![]() |
|
ಮೂಳ್ ಕಾಣಿ:
The black cat.
ಕೊಂಕಣಿಂತ್: ಕಾಳೊ ಬೊಕುಲ್ |
|
 |
|
ಕಾಳೊ
ಬೊಕುಲ್ (ಬುಕ್ಲೊ)
ಲ್ಹಾನ್ ಆಸ್ತನಾಸಾವನ್ ಹಾಂವ್
ಎಕ್ದಮ್ ಶಾಂತ್ ಆನಿ ಮೊವ್ ಸಭಾವಾಚೊ. ಮ್ಹಜ್ಯಾಂತ್ಲ್ಯಾ
ಮನೀಸಪಣಾಚಿ ಸಗ್ಳೆಚ್ ತುಸ್ತ್ ಕರಿ. ಮ್ಹಜ್ಯಾ ಮವಾಳಪಣಾಕ್
ಲಾಗೂನ್ ಮ್ಹಜೆ ಇಶ್ಟ್ ಮ್ಹಜಿ ಫಕಾಣಾಂ ಕರ್ತಾಲೆ. ಮ್ಹಾಕಾ
ಜನಾವ್ರಾಂ ಪೊಸ್ಪಾಚೊ ಭೊವ್ ಘೊಸ್ತ್. ದೆಖೂನ್, ಮ್ಹಜೆರ್
ಉಪಾಟ್ ಮೊಗ್ ಕರ್ಪಿ ಮ್ಹಜ್ಯಾ ಆವ್ಯ್ - ಬಾಪಾಯ್ನ್
ಮ್ಹಜೆಖಾತೀರ್ ಬರೆಚ್ ಪ್ರಾಣಿ ಪೊಶಿಲ್ಲೆ. ಹಾಂವ್ ಮ್ಹಜೊ
ಚಡ್ಸೊ ವೆಳ್ ತಾಂಚೆವಾಂಗಡಾ ಸಾರ್ತಲೊಂ. ತಾಂಕಾಂ ಖಾಣ್
ಘೊಲಪ್, ತ್ಯಾಂಚೆ ಲಾಡ್ ಕರಪ್ ಹಾಚೆಪರಸ್ ಚಡ್ ಸುಖ್
ಮ್ಹಾಕಾ ಹೆರ್ ಕಸ್ಲೆಚ್ ಗಜಾಲೀಂತ್ಲ್ಯಾನ್
ಮೆಳ್ನಾಶಿಲ್ಲೆಂ. ಮ್ಹಜೆ ಪಿರಾಯೆವಾಂಗಡಾ ಹಿ ಆವ್ಡ್ ವಾಡತ್
ಗೆಲಿ. ವಿಸ್ವಾಸು ಆನಿ ಹುಶಾರ್ ಕುತ್ರೊ ಪೊಸ್ಪ್ಯಾಂಕ್
ತಾಚೆರ್ ಆಶಿಲ್ಲ್ಯಾ ಮೊಗಾಂತ್ಲ್ಯಾನ್ ಕೆದೊ ವ್ಹಡ್ ಆನಂದ್
ಮೆಳ್ಟಾ ಹೆಂ ವೆಗ್ಳೆಂ ಸಾಂಗ್ಪಾಚಿ ಗರಜ್ ನಾ.ತಾಂಚೊ
ಸುವಾರ್ಥಿ ಆನಿ ನಿತಳ್ ಮೊಗ್ ಬದ್ದ್ ಕಾಳ್ಜಾಂತ್ ರಿಗ್ತಾ.
ಹಾಚೆಂ ಕಾರಣ್ ಮ್ಹಳ್ಯಾರ್ ಆಮ್ಕಾಂ ಮನ್ಶಾಚಿ ಬೈಮಾನ್,
ತಕ್ಲುಪಿ ಇಶ್ಟಾಗತ್ ಆನಿ ಲಟ್ಕ್ಯಾ ಪ್ರಾಮಾಣಿಕಪಣಾಚಿ
ಸಂವ್ಯ್ ಜಾಲ್ಲಿ ಆಸ್ತಾ.
ಹಾಂವೆ ತರ್ಣೆ ಪಿರಾಯೆರ್
ಲಗ್ನ್ ಕೆಲೆಂ. ಮ್ಹಜೆ ಬಾಯ್ಲೆಚೊಯ್ ಸಭಾವ್ ಮ್ಹಜೆಭಶೆನೂಚ್
ಆಸಾ ಹೆಂ ಕಳ್ಟಕಚ್ ಮ್ಹಾಕಾ ಖೂಬ್ ಖೊಸ್ ಜಾಲಿ. ಮ್ಹಜೊ
ಜನಾವ್ರಾಂವಿಶೀಂಚೊ ಮೊಗ್ ಪಳೊವ್ನ್ ತಿಣೆಂ ಬೆಗೊಬೆಗ್
ಬರೆಚ್ ಪ್ರಾಣಿ ಘರಾಂತ್ ಹಾಡ್ಲೆ. ಆಮ್ಚೆಕಡೆನ್ ಕಾಂಯ್
ಸುಕ್ಣಿಂ, ಗೊಲ್ಡ್ ಫಿಶ್, ಎಕ್ ಸೊಬೀತ್ ಕುತ್ರೊ, ಸೊಂಶೆ,
ಎಕ್ ಲ್ಹಾನ್ಸೊ ಮಾಕೊಡ್ ಆನಿ ಎಕ್ ಮಾಜರ್ ಅಶೆ ಪ್ರಾಣಿ
ಆಶಿಲ್ಲೆ.
ಹೆಂ ಮಾಜರ್, ಖರೆಂ ಮ್ಹಳ್ಯಾರ್
ಬುಕ್ಲೊ ಗುಬ್ಗುಬೀತ್ ಆನಿ ಸೊಬೀತ್ ದಿಸ್ಪಿ. ತೊ ಪುರಾಯ್
ಕಾಳೊ ಆನಿ ಸಾಮ್ಕೊ ಹುಶಾರ್. ಮ್ಹಜಿ ಬಾಯ್ಲ್ ಮಾತ್ಶಿ
ಅಂಧಶ್ರದ್ಧ್. ಕಾಳಿಂ ಮಾಜ್ರಾಂ ಮ್ಹಳ್ಯಾರ್ ಚೆಟ್ಕಿಣಿ,
ಹ್ಯಾ ಪೊರ್ನ್ಯಾ ಕಾಳಾಂತ್ಲ್ಯಾ ಸಮ್ಜಣೆಚೆರ್ ತಿಚೊಯ್
ವಿಶ್ವಾಸ್. ಮಾತ್ ಹ್ಯಾ ಬುಕ್ಲ್ಯಾವಿಶಿಂ ಉಲಯ್ತನಾ ತಿ ಹೆಂ
ಮತ್ ತಶೆಂ ಗಂಭೀರಪಣಾನ್ ಉಕ್ತೆಂ ಕರಿನಾಶಿಲ್ಲಿ. ಹಾಂವೆಂ
ಹೆಂ ಸಾಂಗ್ಪಾಚೆಂ ಕಾರಣ್ ಮ್ಹಳ್ಯಾರ್ ಮ್ಹಾಕಾ ಸಹಜ್ ತಾಚಿ
ಯಾದ್ ಆಯ್ಲಿ.
ಪ್ಲೂಟೊ, ಮ್ಹಳ್ಯಾರ್ ಹೊ ಬುಕ್ಲೊ, ಆಮ್ಚ್ಯಾ ಪೊಶಿಲ್ಲ್ಯಾ ಜನಾವ್ರಾಂಮದಿಂ ಮ್ಹಜೊ
ಸಗ್ಳ್ಯಾಂತ್ ಚಡ್ ಘೊಸ್ತಾಚೊ ಸವಂಗಡಿ. ತಾಚಿ ಕುಯ್ತಾದ್
ಹಾಂವೂಚ್ ಕರಿ, ದೆಖೂನ್ ತೊ ಮ್ಹಜ್ಯಾ ಫಾಟ್ಲ್ಯಾ
ಫಾಟ್ಲ್ಯಾನ್ ಭೊಂವ್ತಾಲೊ. ಹಾಂವ್ ಘರಾಭಾಯರ್ ವತ್ನಾ
ಲೆಗೀತ್ ತೊ ವಾಂಗ್ಡಾ ಯೆವಂಕ್ ಸೊದಿ ಪೂಣ್ ಹಾಂವ್ ತಾಕಾ
ಆಡಾಯ್ತಾಲೊಂ.
ಅಶೆ ತರೆನ್ ಬರೀಂಚ್ ವರ್ಸಾಂ
ಆಮ್ಚಿ ಇಶ್ಟಾಗತ್ ತಿಗ್ಲಿ. ಪೂಣ್ ಇತ್ಲೆಮಜಗತಿಂ ಮ್ಹಜ್ಯಾ
ಸಭಾವಾಂತ್ ಆನಿ ವಾಗ್ಣುಕೆಂತ್ ಬರೊಚ್ ಬದಲ್ ಜಾತಾಲೊ ಆನಿ
ತೊವುಯ್ ವಾಯ್ಟ್ ಅರ್ಥಾನ್. ಮ್ಹಾಕಾ ಹೆಂ ಸಾಂಗೂಂಕ್
ಲೆಗೀತ್ ಲಜ್ ದಿಸ್ತಾ, ಪೂಣ್ ಸೈತಾನ್ ಮ್ಹಜ್ಯಾ ಮನಾಂತ್
ಘರ್ ಕರ್ತಾಲೊ. ದಿಸಾನದಿಸ್ ಹಾಂವ್ 'ಮುಡಿ' ಆನಿ ಕಿರ್ಕಿರೊ
ಜಾಯ್ತ್ ವತಾಲೊಂ. ದುಸ್ರ್ಯಾಂಚ್ಯಾ ಭಾವ್ನಾಂಚೊ ವಿಚಾರ್
ಕರಪ್ ಪಸೂನ್ ಹಾಂವೆಂ ಸೊಡೂನ್ ದಿಲ್ಲೆಂ. ಮ್ಹಜೆ
ಬಾಯ್ಲೆಕಡೆನ್ ಹಾಂವ್ ಅಸ್ಭ್ಯಪಣಾನ್ ವಾಗ್ತಾಲೊಂ.
ಕೆನ್ನಾಕೆನ್ನಾ ತಿಚೆರ್ ಹಾತೂಯ್ ಉಬಾರತಾಲೊಂ. ಮ್ಹಜೊ ಹೊ
ಬದ್ಲಪಿ ಸಭಾವ್, ಘರ್ಚ್ಯಾ ಪೊಶಿಲ್ಲ್ಯಾ ಜನಾವ್ರಾಂಚೆಯ್
ಮತೀಂತ್ ಆಯಿಲ್ಲೊ.
ಹಾಂವೆ ತಾಂಚಿ ವಾಸ್ಪೂಸ್ ತರ್
ಸೊಡೂನ್ ದಿಲ್ಲೀಚ್, ಪೂಣ್ ತಾಂಕಾಂ ಹಾಂವ್ ವಾಯ್ಟ್
ವಾಗ್ಣುಕೂಯ್ ದಿತಾಲೊಂ. ಪ್ಲೂಟೊವಿಶಿಂ ಮಾತ್ ಮ್ಹಜ್ಯಾ
ಮನಾಂತ್ ಥೊಡೆಂಭೊವ್ ಆಪ್ಲೆಪಣ್ ಆಶಿಲ್ಲೆಂ. ದೆಖೂನ್
ಹಾಂವೆಂ ತಾಕಾ ವಾಯ್ಟ್ ವಾಗ್ಣೂಕ್ ದಿವಂಕ್ ನಾಶಿಲ್ಲಿ.
