![]() |
|
[ಕಾದಂಬರಿ]
ಸಯ್ತಾನಾಚೊ
ವಕೀಲ್ (Devil's
Advocate)
ಮೂಳ್: ಮೋರಿಸ್
ವೆಸ್ಟ್. ಕೊಂಕಣಿ:
ಜೆರಾಲ್ಡ್ ವಿ. ಕಾರ್ಲೊ, ಹಾಸನ್ |
|
ಅವಸ್ವರ್ 1
ಮೊರ್ತೆಲ್ಯಾಂಕ್ ಸಾಸ್ಣಿಕ್ ಜಿಣ್ಯೆಕ್ ತಯಾರ್ ಕರ್ಚೆಂ
ಕಾಮ್ ತಾಚೆಂ ಜಾವ್ನಾಸ್ಲೆಂ. ಪುಣ್ ಅಪುಣ್‌ಚ್ ತಯಾರ್
ನಾತ್‌ಲ್ಲಿ ಗಜಾಲ್ ಗಮ್ತಾನಾ ತಾಕಾ ಅಘಾತ್ ಜಾಲೊ. ತೊ
ಎಕ್ಲೊ ವಾಸ್ತಾವ್‌ವಾದಿ ಜಾವ್ನಾಸ್ಲೊ. ಮ್ಹನಿಸ್
ಜಲ್ಮಾತಾನಾಂಚ್ ಆಪ್ಲ್ಯಾ ಮರ್ಣಾಚೆಂ ಫರ್ಮಾಣ್ ಬರವ್ನ್
ಘೆವ್ನ್ಂಚ್ ಜಲ್ಮಾತಾ ಮ್ಹಣೊನ್ ತೊ ಜಣಾಸ್ಲೊ. ತೊ ಥಂಡ್
ವ್ಯಕ್ತಿತ್ವಾಚೊ ಜಾವ್ನಾಸೊನ್ ಶಿಸ್ತ್ ತಾಕಾ ಕರ್ಕರೆ
ಹಾಡಾಯ್ನಾತ್ಲಿ ತರೀ ಅಮರತ್ವಾಚ್ಯಾ ಭ್ರಾಂತೆಕ್ ವಳಗ್
ಜಾಲ್ಲೊ.
ಮರ್ಣಾನ್, ಕಸಲೊಚ್ ಹಿಶಾರೊ ದೀನಾಸ್ತಾಂ
ಎಕಾ ಚೊರಾ ಪರಿಂ ಅವ್ಚಿತ್, ಕುಸ್ಕುಟ್ ತಯಾರ್ ನಾತ್ಲ್ಯಾ
ವೆಳಾ ಆಕ್ರಮಣ್ ಕರ್ಚಿ ರೀತ್ ಜಾವ್ನಾಸ್ಲಿ. ದಸ್ತುರೆ
ಫರ್ಮಾಣೆ ತಾಣೆ ಆಪ್ಲೊ ಭಾವ್ ನಿದೆ ಬರಿಂ ವ ಎಕಾಚ್ಛಾಣೆ
ಹಿಂಸಾತ್ಮಕ್ ರಿತಿನ್ ಯೆಂವ್ಚೆ ಆಸ್ಲೆಂ.
ಮರ್ಣಾಚಿ
ರೀತ್. ಅಸಲ್ಯಾ ಮರ್ಣಾಕ್ ಮ್ಹನಿಸ್ ಕಿತ್ಲೊ ಆಶೆವ್ನ್
ಆಸ್ತಾ! ಮಾಗೊನ್ ಆಸ್ತಾ! ಅಸಲೆಂ ಮರಣ್ ತಾಕಾ
ನಿರಾಕರ್ಸಿಲ್ಲೆ ವೆಳಾ ತೊ ಕಿತ್ಲೊ ಕಂಗಾಲ್ ಜಾತಾ,
ಕೊಡ್ಸಾಣೆನ್ ಭರ್ತಾ, ಆನಿ ದೆದೆಸ್ಪರ್ ಜಾತಾ.
ಲಂಡನಾಂತ್ಲ್ಯಾ ತ್ಯಾ ವಸಂತ್ ಋತುಚ್ಯಾ ತರ್ನ್ಯಾ ವೊತಾಂತ್
ಬಸೊನ್ ಆಸ್ಲೊ ಬ್ಲೇಸ್ ಮೆರ್ಡಿತ್ ಆಪ್ಲ್ಯಾ ಮರ್ಣಾ ವಿಶಿಂ
ಚಿಂತುನ್ ಆಸ್ಲೊ. ಸಮಧಾನಾಚೆಂ ಮರಣ್ ತಾಕಾ ನಾ ಫಾವೊ
ಕೆಲ್ಲೆಂ. ವಾರ್‍ಯಾಕ್ ಧಲೊನ್ ಆಸ್ಚಿಂ ಕ್ರೋಕಸ್,
ಡ್ಯಾಫೊಡಿಲ್ ಫುಲಾಂ, ಹಾತಾಂತ್ ಹಾತ್ ಮೆಳವ್ನ್ ಜಿವಿತಾಚೆ
ಅಖ್ರೇಚೆ ಥೆಂಬೆ ಚಾಕೊನ್ ಆಸ್ಚಿಂ ಪ್ರಾಯೆಸ್ತ್ ಜೊಡಿಂ,
ಎಕಾಮೆಕಾ ವೆಂಗೆಂತ್ ಸೆರ್ವಾಲ್ಲಿಂ ತನಿಂ
ಜೊಡಿಂಸ॒ಗ್ಳ್ಯಾನಿಂ ಸೃಷ್ಟೆಚೆಂ ಕಾಯೆಂ ಭರಾನ್ ಚಲೊನ್
ಆಸ್ಚೆಂ ದೆಕ್ತಾನಾ ಅಪ್ಣಾಕ್ ಮಾತ್ರ್ ಮೊರೊಂಕ್ ಆಸಾ
ಮ್ಹಳ್ಳ್ಯಾ ಕೊಡ್ಹು ಚಿಂತ್ಪಾನ್ ಮೆರ್ಡಿತ್ ಫುಮಾರ್ ಜಾಲೊ.
ಕಾರ್ಸಿನೋಮಾ! ಕಾಂಯ್ಚ್ ದುಬಾವ್ ನಾ. ಎಕ್ಸ್‌ರೇಚ್ಯಾ
ಮಧೆಂಗಾತ್ ಬೋಟ್ ಭಂವ್ಡಾವ್ನ್ ದಾಕ್ತೆರಾನ್ ಮ್ಹಳ್ಳೆಂ.
ವಾಡಾವಳ್ ಸಾರ್ಕಿ ಜಾಂವ್ಕ್ ನಾ ತರೀ ಕೆಸೊಳಿ ಕೆನ್ಸರಾಚಿಚ್
ಮ್ಹಣ್ಚಾಂತ್ ಕಾಂಯ್ಚ್ ದುಭಾವ್ ನಾ! ತಾಣೆ ತೀರ್ಪ್
ದಿಲ್ಲೆಂ.
ಉಜಳ್ಚ್ಯಾ ಎಕ್ಸ್‌ರೇಚೆರ್ ಭಂವ್ಚೆ
ದಾಕ್ತೆರಾಚೆಂ ಬೋಟ್ ಪಳೆತಾನಾ ಮೆರ್ಡಿತಾಕ್ ಪರಿಸ್ಥಿತಿಚಿ
ಗಂಭೀರತಾ ಕಳೊನ್ ಆಯ್ಲಿ. ತಾಚಿ ಸಗ್ಳಿ ಜಿಣಿ
ದುಸ್ರ್ಯಾಂಚ್ಯಾ ಜಿಣ್ಯೆಚ್ಯಾ ಸತಾಂ ವಿಶ್ಯಾಂತ್, ದರ್ಣಿಕ್
ಶೆವ್ಟಾಯಿಲ್ಲ್ಯಾ ತಾಂಚ್ಯಾ ಪಾತ್ಕಾಂ ವಿಶ್ಯಾಂತ್
ಸಮ್ಜಂವ್ಚಾಂತ್ ಖರ್ಚಾಲ್ಲಿ. ಆತಾಂ ತೊ ಆಪ್ಣಾ ಭಿತೆರ್ ಆನಿ
ಥೊಡ್ಯಾಚ್ ತೆಂಪಾನ್ ಆಪ್ಲಿ ಜಿಣಿ ನಾಸ್ ಕರುಂಕ್, ಫುಲೊನ್
ಯೆಂವ್ಚ್ಯಾ ಕೆಸೊಳೆಕ್ ಪಳೆತಾಲೊ.
ತಾಣೆ ಉದ್ವೇಗಾ ವಿಣೆ
ವಿಚಾಲೆಂ: ಒಪ್ರೇಶನ್ ಸಾಧ್ಯ್ ನಾಂಗಿ?
