![](img/mdm51.jpg)
“ಬುಕಾಂಕ್ ಆದೇವ್ಸ್ ಮಾಗ್ಯಾಂ. ಗ್ಲಾಸಾಕ್ ಸ್ವಾಗತ್
ಕರ್ಯಾಂ. ಧರ್ ಘೆ ವೀರಾ” ಗ್ರೇಶನಾನ್ ಅಮಾಲ್ ಪೀವನ್
ಭರ್ಲ್ಲೊ ಗ್ಲಾಸ್ ವೀರಾ ಮುಖಾರ್ ಧರ್ಲೊ.
“ಕಂಗ್ರಾಚ್ಯುಲೇಶನ್ಸ್, ಚಿಯರ್ಸ್” ವೀರಾನ್ ಗ್ಲಾಸಾಕ್
ಘೊಟ್ ಮಾರ್ಲೊಚ್.
ತ್ಯಾ ಡಿಸ್ಕೊ ಕ್ಲಬ್ಬಾಂತ್ ಅಪಾಪ್ಲೆ ಗ್ಲಾಸ್ ಘೆವ್ನ್,
ನಾಚ್ ಅನಿಂ ಗಾಯಾನಾಂ ಸಂಗಿಂ ಕಾಲೇಜ್ ಸಂಪ್
ಲ್ಲ್ಯಾ ಖುಶೆನ್, ಗ್ರ್ಯಾಜುಯೇಶನ್ ಸಂಭ್ರಮುನ್
ಸಗ್ಳಿಂ ನಾಚೊನ್ ಅಸ್ಲಿಂ. ಗ್ರೇಶನಾನ್ ವೀರಾಚ್ಯಾ
ಪೆಂಕ್ಟಾಕ್ ವೆಡೊ ಘಾಲ್ನ್ ತಾಕಾ ಅಪ್ಣಾಂ ಸರ್ಶಿಂ
ವೊಡ್ಲೆಂ.
“ಈಸಿ, ಈಸಿ ಗ್ರೇಶನ್” ವೀರಾನ್ ಅಪ್ಲೊ ಪೀವನಾಚೊ ಗ್ಲಾಸ್
ಸಾಂಬಾಳ್ಳೊ.
“ಅಯ್ಚಿ ರಾತ್ ಉಡಾಸಾಭರಿತ್ ರಾತ್ ಕರ್ಯಾಂ” ವೀರಾಚ್ಯಾ
ಕಾನಾಂತ್ ಪುಸ್ಪುಸ್ಲೊ ಗ್ರೇಶನ್.
“ತುಂ ಕಿತೆಂ ಉಲಯ್ತಾಯ್ ಗ್ರೇಶನ್? ಹಾಂವ್ ಕೇವಲ್ ತುಜ್ಯಾ
ಒತ್ತಾಯೆಕ್ ಅಯಿಲ್ಲಿಂ, ಅತಾಂ ತುಜ್ಯಾ ಒತ್ತಾಯೆಕ್ ಪಿಯೆತೇ
ಅಸಾಂ. ಮ್ಹಾಕಾ ವೆಗ್ಗಿಂ ಘರಾ ವಚಜಯ್, ನಾಂ ತರ್ ಮ್ಹಜಿಂ
ಮಮ್ಮಿ- ಡ್ಯಾಡಿ ಮ್ಹಾಕಾ ಸೊದುನ್ ಯೆತಾಲಿಂ” ವೀರಾನ್
ಗ್ರೇಶನಾಕ್ ಪಯ್ಸ್ ಲೊಟ್ಲೆಂ.
“ಅರೆ ಯಾರ್, ಅಯ್ಚಿ ರಾತ್ ಅಮ್ಚಿ ರಾತ್. ಕೋಣ್ ಜಾಣಾಂ
ಅಮಿಂ ಅನಿಂ ಕೆದಾಳಾ ಸಾಂಗಾತಾ ಮೆಳ್ತೆಲ್ಯಾಂವ್ ಮ್ಹಣ್.”
ಗ್ರೇಶನ್ ಅಪ್ಲೆ ವೋಂಟ್ ವೀರಾಚ್ಯಾ ವೋಂಟಾ ಸರ್ಶಿಂ ಹಾಡ್ನ್
ಅಯ್ಲೊ.
“ಗ್ರೇಶನ್, ಕಂಟ್ರೋಲ್ ಯುವರ್ ಸೆಲ್ಫ್” ವೀರಾಚೊ ತಾಳೊ
ತಿಕ್ಕೆ ಗರಮ್ ಜಾಲ್ಲೊ ತ್ಯಾ ನಾಚ್ ಗಾಯಾನಾಂ ಮದೆಂ
ಕೊಣಾಯ್ಕಿ ಅಯ್ಕಾಲೊನಾಂ.
“ಕಮೋನ್ ಡಿಯರ್ ರಾಗಾರ್ ಜಾಯ್ನಾಕಾ. ತುಂ ಅಮ್ಚ್ಯಾ
ಕಾಲೇಜಿಚೆಂ ಸತಿ ಸಾವಿತ್ರಿ ಮ್ಹಣ್ ಸಗ್ಳಿಂ ಜಾಣಾಸಾತ್.
ಅಯ್ಚ್ಯಾ ರಾತಿಂ ತರೀ ಇತ್ಲೆಂ ಸಿರಿಯಸ್ ಜಾಯ್ನಾಕಾ.”
ಹಾಸ್ಲೊ ಗ್ರೇಶನ್. ಗ್ರೇಶನ್ ಗ್ರೇಸ್ತ್ ತಶೆಂಚ್
ಹ್ಯಾಂಡ್ಸಮ್ ಅಸ್ಲೊ. ವೀರಾ ಮದ್ಯಮ್ ವರ್ಗಾಚೆಂ
ಜಾಲ್ಲ್ಯಾನ್ ಹಾತಾಕ್ ಮೆಳಾನಾತ್ ಲ್ಲ್ಯಾ ದಾಕಾಂ ವಿಶಿಂ
ಸ್ವಪ್ಣೆಂವ್ಚೆ ಸಮಾ ನ್ಹಯ್ ಮ್ಹಣ್ ತೆಂ ಜಾಣಾಸ್ಲೆಂ.
