[ಖಬರ್] ಕೊಂಕಣಿಕ್ ಏಕ್ ನವೊ ಸಾಂಕವ್ ಕೊಂಕಣ್‌ಗಾರ್

1 ಮಾರ್ಚ್ (ಕಲಂಗೂಟ್, ಗೊಂಯ್): ’ಕೊಂಕಣ್‌ಗಾರ್ ಖರೊಚ್ ಜಾವ್ನ್ ಕೊಂಕಣಿಚ್ಯಾ ವೆವೆಗಳ್ಯಾ ಲಿಪಿ, ಬೊಲಿಚ್ಯಾ ಮನಶಾಂಕ್ ಎಕಾ ಮನಾನ್ ವಾವ್ರ್ ಕರುನ್ ಕೊಂಕಣಿಕ್ ಫುಡೆಂ ವರಚ್ಯಾ ದಿಶೆನ್ ಏಕ್ ಸಾಂಕವ್’ ಮ್ಹಣಾಲೊ ನಾಮ್ನೆಚೊ ಕೊಂಕಣಿ ಕಥಾಕಾರ್, ಕಾದಂಬರಿಕಾರ್ ಬಾಬ್ ದಾಮೋದರ್ ಮಾವ್ಜೊ. ’ಕನ್ನಡ್, ನಾಗರಿ, ಆನಿ ರೋಮಿ’ ತಿನ್‌ಯೀ ಲಿಪಿಂನಿ ಕೊಂಕಣಿ ಸಾಹಿತ್ಯ್ ಪ್ರಕಾಶಿತ್ ಕರ್ಚೆಂ ಪಯ್ಲೆಂ ಕೊಂಕಣಿ ಪ್ರಕಾಶನ್; ’ಕೊಂಕಣ್‌ಗಾರ್ ಪ್ರಕಾಶನಾಚೆಂ’ ವಿಮೋಚನ್ ಆಯ್ತಾರಾ (1 ತಾರಿಕ್ ಮಾರ್ಚ್) ಗೋವಾ ಹೆರಿಟೇಜ್ ಹೊಟೆಲಾಂತಲ್ಯಾ ಸಭಾಸಾಲಾಂತ್ ಗೊವಾ ಕೊಂಕಣಿ ಅಕಾಡೆಮಿಚೊ ಅಧ್ಯಕ್ಶ್ ಜಾವ್ನಾಸ್ಚ್ಯಾ ಬಾಬ್ ಅರುಣ್ ಸಾಖರ್‌ದಾಂಡೆನ್ ಕೆಲೆಂ.

ಬಾಬ್ ದಿಲೀಪ್ ಬೋರ್ಕರಾನ್ ಆಂಟೊನಿಯೊ ವೆರೊನಿಕಾ ಫೆರ್ನಾಂಡಿಸಾಚ್ಯಾ ಇಂಗ್ಲೀಶ್ ಬುಕಾಚೆಂ ಕೊಂಕಣೀ ತರ್ಜಣ್ ’ಮಾಡಾಥಾವ್ನ್ ತೆಲಾಖಣಿ ಪರಯಾಂತ್’, ಬಾಬ್ ದಾಮೋದರ್ ಮಾವ್ಜೊನ್ ವಲ್ಲಿ ಕ್ವಾದ್ರೂಶಾಚೊ ವೆಂಚಿಕ್ ಕಥಾಜಮೊ ’ಸಾಂಕವ್’ ಪುಸ್ತಕ್, ಬಾಬ್ ಮಾಧವ್ ಬೋರ್ಕರಾನ್ ’ರಾಶ್ಟ್ರೀಯ್ ಮಟ್ಟಾಚ್ಯಾ 27 ಕವಿಂಚ್ಯಾ ಕೊಂಕಣಿ ಕವಿತಾಜಮೊ’ ಪುಸ್ತಕಾಂಚೆಂ ವಿಮೋಚನ್ ಕೆಲೆಂ. ಬಾಬ್ ಪ್ರಭಾಕರ್ ತಿಂಬ್ಲೆ ಆನಿ ಬಾಬ್ ವಿನ್ಸಿ ಕ್ವಾದ್ರೂಶ್ (ದಲ್ಗಾದೊ ಕೊಂಕಣಿ ಅಕಾಡೆಮಿಚ್ ಅಧ್ಯಕ್ಷ್) ಹಾಣಿಂ ಪಯ್ಣಾರಿ-ವೀಜ್ ರಾಶ್ಟ್ರೀಯ್ ಮಟ್ಟಾಚೊ ದೆ|ವಿಲ್ಫಿ ರೆಬಿಂಬಸ್ ಸ್ಮಾರಕ್ ತೀನ್ ಲಿಪಿಂನಿ ಚಲ್ಚೊ ಕೊಂಕಣಿ ಸಾಹಿತಿಕ್ ಸ್ಪರ್ಧೊ ಘೋಶಿತ್ ಕರುನ್ ಬಾಯ್ ನಯನಾ ಅಡಾರಕರ್ ಆನಿ ಬಾಯ್ ಸರಸ್ವತಿ ದಾ. ನಾಯ್ಕ್ ಹಾಂಚ್ಯಾ ಬಾಲ್ ಸಾಹಿತ್ಯ್ ಪುಸ್ತಕಾಂಚೆಂ ವಿಮೋಚನ್ ಕೆಲೆಂ.