ದಾಕ್ತೆರ್
ಸ್ಕ್ರೀನಾಚೊ ಲೈಟ್ ಪಾಲ್ವವ್ನ್ ಮೆಜಾ ಸಶಿಂ ಬಸ್ಲೊ.
ಮೆರ್ಡಿತಾಚೆರ್ ಉಜ್ವಾಡ್ ಪಡ್ಚೆ ಬರಿಂ ತಾಣೆ ಟೇಬಲ್
ಲ್ಯಾಂಪ್ ಘುಂವ್ಡಾಯ್ಲೊ. ದಾಕ್ತೆರ್, ಕಾಳೊಕಾಂತ್.
ಪಿಡೆಸ್ತ್, ಮ್ಯೂಸಿಯಮಾಂತ್ಲ್ಯಾ ಮಾರ್ಬಲಾಚ್ಯಾ ಮೂರ್ತಿ
ಬರಿಂ. ಮೆರ್ಡಿತಾಕ್ ದಾಕ್ತೆರಾಚಿ ಸಜಾವಣ್ ಸಮ್ಜೊಂಕ್
ಕಷ್ಟ್ ಜಾಲೆನಾಂತ್. ತೆ ದೊಗೀ ಪ್ರೊಫೆಶನಲ್ ಜಾವ್ನಾಸ್ಲೆ.
ದೊಗಾಂಯ್ಚ್ಯಾ ಭೆಸಾಂತ್ ಮ್ಹನ್ಶಾ ಸಂಪರ್ಕ್ ಪ್ರಮುಖ್
ಜಾವ್ನಾಸ್ಲೊ. ತಾಂಚ್ಯಾ ಸಂಪರ್ಕಾಕ್ ಆಯ್ಲೆಲ್ಯಾ ಲಾಗ್ಗಿಂ
ತಾಣಿ ಭಾವನಾಂರಹಿತ್ ಜಾವ್ನ್ ಆಸಾಜಾಯ್ ಅಸ್ಲೆಂ. ನಾ ತರ್,
ಸಸಾಯ್ ಮಾಗೊನ್ ಆಯ್ಲೆಲ್ಯಾಂಕ್ ತಾಣಿ ಕುಮಕ್ ಕರ್ಚಿ
ಸಾಧ್ಯತಾ ನಾತ್ಲಿ.
ಒಪ್ರೇಶನ್ ಕರುಂಕ್ ಹಾಂವ್
ಸಕಾನ್ ಪುಣ್ ತುಂ ತೀನ್ ಮಯ್ನ್ಯಾನಿಂ ಮೊರ್ತೊಲೊಯ್. ನಾ
ತರ್, ಥೊಡೊ ತೇಂಪ್ ಚಡ್ತಾವ್ ವಾಂಚ್ತೊಲೊಯ್, ಪುಣ್ ದುಕಿನ್
ವಳ್ವಳೊನ್ ಮೊರ್ತೊಲೊಯ್.
ಚಡ್ತಾವ್ ಮ್ಹಳ್ಯಾರ್ ಕಿತ್ಲೊ
ತೇಂಪ್?
ಸ ಥಾವ್ನ್ ಬಾರಾ ಮಯ್ನೆ.
ಕಷ್ಟಾಂಚಿ ವಿಂಚವ್ಣ್.
ವ್ಹಯ್. ಪುಣ್ ತುಂವೆ
ಕರಿಜಾಯ್ಚ್ ಪಡ್ತೆಲಿ.
ಮ್ಹಾಕಾ ಸಮ್ಜತಾ.
ಬಸ್‌ಲ್ಲೆ ಕಡೆಚ್ ದಾಕ್ತೆರ್ ಸದಿಳ್ ಜಾಲೊ. ತಾಕಾ
ಉದ್ವಿಗ್ನ್ ಕೆಲ್ಲಿ ವಿಷಮ್ ಘಡಿ ಉತ್ರಾಲ್ಲಿ. ತಾಣೆ
ಚಿಂತ್ಲ್ಲೆ ಫ್ರಮಾಣೆ ತಾಚ್ಯಾ ಪಿಡೆಸ್ತಾನ್ ಪರಿಸ್ಥಿತಿ
ಸಮ್ಜೊನ್ ಘೆತ್‌ಲ್ಲಿ . ತೊ ಬುದ್ವಂತ್. ಕೊಣಾಯ್ಚಿ ಮಜತ್
ನಾಸ್ತಾಂ ಅಪ್ಣಾಕ್ಚ್ ಸಾಂಬಾಳುಂಕ್ ಸಕ್ತಲೊ. ಅನಿವಾರ್ಯ್
ಪರಿಸ್ಥಿತೆಕ್ ತೊ ಖಂಡಿತ್ ಖಾಂಧ್ ಮಾರ್ತೊಲೊ ಆನಿ ವೇಳ್
ಘಡಿ ಯೆತಾನಾ ತೊ ಘನಾನ್ ದೂಕ್ ಸೊಸ್ತೊಲೊ.
ಆಪ್ಲ್ಯಾ ಶಾಂತ್ ಆನಿ ಸುಕ್ಯಾ ತಾಳ್ಯಾನ್ ಮೆರ್ಡಿತ್
ಮ್ಹಣಾಲೊ: ಎಕಾದಾವೆಳಾ ಒಪ್ರೇಶನ್ ಕರಿನಾಸ್ತಾಂ ಹಾಂವೆ
ಮ್ಹಜಾ ಕಾಮಾಕ್ -ರೋಮಾಕ್-ವಚೊಂಕ್ ಚಿಂತ್ಲ್ಯಾರ್, ಥೈಂಚ್ಯಾ
ಮ್ಹಜಾ ದಾಕ್ತೆರಾ ಖಾತಿರ್ ಸಗ್ಳೊ ರಿಪೋರ್ಟ್ ಬರವ್ನ್
ದಿಶಿಗೀ?
ಖಂಡಿತ್ ಜಾವ್ನ್ ಮೊನ್ಸಿಜ್ಞೊರ್ ಮೆರ್ಡಿತ್.
ತುಜೆಂ ಧೈರ್ ಹಾಂವ್ ಮೆಚ್ವಾತಾಂ. ಹಾಂವ್ ಕಥೊಲಿಕ್ ನ್ಹಯ್
ತರೀ, ಹ್ಯಾ ಸಂದರ್ಭಾರ್ ತುಜೊ ಭವಾಡ್ತ್ ತುಕಾ ಖಂಡಿತ್
ಜಾವ್ನ್ ಉಪ್ಕಾರ್ತಾಲೊ.
ಹಾಂವ್ ಯೀ ತಶೆಂಚ್ ಚಿಂತುನ್
ಆಸಾಂ ಡೊಕ್ಟರ್ ಮೆರ್ಡಿತಾನ್ ಸಾಂಗ್ಲೆಂ. ಪುಣ್ ತಾಕಾ
ಭರ್ವಾಸೊ ನಾತ್ಲೊ.
ಆತಾಂ ಪಾಕಾಂತ್ಲ್ಯಾ ತ್ಯಾ
ಬಾಂಕಾಚೆರ್ ಬಸೊನ್ ತೊ ಆಪ್ಲಿ ಮುಕ್ಲಿ ಜಿಣಿ ನಿಯಾಳುಂಕ್
ಲಾಗ್ಲೊ. ವಾರ್‍ಯಾಂತ್ ವಸಂತ್ ಋತುಚೊ ಸ್ವಾಧೀಕ್ ಪರ್ಮಳ್
ಮಿಸ್ಳೊನ್ ಆಸುಲ್ಲೊ. ತರ್ನೆಂ ವೋತ್ ನವಿ ಹುರುಪಾಯ್
ಹಾಡಿಲಾಗ್ಲಿ, ಪುಣ್ ಮೆರ್ಡಿತಾಚ್ಯಾ ವಾಂಟ್ಯಾಕ್ ತೆಂ
ಸಕ್ಕಡ್ ನಿರ್ಫಳ್ ಜಾವ್ನಾಸ್ಲೆಂ. ವಿದ್ಯಾರ್ಥಿ ಜೀವನಾಂತ್
ಎಕಾ ಪಾದ್ರಿನ್, ಮರ್ಣಾ ಥಾವ್ನ್ ಉಟ್ಲೆಲ್ಯಾ ಲಾಜರಸಾ
ವಿಶ್ಯಾಂತ್ ದಿಲ್ಲೊ ಘಣ್ಗಣಿತ್ ಸೆಮಾಂವ್ ತಾಚ್ಯಾ ಉಡಾಸಾಕ್
ಆಯ್ಲೊ. ಜೆಜುನ್ ಊಠ್ ಮ್ಹಳ್ಳ್ಯಾಕ್ಷಣ್ ಕಸೊ ಲಾಜರಸ್
ಕಾಂಪೊನ್ ಉಭೊ ರಾವ್ತಾ ಮ್ಹಳ್ಳೆಂ ತಾಣೆ ರೂಬ್ ರೂಬ್
ಪಳೆಲ್ಲೆಶೆಂ ಪಿಂತ್ರಾಯಿಲ್ಲೆಂ. ಪುನರ್ಜೀವನಾ ಖಾತಿರ್
ಲಾಜರಸಾನ್ ಕಸಲೆಂ ಮೋಲ್ ಫಾರಿಕ್ ಕೆಲ್ಲೆಂ? ಪೆಲ್ಯಾ
ಖಾತಿರ್ ಕಾಳಿಜ್ ಕಡ್ಚೆ ಬರಿಂ ತೊ ಚಲ್ಲೊಗೀ? ವ..
