[ಖಬರ್:] ಜೆ.ಎಫ್.ಡಿ’ಸೋಜಾಚೊ ’ಹಾಸೊಚ್ಚ್ ಹಾಚೊ’ ಬೂಕ್ ಮೊಕ್ಳಿಕ್

ಮಂಗ್ಳುರ್ (ನವೆಂಬರ್ 17): ಭುರ್ಗ್ಯಾಂಚ್ಯಾ ಕಾಣ್ಯಾಂ ಖಾತಿರ್ ಕೊಂಕ್ಣಿ ಪತ್ರಾಂನಿ ಫಾಮಾದ್ ಕೊಂಕ್ಣಿ ಲೇಖಕ್ ಮಾನೆಸ್ತ್ ಜೆ.ಎಫ್.ಡಿ’ಸೋಜ್ ಅತ್ತಾವರ್ ಹಾಚೊ ಹಾಸ್ಯಾಂಚೊ ಜಮೊ ’ಹಾಸೊಚ್ ಹಾಸೊ’ ಬೂಕ್ ಹೆಚ್ಚ್ ನವೆಂಬ್ರಾಚ್ಯಾ 17 ತಾರಿಕೆರ್ ಕೊಡಿಯಾಳ್‍ಚ್ಯಾ ಪತ್ರಿಕಾ ಭವನಾಂತ್ ಪತ್ರಿಕಾಗೋಷ್ಟಿವೆಳಾರ್ ಮಾಲ್ಘಡೊ ಕೊಂಕ್ಣಿ ಸಾಹಿತಿ ಮಾನೆಸ್ತ್ ಡೊಲ್ಫಿ ಕಾಸ್ಸಿಯಾನ್ ಮೊಕ್ಳಿಕ್ ಕೆಲೊ. ಲಗ್ಬಗ್ 350 ಹಾಸೊ ಎಕ್ಟಾಂಯ್ ಕೆಲ್ಲೊ ಹೊ ಬೂಕ್ ’ಜ್ಯೋತಿ ಪ್ರಕಾಶನ್’ ಧ್ವಾರಿಂ ಪರ್ಗಟ್ಲಾಂ. ’ಭಾಂಗಾರ್’ ಶಿಂಕ್ಳೆಂತ್ ಭುರ್ಗ್ಯಾಂಚ್ಯಾ ಕಾಣ್ಯಾಂಚಿಂ 9 ಪುಸ್ತಕಾಂ ಆನಿ ಜಿವಿತಾಂತ್ ಉಪ್ಕಾರಾಕ್ ಪಡ್ಚಿಂ ’ವೆಳಾ-ಕಾಳಾಚಿಂ ಸೂತ್ರಾಂ’ ಮ್ಹಳ್ಳೊ ಬೂಕ್‌ಯೀ ಪರ್ಗಟ್ ಜಾಲಾ. ’ಹಾಸೊಚ್ ಹಾಸೊ’ ಜೆ.ಎಫ್.ಡಿ’ಸೋಜಾಚೊ ಇಕ್ರಾವೊ ಬೂಕ್ ಜಾವ್ನಾಸಾ.

ಕೊಂಕ್ಣೆಂತ್ಲೊ ಅನ್ಯೇಕ್ ಲೊಕಾಮೊಗಾಳ್ ಲೇಖಕ್, ’ಆಮ್ಚೊ ಯುವಕ್’ ಪತ್ರಾಚೊ ಆಧ್ಲೊ ಸಂಪಾದಕ್ ’ಮಚ್ಚಾ ಮಿಲಾರ್’ ಹಾಣೆಂ ಅಪ್ಲ್ಯ ವ್ಹಡ್ ಭಾವ್ ಜಾವ್ನಾಸ್ಚ್ಯಾ ಜೆ.ಎಫ್.ಡಿ’ಸೋಜಾಚಿ ಸಾಹಿತಿಕ್ ಪರಿಚಯ್ ತಶೆಂಚ್ ಬುಕಾಚಿ ಪರಿಚಯ್ ಕರುನ್ ದಿಲಿ ತಶೆಂಚ್ ಸರ್ವ್ ಕೊಂಕ್ಣಿ ವಾಚ್ಪ್ಯಾಂನಿ ಹ್ಯಾ ಬುಕಾಕ್ ಮೊಲಾಕ್ ಘೆವ್ನ್ ಆಧಾರ್ ದೀಂವ್ಕ್ ಉಲೊ ದಿಲೊ.