ಹೆರ್ ಪ್ರಾಣಿ ಚುಕೂನ್ ವಾ ಮ್ಹಜ್ಯಾವಯ್ಲ್ಯಾ ಮೊಗಾಕ್
ಲಾಗೂನ್ ಮ್ಹಜ್ಯಾ ಪಾಯಾಂಭೊಂವತಣಿ ಘುಟಮ್ಳ್ಯಾರ್ ಹಾಂವ್
ತಾಂಕಾಂ ತ್ರಾಸ್ ದಿತಾಲೊಂ. ಸೊಂಶೆ, ಮಾಕಡ್ ಆನಿ ಮ್ಹಜ್ಯಾ
ಕುತ್ರ್ಯಾಕ್ ಲೆಗೀತ್. ಮ್ಹಾಕಾ ಸೊರ್ಯಾಚೆಂಯ್ ವೆಸನ್
ಲಾಗ್ಲೆಂ. ಹೆಂ ದುಯೆಂಸ್ ವಾಡತ್ ರಾವ್ಲೆಂ. ಪ್ಲೂಟೊ ಆತಾಂ
ಮ್ಹಾತಾರೊ ಜಾಂವ್ಕ್ ಲಾಗಿಲ್ಲೊ, ದೆಖೂನ್ ಮಾತ್ಸೊ
ಕಿರ್ಕಿರೊಯ್ ಆನಿ ಲ್ಹವ್ ಲ್ಹವ್ ಮ್ಹಜ್ಯಾ ರಾಗಿಶ್ಟ್
ಸಭಾವಾಚೊ ತಾಚೆರೂಯ್ ಪರಿಣಾಮ್ ಜಾಂವ್ಕ್ ಲಾಗ್ಲೊ.
ಅಸೊಚ್ ಎಕೆ ರಾತಿಂ ಹಾಂವ್ ಸದ್ಚೆಭಶೆನ್ ಗಾಂವಾಂತ್ ವಚೂನ್
ಸಾಮ್ಕೊ ತಾಯ್ಟ್ ಜಾವ್ನ್ ಘರಾಂತ್ ಪಾವ್ಲೊಂ ತೆನ್ನಾ
ಬುಕ್ಲೊ ಮ್ಹಾಕಾ ಪಳೊವ್ನ್ ಲಿಪ್ತಾ ಅಸೊ ಮ್ಹಾಕಾ ಭಾಸ್
ಜಾಲೊ. ತಿಡ್ಕೀನ್ ಹಾಂವೆಂ ಝೊಂಪಯ್ ಮಾರೂನ್ ತಾಕಾ ಧರ್ಲೊ.
ಹಾಂವೆಂ ಕೆಲ್ಲೆ ಲಟಾಫಟೀಕ್ ಲಾಗೂನ್ ತೊ ಭಿಯೆಲೊ ಆನಿ
ತಾಣೆಂ ಮ್ಹಜ್ಯಾ ಹಾತಾಕ್ ಲ್ಹವಚ್ ಘಾಂಸ್ ಮಾರ್ಲೊ. ಮ್ಹಾಕಾ
ಕಾಂಯ್ಚ್ ಜಾಂವ್ಕ್ ನಾಶಿಲ್ಲೆಂ ಪೂಣ್ ಮ್ಹಜೆ ಕುಡೀಂತ್
ಸೈತಾನ್ ಘುಸ್ಲೊ. ರಾಗಾನ್ ಹಾಂವ್ ಪಿಶ್ಯಾವರಿ ಜಾಲೊಂ ಆಣಿ
ಕಿತೆಂ ಕರ್ತಾಂ ಹೆಂ ಮ್ಹಾಕಾಚ್ ಸಮ್ಜನಾ ಜಾಲೆಂ. ಮ್ಹಜೊ
ಮೂಳ್ ಆತ್ಮೊ ಮ್ಹಜಿ ಕೂಡ್ ಸೊಡೂನ್ ಗೆಲೊ ಆನಿ ಸೊರ್ಯಾಚೆ
ನಶೆನ್ ಚಡೂಚ್ ಫಾಫಸ್ಲ್ಲಿ ಸೈತಾನಿ ಪ್ರವೃತ್ತಿ ಮ್ಹಜೆ
ಕುಡೀಂತಲೆ ದರೆಕ್ ಅಣುಮೆರೆನ್ ಪಾವ್ಲಿ. ಮ್ಹಜ್ಯಾ
ಕೊಟಾಚ್ಯಾ ಬೊಲ್ಸಾಂತ್ಲ್ಯಾನ್ ಹಾಂವೆಂ ಎಕ್ ಲ್ಹಾನ್ಸೊ
ಚಾಕು ಭಾಯ್ರ್ ಕಾಡ್ಲೊ, ಉಕ್ತೊ ಕೆಲೊ ಆಣಿ ತ್ಯಾ
ಬುಕ್ಲ್ಯಾಚಿ ಗೊಮ್ಟಿ ಆವ್ಳೂನ್ ಧರೂನ್ ತಾಚೊ ಎಕ್ ದೊಳೊಚ್
ಕಾಪೂನ್ ಕಾಡ್ಲೊ! ಮ್ಹಜೆ ಹೆ ಕ್ರೂರ್ ಕರ್ಣೆವಿಶಿಂ
ಸಾಂಗ್ತನಾ ಹಾಂವ್ ಲಜೆನ್ ಭರ್ಲಾಂ, ಭಿತರ್ಲ್ಯಾ ಭಿತರ್
ಹಾಂವ್ ಜಳ್ಟಾಂ, ಭಯಾನ್ ಮ್ಹಜೊ ಆವ್ರೊ ಉಡ್ಟಾ.
ರಾತಿಂ ರಾಗಾಚ್ಯಾ ನೆಟಾರ್ ಕೆಲ್ಲ್ಯಾ ಪಾಪಿ ಕರ್ತೂಪಾಚೆರ್
ಉಪಾಯ್ ಮ್ಹೂಣ್ ಎಕ್ ವ್ಹಡ್ಲಿ ಝೆಮ್ ಕಾಡ್ಲ್ಯಾಉಪರಾಂತ್
ಸಕಾಳೀಂಫುಡೆಂ ಹಾಂವ್ ವೆವ್ಸ್ಥಿತ್ ಜಾಗ್ಯಾರ್ ಆಯ್ಲೊಂ.
ಕೆಲ್ಲ್ಯಾ ಗುನ್ಯಾಂವಾಕ್ ಲಾಗೂನ್ ಎಕ್ ಅಪ್ರಾಧಿ
ಆಶಿಲ್ಲ್ಯಾಚಿ ಭಾವ್ನಾ ಮ್ಹಾಕಾ ಸತಾಯ್ತಾಲಿ, ಲಜ್
ದಿಸ್ತಾಲಿ, ಪಶ್ಚಾತಾಪ್ ಜಾಲ್ಲೊ. ಪೂಣ್ ತರೀಲೆಗೀತ್ ಹ್ಯಾ
ಸಗ್ಳ್ಯಾ ಚಿತಂನಾಫಾಟ್ಲ್ಯಾನ್ ವ್ಹಡ್ಲೆಂಶೆಂ ಬಳ್ಗೆಂ
ನಾಶಿಲ್ಲೆಂ. ತೆ ಘಡ್ಣುಕೆನ್ ಮ್ಹಜ್ಯಾ ಆತ್ಮ್ಯಾಚೆರ್ ಎಕ್
ಸಾದೊ ದಾಗ್ ಲೆಗೀತ್ ಪಡೂನಾಶಿಲ್ಲೊ. ಹಾಂವೆಂ ಪರ್ತೂನ್
ಪಿಯೆವಂಕ್ ಸುರ್ವಾತ್ ಕೆಲಿ ಆನಿ ತೆ ಘಡ್ಣುಕೆಚಿ ಯಾದ್
ಸೊರ್ಯಾಚ್ಯಾ ಗ್ಲಾಸಾಂತ್ ಬುಡೊವ್ನ್ ಉಡಯ್ಲಿ.
ತೊ ಬುಕ್ಲೊ ಇಲ್ಲೊ ಇಲ್ಲೊ ಕರೂನ್ ಬರೊ ಜಾಲೊ. ದೊಳೊ
ನಾಶಿಲ್ಲಿ ತಾಚಿ ಖಾಂಚ್ ಭಯಾನಕ್ ದಿಸ್ತಾಲಿ. ವೆದ್ನಾ
ಪುರಾಯ್ಪಣಾನ್ ಪಯ್ಸಾವ್ಲ್ಲಿ ಅಶೆಂ ದಿಸ್ತಾಲೆಂ. ತೊ
ಸದ್ಚೆವರಿ ಘರ್ಭರ್ ಭೊಂವ್ತಾಲೊ. ಪೂಣ್ ಮ್ಹಜೆರ್ ನದರ್
ಪಡ್ಲ್ಯಾಉಪರಾಂತ್ ತೊ ಥರ್ತ್ ಭಿಯೆವ್ನ್ ಪಳೂನ್ ವತಾಲೊ.
ಮನಾಚ್ಯಾ ಎಕಾ ಕೊನ್ಶ್ಯಾಂತ್ ಮ್ಹಜೊ ಮೊವ್ ಸಭಾವ್ ಆಜೂನ್
ತಿಗೂನ್ ಉರಿಲ್ಲೊ. ದೆಖೂನ್, ಮ್ಹಜೆರ್ ಉಪಾಟ್ ಮೊಗ್ ಕರ್ಪಿ
ಪೊಶಿಲ್ಲೆಂ ಜನಾವ್ರ್ ಮ್ಹಾಕಾ ಭಿಯೆವ್ನ್ ಪಯ್ಸ್ ಪಳ್ಟಾ
ಹೆಂ ಪಳೊವ್ನ್ ಮ್ಹಾಕಾ ಭೊವ್ ಖಂತ್ ಭೊಗ್ತಾಲಿ. ಪೂಣ್
ರೊಖ್ಡೀಚ್ ತೆ ಖಂತೀಚಿ ಸುವಾತ್ ತಿಡ್ಕೀನ್ ಘೆತ್ಲಿ.
ಮ್ಹಜೆಭೀತರ್ ಎಕ್ ಖರ್ ಅಶಿ ವಿಕೃತಿ ನಿರ್ಮಾಣ್ ಜಾಲಿ ಆನಿ
ಥಂಯ್ಸಾವನ್ ಪರತ್ ಯೆವ್ಪಾಚೊ ಮಾರ್ಗ್ ಪುರಾಯ್ ಬಂದ್ ಜಾಲೊ.