ಹೆಂ
ಸವಾಲ್ ಮೆರ್ಡಿತಾಕ್ ಸಬಾರ್ ವಸಾಂ ಥಾವ್ನ್ ದೊಸ್ತಾಲೆಂ.
ಆತಾಂ ಅಖ್ರೆಕೀ ತಾಕಾ ಜಾಪ್ ಮೆಳ್ಳಿ, ಜಿವಾ ವ್ಹರ್ತಿ
ಸ್ವಾಧಿಕ್ ವಸ್ತ್ ದುಸ್ರಿ ನಾ, ವೆಳಾ ವ್ಹರ್ತಿ ಮೊಲಾಧಿಕ್
ವಸ್ತ್ ದುಸ್ರಿ ನಾ. ಪಾಚ್ವೆಂ ತಣ್ ಆನಿ ಮಾತ್ಯೆಚೊ
ಸ್ಪರ್ಶ್, ಸುಕ್ಣ್ಯಾ ಸಾವ್ಜಾಂಚ್ಯಾ ರಂಗೀನ್ ಆವಾಜಾ
ವ್ಹರ್ತೊ ಸಂತೊಸ್ ದುಸ್ರೊ ನಾ.
ಹಿಚ್ ಸಂಗತ್
ಮೆರ್ಡಿತಾಕ್ ಧೊಸ್ತಾಲಿ. ವೀಸ್ ವಸಾಂ ದೆವಾಚೊ ಮಣಿಯಾರಿ
ಜಾವ್ನ್ ತಾಣೆ ಖರ್ಚಿಲ್ಲಿಂ. ನಶ್ವರ್ ಕುಡಿಂತ್ ,
ದೆವಾಚ್ಯಾ ಪಾಯಾಂಥಳಾ ಸೆವೊಂಕ್ ಅತ್ರೆಗ್ಚೊ ಆತ್ಮೊ ಕುಡಿ
ಥಾವ್ನ್ ಮೆಕ್ಳೊ ಜಾಂವ್ಚಿ ತಾರಿಕ್ ಪಯ್ಲಿಚ್ ಕಳಿತ್
ಜಾಲ್ಯಾ ತರೀ ಹೆಂ ಮಾಂದುಂಕ್ ಅಪುಣ್ ಕಿತ್ಯಾಕ್ ನರ್ಗಾತಾಂ?
ಸಂತೊಸಾನ್ ನ್ಹಯ್ ತರೀ ಭರ್ವಸ್ಯಾನ್ ಪುಣಿ? ಅಪುಣ್
ಕಿತ್ಯಾಕ್ ಪಾಸುನ್ ಚಿಡ್ಕೊನ್ ರಾವ್ಲಾಂ? ಆಪ್ಲಿಂ
ಮ್ಹಳ್ಳಿಂ ತಾಕಾ ಕೊಣ್‌ಚ್ ನಾತ್ಲಿಂ. ಆಸ್ತ್? ರೊಮಾಂತ್
ಏಕ್ ಅಪಾರ್ಟ್‌ಮೆಂಟ್, ಕೂಡ್ ಭರ್ತಿ ಬೂಕ್, ಆನಿ ಅವಯ್
ಥಾವ್ನ್ ಥೊಡೆಂ ವಾರ್ಷಿಕ್ ಧನ್. ವೃತ್ತೇ ಖಾತಿರ್ ಪುಣಿ?
ಜಾವ್ನಾಸೊಂಕೀ ಪುರೊ. ಕಿತ್ಯಾ, ತೊ ಧಾರ್ಮಿಕ್ ವಿಧಿಂಚ್ಯಾ
ಪವಿತ್ರ್ ಮೇಳಾಚೊ ಲೆಖಾಂ ತಪಾಸ್ಣಾರ್, ಪ್ರಿಫೆಕ್ಟ್
ಕಾಡ್ದಿನಾಲ್ ಯೂಜಿನಿಯಾ ಮಾರೊಟ್ಟೊಚೊ ಆಪ್ತ್ ಕಾರ್ಯ್ದರ್ಶಿ
ಜಾವ್ನಾಸ್ಲೊ. ಹೆಂ ಕಾಮ್ ಪಾಪ್ ಸಾಯ್ಬಾಚ್ಯಾ ಸಾವ್ಳೆಕ್
ಲಾಗ್ಗಿಂ ಪಡ್ತಾಲೆಂ. ಎದ್ಯಾ ವ್ಹಡ್ಲ್ಯಾ ಧಾರ್ಮಿಕ್
ಸಂಸ್ಥ್ಯಾಚ್ಯೊ ಆಂತರಿಕ್ ಚಟುವಟಿಕೊ ಲಾಗ್ಗಿಂ ಥಾವ್ನ್
ಪಳೆಂವ್ಚೊ ಸುಯೋಗ್ ತಾಕಾ ಲಾಬ್‌ಲ್ಲೊ. ತೊ ಸ್ವತಂತ್ರ್
ಆಸುಲ್ಲೊ. ತರೀ ಪುಣ್ ವಾಂಚೊನ್ ಉರೊಂಕ್ ಹಿಂಚ್ ಪ್ರಬಳ್
ಕಾರಣಾಂ ಜಾಂವ್ಕ್ ಸಾಧ್ಯ್ ನಾತ್ಲಿಂ. ಸಾಸ್ಣಾಚೆ ಜಿಣ್ಯೆ
ವಿಶಿಂ ಸೆಮಾಂವ್ ದಿತೆಲ್ಯಾಂಕ್ ವಯ್ಲೆಂ ಕಾರಣ್
ಜಾವ್ನಾಸೊಂಕ್ ಸಾಧ್ಯ್ಚ್ ನಾ.
ತೊ ಕೆದ್ನಾಂಯ್,
ಕಸಲ್ಯಾಕ್ಚ್ ಆಶೆಂವ್ಕ್ ನಾತ್ಲೊ. ತಾಣೆ ಇಗರ್ಜ್ ಮಾತೆಚೆಂ
ಶಿಸ್ತ್ ಸಾಂಬಾಳ್‌ಲ್ಲೆಂ ಆನಿ ಇಗರ್ಜ್ ಮಾತೆನ್ ತಾಕಾ
ರಕ್ಷಣ್ ದಿಲ್ಲೆಂ. ತಾಚಿಂ ತಾಲೆತಾಂ ಗಳ್ಸುಂಕ್
ಇಗರ್ಜ್‌ಮಾತೆನ್ ತಾಕಾ ಅವ್ಕಾಸ್ ದಿಲ್ಲೊ. ತಾಚ್ಯಾ
ರೆಲಿಜಿಯೊಸ್ ಜೀವನಾಂತ್ ಎಕಾ ಥರಾಚಿ ತೃಪ್ತಿ ತಾಕಾ
ಪ್ರಾಪ್ತ್ ಜಾಲ್ಲಿ. ಪುಣ್ ಆಜ್ ತಾಚ್ಯಾ ತೃಪ್ತೆಂತ್ ತಾಕಾ
ದುಬಾವ್ ಸುರು ಜಾಲ್ಲೊ.. ಅತಾಂ, ನಿಮಾಣ್ಯಾ ಝಡ್ತೆ ವೆಳಾ
ಅಪುಣ್ ಕಿತೆಂ ವ್ಹರ್ತೊಲೊಂ? ಆನಿ ಸಂಸಾರಾಂತ್,
ಉರ್ಲೆಲ್ಯಾನಿಂ ಅಪ್ಣಾಚೊ ಉಗ್ಡಾಸ್ ಕಾಡುಂಕ್ ಕಿತೆಂ
ಸೊಡ್ನ್ ವೆತೊಲೊಂ? ಹಾಂಗಾಚ್ ತಾಚ್ಯಾ ಅತೃಪ್ತೆಚಿ
ಕೊಡ್ಸಾಣ್ ಆಸುಲ್ಲಿ. ಅಪುಣ್ ಜಿವಿತಾಂತ್ ಸಲ್ವಲಾಂ
ಮ್ಹಣ್ಚಾಂತ್ ಕಾಂಯ್ಚ್ ದುಬಾವ್ ನಾತ್ಲೊ.