ಬುಕಾಚ್ಯೆ ಮೊಕ್ಳಿಕ್ ಜಾತೆಚ್ಚ್, ಬರವ್ಪ್ಯಾನ್ ಅಪ್ಲ್ಯಾ ಉತ್ರಾಂನಿ ’ಅಪ್ಣಾನ್ ವ್ಹಡಾ ಹುಮೆದಿನ್ ತಶೆಂಚ್ ಧಯ್ರಾನ್ ಕೊಂಕ್ಣಿ ಬೂಕ್ ಪರ್ಗಟ್ ಕರುನ್ ಆಯ್ಲಾಂ. ಆಯ್ಚ್ಯಾ ಕಾಳಾರ್ ಕೊಂಕ್ಣಿ ಬೂಕ್ ಪರ್ಗಟ್ ಕರ್ಚೆಂ ಮ್ಹಳ್ಯಾರ್ ಉಪ್ಯೆಂವ್ಕ್ ಕಳಿತ್ ನಾತ್‌ಲ್ಲ್ಯಾನ್ ದರ್ಯಾಕ್ ಉಡಿ ಮಾರ್‌ಲ್ಲೆಪರಿಂ ರಿಸ್ಕೆಚಿ ಗಜಾಲ್ ಜಾವ್ನಾಸಾ’ ಮ್ಹಣಾಲೊ.

ಡೋಲ್ಪಿ ಕಾಸ್ಸಿಯಾನ್ ಅಪ್ಲ್ಯಾ ಉಲವ್ಪಾಂತ್ ’ಪಾಟ್ಲ್ಯಾ 55 ವರ್ಸಾಂ ಥಾವ್ನ್ ಜೆ.ಎಫ್.ಡಿ’ಸೋಜ್ ಕೊಂಕ್ಣೆಂತ್ ಭುರ್ಗ್ಯಾಂಚ್ಯೊ ಕಾಣ್ಯೊ, ತಶೆಂಚ್ ಹೆರ್ ಸಕಾಳಿಕ್ ಬರ್ಪಾಂ, ಲೇಖನಾಂ, ಕವಿತಾ, ಚುಟುಕಾಂ ಖಾತಿರ್ ವ್ಹಳ್ಕಿಚೊ ಜಾಲಾ. ಹಾಣೆಂ ಕೊಂಕ್ಣೆಶಿವಾಯ್ ಕಾನಡಿ, ಇಂಗ್ಲಿಶ್ ಭಾಸೆಂತ್ ಸಯ್ತ್ ಕಾಂಯ್ 5500 ಮಿಕ್ವೊನ್ ಬರ್ಪಾಂ ಬರಯ್ಲ್ಯಾಂತ್. ಹಾಚ್ಯಾ ಪ್ರಕಾಶನಾಕ್ ಸರ್ವ್ ಬರೆಂ ಮಾಗ್ತಾಂ’ ಮ್ಹಣಾಲೊ.

ವೆದಿಚೆರ್ ಜೆ.ಎಫ್.ಡಿ’ಸೋಜಸವೆಂ ಡೋಲ್ಫಿ ಕಾಸ್ಸಿಯಾ, ಮಾಚ್ಚಾ ಮಿಲಾರ್, ಎ.ಡಿ’ಸೋಜಾ ಆನಿ ಮಾನೆಸ್ತಿಣ್ ಟ್ರೆಸ್ಸಿ ಡಿ’ಸೋಜಾ ಹಾಜರ್ ಆಸ್ಲಿಂ.

ಭಾತ್ಮಿ: ಜೆ.ಎಫ್.ಡಿ’ಸೋಜ್, ಅತ್ತಾವರ್