ವಾಲ್ಟರ್ ಲಸ್ರಾದೊ ನಕ್ರೆ, ಕೊಂಕ್ಣೆಂತ್ ಅಪ್ರೂಪಾನ್ ಬರಯ್ತಾ ತರ್‌ಯೀ ಅಪುರ್ಭಾಯೆಚೆಂ ಬರಯ್ತಾ. ಕೊಂಕ್ಣೆಭಾಯ್ಲೆಂ ಸಾಹಿತ್ಯ್ ಸಯ್ತ್ ವಾಸ್ಚಾ ಹಾಣೆಂ ಸಭಾರ್ ಉಂಚ್ಲ್ಯೊ ಕೃತಿಯೊ ಕೊಂಕ್ಣೆಕ್ ಅನುವಾದಿತ್ ಕೆಲ್ಯಾತ್. ಚಡ್ತಾವ್ ಜಾವ್ನ್ ಸಕಾಳಿಕ್ ಲೇಖನಾಂ ತಶೆಂಚ್ ಸಮಾಜಿಕ್ ಸಂಗ್ತೆಚೆರ್ ಘಾಲ್ಚಿ ಹಾಚಿ ವಿಡಂಬನಾತ್ಮಕ್ ನದರ್, ಖರಿಚ್ ಜಾವ್ನ್ ಸಮಾಜಿಕ್ ಸ್ಪಂದನ್ ಕರ್ಚೆತಸ್ಲಿ. ದೆಕುನ್ ಹೊ ಕಾಣ್ಯೆಗಾರ್ ಕೊಂಕ್ಣೆಂತ್ಲ್ಯಾ ವಿಂಚ್ಣಾರ್ ಕಾಣ್ಯೆಗಾರಾಂ ಪಯ್ಕಿಂತ್ಲೊ ಎಕ್ಲೊ ಮ್ಹಣ್ ಭರ್ವಸ್ತೆಲ್ಯಾಂತ್ಲೊ ಹಾಂವ್‌ಯೀ ಎಕ್ಲೊಂ. ಸದ್ದ್ಯಾಕ್ ಮುಂಬಯಾಂತ್ಲ್ಯಾ ಮಲಾಡಾಂತ್ ಆಪ್ಲ್ಯಾ ಪತಿಣೆಸವೆಂ ವಸ್ತಿ ಕರುನ್ ಆಸಾ.

ಆಸ್ವೆಲಾಚೊ ಉಮೊ [ ಮೂಳ್ ಲೇಖಕ್: ರೊಬರ್ಟ್ ಬ್ಲೊಚ್, ತರ್ಜಣ್: ವಾಲ್ಟರ್ ಲಸ್ರಾದೊ, ನಕ್ರೆ]

[ಕಾಣ್ಯೆಚೊ ಆಧ್ಲೊ ಭಾಗ್]

ದುಸ್ರೆ ದೀಸ್ ಸಕಾಳಿಂ ವಾಯ್ಲೆಟ್ ಖಾಟ್ಯೆರ್ ಚ್ ಉರ್ಲೆಂ ಆನಿ ಹಾಂವ್ ಲೀಜಾಕ್ ಮೆಳೊಂಕ್ ಶಹರಾ ಕುಶಿನ್ ಗೆಲೊಂ.

ಲೀಜಾ ಜೋಡ್ ಮಾರ್ಗಾಲಾಗಿಂ ಆಪ್ಲ್ಯಾ ಬಾಪಯ್ ಸಾಂಗಾತಾ ರಾವ್ತಾಲೆಂ. ತ್ಯಾ ಮ್ಹಾತಾರ್ಯಾಕ್ ಆರ್ ಮಾರ್ ಲ್ಲಿ ಆನಿ ಲೀಜಾ ಪ್ರವಾಸಿ ವೆಪಾರಾ ಖಾತಿರ್ ಮಣಿಯಾಂಚೆ ಸರ್ ಆನಿ ಕುರ್ಪೊಣೆ ವೊಳುನ್ ತಾಕಾ ಪೊಸ್ತಾಲೆಂ.

