ಜೀವ್ ಆಸಾ. ಆತಾಂ ತೊ ಘಾಯ್ ಕಾಮ್ ಕರುಂಕ್ ಲಾಗ್ಲಾ ಆನಿ ಚಂದ್ರೆಮ್ ಯೀ ಉದೆವ್ನ್ ವಯ್ರ್ ಆಯ್ಲಾ. ರಾತಿಂ ರಾನಾಂತ್ ಭಂವೊನ್ ಆಸ್ ಲ್ಲೆಂ ವಾಯ್ಲೆಟ್ ಏಕ್ ಆಸ್ವೆಲ್ ಜಾವ್ನಾಸಾ!

ಅಳೆ ಥಂಯ್! ಜನೆಲಾ ಭಾಯ್ರ್...ಆತಾಂ ತೆಂ ಮ್ಹಾಕಾ ದಿಸ್ತಾ!

ಗೊಬ್ರಾ ರಂಗಾಚಿ ವ್ಹಡ್ ಜಯ್ತ್ ಮನ್ಜಾತ್! ಆಸ್ವೆಲ್!

ಹಿ ಕಾಣಿ ಹಾಂವ್ ಬರವ್ನ್ ಆಸ್ತಾನಾ ಆಸ್ವೆಲ್ ಕೆಬಿನಾಚಾ ಲಾಗಿಂ ಲಾಗಿಂ ಯೇವ್ನ್ ಆಸಾ. ಚಂದ್ರೆಮಾಚ್ಯಾ ಉಜ್ವಾಡಾಕ್ ಹಾಂವ್ ಸಾರ್ಕೆಂ ಪಳೆಂವ್ಕ್ ಸಕ್ತಾಂ. ತಾಚೆ ಪಾಟಿಚೆ ಲೋಂವೆಕ್ ಚಂದ್ರೆಮಾಚೊ ಉಜ್ವಾಡ್ ಪರ್ಜಳ್ತಾ. ತಾಚಾ ಉಗ್ತ್ಯಾ ತೊಂಡಾಂತ್ಲ್ಯಾನ್ ಚೂಪ್ ದಾಂತ್ ಮ್ಹಾಕಾ ದಿಸ್ತಾತ್.

ವಾಯ್ಲೆಟ್ ಮ್ಹಾಕಾ ಕಾಂಠಳ್ತಾ.

ವಾಯ್ಲೆಟ್ ಪಾಟಿಂ ಆಯ್ಲಾಂ, ಮಜೆರ್ ರಾಗ್ ಕಾಡುಂಕ್. ಮ್ಹಜೆ ಕರ್ನೆಚೆಂ ಹಗೆಂ ತಿರ್ಸುಂಕ್. ಪುಣ್ ಸ್ತ್ರೀಯೆಚೆಂ ರೂಪ್ ಸಾಂಡುನ್ ಆಸ್ವೆಲಾಚೆಂ ರೂಪ್ ಘೆವ್ನ್ ಆಯ್ಲಾಂ.

ರಾವ್! ಹಾಂವೆ ದಾರಾಚಿ ಖಿಳ್ ಘಾಲ್ಯಾಗಿ? ವ್ಹಯ್.

ಬರೆಂ, ತೆಂ ಭಿತರ್ ರಿಗೊಂಕ್ ಸಕ್ಚೆಂನಾ. ತೆಂ ಆತಾಂ ಭಾಯ್ರ್ ದಾರಾಕ್ ಖೊರ್ಪುಂಕ್ ಲಾಗ್ಲಾಂ. ತಾಳ್ಯಾಂತ್ ಗುಂಡಾಯೆ ಥಾವ್ನ್ ತೆಂ ಹುಂಕಾರ್ತಾ. ತೆಂ ತೊಂಡ್...ತೆ ಚೂಪ್ ದಾಂತ್!

ಬಹುಶ ಇನ್ಸ್ ಪೆಕ್ಟರ್ ಗ್ರೆಗರಿ, ನ್ಹಯ್ ತರ್ ದೊ| ಮೆರೊಕ್ಸ್ ಮ್ಹಾಕಾ ಮೆಳೊಂಕ್ ಯೆತಲೆ. ತೆ ಯೇನಾಂತ್ ಜಾಲ್ಯಾರ್ ಹಾಂವ್ ಆಯ್ಚಿ ರಾತ್ ಜಾಗೊಚ್ ಬಸೊನ್ ಪಾಶಾರ್ ಕರ್ತಲೊಂ. ಸಕಾಳಿಂ ಉಜ್ವಾಡ್ತಾನಾ ತೆಂ ವೆತಲೆಂ. ಉಪ್ರಾಂತ್ ತೆಂ ಪರ್ತುನ್ ಪಾಟಿಂ ಯೆತಾನಾ ತಾಕಾ ಧರ್ನ್ ಜೈಲಾಂತ್ ಘಾಲ್ಚಿ ವಿಲೆವಾರಿ ಕರ್ತಲೊಂ.

