ವಾಲ್ಟರ್ ಲಸ್ರಾದೊ ನಕ್ರೆ, ಕೊಂಕ್ಣೆಂತ್ ಅಪ್ರೂಪಾನ್ ಬರಯ್ತಾ ತರ್‌ಯೀ ಅಪುರ್ಭಾಯೆಚೆಂ ಬರಯ್ತಾ. ಕೊಂಕ್ಣೆಭಾಯ್ಲೆಂ ಸಾಹಿತ್ಯ್ ಸಯ್ತ್ ವಾಸ್ಚಾ ಹಾಣೆಂ ಸಭಾರ್ ಉಂಚ್ಲ್ಯೊ ಕೃತಿಯೊ ಕೊಂಕ್ಣೆಕ್ ಅನುವಾದಿತ್ ಕೆಲ್ಯಾತ್. ಚಡ್ತಾವ್ ಜಾವ್ನ್ ಸಕಾಳಿಕ್ ಲೇಖನಾಂ ತಶೆಂಚ್ ಸಮಾಜಿಕ್ ಸಂಗ್ತೆಚೆರ್ ಘಾಲ್ಚಿ ಹಾಚಿ ವಿಡಂಬನಾತ್ಮಕ್ ನದರ್, ಖರಿಚ್ ಜಾವ್ನ್ ಸಮಾಜಿಕ್ ಸ್ಪಂದನ್ ಕರ್ಚೆತಸ್ಲಿ. ದೆಕುನ್ ಹೊ ಕಾಣ್ಯೆಗಾರ್ ಕೊಂಕ್ಣೆಂತ್ಲ್ಯಾ ವಿಂಚ್ಣಾರ್ ಕಾಣ್ಯೆಗಾರಾಂ ಪಯ್ಕಿಂತ್ಲೊ ಎಕ್ಲೊ ಮ್ಹಣ್ ಭರ್ವಸ್ತೆಲ್ಯಾಂತ್ಲೊ ಹಾಂವ್‌ಯೀ ಎಕ್ಲೊಂ. ಸದ್ದ್ಯಾಕ್ ಮುಂಬಯಾಂತ್ಲ್ಯಾ ಮಲಾಡಾಂತ್ ಆಪ್ಲ್ಯಾ ಪತಿಣೆಸವೆಂ ವಸ್ತಿ ಕರುನ್ ಆಸಾ.

ಆಸ್ವೆಲಾಚೊ ಉಮೊ [ ಮೂಳ್ ಲೇಖಕ್: ರೊಬರ್ಟ್ ಬ್ಲೊಚ್, ತರ್ಜಣ್: ವಾಲ್ಟರ್ ಲಸ್ರಾದೊ, ನಕ್ರೆ]

[ಕಾಣ್ಯೆಚೊ ಆಧ್ಲೊ ಭಾಗ್]

ಹಾಂವ್ ಪಾಟಿಂ ಕೆಬಿನಾಕ್ ಪಾವ್ತಾನಾ ದಾರಾ ಭಾಯ್ರ್ ವಾಯ್ಲೆಟ್ ಮ್ಹಾಕಾ ರಾಕೊನ್ ಆಸ್ ಲ್ಲೆಂ.

“ಖಬಾರ್ ಆಸಾಗಿ ತುಕಾ?” ತಾಣೆ ವಿಚಾರ್ಲೆಂ.

“ತುಕಾ ಕಶೆಂ ಕಳ್ಳೆಂ?”, ಹಾಂವೆ ಸವಾಲ್ ಕೆಲೆಂ.

“ತುಕಾ ಮೆಳೊಂಕ್ ಎಕ್ಲೊ ಆಯ್ಲಾ – ತಾಣೆ ಸಾಂಗ್ಲೆಂ. ತಾಣೆ ಮ್ಹಾಕಾ ಆಸ್ವೆಲಾ ವಿಶಿಂ ಸಾಂಗ್ಲೆಂ ಆನಿ ಹ್ಯಾ ದಿಸಾಂನಿ ಘಡೊನ್ ಆಸ್ ಲ್ಲೆಂ ತಾಕಾ ಹಾಂವೆ ಸಾಂಗ್ಲೆಂ. ತೊ ಭಿತರ್ ತುಕಾ ರಾಕೊನ್ ಬಸ್ಲಾ.”