ತಾಣೆ
ಕೆದಿಂಚ್ ಎಕಾ ಭುರ್ಗ್ಯಾಕ್ ಜಲ್ಮ್ ದೀಂವ್ಕ್ ನಾತ್ಲೊ
ಸೊಡ್ಯಾಂ, ಏಕ್ ರೊಂಪಿ ಸಯ್ತ್ ಲಾಂವ್ಕ್ ನಾತ್ಲಿ. ರಾಗ್
ಕರುಂಕ್ನಾತ್ಲೊ ವ ದಾನ್ ದೀಂವ್ಕ್ ನಾತ್ಲೆಂ, ತಾಚಿ ಜಿಣಿ
ವಾತಿಕಾನಾಚ್ಯಾ ದಪ್ತರಾನಿಂ ಎಕಾ ಬೂಕಾ ಕಿಡಿ ಬರಿಂ ಪಾಶಾರ್
ಜಾಲ್ಲಿ, ತಾಚೆ ಥಾವ್ನ್ ಕಿತೆಂಯ್ ಬರೆಂಪಣ್ ಜಾಲಾಂ ತರ್,
ತಾಂತುಂ ವ್ಯಕ್ತಿಗತ್ ಸಮರ್ಪಣ್ ನಾತ್ಲೆಂ. ಭುಜಾವಣ್
ದಿಲ್ಲ್ಯಾ ಖಾತಿರ್ ತಾಕಾ ಕೊಣ್‌ಚ್ ಪಿಡೆಸ್ತ್ ಬೆಸಾಂವ್
ದಿಂವ್ಚೆ ನಾಂತ್. ಪಾತ್ಕಿ, ಸಲ್ವಾಸಾಂವಾ ಲಾಗೊನ್ ತಾಚೊ
ಉಡಾಸ್ ಕಾಡ್ಚೆ ನಾಂತ್. ತಾಕಾ ಉಕಳ್ಶಾ ಮೊರಾಜಾಯ್
ಪಡ್ತೆಲೆಂ.
ಎಕಾಚ್ಛಾಣೆ ತೊ ಘಾಬಾರ್ಲೊ. ತಾಕಾ
ಶೆಳೊ ಘಾಮ್ ಸುಟ್ಲೊ. ಬೋಲ್ ಖೆಳೊನ್ ತಾಚೆ ಲಾಗ್ಗಿಂ
ಪಾವ್ಲ್ಲೆಲ್ಲೆ ಥೊಡೆ ಭುರ್ಗೆ ತಾಚೆಂ ತೊಂಡ್ ಪಳೆವ್ನ್ಚ್
ನಪಂಯ್ಚ್ ಜಾಲೆ. ಥೊಡೊ ಥೊಡೊಚ್ ಆಕಾಂತ್ ಪಯ್ಸ್ ಜಾವ್ನ್
ಪರ್ತ್ಯಾನ್ ತಾಚೆ ಥೈಂ ಶಾಂತತಾ ಭರ್ಲಿ. ಉರ್ಲೆಲ್ಯಾ
ಅವ್ದೆಂತ್ ಆಪ್ಲಿ ಜಿಣಿ ಕಶಿ ಮಾಂಡುನ್ ಹಾಡ್ಚಿ ಮ್ಹಣೊನ್
ತೊ ನಿಯಾಳುಂಕ್ ಲಾಗ್ಲೊ.
ರೋಮಾಂತ್ಲ್ಯಾ
ದಾಕ್ತೆರಾನಿಂ ತಾಚ್ಯಾ ಪಿಡೆ ವಿಶ್ಯಾಂತ್ ಪಯ್ಲೆಂ
ಕಳಯ್ತಾನಾ, ಸಹಜ್ ಜಾವ್ನ್ ಆಪ್ಲ್ಯಾ ಮಾಂಯ್ಗಾಂವ್ ಲಂಡನಾಕ್
ವಚೊಂಕ್ ತಾಣೆ ನಿರ್ಧಾರ್ ಕೆಲ್ಲೊ. ಆಪ್ಲ್ಯೆ ಜಿಣ್ಯೆಚಿ
ಅವ್ದಿ ಮಟ್ವಿ ಜಾಲ್ಯಾರ್, ಮರ್ಣಾಕ್, ಲಂಡನಾಚ್ಯಾ
ಪ್ರಶಾಂತ್ ವಾರ್‍ಯಾಂತ್‌ಚ್ ಸ್ವಾಗತ್ ಕರುಂಕ್ ತಾಣೆ
ಚಿಂತ್‌ಲ್ಲೆಂ.
ಆತಾಂ ಹಿ ಆಶಾ ಯೀ ಸ್ವಪಾಣ್
ಜಾಂವ್ಕ್ ಪಾವ್‌ಲ್ಲಿ. ತಾಚ್ಯಾ ಪೊಟಾಂತ್ ವ್ಹಾಡೊನ್
ಯೆಂವ್ಚ್ಯಾ ದುಸ್ಮಾನಾಕ್ ನಾಸ್ ಕರುಂಕ್ ಸಾಧ್ಯ್ ನಾತ್ಲೆಂ.
ಏಕ್ ದಾದ್ಲೊ ಆನಿ ಯಾಜಕ್ ಜಾವ್ನ್ ಸಲ್ವಾಲ್ಲ್ಯಾ ಸತಾ
ಬರಿಂ. ಆತಾಂ ಕಿತೆಂ ಕಚೆಂ? ಒಪ್ರೇಶನ್ ಕರವ್ನ್ ದೂಕ್ ಆನಿ
ವಳ್ವಾಳ್ಯಾಂ ಥಾವ್ನ್ ಸುಟ್ಕಾ ಜೊಡ್ಚಿ? ಪುಣ್ ಹಿ
ದುಸ್ರ್ಯಾ ಥರಾಚಿ ಸಲ್ವಣಿ ಜಾಂವ್ಚಿ ನಾಮೂ? ಹಾಕಾ ಆನಿ
ಜೀವ್ಘಾತಾಕ್ ಕಿತೆಂ ಫರಕ್? ತಾಣೆ ಫಾರಿಕ್ ಕರುಂಕ್ ಆಸ್ಚೆಂ
ದೆಂವೆ ಮಸ್ತು ಆಸುಲ್ಲೆಂ. ಭೊರ್ಯಾ ವಯ್ರ್ ಬೊರ್ಕೊಟಿ
ಕಿತ್ಯಾಕ್?
ಪಾಟಿಂ ಕಾಮಾಕ್ ವೆಚೆಂ? ರೋಮಾಂತ್ಲ್ಯಾ
ಕೊಂಗ್ರೆಗೇಶನ್ ರಾವ್ಳೆರಾಂತ್ ತಾಚಿ ಬಸ್ಕಾ ಖಾಲಿಚ್
ಆಸುಲ್ಲಿ. ಥೈಂ ಸಾಂತಿಪಣಾಕ್ ತಯಾರ್ ಜಾಲ್ಲ್ಯಾ ವೆಕ್ತಿಂಚಿ
ದರಬಸ್ತ್ ಫಾಯ್ಲಾಂ ಧುಳ್ ಖಾವ್ನ್ ರಾಕೊನ್ ಆಸ್ಲಿಂ. ತಿಂ
ಉಗ್ತಿಂ ಕರ್ನ್ ತಾಂಚಿ ಜಿಣಿ. ಕೃತ್ಯಾಂ, ಅಜ್ಯಾಪಾಂ
ಇತ್ಯಾದಿ ತಜ್ವೀಜ್ ಕರ್ನ್ ವಿಶ್ಲೇಶಣ್ ಕರುಂಕ್ ಆಸ್ಲೆಂ.
ತಾಂಚ್ಯಾ ಸಾಂತಿಪಣಾ ಆನಿ ಅಜ್ಯಾಪಾಂ ವಯ್ರ್ ತೀಕ್ಷ್ಣ್
ಸವಾಲಾಂ ಕರುಂಕ್ ಆಸ್ಲಿಂ. ಕಸಲ್ಯಾ ಫಾಯ್ದ್ಯಾಕ್?
ಸಾಂತಿಪಣಾಚೊ ಕುರೊವ್ ಎಕ್ಲ್ಯಾಕ್ ನಿರಾಕರ್‍ಸುಂಕ್,
ಕಿತ್ಲೇಶ್ಯಾ ವಸಾಂ’ಪ್ರಾಂತ್ ಪಾಪ್ಸಾಯ್ಬಾನ್ ಆನ್ಯೆಕಾ
ವೆಕ್ತಿಕ್ ಸಾಂತಾಚೆ ಪಟ್ಟೆರ್ ನಾಂವ್ ಮೆಳಂವ್ಕ್ ಹುಕುಂ
ದಿಂವ್ಚೆ ಖಾತಿರ್?
