[ಖಬರ್:] ದೆ|ಜೆ.ಬಿ.ಮೊರಾಯಸ್ ಆನಿ ದೆ|ಜೆ.ಬಿ.ಸಿಕ್ವೇರಾ ಸ್ಮಾರಕ್ ಕೊಂಕ್ಣಿ ಕವಿತಾ ಸ್ಪರ್ಧೊ

ಜನೆರ್ 15 (ಜೆರಿಮೆರಿ, ಮುಂಬಯ್): ಮುಂಬಯಾಂತ್ಲ್ಯಾ ಕೊಂಕ್ಣಿ ಭಾಸೆಕ್ ಜಿವಾಳ್ ದವರ್ಚೆ ಇರಾದ್ಯಾನ್ ಕೊಂಕ್ಣಿ ಭಾಶಾ ಮಂಡಳ್ ಸಂಸ್ಥ್ಯಾಕ್ ಭೋವ್ ಮಹತ್ವಾಚಿ ದೇಣ್ಗಿ ದಿಲ್ಲ್ಯಾ, ಸಾಹಿತ್ ಅಕಾಡೆಮಿ ಪುರಸ್ಕಾರ್ ಜಿಕ್ಪಿ ದೆ|ಜೆ. ಬಿ. ಮೊರಾಯಸ್ ಆನಿ ದೆ|ಜೆ. ಬಿ. ಸಿಕ್ವೇರಾ ಹಾಂಚ್ಯಾ ಉಡಾಸಾಚೊ ವರ್ಸಾಳೊ ಕವಿತಾಸ್ಪರ್ಧೊ, ಕೊಂಕ್ಣಿ ಭಾಶಾ ಮಂಡಳ್ (ಮುಂಬಯ್) ಹಾಣಿಂ ಹೆಚ್ಚ್ ಜನೆರಾಚ್ಯಾ ೧೫ ತಾರಿಕೆರ್ ಆಯ್ತಾರಾ, ಸಾಂಜೆರ್ ಸಾಡೆ ಚ್ಯಾರ್ ವೊರಾಂಕ್, ಜೆರಿಮೆರಿ ಫಿರ್ಗಜೆಚ್ಯಾ ಸಭಾಸಾಲಾಂತ್ ಆಯೋಜಿತ್ ಕೆಲೊ.

ಕವಿತಾಸಮ್ಮೇಳಾಚೆ ಸುರ್ವಾತೆರ್ ಸ್ವಾಗತ್ ಉತ್ರಾಂನಿ ಕೊಂಕ್ಣಿ ಭಾಶಾ ಮಂಡಳಿಚೊ ಕಾರ್ಯದರ್ಶಿ ಮಾನೆಸ್ತ್ ಜೋನ್ ಪಿರೇರಾನ್, ಸಯ್ರ್ಯಾಂಕ್ ತಶೆಂಚ್ ಕವಿತಾರಸ್ಕಾಂಕ್ ಸ್ವಾಗತ್ ಮಾಗೊನ್, ಸಯ್ರ್ಯಾಂಕ್ ವೆದಿಚೆರ್ ಆಪಯ್ಲೊ; ಮಾನೆಸ್ತ್ ವಾಲ್ಟರ್ ಡಿ’ಸೋಜ್, ಮಾನೆಸ್ತ್ ಸಿರಿಲ್ ಕ್ಯಾಸ್ತೆಲಿನೊ, ತೇಗ್ ವೊರಯ್ಣಾರ್; ಮಾನೆಸ್ತ್ ಲಾರೆನ್ಸ್ ಡಿ’ಸೋಜ ಕಮಾನಿ, ಮಾನೆಸ್ತ್ ಫ್ರಾನ್ಸಿಸ್ ಒಲಿವೆರಾ ಪಡುಕೋಣೆ, ಮಾನೆಸ್ತ್ ಅನಂತ್ ಅಮೆಂಬಳ್ ತಶೆಂಚ್ ಕವಿಸಮ್ಮೇಳನಾಚೊ ಅಧ್ಯಕ್ಷ್ ಮಾನೆಸ್ತ್ ವಲ್ಲಿ ಕ್ವಾಡ್ರಸ್ ಹಾಂಕಾಂ ವೆದಿಚೆರ್ ಆಪಯ್ಲೊ.