ಅಶೆಂಚ್ ಗೆಲ್ಯಾ ಮ್ಹಯ್ನ್ಯಾಂತ್ ಹಾಂವ್ ಎಕ್ಲೊಚ್ ಆಯಿಲ್ಲ್ಯಾ ವೆಳಾರ್ ತಾಕಾ ಹಾಂವ್ ಭೆಟ್ ಲ್ಲೊಂ. ವಾಯ್ಲೆಟಾಕ್ ಕಾಣಿಕ್ ಜಾವ್ನ್ ಧಾಡ್ಚೆ ಖಾತಿರ್ ಎಕ್ ಬ್ರೆಸ್ಲೆಟ್ ಮೊಲಾಂವ್ಕ್ ಮಾರ್ಗಾ ದೆಗೆನ್ ಹಾಂವ್ ರಾವ್ ಲ್ಲೊಂ.

ತೆದಾಳಾ ಲೀಜಾ ಮ್ಹಜೆ ದಿಷ್ಟಿಕ್ ಪಡ್ಲೆಂ ಆನಿ ಹಾಂವ್ ಹೆರ್ ಸಕ್ಕಡ್ ವಿಸರ್ಲೊಂ. ಲೀಜಾ ಅರ್ದೆಂ ಇಂಡಿಯನ್ ಆನಿ ಅರ್ಧೆಂ ದೇವಿ ಜಾವ್ನಾಸ್ಲೆಂ. ತಾಚೆ ಕೆಸ್ ಕಾಳೆ ಆಸ್ ಲ್ಲೆ. ತಾಚ್ಯಾ ದೊಳ್ಯಾಂ ಭಿತರ್ ಪಳೆಲ್ಯಾ ಶಿವಾಯ್, ಗೂಂಡಾಯೆಚಿ ಆನಿ ಪರ್ಜಳ್ಚಿ ಕಾಳ್ಬಾಣ್ ಕಶಿ ಆಸ್ತಾ ಮ್ಹಳ್ಳೆಂ ತುಮಿ ಅಂದಾಜ್ ಕರುಂಕೀ ಸಕ್ಚಿಂನಾಂತ್. ಕಾಳ್ಕ್ಯೆ ರಾತಿಂ ತಾಂತಿಂ ಆಕಾರಾಚ್ಯಾ ಉಗ್ತ್ಯಾ ದೋನ್ ಜನೆಲಾಂಪರಿಂ ಆಸ್ ಲ್ಲೆ ತಾಚೆ ದೊಳೆ. ತಾಚೆಂ ಮುಖಮಳ್ ಆನಿ ಲಕ್ಷಣ್ ಹಳ್ತಾನ್ ತಾಂಬ್ಯಾಚೊ ಪರ್ಜಳ್ ದೀವ್ನ್ ರಚ್ ಲ್ಲೆಂ. ತಾಚೊ ಜೀವ್ ಬಾರಿಕ್ ಆನಿ ಬಳಿಷ್ಟ್ ಆಸ್ ಲ್ಲೊ. ಪುಣ್ ವೆಂಗೆಂತ್ ಆಚರ್ಯಾನ್ ಮ್ಹಳ್ಳೆಪರಿಂ ಪಿಗಳ್ತಾಲೊ. ತೆಂ ಮ್ಹಾಕಾ ವೆಗಿಂಚ್ ಕಳ್ಳೆಂ, ಪಯ್ಲ್ಯೆ ಭೆಟೆಚ್ಯಾ ದೋನ್ ದಿಸಾಂ ಉಪ್ರಾಂತ್. ತಾಕಾ ಲ್ಹಾನ್ ಕರ್ಚೊ ಮ್ಹಜೊ ಇರಾದೊ ನ್ಹಂಯ್, ಪುಣ್ ಲೀಜಾ ಅರ್ದೆಂ ಇಂಡಿಯನ್ ಆನಿ ಅರ್ದೆಂ ದೇವಿ ಜಾವ್ನಾಸ್ಲೆಂ. ಆನಿ ತೆಂ ಸಗ್ಳೆಂಚ್ ಧುಷ್ಟ್ ಜಾವ್ನಾಸ್ಲೆಂ. ತಾಚೆಂ ಆಂಗ್ ಪಾತ್ಕಾಂಚ್ಯಾ ಕೊಂಡಾಂತ್ ಬುಡವ್ನ್ ಕಾಡ್ ಲ್ಲೆಂ ಜಾಂವ್ಕ್ ಪುರೊ.