“ತುಂವೆ ಸಾಂಗ್ಲೆಂ ತಾಕಾ. ದೆಕುನ್ ತೊ ಮ್ಹಾಕಾ ಮೆಳೊಂಕ್ ಖುಶಿ ವರ್ತಾ,” ಹಾಂವೆ ಮ್ಹಳೆಂ.

“ವ್ಹಯ್, ತುಂವೆ ಎಕ್ಲ್ಯಾನ್ ಮಾತ್ರ್ ಭಿತರ್ ವೆಚೆಂ ಬೊರೆಂ. ತಾಚೆಂ ನಾಂವ್ ಗ್ರೆಗರಿ ಆನಿ ತೊ ಪೊಲಿಸ್ ಜಾವ್ನಾಸಾ.”

ಭಿತರ್ ಗೆಲ್ಯಾ ಶಿವಾಯ್ ದುಸ್ರಿ ವಾಟ್ ನಾತ್ ಲ್ಲಿ.

“ಮಿ| ಚಾರ್ಲ್ಸ್,” ತಾಣೆ ಮ್ಹಳೆಂ ಹಾಂವ್ ಭಿತರ್ ಸರ್ತಾನಾ ಆರಾಮ್ ಕದೆಲಾವಯ್ಲೊ ಉಟೊನ್.

“ಎಸ್ ಸರ್, ತುಜೆ ಖಾತಿರ್ ಹಾಂವ್ ಕಿತೆಂ ಕರುಂ?”

“ಹಾಂವ್ ಚಿಂತಾಂ ತುಂ ಜಾಣಾಂಯ್. ಸರೋವರಾಚೆ ಪಲ್ತೊಡಿ ರಾಂವ್ಚ್ಯಾ ಚೆಡ್ಚಾಚ್ಯಾ ಮೊರ್ನಾ ಸಂಬಂಧಿ ಹಾಂವ್ ಆಯ್ಲಾಂ.”

ಹಾವೆಂ ಸ್ವಾಸ್ ಸೊಡ್ಲೊ. “ಜೋಡ್ ಮಾರ್ಗಾಲಾಗಿಂ ತಿ ಖಬಾರ್ ಮ್ಹಾಕಾ ಮೆಳ್ಳಿ. ಆಸ್ವೆಲ್, ವ್ಹಯ್ಮೂ? ತ್ಯಾ ವಿಶ್ಯಾಂತ್ ಮ್ಹಾಕಾ ಕಾಂಯ್ ಕಳಿತ್ ಆಸಾಗಿ ಮ್ಹಣ್ ತುಂ ಜಾಣಾ ಜಾಂವ್ಕ್ ಅಪೇಕ್ಷಿತಾಯ್.”

“ಕಾಂಯ್ ಜಾಣಾಂಯ್ಗಿ ತುಂ?”

ಹಾಂವ್ ನಾರ್ಗಾಲೊಂ. ತಿ ಏಕ್ ಚುಕ್ ಜಾವ್ನಾಸ್ಲಿ. ಯುನಿಫೊರ್ಮಾಂತ್ ಆಸ್ ಲ್ಲೊ ತೊ ವ್ಹಡ್ಲೊ ಮನಿಸ್ ಮ್ಹಾಕಾಚ್ ಪಳೆಲಾಗ್ಲೊ.

“ಕಾಂಯ್ ಫಿಕಿರ್ ಕರಿನಾಕಾ. ಹ್ಯಾ ಕೆಬಿನಾ ಭಂವಾರಿಂ ಸೂಕ್ಷ್ಮ್ ನದರ್ ಘಾಲ್ಯಾರ್ ಆಸ್ವೆಲಾಚಿಂ ಮೆಟಾಂ ಸಾರ್ಕಿಂ ಪಳೆಂವ್ಕ್ ಮೆಳ್ತಾತ್. ಆಸ್ವೆಲ್ ಹಾಂಗಾ ಥಾವ್ನ್ ಶೀದಾ ಚೆಡ್ವಾಚ್ಯಾ ಘರಾ ಗೆಲೊ ಮ್ಹಣ್ ಸ್ಪಷ್ಟ್ ಕಳ್ತಾ.”

