[ಖಬಾರ್:] ಮುಂಬಯಾಂತ್ ಕೊಂಕ್ಣಿ ಸಹಮಿಲನ್ ಆನಿ ಕವಿಸಮ್ಮೇಳ್

ಮಾರ್ಚ್ 20 (ಮುಂಬಯ್) ಮಹಾರಾಷ್ಟ್ರ ಕೊಂಕಣಿ ಅಸೋಸಿಯೇಶನ್ ತಶೆಂಚ್ ಅಖಿಲ್ ಭಾರತೀಯ್ ಕೊಂಕಣಿ ಪರಿಷದ್ ಹಾಂಚ್ಯಾ ಜೋಡ್ ಆಯೋಗಾಖಾಲ್ ’ಕೊಂಕ್ಣಿ ಸಹಮಿಲನ್ ಆನಿ ಕವಿಸಮ್ಮೇಳ್’ ಹೆಚ್ಚ್ ಮಾರ್ಚಾಚ್ಯಾ 20 ತಾರಿಕೆರ್, ಮುಂಬಯಾಂತ್ಲ್ಯಾ ಜೆರಿಮೆರಿಚ್ಯಾ ಸಾಂ|ಜೂಡ್ ಫಿರ್ಗಜೆಚ್ಯಾ ಸಭಾಸಾಲಾಂತ್ ಚಲ್ಲೆಂ.

ಕಾರ್ಯಾಚಿ ಸುರ್ವಾತ್ ಜೆರಿ ಬೊಂದೆಲ್ ಆನಿ ಲ್ಯಾನ್ಸಿ ನಿಡ್ಡೋಡಿ ಹಾಣಿಂ ಗಾಯ್ಲೆಲ್ಯಾ ಕೊಂಕ್ಣಿ ಪದಾಸವೆಂ ಜಾತಚ್ಚ್ ಕೊಂಕ್ಣಿ ಪರಿಷದೆಚೊ ಉಪಾಧ್ಯಕ್ಷ್ ಮಾನೆಸ್ತ್ ಡಾ|ಚಂದ್ರಕಾಂತ ಶೆಣಯ್ ಹಾಣೆಂ ಕೊಂಕ್ಣೆಚೊ ಎಕ್ವಟಿತ್ ವಾವ್ರ್ ಕರ್ಚಿ ಗರ್ಜ್ ಕಸಲಿ ಮ್ಹಳ್ಳ್ಯಾಚೆರ್ ವಿವರ್ ದೀವ್ನ್, ಆಜ್ ಹರ್ಯೆಕ್ ಪ್ರಾಂತೀಯ್ ಭಾಸ್ ಏಕ್ ನ್ಹಯ್ ಎಕಾ ರಿತಿಚ್ಯಾ ಸಮಸ್ಯಾಂತ್ ಬುಡೊನ್ ಆಸಾ ಆಸ್ತಾಂ, ಆಮ್ಕಾಂ ಎಕ್ವಟಿತ್ ಜಾವ್ನ್ ಎಕಾ ಭಾಸೆಚೊ ಪೋಸ್ ಕರ್ಚಿ ಗರ್ಜ್ ಅನಿವಾರ್ಯ್ ತಶೆಂಚ್ ಭೋವ್ ಗರ್ಜೆಚಿ ಜಾಲ್ಯಾಸ್ತಾಂ, ಕೊಂಕ್ಣಿ ಭಾಸೆಚ್ಯಾ ಉದರ್ಗತೆ ಪಾಸತ್ ಸರ್ವಾಂನಿ ಎಕಾ ಮನಾನ್ ವಾವ್ರ್ ಕರ್ಚಿ ಗರ್ಜ್ ಆಸಾ ಮ್ಹಣಾಲೊ, ಆನಿ ಹ್ಯಾ ದಿಶೆನ್ ಅಖಿಲ್ ಭಾರತೀಯ್ ಕೊಂಕ್ಣಿ ಸಾಹಿತ್ಯ್ ಪರಿಷದ್ ಅಪ್ಲೊ ವಾವ್ರ್ ಕರ್ತಲೊ ಮ್ಹಣಾಲೊ.