ಪುರಾತನ್ ಕಾಳಾಚ್ಯಾ ತ್ಯಾ ಎಕ್ ಆಡ್ವಾರ್ಲೆಲ್ಯಾ ಫಳಾಚೊ ಗೊಡ್ಸೊ ಆಮ್ಸೊ ರೋಸ್ ತಾಣೆ ಮ್ಹಾಕಾ ಆರ್ಪಿಲೊ. ಚಂದ್ರೆಮ್ ನಾತ್ಲೆಲ್ಯಾ ತ್ಯೆ ಎಕ್ ರಾತಿಂ ಆವಾಜ್ ನಾಸ್ತಾನಾ ತೆಂ ಮ್ಹಜೆಲಾಗಿಂ ಆಯ್ಲೆಂ ಆನಿ ಹಾಂವೆ ತ್ಯೆ ಕಾಳ್ಕ್ಯೆ ರಾತಿಂ ಬರೆಂ ಫೆಸ್ತ್ ಮಾರ್ಲೆಂ.

ವಾಯ್ಲೆಟ್ ಮ್ಹಜೆ ಸಾಂಗಾತಾ ರಾವೊಂಕ್ ಯೆತಾನಾ ಆಮ್ಚಿ ಮೊಗಾ ಭೆಟ್ ರಾವ್ಲಿ. ಆಮಿ ಜಾಗ್ರುತ್ ರಾವಾಜೆ ಮ್ಹಣ್ ಹಾಂವೆ ಲೀಜಾಕ್ ಸಾಂಗ್ಲೆಂ ಆನಿ ತೆಂ ಬೆಫಿಕಿರಾಯೆನ್ ಹಾಸ್ಲೆಂ.
“ಥೊಡ್ಯಾ ತೆಂಪಾ ಖಾತಿರ್ ಮಾತ್ರ್,” ಮ್ಹಣೊನ್ ತೆಂ ಕಬೂಲ್ ಜಾಲೆಂ.

“ಥೊಡ್ಯಾ ತೆಂಪಾ ಖಾತಿರ್?”

ಲೀಜಾನ್ ಮಾತೆಂ ವಯ್ರ್ ಸಕಯ್ಲ್ ಕೆಲೆಂ. ತಾಚೆ ದೊಳೆ ಪರ್ಜಳ್ತಾಲೆ. “ವ್ಹಯ್, ತುಜಿ ಬಾಯ್ಲ್ ಜೀವಂತ್ ಆಸ್ತಾ ಪರ್ಯಾಂತ್.”

ತಾಣೆ ತಶೆಂ ಸ್ವಾಭಾವಿಕ್ರಿತಿನ್ ಮ್ಹಳೆಂ ಆನಿ ಥೊಡ್ಯಾ ವೆಳಾ ಉಪ್ರಾಂತ್ ಮ್ಹಾಕಾಯ್ ತಿಂ ಉತ್ರಾಂ ಸ್ವಾಭಾವಿಕ್ ದಿಸ್ಲಿಂ. ಕಿತ್ಯಾಕ್ ಮ್ಹಳ್ಯಾರ್ ತಾಂತುಂ ಸತ್ ಆಸ್ ಲ್ಲೆಂ. ರಾಜಾಂವ್ ಆಸ್ ಲ್ಲೆಂ. ಮ್ಹಾಕಾ ಆತಾಂ ವಾಯ್ಲೆಟ್ ನಾಕಾಸ್ಲೆಂ. ಮ್ಹಾಕಾ ಹಿ ದುಸ್ರಿ ವಸ್ತ್ ಜಾಯ್ ಆಸ್ಲಿ. ಹಿ ವಸ್ತ್ ಮೋಗ್ ಯೀ ನ್ಹಯ್, ಕಾಮುಕಿ ತಾನ್ ಯೀ ನ್ಹಯ್. ತೊ ಎಕ್ ಮ್ಹಜ್ಯಾ ಅತ್ಮ್ಯಾಚೊ ಆನಿ ಭಯಂಕರ್ ಘಾತ್ಕಿಪಣಾಚೊ ಎಕ್ವಟ್ ಜಾವ್ನಾಸ್ಲೊ.

