[ಖಬಾರ್:] ಶಿವಮೊಗ್ಗ ಆನಿ ಸಾಗರಾಂತ್ ’ಮ್ಹಾತಾರೊ ಚರ್ಬೆಲಾ’

ಕೊಂಕ್ಣಿ ನಾಟಕ್ ಶೆತಾಂತ್ ದಾಖ್ಲೆ ರಚ್‌ಲ್ಲ್ಯಾ ’ಮ್ಹಾತಾರೊ ಚರ್ಬೆಲಾ’ ನಾಟಕ್ ಪಂಗ್ಡಾನ್, ಶಿವಮೊಗ್ಗ ಆನಿ ಸಾಗರ ಫಿರ್ಗಜೆಚ್ಯಾ ಚರಿತ್ರೆಂತ್ ಪಯ್ಲೆ ಪಾವ್ಟಿಂ ಕೊಂಕ್ಣಿ ನಾಟಕ್ ಕರ್ನ್ ಪರತ್ ದಾಖ್ಲೊ ರಚ್ಲೊ.

ನಾಟಕಾಚೆಂ 67ವೆಂ ಪ್ರದರ್ಶನ್ 2016 ಇಸ್ವಿ ಎಪ್ರಿಲಾಚ್ಯಾ 23 ತಾರಿಕೆರ್ ಸನ್ವಾರಾ ಸಾಂಜೆಚ್ಯಾ 5:30 ವೊರಾರ್ ಕುವೆಂಪು ರಂಗ್‌ಮಂದಿರ್ ಶಿವಮೊಗ್ಗ ಹಾಂಗಾಸರ್ ಜಾಲೆಂ.

ಹೆಂ ಕಾರ್ಯಕ್ರಮ್ ಕೊಂಕ್ಣಿ ಕಥೊಲಿಕ್ ಸಭಾ ಶಿವಮೊಗ್ಗ ಹಾಣಿಂ ಕರ್ನಾಟಕ ಕೊಂಕಣಿ ಸಾಹಿತ್ಯ್ ಅಕಾಡೆಮಿ ಹಾಂಚ್ಯಾ ಆಶ್ರಯಾಖಾಲ್ ಮಾಂಡುನ್ ಹಾಡ್‌ಲ್ಲೆಂ.

ನಾಟಕಾಚೆಂ 68ವೆಂ ಪ್ರದರ್ಶನ್ ಎಪ್ರಿಲ್ 24 ವೆರ್ ಆಯ್ತಾರಾ ಸಾಂಜೆಚ್ಯಾ 5:30 ವೊರಾರ್ ಸಾಗರಂತ್ಲ್ಯಾ ಸಾಂ ಜುಜೆ ಇಗರ್ಜೆಚ್ಯಾ ರಂಗ್‌ಮಾಂಚಿಯೆರ್, ಸಾಂ ವಿಶೆಂತ್ ಪಾವ್ಲ್ ಸಭಾ, ಸಾಗರ್ ಘಟಕ್ ಹಾಣಿಂ ಸಾಂ ಜುಜೆಚಿ ಫಿರ್ಗಜ್ ಸಾಗರ್ ಆನಿ ಕರ್ನಾಟಕ್ ಕೊಂಕ್ಣಿ ಸಾಹಿತ್ಯ್ ಅಕಾಡೆಮಿ ಹಾಂಚ್ಯಾ ಸಹಕಾರಾನ್ ಮಾಂಡುನ್ ಹಾಡ್‌ಲ್ಲೆಂ.

ದೊನ್‌ಯೀಂ ದಿಸಾಂಚ್ಯಾ ಕಾರ್ಯಕ್ರಮಾ ವೆಳಾರ್ ನಾಟಕಾಚೊ ಬರಯ್ಣಾರ್ ಮಾನೆಸ್ತ್ ಫ್ರನ್ಸಿಸ್ ಫೆರ್ನಾಂಡಿಸ್ ಕಾಸ್ಸಿಯಾ ಆನಿ ನಾಟಕಾಚೊ ನಿರ್ದೇಶಕ್ ಮಾನೆಸ್ತ್ ಜೋಯ್ ಪಾಲಡ್ಕಾ ಹಾಂಕಾಂ ಫುಲಾಂ ಫಳಾಂ ಆನಿ ಶಾಲ್ ಪಾಂಗ್ರುನ್ ಮಾನ್ ಕೆಲೊ.

[ಕೊಂಕ್ಣಿ ಭಾಸೆಚ್ಯಾ ಪ್ರಚಾರಾ ಖಾತಿರ್ ಕೊಂಕ್ಣಿ ನಾಟಕಾಂಕ್ ವೆವೆಗ್ಳ್ಯಾ ಪ್ರಾಂತ್ಯಾಕ್ ಪಾವಂವ್ಚ್ಯಾ ಇರಾದ್ಯಾನ್ ಜಾಯ್ತಿ ಮಿನತ್ ಕೆಲ್ಲ್ಯಾ/ಕರ್ತೆಲ್ಯಾ ಸರ್ವ್ ಕೊಂಕ್ಣಿ ಕಲಾಕಾರಾಂಕ್, ಕೊಂಕ್ಣಿ ಲೊಕಾಂನಿ ಸಹಕಾರ್ ದೀಂವ್ಕ್ ಫಾವೊ, ಆನಿ ಹ್ಯಾ ಪಾಸತ್ ಸಭಾರಾಂನಿ ಸಭಾರ್ ರಿತಿಚಿ ಮಿನತ್ ಕೆಲ್ಯಾ/ಕರುನ್ ಆಸಾತ್. ’ಮ್ಹಾತಾರೊ ಚರ್ಬೆಲಾ’ ಚ್ಯಾ ಕಲಾಕಾರಾಂಕ್ ನಿಜಾಯ್ಕೀ ಉಲ್ಲಾಸ್ ಫಾವೊ]

- ಆಮ್ಚೊ ಭಾತ್ಮಿ