ಆಪ್ಣೆ ತಾಂಚ್ಯಾ ಜಿಣ್ಯೆವಯ್ರ್
ಕಿತೆಂ ಬರಯ್ಲಾಂ ಮ್ಹಣ್ ಹೆ ಸರ್‌ಲ್ಲೆ ವೆಕ್ತಿ ಗಣ್ಣೆ
ಕರ್ತಿತ್? ತೆ ಸರೊನ್ ಕಿತ್ಲೀಶಿಂ ವಸಾಂ ಸಂಪ್ಲ್ಯಾಂತ್ ಆನಿ
ತಾಂಚೆರ್ ಎದೊಳ್ಚ್ ತೀರ್ಪ್ ವಾಚ್ಲಾಂ, ವೆಗ್ಗಿಂಚ್
ಆಪ್ಣಾಚೆಂ ಜಾಂವ್ಕ್ ಆಸ್ಚೆ ಬರಿಂ. ಏಕ್ ನವೊ ಯಾತ್ರಿಕ್
ಜಾಗೊ, ಲಿತುರ್ಜಿಂತ್ ನವೆಂ ಮೀಸ್ ಖಂಚೇಂಯ್ ತಾಂಚೆರ್
ಕಸಲೊಚ್ ಪ್ರಭಾವ್ ಘಾಲ್ಚೊ ನಾ. ಬ್ಲೇಸ್ ಮೆರ್ಡಿತ್ ತಾಂಚಿ
ಜಿಣ್ಯೆ ಚರಿತ್ರಾ ಘೆವ್ನ್ ಕಿತ್ಲಿಂ ವಸಾಂ ಸಂಸೊಧ್ ಕರಿತ್
ಜಾಲ್ಯಾರೀ ಕಿತೆಂಚ್ ಜಾಂವ್ಚೆಂ ನಾ.
ಪುಣ್ ಹೆಂ
ತಾಚೆಂ ಕಾಮ್ ಜಾವ್ನಾಸ್ಲೆಂ. ನವೆಂ ಕಾಮ್ ಶಿಕೊಂಕ್ ಆತಾಂ
ವೇಳ್ ಉತ್ರಾಲ್ಲೊ. ಸದಾಂಯ್ ಮೀಸ್ ಸಾಂಗ್ಚೆಂ, ದಫ್ತರಾಚೆಂ
ಕಾಮ್, ಅಪ್ರೂಬ್ಶೆಂ ಇಂಗ್ಲೆಜ್ ಇಗಜಿಂತ್ ಸೆರ್ಮಾಂವ್
ದಿಂವ್ಚೊ, ರಜೆರ್ ಆಸ್ಚ್ಯಾ ಪಾದ್ರಿಚ್ಯಾ ಜಾಗ್ಯಾರ್
ಕುಮ್ಸಾರಿಂತ್ ಬಸ್ಚೆಂ, ಬ್ರಿವಿಯರಿ ವಾಚ್ಚಿ, ಆನಿ
ನಿದೆವಿಣ್ ರಾತ್ ಪಾಶಾರ್ ಕರ್ಚಿ ತಾಚ್ಯಾ ಮುಕ್ಲ್ಯಾ ಸ ವ
ಬಾರಾ ಮಯ್ನ್ಯಾಂಚಿ ದಿಸ್ಪಟಿ ಜಾಂವ್ಕ್ ಆಸ್ಲಿ. ಉಪ್ರಾಂತ್
ಏಕ್ ದೀಸ್ ತೊ ಮೊರ್ತೊಲೊ. ಏಕ್ ಹಫ್ತೊ ಬರ್ ಸರ್ಲ್ಲೊಲೊ
ಆಮ್ಚೊ ಭಾವ್ ಬ್ಲೇಸ್ ಮೆರ್ಡಿತ್.. ಮ್ಹಣೊನ್ ಮೀಸಾಂಚೆರ್
ತಾಚೊ ಉಡಾಸ್ ಕಾಡ್ತೆಲೆ. ನಂತರ್, ಸರ್ಲ್ಲ್ಯಾ ಸರ್ವ್
ಭಾವಾಡ್ತ್ಯಾಂ ಪಾಸುನ್.. ಜೆರಾಲ್ ಮಾಗ್ಣ್ಯಾಂತ್
ಸೆರ್ವಾತೊಲೊ.
ಪಾಕಾಂತ್ ಆತಾಂ ಥಂಡಿ ದೆಂವೊನ್
ಯೇಂವ್ಕ್ ಲಾಗ್ಲಿ. ಮೋಗಿಂ ಕುಲ್ಯಾಂಕ್ ಚಿಡ್ಕಾಲ್ಲೆಂ ತಣ್
ಪಾಪುಡ್ನ್ ಘರಾ ಕುಶಿಕ್ ಭಾಯ್ರ್ ಸಲಿಂ. ಹಾಸಾಂ ತಳ್ಯಾಚ್ಯಾ
ದೆಗೆಕ್ ವೊಂದೊಂಕ್ ಲಾಗ್ಲಿಂ. ಮೊನ್ಸಿಜ್ಞೊರ್ ಬ್ಲೇಸ್
ಮೆರ್ಡಿತ್‌ಯೀ ಉಟೊಂಕ್ ತಯಾರ್ ಜಾಲೊ. ವೆಸ್ಟ್
ಮಿನಿಸ್ಟರಾಚ್ಯಾ ಆಡಳ್ತೆದಾರಾ ಥಾವ್ನ್ ತಾಕಾ ಚ್ಹಾಯೆಚೆಂ
ಆಮಂತ್ರಣ್ ಆಸುಲ್ಲೆಂ. ಆಪ್ಲ್ಯಾ ಸಾಲ್ವಾಸಾವಾಂತ್
ದುಸ್ರ್ಯಾಂಕ್ ವಾಂಟೆಲಿ ಕರಿನಾಸ್ತಾಂ ಆಪ್ಲೊ ಖುರಿಸ್
ಅಪ್ಣೆಂಚ್ ವ್ಹಾವೊಂವ್ಚಿ ಇಂಗ್ಲಿಷ್ ರೀತ್ ಜಾವ್ನಾಸ್ಲಿ.
ಥೊಡೊ ವೇಳ್ ಪುಣಿ ದುಸ್ರ್ಯಾಂ ಸಾಂಗಾತಾ ಗಜಾಲಿ ಮಾರ್ನ್
ಆಪ್ಲಿ ದೂಕ್ ವಿಸ್ರೊಂಕ್ ಮೆಳ್ಳೆಲ್ಯಾ ಅವ್ಕಾಸಾ ಖಾತಿರ್
ಅಭಾರಿ ಜಾವ್ನ್ ಮೆರ್ಡಿತ್ ಉಟೊನ್ ಹಳೂ ಚಲೊಂಕ್ ಲಾಗ್ಲೊ.
**** (ಮುಖಾರುಂಕ್
ಆಸಾ)
|
[कादंबरी]
सय्तानाचो वकील (Devil's
Advocate)
मूळ: मॊरिस
वेस्ट. कोंकणी: जेराल्ड वी.
कार्लो, हासन |
|
अवस्वर १
मोर्तेल्यांक सासणीक जिण्येक तयार कर्चें काम
ताचें जावनासलें. पूण अपूणच तयार नातल्ली गजाल
गमताना ताका अघात जालो. तो एकलो वासताववादी
जावनासलो. म्हनीस जल्मातानांच आपल्या मर्णाचें
फर्माण बरवन घेवन्ंच जल्माता म्हणोन तो जणासलो. तो
थंड व्यक्तित्वाचो जावनासोन शिसत ताका कर्करे
हाडायनातली तरी अमरत्वाच्या भ्रांतेक वळग जाल्लो.
मर्णान, कसलोच हिशारो दीनासतां एका चोरा परीं
अवचीत, कुसकूट तयार नातल्या वेळा आक्रमण कर्ची रीत
जावनासली. दसतुरे फर्माणे ताणे आपलो भाव निदे बरीं
व एकाच्छाणे हिंसात्मक रितीन येंवचे आसलें.