ತಿ ವಸ್ತ್ ಹಾಂವೆ ಸ್ವೀಕಾರ್ ಕರಿಜೆ ಜಾಲ್ಯಾರ್ ವಾಯ್ಲೆಟಾನ್ ಮರೊಂಕ್ ಜಾಯ್. ಹಾಂವೆ ಲೀಜಾಕ್ ಪಳೆಲೆಂ ಆನಿ ಕಬ್ಲತೆನ್ ಮಾತೆಂ ಹಾಲಯ್ಲೆಂ.

“ಹಾಂವೆ ತಾಕಾ ಲಗಾಡ್ ಕಾಡಿಜೆಗಿ?”, ವಿಚಾರ್ಲೆಂ ಹಾಂವೆ.

“ನಾಕಾ, ದುಸ್ರ್ಯೊ ವಾಟೊ ಆಸಾತ್.”

“ಇಂಡಿಯನ್ ಮೆಜಿಕ್?”

ಎಕಾ ಮ್ಹಯ್ನ್ಯಾ ಆಧಿಂ ಜಾಲ್ಲೆಂ ತರ್ ತ್ಯಾ ಉತ್ರಾಂಚೆ ಧಾರಿಕ್ ಹಾಂವ್ ಥಂಯ್ಚ್ ಕಾತರ್ ಮಾರ್ತೊಂ ಆಸ್ಲೊಂ. ಪುಣ್ ಆತಾಂ, ಲೀಜಾ ಮೆಳ್ಳ್ಯಾ ಉಪ್ರಾಂತ್, ತಾಕಾ ವೆಂಗೆಂತ್ ಧರ್ಲ್ಯಾ ಉಪ್ರಾಂತ್, ತಾಚ್ಯಾ ವೊಂಟಾಂಚಿ ಗೊಡ್ಸಾಣ್ ಚಾಕ್ಲ್ಯಾ ಉಪ್ರಾಂತ್ ತಾಚಿ ಸಲಹಾ ಮ್ಹಾಕಾ ಸಾರ್ಕಿ ಮ್ಹಣ್ ದಿಸ್ಲಿ.

“ ಚಿಂತ್ಯಾಂ, ತುಜ್ಯೆ ಬಾಯ್ಲೆನ್ ಮೊರ್ಚೆಂ ನಾಕಾ. ತಾಚ್ಯೆ ಬದ್ಲೆಕ್ ತಿಕಾ ಪಯ್ಸ್ ವಚೊಂಕ್ ಪಡ್ಲ್ಯಾರ್ ಕಶೆಂ?”

“ತುಜೊ ಮತ್ಲಾಬ್, ತಾಣೆ ಮ್ಹಾಕಾ ಸೊಡ್ನ್ ವೆಚೆಂ, ವೆಗ್ಳಾಚಾರ್ ಘೆಂವ್ಚೆಂ?”

“ತುಕಾ ಅರ್ಥ್ ಜಾವ್ನಾ ಮ್ಹಣ್ ಮ್ಹಾಕಾ ಕಳ್ತಾ. ತಕ್ಲೆಂತ್ ಅಸ್ಕತ್ ಜಾಲ್ಲ್ಯಾಂಕ್ ಬಂಧ್ ಕರ್ನ್ ದವರ್ಚೆ ಜಾಗೆ ಆಸಾತ್ ಯಾ ನಾ?”

“ಪುಣ್ ವಾಯ್ಲೆಟ್ ಪಿಶೆಂ ನ್ಹಯ್. ತೆಂ ಸಾರ್ಕೆಂ ಆಸಾ. ತಾಕಾ ಪಿಶೆಂ ಕರ್ಚೆಂ ಕಾಮ್ ತಿತ್ಲೆಂ ಸುಲಭ್ ನ್ಹಯ್.”

“ತಾಕಾ ಎಕ್ ಆಸ್ವೆಲ್ ಪಳೆಂವ್ಕ್ ಮೆಳ್ಳ್ಯಾರ್?”

“ಆಸ್ವೆಲ್?”

