[ಖಬರ್:] ಮಯ್ಸೂರಾಂತ್ ಕೊಂಕಣಿ-ಕಾನಡಿ ಕಾರ್‍ಯೆಂ

ಮಯ್ಸೂರ್ (ಜನೆರ್ 20): ಕೊಂಕ್ಣಿ ಕ್ರಿಶ್ಚಿಯನ್ ಅಸೋಸಿಯೇಶನ್ ಮಯ್ಸೂರ್ ಹಾಂಚ್ಯಾ ಮುಕೇಲ್‌ಪಣಾಖಾಲ್ ಜನೆರ್ 20 ತಾರಿಕೆರ್ ಸಾಂಜೆರ್ 5:30 ವೊರಾರ್, ವಿಜಯನಗರಾಂತ್ಲ್ಯಾ ಕೊಂಕಣ್ ಭವನಾಂತ್ ನಾಮ್ಣೆಚೊ ಕೊಂಕ್ಣಿ ಕಾಣ್ಯೆಗಾರ್ ವಲ್ಲಿ ವಗ್ಗಚ್ಯಾ ಕೊಂಕ್ಣಿ ಕಾಣಿಯಾಂಚೊ ಕಾನಡಿಕ್ ತರ್ಜಣ್ ಕೆಲ್ಲೊ ’ಹೆಗಲ ಶಿಲುಬೆ’ ಕಾಣಿಯಾಂಚೊ ಜಮ್ಯಾಚೆಂ ಮೊಕ್ಳಿಕ್ ಕಾರ್ಯೆಂ ಚಲ್ಲೆಂ. ಕೊಂಕ್ಣಿ ಮುಳಾಚೊ ನಾಮ್ಣೆಚೊ ಕಾನಡಿ ಸಾಹಿತಿ ಮಾನೆಸ್ತ್ ನಾ.ಡಿ’ಸೋಜಾನ್ ಹ್ಯಾ ಬುಕಾಕ್ ಮೊಕ್ಳಿಕ್ ಕೆಲೆಂ. ಕಾರ್ಮೆಲಿತ್ ಭಾವ್ ಮಾ|ಡೊಮಿನಿಕ್ ವಾಜ್, ತಶೆಂಚ್ ಮಾ|ಆರ್ಚಿಬಾಲ್ಡ್ ಗೊನ್ಸಾಲ್ವಿಸ್, ಅಭಿರುಚಿ ಪ್ರಕಾಶನಾಚೊ ಗಣೇಶ್, ತಶೆಂಚ್ ವಲ್ಲಿ ವಗ್ಗಸವೆಂ ವಿನ್ಸೆಂಟ್ ಕ್ರಾಸ್ತೊ (ಅಧ್ಯಕ್ಷ್), ಜೋನ್ ವಿಲಿಯಮ್ ಡಿ’ಸೋಜ್, ಜೋನ್ ಲಿಯೋ ರೆಬೆಲ್ಲೊ, ಜೋಯ್ಸ್ ಸಿಕ್ವೇರಾ ಆನಿ ಹ್ಯಾರಿ ಪಿಂಟೊ ವೆದಿಚೆರ್ ಹಾಜರ್ ಆಸ್ಲೆ.

’ಮಯೂರ’, ’ತರಂಗ’, ’ಉದಯವಾಣಿ’, ’ತುಶಾರ’ ಅಶೆಂ ವೆವೆಗ್ಳ್ಯಾ ಕಾನಡಿ ಪತ್ರಾಂನಿ ಪರ್ಗಟ್ ಜಾಲ್ಲ್ಯಾ ಪನ್ನಾಸ್ ಕಾಣಿಯಾಂಪಯ್ಕಿಂತ್ಲಾ ವಿಂಚ್ಣಾರ್ 17 ಮಟ್ವ್ಯಾ ಕಾಣಿಯಾಂಕ್ ವಿಂಚುನ್ ’ಅಭಿರುಚಿ ಪ್ರಕಾಶನ್’ ಮಯ್ಸೂರ್ ಹಾಣಿಂ ಹೊ ಬೂಕ್ ಕಾನಡಿ ಭಾಸೆಂತ್ ಪರ್ಗಟ್ಲಾ.

ಹೆಚ್ಚ್ ಸಂಧರ್ಭಾರ್ ನಾ.ಡಿ’ಸೋಜಾಕ್ ತಾಣಿಂ ಕಾನಡಿ/ಕೊಂಕಣಿ ಸಾಹಿತ್ಯಾಕ್ ದಿಲ್ಲ್ಯಾ ದೇಣ್ಗೆಖಾತಿರ್ ಮಾನ್-ಪತ್ರ್ ದಿವುನ್, ಶಾಲ್ ಪಾಂಗ್ರುನ್ ಸನ್ಮಾನ್ ಕೆಲೊ. "ಅಪ್ಣಾಕ್ ಯೆದೊಳ್ ಪಾಸೊನ್ ಸಭಾರ್ ಮಾನ್-ಸಮ್ಮಾನ್ ಲಾಭ್ಲ್ಯಾತ್ ತರ್‌ಯೀ, ಆಮ್ಚ್ಯಾ ಕೊಂಕ್ಣಿ ಸಮಾಜೆಥಾವ್ನ್ ಲಾಭ್ಚೊ ಮಾನ್ ಸದಾಂಚ್ ವಿಶೇಸ್ ತಶೆಂ ಅಭಿಮಾನಾಚೊ" ಮ್ಹಣುನ್ ಅಪ್ಲ್ಯಾ ಉತ್ರಾಂನಿ ತಾಣೆಂ ಉಪ್ಕಾರ್ ಆಟಯ್ಲೊ.

ಹೆಚ್ಚ್ ಸಂಧರ್ಭಾರ್ ಜೋರ್ಜ್ ವಿಲಿಯಮ್ ಡಿ’ಸೋಜಾಚ್ಯಾ ಮುಖೇಲ್‌ಪಣಾಖಾಲ್ ’ಕೊಂಕ್ಣಿ ಸಾಂಸ್ಕೃತಿಕ್ ಕಾರ್‍ಯೆಂ’ ಚಲ್ಲೆಂ.

ಜೋಯ್ಸ್ ಸಿಕ್ವೇರಾ ಆನಿ ಲವೀನಾ ಡಿ’ಸೋಜಾ ಹಾಣಿಂ ಹೆಂ ಕಾರ್ಯೆಂ ಅಪುರ್ಭಾಯೆನ್ ಚಲವ್ನ್ ವೆಲೆಂ

ಮಂಗ್ಳುರ್ ಥಾವ್ನ್ ನಾಮ್ಣೆಚೆ ಸಾಹಿತಿ, ಚಿಂತ್ಪಿ, ನಾಟಕಿಸ್ತ್ ಮಾನೆಸ್ತ್ ಜಿಯೋ ಆಗ್ರಾರ್, ತಶೆಂಚ್ ಮುಂಬಯ್ ಥಾವ್ನ್ ವಲ್ಲಿ ಕ್ವಾಡ್ರಸ್ ಆನಿ ಲಗ್ಬಗ್ ಚಾರ್ಶಿಂ ಕೊಂಕ್ಣಿ ತಶೆಂಚ್ ಕಾನಡಿ ಸಾಹಿತಿಕ್ ಅಭಿಮಾನಿ ಹ್ಯಾ ಕಾರ್ಯಾಕ್ ಹಾಜರ್ ಆಸ್ಲೆ.

- ಆಮ್ಚೊ ಭಾತ್ಮಿ