ಸುರ್ವಾತೆರ್ ಬಾಯ್ ಉರ್ಜಿತಾ ಭೊಬೆನ್ ಸಮೇಸ್ತಾಂಕ್ ಯೆವ್ಕಾರ್ ಮಾಗ್ತಚ್ ಮುಖೆಲ್ ಸಯ್ರ್ಯಾಂಕ್ ವೆದಿಚೆರ್ ಬಸ್ಕಾ ಘೆಂವ್ಕ್ ಆಪವ್ಣೆಂ ದಿವುನ್ ಸರ್ವ್ ಮುಖೆಲ್ ಸಯ್ರ್ಯಾಂಚಿ ವಳೊಕ್ ಕರುನ್ ದಿಲಿ. ಕಾರ್ಯಾಚೆಂ ಉಗ್ತಾವಣ್ ದಿವ್ಲಿ ಪೆಟವ್ನ್ ಜಾಲ್ಲೆಂಚ್ ಬಾಬ್ ವೆರೊನಿಕಾ ಫೆರ್ನಾಂಡಿಸಾನ್ ಸ್ವಾಗತ್ ಉಲವ್ಪ್ ಕರುನ್ ಮುಖೆಲ್ ಸಯ್ರ್ಯಾಂಕ್ ಕೊಂಕಣಿ ಪುಸ್ತಕಾಚಿ ಕಾಣಿಕ್ ದಿವುನ್ ಸ್ವಾಗತ್ ಕೆಲೊ.

ಕುವೇಯ್ಟ್ ಕೊಂಕಣಿ ಕೇಂದ್ರಾಚೊ ಸ್ಥಾಪಕ್ ಅಧ್ಯಕ್ಷ್ ಬಾಬ್ ಎಲ್ವಿನೋ ರೊಡ್ರಿಗಸನ್ ಬಾಬ್ ವೆರೊನಿಕಾ ಫೆರ್ನಾಂಡಿಸಾಚಿ ಸವಿಸ್ತಾರ್ ವಳೊಕ್ ದಿಲಿ. ವಲ್ಲಿ ಕ್ವಾಡ್ರಸಾನ್ ಪ್ರಸ್ತಾವಿಕ್ ಉಲವ್ಪ್ ಕರುನ್ ಕೊಂಕಣಿಕ್ ಡಿಜಿಟಲ್ ಆನಿ ತಾಂತ್ರಿಕ್ ಸಕ್ತೆಚ್ಯಾ ಆಧಾರಾನ್ ಕಸೆಂ ಆಮಿ ಎಕಾ ಮನಾನ್ ಎಕ್ವಟಿಕ್ ಜಾವ್ನ್ ಕೊಂಕಣಿ ವಾವ್ರ್ ಕರುಂಕ್ ಜಾತಾ ಮ್ಹಳ್ಳೊ ಆಶಾವಾದ್ ವೆಕ್ತ್ ಕರುನ್ ಕೊಂಕಣ್‌ಗಾರ್ ಪ್ರಕಾಶನಾಚೊ ಮೂಳ್ ದಿಶ್ಟಾವೊ ಸಾಂಗ್ಲೊ.