ಭುರ್ಗೆ ಲಿಯೋನ್ ಆನಿ ಲಿರೋನ್ ಫೆರ್ನಾಂಡಿಸ್ ಹಾಣಿಂ ’ಕೊಂಕ್ಣಿ ಆಮ್ಚಿ ಭಾಸ್’ ಮ್ಹಳ್ಳೆಂ ಪದ್ ಗಾವ್ನ್ ಕೊಂಕ್ಣಿ ಸಮ್ಮೇಳನಾಚಿ ಸುರ್ವಾತ್ ಕೆಲಿ, ಮಹಾರಾಷ್ಟ್ರ ಕೊಂಕಣಿ ಅಸೋಸಿಯೇಶನ್ ಹಾಚೊ ಸ್ಥಾಪಕ್ ಅಧ್ಯಕ್ಷ್ ಮಾನೆಸ್ತ್ ಲೀಯೊ ಫೆರ್ನಾಂಡಿಸಾನ್, ಕಸೊ ಹೊ ಸಂಸ್ಥೊ ವೀಸ್ ವರ್ಸಾಧಿಂ ಸುರು ಜಾಲ್ಲೊ ಆನಿ ಹ್ಯಾ ವೀಸ್ ವರ್ಸಾಂನಿ ಹ್ಯಾ ಸಂಸ್ಥ್ಯಾನ್ ವಾಡೊನ್ ಆಯಿಲ್ಲಿ ರೀತ್ ಆನಿ ಕೊಂಕ್ಣೆಚ್ಯಾ ಉದರ್ಗತೆಪಾಸತ್ ಕೆಲ್ಲ್ಯಾ ವೆವೆಗ್ಳ್ಯಾ ವಾವ್ರಾಚಿ ಮಟ್ವಿ ವಳೊಕ್ ಕರುನ್ ದಿಲಿ.

ಉಪ್ರಾಂತ್ ವೆವೆಗ್ಳ್ಯಾ ಕಲಾಕಾರಾಂ ಥಾವ್ನ್ ನಾಟ್ಕುಳೆ ತಶೆಂಚ್ ಮಟ್ವೆ ಹಾಸ್ಯ್ ಪ್ರದರ್ಶನ್ ಜಾತಚ್ಚ್ ಫಿಲೋಮಿನಾ ಫೆರ್ನಾಂಡಿಸ್ ಕಲ್ಮಾಡಿ ಆನಿ ಪಂಗ್ಡಾಥಾವ್ನ್ ನಾಚ್ ಪ್ರದರ್ಶಿತ್ ಜಾಲೊ.

ತಶೆಂಚ್ ಭುರ್ಗ್ಯಾಂನಿ ಸಯ್ತ್ ತಾಂಚೊ ನಾಚ್ ಪ್ರದರ್ಶಿತ್ ಕೆಲೊ.

 ತ್ಯೇ ಉಪ್ರಾಂತ್ ಬಾಯ್ ಫಿಲೋಮಿನಾ ಫ್ರಾನ್ಸಿಸ್ಕೋ ಹಿಚ್ಯಾ ಮುಖೇಲ್ಪಣಾಖಾಲ್ ಏಕ್ ಸಂವಾದ್ ಚಲಯ್ಲೊ. ಪರ್ಗಾಂವಾಂತ್ ಆಸೊನ್‌ಯೀ, ಹೆರ್ ಭಾಸೊ ಶಿಕ್ಚೆಸವೆಂ ಕಶೆಂ ಕೊಂಕ್ಣಿ ಭಾಸ್ ಸಯ್ತ್ ಹಿಂ ಶಿಕುಂಕ್ ಪಾವ್ಲಿಂ ಮ್ಹಳ್ಳ್ಯಾಚೆರ್ ಅಪುರ್ಭಾಯೆಚೊ ಆಟೊವ್ ಚಲ್ಲೊ.