ಹಾಂವ್ ಕಾಂಯ್ ಸಾಂಗೊಂಕ್ ಸಕ್ಲೊಂನಾ. ಹಾಂವೆ ಸಿಗ್ರೆಟ್ ಪೆಟಂವ್ಚೆಂ ಪ್ರೇತನ್ ಕೆಲೆಂ ಆನಿ ತಶೆಂ ಕರುಂಕ್ ನಜೊ ಆಸ್ ಲ್ಲೆಂ ಮ್ಹಣ್ ಮ್ಹಾಕಾ ಭಗ್ಲೆಂ.

“ತ್ಯಾ ಶಿವಾಯ್”, ಮ್ಹಣಾಲೊ ಗ್ರೆಗರಿ. “ಹಾಂವ್ ತುಜ್ಯೆ ಬಾಯ್ಲೆಲಾಗಿಂ ಉಲವ್ನ್ ಆಸ್ ಲ್ಲೊಂ. ಹ್ಯಾ ಆಸ್ವೆಲಾವಿಶಿಂ ತಿಕಾ ಜಾಯ್ತಿ ಮಾಹೆತ್ ಆಸಾ ತಶೆಂ ದಿಸ್ತಾ.”

“ವ್ಹಯ್ಗೀ? ಕಾಲ್ ರಾತಿಂಚ್ ಏಕ್ ಆಸ್ವೆಲಾಕ್ ತಿಣೆ ಪಳೆಲಾ ಮ್ಹಣ್ ತುಕಾ ಸಾಂಗ್ಲೆಂ?”

“ವ್ಹಯ್,” ಗ್ರೆಗರಿ ಆತಾಂ ಗಂಭೀರ್ ಜಾಲೊ. “ತೆಂ ಆಸೊಂ, ಕಾಲ್ ರಾತಿಂ ಹಾಂಗಾಸರ್ ಆಸ್ವೆಲ್ ಯೆತಾನಾ ತುಂ ಖಂಯ್ ಆಸ್ ಲ್ಲೊಯ್?”

“ಹಾಂವ್ ಶಹರಾಕ್ ಗೆಲ್ಲೊಂ.”

“ಲಿಯಾಂವಾಕಡೆ?”

“ನ್ಹಯ್, ಹಾಂವ್ ಅಶೆಂಚ್ ಭಂವೊನ್ ಆಸ್ ಲ್ಲೊಂ.”

“ಭಂವೊನ್ ಆಸ್ ಲ್ಲೊಯ್ ನ್ಹಂಯ್ಗೀ?”

ತಾಚೆ ಮತಿಂತ್ ಕಿತೆಂ ಆಸಾ ಮ್ಹಣ್ ಹಾಂವ್ ಸಮ್ಜಾನಾ ಜಾಲೊಂ.

“ತಿ ಗಜಾಲ್ ಆತಾಂ ಸದ್ದ್ಯಾಕ್ ಸೊಡ್ಯಾಂ,” ತೊ ಮ್ಹಣಾಲೊ.”ಹ್ಯೆ ಕೇಜಿ ಸಂಬಂಧಿಂ ಸರ್ವ್ ಸಂಗ್ತಿ ಮ್ಹಾಕಾ ಕಳಿತ್ ಆಸಾತ್.ತ್ಯೆ ಮನ್ಜಾತಿಚ್ಯೆ ಸವಯೆ ವಿಶಿಂ ಕಾಂಯ್ ಉಜ್ವಾಡ್ ಘಾಲುಂಕ್ ಜಾತಾಗಿ ಮ್ಹಣ್ ಹಾಂವ್ ಪ್ರೇತನ್ ಕರ್ನ್ ಆಸಾಂ, ತಿತ್ಲೆಂಚ್. ಆಮಿ ಆತಾಂ ಶಿಕಾರೆಚೊ ಪಂಗಡ್ ಜಮೊ ಕರ್ನ್ ಆಸಾಂವ್. ತುಂ ಆಮ್ಚೆ ಸಾಂಗಾತಾ ಮೆಳ್ಚೊನಾಂಯ್, ವ್ಹಯ್ಮೂ? ಅಸಲಿಂ ಕಾಮಾಂ ತುಜೆವರ್ನಿ ಜಾಂವ್ಚಿಂನಾಂತ್.”

ಹಾಂವೆ ಕಾಂಯ್ ಮ್ಹಳೆಂ ನಾ.