ಕನ್ನಡ್, ನಾಗರಿ ಆನಿ ರೊಮಿ ಲಿಪಿಂನಿ ಕೊಂಕಣಿ ಭಾಶೆಂತ್ಲೆಂ 95-99% ಠಕ್ಕೆಂ ಸಾಹಿತ್ಯ್ ರಚನ್ ಜಾತಾ ದೆಕುನ್ ಕೊಂಕಣಿಚ್ಯಾ ಸರ್ವ್ ಲಿಪಿಚ್ಯಾ, ಬೊಲಿಚ್ಯಾ ಲೊಕಾಕ್ ಲಾಗಿಂ ಹಾಡ್ಚ್ಯಾ ದಿಶೆನ್ ಏಕ್ ಲ್ಹಾನ್ ಪ್ರಯತ್ನ್ ಜಾವ್ನ್ ಬಾಬ್ ವೆರೋನಿಕಾ ಫೆರ್ನಾಂಡಿಸಾಚ್ಯಾ ಪ್ರಕಾಶಕ್‌ಪಣಾಖಾಲ್, ಬಾಬ್ ವಲ್ಲಿ ಕ್ವಾದ್ರೂಶಾಚ್ಯಾ ಸಂಪಾದಕ್‌ಪಣಾಖಾಲ್ ’ಕೊಂಕಣ್‌ಗಾರ್ ಪ್ರಕಾಶನ್’ ಮ್ಹಳ್ಳೆಂ ಪ್ರಕಾಶನ್, 1 ಮಾರ್ಚ್ 2020 ಚ್ಯಾ ಆಯ್ತಾರಾ ದನ್ಪಾರಾಂ 3 ಥಾವ್ನ್ 5 ಪಾಸುನ್, ಕಲಂಗೂಟಾಂತಲ್ಯಾ ’ಗೋವಯ್ ಹೆರಿಟೇಜ್ ಹೊಟೆಲಾಂತ್’ ಗೋವಾ ಕೊಂಕಣಿ ಅಕಾಡೆಮಿಚೊ ಅಧ್ಯಕ್ಷ್ ಬಾಬ್ ಅರುಣ್ ಸಾಖರ್‌ದಾಂಡೆನ್ ವಿಮೋಚನ್ ಕೆಲೆಂ.

ಅಧ್ಯಕ್ಶಾಚ್ಯಾ ಉಲವ್ಪಾಂತ್ ಬಾಬ್ ಅರುಣ್ ಸಾಖರ್‌ದಾಂಡೆನ್ ಬಾಬ್ ವೆರೊನಿಕಾ ಫೆರ್ನಾಂಡಿಸಾಚ್ಯಾ ’ಮಾಡಾಥಾವ್ನ್ ತೆಲಾಖಣಿ ಪರಯಾಂತ್’ ಬುಕಾವಿಶ್ಯಾಂತ್ ಉಲವ್ನ್, ಕೊಂಕಣಿ ಆಜ್ ಮುಕಾರ್ ವರುಂಕ್ ಅಕಾಡೆಮಿ, ಸಂಘಟನಾಂಲಾಗಿಂ ದುಡು ನಾ ದೆಕುನ್ ಆಮಿ ಎಕಾಮೆಕಾ ಆಧಾರ್ ದಿವುನ್ ಹೊ ವಾವ್ರ್ ಕರ್ಚೊ ಮ್ಹಳ್ಳೊ ಉಲೊ ದಿಲೊ.

ಗೊವಾ ಕೊಂಕಣಿ ಅಕಾಡೆಮಿಚೆಂ ಪತ್ರ್ ’ಅನನ್ಯ’ಚಿ ಸಂಪಾದಕ್, ನಾಮ್ನೆಚಿ ಲೋಕ್‌ವೇದ್ ಸಂಶೋಧಕ್, ಆಯ್ಲೆವಾರ್ ಸಾಹಿತ್ಯ್ ಅಕಾಡೆಮಿಚೊ ತರ್ಜಣೆಚೊ ಪುರಸ್ಕಾರ್ ಜೊಡ್ಪಿ ಬಾಯ್ ದೊ|ಜಯಂತಿ ನಾಯ್ಕ್ ಹಿಣೆಂ ವಲ್ಲಿ ಕ್ವಾದೂಶಾಚ್ಯಾ ಕೊಂಕಣಿ ಕಾಣಿಯಾಂಚೆರ್ ಉಲವ್ನ್ ’ಸಾಂಕವ್’ ಬುಕಾಂತಲ್ಯಾ ಥೊಡ್ಯಾ ಕಾಣಿಯಾಂಚೆರ್ ಖೊಲಾಯೆನ್ ವಿಚಾರ್ ಸಾಂಗುನ್ ಬುಕಾಚಿ ವಳೊಕ್ ಕರುನ್ ದಿಲಿ.