ತತ್ವಜ್ಞಾನಾಂತ್ ಅಶೆ ವಿಕೃತೀಚಿ ಆಯ್ಜಮೆರನ್ ಭಾಸಾಭಾಸ್
ಜಾಂವ್ಕ್ ನಾ ಪುಣ್ ಮ್ಹಜೆ ಕುಡೀಭಿತರ್ ಆತ್ಮೊ ಆಸಾ ಹೆಂ
ಹಡ್ಡ್ಯಾರ್ ಹಾತ್ ಮಾರೂನ್ ಹಾಂವ್ ಜಶೆಂ ಸಾಂಗುಂಕ್ ಶಕ್ತಾಂ
ತೆಚ್ ಪರೀನ್ ವಿಕೃತಿ ಹಿ ಮನ್ಶಾಚಿ ಎಕ್ ಆದಿಮ್ ಪ್ರೆರ್ಣಾ
ಅಶೆಂ ಮ್ಹಾಕಾ ದಿಸ್ತಾ. ಹಿ ಮುಳಾವಿ ಭಾವ್ನಾ ಮನ್ಶಾಚ್ಯಾ
ಸಭಾವಾಕ್ ದಿಕಾ ದಿತಾ. ಆಮ್ಚ್ಯಾಮದ್ಲ್ಯಾ ದರೆಕ್ಲ್ಯಾನ್
ಶಂಬರ್ ಫಾವ್ಟ್ ಕಸ್ಲೆಂತರಿ ಮೂರ್ಖಪಣಾಚೆಂ ವಾ
ದುಶ್ಟಪಣಾಚೆಂ ಕರ್ತೃಪ್ ಕೆಲ್ಲೆಂ ಆಸ್ತಾ ಆನಿ ತಾಚೆಫಾಟಲೆಂ
ಎಕೂಚ್ ಕಾರಣ್ ಮ್ಹಳ್ಯಾರ್ ವಿಕೃತಿ. ಅಶೆ ವಾಗ್ಣುಕೆಚಿ
ಆಮ್ಚೆಕಡ್ಲ್ಯಾನ್ ಆಸ್ತ್ ನಾಸ್ತಾ. ಆಪ್ಲ್ಯಾಕ್ ಖಬರ್
ಆಶಿಲ್ಲೊ ಎಕಾದ್ರೊ ಕಾಯ್ದೊ ಫಕ್ತ್ ಮೊಡ್ಪಾಖಾತೀರ್ ಮೊಡ್ಚೊ
ಅಶೆಂ ಆಮ್ಚ್ಯಾಮದ್ಲ್ಯಾ ದರೆಕ್ಲ್ಯಾಕ್ ದಿಸ್ತಾ ಕಾಯ್ ನಾ?
ತಿ ಚೂಕ್ ಹೆಂ ಖಬರ್ ಆಸೂನ್ ಲೆಗೀತ್? ಮ್ಹಜ್ಯಾ ಮನಾಂತಲೆ
ಹೆ ವಿಕೃತೀಚೊ ಎಕ್ ದಿಸ್ ಸಾಮ್ಕೊಚ್ ತೊಲ್ ಗೆಲೊ.
ಸ್ವತಾಕೂಚ್ ತ್ರಾಸ್ ಕರೂನ್ ಘೆವ್ಪಾಚಿ ಎಕ್ ವಿಚಿತ್ರ್,
ಪೂಣ್ ಸಮ್ಜಣೆಭಾಯಲಿ ಖರ್ ಇತ್ಸಾ ಮ್ಹಜ್ಯಾ ಆತ್ಮ್ಯಾಕ್
ಖೆಂಪೂಕ್ ಲಾಗ್ಲಿ. ಫಕತ್ ವಾಯ್ಟ್ ಕರ್ಚೆಖಾತೀರ್ ಕೆಲಿ ಎಕ್
ವಾಯ್ಟ್ ಗಜಾಲ್ ಅಶೆಂಚ್ ತಿಚೆಂ ರೂಪ್ ಆಶಿಲ್ಲೆಂ. ಆನಿ
ನಿಯಂತ್ರಣಾಭಾಯರ್ ಗೆಲ್ಲಿ ಮ್ಹಜಿ ಇತ್ಸಾ ಭಾಗೊವ್ಪಾಖಾತೀರ್
ಹಾಂವೆ ತೆ ಮೊನ್ಜಾತೀಚೆ ಹಾಲ್ ಸಾಸ್ಣಾಂಖಾತೀರ್ ಸೊಂಪಯ್ಲೆ.
ಸಕಾಳೀಂಫುಡೆಂಚ್ ಹಾಂವೆಂ ಅಚ್ಳಯ್ ತಾಚೆ ಗೊಮ್ಟೆಭೊಂವತಣಿ
ದೊರ್ಯೆಚೊ ಫಾಸ್ ಘಾಲೊ ಆನಿ ತಾಕಾ ಎಕಾ ಝಾಡಾಚ್ಯಾ
ಖಾಂದ್ಯೆರ್ ಹುಮ್ಕಳಾಯಲೊ. ತ್ಯಾವೆಳಾರ್ ಮ್ಹಜ್ಯಾ
ದೊಳ್ಯಾಂತ್ಲ್ಯಾನ್ ಉದ್ಕಾಚಿ ಝರ್ ವ್ಹಾಂವ್ತಾಲಿ ಆನಿ
ಪಶ್ಚಾತ್ತಾಪಾಚ್ಯಾ ಉಜ್ಯಾನ್ ಮ್ಹಜೆಂ ಮನ್ ಕೊಡು ಜಾವ್ನ್
ಗೆಲ್ಲೆಂ. ಹಾಂವೆಂ ತಾಕಾ ಫಾಸಾರ್ ಹುಮ್ಕಳಾಯಲೊ. ಕಾರಣ್
ಮ್ಹಾಕಾ ಖಬರ್ ಆಶಿಲ್ಲೆಂ ; ತಾಣೆಂ ಮ್ಹಜೆರ್ ಮೊಗ್
ಕೆಲ್ಲೊ. ಅಶೆಂ ಕರ್ತೂಪ್ ಕರ್ಚೆಖಾತೀರ್ ಹಾಂವ್ ಉದ್ಯುಕ್ತ್
ಜಾವಂಚೊ ಅಶೆ ತರೆಚಿ ತಾಚಿ ವಾಗ್ಣೂಕ್ ನಾಶಿಲ್ಲಿ. ಹಾಂವೆಂ
ತಾಕಾ ಫಾಸಾರ್ ಹುಮ್ಕಳಾಯಲೊ ಕಾರಣ್ ಹಾಂವ್ ಎಕ್ ಪಾಪ್
ಕರ್ತಾಂ ಹೆಂ ಮ್ಹಾಕಾ ಪುರಾಯ್ಪಣಾನ್ ಖಬರ್ ಆಶಿಲ್ಲೆಂ.
ಮ್ಹಜೊ ಆತ್ಮೊ ಭಯಂಕರ್ ಪಾಪಾಚೆ ಕರ್ಣೆಕ್ ಲಾಗೂನ್ ಸಾಪ್ಪ್
ಭೂಂಯ್ಭರವಣ್ ಜಾವ್ಪಾಚೊ ಆಶಿಲ್ಲೊ ಆನಿ ಖಂಯ್ಚ್ಯಾಚ್ ದಯೆನ್
ಭರಿಲ್ಲ್ಯಾ ವಾ ಭಯಂಕರ್ ದೆವಾಚಿ ಕೃಪಾ ತಾಕಾ ವಾಚೊವಂಕ್
ಶಕ್ನಾಶಿಲ್ಲಿ.
ತೆ ರಾತೀಕಡೆನ್ ಹಾಂವ್ ಅಚ್ಕಿತ್
ಉಠ್ಲೊಂ - ಮ್ಹಜ್ಯಾ ಪಲಂಗಾಕ್ ಉಜೊ ಲಾಗಿಲ್ಲೊ. ಹಾಂವೆಂ
ಭಾಯ್ಲ್ಯಾನ್ ಯೆವ್ಪಿ ಲೊಕಾಂಚ್ಯೊ ಆಡ್ಡಯೊ ಆಯ್ಕ್ಲ್ಯೊ.
ಉಜೊ! ಉಜೊ! ಆಮ್ಚ್ಯಾ ಘರಾಕ್ ಉಜೊ ಲಾಗಿಲ್ಲೊ! ಹಾಂವ್,
ಮ್ಹಜಿ ಬಾಯ್ಲ್ ಆಣಿ ಆಮ್ಚೊ ನೊಕರ್, ತಿಗಾಯಂಚೆ ನಶೀಬ್
ಬರೆಂ ದೆಖೂನಆಮಚೊ ಜೀವ್ ವಾಚ್ಲೊ. ಉಜ್ಯಾನ್ ಘರ್
ಭೂಂಯ್ಭರವಣ್ ಜಾತ್ನಾ ಆಮಿ ತಿಗಾಂನೀಯ್ ಪಳಯ್ಲೆಂ.
ದುಸ್ರೆ ದಿಸಾ ಸಕಾಳಿಂ ಇಮಾರತೀಂತ್ ಕಾಂಯ್ಚ್ ಉರೂಂಕ್
ನಾಶಿಲ್ಲೆಂ. ರಾತೀಚ್ಯೊಚ್ ಸಗ್ಳ್ಯೊ ವಣ್ಟಿ ರಾತ್ಚ್ಯೊಚ್
ಸಕಯ್ಲ್ ಪಡಿಲ್ಲ್ಯೊ, ಫಕತ್ ಎಕ್ ಮದ್ಲಿ ವಣತ್ ಸೊಡೂನ್. ಹಿ
ವಣತ್ ಕಶಿ ಮೊಡ್ಲೀನಾ ಹಾಂಚೆಂಯ್ ಕಾರಣ್ ಮ್ಹಾಕಾ
ವ್ಹೊಲ್ಮಲೆಂ: ಕಾರಣ್ ತಿಚೆರ್ ನವೊ ಪ್ಲಾಸ್ಟರ್ ಲಾಯಿಲ್ಲೊ.
ತೊ ಆಜೂನ್ ಒಲೊಚ್ ಆಶಿಲ್ಲೊ.
ವಣ್ಟೀಶೆಜರಾಕ್
ಲೊಕಾಂಚಿ ಗರ್ದಿ ಪಳೊವ್ನ್ ಮ್ಹಾಕಾ ಅಜಾಪ್ ದಿಸ್ಲೆಂ.
ಹೆವ್ಟೆನ್ ತೆವ್ಟೆನ್ ಹಾತ್ ದಾಖಯ್ತ್ ತೆ ವ್ಹಡ್ಲ್ಯಾನ್
ಉಲಯ್ತಾಲೆ. ಹಾಂವ್ ಮಾತ್ಸೊ ಲಾಗಿಂ ಗೆಲೊಂ. ಗರ್ದೆಚ್ಯಾ
ಖಾಂದ್ಯಾವಯ್ಲ್ಯಾನ್ ಪಳಯ್ಲೆಂ. ಉಬೆ ಆಶಿಲ್ಲೆ
ವಂಟೀವ್ಯ್ಲ್ಯಾ ನವ್ಯಾ ಧವ್ಯಾ ಪ್ಲಾಸ್ಟರಾಂತ್ ಮ್ಹಾಕಾ
ಕಾಳೊಂ ರಂಗ್ ದಿಸ್ಲೊ. ಮಾನೆಭೊಂವತಣಚೆ ದೊರ್ಯೆರ್
ಹುಮ್ಕಳಪಿ ಎಕಾ ವ್ಹಡ್ಲ್ಯಾ ಮಾಜ್ರಾಚೊ ತೊ ಆಕಾರ್
ಆಶಿಲ್ಲೊ. ತೊ ಆಕಾರ್ ಪಳಯ್ತನಾ ಹಾಂವ್ ಥರ್ತ್ ಭಿಯೆಲೊಂ.
ಸ್ಪಶ್ಟಪಣಾನ್ ವಿಚಾರ್ ಕರ್ಚೆಖಾತೀರ್ ಮ್ಹಾಕಾ ಬರೊಚ್ ವೆಳ್
ಲಾಗ್ಲೊ. ಸ್ಪಶ್ಟ್ ಚಿಂತೂಂಕ್ ಮ್ಹಾಕಾ ಯತ್ನ್ ಕರ್ಚೆಚ್
ಪಡ್ಟಲೆ ಹೆಂಯ್ ಜಾಣವ್ಲೆಂ. ತಿ ಆಕೃತಿ ಥಂಯ್ ಕಶಿ ಪಾವ್ಲಿ?
