[ಖಬಾರ್:] ಮುಂಬಯಾಂತ್ ಕಥಾಪಾಠ್ ಆನಿ ಕೊಂಕ್ಣಿ ಕವಿಸಮ್ಮೇಳ್

(ಮುಂಬಯ್, 14 ಫೆಬ್ರೆರ್): ಪ್ರಗತಿಶೀಲ್ ಕೊಂಕ್ಣಿ ಬರಯ್ಣಾರಾಂಚ್ಯಾ ಎಕ್ತಾರಾಚ್ಯಾ ಮುಖೇಲ್‌ಪಣಾಖಾಲ್ ಕೊಂಕ್ಣಿ ಮಟ್ವ್ಯಾ ಕಾಣ್ಯಾಂಚೆರ್ ಅದೇಸಾಚೆಂ ಅಧ್ಯಯನ್ ಕಾಮಾಸಾಳ್, ಹೆಚ್ಚ್ ಫೆಬ್ರೆರಾಚ್ಯಾ 14 ತಾರಿಕೆರ್, ಮಿರಾ ರೋಡ್ ಫಿರ್ಗಜೆಚ್ಯಾ ಸಭಾಸಾಲಾಂತ್ ಮಾಂಡುನ್ ಹಾಡ್ಲೆಂ.

ಕಾಮಾಸಾಳಾಚೆಂ ಉಗ್ತಾವಣ್ ಕರುನ್ ಮಾ|ಜೋಕಿಮ್ ರೊಡ್ರಿಗಸ್ ಮ್ಹಣಾಲೊ; "ಮ್ಹಜ್ಯಾ ಮಿಸಾಂವಾಕ್ ಲಾಗೊನ್ ಹಾಂವ್ ಸಂಸಾರಾಚ್ಯಾ ವೆವೆಗ್ಳ್ಯಾ ದೇಶಾಂನಿ ಭಂವ್ಲಾಂ, ವೆವೆಗ್ಳ್ಯೊ ಭಾಸೊ ಉಲಯ್ಲಾಂ ತರ್‌ಯೀ, ಮ್ಹಜ್ಯಾ ಕಾಳ್ಜಾಂತ್ಲಿ ಭಾಸ್ ಅಜೂನ್ ಕೊಂಕಣಿ ಜಾವ್ನಾಸಾ, ಆನಿ ತಿ ಮೊರಾಪಾಸೊನ್ ಮ್ಹಜಿ ಆವಯ್‌ಭಾಸ್ ಜಾವ್ನ್ ಉರ್ತಲಿ"

ಸ್ವಾಗತ್ ಉತ್ರಾಂನಿ, ಪ್ರಗತಿಶೀಲ್ ಕೊಂಕ್ಣಿ ಎಕ್ತಾರಾಚ್ಯಾ ಮುಂಬಯ್ ಪಂಗ್ಡಾಚೊ ಮುಖೆಲ್ ಸಂಯೋಜಕ್ ಜೋಯ್ ಪಾಲಡ್ಕಾ ಮ್ಹಣಾಲೊ "ಬದ್ಲೊನ್ ಯೆಂವ್ಚ್ಯಾ ಪರಿಗತೆಂತ್ ಆನಿ ಫಕತ್ ತ್ಯಾ ಬದ್ಲಾವಣೆಕ್ ದೆಖೊನ್ ಬೊಸ್ಚೆಪ್ರಾಸ್, ಎಕ್ವಟಿತ್ ಜಾವ್ನ್ ಕೊಂಕ್ಣಿ ಕಾಮಾಚೊ ಇರಾದೊ ತಶೆಂಚ್ ಮಿಸಾಂವ್ ಹಾತಿಂ ಘೆತ್ಲೆಂ ತರ್, ತಸಲೊ ವಾವ್ರ್ ಕೊಂಕ್ಣಿ ಸಾಹಿತ್ಯಾಕ್ ಉಪ್ಕಾರ್ತಲೊ" ಮ್ಹಣಾಲೊ.

