[ಖಬರ್]  ಕಾರ್ಲೊ ಆಕುತಿಸಾಚೆರ್ ಪುಸ್ತಕ್ ಉಜ್ವಾಡಾಯ್ಲೆಂ

17 ದಸೆಂಬರ್ 2023 (ಮಡ್ಗಾಂವ್): ಸಗ್ಳ್ಯಾ ಥರಾಂ ವಯ್ಲ್ಯಾ ಲೊಕಾನ್ ಪುಸ್ತಕ್ ವಾಸ್ಚೆಂ: ಆರ್ಚ್‌ಭಿಸ್ಪ್ ಫಿಲಿಪ್ ನೆರಿ ಕಾರ್ಡಿಯಾಲ್ ಫೆರಾವೊ

"ಕಾರ್ಲೊ ಆಕುತೀಸ್ ಹೊ ತರ್ನಾಟ್ಯಾಂಕುಚ್ ನ್ಹಯ್ ತರ್ ಭುರ್ಗ್ಯಾಂಕ್ ಆನಿ ವ್ಹಡಾಂಕ್ ಲೆಗಿತ್ ಏಕ್ ಬರಿ ದೇಕ್ ಜಾವ್ನ್ ಆಸಾ. ಕಾರ್ಲೊ ಪರಮ್ ಸಂಕ್ಸಾರಾ ಮುಖಾರ್ ದಿಂಬಿ ಘಾಲುನ್ ಮಾಗ್ಣೆಂ ಕರ್ತಾಲೊ. ಮಿಸಾ ಆದಿಂ ವೊ ಮಿಸಾ ಉಪ್ರಾಂತ್ ತೊ ಪರಮ್ ಸಂಸ್ಕಾರಾ ಫುಡ್ಯಾಂತ್ ವೆಳ್ ಸಾರ್ತಾಲೊ. ತಾಣೆಂ ಕಂಪ್ಯೂಟರ್ ವಾಪ್ರುನ್ ಪರನ್ ಸಂಸ್ಕಾರಾಚೊ ಅಭ್ಯಾಸ್ ಕೆಲೊ ಆನಿ ತೊ ಸಂಖೆತ್-ಥಳಾ ವರ್ವಿಂ ಸಂವಾಸಾರ್ ಪಾವಯ್ಲೊ ಮ್ಹಣ್ ಪಂದ್ರಾ ವರ್ಸಾಂ ಪ್ರಾಯೆಚ್ಯಾ ಕಾರ್ಲೊಕ್ ಆಲ್ತಾರಾಚೊ ಮಾನ್ ಫಾವೊ ಜಾಲೊ. ಹೆಂ ಪುಸ್ತಕ್ ಸಗ್ಳ್ಯಾ ಥರಾಂ ವೆಲ್ಯಾ ಲೊಕಾನ್ ವಾಸ್ಚೆಂ." ಅಶೆಂ ಗೊಂಯ್ ಆನಿ ದಾಮಾಂವ್ಚೊ ಆರ್ಚ್ ಭಿಸ್ಪ್ ಭೋವ್ ಮಾನಾಧಿಕ್ ಫಿಲಿಪ್ ನೆರಿ ಕಾರ್ಡಿಯಾಲ್ ಫೆರಾವೊನ್ ಹಾಣೆಂ ವಿನ್ಸಿ ಕ್ವಾಡ್ರಸ್ ಹಾಚೆಂ ತರ್ನಾಟ್ಯಾಂಚೊ ದೈವಿಕ್ ’ಹಿರೊ’ ಕಾರ್ಲೊ ಆಕುತಿಸ್ ಹೆಂ ಚರಿತ್ರ್ ಪುಸ್ತಕ್ ಉಜ್ವಾಡಾಯ್ತಾನಾ ರಾಯ್ಚಿಯೆ ನೆವೆಸ್ ಸಾಇಭಿಣಿಚ್ಯಾ ಇಗರ್ಜೆಂತ್ ೧೭ ದಸೆಂಬರ್ ದಿಸಾ ಮ್ಹಳೆಂ. ಹ್ಯಾ ವೆಳಾರ್ ತಾಚೆ ಬರಾಬರ್ ಬರವ್ಪಿ ವಿನ್ಸಿ ಕ್ವಾಡ್ರಸ್, ಸೆವಾಧರ್ಮಿಕ್ ಕೇಂದ್ರಾಚೊ ಸಂಚಾಲಕ್ ಪ್ರಿ. ಆಲ್ಫೊನ್ಸೊ ಮೆಂಡೊನ್ಸಾ, ಎಪಿಸ್ಕೊಪಲ್ ಪ್ರೊ. ಲುಚಿಯೊ ಡಿಯಾಸ್, ರಾಯ್ಚೊ ವಿಗಾರ್‌ವಾರ್ ಪ್ರಿ. ಲಿಗರಿನ್ಹೊ ಫೆರ್ನಾಂಡಿಸ್, ರಾಯ್ಜಿಯೆ ಇಗರ್ಜಿಚೊ ಪಾದ್ರ್ ವಿಗಾರ್ ಪ್ರಿ. ಜಾನುರಿಯೊ ದಾಕೊಸ್ತಾ, ಪಾದ್ರಿಕುರ್ ಪ್ರಿ. ರನ್ಯ್ ಫೆರ್ನಾಂಡಿಸ್ ಆನಿ ಪ್ರಿ. ಲವ್ರಿನ್ಯೊ ಪಿರೇರಾ ಆನಿ ಜಾಯ್ತೆ ಪಾದ್ರಿ ಮಾಂಚಿಯೆತ್ ಹಾಜಿರ್ ಆಸ್ಲೆ.