मर्णाची रीत. असल्या मर्णाक म्हनीस कितलो
आशेवन आसता! मागोन आसता! असलें मरण ताका
निराकर्सिल्ले वेळा तो कितलो कंगाल जाता, कोडसाणेन
भर्ता, आनी देदेस्पर जाता. लंडनांतल्या त्या वसंत
ऋतुच्या तर्न्या वोतांत बसोन आसलो ब्लेस मेर्डीत
आपल्या मर्णा विशीं चिंतून आसलो. समधानाचें मरण
ताका ना फावो केल्लें. वारयाक धलोन आसचीं क्रोकस,
ड्याफोडील फुलां, हातांत हात मेळवन जिविताचे
अखरेचे थेंबे चाकोन आसचीं प्रायेसत जोडीं, एकामेका
वेंगेंत सेर्वाल्लीं तनीं जोडिंस॒ग्ळ्यानीं
सृषटेचें कायें भरान चलोन आसचें देक्ताना अपणाक
मात्र मोरोंक आसा म्हळ्ळ्या कोडहू चिंत्पान
मेर्डीत फुमार जालो.
कार्सिनोमा! कांयच
दुबाव ना. एक्सरेच्या मधेंगात बोट भंवडावन
दाक्तेरान म्हळ्ळें. वाडावळ सार्की जावंक ना तरी
केसोळी केन्सराचीच म्हणचांत कांयच दुभाव ना! ताणे
तीर्प दिल्लें.
उजळच्या एक्सरेचेर भंवचे
दाक्तेराचें बोट पळेताना मेर्डिताक परिस्थितिची
गंभीरता कळोन आयली. ताची सगळी जिणी दूसऱ्यांच्या
जिण्येच्या सतां विश्यांत, दर्णीक शेवटायिल्ल्या
तांच्या पात्कां विश्यांत समजंवचांत खर्चाल्ली.
आतां तो आपणा भितेर आनी थोड्याच तेंपान आपली जिणी
नास करुंक, फुलोन येंवच्या केसोळेक पळेतालो.
ताणे उद्वेगा विणे विचालें: ओपरेशन साध्य नांगी?
दाक्तेर स्क्रीनाचो लैट पालववन मेजा सशीं
बसलो. मेर्डिताचेर उज्वाड पडचे बरीं ताणे टेबल
ल्यांप घुंवडायलो. दाक्तेर, काळोकांत. पिडेसत,
म्यूसियमांतल्या मारबलाच्या मूर्ती बरीं.
मेर्डिताक दाक्तेराची सजावण समजोंक कषट जालेनांत.
ते दोगी प्रोफेशनल जावनासले. दोगांयच्या भेसांत
म्हनशा संपर्क प्रमूख जावनासलो. तांच्या संपर्काक
आयलेल्या लाग्गीं ताणी भावनांरहीत जावन आसाजाय
असलें. ना तर, ससाय मागोन आयलेल्यांक ताणी कुमक
कर्ची साध्यता नातली.
ओपरेशन करुंक हांव
सकान पूण तूं तीन मयन्यानीं मोर्तोलोय. ना तर,
थोडो तेंप चडताव वांचतोलोय, पूण दुकीन वळवळोन
मोर्तोलोय.
चडताव म्हळ्यार कितलो तेंप?
स थावन बारा मयने.
कषटांची विंचवण.
व्हय. पूण तुंवे करिजायच पडतेली.
म्हाका समजता.
बसल्ले कडेच दाक्तेर सदीळ
जालो. ताका उद्विग्न केल्ली विषम घडी उत्राल्ली.
ताणे चिंतल्ले फ्रमाणे ताच्या पिडेसतान परिस्थिती
समजोन घेतल्ली . तो बुद्वंत. कोणायची मजत नासतां
अपणाकच सांबाळुंक सक्तलो. अनिवाऱ्य परिस्थितेक तो
खंडीत खांध मार्तोलो आनी वेळ घडी येताना तो घनान
दूक सोसतोलो.
आपल्या शांत आनी सुक्या
ताळ्यान मेर्डीत म्हणालो: एकादावेळा ओपरेशन
करिनासतां हांवे म्हजा कामाक -रोमाक-वचोंक
चिंतल्यार, थैंच्या म्हजा दाक्तेरा खातीर सगळो
रिपोर्ट बरवन दिशिगी?
खंडीत जावन मोन्सिज्ञोर
मेर्डीत. तुजें धैर हांव मेचवातां. हांव कथोलीक
न्हय तरी, ह्या संदर्भार तुजो भवाडत तुका खंडीत
जावन उपकार्तालो.
हांव यी तशेंच चिंतून आसां
डोकटर मेर्डितान सांगलें. पूण ताका भर्वासो नातलो.
आतां पाकांतल्या त्या बांकाचेर बसोन तो आपली
मुकली जिणी नियाळुंक लागलो. वारयांत वसंत ऋतुचो
स्वाधीक पर्मळ मिसळोन आसुल्लो. तर्नें वोत नवी
हुरुपाय हाडिलागली, पूण मेर्डिताच्या वांट्याक तें
सक्कड निर्फळ जावनासलें. विद्यार्थी जीवनांत एका
पाद्रीन, मर्णा थावन उटलेल्या लाजरसा विश्यांत
दिल्लो घणगणीत सेमांव ताच्या उडासाक आयलो. जेजून
ऊठ म्हळ्ळ्याक्षण कसो लाजरस कांपोन उभो रावता
म्हळ्ळें ताणे रूब रूब पळेल्लेशें पिंत्रायिल्लें.
पुनर्जीवना खातीर लाजरसान कसलें मोल फारीक
केल्लें? पेल्या खातीर काळीज कडचे बरीं तो
चल्लोगी? व..
हें सवाल मेर्डिताक सबार वसां
थावन दोसतालें. आतां अखरेकी ताका जाप मेळ्ळी, जिवा
व्हर्ती स्वाधीक वसत दुस्री ना, वेळा व्हर्ती
मोलाधीक वसत दुस्री ना. पाचवें तण आनी मात्येचो
स्पर्श, सुकण्या सावजांच्या रंगीन आवाजा व्हर्तो
संतोस दुस्रो ना.
हीच संगत मेर्डिताक
धोसताली. वीस वसां देवाचो मणियारी जावन ताणे
खर्चिल्लीं. नश्वर कुडिंत , देवाच्या पायांथळा
सेवोंक अत्रेगचो आत्मो कुडी थावन मेकळो जांवची
तारीक पयलीच कळीत जाल्या तरी हें मांदुंक अपूण
कित्याक नर्गातां? संतोसान न्हय तरी भर्वस्यान
पुणी? अपूण कित्याक पासून चिडकोन रावलां? आपलीं
म्हळ्ळीं ताका कोणच नातलीं. आसत? रोमांत एक
अपार्टमेंट, कूड भर्ती बूक, आनी अवय थावन थोडें
वारषीक धन. वृत्ते खातीर पुणी? जावनासोंकी पुरो.
कित्या, तो धार्मीक विधिंच्या पवित्र मेळाचो लेखां
तपासणार, प्रिफेकट काडदिनाल यूजिनिया मारोट्टोचो
आप्त काऱ्यदर्शी जावनासलो. हें काम पाप सायबाच्या
सावळेक लाग्गीं पडतालें. एद्या व्हडल्या धार्मीक
संस्थ्याच्यो आंतरीक चटुवटिको लाग्गीं थावन
पळेंवचो सुयोग ताका लाबल्लो. तो स्वतंत्र
आसुल्लो. तरी पूण वांचोन उरोंक हिंच प्रबळ कारणां
जावंक साध्य नातलीं. सासणाचे जिण्ये विशीं सेमांव
दितेल्यांक वयलें कारण जावनासोंक साध्यच ना.
तो केदनांय, कसल्याकच आशेवंक नातलो. ताणे
इगर्ज मातेचें शिसत सांबाळल्लें आनी इगर्ज मातेन
ताका रक्षण दिल्लें. ताचीं तालेतां गळसुंक
इगर्जमातेन ताका अवकास दिल्लो. ताच्या रेलिजियोस
जीवनांत एका थराची तृप्ती ताका प्राप्त जाल्ली.
पूण आज ताच्या तृप्तेंत ताका दुबाव सुरू जाल्लो..
अतां, निमाण्या झडते वेळा अपूण कितें व्हर्तोलों?
आनी संसारांत, उरलेल्यानीं अपणाचो उगडास काडुंक
कितें सोडन वेतोलों? हांगाच ताच्या अतृप्तेची
कोडसाण आसुल्ली. अपूण जिवितांत सलवलां म्हणचांत
कांयच दुबाव नातलो.
ताणे केदिंच एका
भुर्ग्याक जल्म दीवंक नातलो सोड्यां, एक रोंपी सयत
लावंक नातली. राग करुंक्नातलो व दान दीवंक नातलें,
ताची जिणी वातिकानाच्या दप्तरानीं एका बूका किडी
बरीं पाशार जाल्ली, ताचे थावन कितेंय बरेंपण जालां
तर, तांतूं व्यक्तिगत समर्पण नातलें. भुजावण
दिल्ल्या खातीर ताका कोणच पिडेसत बेसांव दिंवचे
नांत. पात्की, सलवासांवा लागोन ताचो उडास काडचे
नांत. ताका उकळशा मोराजाय पडतेलें.