ಕಾಲೇಜಿಂತ್ಲಿಂ ಸಗ್ಳಿಂ ಚೆಡ್ವಾಂ ಗ್ರೇಶನಾ ಖಾತಿರ್ ಜೀವ್
ದೀಂವ್ಕ್ ಯ್ ತಯಾರ್ ಅಸ್ಲಿಂ. ದೆಕುನ್ ತೆಂ ತಾಚ್ಯಾ
ಥಾವ್ನ್ ಪಯ್ಸ್ ಚ್ ರಾಂವ್ಚೆಂ ಬರೆಂ ಮ್ಹಣ್ ಚಿಂತ್ತಾಲೆಂ.
ಪೂಣ್ ತಾಚ್ಯಾ ತರ್ನ್ಯಾ ಕಾಳ್ಜಾಕ್ ಕೋಣ್ ಸಮ್ಜಾಯ್ತಾಲೆಂ.
ತಾಕಾಯ್ ಗ್ರೇಶನಾಚೊ ಸಾಂಗಾತ್ ಬರೊ ಲಾಗ್ತಾಲೊ. ಗ್ರೇಶನಾನ್
ಪಯಿಲ್ಲೆ ಪಾವ್ಟಿಂ ತಾಚ್ಯಾ ಸರ್ಶಿಂ ಯೇವ್ನ್ ತಾಕಾ
ಗ್ರಾಜುಯೆಶನ್ ಸಂಭ್ರಮುಂಕ್ ಸಾಂಗಾತ್ ದೀಂವ್ಕ್ ಒತ್ತಾಯ್
ಕರ್ತಾನಾ ತಾಣೆಂ ಘಡ್ಯೆನ್ ಒಪ್ಪಿಗೆ ದಿಲ್ಲಿ.
“ವೀರಾ, ಅಮಿಂ ಪೂರಾ ಫ್ರೆಂಡ್ಸಾನಿಂ ಸಾಂಗಾತಾ ಬಸೊನ್
ಅಯ್ಚಿ ರಾತ್ ಪಾಶಾರ್ ಕರ್ಚಿ ಮ್ಹಣ್ ಚಿಂತ್ಲ್ಯಾ. ಪ್ಲೀಜ್
ತುಜ್ಯಾ ಮಮ್ಮಿ ಡ್ಯಾಡಿಕ್ ಸಾಂಗೊನ್ ತೂಂಯ್ ಅಮ್ಚೆ ಸಂಗಿಂ
ರಾವ್.” ಗ್ರೇಶನಾನ್ ಪರಾತ್ತಿತಾನಾ ವೀರಾಕ್ಯೀ ರಾವ್ಯಾಂ
ಮ್ಹಣ್ ಭೊಗ್ಲೆಂ. ಏಕ್ ರಾತ್ ನ್ಹಯ್ ಗೀ ಫಾಲ್ಯಾಂ ಹಾಂವ್
ಖಂಯ್ ಗೀ, ತಿಂ ಖಂಯ್ ಗಿ?” ಚಿಂತ್ಲೆಂ ವೀರಾನ್.
“ಹಾಂವ್ ಡ್ಯಾಡಿಕ್ ಫೋನ್ ಕರ್ನ್ ಪರ್ಮಿಶನ್ ಕಾಣ್ಘೆವ್ನ್
ಯೆತಾಂ.” ಬ್ಯಾಗಾಂತ್ಲೆಂ ಫೋನ್ ಕಾಡ್ನ್ ತ್ಯಾ ಗಲಾಟ್ಯಾಕ್
ಫುಡ್ ಕರ್ನ್ ಭಾಯ್ರ್ ದಾಂವ್ಲೆಂ ವೀರಾ.
“ತುವೆಂ ರಾಂವ್ಚೆಂ ನಾಕಾ. ಥೊಡ್ಯಾ ವೆಳಾನ್ ಹಾಂವ್ ತುಕಾ
ಆಪವ್ನ್ ವರುಂಕ್ ಯೆತಾಂ.” ಡ್ಯಾಡಿನ್ ಖಡಕ್ಕ್ ಜಾಪ್ ದಿಲಿ.
“ಅಸೊಂದಿ ಸಾಯ್ಬಾ, ಏಕ್ ರಾತ್ ನೆಂ. ತಾಚೆ ಸಗಿಂ ತಾಚ್ಯಾ
ಕ್ಲಾಸಿಚಿಂ ಸಗ್ಳಿಂ ಅಸಾತ್ ನೆಂ. ತೆಂ ಎಕ್ಲೆಂಚ್ ನ್ಹಯ್
ನೆಂ. ರಾವೊಂದಿ.” ಮಮ್ಮಿ ಪಾಟ್ಲ್ಯಾನ್ ಥಾವ್ನ್ ಡ್ಯಾಡಿಕ್
ಸಮ್ಜಯ್ತಾಲಿ.
“ಜಾಯ್ತ್ ರಾವ್. ಸಕಾಳಿಂ ವೆಗ್ಗಿಂ ಬಸ್ಸ್ ಧರ್ನ್ ಘರಾ ಯೆ.
ಮ್ಹಾಕಾ ಕಾಮ್ ಅಸಾ. ತುಕಾ ಆಪವ್ನ್ ವರುಂಕ್ ಯೇಂವ್ಕ್
ಜಾಂವ್ಚೆಂ ನಾಂ” ಮನ್ ನಾತ್ಲ್ಯಾ ಮನಾನ್ ಡ್ಯಾಡಿನ್
ಪರ್ವಣ್ಗಿ ದಿಲ್ಲಿ.