ಘರಾಭೊಂವತಣ್ಚ್ಯಾ ಜಾರ್ದೀನಾಂತ್ಲ್ಯಾ ಝಾಡಾಚೆರ್
ಹಾಂವೆ ಮಾಜ್ರಾಕ್ ಹುಮ್ಕಳಾಯ್ಲ್ಲೆಂ ಹಾಚಿ ಘಟ್ಟ್ ಮ್ಹಾಕಾ
ಯಾದ್ ಆಶಿಲ್ಲಿ. ಉಜೊ ಲಾಗ್ಲೊ ತೆನ್ನಾ ಜಾರ್ದೀನಾಂತ್
ಬರೆಚ್ ಲೊಕ್ ಜಮಿಲ್ಲೆ. ಘಡ್ಯೆ ತಾಂಚೆಮದ್ಲ್ಯಾ ಕೊಣೆತರಿ
ಮೆಲ್ಲ್ಯಾ ಮಾಜ್ರಾಚಿ ದೊರಿ ಝಾಡಾವ್ಯ್ಲ್ಯಾನ್ ಕಾಪೂನ್
ತಾಕಾ ಜನೆಲಾಂತ್ಲ್ಯಾನ್ ಮ್ಹಾಕಾ ಜಾಗೊ ಕರ್ಚೆಖಾತೀರ್
ಭಿರ್ಕಟಾವನ್ ಮಾರ್ಲಾಂ ಆಸ್ತಲೆಂ. ಉಜ್ಯಾಕ್ ಲಾಗೂನ್ ಹೆರ್
ವಣ್ಟಿ ಕೊಸ್ಳಟನಾ ಮಾಜರ್ ಒಲೆ ವಣ್ಟೀಕ್ ದಶಿಲ್ಲ್ಯಾನ್
ಥಂಯ್ಚ್ ಪುರಾಯ್ಪಣಾನ್ ಕರ್ಪಲೆಂ. ಆನಿ ತಾಚೊ ಕಾಳೊ ಆಕಾರ್
ಒಲೆ ವಣ್ಟೀಕ್ ದಸ್ಲೊ. ಹಯ್, ಅಶೆಂಚ್ ಘಡ್ಲಾಂ ಆಸುಂಯೆ
ಹಾಚೆರ್ ಮ್ಹಜೊ ವಿಶ್ವಾಸ್ ಬಸ್ಲೊ.
ಪೂಣ್ ಫುಡ್ಲೆ
ಕಾಂಯ್ ಮ್ಹಯ್ನೆತರಿ ಹಾಂವ್ ತೊ ಕಾಳೊ ಆಕಾರ್ ವಿಸ್ರೂಂಕ್
ಶಕ್ಲೊ ನಾ. ಮ್ಹಾಕಾ ತೊ ಸಪ್ನಾಂನಿ ಲೆಗೀತ್ ದಿಸ್ತಾಲೊ.
ಎಕ್ ಬರೆಂ ಜನಾವ್ರ್ ಹೊಗ್ಡಾಯಲೆಂ ಹಾಚಿ ಖಂತ್ ಮ್ಹಾಕಾ
ದಿಸ್ತಾಲಿ. ತಸೊಚ್ ಎಕ್ ಪ್ರಾಣಿ ಹಾಂವೆ ಸೊದೂಂಕ್
ಸುರ್ವಾತ್ ಕೆಲಿ. ಆಮ್ಚ್ಯಾ ಶಾರಾಚ್ಯಾ ಗರೀಬ್ ಲೊಕಾಂಚ್ಯಾ
ವಸ್ಣುಕಾಂನಿ ಹಾಂವ್ ಭೊಂವ್ಡ್ಯೊ ಮಾರೂಂಕ್ ಲಾಗ್ಲೊಂ. ಎಕೆ
ರಾತಿ, ಘಾಣ್ಯಾರೆ ವಸ್ಣುಕೆಂತ್ ಎಕಾ ಪೊರ್ನ್ಯಾ ,
ಕಾಳ್ಖ್ಯಾ ತಾವ್ಹೆರ್ನಾನ್ತ್ ಬಸೂನ್ ಪಿಯೆತನಾ
ಮುಖಾವ್ಯ್ಲ್ಯಾ ಕಪಾಟಾವಯ್ಲ್ಯೊ ಸೊರ್ಯಾಚ್ಯೊ ಬಾಟ್ಲ್ಯೊ
ಮ್ಹಾಕಾ ಹಾಲಿಲ್ಲ್ಯಾವರಿ ದಿಸ್ಲ್ಯೊ. ಕಾಂಯ್ ಖೀಣ್
ಬಾರಿಕಸಾಣೀನ್ ಪಳಯ್ಲ್ಯಾಉಪರಾಂತ್ ತ್ಯೊ ಬಾಟ್ಲ್ಯೊ ಥಂಯ್
ನಾಶಿಲ್ಲ್ಯೊ.
ಹಾಂವ್ ಉಠ್ಲೊಂ ಆನಿ ಕಪಾಟಾಚೆರ್
ಅಸಾ ತರಿ ಕಿತೆಂ ಹೆ ಪಳ್ವಂಕ್ ಮ್ಹಜೊ ಹಾತ್ ಘಾಲೊ. ಹಾತಾಕ್
ಎಕ್ ಮೊವ್ ವಸ್ತ್ ಲಾಗ್ಲಿ. ಹಾಂವೆಂ ದೊನೂಯ್ ಹಾತಾನಿ ತಿ
ಸಕಯ್ಲ್ ಕಾಡ್ಲಿ ಜಾಲ್ಯಾರ್ ತೆಂ ಆಶಿಲ್ಲೆಂ ಎಕ್ ಕಾಳೆಂ
ಮಾಜರ್. ಪ್ಲೂಟೊವ್ರಿ ಮೊಠೊ ಆನಿ ಗುಬ್ಗುಬೀತ್ ಬುಕ್ಲೊ.
ತೆಂ ಎಕ್ದಮ್ ಪ್ಲುಟೊಚೆಂಚ್ ದುಸ್ರೆಂ ರೂಪ್ ದಿಸ್ತಾಲೆಂ;
ಫಕತ್ ಎಕ್ ಗಜಾಲ್ ಸೊಡೂನ್, ತಾಚ್ಯಾ ಹಡ್ಡ್ಯಾರ್ ಎಕ್ ಧವೊ
ದಾಗ್ ಆಶಿಲ್ಲೊ.
ಹಾಂವೆಂ ತಾಕಾ ಸ್ಪರ್ಶ್ ಕೆಲ್ಯಾ
ಉಪ್ರಾಂತ್ ತೊ ಉಠ್ಲೊ ಆನಿ ಆಪ್ಲಿ ತಕ್ಲಿ ಮ್ಹಜ್ಯಾ ಹಾತಾಕ್
ಘಾಸುಂಕ್ ಲಾಗ್ಲೊ. ತಾಕಾ ಹಾಂವ್ ಮಾನವ್ಲೊಂ ಅಶೆಂ
ದಿಸ್ತಾಲೆಂ. ಅಸೊಚ್ ಪ್ರಾಣಿ ಹಾಂವ್ ಸೊದ್ತಾಲೊಂ. ಬರೊಚ್
ವೆಳ್ ಇಶ್ಟಾಗತೀನ್ ತಾಣೆಂ ಮ್ಹಜೆಕಡ್ಲ್ಯಾನ್ ಸಾಸ್ಪೂನ್
ಘೆತ್ಲೆಂ. ಉಪ್ರಾಂತ್ ಹಾಂವ್ ಘರಾ ಯೆವಂಕ್ ಭಾಯ್ರ್
ಸರ್ಲ್ಯಾ ಉಪರಾಂತ್ ತೊಯ್ ರಸ್ತ್ಯಾರ್ ಆಯ್ಲೊ ಆನಿ
ಮ್ಹಜೆವಾಂಗಡಾ ಘರಾ ಆಯ್ಲೊ. ಆತಾಂ ಮ್ಹಜೆ ಎಕ್ ನವೆಂ ಘರ್
ಆಶಿಲ್ಲೆಂ.
ಘರಾಂತ್ ಆಯ್ಲ್ಯಾಉಪರಾಂತ್ ಸಂವ್ಕಳ್
ಆಶಿಲ್ಲೆವರಿ ತಾಣೆಂ ಪುಟ್ಕರೂನ್ ಎಕೆ ಕದೆಲೀರ್ ಉಡಿ
ಮಾರ್ಲಿ ಆನಿ ತೊ ಸುಸ್ತ್ ನ್ಹಿದ್ಲೊ. ತೊ ಆಮ್ಚೆವಾಂಗಡಾ
ರಾವಂಕ್ ಲಾಗ್ಲೊ ಆನಿ ಆಮ್ಚೆರ್ ದೊಗಾಂಯ್ಚೆರ್ ಮೊಗ್ ಕರು
ಲಾಗ್ಲೊ. ರೊಖ್ಡೊಚ್ ತೊ ಮ್ಹಜೆ ಬಾಯ್ಲೆಚೊ ಲಾಡ್ಕೊ
ಜಾಲೊ.ಪೂಣ್ ಜಶೆ ದಿಸ್ ವಚೂಂಕ್ ಲಾಗ್ಲೆ, ಕಾಂಯ್
ಸಪ್ತಕಾಂಭಿತರ್ ಮ್ಹಾಕಾ ತಾಚೆವಿಶಿಂ ಮೊಗ್ ದಿಸ್ನಾ ಜಾಲೊ
ಆನಿ ದಿಸಾಂದಿಸ್ ತಾಚಿ ತಿಡಕ್ ಯೆವಂಕ್ ಲಾಗ್ಲಿ. ತೊ
ಮ್ಹಜೆವ್ಯಲೊ ಮೊಗ್ ದಾಖಯ್ತಾ ಹಾಚೊ ಮ್ಹಾಕಾ ದುಸ್ವಾಸ್
ದಿಸೂಂಕ್ ಲಾಗ್ಲೊ.
ರೊಖ್ಡೊಚ್ ಮ್ಹಜೊ ದುಸ್ವಾಸ್
ವಾಡತ್ ಗೆಲೊ, ಪೂಣ್ ಹಾಂ, ಹಾಂವ್ ತಾಚೆಕಡೆನ್
ಕ್ರೂರ್ಪಣಾನ್ ವಾಗ್ಲೊನಾ. ಹಯ್, ತೆ ಗಜಾಲೀಚಿ ಹಾಂವೆಂ
ಪುರಾಯ್ ಜತ್ನಾಯ್ ಘೆತಿಲ್ಲಿ. ಕಾರಣ್ ಮ್ಹಜ್ಯಾ ಗರೀಬ್
ಸ್ವಭಾವಾಚ್ಯಾ ಪ್ಲುಟೊಚೆಂ ಹಾಂವೆಂ ಕಿತೆಂ ಕೆಲ್ಲೆಂ ತಾಚೊ
ಉಗ್ಡಾಸ್ ಮ್ಹಾಕಾ ಯೆತ್ ರಾವ್ತಾಲೊ. ಹಾಂವೆಂ ಹ್ಯಾ
ಪ್ರಾಣ್ಯಾಚೊ ಚಡ್ ದುಸ್ವಾಸ್ ಕರ್ಪಾಚೆಂ ದುಸ್ರೆಂ ಎಕ್
ಕಾರಣ್ ಮ್ಹಳ್ಯಾರ್ ತಾಕಾಯ್ ಪ್ಲೂಟೊವ್ರಿ ಫಕತ್ ಎಕೂಚ್
ದೊಳೊ ಆಶಿಲ್ಲೊ. ತೊ ಮ್ಹಜೆವಾಂಗಡಾ ಘರಾ ಆಯ್ಲ್ಯಾಉಪರಾಂತ್
ದುಸ್ರೆ ದಿಸಾ ಮ್ಹಾಕಾ ತೆಂ ಸಮಜ್ಲ್ಲೆಂ. ತೆ ಗಜಾಲೀಕ್
ಲಾಗೂನ್ ಮ್ಹಜಿ ಬಾಯ್ಲ್ ತಾಚೆರ್ ಚಡೂಚ್ ಮೊಗ್ ಕರೂಂಕ್
ಲಾಗಿಲ್ಲಿ!