ಪ್ರಮುಖ್ ಉಲವ್ಪಿ ಜಾವ್ನ್ ಆಯಿಲ್ಲ್ಯಾ ಡಾ|ಎಡ್ವರ್ಡ್ ನಜ್ರೆತಾಚಿ ವ್ಹಳೊಕ್ ವಲ್ಲಿ ಕ್ವಾಡ್ರಸಾನ್ ಕರುನ್ ದಿತಚ್ಚ್, ಡಾ|ನಜ್ರೆತಾನ್ ’ಹಾಂವ್ ಮಟ್ವ್ಯೊ ಕಥಾ ಕಶ್ಯೊ ಬರಯ್ತಾಂ’ ಮ್ಹಳ್ಳ್ಯಾ ವಿಶ್ಯಾಚೆರ್ ಸವಿಸ್ತಾರ್ ರಿತಿನ್ ಆಪ್ಲಿ ಜಾಣ್ವಾಯ್ ಆನಿ ಮಾಹೆತ್ ವಾಂಟುನ್ ಘೆತ್ಲಿ.

ಉಪ್ರಾಂತ್ ನೆರಿ ನಜ್ರೆತಾನ್ ವಲ್ಲಿ ಕ್ವಾಡ್ರಸಾಚ್ಯಾ ಕಾಣ್ಯಾಂಚ್ಯಾ ವಾವ್ರಾಚಿ ವ್ಹಳೊಕ್ ಕರ್ನ್ ದಿಲಿ, ಆನಿ ’ಸಾಹಿತ್ಯ್ ಮ್ಹಳ್ಯಾರ್ ಕಿತೆಂ, ಮಟ್ವ್ಯೊ ಕಾಣ್ಯೊ ತಾಂತ್ರಿಕ್ ರಿತಿನ್ ಕಶ್ಯೊ ಆಸುಂಕ್ ಜಾಯ್, ಮಟ್ವ್ಯಾ ಕಾಣ್ಯಾಂಚೆ ವರ್ಗ್, ಪ್ರಕಾರ್ ವಿಶ್ಯಾಂತ್ ಸವಿಸ್ತಾರ್ ಜಾಣ್ವಾಯ್ ಆಟಾಪ್ಚೆಂ ಅಧ್ಯಯನ್ ವಲ್ಲಿ ಕ್ವಾಡ್ರಸಾನ್ ಚಲವ್ನ್ ವೆಲೆಂ.

ಹ್ಯಾ ಅಧ್ಯಯನಾ ಖಾತಿರ್ ಹಿಂದಿಂತ್ಲಿ ’ನಮಕ್ ಕ ದರೊಗಾ (ಮುನ್ಶಿ ಪ್ರೇಮ್‌ಚಂದಾಚಿ ಮಟ್ವಿ ಕಥಾ)’, ಇಂಗ್ಲಿಶಾಂತ್ಲಿ ’ದ ಬೆಟ್ (ಆಂಟೊನಿ ಚೆಕೋಫಾಚಿ ಮಟ್ವಿ ಕಥಾ)’ ತಶೆಂಚ್ ಕಾನಡಿಚಿ ’ಕೊನೆಯ ಗಿರಾಕಿ (ನಿರಂಜನಾಚಿ ಮಟ್ವಿ ಕಥಾ)’ ವಿಂಚ್ಲ್ಯೊ ತಶೆಂಚ್ ಹ್ಯಾ ಕಾಣ್ಯಾಂನಿ ಸಾಹಿತಿಕ್ ತಶೆಂಚ್ ಸಾಮಾಜಿಕ್ ಶೆತಾಂತ್ ಉಟಯಿಲ್ಲ್ಯಾ ಚಿಂತ್ಪಾಚೆರ್ ಆರ್ಸೊ ಧರ್ಲೊ.

ತ್ಯೇ ಉಪ್ರಾಂತ್‌ಲ್ಯಾ ಸಂವಾದಾಂತ್ ಅನಂತ್ ಅಮೆಂಬಳ್, ಜೋಯ್ ಪಾಲಡ್ಕಾ, ಗ್ರೆಗೊರಿ ನಿಡ್ಡೋಡಿ ಆನಿ ಹಿಲರಿ ಡಿ’ಸಿಲ್ವಾ ಹಾಣಿಂ ಭಾಗ್ ಘೆತ್ಲೊ. ದಿವೊ ಪತ್ರಾಚೊ ಸಂಪಾದಕ್ ಮಾನೆಸ್ತ್ ಲಾರೆನ್ಸ್ ಕುವೆಲ್ಹೊ, ಆನಿ ಮಾನೆಸ್ತಿಣ್ ಸುಜಾನಾ ಕುವೆಲ್ಹೊ, ಹ್ಯಾರಿಬೋಯ್, ಆನ್ಸಿ ಪಾಲಡ್ಕಾ, ಲಾರೆನ್ಸ್ ಡಿ’ಸೋಜ ಕಮಾನಿ, ಜೋನ್ ಕ್ರಾಸ್ತಾಸವೆಂ ಲಗ್ಬಗ್ ಚಾಳೀಸ್ ಜಣಾಂನಿ ವಾಂಟೊ ಘೆತ್ಲೊ.

