[ಖಬಾರ್:] ಮೈಸೂರಾಂತ್ ಅಖಿಲ್ ಭಾರತೀಯ್ ಕೊಂಕಣಿ ಸಾಹಿತಿಕ್ ಉತ್ಸವ್

 ಮೈಸೂರ್ (ಫೆಬ್ರೆರ್ 28): ಕೊಂಕಣಿ ಕ್ರಿಶ್ಚಿಯನ್ ಅಸೋಸಿಯೇಶನ್ (ರಿ) ಮೈಸೂರ್ ಆನಿ ಅಖಿಲ್ ಭಾರತೀಯ್ ಕೊಂಕಣಿ ಲೇಖಕ್ ಸಂಘಟನ್ (ರಿ) ಮಂಗ್ಳುರ್ ಸಾಂಗಾತ್‌ಪಣಾಖಾಲ್ ಎಕಾ ದಿಸಾಚೆಂ ಕೊಂಕ್ಣಿ ಸಾಹಿತಿಕ್ ಉತ್ಸವ್ ಕಾರ್ಯೆಂ, ಹೆಚ್ಚ್ ಫೆಬ್ರೆರಾಚ್ಯಾ 28 ತಾರಿಕೆರ್ (ಆಯ್ತಾರಾ) ವಿಜಯನಗರಾಂತ್ಲ್ಯಾ ’ಕೊಂಕಣ್ ಭವನ್’ ಚೆರ್ ಚಲ್ಲೆಂ.

ಫಾಮಾದ್ ಕೊಂಕ್ಣಿ ಬರವ್ಪಿ, ಪ್ರಸಂಗ್‌ಕಾರ್ ಮಾ|ವಿ.ಜೆ.ಮಿನೇಜ್ (ಮೆಲ್ಕಿ ಹೊಸ್ಪೇಟ್) ಹಾಂಚೆಥಾವ್ನ್ ಮಿಸಾಚ್ಯಾ ಬಲಿದಾನಾಂತ್ ಸುರ್ವಾತ್ ಜಾಲ್ಲ್ಯಾ ಹ್ಯಾ ಕಾರ್ಯಾಚೆಂ ಅಧ್ಯಕ್ಷ್‌ಪಣ್ ವಿನ್ಸೆಂಟ್ ಕ್ರಾಸ್ತಾನ್ ಚಲವ್ನ್ ವ್ಹೆಲೆಂ. ಉಗ್ತಾವಣ್ ಕಾರ್ಯಾಚೊ ಅಧ್ಯಕ್ಷ್ ಜಾವ್ನ್ ಹಾಜರ್ ಆಸ್‌ಲ್ಲೊ ಕೊಂಕ್ಣಿ ಕ್ರಿಶ್ಚಿಯನ್ ಫೆಡೆರೇಶನಾಚೊ ಅಧ್ಯಕ್ಷ್ ಮಾನೆಸ್ತ್ ಎಡ್ವಿನ್ ಡಿ’ಸೋಜಾನ್, ಕಾರ್ಯಾಚೆಂ ಉಗ್ತವಣ್ ಚಲವ್ನ್, ಆಜ್ ಕೊಂಕ್ಣಿ ಭಾಸೆಚಿ ಅಸ್ಮಿತಾಯ್ ಉರಂವ್ಚಿ ಹರ್ಯೆಕಾ ಕುಟ್ಮಾಚಿ ಜವಾಭ್ದಾರಿ ಆನಿ ಕಾಯ್ದೊ ಜಾವ್ನಾಸಾ ಮ್ಹಣಾಲೊ. ಅಖಿಲ್ ಭಾರತೀಯ್ ಕೊಂಕ್ಣಿ ಲೇಖಕಾಂಚ್ಯಾ ಎಕ್ತಾರಾಚೊ ಜೆರಾಲ್ ಕಾರ್ಯದರ್ಶಿ ಡಾ|ಎಡ್ವರ್ಡ್ ನಜ್ರೆತಾನ್ ಸ್ವಾಗತ್ ಮಾಗ್ಲೊ.