एकाच्छाणे तो घाबारलो. ताका शेळो घाम सुटलो. बोल
खेळोन ताचे लाग्गीं पावल्लेल्ले थोडे भुर्गे ताचें
तोंड पळेवन्च नपंयच जाले. थोडो थोडोच आकांत पयस
जावन पर्त्यान ताचे थैं शांतता भरली. उरलेल्या
अवदेंत आपली जिणी कशी मांडून हाडची म्हणोन तो
नियाळुंक लागलो.
रोमांतल्या दाक्तेरानीं
ताच्या पिडे विश्यांत पयलें कळयताना, सहज जावन
आपल्या मांयगांव लंडनाक वचोंक ताणे निर्धार
केल्लो. आपल्ये जिण्येची अवदी मटवी जाल्यार,
मर्णाक, लंडनाच्या प्रशांत वारयांतच स्वागत
करुंक ताणे चिंतल्लें.
आतां ही आशा यी
स्वपाण जावंक पावल्ली. ताच्या पोटांत व्हाडोन
येंवच्या दुस्मानाक नास करुंक साध्य नातलें. एक
दादलो आनी याजक जावन सलवाल्ल्या सता बरीं. आतां
कितें कचें? ओपरेशन करवन दूक आनी वळवाळ्यां थावन
सुटका जोडची? पूण ही दूसऱ्या थराची सलवणी जांवची
नामू? हाका आनी जीवघाताक कितें फरक? ताणे फारीक
करुंक आसचें देंवे मसतू आसुल्लें. भोऱ्या वयर
बोर्कोटी कित्याक?
पाटीं कामाक वेचें?
रोमांतल्या कोंग्रेगेशन रावळेरांत ताची बसका खालीच
आसुल्ली. थैं सांतिपणाक तयार जाल्ल्या वेक्तिंची
दरबसत फायलां धूळ खावन राकोन आसलीं. तीं उग्तीं
कर्न तांची जिणी. कृत्यां, अज्यापां इत्यादी
तज्वीज कर्न विशलेशण करुंक आसलें. तांच्या
सांतिपणा आनी अज्यापां वयर तीक्ष्ण सवालां करुंक
आसलीं. कसल्या फायद्याक? सांतिपणाचो कुरोव एकल्याक
निराकरसुंक, कितलेश्या वसां’प्रांत पाप्सायबान
आन्येका वेक्तीक सांताचे पट्टेर नांव मेळवंक हुकूं
दिंवचे खातीर?
आपणे तांच्या जिण्येवयर
कितें बरयलां म्हण हे सरल्ले वेक्ती गण्णे
कर्तीत? ते सरोन कितलीशीं वसां संपल्यांत आनी
तांचेर एदोळच तीर्प वाचलां, वेग्गिंच आपणाचें
जावंक आसचे बरीं. एक नवो यात्रीक जागो, लितुर्जिंत
नवें मीस खंचेंय तांचेर कसलोच प्रभाव घाल्चो ना.
ब्लेस मेर्डीत तांची जिण्ये चरित्रा घेवन कितलीं
वसां संसोध करीत जाल्यारी कितेंच जांवचें ना.
पूण हें ताचें काम जावनासलें. नवें काम शिकोंक
आतां वेळ उत्राल्लो. सदांय मीस सांगचें, दफ्तराचें
काम, अपरूबशें इंगलेज इगजिंत सेर्मांव दिंवचो,
रजेर आसच्या पाद्रिच्या जाग्यार कुम्सारिंत बसचें,
ब्रिवियरी वाच्ची, आनी निदेवीण रात पाशार कर्ची
ताच्या मुकल्या स व बारा मयन्यांची दिस्पटी जावंक
आसली. उपरांत एक दीस तो मोर्तोलो. एक हफ्तो बर
सरल्लोलो आमचो भाव ब्लेस मेर्डीत.. म्हणोन
मीसांचेर ताचो उडास काडतेले. नंतर, सरल्ल्या सर्व
भावाडत्यां पासून.. जेराल मागण्यांत सेर्वातोलो.
पाकांत आतां थंडी देंवोन येवंक लागली. मोगीं
कुल्यांक चिडकाल्लें तण पापुडन घरा कुशीक भायर
सलीं. हासां तळ्याच्या देगेक वोंदोंक लागलीं.
मोन्सिज्ञोर ब्लेस मेर्डीतयी उटोंक तयार जालो.
वेसट मिनिसटराच्या आडळतेदारा थावन ताका च्हायेचें
आमंत्रण आसुल्लें. आपल्या सालवासावांत दूसऱ्यांक
वांटेली करिनासतां आपलो खुरीस अपणेंच व्हावोंवची
इंगलीष रीत जावनासली. थोडो वेळ पुणी दूसऱ्यां
सांगाता गजाली मार्न आपली दूक विस्रोंक मेळ्ळेल्या
अवकासा खातीर अभारी जावन मेर्डीत उटोन हळू चलोंक
लागलो.
****
(मुखारूंक आसा)
|
[Kadombori]
Soitanacho Vokil (Devil's
Advocate)
Mull: Morris
West. Konknni: Gerald V. Carlo,
Hassan |
|
Ovosvor 1
Morteleank sasnnik
jinnyek toyar korchem kam' tachem zaunaslem.
Punn opunnch toyar natl'li gozal gomtana taka
oghat zalo. To eklo vastavovadi zaunaslo.
Mhonis zolmatananch aplea mornnachem formann
boroun gheun'nch zolmata mhonnon to zonnaslo. To
thondd vyoktitvacho zaunason xist taka korkore
haddainatli tori omorotvachea bhrantek vollog
zal'lo.
Mornnan, kosoloch
hixaro dinastam eka chora porim ovchit, kuskutt
toyar natlea vella akromonn korchi rit zaunasli.
Dosture formanne tanne aplo bhavo nide borim vo
ekachchhanne himsatmok ritin yemvche aslem.
Mornnachi rit. Osolea
mornnak mhonis kitlo axeun asta! magon asta!
osolem moronn taka nirakorsil'le vella to kitlo
kongal zata, koddsannen bhorta, ani dedespor
zata. Londdonantlea tea vosont rituchea tornea
votant boson aslo bles merddit aplea mornna
vixim chintun aslo. Somodhanachem moronn taka na
favo kel'lem. Varyak dholon aschim krokos,
ddeafoddil fulam, hatant hat melloun jivitache
okhreche thembe chakon aschim prayest zoddim,
ekameka vengent serval'lim tonim
zoddimso॒glleanim srixttechem kayem bhoran
cholon aschem dektana opnnak matr moronk asa
mholl'llea koddhu chintpan merddit fumar zalo.
Karsinoma! kainch
dubavo na. Eksrechea modhengat bott bhomvddaun
dakteran mholl'llem. Vaddaull sarki zaunko na
tori kesolli kensorachich mhonnchant kainch
dubhavo na! tanne tirp dil'lem.
Uzollchea eksrecher
bhomvche dakterachem bott polletana merdditak
poristhitichi gombhirota kollon aili. Tachi
soglli jinni dusreanchea jinnyechea sotam
vixeant, dornnik xeuttayil'lea tanchea patkam
vixeant somzomvchant khorchal'li. Atam to apnna
bhiter ani thoddeach tempan apli jinni nas
korunk, fulon yemvchea kesollek polletalo.
Tanne udvega vinne
vichalem: oprexon sadhy nangi?
dakter skrinacho loitt
palvoun meza soxim boslo. Merdditacher ujvadd
poddche borim tanne ttebol leamp ghumvddailo.
Dakter, kallokant. Piddest, myusiyomantlea
marbolachea murti borim. Merdditak dakterachi
sozaunn somzonk koxtt zalenant. Te dogi
profexonol zaunasle. Dogamychea bhesant mhonxa
sompork promukh zaunaslo. Tanchea somporkak
ailelea laggim tanni bhaunamrohit zaun asazai
oslem. Na tor, sosai magon aileleank tanni kumok
korchi sadhyota natli.
Oprexon korunk hamv
sokan punn tum tin moineanim mortoloi. Na tor,
thoddo temp choddtavo vanchtoloi, punn dukin
vollvollon mortoloi.
Choddtavo mhollear
kitlo temp?
so thaun bara moine.
Koxttanchi vinchounn.
Vhoi. Punn tumve
korizaich poddteli.
Mhaka somzota.
