[ಕಳವ್ಣಿ:] ದುಬಾಯಾಂತ್ ಕೊಂಕ್ಣಿ ನಾಟಕ್ - " ಫಾಲ್ಯಾಂ ಪಳೆಯಾಂ"

ದುಬಾಯಾಂತ್ಲ್ಯಾ ಕೊಂಕ್ಣಿ ಪರ್ಜೆಕ್ ಖುಶೆಚಿ ಖಬರ್. ಆರ್ವಿಲ್ಯಾ ಮಹಿನ್ಯಾಂನಿ ಹ್ಯಾ ಪ್ರದೇಶಾಂತ್ ಕೊಂಕ್ಣಿ ಕಾರ್ಯಾಂಚಿ ಸುಖಿದಾಡ್ ಪಡ್ಲ್ಲ್ಯಾ ವಗ್ತಾ "ಕೊಂಕ್ಣಿ ಹಾಸ್ಯ್ ರಾಯ್ ಕುಂವರ್" ಪ್ರದೀಪ್ ಬರ್ಬೊಜಾ ಪಾಲಡ್ಕಾ ಆಪ್ಲ್ಯಾ ಸಾಂಗಾತ್ಯಾಂಕ್ ಘೇವ್ನ್ ಆಯ್ಲಾ ಆಪ್ಲೊ ನವೊಚ್ ನಾಟಕ್ "ಫಾಲ್ಯಾಂ ಪಳೆಯಾಂ". ದುಬಾಯ್ ಸೈಂಟ್ ಮೇರಿಸ್ ಇಗರ್ಜೆಚೆಂ ಮಂಗ್ಳೂರಿಯನ್ ಕೊಂಕ್ಣಿ ಸಂಘಟನ್ "ಸೈಂಟ್ ಮೇರಿಸ್ ಮಂಗ್ಳೂರಿಯನ್ ಕಮ್ಯುನಿಟಿ" ಹಾಂಚ್ಯಾ ಪ್ರಾಯೋಜಕ್ಪಣಾಖಾಲ್ ಜಾಂವ್ಚೊ ಹೊ ನಾಟಕ್ ದುಬಾಯ್ ಸೈಂಟ್ ಮೇರಿಸ್ ಫಿರ್ಗಜೆಚ್ಯಾ ಉಗ್ತ್ಯಾ ಮೈದಾನಾಂತ್ ಪೊರ್ವಾಂ ಸುಕ್ರಾರಾ ಆಕ್ಟೊಬರಾಚ್ಯಾ 27 ತಾರಿಕೆರ್ ಜುಸ್ತ್ 07:30 ವ್ಹರಾರ್ ಖೆಳೊನ್ ದಾಖಯ್ತೆಲೆ.

ದುಬಾಯ್ ಸೈಂಟ್ ಮೇರಿಸ್ ಫಿರ್ಗಜೆಚ್ಯಾ ಕೊಂಕ್ಣಿ ಸಮುದಾಯಾಚೊ ಪ್ರತಿನಿಧಿ ಜಾವ್ನ್ ಬಾಪ್ ರೊಬರ್ಟ್ ಲಸ್ರಾದೊ ಆಯಿಲ್ಲ್ಯಾ ಉಪ್ರಾಂತ್ ಕೊಂಕ್ಣೆಕ್ ದುಬಾಯಾಂತ್ ಪರ್ತೆಕ್ ನವೆಂ ರೂಪ್ ಆಯ್ಲಾಂ.ಕೊಂಕ್ಣೆಕ್ ಆಪ್ಲೊ ಸಂಪೂರ್ಣ್ ಪಾಟಿಂಬೊ ಬಾಪ್ ರೊಬರ್ಟ್ ಲಸ್ರಾದೊನ್ ದಿಲ್ಲ್ಯಾನ್ ಬೊರ್ಯಾಂಕತ್ಲಿಂ ಬೊರಿಂ ಲಿತುರ್ಜಿಕ್ ಆನಿ ಸಾಂಸ್ಕ್ರತಿಕ್ ಕಾರ್ಯಿಂ ಇಗರ್ಜೆಂತ್ ಚಲೊನ್ ಆಸಾತ್.ಜಾಂವ್ದಿ ತೆಂ ಮೊಂತಿ ಫೆಸ್ತ್, ತಾಕಾ ಲಗ್ತಿ ಜಾಲ್ಲೆ ಸ್ಪರ್ಧೆ, ಆನಿ ಇತರ್ ಕಾರ್ಯಕ್ರಮಾಂ.ಖಂಡಿತ್ ಜಾವ್ನ್ ಕೊಂಕ್ಣೆಕ್ ಏಕ್ ನವೊ ಹುರುಪ್ ಭರ್‌ಲ್ಲ್ಯಾ ಬಾಪ್ ರೊಬರ್ಟ್ ಲಸ್ರಾದೊಕ್ ಉಲ್ಲಾಸ್ ಫಾವೊ.ಆನಿ ತಾಚ್ಯಾ ಯೋಜನಾಂಕ್ ಜೊಕ್ತ್ಯಾ ರುಪಾನ್ ಕಾರ್ಯಗತ್ ಕರುಂಕ್ ಸಂಯೋಜಕಿ ಜರೀನಾ ಲುವಿಸ್ ತಶೆಂಚ್ ಉಪ ಸಂಯೋಜಕ್, ದುಬಾಯಾಂತ್ಲ್ಯಾ ಸರ್ವ್ ಕಾರ್ಯಾಂ ಪಾಟ್ಲೊ ಏಕ್ ದೈರ್ಯಾಧಿಕ್ ಖಾಂಬೊ ತಶೆಂಚ್ ಕೊಂಕ್ಣಿ ಮುಳ್ಳ್ಯಾರ್ ಸರ್ವ್ ಸಹಕಾರಾಕ್ ತಯಾರ್ ಆಸ್ಚೊ ಶ್ರೀ ಜೊಸೆಫ್ ಮಥಾಯಸ್ ಹಾಂಚ್ಯಾ ಮುಖೆಲ್ಪಾಣಾರ್ "ಸೈಂಟ್ ಮೇರಿಸ್ ಮಂಗ್ಳೂರಿಯನ್ ಕಮ್ಯುನಿಟಿ" ಆಪ್ಲೊ ಸರ್ವ್ ಸಹಕಾರ್ ದೀವ್ನ್ ಆಸಾ.