“ಎಕ್ ಆಸ್ವೆಲ್ ತುಜ್ಯೆ ಬಾಯ್ಲೆಚೊ ಪಾಟ್ಲಾವ್ ಕರ್ತಲೊ. ತೆಂ ಎಕ್ಸುರೆಂ ಆಸ್ತಾನಾ ತೊ ತಾಕಾ ಉಪದ್ರ್ ದಿತಲೊ. ಇರಾರ್ ಕರ್ತಲೊ. ತೆಂ ತ್ಯಾ ವಿಶಿಂ ಉಲಂವ್ಕ್, ಮಜತ್ ಮಾಗೊನ್ ತುಜೆಲಾಗಿಂ ಯೆತಲೆಂ. ತುಂವೆ ತಾಕಾ ಪಾತ್ಯೆಂವ್ಕ್ ಇನ್ಕಾರ್ ಕರುಂಕ್ ಜಾಯ್. ಹೆಣೆ ಆಸ್ವೆಲ್ ನಾಂತ್ ಮ್ಹಣ್ ತುವೆಂ ವಾದ್ ಮಾಂಡುಂಕ್ ಜಾಯ್. ಥೊಡ್ಯಾ ದಿಸಾಂನಿ ತಾಚಿ ಮತ್...”

ಲೀಜಾನ್ ಭುಜಾಂ ವಯ್ರ್ ಸಕಯ್ಲೆ ಕೆಲಿಂ. ಹಾಂವೆ ಸವಾಲಾಂ ವಿಚಾರ್ಲಿಂನಾಂತ್. ತಾಚಿ ಸಲಹಾ ಹಾಂವೆ ಸ್ವೀಕಾರ್ ಕೆಲಿ.

ಲೀಜಾನ್ ರಾನಾಂತ್ ವಚೊನ್ ತಾಚ್ಯಾ ಇಂಡಿಯನ್ ದೆವಾಂಚಿ ಮಜತ್ ಘೆತ್ಲಿ ಯಾ ಕಾಳ್ಯಾ ದೆಂವ್ಚಾರಾಂಕ್ ಮಾಗ್ಣಿಂ ಭೆಟಯ್ಲಿಂ ಮ್ಹಳ್ಳೆಂ ಹಾಂವ್ ನೆಣಾ. ಹಾಂವ್ ಇತ್ಲೆಂಚ್ ಜಾಣಾ ಕೀ, ಎಕ್ ಆಸ್ವೆಲ್ ಮ್ಹಜ್ಯೆ ಬಾಯ್ಲೆಚೊ ಪಾಟ್ಲಾವ್ ಕರುಂಕ್ ಲಾಗ್ಲೊ. ಆನಿ ಹಾಂವೆ ಕಿತೆಂಚ್ ನೆಣಾ ಆಸ್ಲೆಪರಿಂ ನಟನ್ ಕೆಲೆಂ. ಲೀಜಾನ್ ಸಾಂಗ್ ಲ್ಲೆಪರಿಂ ಹಾಚೊ ಪರಿಣಾಮ್ ಜಾಂವ್ಕ್ ಶುರು ಜಾಲೊ. ವಾಯ್ಲೆಟ್ ಪಿಶೆಂ ಜಾವ್ನ್ ಯೆತಾಲೆಂ ಆನಿ ಲೀಜಾ ವೆಳಾಕ್ ರಾಕ್ತಾಲೆಂ, ಆಪ್ಲೊ ಗುಪ್ತ್ ಹಾಸೊ ದಾಕವ್ನ್.

ಆಜ್ ಸಕಾಳಿಂ ಜೋಡ್ ಮಾರ್ಗಾಲಾಗಿಂ ಲೀಜಾ ಮ್ಹಾಕಾ ರಾಕೊನ್ ರಾವ್ ಲ್ಲೆಂ. ಹಾಂಗಾಸರ್ ಸುರ್ಯಾಚ್ಯಾ ಉಜ್ವಾಡಾಕ್ ತೆಂ ಎಕ್ ಸಾದೆಂ ಚೆಡುಂ ತಶೆಂ ದಿಸ್ತಾಲೆಂ.ತೆಂ ಸಾವ್ಳೆಂತ್ ಆಸ್ ಲ್ಲ್ಯಾ ವೆಳಾರ್ ಮಾತ್ರ್ ತಾಚೆ ಬದ್ಲಾನಾತ್ಲೆ ದೊಳೆ ಆನಿ ಕೆಸ್ ಹಾಂವ್ ಪಳೆಂವ್ಕ್ ಸಕ್ತಾಲೊಂ.