ತ್ಯೇ ಉಪ್ರಾಂತ್ ರೋನ್ ಮಾಯ್ಕಲ್ ವಾಸ್ ಹಾಚ್ಯಾ ಅಧ್ಯಕ್ಷ್‌ಪಣಾಖಾಲ್ ಕೊಂಕ್ಣಿ ಕವಿಗೋಶ್ಟಿ ಚಲ್ಲಿ, ೧೬ ಕವಿಂನಿ ಹಾಂತುಂ ಭಾಗ್ ಘೆತ್ಲೊ; ಉಪ್ರಾಂತ್ ಹಾಂತುಂ ಭಾಗ್ ಘೆತ್‌ಲ್ಲ್ಯಾಂನಿ ವಿಂಚುನ್ ಕಾಡ್‌ಲ್ಲ್ಯಾ ದೊಗಾಂ ಉತ್ತೀಮ್ ಕವಿಂಕ್; ವಲ್ಲಿ ಕ್ವಾಡ್ರಸ್ ಆನಿ ಫಿಲೋಮೆನಾ ಫ್ರಾನ್ಸಿಸ್ಕೋ ಹಾಂಕಾಂ ಮಾ|ಬಾ|ಲ್ಯಾನ್ಸಿನ್ ತಶೆಂಚ್ ಮಾನೆಸ್ತಿಣ್ ಬೆನಡಿಕ್ಟಾ ರೆಬೆಲ್ಲೊನ್ ಮಾನ್ ಕೆಲೊ.

ಉಪ್ರಾಂತ್ ಚಲ್‌ಲ್ಲ್ಯಾ ವೇದಿ ಕಾರ್ಯಾಂತ್ ಮಾನೆಸ್ತ್ ಬಸ್ತಿ ವಾಮನ್ ಶೆಣಯ್, ಪರಿಷದೆಚೊ ಅಧ್ಯಕ್ಷ್ ಮಾನೆಸ್ತ್ ಗೋಕುಲ್‌ದಾಸ್ ಪ್ರಭು, ಉಪಾಧ್ಯಕ್ಷ್ ಮಾನೆಸ್ತ್ ಡಾ|ಚಂದ್ರಕಾಂತ್ ಶೆಣಯ್, ಮುಖೆಲ್ ಸಯ್ರೊ ಜಾವ್ನ್ ಮಾ|ಬಾ|ಲ್ಯಾನ್ಸಿ, ಮಹಾರಾಷ್ಟ್ರ ಕೊಂಕಣಿ ಅಸೋಸಿಯೇಶನಾಚೊ ಅಧ್ಯಕ್ಷ್ ಮಾನೆಸ್ತಿಣ್ ಬೆನಡಿಕ್ಟಾ ರೆಬೆಲ್ಲೊ ಆನಿ ಲೀಯೊ ಫೆರ್ನಾಂಡಿಸ್ ವೆದಿಚೆರ್ ಹಾಜರ್ ಆಸ್‌ಲ್ಲಿಂ.