ವರ್ಸಾಕ್ ಏಕ್ ಬರ್‍ಯಾಂತ್ಲೆಂ ಬರೆಂ ಕಾರ್ಯೆಂ ಕೊಂಕ್ಣಿ ಲೋಕಾಕ್ ದೀಜೆ ಮುಳ್ಳ್ಯಾ ಉದ್ದೇಶಾನ್ ಆಸಾ ಕರ್ಚೊ ಹೊ ನಾಟಕ್ ಪ್ರದೀಪ್ ಬರ್ಬೊಜಾ ಪಾಲಡ್ಕಾ ಹಾಚೆಂ ಬಾರಾವೆಂ ರಚನ್ ಜಾವ್ನಾಸಾ. ತಾಚ್ಯಾ ಹೆರ್ ನಾಟಕಾಂಪರಿ ಹೊ ನಾಟಕ್ ಸಂಪೂರ್ಣ್ ಹಾಸ್ಯ್‌ಮಯ್ ಜಾವ್ನಾಸಾ ತರೀ, ಜಾಯ್ತೆಂ ಲಿಸಾಂವ್, ವ್ಹಡಿಲಾಂಕ್ ಜಾಗ್ರುತ್ಕಾಯ್, ಆಖೇರಿ ಪರ್ಯಾಂತ್ ಸಸ್ಪೆನ್ಸ್, ಚಿಂತಿನಾತ್ಲ್ಲ್ಯಾ ಬರಿ ಘುಂವ್ಡ್ಯೊ ಹ್ಯಾ ನಾಟಕಾಂತ್ ಭರ್ಸುನ್ ಆಸಾತ್.ಜಾಯ್ತ್ಯಾ ಪೌವ್ಟಿಂ ಆಮ್ಕಾಂ ಆವ್ಕಾಸ್ ಸಭಾರ್ ಮೆಳ್ಳ್ಯಾರಿ ತೆ ಆಮಿಂ ಜೊಕ್ತ್ಯಾ ರುಪಾನ್ ಉಪಯೋಗ್ ಕರಿನಾಸ್ತಾನಾ ಫಾಲ್ಯಾಂಕ್ ದವರ್ತಾಂವ್.ತಶೆಂ ಕೆಲ್ಲ್ಯಾನ್ ಮ್ಹನಿಸ್ ಕಿತೆಂ ಸರ್ವ್ ಹೊಗ್ಡಾಂವ್ಕ್ ಪಾವ್ತಾ, ಕಿತ್ಲ್ಯೊ ರ್ವ್ ಘುಂವ್ಡ್ಯೊ ಮನ್ಶ್ಯಾಚ್ಯಾ ಜೀವನಾಂತ್ ಯೆತಾತ್ ಮುಳ್ಳೆಂಚ್ ಹ್ಯಾ ನಾಟಕಾಚ್ಯಾ ಕಾಣಿಯೆಚೆಂ ತೀರ್ಲ್ ಜಾವ್ನಾಸಾ.ತಾಚ್ಯಾ ಸಾಂಗಾತಾ ಪ್ರದೀಪಾನ್ ಜಾಯ್ತೆ ಸಾಮಾಜಿಕ್ ಸಮಸ್ಯೆ ಉಗ್ತೆ ಕರುನ್ ಲೋಕಾಕ್ ಚಿಂತುಂಕ್ ಆವ್ಕಾಸ್ ಕರುನ್ ದಿಲಾ.ಹ್ಯಾ ನಾಟಕಾಚಿ ಆನ್ಯೇಕ್ ವಿಶೇಷತಾ ಮುಳ್ಳ್ಯಾರ್ ಪ್ರದೀಪಾನ್ ಮುಖ್ಯ್ ಭುಮಿಕಾ ಆಪ್ಲ್ಯಾ ಸಾಂಗಾತಿ ಕಲಾಕರಾಂಕ್ ದೀವ್ನ್ ಆಪುಣ್ ಏಕ್ ಕಲಾಕರ್ ಮಾತ್ರ್ ನಹಿಂ ಆಸ್ತಾಂ ಕಲಾಕರಾಂಕ್ ರಚನ್ ಕರ್ಚೊ ನಿಸ್ವಾರ್ಥಿ ಕಲಾಪ್ರೇಮಿ ಮುಣೊನ್ ದಾಕೊವ್ನ್ ದಿಲಾಂ.