ನಾಮ್ನೆಚೊ ಕೊಂಕಣಿ, ಮರಾಠಿ ಕಥಾಕಾರ್, ಕವಿ, ಬಾಬ್ ಎನ್. ಶಿವದಾಸ್ ಹಾಣಿಂ ’ಮಯಲಾ ಫಾತರ್’ ಬುಕಾಚಿ ವಳೊಕ್ ಕರುನ್ ದಿತಚ್ ಹ್ಯಾ ತೀನ್ ಬುಕಾಂಚೆಂ ವಿಮೋಚನ್ ಕಾರ್ಯೆಂ ಚಲ್ಲೆಂ.

ಉಪ್ರಾಂತ್ ಬಾಬ್ ಪ್ರಭಾಕರ್ ತಿಂಬ್ಲೆ ಆನಿ ಬಾಬ್ ವಿನ್ಸಿ ಕ್ವಾದ್ರೂಶ್ ಹಾಣಿಂ ದೆ|ವಿಲ್ಫಿ ರೆಬಿಂಬಸ್ ಸ್ಮಾರಕ್ ಪಯ್ಣಾರಿ-ವೀಜ್ ಹಾಂಚ್ಯಾ ಜೋಡ್ ಆಯೋಗಾನ್ ಮಾಂಡುನ್ ಹಾಡ್ಚ್ಯಾ ತ್ರಿ-ಲಿಪಿಂತ್ಲ್ಯಾ ಕೊಂಕಣಿ ಸಾಹಿತಿಕ್ ಸ್ಪರ್ಧ್ಯಾಚೆಂ ಘೋಶಣ್ ಕೆಲೆಂ. ಹೆಚ್ ಸಂಧರ್ಭಾರ್ ಬಾಯ್ ನಯನಾ ಅಡಾರಕರ್‌ಚೊ ’ಬೆಲಾಬಾಯಚೊ ಶಂಕರ್ ಆನೀ ಹೆರ್ ಕಾಣಯೊ’ ತಶೆಂಚ್ ಸರಸ್ವತಿ ದಾಮೋದರ್ ನಾಯ್ಕ್ ಹಿಚ್ಯ್ ’ಜಾದುಚೊ ಪತಂಗ್ ಆನೀ ಕಾಣಯೊ’ ಮ್ಹಳ್ಳಿಂ ದೋನ್ ಬಾಲ್ ಸಾಹಿತ್ಯಾಚ್ಯಾ ಪುಸ್ತಕಾಂಚೆಂ ವಿಮೋಚರ್ ಕೆಲೆಂ.

ಉಪ್ರಾಂತ್ ಬಾಬ್ ದಿಲೀಪ್ ಬೋರ್ಕರ್ ಆಪ್ಲ್ಯಾ ಉಲವ್ಪಾಂತ್ ಕೊಂಕಣಿ ವಾವ್ರ್ ಫುಡೆಂ ವರುಂಕ್ ಆಮಿ ಖರೆಂಚ್ ಜಾವ್ನ್ ಸರ್ವ್ ಮನಾಂಚಿಂ, ಸರ್ವ್ ಮತಾಂಚಿಂ, ಸರ್ವ್ ಲಿಪಿ-ಬೊಲಿಚ್ಯಾ ಲೊಕಾನ್ ಸಾಂಗಾತಾ ವಾವ್ರ್ ಕರ್ಚಿ ಗರಜ್ ಆಸಾ ಆನಿ ತೆಂ ಕಾಮ್ ಭೋವ್ ಗರ್ಜೆಚೆಂ ಕಾಮ್ ದೆಕುನ್ ಹಿ ಕೊಂಕಣೆಂತ್ ಏಕ್ ಬರಿ ಸುರವಾತ್ ಮ್ಹಣಾಲೊ.