ಹಿಲರಿ ಡಿ’ಸಿಲ್ವಾನ್ ಉಪ್ಕಾರ್ ಬಾವುಡ್ಲೊ.

ಕವಿಸಮ್ಮೇಳ್ (ಕವಿಸಂವಾದ್ ಆನಿ ಜೆ.ಬಿ.ಸಿಕ್ವೇರಾ ಸ್ಮಾರಕ್  ಕವಿತಾಸ್ಪರ್ಧೊ)

ಕೊಂಕಣಿ ಭಾಶಾ ಮಂಡಳ್ ಆನಿ ಪ್ರಗತಿಶೀಲ್ ಕೊಂಕ್ಣಿ ಬರಯ್ಣಾರಾಂಚ್ಯಾ ಎಕ್ತಾರಾಚ್ಯಾ ಜೋಡ್ ಆಯೋಗಾಂತ್ ದನ್ಪಾರಾಂ ಉಪ್ರಾಂತ್ಲ್ಯಾ ಕಾರ್ಯಾಂತ್, ಡೆಲಿಶಾ ಡಿ’ಸೋಜಾಚ್ಯಾ ಸಂಗೀತಾಂತ್ ’ಕೊಂಕ್ಣಿ ಆಮ್ಚಿ ಮಾಂಯ್, ಕೊಂಕ್ಣಿ ಆಮ್ಕಾಂ ಜಾಯ್’ ಮ್ಹಳ್ಳೆಂ ಅಪುರ್ಭಾಯೆಚ್ಯಾ ಪದಾನ್ ಲೆವಿನ್ ಫೆರ್ನಾಂಡಿಸ್ ಆನಿ ಲಿರೋನ್ ಫೆರ್ನಾಂಡಿಸ್ ಹಾಣಿಂ ಸುರ್ವಾತ್ ಕೆಲಿ.

ಕವಿಸಮ್ಮೇಳಾಚೆಂ ಉಗ್ತಾವಣ್ ಕರುನ್ ಮಾ|ಮೆಲ್ವಿನ್ ಡಿ’ಕುನ್ಹಾನ್ ಜಶೆಂ ರಿಲೆ ಖೆಳಾಂತ್ ಸರ್ವ್ ಸಾಂದ್ಯಾಂನಿ ತ್ಯಾ ಬೇಟನ್ ಎಕ್ಲ್ಯಾ ಥಾವ್ನ್ ದುಸ್ರ್ಯಾಕ್ ಪಾಶಾರ್ ಕರುಂಕ್ ಆಸ್ಚೆಪರಿಂಚ್ ಆಮಿ ಸಯ್ತ್ ಆಮ್ಚ್ಯಾ ಮುಖ್ಲ್ಯಾ ಪಿಳ್ಗೆಕ್ ಹಿ ಕೊಂಕ್ಣಿ ಭಾಸ್, ಜಿ ಆಮ್ಚಿ ಮಾಯ್‌ಭಾಸ್ ಪಾವಂವ್ಚಿ ವ್ಹಡ್ ಜವಾಭ್ದಾರಿ ಆಮ್ಚಿ ಜಾವ್ನಾಸಾ, ದೆಕುನ್ ಖಂಯ್ಚರ್ ಕೊಂಕ್ಣಿ ಚಟುವಟಿಕೊ ಜಾತಾತ್, ತಾಕಾ ಪುರ್ತೊ ಪಾಟಿಂಬೊ ದೀಂವ್ಕ್ ಲೊಕಾಂಕ್ ಉಲೊ ದಿಲೊ.