“ಐ ಲವ್ ಯು ಡ್ಯಾಡಿ”. ಫೊನಾಕ್ ಉಮೊ ದಾಂಬುನ್ ಕ್ಲಬ್ಬಾ
ಬಿತರ್ ದಾಂವ್ಲೆಂ ವೀರಾ.
“ಕಿತೆಂ ಮ್ಹಳೆಂ ಡ್ಯಾಡಿನ್?” ಆತುರಿತ್ ಜಾಲೊ ಗ್ರೇಶನ್.
“ಜಾಯ್ತ್ ಮ್ಹಳೆಂ” ವೀರಾನ್ ತಕ್ಲಿ ಹಾಲಯ್ಲಿ.
“ಮ್ಹಾಕಾ ಗೊತ್ತುಚ್ ಅಸ್ಲೆಂ. ದೆಕುನ್ ತುಕಾ ಕೋಕ್ ಟೈಲ್
ಆರ್ಡರ್ ಕೆಲೆಂ. ಧರ್ ಪಿಯೆ” ಪೀವನಾಂತ್ ದಾಕ್ಟುಲಿ ಸತ್ರಿ
ರೊಂಬುಲ್ಲೊ ಗ್ಲಾಸ್ ತಾಣೆಂ ವೀರಾಕ್ ಒಡ್ಡಾಯ್ಲೊ. ಎಕಾ
ಪಾಟ್ಲ್ಯಾನ್ ಏಕ್ ಘೊಟ್ ಮಾರ್ನ್ ಗ್ಲಾಸ್ ವೆಗಿಂಚ್ ಕಾಬಾರ್
ಜಾಲೊ. ಗ್ಲಾಸಾ ವಯ್ರ್ ಗ್ಲಾಸ್ ಖಾಲಿ ಜಾತಾನಾ ಗ್ರೇಶನಾಚೆ
ಗಾಲ್ ವೀರಾಚ್ಯಾ ಗಾಲಾಂಕ್ ಚಿಡ್ಕಾಲ್ಲೆ. ತಾಚ್ಯಾ ಬಳ್ವಂತ್
ಬಾವ್ಳ್ಯಾಂನಿ ವೀರಾಚ್ಯಾ ಪೆಂಕ್ಟಾಕ್ ವೆಡೊ ಘಾಲ್ಲೊ. ನಾಚ್
ಅನಿಂ ಗಾಯನ್ ಅಜೂನ್ ಚಾಲು ಆಸ್ ಲ್ಲೆಂ. ವೀರಾಚ್ಯಾ ಪಾಂಯಾ
ಪಂದ್ಲಿ ದರ್ಣ್ ಹಾಲ್ತಾಲಿ. ತರೀ ತಾಚಿ ಕೂಡ್ ಗ್ರೇಶನಾಚ್ಯಾ
ವೆಂಗೆಂತ್ ನಾಚ್ತಾಲಿ. ವೀರಾಚ್ಯಾ ಜಡ್ ಜಾಲ್ಯಾ ತಕ್ಲೆನ್
ಗ್ರೇಶನಾಚ್ಯಾ ಖಾಂದ್ಯಾಚೊ ಅಸ್ರೊ ಘೆತ್ಲ್ಲೊ.
"ಚಲ್ ಹಾಂವ್ ತುಕಾ ರುಮಾಕ್ ವರ್ತಾಂ.” ಗ್ರೇಶನ್ ವೀರಾಚ್ಯಾ
ಕಾನಾಂತ್ ಪುಸ್ಪುಸ್ಲೊ.
ವೀರಾ ತಾಕಾ ಜಾಪ್ ದಿಂವ್ಚ್ಯಾ ಸ್ಥಿತೆರ್ ನಾತ್ಲೆಂ.
ರುಮಾಚೆಂ ಬೀಗ್ ಉಘಡ್ನ್ ವೀರಾಕ್ ಬೆಡ್ಡಾರ್ ನಿದಾವ್ನ್
ತಾಚೆ ಮೊಚೆ ನಿಕ್ಳಾಯ್ಲೆ ಗ್ರೇಶನಾನ್.
****
“ಮೇಡಂ ಬ್ರೆಕ್ ಫಾಸ್ಟ್” ಹೊಟೆಲ್ ಸ್ಟಾಫಾನ್ ಬ್ರೇಕ್
ಫಾಸ್ಟ್ ಮೆಜಾರ್ ದವರ್ತಾನಾ ವೀರಾಕ್ ಜಾಗ್ ಜಾಲಿ. ತಾಕಾ
ತಕ್ಲಿ ಉಕ್ಲುಂಕ್ ಜಾಲಿ ನಾಂ. ತಕ್ಲೆರ್ ಜಡ್ ಖಡ್ಪಿ ಫಾತರ್
ದವರ್ಲ್ಯಾ ಬರಿಂ ಭೊಗ್ತಾಲೆಂ. ಆಂಗ್ ಸಗ್ಳೆಂ ದುಖ್ತಾಲೆಂ.
ಕಾಲ್ ಪಿಯೆಲ್ಲೆಂ ಚಡ್ ಜಾಲ್ಲೆಂ ಮ್ಹಣ್ ತಾಚಿ ಸಗ್ಳಿ ಕೂಡ್
ಸಾಕ್ಸ್ ದಿತಾಲಿ.
“ವರಾಂ ಕಿತ್ಲಿಂ ಜಾಲಿಂ?” ವೀರಾನ್ ತಕ್ಲಿ ಉಕಲಿನಾಸ್ತಾಂ
ತ್ಯಾ ಸ್ತ್ರಿಯೆಕ್ ವಿಚಾರ್ಲೆಂ.