ಪೂಣ್ ಹಾಂವ್ ತ್ಯಾ ಬುಕ್ಲ್ಯಾಚೊ ಜಿತ್ಲೊ
ಚಡ್ ದುಸ್ವಾಸ್ ಕರ್ತಲೊಂ ತಾಚೆಪರಸ್ ಚಡ್ ಮೊಗ್ ತೊ
ಮ್ಹಜೆರ್ ಕರ್ತಾಲೊ. ಹಾಂವ್ ವತಾಂ ಥಂಯ್ ಥಂಯ್ ತೊ
ಮ್ಹಜೆಫಾಟ್ಲ್ಯಾನ್ ಭೊಂವ್ತಾಲೊ ಆನಿ ಮ್ಹಜ್ಯಾ ಪಾಯಾಂಮದಿಂ
ಯೆತಾಲೊ. ಸದಾಂಚ್ ಹಾಂವ್ ಬಸ್ತಾಂ ತೆ ಕದೆಲೀಪೊಂದಾ ತೊ
ಬಸ್ತಾಲೊ. ಕೆನ್ನಾ ಕೆನ್ನಾಯ್ ತೊ ಮ್ಹಜೆ ಮಾಂಡ್ಯೆರ್ ಉಡಿ
ಮಾರ್ತಾಲೊ ತೆನ್ನಾ ಮ್ಹಾಕಾ ತಾಚೊ ಖೂನ್ ಕರ್ಚೊ ಕಶೆಂ
ದಿಸ್ತಾಲೆಂ ಪೂಣ್ ಹಾಂವೆಂ ತಶೆಂ ಕೆಲೆನಾಂ. ಹಾಂವ್
ಸ್ವತಾಕೂಚ್ ಥಾಮಯ್ತಾಲೊಂ ಕಾರಣ್ ಮ್ಹಾಕಾ ಪ್ಲೂಟೊಚಿ ಯಾದ್
ಜಾತಾಲಿ, ತೆಭಾಯ್ರ್ ಹ್ಯಾ ಜನಾವ್ರಾಚಿ ಮ್ಹಾಕಾ ಭಿರಾಂತೂಯ್
ದಿಸಾತಲಿ.
ತೆ ಭಿರಾಂತೀಚೆಂ ವರ್ಣನ್ ಹಾಂವ್ ಕಶೆಂ
ಕರುಂ? ಖರೆಂ ಮ್ಹಳ್ಯಾರ್ ಎಖಾದ್ರ್ಯಾ ವಾಯ್ಟ್ ಕರ್ತುಪಾಚಿ
ತಿ ಭಿರಾಂತ್ ನಾಶಿಲ್ಲಿ... ಪೂಣ್ ಹಾಂವ್ ತಿಚೆಂ ವರ್ಣನ್
ಕಶೆತರೆನ್ ಕರುಂ ತೆಂಚ್ ಮ್ಹಾಕಾ ಸಮ್ಜನಾ. ಕಾಂಯ್
ದಿಸಾಂಸಾವನ್ ತಿ ವಿಚಿತ್ರ್ ಭಿರಾಂತ್ ವಾಡೂಂಕ್ ಲಾಗಿಲ್ಲಿ
ಆನಿ ಹಾಂವ್ ಪುರಾಯ್ಪಣಾನ್ ಭಿರಾಂತೀಚೆ ಸಾವ್ಳೆಪೊಂದಾ
ಪಾವಿಲ್ಲೊಂ. ಹಾಚೆಂ ಕಾರಣ್ ಸಾಂಗೀತ್ ಜಾಲ್ಯಾರ್ ತುಮಿ
ಮ್ಹಜೆರ್ ವಿಸ್ವಾಸ್ ದವ್ರಚೆ ನಾ. ತುಮಿ ಮ್ಹಾಕಾ ಪಿಸೊ
ಮ್ಹಣ್ಟಲೆ.
ಬರೆಚ್ ಫಾವ್ಟ್ ಮ್ಹಜೆ ಬಾಯ್ಲೆನ್
ಬುಕ್ಲ್ಯಾಚ್ಯಾ ಹಡ್ಡ್ಯಾವಯಲೊ ದಾಗ್ ಮ್ಹಾಕಾ ದಾಖಯ್ಲ್ಲೊ.
ತ್ಯಾ ದಾಗಾಚೊ ಆಕಾರ್ ಬದ್ಲತಾ ಅಶೆಂ ತಿ ಮ್ಹಾಕಾ ಸಾಂಗಿ.
ಹಾಂವೆಂ ತಿಚೆರ್ ವಿಸ್ವಾಸ್ ದವ್ರಲೊ ನಾ. ಪೂಣ್ ಕಾಂಯ್
ಸಪ್ತಕಾಂಭೀತರ್ ತಿಚ್ಯಾ ಉತ್ರಾಂಮದಲೆಂ ಸತ್ ಮ್ಹಾಕಾ
ವ್ಹೊಲ್ಮಲೆಂ. ತ್ಯಾ ದಾಗಾಚೊ ಆಕಾರ್ ಖರೆಂಚ್ ಬದ್ಲತಾಲೊ.
ತಾಚ್ಯೊ ದೊನೂಯ್ ಕಡೊ ನೀಟ್ ಜಾಲ್ಲ್ಯೊ. ಆನಿ ಲ್ಹವ್ಲ್ಹವ್
ಎಕ್ ವೆಗ್ಳೊ ಆಕಾರ್ ತಾಂತ್ಲ್ಯಾನ್ ತಯಾರ್ ಜಾತಾಲೊ.
ಹಯ್, ಕಾಳ್ಜಾಂತ್ ಭಿರಾಂತ್ ನಿರ್ಮಾಣ್ ಕರ್ಪಿ ತೆಂ
ಎಕಾ ಯಂತ್ರಾಚೆಂ ಚಿತ್ರ್ ಆಶಿಲ್ಲೆಂ. ಮರ್ಣಾಚಿ ಖ್ಯಾಸ್ತ್
ಜಾಲ್ಲ್ಯಾ ಮನ್ಶಾಕ್ ಫಾಸಾವ್ರ್ ಹುಮ್ಳಾವನ್ ಮಾರ್ಪಾಚೆಂ
ಯಂತ್ರ್ !
ಸುಖ್, ವಿಸವ್ ಹ್ಯಾ ಉತ್ರಾಂಚೊ ಅರ್ಥ್
ಹಾಂವ್ ತ್ಯಾ ದಿಸಾಸಾವನ್ ವಿಸ್ರೂನ್ ಗೆಲೊಂ. ದಿಸ್ಭರ್ ತೆಂ
ಜನಾವ್ರ್ ಮ್ಹಜಿ ಫಾಟ್ ಸೊಡಿನಾಶಿಲ್ಲೆಂ. ರಾತೀಕಡೆನ್ ದರ್
ವರಾಉಪರಾಂತ್ ತೆಂ ಮ್ಹಾಕಾ ಜಾಗಯ್ತಲೆಂ. ಮ್ಹಾಕಾ ಯಾದ್
ಜಾತಾ, ಕೆನ್ನಾಕೆನ್ನಾಯ್ ಮ್ಹಾಕಾ ಸಾಮ್ಕ್ಯಾ ಭಿರಾಂಕೂಳ್
ಸಪ್ನಾಂತ್ಲ್ಯಾನ್ ಜಾಗ್ ಆಯ್ಲ್ಯಾಉಪರಾಂತ್ ಮ್ಹಜ್ಯಾ
ಮುಖಾಮಳಾಲಾಗಿಂ ಆಪ್ಲೆಂ ತೊಂಡ್ ಹಾಡೂನ್ ತೊ ಮ್ಹಜೆಂ
ಕಾಳೀಜ್ ದಾಮಿತ್ ಮ್ಹಜ್ಯಾ ಹಡ್ಡ್ಯಾರ್ ಬಸೂನ್ ಆಸ್ತಾಲೊ.
ಆತಾಂ ಮ್ಹಜೆಂ ಪರಿವ್ರ್ತನ್ ಜಾವಂಕ್ ಲಾಗಿಲ್ಲೆಂ.
ಮ್ಹಜೆಭೀತರ್ ಸದ್ಗುಣ್ ಚಿಮ್ಟೀಭರ್ ಲೆಗೀತ್ ಉರ್ಲೊನಾ.
ಮ್ಹಜೆ ತಕ್ಲೆಂತ್ ದುಶ್ಟ್ ವಿಚಾರ್ ನಾಚೂಂಕ್ ಲಾಗಿಲ್ಲೆ-
ಎಕ್ದಮ್ ಕಾಳೆಕಿಟ್ಟ್ ಆನಿ ಸಾಮ್ಕೆ ಹಿಂಸ್ತ್ರ್ ವಿಚಾರ್.
ಭೊಂವ್ತಣ್ಚ್ಯಾ ದರೆಕ್ಲ್ಯಾಚೊ ಆನಿ ದರೆಕ್ ವಸ್ತೂಚೊ ಹಾಂವ್
ದುಸ್ವಾಸ್ ಕರೂಂಕ್ ಲಾಗ್ಲೊಂ... ಮ್ಹಜೆ ಬಾಲ್ಯೆಚೊ
ಲೆಗೀತ್. ಎಕ್ ದಿಸ್ ತಿ ಮ್ಹಜೆವಾಂಗಡಾ ಲಾಕ್ಡಾಂ ಕಾಪೂಂಕ್
ಸಕಯ್ಲ್ ತಳ್ಘರಾಂತ್ ಆಯ್ಲಿ. ಆತಾಂ ನೊಕರ್ ದವ್ರಪಾಚಿ
ಮ್ಹಜಿ ಐಪತ್ ನಾಶಿಲ್ಲಿ. ಹಾಂವ್ ಸೊಂಪ್ಣಾ ದೆವೂನ್ ಸಕಯ್ಲ್
ಯೆತಾನಾ ಬುಕ್ಲೊಯ್ ಮ್ಹಜ್ಯಾ ಫಾಟ್ಲ್ಯಾನ್ ಆಯ್ಲೊ ಆನಿ
ಮ್ಹಜ್ಯಾ ಪಾಯಾಂಮದಿಂ ಘುಟ್ಮಳುಂಕ್ ಲಾಗ್ಲೊ. ಸ್ವಸ್ತಾಕ್
ಸಾವ್ರಿನಾ ಜಾಲ್ಯಾರ್ ಹಾಂವ್ ಗಡ್ಗಡತ್ ಸಕಯ್ಲ್ ವಚ್ಪಾಚೊಂ.
ಮ್ಹಾಕಾ ಸಾಮ್ಕಿ ಭಿರ್ಭಿರಿ ಮಾರ್ಲಿ. ಥಂಯ್ ಆಶಿಲ್ಲಿ ಎಕ್
ಕುರಾಡ್ ಉಬಾರೂನ್ ಹಾಂವೆಂ ತಾಚೆ ದೊನ್ ಕುಡ್ಕೆ ಕರ್ಪಾಚೊ
ಯತ್ನ್ ಕೆಲೊ. ಪೂಣ್ ಹಾಂವ್ ಕುರಾಡ್ ಸಕಯ್ಲ್ ಹಾಡ್ಟನಾ
ಮ್ಹಜೆ ಬಾಯ್ಲೆನಆಪ್ಲ್ಯಾ ಹಾತಾನ್ ಮ್ಹಜೊ ಹಾತ್ ಘಟಆಂವಳೂನ್
ಧರ್ಲೊ. ಮ್ಹಾಕಾ ಚಡ್ ತಿಡಕ್ ಆಯ್ಲಿ. ಹಾಂವೆಂ ಎಕಾ
ಝಟ್ಕ್ಯಾನ್ ಮ್ಹಜೆ ಮನ್ಗಟ್ ಸೊಡವ್ನ್ ಘೆತ್ಲೆಂ, ಕುರಾಡ್
ಪರತ್ ಉಬಾರಲಿ ಆನಿ ಘಸ್ಸ್ ಕರೂನ್ ತಿಚೆ ತಕ್ಲೆರ್ ಮಾರ್ಲಿ.