ಆರ್ಚ್‌ಭಿಸ್ಪಾನ್ ಮುಖಾರುನ್ ಮ್ಹಳೆಂ, :ವಿನ್ಸಿ ಕ್ವಾಡ್ರಸಾನ್ ಹ್ಯೇ ಆದಿಂ ಜಾಯ್ತೆಂ ಬರೆಂ ಸಾಹಿತ್ಯ್ ಕೊಂಕಣಿ ಭಾಶೆಕ್ ದಿಲಾಂ. ದೆವಾನ್ ದಿಲಲೆ ಗೂಣ್ ವಾಫ್ರುನ್ ತಾಣೆಂ ಬರವ್ಪಾಚೆಂ ಚಾಲುಚ್ ದವರ್ಚೆಂ ಮ್ಹಣ್ತಾನಾ ತಾಕಾ ತಾಣೆಂ ಪರ್ಭಿಂ ದಿಲಿ"

ಕಾರ್ಲೊ ಆಕುತಿಸ್-ಚೆರ್ ಪುಸ್ತಕ್ ಬರಂವ್ಕ್ ಮ್ಹಾನಾ ಸ್ಪೂರ್ತಿ ಮೆಳ್ಳಿ ತಿ ತಾಚ್ಯಾ ಜಿವಿತಾಚೆರ್ ಆಸ್ಲಲ್ಯಾ ಇಂಗ್ಲೆಜ್ ಪುಸ್ತಕಾಚ್ಯಾ ಅಣ್ಕಾರಾಂತ್ಲ್ಯಾನ್. ತೆಂ ಅಣ್ಕಾರ್ ಮ್ಹಾಕಾ ದಿಸ್ಲೆಂ ಹಿಚ್ ಮಾಹಿತಿ ಕೊಂಕಣಿ ಮನ್ಶಾಂಕ್ ದೀಂವ್ಕ್ ಜಾಯ್ ಆನಿ ಪವಿತ್ರ್ ಅತ್ಮ್ಯಾಚ್ಯಾ ಪ್ರೇರಣೆನ್ ಹೆಂ ಪುಸ್ತಕ್ ದೇಡ್ ಮಯ್ನ್ಯಾ ಭಿತರ್ ತಯಾರ್ ಜಾಲೆಂ.’ ಬರವ್ಪಿ ವಿನ್ಸಿ ಕ್ವಾಡ್ರಸಾನ್ ಅಶೆಂ ಅಪ್ಲೆಂ ಮನ್ ಉಗ್ತಾಯ್ತಾನಾ ಮ್ಹಳೆಂ.