“ವರಾಂ ಧಾ ಜಾಲಿಂ ಮೇಡಮ್. ತುಮ್ಚ್ಯಾ ರುಮಾ ಥಾವ್ನ್ ರೂಮ್
ಸರ್ವಿಸ್ ಒರ್ಡರ್ ಅಯಿಲ್ಲೆಂ. ಬಾಗಿಲ್ ಉಗ್ತೆಂ ಅಸ್ಲೆಂ
ದೆಕುನ್ ಮೆಜಾರ್ ದವರ್ಯಾಂ ಮ್ಹಣ್ ಹಾಂವ್ ಬಿತರ್ ಅಯ್ಲಿಂ”.
ತಿ ಸ್ತ್ರೀ ನಮ್ರತಾಯೆನ್ ಉಲಯ್ಲಿ.
ಏಕ್ ಘಡಿ ತಕ್ಲಿ ದಾಂಬುನ್ ಧರ್ನ್ ಕಾಲ್ಚಿ ರಾತ್ ಉಡಾಸಾಕ್
ಹಾಡ್ಚೆಂ ಪ್ರಯತ್ನ್ ಕೆಲೆಂ ವೀರಾನ್. ಪೂಣ್ ತಾಚೆಂ
ಪ್ರಯತ್ನ್ ನಿರ್ಫಳ್ ಜಾಲ್ಲೆಂ. ಗ್ರೇಶನಾನ್ ರುಮಾಕ್
ಹಾಡ್ನ್ ಪಾಯಿಲ್ಲೆಂ ಮಾತ್ರ್ ಉಡಾಸಾಕ್ ಅಯ್ಲೆಂ. ಉಪ್ರಾಂತ್
ಕಿತೆಂ ಜಾಲೆಂ ತೆಂ ನೆಣಾಂ. ಭೊಂವ್ತಿ ಪಳೆಯ್ತಾನಾ ತಾಕಾ
ಗ್ರೇಶನ್ ದಿಸ್ಲೊ ನಾಂ. ಮ್ಹಾಕಾ ರುಮಾಕ್ ಪಾವ್ನ್ ತೊ
ಫ್ರೆಂಡ್ಸಾ ಸಾಂಗಾತಾ ಗೆಲಾಸ್ತಾಲೊ ಚಿಂತ್ಲೆಂ ವೀರಾನ್. ತೊ
ಮೆಳ್ಳ್ಯಾರ್ ತಾಚೆ ಸರ್ಶಿಂ ಭೊಗ್ಸಾಣೆಂ ಮಾಗಜಯ್. ಹಾಂವ್
ತಾಂಚೆ ಸಂಗಿಂ ವಚೊಂಕ್ನಾ ದೆಕುನ್ ತಾಕಾ ಮಸ್ತ್ ಬೆಜಾರ್
ಜಾಲಾಸ್ತಲೆಂ. ವೀರಾನ್ ಹಳ್ತಾರ್ ಉಟೊನ್ ಬಾತ್ ರೂಮಾ
ಕುಶಿನ್ ಮೆಟಾಂ ಕಾಡ್ಲಿಂ.
ಖಾಂವ್ಚೆ ಮನ್ ನಾತ್ಲ್ಯಾರೀ ಪೊಟಾಕ್ ಭುಕ್ ಲಾಗ್ತಾಲಿ
ದೆಕುನ್ ಕುಡಿಚಿ ನಿತಾಳಾಯ್ ಸಂಪವ್ನ್ ನಾಸ್ಟೊ ತಿರ್ಸಿಲೊ
ವೀರಾನ್. ಬ್ಯಾಗ್ ಉಸ್ತಿತಾನಾ ಬ್ಯಾಗಾಂತ್ ಪೆನಡೋಲಾಚಿ
ಪೆಕೆಟ್ ದಿಸ್ಲಿ. ದೋನ್ ಪೆನಡೋಲ್ ತಾಳ್ಯಾಕ್ ಉಡವ್ನ್
ಉದಾಕ್ ಪಿಯೆಲೆಂ ತೆಂ. ಕೇಸ್ ಉಗವ್ನ್, ತೊಂಡಾಕ್ ಇಲ್ಲೆಂ
ಮೇಕಪ್ ಸಾರವ್ನ್ ರುಮಾ ಥಾವ್ನ್ ಬಾಯ್ರ್ ಅಯ್ಲೆಂ ವೀರಾ.
“ಗುಡ್ ಮೋರ್ನಿಂಗ್ ಮೇಡಂ” ರಿಸೆಪ್ಶನಿಸ್ಟಾನ್ ವಂದಿಲೆಂ.
“ಗುಡ್ ಮೋರ್ನಿಂಗ್” ಕಶ್ಟಾನಿಂ ವೋಂಟ್ ಹಾಲಯ್ಲೆ ವೀರಾನ್.
“ರುಮಾಚೆಂ ಬಿಲ್ಲ್?” ಬ್ಯಾಗಾ ಬಿತರ್ ಹಾತ್ ಘಾಲ್ನ್
ವ್ಯಾಲೆಟ್ ಸೊದಿಲಾಗ್ಲೆಂ ವೀರಾ.
“ಸಗ್ಳೆಂ ಪೇಮೆಂಟ್ ಜಾಲಾಂ ಮೇಡಮ್. ತುಮಿಂ ವಚ್ಯೆತ್”
ರಿಸೆಪ್ಶನಿಸ್ಟಾನ್ ಸಾಂಗ್ತಾನಾ ವೀರಾಕ್ ಖುಶಿ ಜಾಲಿ.
ವೀರಾಚ್ಯಾ ವ್ಯಾಲೆಟಾಂತ್ ಮೆಜುನ್ ಥೊಡೆ ಮಾತ್ರ್
ಶೆಂಬೊರಾಂಚೆ ನೋಟ್ ಅಸ್ಲೆ. ಬಿಲ್ಲ್ ಕಿತ್ಲೆಂ ಜಾತಾಲೆಂ
ಮ್ಹಳ್ಳಿ ಖಂತ್ ತಾಕಾ ದೊಸ್ತಾಲಿ.