ತಾಣೆ ಮ್ಹಜೊ ಬಾವ್ಳೊ ಧರ್ಲೊ ಆನಿ ತ್ಯಾ ಬರ್ಫಾಚ್ಯಾ ಆನಿ ಉಜ್ಯಾಚ್ಯಾ ಸ್ಪರ್ಶಾಕ್ ಮ್ಹಜೆ ಪಾಟಿಚ್ಯೆ ಕಣ್ಯಾಂತ್ಲ್ಯಾನ್ ಶಿರ್ಶಿರೊ ಧಾಂವ್ಲೊ.

“ತುಜಿ ಬಾಯ್ಲ್ ಕಶಿ ಆಸಾ?”, ತೆಂ ಪುಸ್ಪುಸ್ಲೆಂ.

“ತಿತ್ಲಿ ಬರಿ ನಾ. ಕಾಲ್ ರಾತಿಂ ಆಮ್ಚ್ಯಾ ದಾರಾಲಾಗಿಂ ತಾಣೆ ಆಸ್ವೆಲಾಚ್ಯೆ ಮೆಟಾಂಚೆ ಗುರ್ತ್ ಪಳೆಲೆ. ಕಠಿಣ್ ಉಚಾಂಬಳ್ ಜಾಲಾಂ ತೆಂ.”

ಲೀಜಾ ಹಾಸ್ಲೆಂ.

“ತೆಂ ಚಿಂತಾ ತಿ ಮನ್ಜಾತ್ ಆಸ್ವೆಲಾಚೆಂ ರೂಪ್ ಘೆತ್ ಲ್ಲೊ ಮನಿಸ್ ಮ್ಹಣ್.”

ತೆಂ ಹಾಸ್ಲೆಂ.

“ತುವೆಂ ಮ್ಹಾಕಾ ಖರಿ ಗಜಾಲ್ ಸಾಂಗ್ಲ್ಯಾರ್ ಬೊರೆಂ ಆಸ್ ಲ್ಲೆಂ. ಡಾರ್ಲಿಂಗ್, ಆಸ್ವೆಲ್ ತಾಚ್ಯಾ ಪಾಟ್ಲ್ಯಾನ್ ಕಸೊ ವೆತಾ? ಖಂಯ್ ಥಾವ್ನ್ ಯೆತಾ ತೊ? ಹಿ ಮಾಂಡಾವಳ್ ತುಂವೆ ಕಶಿ ಕೆಲಿ?” ಹಾಂವೆ ವಿಚಾರ್ಲೆಂ. ತೆಂ ಹಾಸ್ಲೆಂ ಮಾತ್ರ್.

ಹಾಂವೆ ಸ್ವಾಸ್ ಸೊಡ್ಲೊ. “ಹಾಂವೆ ಚಡ್ ಸವಾಲಾಂ ವಿಚಾರುಂಕ್ ನಜೊ ಮ್ಹಣ್ ದಿಸ್ತಾ.”

“ತೆಂ ಖರೆಂ ಚಾರ್ಲ್ಸ್. ಆಮ್ಚಿ ಯೆವ್ಜಣ್ ಫಳಾಧಿಕ್ ಜಾವ್ನ್ ಯೆತಾ. ತೆಂ ಚಡ್ ಗರ್ಜೆಚೆಂ ನ್ಹಯ್? ಥೊಡ್ಯಾ ದಿಸಾಂನಿ ತೆಂ ಪುರ್ತೆಂ ಪಿಶೆಂ ಜಾತಲೆಂ ಆನಿ ತಾಕಾ ಪಯ್ಸ್ ಆಸ್ಪತ್ರೆಂತ್ ವರ್ನ್ ದವರ್ಚಿ ಗರ್ಜ್ ಪಡ್ತಲಿ. ಉಪ್ರಾಂತ್ ಆಮಿ ಸದಾಂಕಾಳ್ ಸಾಂಗಾತಾ ಉರ್ತಲ್ಯಾಂವ್, ನ್ಹಯ್?”