ಕೊಂಕ್ಣಿ ಭಾಶಾ ಮಂಡಳಿಚೊ ಆಧ್ಲೊ ಕಾರ್ಯದರ್ಶಿ ಮಾನೆಸ್ತ್ ಲಾರೆನ್ಸ್ ಡಿ’ಸೋಜ ಕಮಾನಿನ್, ಆಪ್ಲ್ಯಾ ಉಲವ್ಪಾಂತ್, ದೆ|ಜೆ.ಬಿ.ಮೊರಾಯಸ್ ಆನಿ ದೆ|ಜೆ.ಬಿ.ಸಿಕ್ವೇರಾಚಿ ಮಟ್ವಿ ವಳೊಕ್ ಕರುನ್, ತಾಣಿಂ ಮುಂಬಯಾಂತ್ಲ್ಯಾ ಕೊಂಕ್ಣಿ ಭಾಸೆಕ್ ದಿಲ್ಲ್ಯಾ ದೇಣ್ಗೆವಿಶಿಂ ಸಾಂಗುನ್, ಆಜ್ ಕವಿತಾಸಮ್ಮೇಳನಾಂತ್ ಆಯ್ಕುಂಕ್ ಮೆಳ್ಚಿಂ ಕವಿತಾ ಜಶೆಂ ಥರಾವಳ್ ರಿತಿಚ್ಯಾ ಆಂಬ್ಯಾಪರಿಂ ವೆವೆಗ್ಳ್ಯಾ ರುಪಾ/ರಂಗಾನ್ ತಶೆಂಚ್ ರುಚಿಂತ್ ಆಸ್ತಾತ್, ತಶೆಂಚ್ ಹ್ಯಾ ಸರ್ವ್ ಕವಿತೆಂಚೊ ಸ್ವಾದ್ ಚಾಕುಂಕ್ ಲೊಕಾಕ್ ಉಲೊ ದಿಲೊ.

ಉಪ್ರಾಂತ್ ವಲ್ಲಿ ಕ್ವಾಡ್ರಸಾಚ್ಯಾ ಅಧ್ಯಕ್ಷ್‌ಪಣಾಖಾಲ್ ಚಲ್‌ಲ್ಲ್ಯಾ ಕವಿತಾಸಮ್ಮೇಳನಾಂತ್ ವಿಂಚ್ಣಾರ್ ೮ ಕವಿಂನಿಂ ಆಪಾಪ್ಲಿಂ ಕವಿತಾ ವಾಚ್ಲಿಂ;

ಕವಿಬಾಬ್ ನಜ್ರೆತ್ ನೆರಿ ತಾಕೊಡೆ, ಬಾಯ್ ರೀಟಾ ಆಲ್ಬುಕರ್ಕ್, ಬಾಬ್ ರೋನ್ ಮಾಯ್ಕಲ್, ಬಾಬ್ ಶಾಂತಿರೋಯ್ ಸಿಕ್ವೇರಾ, ಬಾಬ್ ಸ್ಟೀಫನ್ ಲೋಬೊ, ಬಾಬ್ ಸಿರಿಲ್ ಕ್ಯಾಸ್ತಲಿನೊ, ಬಾಬ್ ಫಿಲಿಪ್ ಡಿ’ಸೋಜ ಕಾಂಜೂರ್‌ಮಾರ್ಗ್ ತಶೆಂಚ್ ಬಾಬ್ ವಲ್ಲಿ ಕ್ವಾಡ್ರಸ್ ಹಾಣಿಂ ಆಪಾಪ್ಲಿಂ ವೆವೆಗ್ಳಿಂ ಕವಿತಾ ವಾಚುನ್ ಲೊಕಾಂಕ್ ಧಾದೊಸ್ ಕೆಲೆಂ. ಆಪ್ಲ್ಯಾ ಅಧ್ಯಕ್ಷ್ಯಾಚ್ಯಾ ಉಲವ್ಪಾಂತ್ ವಲ್ಲಿ ಕ್ವಾಡ್ರಸಾನ್ ’ಎಕಾ ಕವಿಕ್ ಸಮಾಜಿಕ್ ಕಾಳ್ಜಿ/ಹುಸ್ಕೊ ಆಸ್ಚಿ ಗರ್ಜ್ ಆನಿ ಕವಿನ್ ಪಯ್ಲೊ ಅಪ್ಣಾಥಂಯ್ ಪ್ರಾಮಾಣಿಕ್ ಜಾವ್ನ್ ಆಸ್ಚಿ ಗರ್ಜ್’ ಮ್ಹಣಾಲೊ.