ತಿ ಥಂಯ್ಚ್ ಜಮ್ನೀರ್ ಕೊಸ್ಳ್ಳಿ ಆನಿ ಆವಾಜ್ ಕಾಡೀನಾಸತನಾ
ತಿಣೆಂ ಜೀವ್ ಸೊಡ್ಲೊ.
ಕಾಂಯ್ ಖೀಣ್ ಹಾಂವೆಂ
ಹೆವ್ಟೆನ್ ತೆವ್ಟೆನ್ ಬುಕ್ಲ್ಯಾಕ್ ಸೊದ್ಲೊ, ಪೂಣ್ ತೊ
ಪಳೂನ್ ಗೆಲ್ಲೊ. ಆತಾಂ ಮ್ಹಾಕಾ ದುಸ್ರಿ ಚಿಂತಾ ಸತಾವಂಕ್
ಲಾಗ್ಲಿ. ಬಾಯ್ಲೆಚ್ಯಾ ಮಡ್ಯಾಚೆಂ ಕಿತೆಂ ಕರಪ್? ಮ್ಹಾಕಾ
ಬೆಗೊಬೆಗ್ ಕಿತೆಂತರಿ ಕರಪ್ ಗರ್ಜೆಚೆಂ ಆಶಿಲ್ಲೆಂ.
ಮಡ್ಯಾಕ್ ಖಂಯ್ ಲಿಪೊವ್ನ್ ದವ್ರುಂ? ಘರ್ಭಯಾರ್ ಕಾಡಪ್
ಶಕ್ಯ್ ನಾ. ಶೆಜಾರಿ ಪಾಜಾರಿ ಪಳಯ್ತಲೆ! ಹಾಂವೆಂ ತಿ ಕೂಡ್
ಕಾಪೂನ್ ಲಾಸ್ಪಾಚೆಂ ಚಿಂತ್ಲೆಂ; ತಳ್ಘರಾಂತೂಚ್ ಫೊಂಡ್
ಕಡೂನ್ ಪೂರ್ಪಾಚೆಂ ಚಿಂತ್ಲೆಂ; ಜರ್ದೀನಾ ಪಲ್ತಡಚೆ
ನ್ಹಂಯತ್ ಉಡವ್ಪಾಚೆಂ ಚಿಂತ್ಲೆಂ; ಎಕಾ ಬರ್ಯಾ
ಬೊಕ್ಸಾಭಿತರ್ ಘಾಲೂನ್ ಕೊಣಾಕ್ ಕಳ್ನಾಸತನಾ ಘರಾಭಾಯರ್
ಕಾಡ್ಪಾಚೆಂ ಚಿಂತ್ಲೆಂ. ಅಚ್ಕಿತ್ ಮ್ಹಜಿ ನದರ್
ತಳ್ಘರಾಂತಲೆ ಎಕೆ ವಂಟೀಚೆರ್ ಪಡ್ಲಿ. ಥಂಯ್ ಪೊರ್ನಿ,
ವಾಪ್ರೂಂಕ್ ನಾಶಿಲ್ಲಿ ಫಾಯ್ರ್ ಪ್ಲೆಸ್ ಚುನೊ ಆನಿ ವಿಟೊ
ಲಾವ್ನ್ ಬಂದ್ ಕೆಲ್ಲಿ. ತೆಂ ಬಾಂದ್ಕಾಮ್ ತಕ್ಲುಪಿ
ದಿಸ್ತಾಲೆಂ. ಹಾಂವೆ ಎಕ್ ಪಾರಯ್ ಘಾಲಿ ಆನಿ ಯತ್ನ್ ಕರೂನ್
ಕಾಂಯ್ ವಿಟೊ ಹಾಲಯ್ಲ್ಯೊ. ತ್ಯೊ ಸಹಜ್ ನಿಖ್ಳುನ್
ಆಯ್ಲ್ಯೊ. ತಾಂಚೆಫಾಟ್ಲ್ಯಾನ್ ಹಾಂವೆಂ ಚಿಂತಿಲ್ಲೆಂ ತೆಚ್
ಭಶೆನ್ ಎಕ್ ಕೂಡ್ ಉರ್ಪಾಇತಲಿ ಸುವಾತ್ ಥಂಯ್ ಆಶಿಲ್ಲಿ.
ಬರೀಚ್ ಖಟ್ಪಟ್ ಕರೂನ್ ಹಾಂವೆಂ ತಿ ಕೂಡ್ ಥಂಯ್ ಘುಸಯ್ಲಿ
ಆನಿ ಸಗ್ಳ್ಯೊ ವಿಟೊ ಆದ್ಲೆವರಿ ದಾಳೂನ್ ದವ್ರ್ಲ್ಯೊ. ಚುನೊ
ಲಾವ್ನ್ ವಿಟಾಂಚಿ ವಣತ್ ಸಾರಯ್ಲಿ. ಆತಾಂ ತಿಚೆಭಿತರ್ ಆನಿ
ವಂಟೀಚ್ಯಾ ಹೆರ್ ಸುವಾತೆಭೀತರ್ ಕಸ್ಲೀಚ್ ಫರಕ್
ದಿಸ್ನಾಶಿಲ್ಲೊ. ಕಾಂಯ್ ವೆಳ್ ತೆ ವಂಟೀಕಡೆನ್
ಪಳಯ್ಲ್ಯಾಉಪರಾಂತ್ ಹಾಂವ್ ಧಾದೊಶಿ ಜಾಲೊಂ. ಕಾರಣ್ ತೆ
ವಂಟೀತ್ಲ್ಯಾನ್ ವಿಟೊ ಕಾಡೂನ್ ತ್ಯೊ ಪರ್ತ್ಯೊ ದಾಳೂನ್
ದವ್ರ್ಲ್ಯಾತ್ ಹೆಂ ಮಾತ್ತುಯ್ ಸಮ್ಜನಾಶಿಲ್ಲೆಂ. ಹಾಂವೆಂ
ಜಮೀನ್ ನಿತಳ್ ಕೆಲಿ ಆನಿ ಚೊಂಯ್ವ್ಟೆನ್ ನದರ್ ಮಾರ್ಲಿ.
ಥಂಯ್ ಕಿತೆಂ ಘಡ್ಲಾಂ ಹಾಚಿ ಸುಲೂಸ್ ಕೊಣಾಕೂಚ್ ಲಾಗಪ್
ಶಕ್ಯ್ ನಾಶಿಲ್ಲೆಂ.
ಹಾಂವ್ ವಯ್ರ್ ಆಯ್ಲೊಂ ಆನಿ
ತ್ಯಾ ಬುಕ್ಲ್ಯಾಕ್ ಜೀವೆಂಶಿಂ ಮಾರ್ತಲೊಂಚ್ ಅಸೊ ಹಾಂವೆಂ
ನಿಶ್ಚೆವ್ ಕೆಲೊ. ತಾಣೆಂ ಮ್ಹಜ್ಯಾ ನಶೀಬಾಂತ್ ವಾಯ್ಟ್
ದಿಸ್ ಹಾಡಿಲ್ಲೊ. ಹಾಂವೆಂ ತಾಕಾ ಸಗ್ಳ್ಯಾಕ್ ಸೊದ್ಲೊ ಪೂಣ್
ತೊ ಮ್ಹಾಕಾ ಮೆಳೊನಾ. ಹಾಂವ್ ಬಾಯ್ಲೆಚೊ ಖೂನ್ ಕರ್ತನಾ ತೊ
ಥಂಯ್ ಆಶಿಲ್ಲೊ ಆನಿ ಹಾಂವ್ ತಾಚಿ ವಾಟ್ ಪಳಯ್ತಾಂ ಹೆಂ
ಬೆಸ್ ಬರೆಂ ಜಾಣೂನ್ ತೊ ಮ್ಹಜೆಲಾಗಿಂ ಯೆವ್ಚೊನಾ ಹೆಂ
ಮ್ಹಾಕಾ ಸಮ್ಜತಾಲೆಂ. ಹಾಂವೆಂ ಸಾಂಜೆಮೆರೆನ್ ತಾಚಿ ವಾಟ್
ಪಳಯ್ಲಿ ಪೂಣ್ ತೆಂ ದುಶ್ಟ್ ಜನಾವ್ರ್ ಮ್ಹಾಕಾ ಖಂಯ್ಚ್
ದಿಸ್ಲೆನಾ. ರಾತೀಕಡೆನೂಯ್ ತೊ ಆಯ್ಲೊ ನಾ ಆನಿ ಬರ್ಯಾಚ್
ರಾತೀಂಉಪರಾಂತ್ ಹಾಂವ್ ಸವ್ಸ್ತಕಾಯೆನ್ ನ್ಹಿದ್ಲೊಂ.
ಸಕಾಳೀಂಫುಡೆಂ ಜಾಗ್ ಯೆತ್ಕಚ್ ಲೆಗೀತ್ ತೊ ಮ್ಹಜೆ ನದ್ರೆಕ್
ಪಡ್ಲೊ ನಾ ದೆಖೂನ್ ಮ್ಹಾಕಾ ಮಾತ್ಶೆಂ ಅಜಾಪ್ ದಿಸ್ಲೆಂ.
ದೊನ್ , ತೀನ್ ದಿಸ್ ಗೆಲೆ ಪೂಣ್ ಬುಕ್ಲೊ ಖಂಯ್ಚ್ ದಿಸ್ಲೊ
ನಾ. ಮ್ಹಾಕಾ ಕಿತ್ಲಿ ಖೊಸ್ ಜಾಲಿ ತೆಂ ಕಶೆಂ ಸಾಂಗುಂ?
ತ್ಯಾ ಬುಕ್ಲ್ಯಾವಿಣೆಂ ಮ್ಹಜಿ ಜೀಣ್ ಸುಖಿ ಜಾಲಿ. ಹಯ್!
ತಾಕಾಚ್ ಲಾಗೂನ್ ಹಾಂವ್ ದುಖೆಸ್ತ್ ಆಶಿಲ್ಲೊಂ. ಆನಿ ಆತಾಂ
ತೊ ಗಾಯ್ಬ್ ಜಾಲ್ಯಾಉಪರಾಂತ್ ಮ್ಹಾಕಾ ಮುಕ್ತ್
ಜಾಲ್ಲ್ಯಾವರಿ ದಿಸ್ಲೆಂ. ಪುರಾಯ್ ಮುಕ್ತ್ ಆನಿ
ಉರ್ಬೆಭರೀತ್! ಹಾಚೆಫುಡೆಂ ಮಾಜರ್ ನಾಕಾ! ಕೆನ್ನಾಚ್ ನಾಕಾ!