“ಹಾಂವೆ ಸಾಂಗ್ಚೆಂ ಸಾರ್ಕೆಂಮೂ?” ತಾಣೆ ಧಾಂಬೂನ್ ವಿಚಾರ್ಲೆಂ.”ತುಂ ಏಕ್ ಲೇಖಕ್ ಜಾವ್ನಾಸಾಯ್.”

ಹಾಂವೆ ತಕ್ಲಿ ವಯ್ರ್ ಸಕಯ್ಲ್ ಕೆಲಿ.

“ತುಂವೆ ಅದ್ಭುತ್ ಸಂಗ್ತಿಂ ವಿಶಿಂ ಸಭಾರ್ ಕಾಣಿಯೊಂ ಬರಯ್ಲ್ಯಾತ್ ಮ್ಹಣ್ ಆಯ್ಕಾಲಾಂ ಹಾಂವೆ. ಏಕ್ ಅದ್ರಶ್ಯ್ ರಾಕ್ಸಾವಿಶಿಂ ಆಯ್ಲೆವಾರ್ ಬರವ್ನ್ ಕಾಡ್ಲಾಂಯ್ ಮ್ಹಣ್ತಾ ತುಜಿ ಪತಿಣ್.”

ಪರ್ತುನ್ ಹಾಂವೆ ಮಾತೆಂ ವಯ್ರ್ ಸಕಯ್ಲೆ ಕೆಲೆಂ. ತೆಂಚ್ ಸುಲಭ್ ಜಾವ್ನಾಸ್ಲೆಂ.

ಗ್ರೆಗರಿ ಸವ್ಕಾಸ್ ಉಟ್ಲೊ. “ಥೊಡೆ ಪಾವ್ಟಿಂ ಕಸಲೆಂ ತರಿ ವಿಚಿತ್ರ್ ಝಳ್ಕಾತಾಗಿ ತುಕಾ?” ತಾಣೆ ವಿಚಾರ್ಲೆಂ.

“ಮ್ಹಳ್ಯಾರ್?”

“ತುಜೆ ತಸಲೊ ಲೇಖಕ್ ಸ್ವಾಭಾವಿಕ್ ಜಾವ್ನ್ ವೆಗ್ಳ್ಯಾಚ್ ಥರಾಚೊ ಆಸ್ಯೆತ್ ಮ್ಹಣ್ ಮ್ಹಾಕಾ ಭಗ್ತಾ. ರಾಕ್ಸಾಂ ವಿಶಿಂ ಬರಂವ್ಚೊ ಮನಿಸ್ ಥೊಡೆ ಪಾವ್ಟಿಂ ಸಾರ್ಕೊ ಮನಿಸ್ ಜಾವ್ನ್ ಉರ್ತಾ ಮ್ಹಣ್ ಸಾಂಗೊಂಕ್ ಕಷ್ಟ್.”

“ಹಾಂವ್ ರಾಕ್ಸಾ ವಿಶಿಂ ಬರಯ್ತಾನಾ ಮ್ಹಜ್ಯಾ ಜೀವನ್ ಚರಿತ್ರೆಚೊ ತೊ ಏಕ್ ವಾಂಟೊ ಜಾವ್ನ್ ಆಸ್ಯೆತ್ ಮ್ಹಣ್ ಚಿಂತಾಯ್ಗಿ ತುಂ?,” ವಿಚಾರ್ಲೆಂ ಹಾಂವೆ.

“ಹಾಂವ್ ತಶೆಂ ಉಲಯ್ನ್ ಮ್ಹಣ್ ತಾಣೆ ಚಿಂತುಂಕ್ ನಾತ್ಲೆಂ. ಹಾಂವೆಂಚ್ ಮುಕಾರ್ಸಿಲೆಂ-

“ತುಕಾ ಜಾಲಾಂ ತರೀ ಕಿತೆಂ?”,ಹಾಂವ್ ತಾಪ್ಲೊಂ. “ಹಾಂವ್ ರಾಕ್ಸಾಪರಿಂ ದಿಸ್ತಾಂಗಿ ತುಕಾ?”

ಗ್ರೆಗರಿ ಹಾಸ್ಲೊ. “ದುಬಾವ್ ಕರ್ಚಿ ಮ್ಹಜಿ ವ್ಯಾಪ್ತ್ ಜಾವ್ನಾಸಾ. ಹಾಂವೆ ಜಾಪ್ ದಿಂವ್ಚೆ ಪಯ್ಲೆಂ ತುಜೆ ದಾಂತ್ ಪಳೆಯಾಂ.”