ಸಾಹಿತಿಕ್ ಉತ್ಸವಾಚೊ ಅಧ್ಯಕ್ಷ್ ಮಾನೆಸ್ತ್ ವಿನ್ಸೆಂಟ್ ಕ್ರಾಸ್ತಾನ್ ಆಪ್ಲ್ಯಾ ಉತ್ರಾಂನಿ 41 ವೆವೆಗ್ಳ್ಯಾ ಬೊಲಿಂನಿ ಸೊಭೊನ್ ಆಸ್ಚ್ಯಾ ಕೊಂಕ್ಣೆಚ್ಯಾ ಗ್ರೇಸ್ತ್‌ಕಾಯೆಕ್ ಆಮಿ ಸಮ್ಜುಂಕ್ ಜಾಯ್, ತಶೆಂಚ್ ಕೊಂಕ್ಣಿ ಭಾಸೆಚ್ಯಾ ಉದರ್ಗತೆಖಾತಿರ್ ಸರ್ವಾಂನಿ ಆಮಿ ಮೆಳುನ್ ಎಕ್ವಟಿಕ್ ರಿತಿನ್ ವಾವ್ರ್ ಕರುಂಕ್ ಜಾಯ್ ಮ್ಹಣುನ್ ಉಲೊ ದಿಲೊ. ಕೊಂಕ್ಣಿ ಉತ್ಸವಾಚೊ ಸಂಚಾಲಕ್ ಮಾನೆಸ್ತ್ ವಲ್ಲಿ ವಗ್ಗನ್ ಉಪ್ಕಾರ್ ಆಟಯ್ಲೊ.

ಕಾರ್ಯಾಚ್ಯಾ ಮುಖ್ಲ್ಯಾ ವಾಂಟ್ಯಾಂತ್ ’ಸಾಹಿತಿಲಾಗಿಂ ಸಂವಾದ್’ ಕಾರ್ಯೆಂ ಚಲ್ಲೆಂ, ಮಾ|ವಿ.ಜೆ.ಮಿನೇಜಸಾಚಿ ಸವಿಸ್ತಾರ್ ವಳೊಕ್, ತಶೆಂಚ್ ತಾಚ್ಯಾ ಭುರ್ಗ್ಯಾಪಣಾಲೆ, ಯುವಪಣಾಲೆ ಯಾದ್ ಕರುನ್, ಏಕ್ ಸಮಾಜಿಕ್ ಸುಧಾರಕ್ ಜಾವ್ನ್ ಮಾ|ವಿ.ಜೆ.ಮಿನೇಜಸಾನ್ ಕೆಲ್ಯಾ ವಾವ್ರಾಚಿ ವಳೊಕ್ ಕರ್ನ್ ದೀವ್ನ್ ಮಾನೆಸ್ತ್ ವಲ್ಲಿ ವಗ್ಗನ್ ತಾಂಚೆಸವೆಂ ಸಂವಾದ್ ಚಲವ್ನ್ ವೆಲೊ. ಮಾ|ವಿ.ಜೆ.ಮಿನೇಜಸಾನ್ ಆಪ್ಲ್ಯಾ ಜಿಣ್ಯೆಚ್ಯಾ ಸುರ್ವಾತೆರ್ ಸಾಹಿತ್ಯಾನ್ ಕಸೊ ತಾಚ್ಯಾ ಚಿಂತ್ಪಾಚೆರ್, ಬರಿ ವಾಟ್ ಧರ್ಚೆದಿಶೆನ್ ಕಸಲೊ ಪ್ರಭಾವ್ ಘಾಲೊ ಮ್ಹಣುನ್, ವೆವೆಗ್ಳ್ಯಾ ಘಡಿತಾಂಚೊ ಉಡಾಸ್ ಕಾಡುನ್ ವಿವರ್ ದಿಲೊ.

ಕಾರ್ಯಾಚ್ಯಾ ಮುಖ್ಲ್ಯಾ ವಾಂಟ್ಯಾಂತ್ ಮುಂಬಯ್, ಮೈಸೂರ್, ಸುಂಟಿಕೊಪ್ಪ, ಮಂಗ್ಳುರ್ ಅಶೆಂ ವೆವೆಗ್ಳ್ಯಾ ಪ್ರಾಂತ್ಯಾಥಾವ್ನ್ ಆಯಿಲ್ಲ್ಯಾ ಆಟ್ ಕವಿಂಸವೆಂ, ಕವಿ ವಲ್ಲಿ ಕ್ವಾಡ್ರಸಾಚ್ಯಾ ಅಧ್ಯಕ್ಷ್‌ಪಣಾಖಾಲ್ ’ಅಖಿಲ್ ಭಾರತೀಯ್ ಕೊಂಕ್ಣಿ ಕವಿಗೋಶ್ಟಿ’ ಚಲವ್ನ್ ವೆಲಿ.