ಆಪ್ಲ್ಯಾ ಉತ್ರಾಂನಿ ಮಾನೆಸ್ತ್ ಗೋಕುಲ್‌ದಾಸ್ ಪ್ರಭುನ್, ಚ್ಯಾರ್ ರಾಜ್ಯಾಂನಿ ಶಿಂಪ್ಡೊನ್ ಗೆಲ್ಲ್ಯಾ ಕೊಂಕ್ಣಿ ಭಾಸೆಚೊ ಪೋಸ್ ಕರ್ತೆಲ್ಯಾ ವೆವೆಗ್ಳ್ಯಾ ಸಂಸ್ಥ್ಯಾಂಚೊ ಉಲ್ಲೇಕ್ ಕರೀತ್, ಆಜ್ ಕೊಂಕ್ಣಿ ಭಾಸೆಚ್ಯಾ ಉದರ್ಗತೆಖಾತಿರ್ ಜಾಯ್ತೆ ಆವ್ಕಾಸ್ ಆಸಾತ್ ಆಸ್ತಾಂ, ಫಕತ್ತ್ ಏಕ್ ’ಎಕ್ವಟಿಕ್ ವಾವ್ರ್ ಕರ್ಚೆಂ ಬರೆಂ ಮನ್’ ಮಾತ್ರ್ ಹ್ಯಾ ಭಾಸೆಚ್ಯಾ ವಿಕಾಸಾಕ್ ಕಾರಣ್ ಕರುಂಕ್ ಸಕ್ತಾ ಮ್ಹಣಾಲೊ. ಮಾನೆಸ್ತ್ ಬಸ್ತಿ ವಾಮನ್ ಶೆಣಯಾನ್ ಮುಂಬಯಾಂತ್ ಕೊಂಕ್ಣಿ ಭಾಸೆಚ್ಯಾ ಮೊಗಾನ್ ವ್ಹಡಾ ಸಂಖ್ಯಾನ್ ಆಯಿಲ್ಲ್ಯಾ ಲೊಕಾಚಿ ವಾಖಣ್ಣಿ ಕರುನ್ ’ಕೆದ್ನಾಂಯ್ ಮಂಗ್ಳುರ್ ಆಯ್ಲ್ಯಾರ್ ವಿಶ್ವ್ ಕೊಂಕ್ಣಿ ಕೇಂದ್ರಾಕ್’ ಭೆಟ್ ದೀಂವ್ಕ್ ವಿಸರ್ನಾಕಾತ್ ಮ್ಹಣುನ್ ಉಲೊ ದಿಲೊ.

ಮುಖೆಲ್ ಸಯ್ರೊ ಮಾ|ಲ್ಯಾನ್ಸಿನ್ ’ಕೊಂಕ್ಣಿ ಭಾಸ್’ ಆಮ್ಚಿ ಮಾಯ್‌ಭಾಸ್ ಆನಿ ಆಮ್ಚ್ಯಾ ಮಾಯ್‌ಭಾಸೆಕ್ ಆಮಿ ಕೆದಿಂಚ್ ಸೊಡಿನಾಯೆ, ತಿ ಭಾಸ್ ಎಕಾ ಸಂಸ್ಕೃತೆಕ್, ಆನಿ ಎಕಾ ಸಭ್ಯತೆಕ್ ಘೆವ್ನ್ ಯೆತಾ ಮ್ಹಣಾಲೊ.

ಹೆಚ್ಚ್ ಸಂಧರ್ಭಿಂ ವೆವೆಗ್ಳ್ಯಾ ಸಂಸ್ಥ್ಯಾಂನಿ, ವೆವೆಗ್ಳ್ಯಾ ಪ್ರಕಾರಾಂನಿ ವಾವ್ರ್ ಕೆಲೆಲ್ಯಾ ಕೊಂಕ್ಣಿ ಮಾನೆಸ್ತಾಂಕ್ ವೇದಿಕ್ ಆಪವ್ನ್ ಮಾನ್ ಕೆಲೊ.

ಮಾನೆಸ್ತ್ ವಿನ್ಸಿನ್ ಉಪ್ಕಾರ್ ಆಟಯ್ಲೊ ತರ್, ಹೆಂ ಅಪುರ್ಭಾಯೆಚ್ಯಾ ಕಾರ್ಯಾಚೆಂ ನಿರ್ವಾಹಣ್ ಮಾನೆಸ್ತ್ ಸಿರಿಲ್ ಕ್ಯಾಸ್ತಲಿನೊ ಪೆರ್ನಾಲ್ ಹಾಣೆಂ ಕೆಲೆಂ.

ರುಚಿಕ್ ಜೆವ್ಣಾಸವೆಂ ಸಂಪ್‍ಲ್ಲ್ಯಾ ಕಾರ್ಯಾಂತ್ ಸುಮಾರ್ ದೆಡ್ಶಾಂ ವಯ್ರ್ ಕೊಂಕ್ಣಿ ಲೋಕ್ ಹಾಜರ್ ಆಸ್ಲೊ.

- ಆಮ್ಚೊ ಭಾತ್ಮಿ