“ಗ್ರೇಶನ್ ದೇವ್ ಬರೆಂ ಕರುಂ” ಮತಿಂತ್ಚ್ ಗ್ರೇಶನಾಚೊ
ಉಪ್ಕಾರ್ ಬಾವುಡ್ನ್ ಬಸ್ಸ್ ಸ್ಟೋಪಾ ಕುಶಿನ್ ಮೆಟಾಂ
ಕಾಡ್ಲಿಂ ವೀರಾನ್.
****
“ಮಮ್ಮಿ” ಘರಾ ಬಿತರ್ ರಿಗ್ಲ್ಲೆಂಚ್ ಉಲೊ ಮಾರ್ಲೊ
ವೀರಾನ್.
“ಅಯ್ಲೆಂಯ್ಗಿ ಪುತಾ. ಕಾಲ್ಚಿ ರಾತ್ ಕಶಿ ಅಸ್ಲಿ?” ವೀರಾಚಿ
ಮಮ್ಮಿ ರಾಂದ್ಚ್ಯಾ ಕುಡಾ ಥಾವ್ನ್ಚ್ ಉಲಯ್ಲಿ.
“ಬರಿ ಅಸ್ಲಿ ಮಮ್ಮಿ. ಮ್ಹಾಕಾ ಮಸ್ತ್ ಪುರೊ ಜಾಲಾಂ, ಹಾಂವ್
ನಿದೊಂಕ್ ವೆತಾಂ. ಮ್ಹಾಕಾ ಜೆವ್ಣಾಕ್ ಉಟಯ್ನಾಕಾ ಪ್ಲೀಜ್”
ಅವಯ್ಚ್ಯಾ ಜಾಪಿಕ್ ರಾಕನಾಸ್ತಾಂ ಬೆಡ್ ರೂಮಾ ಕುಶಿನ್
ಚಮ್ಕಾಲೆಂ ವೀರಾ. ತೊ ದೀಸ್ ಅನಿಂ ತಿ ರಾತ್ ತಾಣೆಂ
ಬೆಡ್ಡಾರ್ಚ್ ಖರ್ಚಿಲಿ. ಕಾಲೇಜ್ ಸಂಪೊನ್ ಕಾಮಾಚ್ಯಾ
ಸೊದ್ನೆರ್ ಅಸ್ಚ್ಯಾ ತಾಕಾ ದುಸ್ರ್ಯಾ ಖಂಚ್ಯಾಚಿಚ್ ಫಿಕಿರ್
ನಾತ್ಲಿ. ಕುಡಿಂತ್ ಅಜೂನ್ ಪುರಾಸಣ್ ಅಸ್ಲಿ. ತಕ್ಲಿಯ್
ಸಂಪೂರ್ಣ್ ಸಾರ್ಕಿ ಜಾವ್ನಾತ್ಲಿ.
“ಅನಿಂ ಮುಖಾರ್ ಹಾಂವ್ ಅಮಾಲ್ ಪಿಯೊಣೆಂ ಪಿಯೆಂವ್ಚಿಂ ನಾಂ.
ಮ್ಹಜೆ ದೋನ್ ದೀಸ್ ಪಾಡ್ ಜಾಲೆ” ಅಪ್ಣಾಕ್ಚ್ ದುರ್ಸೊನ್
ಬ್ರಶ್ಶಾಕ್ ಪೇಸ್ಟ್ ಲಾಯ್ಲೊ ವೀರಾನ್.
ದೀಸ್ ವೆತಾಂ ವೆತಾಂ ತಾಕಾ ಕುಡಿಂತ್ ಕಿತೆಂಗೀ ಬದ್ಲಾವಣ್
ದಿಸೊನ್ ಅಯ್ಲಿ. ಮಹಿನ್ಯಾ ಮಹಿನ್ಯಾಕ್ ವೆಳಾರ್ ಜಾಂವ್ಚೊ
ರಗ್ತಾಸ್ರಾವ್ ಪಾಟ್ಲ್ಯಾ ದೋನ್ ತೀನ್ ಮಹಿನ್ಯಾ ಥಾವ್ನ್
ಜಾಂವ್ಕ್ ನಾತ್ಲೊ. ತಾಕಾ ಮಿಸ್ತೆರ್ ಸಮ್ಜಾಲೊ ನಾಂ.
ಮಮ್ಮಿ- ಡ್ಯಾಡಿಕ್ ಸಾಂಗ್ಚ್ಯಾ ಪರಿಸ್ಥಿತೆರ್ ತೆಂ
ನಾತ್ಲೆಂ. ದುಸ್ರಿ ವಾಟ್ ನಾಸ್ತಾಂ ತೆಂ ಗೈನೆಕೋಲೊಜಿ
ಕ್ಲಿನಿಕಾಚಿ ಮೆಟಾಂ ಚಡ್ಲೆಂ.
“ತುಂ ಅವಯ್ ಜಾಂವ್ಚ್ಯಾರ್ ಅಸಾಯ್” ಡಾ! ಶಾಲಿನಿಚಿಂ
ಉತ್ರಾಂ ಅಯ್ಕೊನ್ ವೀರಾ ಶಿರಿಂ ಚುಕ್ಲೆಂ. ತೀನ್ ಮಹಿನ್ಯಾಂ
ಥಾವ್ನ್ ಅಪ್ಲ್ಯಾ ಕುಡಿಂತ್ ಜಾಲ್ಲ್ಯಾ ಬದ್ಲಾವಣೆಚಿ ಜಾಪ್
ತಾಕಾ ಆಜ್ ಮೆಳ್ಲ್ಲಿ.