ಬಾಬ್ ಮಾಧವ್ ಬೋರ್ಕರ್ ಆಪ್ಲ್ಯಾ ಉಲವ್ಪಾಂತ್ ಹೆರ್ ಲಿಪಿ-ಬೊಲಿಚ್ಯಾ ಲೊಕಾಂಸವೆಂ ಅಪ್ಲೊ ಅನ್ಭೋಗ್ ವಾಂಟುನ್ ಘೆವ್ನ್, ಸರ್ವ್ ಕೊಂಕಣಿ ಲೊಕಾಕ್ ಲಾಗಿಂ ಹಾಡ್ಚೊಚ್ ಆಮ್ಚೊ ಶೆವೊಟ್ ಜಾಂವ್ಕ್ ಜಾಯ್ ಆನಿ ಹ್ಯಾ ದಿಶೆನ್ ಸರ್ವ್ ಉರ್ಭೆವಂತ್ ಸಾಹಿತಿಂಕ್ ಎಕಾ ಮನಾನ್ ವಾವ್ರ್ ಕರುಂಕ್ ಉಲೊ ದಿಲೊ.

ಬಾಬ್ ದಾಮೋದರ್ ಮಾವ್ಜೊನ್ ಅಪ್ಲ್ಯಾ ಉಲವ್ಪಾಂತ್ ಮೋಗ್, ದಯಾ, ಕರುಣಾ ಆಯ್ಚ್ಯಾ ಸಮಾಜೆಂತ್ ಭೋವ್ ಗರ್ಜೆಚೆಂ, ತಶೆಂಚ್ ಆಜ್ ಜೊ ಸಾಂಕವ್ ಭಾಂದ್ಚೆಂ ಪ್ರೇತನ್ ಸುರು ಜಾಲಾಂ, ಹಾಕಾ ಸರ್ವಾಂನಿ ಆಧಾರ್ ದಿಂವ್ಚಿ ಗರ್ಜ್ ಆಸಾ. ಸಾಂಕವ್ ಮೊಡ್ತೆಲ್ಯಾಂನಿ ಜಾಯ್ತೆ ಸಾಂಕವ್ ಮೊಡುನ್ ಆಮ್ಕಾಂ ಪಯ್ಸ್ ಪಯ್ಸ್ ದವರ್ಲಾಂ ಪುಣ್ ಕೊಂಕಣಿ ಆಮ್ಚಿ ಸರ್ವಾಂಚಿ ಭಾಸ್ ದೆಕುನ್ ಆಮಿ ಸಾಹಿತ್ಯಾಮುಖಾಂತ್ರ್, ಡಿಜಿಟಲ್ ಸಕ್ತೆಮುಖಾಂತ್ರ್ ಅಸಲೆ ಸಾಂಕವ್ ಉಭಾರುಂಕ್ ಮೆಟಾಂ ಕಾಡ್ಯಾಂ ಮ್ಹಣಾಲೊ.

ವಲ್ಲಿ ಕ್ವಾದ್ರುಶಾನ್ ಧಿನ್ವಾಸ್ ಉಲವ್ಪ್ ಕೆಲೆಂ.

ಹೆಂ ಕಾರ್ಯೆಂ ಭೋವ್ ಬರೆ ರಿತಿನ್ ಬಾಯ್ ಉರ್ಜಿತಾ ಭೊಬೆನ್ ಚಲವ್ನ್ ವೆಲೆಂ.