ಹಾಂವೆ ಮ್ಹಜೆಂ ತೊಂಡ್ ಉಗ್ತೆಂ ಕೆಲೆಂ ಆನಿ ಮ್ಹಳೆಂ “ಆಂ!”

ತಾಣೆ ತೊಂಡ್ ಆಂಬೊಟ್ ಕೆಲೆಂ.

“ತುಂ ಕಿತೆಂ ರುಜು ಕರ್ನ್ ದಾಕಂವ್ಕ್ ಪಳೆತಾಯ್, ಆಫಿಸರ್?” ಹಾಂವೆ ವಿಚಾರ್ಲೆಂ. “ಮ್ಹಜೆ ಬಾಯ್ಲೆನ್ ಹೆಣೆಂಸರ್ ಏಕ್ ಆಸ್ವೆಲ್ ಪಳೆಲಾ ಮ್ಹಳ್ಳೆಂ ತುಂ ಜಾಣಾಂಯ್. ಕಾಲ್ ರಾತಿಂ ತೊ ಆಯಿಲ್ಲೊ ಮ್ಹಳ್ಳೆಂಯ್ ತುಂ ಜಾಣಾಂಯ್. ತೊ ಹಾಂಗಾಥಾವ್ನ್ ಬಹುಶ ಪೀಟರಾಚ್ಯಾ ಘರಾ ಗೆಲೊ ಆನಿ ಚೆಡ್ವಾಕ್ ಲಗಾಡ್ ಕಾಡ್ನ್ ರಾನಾಂತ್ ಮಾಯಾಕ್ ಜಾಲೊ. ತುಕಾ ಜಾಯ್ ಆಸ್ ಲ್ಲೆ ಸಕ್ಕಡ್ ವಿವರ್ ಆಮಿ ದಿಲ್ಯಾತ್. ಪುಣ್ ತುಂ ಮ್ಹಾಕಾಚ್ ರಾಕ್ಕೊಸ್ ಮ್ಹಣ್ ಚಿಂತಾಯ್ ಜಾಲ್ಯಾರ್ ತಿ ವಿಂಗಡ್ ಗಜಾಲ್. ಬಹುಶ ತುಮ್ಚಿ ವೈಗ್ಯಾನಿಕ್ ಪೊಲಿಸ್ ಅಭಿಪ್ರಾಯ್ ದಾಕಯ್ತಾ ಜಾಂವ್ಕ್ ಪುರೊ ಹಾಂವ್ ಚ್ ಆಸ್ವೆಲಾಚೆಂ ರೂಪ್ ಕಾಣ್ಘೆತಾಂ, ಬಾಯ್ಲೆಕ್ ಭೆಷ್ಟಾಯ್ತಾಂ ಆನಿ ಕಾಳೊಕಾಂತ್ ವಚೊನ್ ಏಕಾ ತರ್ನಾಟ್ಯೆ ಚೆಡ್ವಾಚೊ ಗಳೊ ಪಿಂದುನ್ ಲಗಾಡ್ ಕಾಡ್ತಾಂ ಮ್ಹಣ್.”

ಹಾಂವೆ ತಾಕಾ ಘಟ್ ಮುಟಿಂತ್ ಧರ್ ಲ್ಲೊ. “ಹೆಣೆಂಚೊ ಥೊಡೊ ಲೋಕ್ ದೆಂವ್ಚಾರಾಂಕ್, ಭೂತಾಂಕ್, ಮೆಲ್ಲ್ಯಾಂಕ್ ಆನಿ ವೆಯೆರ್ ವುಲ್ಫಾಂಕ್ ಪಾತ್ಯೆತಾ ಮ್ಹಳ್ಳೆಂ ಹಾಂವ್ ಜಾಣಾಂ. ಪುಣ್ ಪೊಲಿಸ್ ಸಯ್ತ್ ಅಸಲ್ಯಾ ಪಿತಿಸ್ಪಣಾಕ್ ಪಾತ್ಯೆತಾತ್ ಮ್ಹಣ್ ಹಾಂವ್ ನೆಣಾ ಆಸ್ ಲ್ಲೊಂ.”

“ನೀಜ್ ಜಾವ್ನ್ ಮಿ| ಚಾರ್ಲ್ಸ್, ಹಾಂವ್...”