೬೪ ಪಾನಾಂಚ್ಯಾ ಹ್ಯಾ ಪುಸ್ತಕಾಕ್ ಎದ್ಸ್ ಪಬ್ಲಿಕೇಶನಾನ್ ಉಜ್ವಾಡಾಯ್ಲಾಂ> ತಾಚೆಂ ಕವರ್ ಆಂತೊನಿಯೊ ಕುಲಾಸೊ ಹಾಣೆಂ ಕಾಡ್ಲಾಂ ಜಾಲ್ಯಾರ್ ತಾಚೆಂ ಮೋಗ್ ಫಕತ್ ೮೦ ರುಪಯ್ ಆಸಾ. ಹೆಂ ಪುಸ್ತಕ್ ಜಾತಾ ತಿತ್ಲ್ಯಾ ತರ್ನಾಟ್ಯಾಂ ಆನಿ ಭುರ್ಗ್ಯಾಂ ಮೆರೆನ್ ಪಾಂವ್ಚೆಂ ಭೋವ್ ಕರುನ್ ಇಗರ್ಜ್ಯಾಂಚ್ಯಾ ಪಾದ್ರಿಂನಿ ಫುಡಾಕಾರ್ ಘೆವ್ನ್ ತೆಂ ತಾಂಚೆ ಮೆರೆನ್ ಪಾವಂವ್ಚೆಂ ಅಸೊ ಹಾವೆಸ್ ಪ್ರಕಾಶಕ್ ಮೆಲ್ವಿನ್ ಫೆರ್ನಾಂಡಿಸಾನ್ ಬಾಳ್ಗಿಲಾ. ನಿಮಾಣೆಂ ವಿನ್ಸಿ ಕ್ವಾಡ್ರಸಾನ್ ಸಗ್ಳ್ಯಾಂಚೆ ಉಪ್ಕಾರ್ ಮಾಂದ್ಲೆ.

 ಖಬರ್: ವಿನ್ಸಿ ಕ್ವಾಡ್ರೊಸ್

[खबर] कारलो आकुतिसाचेर पुसतक उज्वाडायलें

सगळ्या थरां वयल्या लोकान पुसतक वासचें: आर्च‌भिस्प फिलीप नेरी कार्डियाल फेरावो

मडगांव (१७ दसेंबर २०२३): "कारलो आकुतीस हो तर्नाट्यांकूच न्हय तर भुर्ग्यांक आनी व्हडांक लेगीत एक बरी देक जावन आसा. कारलो परम संक्सारा मुखार दिंबी घालून मागणें कर्तालो. मिसा आदीं वो मिसा उपरांत तो परम संसकारा फुड्यांत वेळ सार्तालो. ताणें कंप्यूटर वापरून परन संसकाराचो अभ्यास केलो आनी तो संखेत-थळा वर्वीं संवासार पावयलो म्हण पंद्रा वर्सां प्रायेच्या कारलोक आल्ताराचो मान फावो जालो. हें पुसतक सगळ्या थरां वेल्या लोकान वासचें." अशें गोंय आनी दामांवचो आर्च भिस्प भोव मानाधीक फिलीप नेरी कार्डियाल फेरावोन हाणें विन्सी क्वाड्रस हाचें तर्नाट्यांचो दैवीक ’हिरो’ कारलो आकुतीस हें चरित्र पुसतक उज्वाडायताना रायचिये नेवेस साइभिणिच्या इगर्जेंत १७ दसेंबर दिसा म्हळें. ह्या वेळार ताचे बराबर बरवपी विन्सी क्वाड्रस, सेवाधर्मीक केंद्राचो संचालक प्री. आलफोन्सो मेंडोन्सा, एपिसकोपल प्रो. लुचियो डियास, रायचो विगार‌वार प्री. लिगरिन्हो फेर्नांडीस, रायजिये इगर्जिचो पाद्र विगार प्री. जानुरियो दाकोसता, पाद्रिकूर प्री. रन्य फेर्नांडीस आनी प्री. लवरिन्यो पिरेरा आनी जायते पाद्री मांचियेत हाजीर आसले.