 ಖಬರ್: ಆಮ್ಚೊ ಭಾತ್ಮಿ

[खबर] कोंकणीक एक नवो सांकव कोंकण‌गार

१ मार्च (कलंगूट, गोंय): ’कोंकण‌गार खरोच जावन कोंकणिच्या वेवेगळ्या लिपी, बोलिच्या मनशांक एका मनान वावर करून कोंकणीक फुडें वरच्या दिशेन एक सांकव’ म्हणालो नाम्नेचो कोंकणी कथाकार, कादंबरिकार बाब दामोदर मावजो. ’कन्नड, नागरी, आनी रोमी’ तीन‌यी लिपिंनी कोंकणी साहित्य प्रकाशीत कर्चें पयलें कोंकणी प्रकाशन; ’कोंकण‌गार प्रकाशनाचें’ विमोचन आयतारा (१ तारीक मार्च) गोवा हेरिटेज होटेलांतल्या सभासालांत गोवा कोंकणी अकाडेमिचो अध्यक्ष जावनासच्या बाब अरूण साखर‌दांडेन केलें. बाब दिलीप बोर्करान आंटोनियो वेरोनिका फेर्नांडिसाच्या इंगलीश बुकाचें कोंकणी तर्जण ’माडाथावन तेलाखणी परयांत’, बाब दामोदर मावजोन वल्ली क्वाद्रूशाचो वेंचीक कथाजमो ’सांकव’ पुसतक, बाब माधव बोर्करान ’राश्ट्रीय मट्टाच्या २७ कविंच्या कोंकणी कविताजमो’ पुसतकांचें विमोचन केलें. बाब प्रभाकर तिंबले आनी बाब विन्सी क्वाद्रूश (दल्गादो कोंकणी अकाडेमीच अध्यक्ष) हाणीं पयणारी-वीज राश्ट्रीय मट्टाचो दे|विलफी रेबिंबस स्मारक तीन लिपिंनी चल्चो कोंकणी साहितीक स्पर्धो घोशीत करून बाय नयना अडारकर आनी बाय सरस्वती दा. नायक हांच्या बाल साहित्य पुसतकांचें विमोचन केलें.

सुर्वातेर बाय उर्जिता भोबेन समेसतांक येवकार माग्तच मुखेल सयऱ्यांक वेदिचेर बसका घेवंक आपवणें दिवून सर्व मुखेल सयऱ्यांची वळोक करून दिली. काऱ्याचें उग्तावण दिवली पेटवन जाल्लेंच बाब वेरोनिका फेर्नांडिसान स्वागत उलवप करून मुखेल सयऱ्यांक कोंकणी पुसतकाची काणीक दिवून स्वागत केलो. कुवेयट कोंकणी केंद्राचो स्थापक अध्यक्ष बाब एलविनो रोड्रिगसन बाब वेरोनिका फेर्नांडिसाची सविसतार वळोक दिली. वल्ली क्वाड्रसान प्रसतावीक उलवप करून कोंकणीक डिजिटल आनी तांत्रीक सक्तेच्या आधारान कसें आमी एका मनान एकवटीक जावन कोंकणी वावर करुंक जाता म्हळ्ळो आशावाद वेक्त करून कोंकण‌गार प्रकाशनाचो मूळ दिश्टावो सांगलो.

कन्नड, नागरी आनी रोमी लिपिंनी कोंकणी भाशेंतलें ९५-९९% ठक्कें साहित्य रचन जाता देकून कोंकणिच्या सर्व लिपिच्या, बोलिच्या लोकाक लागीं हाडच्या दिशेन एक ल्हान प्रयत्न जावन बाब वेरोनिका फेर्नांडिसाच्या प्रकाशक‌पणाखाल, बाब वल्ली क्वाद्रूशाच्या संपादक‌पणाखाल ’कोंकण‌गार प्रकाशन’ म्हळ्ळें प्रकाशन, १ मार्च २०२० च्या आयतारा दनपारां ३ थावन ५ पासून, कलंगूटांतल्या ’गोवय हेरिटेज होटेलांत’ गोवा कोंकणी अकाडेमिचो अध्यक्ष बाब अरूण साखर‌दांदेन विमोचन केलें.

अध्यक्षाच्या उलवपांत बाब अरूण साखर‌दांडेन बाब वेरोनिका फेर्नांडिसाच्या ’माडाथावन तेलाखणी परयांत’ बुकाविश्यांत उलवन, कोंकणी आज मुकार वरुंक अकाडेमी, संघटनांलागीं दुडू ना देकून आमी एकामेका आधार दिवून हो वावर कर्चो म्हळ्ळो उलो दिलो.

गोवा कोंकणी अकाडेमिचें पत्र ’अनन्य’ची संपादक, नाम्नेची लोक‌वेद संशोधक, आयलेवार साहित्य अकाडेमिचो तर्जणेचो पुरसकार जोडपी बाय दो|जयंती नायक हिणें वल्ली क्वादूशाच्या कोंकणी काणियांचेर उलवन ’सांकव’ बुकांतल्या थोड्या काणियांचेर खोलायेन विचार सांगून बुकाची वळोक करून दिली.