ಮ್ಹಜಿ ಬಾಯ್ಲ್ ದಿಶ್ಟಿ ಪಡ್ನಾ ದೆಖೂನ್ ಶೆಜಾರಿ
ಪಾಜಾರಿ ಆನಿ ಬರೆಚ್ ಲೊಕ್ ಮ್ಹಜೆ ಭೆಟೆಕ್ ಆಯ್ಲೆ, ತಾಣಿಂ
ವಿಚಾರ್ಲ್ಯಾ ಆಡ್ವ್ಯಾ ತಿಡ್ವ್ಯಾ ಪ್ರಸ್ನಾಂಕ್ ಹಾಂವೆಂ
ಸಾದೂರಪಣಾನ್ ಜಾಪೊ ದಿಲ್ಯೊ. ತಾಂಚೆಂ ಸಮಾದಾನ್ ಜಾಲೆಂ ಆನಿ
ಫುಡ್ಲೆ ದೊನ್ ತೀನ್ ದಿಸ್ ತಿಚೊ ಸೊದ್ ಘೆವ್ಪಾಚೆ ಯತ್ನ್
ಜಾಲೆ. ಚವ್ಥ್ಯಾ ದಿಸಾ ಪುಲಿಸ್ ಘರಾ ಆಯ್ಲೆ. ತಾಣಿಂ
ಘರಾಂತ್ ಸೊದೂಂಕ್ ಸುರ್ವಾತ್ ಕೆಲಿ ತೆನ್ನಾ ಹಾಂವ್
ಮಾತ್ತುಯ್ ಕಾಂಚಾವ್ಲೊಂನಾ. ಘರಾಂತ್ ಸಗ್ಳೆಕಡೆನ್ ಸೊದ್ತನಾ
ತಾಣಿಂ ಮ್ಹಾಕಾ ಆಪ್ಲೆವಾಂಗಡಾ ಯೆವ್ಪಾಚಿ ವಿನಂತಿ ಕೆಲಿ
ಆಣಿ ಹಾಂವೆಂ ತಿ ಮಾನ್ಲಿ. ತಾಣಿಂ ಬಾರಿಕಸಾಣೀನ್ ಸೊದ್ಲೆಂ.
ಸಗ್ಳ್ಯಾಕ್, ಪರತ್ ಪರತ್. ಘರಾಚೊ ಎಕ್ ಎಕ್ ಕೊನ್ಸೊ ತಾಣಿಂ
ಸೊದ್ಲೊ. ಮಾಗೀರ್ ತೆ ತಳ್ಘರಾಂತ್ ಪಾವ್ಲೆ. ಹಾಂವುಯ್
ತಾಂಚೆವಾಂಗಡಾ ಸಕಯ್ಲ್ ದೆಂವ್ಲೊಂ. ಮ್ಹಾಕಾ ಮಾತ್ತುಯ್
ಭಿರಾಂತ್ ದಿಸೂನಾಶಿಲ್ಲಿ. ತೆ ಹಾಂಗಾ ಥಂಯ್ ಸೊದೀಮೆರೆನ್
ಹಾಂವ್ ತಾಂಕಾಂ ಪಳಯ್ತ್ ಪಾಸ್ಯೊ ಮಾರ್ತಲೊಂ. ತಾಂಕಾಂ
ಕಾಂಯ್ಚ್ ಮೆಳೆಂನಾ ಆನಿ ರೊಖ್ಡೆಚ್ ತೆ ವಚ್ಪಾಚೆ ಚಾಲೀಕ್
ಲಾಗ್ಲೆ.
ಮ್ಹಜೆಂ ಕಾಳೀಜ್ ಖೊಶ್ಯೆನ್ ಭರ್ಲೆಂ
ಆನಿ ತೆ ಸೊಂಪ್ಣಾಂ ಚಡ್ಟನಾ ಮ್ಹಜೆಂ ತೊಂಡ್ ಮರ್ಯಾದ್
ಸೊಡೂನ್ ಬಡ್ಬಡೂಂಕ್ ಲಾಗ್ಲೆಂ. ಹಾಂವ್ ಕಿತೆಂ ಉಲಯ್ತಾಂ
ಹೆಂ ಮ್ಹಾಕಾಚ್ ಕಳ್ನಾಶಿಲ್ಲೆಂ. "ದೆವ್ ತುಮ್ಕಾಂ ಬರೊ
ದಿಸ್ ದಿಂವ್, ಸರ್! ಹೆಂ ಘರ್ ಪೊರ್ನೆಂ ಪೂಣ್ ಸಾಮ್ಕೆಂ
ಘಟ್ಮುಟ್. ಹಯ್, ಸಾಮ್ಕೆಂ ಪೊರ್ನೆಂ ಪೂಣ್ ಘಟ್ಮುಟ್!
ಹಾಚ್ಯೊ ವಂಟಿ ಮ್ಹಳ್ಯಾರ್...ಆರೆ, ತುಮಿ ಚಲ್ಲೆ ,
ಸಾಯ್ಬ್? — ಹ್ಯೊ ವಂಟಿ ಸಾಮ್ಕ್ಯೊ ಘಟ್ಮುಟ್ ಕಾಯ್ ನ್ಹಯ್
? ಪಳ್ಯಾತ್, ಕಿತ್ಲ್ಯೊ ಘಟ್ಮುಟ್ ತ್ಯೊ! " ಅಶೆಂ ಉಲಯ್ತಾಂ
ಉಲಯ್ತಾಂ ಹಾಂವೆ ಥಂಯ್ ಆಶಿಲ್ಲೊ ಎಕ್ ದಾಂಡೊ ಘೆವ್ನ್
ವಣ್ಟೀರ್ ನೆಟಾನ್ ಮಾರ್ಲೊ.. ಮ್ಹಜೆ ಬಾಯ್ಲೆಚೆಂ ಪ್ರೆತ್
ಲಿಪೊವ್ನ್ ಜೆ ಸುವಾತೆರ್ ಹಾಂವೆಂ ನವಿ ವಣತ್ ಬಾಂದಿಲ್ಲಿ
ಥಂಯ್ಚ್ ದಾಂಡ್ಯಾಚೊ ಧಪ್ಕೊ ಬಸ್ಲೊ.
ಅಚ್ಕಿತ್
ಹಾಂವೆಂ ದಾಂಡೊ ಮಾರಿಲ್ಲೆ ಸುವಾತೆವಯ್ಲ್ಯಾನ್
ಭಿತರ್ಲ್ಯಾನ್ ಎಕ್ ಆವಾಜ್ ಆಯ್ಲೊ. ಲ್ಹಾನ್ ಬಾಳ್ಕಾಚ್ಯಾ
ರಡ್ಪಾಚೊ ಆವಾಜ್! ಸುರ್ವೆಕ್ ದಾಮೂನ್ ಧರಿಲ್ಯಾವರಿ,
ಹುಂಡ್ಕ್ಯಾಂ- ಹುಂಡ್ಕ್ಯಾಂನಿ, ತುಟಕ್ ಆನಿ ಕಾಂಯ್
ಖೀಣಾಂಭಿತರ್ ಮೊಠ್ಯಾನ್, ಥಾಮ್ನಾಸತನಾ, ಎಕ್ ಕಿಳಾಂಚ್
ಕಶಿ... ಮನ್ಶಾಚಿ ನ್ಹಯ್... ಎಕ್ ವೆಗ್ಳೀಚ್. ಅರ್ದಿ
ಭಯಾಚಿ, ಅರ್ದಿ ಜೈತಾಚಿ ! ಪಾತಾಳಾಂತ್ಲ್ಯಾನ್ ಖಂಯ್ಚ್ಯಾ
ತರಿ ಸೈತಾನಾಚ್ಯಾ ಆವಾಜಾವರಿ.
ಮ್ಹಾಕಾ ಭೊಂವ್ತಣಿಂ
ಕಿತೆಂ ಜಾತಾ ತೆಂಚ್ ಸಮ್ಜನಾ ಜಾಲೆಂ. ಪಾಯಾಂಕ್ ಥರ್ಥರೊ
ಭರ್ಲೊ ಆನಿ ಆದ್ರಾಕ್ ಲಾಗೂನ್ ಹಾಂವ್ ಮುಖಾವ್ಯಲೆ ವಣ್ಟೀಕ್
ತೆಂಕ್ಲೊಂ. ದಚ್ಕೂನ್ ಸೊಂಪ್ಣಾಂಚೆರ್ ಉಬೆ ರವಿಲೆಲೆ
ಪುಲಿಸ್ ಖೀಣಾಂಭಿತರ್ ಧಡಾಧಡ್ ಸಕಯ್ಲ್ ದೆಂವ್ಲೆ ಆನಿ ತಿ
ವಣತ್ ಮೊಡುಂಕ್ ತಾಂಕಾಂ ಫಕ್ತ್ ಕಾಂಯ್ ಸೆಕಂದ್ ಲಾಗ್ಲೆ.
ಭೂಂಯಾರಾವರಿ ಆಶಿಲ್ಲೆ ತೆ ಖಾಚೀಂತ್ ಮ್ಹಜೆ ಬಾಯ್ಲೆಚೆಂ
ರಗ್ತಾನ್ ಭರಿಲ್ಲೆಂ, ಭೆಸೂರ್- ಭಯಾನಕ್ ದಿಸ್ಪಿ,ಅರ್ದವಟ್
ಕುಶಿಲ್ಲೆಂ ಮಡೆಂ ಕಡಕ್ ಜಾವ್ನ್ ಉಬೆಂ ಆಶಿಲ್ಲೆಂ.
ಮಡ್ಯಾಚೆ ತಕ್ಲೆರ್ ಕಾಳೊ ಬುಕ್ಲೊ ತಾಮ್ಡೆಂಗುಂಜ್ ತೊಂಡ್
ಉಕ್ತೆಂ ಕರೂನ್ ಭಿರಾಂಕೂಳ್ ಸೈತಾನಾವರಿ ಆಡ್ಡತಾಲೊ. ತಾಚೊ
ಎಕ್ ದೊಳೊ ಉಜ್ಯಾವರಿ ಭಗ್ಭಗತಾಲೊ. ದುಶ್ಟ್ ಆನಿ ಹುಶಾರ್
ಪ್ರಾಣಿ! ತಾಣೆಂ ಮ್ಹಾಕಾ ಮ್ಹಜೆ ಬಾಯ್ಲೆಚೊ ಖೂನ್ ಕರೂಂಕ್
ಪ್ರವೃತ್ತ್ ಕೆಲ್ಲೊ ಆನಿ ಆತಾಂ ಆಪ್ಲ್ಯಾ ಪಾಪಿ, ಅಭ್ದ್ರ್
ಆವಾಜಾನ್ ತೊ ಮ್ಹಾಕಾ ಫಾಶೀಚೆ ದೊರ್ಯೆಮೆರೆನ್ ಒಡೂನ್
ವ್ಹರ್ತಾಲೊ.
June 2020 |
|
मूळ काणी:
The black cat. कोंकणिंत:
काळो बुकलो |
काळो
बुकलो (बोकूल)
ल्हान आसतनासावन
हांव एकदम शांत आणि मोव सभावाचो. म्हज्यांतल्या
मनीसपणाची सगळेच तुस्त करी. म्हज्या मवाळपणाक
लागून म्हजे इश्ट म्हजी फकाणां करताले. म्हाका
जनावरां पोसपाचो भोव घोस्त. देखून, म्हजेर उपाट
मोग करपी म्हज्या आवय - बापायन म्हजेखातीर बरेच
प्राणी पोशिल्ले. हांव म्हजो चडसो वेळ तांचेवांगडा
सारतलों. तांकां खाण घोलप, त्यांचे लाड करप
हाचेपरस चड सुख म्हाका हेर कसलेच गजालींतल्यान
मेळनाशिल्लें. म्हजे पिरायेवांगडा ही आवड वाडत
गेली. विस्वासू आनी हुशार कुत्रो पोसप्यांक ताचेर
आशिल्ल्या मोगांतल्यान केदो व्हड आनंद मेळटा हें
वेगळें सांगपाची गरज ना.तांचो सुवार्थी आनी नितळ
मोग बद्द काळजांत रिगता. हाचें कारण म्हळ्यार
आमकां मनशाची बैमान, तकलुपी इश्टागत आनी लटक्या
प्रामाणिकपणाची संवय जाल्ली आसता.
हांवे
तरणे पिरायेर लग्न केलें. म्हजे बायलेचोय सभाव
म्हजेभशेनूच आसा हें कळटकच म्हाका खूब खोस जाली.