![](img/mdm52.jpg)
“ತುವೆಂ ಚುಕಾನಾಸ್ತಾಂ ಸ್ಕ್ಯಾನಿಂಗಾಕ್ ಯೇಜಯ್
ಪಡ್ತಾಲೆಂ.” ಡಾ! ಶಾಲಿನಿನ್ ಮುಂದರಿಲೆಂ. ವೀರಾ
ತಕ್ಲಿ ಹಾಲವ್ನ್ ಕ್ಲಿನಿಕಾ ಥಾವ್ನ್ ಬಾಯ್ರ್ ದಾಂವೊನ್
ಅಯ್ಲೆಂ. ಥಂಯ್ಚ್ ಆಸ್ಲ್ಲ್ಯಾ ಬಾಂಕಾರ್ ಕುಸ್ಕಾಲೆಂ.
ತಾಕಾ ಉಡಾಸ್ ಅಯ್ಲೊ ತ್ಯಾ ರಾತಿಚೊ. ತರ್ ಗ್ರೇಶನಾನ್ ತ್ಯಾ
ರಾತಿಂ ಹಾಂವ್ ಮತಿರ್ ನಾತ್ಲ್ಯಾ ವೆಳಾ ಮ್ಹಜೊ ಫಾಯ್ದೊ
ಉಟಯ್ಲೊ? ತಾಣೆಂ ಖಂಡಿತ್ ಜಾವ್ನ್ ಮ್ಹಜ್ಯಾ ಪೀವನಾಂತ್
ಕಿತೆಂಯ್ ಭರ್ಸಿಲ್ಲೆಂ ಜಾಯ್ಜಯ್. ನಾಂ ತರ್ ಹಾಂವ್ ಖಂಡಿತ್
ತ್ಯಾ ಸ್ಥಿತೆಕ್ ಪಾವ್ತಿಂ ನಾಂ. ತಾಚಿಂ ದಡಮಾಂ
ಅಡ್ಚ್ಚಾಲಿಂ. ಮುಟಿ ಆಂರ್ದಾಲ್ಯೊ. ಮುಖಾರ್ ಮೆಳ್ಳ್ಯಾರ್
ತಾಕಾ ಜಿವೆಶಿಂಚ್ ಮಾರ್ತಲಿಂ. ಕಾಳಿಜ್ ತಾಚೆಂ ವೇಗಾನ್
ಉಡ್ತಾಲೆಂ. ರಾಗ್ ತಾಚೊ ಝರಿ ರುಪಾರ್ ದೊಳ್ಯಾಂನಿ
ದೆಂವ್ತಾಲೊ. ಲೋಕಾಕ್ ಅನಿಂ ಘರ್ಚ್ಯಾಂಕ್ ಹಿ ವಿಶಯ್
ಕಳ್ಚ್ಯಾ ಪಯ್ಲೆಂ ಹಾಂವೆಂ ತುರ್ತ್ ಮೇಟ್ ಕಾಡಿಜಯ್.
ಕಿತೆಂಗಿ ನಿರ್ದಾರ್ ಘೆವ್ನ್ ಉಟ್ಲೆಂ ತೆಂ. ಘರಾ
ಪಾವ್ಲ್ಲೆಂಚ್ ಕಂಪ್ಯೂಟರ್ ಉಗ್ತೆಂ ಕರ್ನ್ ಅಬೋರ್ಶನಾಚ್ಯೊ
ಗುಳಿಯೊ ಆನ್ ಲೈನಾರ್ ಸೊದುಂಕ್ ಲಾಗ್ಲೆಂ. ಸೈಡ್ ಇಫೆಕ್ಟ್
ಹೈಪೊ ಪರ್ಫ್ಯೂಶನ್ (ಕುಡಿಚ್ಯಾ ಇತರ್ ಬಾಗಾಂಕ್ ರಗ್ತ್
ಸಂಚಾರ್ ಉಣೊ ಜಾಂವ್ಚೊ) ಮ್ಹಣ್ ದಾಟ್ ಅಕ್ಷರಾಂನಿ ಬರವ್ನ್
ಅಸ್ಲ್ಯಾರೀ ತಾಣೆಂ ತ್ಯಾ ವಿಶ್ಯಾಂತ್ ಚಡ್ ಗುಮನ್
ದಿಲೆಂನಾಂ. ಅಪ್ಲ್ಯಾ ಇಶ್ಟಿಣಿಚೊ ಎಡ್ರೆಸ್ ದೀವ್ನ್
ಗುಳಿಯೊ ಹಾಡಯ್ಲ್ಯೊ. ಗುಳಿಯೊ ಘೆವ್ನ್ ದುಸ್ರ್ಯಾಚ್ ದಿಸಾ
ರಗ್ತಾಸ್ರಾವ್ ಆರಂಭ್ ಜಾಲೊ. ರಾವ್ಲೊಚ್ ನಾಂ. ಅದೀಕ್
ರಗ್ತಾಸ್ರಾವಾನ್ ತಕ್ಲಿ ಘುವೊನ್ ಪಡ್ಲ್ಲ್ಯಾ ವೀರಾಕ್
ತಾಚ್ಯಾ ಮಮ್ಮಿ- ಡ್ಯಾಡಿನ್ ತುರಂತ್ ಆಸ್ಪತ್ರೆಕ್ ದಾಖಲ್
ಕೆಲೆಂ. ವೀರಾಕ್ ಎಮರ್ಜೆನ್ಸಿ ಅಪರೇಶನಾ ಖಾತಿರ್ ತುರ್ತಾನ್
ಅಪರೇಶನ್ ಥಿಯೆಟರಾಕ್ ವರಿಜಯ್ ಪಡ್ಲೆಂ. ವೀರಾಕ್ ಮತ್
ಚುಕಯ್ನಾಸ್ತಾಂ ಪಾಟಿಕ್ ಇಂಜೆಕ್ಶನ್ ದೀವ್ನ್ ಪೆಂಕ್ಟಾ
ಸಕಯ್ಲ್ ಮಾತ್ರ್ ನಿರ್ಜೀವ್ ಕೆಲ್ಲ್ಯಾನ್ ತಾಕಾ
ದಾಕ್ತೆರಾನ್ ಉಲಂವ್ಚೆಂ ಸಗ್ಳೆಂ ಅಯ್ಕಾತಾಲೆಂ. ಅಪಾಪಿಂ
ತಾಚ್ಯಾ ದೊಳ್ಯಾಂನಿ ದುಖಾಂ ದೆಂವ್ಲಿಂ.