नाम्नेचो कोंकणी, मराठी कथाकार, कवी, बाब एन. शिवदास हाणीं ’मयला फातर’ बुकाची वळोक करून दितच ह्या तीन बुकांचें विमोचन काऱ्यें चल्लें.

उपरांत बाब प्रभाकर तिंबले आनी बाब विन्सी क्वाद्रूश हाणीं दे|विलफी रेबिंबस स्मारक पयणारी-वीज हांच्या जोड आयोगान मांडून हाडच्या त्री-लिपिंतल्या कोंकणी साहितीक स्पर्ध्याचें घोशण केलें. हेच संधर्भार बाय नयना अडारकर‌चो ’बेलाबायचो शंकर आनी हेर काणयो’ तशेंच सरस्वती दामोदर नायक हिच्य ’जादुचो पतंग आनी काणयो’ म्हळ्ळीं दोन बाल साहित्याच्या पुसतकांचें विमोचर केलें.

उपरांत बाब दिलीप बोर्कर आपल्या उलवपांत कोंकणी वावर फुडें वरुंक आमी खरेंच जावन सर्व मनांचीं, सर्व मतांचीं, सर्व लिपी-बोलिच्या लोकान सांगाता वावर कर्ची गरज आसा आनी तें काम भोव गर्जेचें काम देकून ही कोंकणेंत एक बरी सुरवात म्हणालो.

बाब माधव बोर्कर आपल्या उलवपांत हेर लिपी-बोलिच्या लोकांसवें अपलो अनभोग वांटून घेवन, सर्व कोंकणी लोकाक लागीं हाडचोच आमचो शेवोट जावंक जाय आनी ह्या दिशेन सर्व उर्भेवंत साहितिंक एका मनान वावर करुंक उलो दिलो.

बाब दामोदर मावजोन अपल्या उलवपांत मोग, दया, करुणा आयच्या समाजेंत भोव गर्जेचें, तशेंच आज जो सांकव भांदचें प्रेतन सुरू जालां, हाका सर्वांनी आधार दिंवची गर्ज आसा. सांकव मोडतेल्यांनी जायते सांकव मोडून आमकां पयस पयस दवरलां पूण कोंकणी आमची सर्वांची भास देकून आमी साहित्यामुखांत्र, डिजिटल सक्तेमुखांत्र असले सांकव उभारुंक मेटां काड्यां म्हणालो.

वल्ली क्वाद्रुशान धिन्वास उलवप केलें.

हें काऱ्यें भोव बरे रितीन बाय उर्जिता भोबेन चलवन वेलें.

 ಖಬರ್: ಆಮ್ಚೊ ಭಾತ್ಮಿ

[khobor] Konkonnik ek novo Sankou Konkonn‌gar

1 March (Calangute, Gõy): ’Konkonn‌gar khoroch zaun konkonnichea vevegollea lipi, bolichea monoxank eka monan vaur korun konkonnik fuddem vorochea dixen ek sankou’ mhonnalo namnecho konkonni kothakar, kadomborikar Bab Damodar Mauzo. ’Kannad, Nagari, ani Romi’ tin‌yi lipimni konkonni sahity prokaxit korchem poilem konkonni prokaxon; ’Konkonn‌gar Prokaxonachem’ vimochon, Aitara (1 March) Gova Heritej hottelantolea sobhasalant Gova Konkonni Akademicho odhyokx zaunaschea Bab Arun Sakhar‌danden kelem. Bab Bilip Borkaran Antonio Veronica Fernandisachea English bukachem Konkonni torzonn ’Maddathaun Telakhonni Poroyant’, Bab Damodar Mauzon Valley Quadrushacho venchik kothazomo ’Sankou’ pustok, Bab Madhav Borkoran ’Raxttri-i mott'ttachea 27 kovinchea konkonni kovitazomo’ pustokanchem vimochon kelem. Bab Prabhakar Timble ani Bab Vincy Quadrush (Dalgado Konknni Akademicho Odhyokx) hannim Poinnari-Veez raxttri-i mott'ttacho De| Wilfy Rebimbas smarok tin lipimni cholcho konkonni sahitik spordho ghoxit korun Bai Nayana Adarkar ani Bai Sarasvati Da. Naik hanchea bal sahity pustokanchem vimochon kelem.