ಮ್ಹಜೊ ಹಾತ್ ದಾರಾರ್ ಆಸ್ ಲ್ಲೊ. ತೋಂಡಾರ್ ಹಾಸೊ ಹಾಡ್ನ್ ಹಾಂವೆ ಮ್ಹಳೆಂ, “ಹಾಂವ್ ತುಕಾ ಸಾಂಗ್ತಾಂ, ವಚ್ ಆನಿ ತುಜ್ಯಾ ಆಸ್ವೆಲಾಕ್ ಸೊಧುನ್ ಕಾಡ್.”

ನಿರ್ವೊಗ್ ನಾಸ್ತಾಂ ತೊ ಗೆಲೊ.

ಹಾಂವ್ ಬಸ್ಲೊಂ. ವಾಯ್ಲೆಟ್ ಭಿತರ್ ಯೆತಾನಾ ಘಾಮಾನ್ ಮುದೊ ಜಾಲ್ಲೊಂ ಹಾಂವ್.

ಪಯ್ಲೆ ಪಾವ್ಟಿ ಹಾಂವ್ ಸಮ್ಜಣೆನ್ ಉಲಯಿಲ್ಲೊಂ. ಗ್ರೆಗರಿಚೆ ಮತಿಂತ್ ಕಾಂಯ್ ದುಬಾವ್ ಆಸ್ಲ್ಯಾರ್ ಮ್ಹಜ್ಯಾ ಶೀದಾ ಉಲೊಣ್ಯಾ ವರ್ವಿಂ ತೊ ಮಾಯಾಕ್ ಜಾತಲೊ. ಆಸ್ವೆಲಾಚೆಂ ರೂಪ್ ಘೆಂವ್ಚ್ಯಾ ಮನ್ಶಾಂ ವಿಶಿಂ ಆಯ್ಕೊಂಕ್ ಮೆಳ್ಚ್ಯಾ ಪುಸ್ಪುಸ್ಯಾಂ ಥಂಯ್ ತಾಕಾ ಕಾಂಯ್ ಪಾತ್ಯೆಣಿ ಆಸ್ಲ್ಯಾರ್ ತಿ ಪಯ್ಸ್ ಕರ್ಚೆಪರಿಂ ತಾಕಾ ಹಾಂವೆ ಲಜೆಕ್ ಘಾಲ್ಲೆಂ.

ವಾಯ್ಲೆಟಾಕೀ ತಶೆಂಚ್ ಕರುಂಕ್ ಹಾಂವೆ ಚಿಂತ್ಲೆಂ. ಆಮ್ಚ್ಯಾ ಸಂಭಾಶಣಾ ವಿಶಿಂ ತಾಕಾ ಹಾಂವೆ ಸಾಂಗ್ಲೆಂ. ತೆಂ ಮೌನ್ ಪಣಿ ಆಯ್ಕೊಂಕ್ ಲಾಗ್ಲೆಂ.

“ಆತಾಂ ಪಳೆ ಮೊಗಾ, ಹಿ ಜಾವ್ನಾಸಾ ಖರಿ ಗಜಾಲ್.” ಹಾಂವೆ ಸಮ್ಜಾಯ್ಲೆಂ. “ಆಸ್ವೆಲ್ ಆಸಾ ವ್ಹಯ್. ಪುಣ್ ತೊ ಫಕತ್ ಏಕ್ ಆಸ್ವೆಲ್ ಜಾವ್ನಾಸಾ. ತೊ ಇಲ್ಲಿಶಿ ಬುದ್ವಂತ್ಕಾಯ್ ದಾಕಯ್ತಾ ದೆಕುನ್ ತೊ ಸಾಧಾರ್ಣಾಚೊ ಆಸ್ವೆಲ್ ನ್ಹಯ್ ಮ್ಹಣ್ ತುಂವೆ ಚಿಂತ್ಲಾಂಯ್. ಹಿಂಡಾಂತ್ಲೆ ವಿಂಗಡ್ ಜಾಲ್ಲೆ ಆಸ್ವೆಲ್ ಮನ್ಶಾಂ ಮಧೆಂ ಗುಂವ್ತಾತ್ ಆನಿ ತೆ ಶಿಂತ್ರ್ಯಾಳಿ ಆಸ್ತಾತ್ ಮ್ಹಣ್ತಾ ದೊತೊರ್ ಮೆರೊಕ್ಸ್. ಪುಣ್ ತೆ ಜೀವ್ ಕಾಡ್ತಾನಾ ಮನ್ಜಾತಿ ಪರಿಂಚ್ ಜೀವ್ ಕಾಡ್ತಾತ್. ಆಸ್ವೆಲಾ ಶಿವಾಯ್ ತೊ ದುಸ್ರೊ ಕಾಂಯ್ ನ್ಹಯ್. ಆಜ್ ರಾತಿಂ ತಾಕಾ ಸೊಧುನ್ ಲಗಾಡ್ ಕಾಡ್ತಲೆ ಆನಿ ತುಜಿ ಮತ್ ಶಾಂತ್ ಜಾತಲಿ.”