ಕೊಂಕ್ಣಿ ಭಾಶಾ ಮಂಡಳೆಚ್ಯಾ ತರ್ಫೆನ್ ವಿಂಚ್‌ಲ್ಲ್ಯಾ ತೆಗಾಂ ವೆವೆಗ್ಳ್ಯಾ ವೊರಯ್ಣಾರಾಂಚ್ಯಾ ವಿಂಚವ್ಣೆಪ್ರಕಾರ್ ಹಾಂಕಾಂ ಇನಾಮಾಂ ಫಾವೊ ಜಾಲಿಂ;

ಪಯ್ಲೆಂ ಇನಾಮ್ (ರು. 3000): ಬಾಬ್ ವಲ್ಲಿ ಕ್ವಾಡ್ರಸ್

ದುಸ್ರೆಂ ಇನಾಮ್ (ರು. 2000): ಬಾಬ್ ನಜ್ರೆತ್ ನೆರಿ ತಾಕೊಡೆ

ತಿಸ್ರೆಂ ಇನಾಮ್ (ರು. 1000): ಬಾಬ್ ರೋನ್ ಮಾಯ್ಕಲ್
ಚೊವ್ತೆಂ (ಪ್ರೋತ್ಸಾಹ್) (ರು: 500): ಬಾಬ್ ಶಾಂತಿರೋಯ್ ಸಿಕ್ವೇರಾ

ಕವಿತಾಸಮ್ಮೇಳನಾಂತ್ ಹಾಜರ್ ಆಸ್‌ಲ್ಲ್ಯಾ ಬಾಯ್ ಮೆಟಿಲ್ಡಾ ಮೊರಾಯಸ್ (ಮೆಟ್ಟಿ ಬಾಯ್; ದೆ|ಜೆ.ಬಿ. ಮೊರಾಯಸಾಚಿ ಪತಿಣ್) ಹಿಣೆಂ ಇನಾಮಾಂ ವಾಂಟುನ್, ಹಿ ಕವಿತಾಗೋಶ್ಟಿ ಭೋವ್ ಅಪುರ್ಭಾಯೆನ್ ಚಲವ್ನ್ ವೆಲ್ಲ್ಯಾ ಕೊಂಕ್ಣಿ ಭಾಶಾ ಮಂಡಳಿಚ್ಯಾ ಕಾರ್ಭಾರಿಂಕ್ ಧಿನ್ವಾಸ್ಲಿ.

ಮಾನೆಸ್ತ್ ಲಿಯೋ ಫೆರ್ನಾಂಡಿಸಾನ್ ಜಮಾತೆಚಿ ಹೆರ್ ವೆವಸ್ತಾ ಸಾಂಭಾಳ್‌ಲ್ಲಿ ತರ್, ಮಾನೆಸ್ತ್ ಸಿರಿಲ್ ಕ್ಯಾಸ್ತಲಿನೊನ್ ಹೆಂ ಕಾರ್ಯೆಂ ನಿರ್ವಾಹಣ್ ಕೆಲೆಂ.

- ಭಾತ್ಮಿ: ಆಮ್ಚೊ ಭಾತ್ಮಿದಾರ್ [ತಸ್ವೀರೊ: ಬಾಬ್ ಜೋನ್ ಮಸ್ಕರೇನ್ಹಸ್]