ವ್ಹಯ್, ಹಾಂವ್ ಜಾಗೊ ರಾವೊನ್ ರಾತ್ ಪಾಶಾರ್ ಕರ್ತಲೊಂ.

ಪುಣ್ ಆಯ್ಕ್, ಕಶೆಂ ತೆಂ ಹುಂಕಾರ್ತಾ! ಮ್ಹಜಿ ಮತ್ ಪಿಸಾಂತುರ್ ಜಾತಾ. ಹಾಂವ್ ಹಾಂಗಾ ಆಸಾಂ ಮ್ಹಳ್ಳೆಂ ತೆಂ ಜಾಣಾಂ. ಹಾಂವೆ ಟಾಯ್ಪ್ ಕರ್ಚೆಂ ತಾಕಾ ಆಯ್ಕಾತಾ. ಹಾಂವ್ ತಾಚ್ಯಾ ಘಾಸಾಕ್ ಸಾಂಪಡ್ಲ್ಯಾರ್...

ಪುಣ್ ತಶೆಂ ಕಾಂಯ್ ಜಾಂವ್ಚೆಂನಾ. ಹಾಂವ್ ಹಾಂಗಾ ಕೆಬಿನಾ ಭಿತರ್ ಸುರಕ್ಷಿತ್ ಆಸಾಂ.

ಆತಾಂ ತೆಂ ಕಿತೆಂ ಕರ್ತಾಗಾಯ್? ತೆಂ ಆತಾಂ ದಾರಾಲಾಗಿಂ ಆವಾಜ್ ಕರಿನಾ. ತಾಚ್ಯಾ ಮೆಟಾಂಚೊ ಆವಾಜ್ ಆತಾಂ ಜನೆಲಾಂತ್ಲ್ಯಾನ್ ಆಯ್ಕಾತಾ.

ಜನೆಲ್!

ತ್ಯೆ ರಾತಿಂ ಲೀಜಾ ಜನೆಲಾಂತ್ಲ್ಯಾನ್ ಭಿತರ್ ರಿಗ್ತಾನಾ ತಾಚೊ ಆರ್ಸೊ ಫುಟೊನ್ ಗೆಲ್ಲೊ. ಆತಾಂ ತ್ಯಾ ಜನೆಲಾಕ್ ಆರ್ಸೊ ನಾ!

ತೆಂ ಹುಂಕಾರ್ತಾ. ತೆಂ ಆತಾಂ ಭಿತರ್ ಉಡಿ ಮಾರ್ತಲೆಂ.

ಆತಾಂ ತೆಂ ಮ್ಹಾಕಾ ದಿಸ್ತಾ. ಚಂದ್ರೆಮಾಚ್ಯಾ ಉಜ್ವಾಡಾಕ್ ಭಿತರ್ ಉಡಿ ಮಾರ್ಚೊ ಆಸ್ವೆಲ್ ಮ್ಹಾಕಾ ದಿಸ್ತಾ...

ವಾಯ್ಲೆಟ್! ನಾಕಾ...ನಾಕಾ...ಮ್ಹಾಕಾ ಭಗ್ಸಿ...

**** (ಸಂಪ್ಣಿ)***

(- ವಾಲ್ಟರ್ ಲಸ್ರಾದೊ, ನಕ್ರೆ, ಎಪ್ರಿಲ್ 2016)

ವಾಲ್ಟರ್ ಲಸ್ರಾದೊ: ಕೊಂಕ್ಣೆಂತ್ ಆಸ್ಚ್ಯಾ ಭೋವ್ ಥೊಡ್ಯಾ ಅನುವಾದ್‌ಕಾರಾಂ ಪಯ್ಕಿಂತ್ಲೊ ಎಕ್ಲೊ. ’ಅಕ್ರಮ್ ಜಾಳ್’, ’ಚಲ್ಚೆಂ ಮೊಡೆಂ’, ’ಮೊರ್ನಾಚೊ ತಾಳೊ’, ’ಜುದಾಸಾಚಿ ಜುಗಾರ್’ ’ಮೊರ್ನಾಚೊ ತಾಳೊ’, ’ಮಾಫಿಯಾ ಪೊದೊರ್ನ್’ ಹಾಚ್ಯೊ ಪ್ರಮುಖ್ ಅನುವಾದಿತ್ ಕಾಣ್ಯೊ. ಕಾಣ್ಯಾಂ ಶಿವಾಯ್ ಲೇಕನಾಂ, ವಿಡಂಬನಾಂ ಸಯ್ತ್ ಬರಂವ್ಚೊ ಹೊ ಮುಂಬಯಾಂತ್ ವಸ್ತಿ ಕರುನ್ ಆಸಾ.