ಹಾಂವ್ ತಾಕಾಚ್ ಪಳೆಲಾಗ್ಲೊಂ. “ವ್ಹಯ್, ಪುಣ್ ಸಾಂಗ್ ಮ್ಹಾಕಾ, ಉಪ್ರಾಂತ್ ಕಿತೆಂ ಜಾತಲೆಂ?”, ಹಾಂವೆ ಸವಾಲ್ ಕೆಲೆಂ.

“ತುಜೆ ಬಾಯ್ಲೆಕ್ ಆಸ್ವೆಲ್ ಪಳೆಂವ್ಕ್ ಮೆಳ್ತಲೊ. ನೀಜ್ ಜಾವ್ನ್ ಪಳೆಂವ್ಕ್ ಮೆಳ್ತಲೊ. ತೆದಾಳಾ ತೆಂ ಆನಿಕಿ ಚಡ್ ಭಿಂಯೆತಲೆಂ. ಪಯ್ಲೆಂಚೆ ಪರಿಂಚ್ ತುಂ ಪಾತ್ಯೆಂವ್ಚೊನಾಂಯ್. ಉಪ್ರಾಂತ್ ತೆಂ ಅಧಿಕಾರಿಂಕ್ ಮೆಳ್ತಲೆಂ. ತೆಂ ಶಹರಾಕ್ ಯೆತಲೆಂ ಆನಿ ತಾಚೆರ್ ವಿಶ್ವಾಸ್ ಕರುಂಕ್, ತಾಚ್ಯಾ ಸಾಂಗ್ಣ್ಯಾಕ್ ಪಾತ್ಯೆಂವ್ಕ್ ಲೊಕಾಕ್ ಸಾಂಗ್ತಲೆಂ. ಸಕ್ಡಾಂ ಚಿಂತಲಿಂ ತೆಂ ಪಿಶೆಂ ಜಾಲಾಂ ಮ್ಹಣ್. ತುಕಾ ವಿಚಾರ್ತಾನಾ ತುಂ ಕಾಂಯ್ಚ್ ನೆಣಾಂಯ್. ಥೊಡ್ಯಾ ದಿಸಾಂನಿ ದಾಕ್ತೆರ್ ತಾಕಾ ತಾಪಾಸ್ತಲೊ.ತಾಚೆ ಉಪ್ರಾಂತ್...”

“ತೆಂ ಆಸ್ವೆಲಾಕ್ ಪಳೆತಲೆಂ? ನೀಜ್ ಜಾವ್ನ್ ರೂಪ್ ರೂಪ್ ಪಳೆತಲೆಂ?”, ಹಾಂವೆ ವಿಚಾರ್ಲೆಂ.

“ವ್ಹಯ್.”

“ಕೆದಾಳಾ?’

“ತುಕಾ ಖುಶಿ ಆಸ್ಲ್ಯಾರ್ ಆಜ್ ರಾತಿಂ.”

ಹಾಂವೆ ಸವ್ಕಾಸ್ ಮಾತೆಂ ವಯ್ರ್ ಸಕಯ್ಲ್ ಕೆಲೆಂ.

“ಪುಣ್ ತೆಂ ಆತಾಂ ಚಡ್ ಭಿಯೆಲಾಂ. ಫಾಡಿಂತ್ ಚಲೊಂಕ್ ತೆಂ ವೆಚೆಂ ನಾ.”

“ತಶೆಂ ಜಾಲ್ಯಾರ್ ಆಸ್ವೆಲ್ ತಾಕಾ ಮೆಳೊಂಕ್ ಕೆಬಿನಾಕ್ ಯೆತಲೊ.”

“ಬೋವ್ ಬೊರೆಂ, ಆಜ್ ಸಕಾಳಿಂ ಹಾಂವೆ ಮೆಟಾಂ ಪುಸುನ್ ಕಾಡ್ ಲ್ಲೆಪರಿಂ ಫಾಲ್ಯಾಂಯ್ ಕರ್ತಾಂ.”