ಉತ್ಸವಾಚ್ಯಾ ಸಂಚಾಲಕಾನ್; ವಲ್ಲಿ ವಗ್ಗನ್ ಸರ್ವಾಂಚಿ ವ್ಹಳೊಕ್ ಕರುನ್ ದಿತಚ್ಚ್, ಲೀನಾ ಆಗ್ನೆಸ್ ಡಿ’ಸೋಜ್ ಮೈಸೂರ್, ದೈವಸಮಾಜ ಕೊಂಕ್ಣೆಚಿ ಕವಯತ್ರಿ ನಿಕಿತಾ ಶೇಟ್, ಜಿಯೋ ಆಗ್ರಾರ್, ಜೋನ್ ಸುಂಟಿಕೊಪ್ಪ, ಜಿ.ಎಸ್.ಬಿ ಕೊಂಕಣಿ ಕವಯತ್ರಿಯಾಂ; ಶೀಲಾ ಭಂಡಾರ್‌ಕರ್, ಜೈಶ್ರೀ ಗಣಪತಿ ಶ್ಯಾನ್‌ಭಾಗ್, ರಿಚ್ಚಿ ಪಿರೇರ್, ನವೀನ್ ಪಿರೇರ್ ಆನಿ ವಲ್ಲಿ ಕ್ವಾಡ್ರಸ್ ಹಾಣಿಂ ಆಪಾಪ್ಲಿಂ ಕವಿತಾ ವಾಚ್ಲಿಂ. ಕವಿ ಜೆದ್ನಾಂ ಸಮಾಜಿಕ್ ಸ್ಪಂದನ್ ಕರ್ತಾ, ಆನಿ ಸಮಾಜೆಚೆಂ ಸಂವೇದನ್ ಸಮ್ಜುನ್ ತಿ ಸಂವೆದನ್ ಆಪ್ಲ್ಯಾ ಕವಿತೆಂನಿ ವ್ಹಾಳಯ್ತಾ, ತೆದ್ನಾಂ ಮಾತ್ರ್ ತೊ ಸಮಾಜಿಕ್ ಕವಿ ಜಾತಾ ಮ್ಹಣಾಲೊ.

ದೊನ್ಪಾರಾಂಚ್ಯಾ ಜೆವ್ಣಾಚ್ಯಾ ಕಾರ್ಯಾ ಉಪ್ರಾಂತ್ ಚಲ್‌ಲ್ಲ್ಯಾ ಸಾಂಸ್ಕೃತಿಕ್ ಕಾರ್ಯಾಂತ್, ಸಹಕಾರ್ಯದರ್ಶಿ ಮಾನೆಸ್ತಿಣ್ ಅಪೋಲಿನಾಚ್ಯಾ ಮುಖೇಲ್‌ಪಣಾರ್ ಭುರ್ಗ್ಯಾಂನಿ ಕೊಂಕ್ಣಿ ಮಾಂಡೊ ಆನಿ ಜಾನಪದ್ ತಶೆಂ ಹೆರ್ ಅಪುರ್ಭಾಯೆಚಿಂ ಪದಾಂ ಗಾವ್ನ್, ತಶೆಂಚ್ ನಟನ್/ನಾಚಾಸವೆಂ ಪದಾಂ ಗಾವ್ನ್ ಲೊಕಾಕ್ ಮನರಂಜನ್ ದಿಲೆಂ.

ಉಪ್ರಾಂತ್ಲ್ಯಾ ಕಾರ್ಯಾಂತ್ ’ಪ್ರಾಚೀನ್ ಕೊಂಕ್ಣಿ ಭಾರತ್’ ವಿಶ್ಯಾಚೆರ್ ಏಕ್ ವಿಚಾರ್‌ಸಾತೆಂ ಡಾ|ಎಡ್ವರ್ಡ್ ನಜ್ರೆತ್ ಆನಿ ಡಾ|ರೋಕಿ ವಿ. ಮಿರಾಂದಾ ಹಾಣಿಂ ಚಲವ್ನ್ ವೆಲೆಂ. ಉಪ್ರಾಂತ್ ರಿಚ್ಚಿ ಪಾಯ್ಸಾನ್ ಬರಯಿಲ್ಲೊ, ಜೋರ್ಜ್ ವಿಲಿಯಂ ಡಿ’ಸೋಜ್ ಮೈಸೂರ್ ಹಾಚ್ಯಾ ನಿರ್ದೇಶನಾಖಾಲ್ ’ಗುಳಿಯೊ’ ಮ್ಹಳ್ಳೊ ನಾಟಕ್ ಸಾಂದ್ಯಾನಿ ಖೆಳವ್ನ್ ಧಾಖಯ್ಲೊ.

ಸಕಾಳಿಂ ಥಾವ್ನ್ ಸಾಂಜೆಪರ್ಯಾಂತ್ ಲಗ್ಬಗ್ ಸಾಡೆ ತಿನ್ಶಿಂ ಕೊಂಕ್ಣಿ ಲೊಕಾಂನಿ ಹ್ಯಾ ಕಾರ್ಯಾಂತ್ ವಾಂಟೊ ಘೆತ್ಲೊ. ಜೋನ್ ಲಿಯೋ ರೆಬೆಲ್ಲೊನ್ ಉಪ್ಕಾರ್ ಆಟಯ್ಲೊ.

- ಆಮ್ಚೊ ಭಾತ್ಮಿ