ವಾಯ್ಲೆಟಾನ್ ಮ್ಹಜ್ಯಾ ಬಾವ್ಳ್ಯಾರ್ ಹಾತ್ ದವರ್ಲೊ.

“ತುಂ ಮ್ಹಜೆ ಸಾಂಗಾತಾಚ್ ರಾವ್ತಲೊಯ್ಮೂ?’ ತಾಣೆ ವಿಚಾರ್ಲೆಂ.

ಮ್ಹಜ್ಯಾ ಕಪಾಲಾರ್ ಮಿರ್ಯೊ ಉದೆಲ್ಯೊ.

“ನಾ. ತಾಚ್ಯಾ ಸೊಧ್ನೆಂತ್ ಹಾಂವೀ ಸಾಂಗಾತಾ ಮೆಳ್ತಲೊಂ. ಕಾಲ್ ಹಾಂವೆ ತುಕಾ ಸಾಂಗ್ಲಾಂ. ಹಾಂವೆ ವಚೊಂಕ್ ಜಾಯ್.”

“ತುಂ ವಚಾನಾತ್ಲ್ಯಾರ್ ಬೊರೆಂ ಆಸ್ ಲ್ಲೆಂ. ಮ್ಹಾಕಾ ಭೆಂ ದಿಸ್ತಾ.”

“ದಾರಾಂಕ್ ಖಿಳ್ ಘಾಲ್.ತಿಂ ಉಗ್ತಿಂ ಕರುಂಕ್ ಆಸ್ವೆಲಾಕ್ ಜಾಯ್ನಾ.”

“ಪುಣ್.”

“ಹಾಂವ್ ಶಿಕಾರೆಕ್ ವೆತಲೊಂ. ತುಂ ಹಾಂಗಾ ಸುರಕ್ಷಿತ್ ಆಸ್ತಲೆಂಯ್.”

*******

[ಕಾಣ್ಯೆಚೊ ಮುಖ್ಲೊ ಭಾಗ್]

(- ವಾಲ್ಟರ್ ಲಸ್ರಾದೊ, ನಕ್ರೆ, ಎಪ್ರಿಲ್ 2016)

ವಾಲ್ಟರ್ ಲಸ್ರಾದೊ: ಕೊಂಕ್ಣೆಂತ್ ಆಸ್ಚ್ಯಾ ಭೋವ್ ಥೊಡ್ಯಾ ಅನುವಾದ್‌ಕಾರಾಂ ಪಯ್ಕಿಂತ್ಲೊ ಎಕ್ಲೊ. ’ಅಕ್ರಮ್ ಜಾಳ್’, ’ಚಲ್ಚೆಂ ಮೊಡೆಂ’, ’ಮೊರ್ನಾಚೊ ತಾಳೊ’, ’ಜುದಾಸಾಚಿ ಜುಗಾರ್’ ’ಮೊರ್ನಾಚೊ ತಾಳೊ’, ’ಮಾಫಿಯಾ ಪೊದೊರ್ನ್’ ಹಾಚ್ಯೊ ಪ್ರಮುಖ್ ಅನುವಾದಿತ್ ಕಾಣ್ಯೊ. ಕಾಣ್ಯಾಂ ಶಿವಾಯ್ ಲೇಕನಾಂ, ವಿಡಂಬನಾಂ ಸಯ್ತ್ ಬರಂವ್ಚೊ ಹೊ ಮುಂಬಯಾಂತ್ ವಸ್ತಿ ಕರುನ್ ಆಸಾ.