ದುಬಾಯಾಂತ್ಲಿಂ ಕಲಾಕರಾಂ ಆಲ್ಫೊನ್ಸ್ ಡಿ’ಸೋಜಾ ಮೂಡ್‌ಬೆಳ್ಳೆ, ರೇಮ್ಸಿ (Ramcy) ಫೆರ್ನಾಂಡಿಸ್, ಗೊಡ್ವಿನ್ ಕಾಸ್ತೆಲಿನೊ, ಡೈನಿ ಡಿ’ಸೋಜಾ, ರೊಯ್‌ಸ್ಟನ್ ಕಿರಣ್ ಡಿ’ಸೋಜಾ, ಜೊಯಲ್ ಪಿಂಟೊ, ಪಾವ್ಲ್ ಪಾಲಡ್ಕಾ,ನಾನು ಮರೋಲ್ ತೊಟ್ಟಾಮ್, ಹೆಲ್ವಿನ್ ಡಿ’ಸೋಜಾ, ಲವಿನಾ ಫೆರ್ನಾಂಡಿಸ್ ಪಾಂಗ್ಳಾ, ವಿನಿಶಾ ರೊಡ್ರಿಗಸ್, ಜೊಯ್ಲಿನ್ ಪಿಂಟೊ ಹಾಂಚ್ಯಾ ಸಂಗಿಂ ಪ್ರದೀಪ್ ಬರ್ಬೊಜಾ ಹ್ಯಾ ನಾಟಕಾಂತ್ ನಟನ್ ಕರ್ತಾತ್ ತರ್ ಸಂಗೀತಾಚಿ ಜವಾಬ್ಧಾರಿ ಪ್ರ್ಯಾಂಕಿತ್ ಮಸ್ಕರೇನ್ಹಸ್ ನಿಡ್ಡೊಡಿ ಸಂಪೂರ್ಣ್ ಕರ್ತಾಲೊ.

ತರ್ ದುಬಾಯ್ ಆನಿ ಆಸ್ಪಾರಸ್ಚ್ಯಾ ಸುತ್ತುರಾಂತ್ಲಿ ಕೊಂಕ್ಣಿ ಪರ್ಜಾ ಫಾಲ್ಯಾಂ ಪಳೆಯಾಂ ಮುಣೊನ್ ಘರಾಚ್ ಬಸೊನ್ ಚುರ್ಚುರ್ನಾವಕಾತ್.ಪೊರ್ವಾಂ ಸುಕ್ರಾರಾ ಮುಳ್ಳ್ಯಾರ್ ಆಕ್ಟೊಬರಾಚ್ಯಾ 27 ತಾರಿಕೆರ್ ಜುಸ್ತ್ 07:30 ವ್ಹರಾರ್ ಸೈಂಟ್ ಮೇರಿಸ್ ಇಗರ್ಜ್ ದುಬಾಯ್ ಹಾಚ್ಯಾ ಉಗ್ತ್ಯಾ ಮೈದಾನಾರ್ ಪಳೆಂವ್ಕ್ ಯೆಯಾತ್ ಸಾಮಾಜಿಕ್ ತಶೆಂಚ್ ತುಮ್ಚಿಂ ಕುಸಾಳಾಂ ದುಕಾಯ್ಚೆರ್ ಹಾಸೊಂವ್ಚೊ ಪ್ರದೀಪ್ ಬರ್ಬೊಜಾ ಹಾಚೊ ನವೊಚ್ ನಾಟಕ್ " ಫಾಲ್ಯಾಂ ಪಳೆಯಾಂ".

ಭಾತ್ಮಿ: ನಾಟಕ್ ಪ್ರೇಮಿ