Survater Bai Urjita Bhoben somestank yeukar magtoch mukhel soireank vedicher boska gheunko apounnem divun sorv mukhel soireanchi vollok korun dili. Kareachem ugtaunn divli pettoun zal'lench bab veronika fernanddisan svagot uloup korun mukhel soireank konkonni pustokachi kannik divun svagot kelo. Kuwait Konknni Kendracho sthapok odhyokx Bab Elvino Roddrigoson Bab Veronica Fernandisachi sovistar vollok dili. Valley Quadrusan prostavik uloup korun konkonnik ddijittol ani tantrik soktechea adharan kosem ami eka monan ekvottik zaun Konknni vaur korunk zata mholl'llo axavad vekt korun Konkonn‌gar Prokaxonacho mull dixttavo sanglo.

Kon'nodd, nagori ani romi lipimni konkonni bhaxentlem 95-99% tthokkem sahity rochon zata dekun konkonnichea sorv lipichea, bolichea lokak lagim haddchea dixen ek lhan proitn zaun bab veronika fernanddisachea prokaxok‌ponnakhal, bab vol'li kvadruxachea sompadok‌ponnakhal ’Konkonn‌gar Prokaxon’ mholl'llem prokaxon, 1 march 2020 chea aitara donparam 3 thaun 5 pasun, kolonguttantolea ’gouy herittez hottelant’ gova konkonni okaddemicho odhyokx bab orunn sakhor‌danden vimochon kelem.

Odhyokxachea uloupant bab orunn sakhor‌dandden bab veronika fernanddisachea ’Maddathaun Telakhonni Poroyant’ bukavixeant uloun, konkonni az mukar vorunk okaddemi, songhottonamlagim duddu na dekun ami ekameka adhar divun ho vaur korcho mholl'llo ulo dilo.

Gova konkonni okaddemichem potr ’Ananya’chi sompadok, namnechi lok‌ved sonxodhok, ailevar sahity okaddemicho torzonnecho puroskar zoddpi bai do|zointi naik hinnem Valley Quadrusachea konkonni kanniancher uloun ’Sankou’ bukantolea thoddea kanniancher kholayen vichar sangun bukachi vollok korun dili.

Namnecho konkonni, moratthi kothakar, kovi, Bab N. Shivdas hannim ’Moila Fator’ bukachi vollok korun ditoch hea tin bukanchem vimochon karyem chol'lem.

Uprant Bab Prabhaar Timble ani Bab Vincy Quadrus hannim De| Wilfy Rebimbus smarok Poinnari-Veez hanchea zodd ayogan manddun haddchea tri-lipintlea konkonni sahitik spordheachem ghoxonn kelem. Hech sondhorbhar bai noina oddarokor‌cho ’Belabaicho Shankar ani her kanniyo’ toxench Saraswati Damodar naik hichy ’zaducho potong ani kannoyo’ mholl'llim don bal sahiteachea pustokanchem vimochor kelem.

Uprant Bab Dilip Borkar aplea uloupant konkonni vaur fuddem vorunk ami khorench zaun sorv monanchim, sorv motanchim, sorv lipi-bolichea lokan sangata vaur korchi goroz asa ani tem kam' bhovo gorjechem kam' dekun hi konkonnent ek bori surovat mhonnalo.

Bab Madhav Borkar aplea uloupant her lipi-bolichea lokamsovem oplo onbhog vanttun gheun, sorv konkonni lokak lagim haddchoch amcho xevott zaunko zai ani hea dixen sorv urbheunt sahitink eka monan vaur korunk ulo dilo.

Bab Damodar Mauzon oplea uloupant mog, doya, korunna aichea somajent bhovo gorjechem, toxench az zo sankou bhandchem preton suru zalam, haka sorvamni adhar dimvchi gorz asa. Sankou moddteleamni zaite sankou moddun amkam pois pois dourlam punn konkonni amchi sorvanchi bhas dekun ami sahiteamukhantr, ddijittol soktemukhantr osole sankou ubharunk mettam kaddeam mhonnalo.

Valley Quadrusan dhinvas uloup kelem.

Hem karyem bhovo bore ritin Bai Urjita Bhoben choloun velem.

Amcho Bhatmi