“ಪಂಚ್ವೀಸ್ ವರ್ಸಾಂಚ್ಯಾ ಪ್ರಾಯೆರ್ ಜರ್ ಹ್ಯಾ ಚಲಿಯಚಿ
ಗರ್ಬಾಪೊತಿ ಕಾಡ್ಲಿ ತರ್, ತಾಚೆಂ ಮುಖ್ಲೆಂ ಜಿವಿತ್ ಕಿತೆಂ
ಜಾಯ್ತ್? ಜರ್ ಗರ್ಬಾಪೊತಿ ಕಾಡಿನಾಂ ತರ್ ತೆಂ ಚಡ್ ವೇಳ್
ವಾಂಚೊಂಕ್ ಸಕ್ಚೆಂ ನಾಂ. ಹಾಂವ್ ಅನ್ಯೇಕಾ ಕನ್ಸಲ್ಟೆಂಟಾ
ಕಡೆ ತಾಚಿ ಅಭಿಪ್ರಾಯ್ ವಿಚಾರ್ತಾಂ.” ಡಾ! ವಿಮಲಾನ್
ಅಪರೇಶನಾಚಿ ಮುಸ್ತಾಯ್ಕಿ ಕಾಡ್ನ್ ಕೊಣಾಕಡೆಗೀ ಫೊನಾರ್
ಉಲಂವ್ಚೆಂ ವೀರಾಕ್ ಅಯ್ಕಾಲೆಂ. ತಾಚ್ಯಾ ಮುಖಾರ್ ಪಡ್ದೊ
ಅಸ್ಲ್ಯಾನ್ ತೆಂ ಕಿತೆಂಚ್ ಪಳೆಂವ್ಕ್ ಸಕ್ಲೆಂ ನಾಂ. ತಾಚೆಂ
ಕಾಳಿಜ್ ಜ್ಯೋರಾನ್ ಉಡೊಂಕ್ ಲಾಗ್ಲೆಂ. ವೀರಾಚ್ಯಾ
ಕಾಳ್ಜಾಕ್ ಶಿರ್ಕಾಯಿಲ್ಲೆಂ ಮೆಶಿನ್ ಯ್ ತಿಕ್ಕೆ ಜೋರಾನ್
ಕಿಂಕ್ರಾಟುಂಕ್ ಲಾಗ್ಲೆಂ. ದೆಕುನ್ ದಾಕ್ತೆರಾನ್ ತಾಕಾ
ನಿದೆಚೆಂ ಇಂಜೆಕ್ಶನ್ ದೀವ್ನ್ ವಿರಾಮ್ ಕರುಂಕ್ ಸಾಂಗ್ಲೆಂ.
ಜಾಗ್ ಜಾತಾನಾ ತೆಂ ಐ. ಸಿ. ಯುಂತ್ ಅಸ್ಲೆಂ.
“ಗುಡ್ ಇವ್ನಿಂಗ್ ವೀರಾ” ಡಾ! ವಿಮಲಾ ತಾಚೆ ಸಾಮ್ಕಾರ್ ಉಬಿ
ಅಸ್ಲಿ.
“ತುಜಿ ಗರ್ಬಾಪೊತಿ ಸೆಪ್ಟಿಕ್ ಜಾಲ್ಲ್ಯಾನ್ ತುಕಾ
ವಾಚಂವ್ಚ್ಯಾ ಖಾತಿರ್ ತುಜಿ ಗರ್ಬಾಪೊತಿ ಕಾಡಿಜಯ್ ಪಡ್ಲಿ.
ಐ ಯಾಮ್ ರಿಯಲಿ ಸೊರ್ರಿ.” ಅಪ್ಣೆಂ ಕೆಲ್ಲ್ಯಾ ಚುಕಿಕ್ ಡಾ!
ವಿಮಲಾನ್ ಬೊಗ್ಸಾಣೆಂ ಮಾಗ್ತಾನಾ ವೀರಾಕ್ ತಾಚಿಚ್ ಲಜ್
ದಿಸ್ಲಿ.
“ತಿತ್ಲೆಂಚ್ ನ್ಹಯ್. ತುವೆಂ ಘೆತ್ ಲ್ಲ್ಯಾ ಗುಳಿಯೆಚ್ಯಾ
ಸೈಡ್ ಇಫೆಕ್ಟಾನ್ ರಗ್ತಾ ಸಂಚಾರ್ ತುಜ್ಯಾ ಪಾಂಯಾಂಚ್ಯಾ
ತುದಿಯೆಕ್ ಪಾವಾನಾಸ್ತಾಂ ತುಜ್ಯಾ ಪಾಂಯಾಂಚಿಂ ಬೊಟಾಂ
ಕಾಳಿಂ ಜಾಲ್ಯಾಂತ್. ಅಮಿಂ ತುಜೆ ಪಾಂಯ್ ಉರಂವ್ಚೆ ಪ್ರಯತನ್
ಕರ್ತಾಂವ್. ಪೂಣ್ ಕಿತೆಂಚ್ ದ್ರಡ್ ಸಾಂಗೊಂಕ್ ಜಾಯ್ನಾ.