“ಜಾಯ್ತ್, ಆನಿ ಆಜ್ ರಾತಿಂ ತುಂವೆ ಕೆಬಿನಾಂತ್ ರಾವಾನಾತ್ಲೆಂ ಬೊರೆಂ. ತುಂ ಮೊವಾಳ್ ಮನಿಸ್, ಚಾರ್ಲ್ಸ್. ತುಜೆ ಬಾಯ್ಲೆಚಿ ಭಿರಾಂತೆಚಿ ಬೊಬಾಟ್ ತುಜ್ಯಾನ್ ಆಯ್ಕೊಂಕ್ ಜಾಂವ್ಚಿನಾ.”

ಮ್ಹಾಕಾ ವಾಯ್ಲೆಟಾಚೆಂ ಭಿಂಯಾನ್ ಕಂಗಾಲ್ ಜಾಲ್ಲೆಂ ತೊಂಡ್, ತಾಚೆ ವಾಟಾರ್ಲೆಲೆ ದೊಳೆ, ಮುಕಾರ್ ಉಬೊ ಆಸ್ ಲ್ಲ್ಯಾ ಭಿರಾಂಕುಳ್ ಆಸ್ವೆಲಾಕ್ ಪಳೆವ್ನ್ ಕಿಂಕ್ರಾಟ್ ಮಾರ್ನ್ ಉಗ್ತೆಂ ಜಾಲ್ಲೆಂ ತೊಂಡ್ ಮ್ಹಜ್ಯಾ ದೊಳ್ಯಾಂ ಮುಕಾರ್ ಆಯ್ಲೆಂ.

ಹಾಂವೆ ಕ್ರೂರ್ ಹಾಸೊ ದಾಕಯ್ಲೊ. ಲೀಜಾಯ್ ಹಾಸ್ಲೆಂ. ಹಾಂವ್ ಪಯ್ಸ್ ಸರ್ತಾನಾ ತೆಂ ಆನಿಕೀ ಜ್ಯೋರಾನ್ ಹಾಸೊಂಕ್ ಲಾಗ್ಲೆಂ. ತೊ ಹಾಸೊ ಮ್ಹಾಕಾ ನಕ್ಲಿ, ಅಸಾಭಾವಿಕ್ ತಸೊ ದಿಸ್ಲೊ. ಉಪ್ರಾಂತ್ ಮ್ಹಜೆ ಮತಿಕ್ ಗೆಲೆಂ. ಲೀಜಾ ಖುದ್ಧ್ ಸಂಪೂರ್ಣ್ ಥರಾನ್ ಸ್ವಸ್ಥ್ ಬುದಿಚೆಂ ನ್ಹಯ್.

*******

[ಕಾಣ್ಯೆಚೊ ಮುಖ್ಲೊ ಭಾಗ್]

(- ವಾಲ್ಟರ್ ಲಸ್ರಾದೊ, ನಕ್ರೆ, ಎಪ್ರಿಲ್ 2016)

ವಾಲ್ಟರ್ ಲಸ್ರಾದೊ: ಕೊಂಕ್ಣೆಂತ್ ಆಸ್ಚ್ಯಾ ಭೋವ್ ಥೊಡ್ಯಾ ಅನುವಾದ್‌ಕಾರಾಂ ಪಯ್ಕಿಂತ್ಲೊ ಎಕ್ಲೊ. ’ಅಕ್ರಮ್ ಜಾಳ್’, ’ಚಲ್ಚೆಂ ಮೊಡೆಂ’, ’ಮೊರ್ನಾಚೊ ತಾಳೊ’, ’ಜುದಾಸಾಚಿ ಜುಗಾರ್’ ’ಮೊರ್ನಾಚೊ ತಾಳೊ’, ’ಮಾಫಿಯಾ ಪೊದೊರ್ನ್’ ಹಾಚ್ಯೊ ಪ್ರಮುಖ್ ಅನುವಾದಿತ್ ಕಾಣ್ಯೊ. ಕಾಣ್ಯಾಂ ಶಿವಾಯ್ ಲೇಕನಾಂ, ವಿಡಂಬನಾಂ ಸಯ್ತ್ ಬರಂವ್ಚೊ ಹೊ ಮುಂಬಯಾಂತ್ ವಸ್ತಿ ಕರುನ್ ಆಸಾ.