आर्च‌भिस्पान मुखारून म्हळें, :विन्सी क्वाड्रसान ह्ये आदीं जायतें बरें साहित्य कोंकणी भाशेक दिलां. देवान दिलले गूण वाफ्रून ताणें बरवपाचें चालूच दवर्चें म्हणताना ताका ताणें पर्भीं दिली"

कारलो आकुतीस-चेर पुसतक बरवंक म्हाना स्पूर्ती मेळ्ळी ती ताच्या जिविताचेर आसलल्या इंगलेज पुसतकाच्या अणकारांतल्यान. तें अणकार कर्रलच म्हाका दिसलें हीच माहिती कोंकणी मनशांक दीवंक जाय आनी पवित्र अत्म्याच्या प्रेरणेन हें पुसतक देड मयन्या भितर तयार जालें.’ बरवपी विन्सी क्वाड्रसान अशें अपलें मन उग्तायताना म्हळें.

६४ पानांच्या ह्या पुसतकाक एदस पबलिकेशनान उज्वाडायलां> ताचें कवर आंतोनियो कुलासो हाणें काडलां जाल्यार ताचें मोग फकत ८० रुपय आसा. हें पुसतक जाता तितल्या तर्नाट्यां आनी भुर्ग्यां मेरेन पांवचें भोव करून इगर्ज्यांच्या पाद्रिंनी फुडाकार घेवन तें तांचे मेरेन पावंवचें असो हावेस प्रकाशक मेलवीन फेर्नांडिसान बाळगिला. निमाणें विन्सी क्वाड्रसान सगळ्यांचे उपकार मांदले.

आमचो विन्सी क्वाड्रोस

[Khobor] Carlo Acutisacher pustok uzvaddailem

17 Dosembor 2023 (Moddgao): Sogllea thoram velea lokan pustok vachchem: Arsebisp Filip Neri Kardial Ferrao

‘Carlo Acutis ho tornatteankuch nhoi tor bhurgeank ani vaddloleank legit ek bori dekh zaun asa. Carlo Porom’ Sonksara mukhar dimbi ghalun magnnem kortalo. Misa adim vo Misa uprant to Porom’ Sonskara fuddeant vell sartalo. Tannem kompiuttor vaprun porom’ sonskaracho obheas kelo ani to sonkhet-thollam vorvim sonvsarak pavoilo. Mhonn 15 vorsam pirayechea Carlok altaracho man favo zalo. Hem pustok sogllea thoram velea lokan vachchem.” Oxem Gõy ani Damanvcho Arsebisp Bhou Xrextth Filip Neri Kardial Ferrao hannem Vincy Quadros hachem Tornatteancho Deivik ‘Hero’ Carlo Acutis hem cheoritr pustok uzvaddaitanam Raichie Neves saibinnichie Igorjent 17 Dezembr disa mhunnlem. Hea vellar tache borabor borovpi Vincy Quadros, Sevadhormik Kendracho Sonchealok Pri. Afonso Mendonca, Episcopal Fr. Lucio Dias, Raicho Vigar Var Pri. Ligorinho Fernandes, Raichie igorjecho padr vigar Pri. Januario Da Costa, padr kur Pri. Rony Fernandes ani Pri. Lourdinho Pereira ani zaite padri machier hajir asle.

Archbishopan mukhar mhunnlem, ‘Vincy Quadrosan he adim zaitem borem sahitya Konknni bhaxek dilam. Devan dilole gunn vaprun tannem borovpachem chaluch dovorchem mhunnttanam taka tannem porbim dilim.”

‘Carlo Acutis-acher pustok borounk mhaka sfurti mell’lli ti tachea jivitacher aslolea Inglez pustokachea onnkarantlean. Tem onnkar kortoloch mhaka dislem hich mahiti Konknni mon’xank diunk zai ani Povitr Otmeachie prernnen hem pustok dedd mhoinea bhitor toyar zalem.’ Borovpi Vincy Quadrosan aplem mon ugtaitanam mhunnlem.

64 pananchea hem pustok Ed’s Publicationsan uzvaddailam. Tachem kovor Antonio Colaco hannem kaddlam zalear tachem mol fokot 80 rupia asa. Hem pustok zata titlea tornatteam ani bhurgeam meren pavchem bhou korun igorzanchea padrimni fuddakar gheun tem tanche meren pavounchem oso haves prokaxok Melwyn Fernandesan ballgila. Nimanne koddem Vincy Quadrosan soglleanche upkar mandle.

Khobor: Vincy Quadros