ಡೆಸ್ಮಂಡ್ ಸಲ್ಡಾನ್ಹಾ ಆನಿ ಡೆಲಿಶಾ ಡಿ’ಸೋಜಾ ಹಾಣಿಂ ಅಪುರ್ಭಾಯೆಚಿಂ ಕೊಂಕ್ಣಿ ಪದಾಂ ಗಾಯ್ಲಿಂ.

ಕೊಂ.ಭಾ.ಮಂ. ಅಧ್ಯಕ್ಷ್ ಮಾನೆಸ್ತ್ ಜೋನ್ ಡಿ’ಸಿಲ್ವಾನ್ ಸ್ವಾಗತ್ ಮಾಗೊನ್ ಜೆ.ಬಿ.ಸಿಕ್ವೇರಾಚಿ ಸವಿಸ್ತಾರ್ ವಳೊಕ್ ಕರ್ನ್ ದಿತೆಚ್ಚ್, ಹಿಲರಿ ಡಿ’ಸಿಲ್ವಾನ್ ಕವಿತಾಶೆತಾಂತ್ ವಲ್ಲಿ ಕ್ವಾಡ್ರಸಾನ್ ಕೆಲ್ಲ್ಯಾ ವಾವ್ರಾಚಿ ಸವಿಸ್ತಾರ್ ವ್ಹಳೊಕ್ ಕರುನ್ ದಿತೆಚ್ಚ್, ವಲ್ಲಿ ಕ್ವಾಡ್ರಸಾನ್ ಸಂವಾದಿತ್ ಜಾಂವ್ಕ್ ಆಸ್ಚ್ಯಾ ಕವಿ ಆನ್ಸಿ ಪಾಲಡ್ಕಾಚಿ ವ್ಹಳೊಕ್ ಕರ್ನ್ ದಿಲಿ ತಶೆಂಚ್ ತಾಚೆಲಾಗಿಂ ಸವಿಸ್ತಾರ್ ರಿತಿನ್ ಸಂವಾದ್ ಚಲವ್ನ್ ವೆಲೊ.

ಸಂವಾದ್ ಚಲೊನ್ ಆಸ್ಚೆಪರಿಂಚ್ ಜೆ.ಬಿ.ಸಿಕ್ವೇರಾ ಸ್ಮಾರಕ್ ಕವಿತಾಸ್ಪರ್ಧ್ಯಾಂತ್ ಭಾಗ್ ಘೆತ್‌ಲ್ಲ್ಯಾ ಕವಿಂನಿ ಆಪಾಪ್ಲಿಂ ಕವಿತಾ ವಾಚ್ಲಿಂ. ಆನಿ ಹ್ಯಾ ಸ್ಪರ್ಧ್ಯಾಂತ್ ಜಿಕ್ಲೆಲ್ಯಾಂಕ್ ಇಮಾಮಾಂ ವಾಂಟ್ಲಿಂ:

ಪಯ್ಲೆಂ ಇನಾಮ್ (3000 ನಗದ್ ಆನಿ ಬೂಕ್): ನೆರಿ ನಜ್ರೆತ್ ತಾಕೊಡೆ
ದುಸ್ರೆಂ ಇನಾಮ್ (2000 ನಗದ್ ಆನಿ ಬೂಕ್): ಅಶೋಕ್ ಡಾಯಸ್ ಬೈಂದೂರ್
ತಿಸ್ರೆಂ ಇನಾಮ್ (1000 ನಗದ್ ಆನಿ ಬೂಕ್): ಪ್ರಸನ್ನ ನಿಡ್ಡೋಡಿ
ಭುಜ್ವಣೆಚೆಂ ಇನಾಮ್ (ಬೂಕ್): ಲೆವಿನ್ ಫೆರ್ನಾಂಡಿಸ್

’ಕಾವ್ಯ’, ’ಭಾಸ್’, ’ಪ್ರಸ್ತುತಿ’ ಆನಿ ’ಸೃಜನಶೀಲತಾ’ ಮ್ಹಳ್ಳ್ಯಾ ಚ್ಯಾರ್ ಪ್ರಕಾರಾಂನಿ ಹ್ಯಾ ಕವಿತಾಸ್ಪರ್ಧ್ಯಾಚಿ ವೊರಾವ್ಣಿ ಕೆಲ್ಲ್ಯಾ ಆನ್ಸಿ ಪಾಲಡ್ಕಾ, ವಲ್ಲಿ ಕ್ವಾಡ್ರಸ್ಸವೆಂ ತಿಸ್ರೊ ವೊರಯ್ಣಾರ್ ಜಾವ್ನಾಸ್‌ಲ್ಲ್ಯಾ ಅನಂತ್ ಅಮೆಂಬಳಾನ್ ಸ್ಪರ್ಧ್ಯಾಂತ್ ಆಯಿಲ್ಲ್ಯಾ ಕವಿತೆಂಚಿ ವಾಖಣ್ಣಿ ಕೆಲಿ.