Bosl'le koddech
dakter sodill zalo. Taka udvign kel'li vixom'
ghoddi utral'li. Tanne chintl'le fromanne tachea
piddestan poristhiti somzon ghetl'li . To
budvont. Konnaichi mozot nastam opnnakch
samballunk soktolo. Onivary poristhitek to
khonddit khandh martolo ani vell ghoddi yetana
to ghonan duk sostolo.
Aplea xant ani sukea
tallean merddit mhonnalo: ekadavella oprexon
korinastam hamve mhoza kamak -romak-vochonk
chintlear, thoinchea mhoza daktera khatir sogllo
riportt boroun dixigi?
khonddit zaun
monsigoneor merddit. Tujem dhoir hamv mechvatam.
Hamv kotholik nhoi tori, hea sondorbhar tuzo
bhovaddt tuka khonddit zaun upkartalo.
Hamv yi toxench
chintun asam ddokttor merdditan sanglem. Punn
taka bhorvaso natlo.
Atam pakantlea tea
bankacher boson to apli mukli jinni niallunk
laglo. Varyant vosont ritucho svadhik pormoll
misllon asul'lo. Tornem vot novi hurupai
haddilagli, punn merdditachea vantteak tem
sokkodd nirfoll zaunaslem. Videarthi jiunant eka
padrin, mornna thaun uttlelea lazorosa vixeant
dil'lo ghonngonnit semamv tachea uddasak ailo.
Jezun utth mholl'lleakxonn koso lazoros kampon
ubho rauta mholl'llem tanne rub rub pollel'lexem
pintrayil'lem. Punorjiuna khatir lazorosan
kosolem mol farik kel'lem? pelea khatir kalliz
koddche borim to chol'logi? vo..
Hem soval merdditak
sobar vosam thaun dostalem. Atam okhreki taka
zap mell'lli, jiva vhorti svadhik vost dusri na,
vella vhorti moladhik vost dusri na. Pachvem
tonn ani matyecho sporx, suknnea sauzanchea
rongin avaza vhorto sontos dusro na.
Hich songot merdditak
dhostali. Vis vosam devacho monniari zaun tanne
khorchil'lim. Noxvor kuddint , devachea
payantholla sevonk otregcho atmo kuddi thaun
mekllo zamvchi tarik poilich kollit zalea tori
hem mandunk opunn kiteak norgatam? sontosan nhoi
tori bhorvosean punni? opunn kiteak pasun
chiddkon raulam? aplim mholl'llim taka konnch
natlim. Ast? romant ek oparttmentt, kudd bhorti
buk, ani ovoi thaun thoddem varxik dhon. Vrit'te
khatir punni? zaunasonki puro. Kitea, to dharmik
vidhinchea povitr mellacho lekham topasnnar,
prifektt kadd'dinal yujinia marott'ttocho apt
karydorxi zaunaslo. Hem kam' pap saibachea
saullek laggim poddtalem. Edea vhoddlea dharmik
somstheacheo antorik chottuvottiko laggim thaun
pollemvcho suyog taka labl'lo. To svotontr
asul'lo. Tori punn vanchon uronk hinch proboll
karonnam zaunko sadhy natlim. Sasnnache jinnye
vixim semamv diteleank voilem karonn zaunasonk
sadhych na.
To kednam-i,
kosoleakch axeunko natlo. Tanne igorz matechem
xist samballl'lem ani igorz maten taka rokxonn
dil'lem. Tachim taletam gollsunk igorzmaten
taka ovkas dil'lo. Tachea relijios jiunant eka
thorachi tripti taka prapt zal'li. Punn az
tachea triptent taka dubavo suru zal'lo.. Otam,
nimannea zhoddte vella opunn kitem vhortolom?
ani somsarant, urleleanim opnnacho ugddas
kaddunk kitem soddn vetolom? hangach tachea
otriptechi koddsann asul'li. Opunn jivitant
solvolam mhonnchant kainch dubavo natlo.
Tanne kedinch eka
bhurgeak zolm' diunko natlo soddeam, ek rompi
soit launko natli. Rag korunknatlo vo dan diunko
natlem, tachi jinni vatikanachea doptoranim eka
buka kiddi borim paxar zal'li, tache thaun
kitem-i boremponn zalam tor, tantum vyoktigot
somorponn natlem. Bhuzaunn dil'lea khatir taka
konnch piddest besamv dimvche nant. Patki,
solvasamva lagon tacho uddas kaddche nant. Taka
ukollxa morazai poddtelem.
Ekachchhanne to
ghabarlo. Taka xello gham' suttlo. Bol khellon
tache laggim paul'lel'le thodde bhurge tachem
tondd polleunch nopomych zale. Thoddo thoddoch
akant pois zaun portean tache thoim xantota
bhorli. Urlelea ovdent apli jinni koxi manddun
haddchi mhonnon to niallunk laglo.
Romantlea dakteranim
tachea pidde vixeant poilem kolloitana, sohoz
zaun aplea mamygamv londdonak vochonk tanne
nirdhar kel'lo. Aplye jinnyechi ovdi mottvi
zalear, mornnak, londdonachea proxant
varyantch svagot korunk tanne chintl'lem.
Atam hi axa yi svopann
zaunko paul'li. Tachea pottant vhaddon yemvchea
dusmanak nas korunk sadhy natlem. Ek dadlo ani
yazok zaun solval'lea sota borim. Atam kitem
kochem? oprexon koroun duk ani vollvalleam thaun
suttka zoddchi? punn hi dusrea thorachi solvonni
zamvchi namu? haka ani jiughatak kitem forok?
tanne farik korunk aschem demve mostu asul'lem.
Bhorea voir borkotti kiteak?
pattim kamak vechem?
romantlea kongregexon raullerant tachi boska
khalich asul'li. Thoim santiponnak toyar zal'lea
vektinchi dorobost failam dhull khaun rakon
aslim. Tim ugtim korn tanchi jinni. Kriteam,
ojeapam iteadi tojviz korn vixlexonn korunk
aslem. Tanchea santiponna ani ojeapam voir
tikxnn sovalam korunk aslim. Kosolea faideak?
santiponnacho kurovo ekleak nirakorsunk,
kitlexea vosam’prant papsaiban anyeka vektik
santache pott'tter namv mellounko hukum dimvche
khatir?
apnne tanchea
jinnyeuyr kitem boroilam mhonn he sorl'le vekti
gonn'nne kortit? te soron kitlixim vosam
sompleant ani tancher edollch tirp vachlam,
vegginch apnnachem zaunko asche borim. Ek novo
yatrik zago, liturjint novem mis khonchem-i
tancher kosoloch probhavo ghalcho na. Bles
merddit tanchi jinnye choritra gheun kitlim
vosam somsodh korit zaleari kitench zamvchem na.
Punn hem tachem kam'
zaunaslem. Novem kam' xikonk atam vell utral'lo.
Sodam-i mis sangchem, doftorachem kam', oprubxem
inglez igojint sermamv dimvcho, rojer aschea
padrichea zagear kumsarint boschem, briviyori
vachchi, ani nidevinn rat paxar korchi tachea
muklea so vo bara moineanchi dispotti zaunko
asli. Uprant ek dis to mortolo. Ek hofto bor
sorl'lolo amcho bhavo bles merddit.. Mhonnon
misancher tacho uddas kaddtele. Nontor, sorl'lea
sorv bhavaddteam pasun.. Jeral magnneant
servatolo.
Pakant atam thonddi
demvon yeunko lagli. Mogim kuleank chiddkal'lem
tonn papuddn ghora kuxik bhair solim. Hasam
tolleachea degek vondonk laglim. Monsigoneor
bles merddityi uttonk toyar zalo. Vestt
ministtorachea addolltedara thaun taka
chhayechem amontronn asul'lem. Aplea salvasavant
dusreank vantteli korinastam aplo khuris
opnnench vhavomvchi inglix rit zaunasli. Thoddo
vell punni dusream sangata gozali marn apli duk
visronk mell'llelea ovkasa khatir obhari zaun
merddit utton hollu cholonk laglo.
**** (Mukharunk Asa)
|
|
|
|
2004 ಥಾವ್ನ್
2011 ಪರ್ಯಾಂತ್ ಕಾರ್ಯಾಳ್ ಆಸ್‌ಲ್ಲ್ಯಾ
ದಾಯ್ಜ್.ಕೊಮ್ ಚೆರ್
ಪರ್ಗಟ್‌ಲ್ಲ್ಯಾ ವಿಂಚ್ಣಾರ್ ಸಾಹಿತಾಕ್ ಆಮಿ
ಫುಡಿಲ್ಯಾ ದಿಸಾಂನಿ ಪಯ್ಣಾರಿ ವಾಚ್ಪ್ಯಾಂಕ್
ಲಾಭಯ್ತೆಲ್ಯಾಂವ್. | |
| |
![]() |
|
.gif){kind=small}