ಜರ್ ಅಮ್ಚೆಂ ಪಯತ್ನ್ ಸುಫಳ್ ಜಾಯ್ನಾ ತರ್ ತುವೆಂ ತುಜೆ
ದೋನೀ ಪಾಂಯ್ ಹೊಗ್ಡಾಯ್ಜೆ ಪಡ್ತಾಲೆ.” ಡಾ! ವಿಮಲಾನ್
ಹಳ್ತಾರ್ ವೀರಾಚ್ಯಾ ಪಾಂಯಾವಯ್ಲಿ ವೋಲ್ ವೊಂದ್ವಾಯ್ಲಿ.
ತಾಚ್ಯಾ ದೋನೀ ಪಾಂಯಾಚಿಂ ಬೊಟಾಂ ರಾಂದ್ಣಿಂತ್
ಬಾಜ್ಲ್ಲ್ಯಾ ಕಣ್ಗೆ ಬರಿಂ ಕಾಳಿಂ ಜಾಲ್ಲಿಂ. ಮುಖ್ಲೆಂ
ದ್ರಶ್ಶ್ಯ್ ಪಳೆಂವ್ಕ್ ವೀರಾ ಸಕ್ಲೆಂ ನಾಂ. ತಾಣೆಂ ದೊಳೆ
ದಾಂಪ್ಲೆ. ಜ್ಯೊರಾನ್ ಕಿಂಕ್ರಾಟ್ಯಾಶೆಂ ಭೊಗ್ಲೆಂ ತಾಕಾ.
ಪೂಣ್ ತೊಂಡಾರ್ ಅಸ್ಲ್ಯಾ ಆಕ್ಶಿಜನ್ ಮಾಸ್ಕಾನ್ ತೊಂಡ್
ಉಘಡುಂಕ್ ಅಡಾಯಿಲ್ಲೆಂ.
“ತುಜ್ಯಾ ಮಮ್ಮಿ- ಡ್ಯಾಡಿಕ್ ಆಪಯ್ಜೆಗೀ” ಡಾ!ವಿಮಲಾನ್
ವಿಚಾರ್ಲೆಂ. ವೀರಾನ್ ನಾಕಾ ಮ್ಹಣ್ಚ್ಯಾ ಬಾಶೆನ್ ತಕ್ಲಿ
ಹಾಲಯ್ಲಿ. ಮಮ್ಮಿ- ಡ್ಯಾಡಿಚ್ಯಾ ಸವಾಲಾಂಕ್ ಜಾಪಿ ತಾಚ್ಯಾ
ಕಡೆ ನಾತ್ಲ್ಯೊ.
“ಬರೆಂ ತರ್. ಹಾಂವ್ ತುಕಾ ಪಳೆಂವ್ಕ್ ಫಾಲ್ಯಾಂ ಯೆತಾಂ”
ವೀರಾಚ್ಯಾ ಭುಜಾಂಕ್ ಥಾಪುಡ್ನ್ ಡಾ! ವಿಮಲಾ ಥಂಯ್ಚೆಂ
ಚಲ್ಲೆಂ.
ಫುಲೊಂಕ್ ಅಯ್ತೆಂ ಜಾಲ್ಲೆಂ ವೀರಾಚೆಂ ಜಿವಿತ್ ತ್ಯಾ ಏಕಾ
ರಾತಿನ್ ಕಿಸ್ಪರೊನ್ ಉಡಯಿಲ್ಲೆಂ. ಹಾಂವೆಂ ಅನಿಂ ವಾಂಚೊನ್
ಕಿತೆಂ ಫಾಯ್ದೊ? ವೀರಾನ್ ಖಠೋರ್ ನಿರ್ದಾರ್ ಘೆತ್ಲೊ.
ಮಧ್ಯಾನ್ ರಾತಿಕ್ ಐ ಸಿ ಯುಂತ್ ಚಡ್ ಸ್ಟಾಫಾಂ ನಾತ್ಲ್ಲೊ
ವೇಳ್ ಪಳೆವ್ನ್ ಅಪ್ಲ್ಯಾ ಶಿರಾಂಕ್ ತೊಪ್ಲ್ಲಿ ಸುವಿ
ತಾಣೆಂ ಹಳೂ ಭಾಯ್ರ್ ವೊಡ್ಲಿ. ತಾಣೆಂ ನಿದ್ಲ್ಲ್ಯಾ
ಖಟ್ಲ್ಯಾರ್ ರಗ್ತಾಚಿ ಶಿಂದಡ್ ಜಾಲಿ. ಅಪ್ಲ್ಯಾ ಮುಖಮಳಾ
ವಯ್ಲೆಂ ಮಾಸ್ಕ್ ಕಾಡ್ನ್ ದರ್ಣಿರ್ ಉಡಯ್ಲೆಂ.
ವೆಂಟಿಲೇಟರಾಚೊ ಆವಾಜ್ ಅಯ್ಕೊನ್ ನರ್ಸ್ ಅನಿಂ ದಾಕ್ತೆರ್
ದಾಂವೊನ್ ಅಯ್ಲಿಂ. ಶಿರ್ ದಾಂಬುನ್ ಧರ್ನ್ ಒಕ್ಶಿಜನ್
ಮಾಸ್ಕ್ ಪಾಟಿಂ ತೊಂಡಾರ್ ಶಿರ್ಕಾವ್ನ್ ವೀರಾಚೆಂ ಹರ್ದೆಂ
ದಾಂಬುಂಕ್ ಲಾಗ್ಲಿಂ. ಪೂಣ್ ವೀರಾನ್ ಎದೊಳ್ಚ್ ಹ್ಯಾ
ಸಂಸಾರಾಕ್ ಆದೇವ್ಸ್ ಮಾಗ್ ಲ್ಲೊ. ತಿ ಏಕ್ ರಾತ್ ವೀರಾಚೆಂ
ಜಿವಿತ್ಚ್ ಅಂತ್ಯ್ ಕರುಂಕ್ ಪಾವ್ಲ್ಲಿ.
*** - ***
- ಮೊನಿಕಾ ಮತಾಯಸ್
[ಜ್ಯೂನ್, 2024] |