ಮುಖೆಲ್ ಸಯ್ರೊ ಜಾವ್ನ್ ಮಂಗ್ಳುರ್ ಥಾವ್ನ್ ಆಯಿಲ್ಲೊ ಡಾ|ಎಡ್ವರ್ಡ್ ನಜ್ರೆತಾನ್ ಆಪ್ಲ್ಯಾ ಉಲವ್ಪಾಂತ್ ಕೊಂಕ್ಣಿ ಸಾಹಿತ್ಯಾಚೊ ವಾವ್ರ್ ಕರುಂಕ್ ಸೂಕ್ತ್ ಸಂಧರ್ಭ್ ಆಸ್ಚೆ ಭೋವ್ ಉಣೆಂ ಜಾಲ್ಲ್ಯಾ ಹ್ಯಾ ಕಾಳಾರ್ ಸಯ್ತ್ ಕೊಂಕ್ಣಿ ಮೋಗಿಂನಿ ಕೊಂಕ್ಣಿ ಉರ್ಭಾ ಕೆದಿಂಚ್ ನಿಂವಾನಾಯೆ ಪಳೆಂವ್ಚಿ ಜವಾಭ್ದಾರಿ ಘೆಂವ್ಕ್ ಜಾಯ್, ಆನಿ ತೊ ವಾವ್ರ್ ಕರ್ತೆಲ್ಯಾಂಕ್ ಜೊಕ್ತೊ ಪಾಟಿಂಬೊ ಮೆಳಾನಾ, ಪುಣ್ ಖೊಡಿ ಚಡ್ ಮೆಳ್ತಾತ್ ಮ್ಹಣುನ್ ಕಾಳಿಜ್ ಲ್ಹಾನ್ ಕರ್ನ್ ಬೊಸ್ಚ್ಯಾಕೀ, ಚಡಿತ್ ಪ್ರೇರಿತ್ ಜಾಂವ್ಚ್ಯೊ ವಾಟೊ ಸೊಧುಂಕ್ ಜಾಯ್ ಆನಿ ಹೆಂ ಕಾಮ್ ತಿತ್ಲೆಂ ಸಲೀಸ್ ನ್ಹಯ್. ಜಶೆಂ ಮಂಗ್ಳುರಾಂತ್ ಜಾತಾ ತಶೆಂಚ್ ಮುಂಬಯಾಂತ್ ಸಯ್ತ್ ಕೊಂಕ್ಣಿ ವಾವ್ರ್ ಕರ್ತೆಲ್ಯಾಂನಿ ಎಕಾಮೆಕಾ ಸ್ಪಂದನ್ ಕರ್ನ್, ಎಕಾಮೆಕಾ ಆಧಾರ್ ದೀವ್ನ್ ಕೊಂಕ್ಣೆಚ್ಯಾ ಬರೆಪಣಾಚೊ ಶೆವೊಟ್ ದವರ್ನ್ ವಾವ್ರ್ ಕೆಲೊ ತರ್ ತಸಲೊ ವಾವ್ರ್ ಕೊಂಕ್ಣೆಚ್ಯಾ ಉದರ್ಗತೆಕ್ ಉಪ್ಕಾರ್ತಾ ಮ್ಹಣಾಲೊ.

ಜೋಯ್ ಪಾಲಡ್ಕಾನ್ ಹಿಂ ದೊನೀಂ ಕಾರ್ಯಿಂ ಚಲವ್ನ್ ವೆಲಿಂ.

- ಆಮ್ಚೊ ಭಾತ್ಮಿ, ಪ್ರಗತಿಶೀಲ್ ಕೊಂಕ್ಣಿ ಬರಯ್ಣಾರಾಂಚೊ ಎಕ್ತಾರ್