म्हजो जनावरांविशींचो मोग पळोवन तिणें बेगोबेग
बरेच प्राणी घरांत हाडले. आमचेकडेन कांय सुकणीं,
गोल्ड फिश, एक सोबीत कुत्रो, सोंशे, एक ल्हानसो
माकोड आनी एक माजर अशे प्राणी आशिल्ले.
हें माजर, खरें म्हळ्यार बुकलो गुबगुबीत
आनी सोबीत दिसपी. तो पुराय काळो आनी सामको हुशार.
म्हजी बायल मात्शी अंधश्रद्ध. काळीं माजरां
म्हळ्यार चेटकिणी, ह्या पोरन्या काळांतल्या
समजणेचेर तिचोय विश्वास. मात ह्या बुकल्याविशीं
उलयतना ती हें मत तशें गंभीरपणान उक्तें
करिनाशिल्ली. हांवें हें सांगपाचें कारण म्हळ्यार
म्हाका सहज ताची याद आयली.
प्लूटो,
म्हळ्यार हो बुकलो , आमच्या पोशिल्ल्या
जनावरांमदीं म्हजो सगळ्यांत चड घोस्ताचो सवंगडी.
ताची कुयताद हांवूच करी , देखून तो म्हज्या
फाटल्या फाटल्यान भोंवतालो. हांव घराभायर वतना
लेगीत तो वांगडा येवंक सोदी पूण हांव ताका
आडायतालों.
अशे तरेन बरींच वर्सां आमची
इश्टागत तिगली. पूण इतलेमजगतीं म्हज्या सभावांत
आनी वागणुकेंत बरोच बदल जातालो आनी तोवुय वायट
अर्थान. म्हाका हें सांगूंक लेगीत लज दिसता, पूण
सैतान म्हज्या मनांत घर करतालो. दिसानदिस हांव
'मुडी' आनी किरकिरो जायत वतालों. दुसऱ्यांच्या
भावनांचो विचार करप पसून हांवें सोडून दिल्लें.
म्हजे बायलेकडेन हांव असभ्यपणान वागतालों.
केन्नाकेन्ना तिचेर हातूय उबारतालों. म्हजो हो
बदलपी सभाव, घरच्या पोशिल्ल्या जनावरांचेय मतींत
आयिल्लो.
हांवे तांची वासपूस तर सोडून
दिल्लीच, पूण तांकां हांव वायट वागणुकूय दितालों.
प्लूटोविशीं मात म्हज्या मनांत थोडेंभोव आपलेपण
आशिल्लें. देखून हांवें ताका वायट वागणूक दिवंक
नाशिल्ली. हेर प्राणी चुकून वा म्हज्यावयल्या
मोगाक लागून म्हज्या पायांभोंवतणी घुटमळ्यार हांव
तांकां त्रास दितालों. सोंशे, माकड आनी म्हज्या
कुत्र्याक लेगीत. म्हाका सोऱ्याचेंय वेसन लागलें.
हें दुयेंस वाडत रावलें. प्लूटो आतां म्हातारो
जांवक लागिल्लो, देखून मात्सो किरकिरोय आनी ल्हव
ल्हव म्हज्या रागिश्ट सभावाचो ताचेरूय परिणाम
जांवक लागलो.
असोच एके रातीं हांव सदचेभशेन
गांवांत वचून सामको तायट जावन घरांत पावलों तेन्ना
बुकलो म्हाका पळोवन लिपता असो म्हाका भास जालो.
तिडकीन हांवें झोंपय मारून ताका धरलो. हांवें
केल्ले लटाफटीक लागून तो भियेलो आनी ताणें म्हज्या
हाताक ल्हवच घांस मारलो. म्हाका कांयच जांवक
नाशिल्लें पूण म्हजे कुडींत सैतान घुसलो. रागान
हांव पिश्यावरी जालों आणि कितें करतां हें म्हाकाच
समजना जालें. म्हजो मूळ आत्मो म्हजी कूड सोडून
गेलो आनी सोऱ्याचे नशेन चडूच फाफसल्ली सैतानी
प्रवृत्ती म्हजे कुडींतले दरेक अणुमेरेन पावली.
म्हज्या कोटाच्या बोलसांतल्यान हांवें एक ल्हानसो
चाकू भायर काडलो, उक्तो केलो आणि त्या बुकल्याची
गोमटी आवळून धरून ताचो एक दोळोच कापून काडलो!
म्हजे हे क्रूर करणेविशीं सांगतना हांव लजेन
भरलां, भितरल्या भितर हांव जळटां, भयान म्हजो आवरो
उडटा.
रातीं रागाच्या नेटार केल्ल्या पापी
कर्तूपाचेर उपाय म्हूण एक व्हडली झेम
काडल्याउपरांत सकाळींफुडें हांव वेवस्थित जाग्यार
आयलों. केल्ल्या गुन्यांवाक लागून एक अपराधी
आशिल्ल्याची भावना म्हाका सतायताली, लज दिसताली,
पश्चाताप जाल्लो. पूण तरीलेगीत ह्या सगळ्या
चितंनाफाटल्यान व्हडलेंशें बळगें नाशिल्लें. ते
घडणुकेन म्हज्या आत्म्याचेर एक सादो दाग लेगीत
पडूनाशिल्लो. हांवें परतून पियेवंक सुरवात केली
आनी ते घडणुकेची याद सोऱ्याच्या ग्लासांत बुडोवन
उडयली.
तो बुकलो इल्लो इल्लो करून बरो जालो.
दोळो नाशिल्ली ताची खांच भयानक दिसताली. वेदना
पुरायपणान पयसावल्ली अशें दिसतालें. तो सदचेवरी
घरभर भोंवतालो. पूण म्हजेर नदर पड्ल्याउपरांत तो
थर्त भियेवन पळून वतालो. मनाच्या एका कोनश्यांत
म्हजो मोव सभाव आजून तिगून उरिल्लो. देखून, म्हजेर
उपाट मोग करपी पोशिल्लें जनावर म्हाका भियेवन पयस
पळटा हें पळोवन म्हाका भोव खंत भोगताली. पूण
रोखडीच ते खंतीची सुवात तिडकीन घेतली. म्हजेभीतर
एक खर अशी विकृती निर्माण जाली आनी थंयसावन परत
येवपाचो मार्ग पुराय बंद जालो. तत्वज्ञानांत अशे
विकृतीची आयजमेरन भासाभास जांवक ना पुण म्हजे
कुडीभितर आत्मो आसा हें हड्ड्यार हात मारून हांव
जशें सांगुंक शकतां तेच परीन विकृती ही मनशाची एक
आदिम प्रेरणा अशें म्हाका दिसता. ही मुळावी भावना
मनशाच्या सभावाक दिका दिता. आमच्यामदल्या
दरेकल्यान शंबर फावट कसलेंतरी मूर्खपणाचें वा
दुश्टपणाचें कर्तृप केल्लें आसता आनी ताचेफाटलें
एकूच कारण म्हळ्यार विकृती. अशे वागणुकेची
आमचेकडल्यान आस्त नासता. आपल्याक खबर आशिल्लो
एकाद्रो कायदो फक्त मोडपाखातीर मोडचो अशें
आमच्यामदल्या दरेकल्याक दिसता काय ना? ती चूक हें
खबर आसून लेगीत? म्हज्या मनांतले हे विकृतीचो एक
दिस सामकोच तोल गेलो. स्वताकूच त्रास करून घेवपाची
एक विचित्र, पूण समजणेभायली खर इत्सा म्हज्या
आत्म्याक खेंपूक लागली. फकत वायट करचेखातीर केली
एक वायट गजाल अशेंच तिचें रूप आशिल्लें. आनी
नियंत्रणाभायर गेल्ली म्हजी इत्सा भागोवपाखातीर
हांवे ते मोनजातीचे हाल सासणांखातीर सोंपयले.
सकाळींफुडेंच हांवें अचळय ताचे गोमटेभोंवतणी
दोरयेचो फास घालो आनी ताका एका झाडाच्या खांदयेर
हुमकळायलो. त्यावेळार म्हज्या दोळ्यांतल्यान
उदकाची झर व्हांवताली आनी पश्चात्तापाच्या उज्यान
म्हजें मन कोडु जावन गेल्लें. हांवें ताका फासार
हुमकळायलो. कारण म्हाका खबर आशिल्लें; ताणें
म्हजेर मोग केल्लो. अशें कर्तूप करचेखातीर हांव
उद्युक्त जावंचो अशे तरेची ताची वागणूक नाशिल्ली.
हांवें ताका फासार हुमकळायलो कारण हांव एक पाप
करतां हें म्हाका पुरायपणान खबर आशिल्लें. म्हजो
आत्मो भयंकर पापाचे करणेक लागून साप्प भूंयभरवण
जावपाचो आशिल्लो आनी खंयच्याच दयेन भरिल्ल्या वा
भयंकर देवाची कृपा ताका वाचोवंक शकनाशिल्ली.
ते रातीकडेन हांव अचकित उठलों - म्हज्या
पलंगाक उजो लागिल्लो. हांवें भायल्यान येवपी
लोकांच्यो आड्डयो आयकल्यो. उजो! उजो! आमच्या घराक
उजो लागिल्लो ! हांव, म्हजी बायल आणि आमचो नोकर,
तिगायंचे नशीब बरें देखूनआमचो जीव वाचलो. उज्यान
घर भूंयभरवण जातना आमी तिगांनीय पळयलें.
दुसरे दिसा सकाळीं इमारतींत कांयच उरूंक
नाशिल्लें. रातीच्योच सगळ्यो वण्टी रातच्योच सकयल
पडिल्ल्यो, फकत एक मदली वणत सोडून. ही वणत कशी
मोडलीना हांचेंय कारण म्हाका व्होलमलें: कारण
तिचेर नवो प्लास्टर लायिल्लो. तो आजून ओलोच
आशिल्लो.
वण्टीशेजराक लोकांची गर्दी पळोवन
म्हाका अजाप दिसलें. हेवटेन तेवटेन हात दाखयत ते
व्हडल्यान उलयताले. हांव मात्सो लागीं गेलों.
गर्देच्या खांदयावयल्यान पळयलें. उबे आशिल्ले
वंटीवयल्या नव्या धव्या प्लास्टरांत म्हाका काळों
रंग दिसलो. मानेभोंवतणचे दोरयेर हुमकळपी एका
व्हडल्या माजराचो तो आकार आशिल्लो. तो आकार पळयतना
हांव थर्त भियेलों. स्पश्टपणान विचार करचेखातीर
म्हाका बरोच वेळ लागलो. स्पश्ट चिंतूंक म्हाका
यत्न करचेच पडटले हेंय जाणवलें. ती आकृती थंय कशी
पावली?
घराभोंवतणच्या जार्दीनांतल्या
झाडाचेर हांवे माजराक हुमकळायल्लें हाची घट्ट
म्हाका याद आशिल्ली. उजो लागलो तेन्ना जार्दीनांत
बरेच लोक जमिल्ले. घडये तांचेमदल्या कोणेतरी
मेल्ल्या माजराची दोरी झाडावयल्यान कापून ताका
जनेलांतल्यान म्हाका जागो करचेखातीर भिरकटावन
मारलां आसतलें. उज्याक लागून हेर वण्टी कोसळटना
माजर ओले वण्टीक दशिल्ल्यान थंयच पुरायपणान
करपलें. आनी ताचो काळो आकार ओले वण्टीक दसलो. हय,
अशेंच घडलां आसुंये हाचेर म्हजो विश्वास बसलो.
पूण फुडले कांय म्हयनेतरी हांव तो काळो आकार
विसरूंक शकलो ना. म्हाका तो सपनांनी लेगीत
दिसतालो. एक बरें जनावर होगडायलें हाची खंत म्हाका
दिसताली. तसोच एक प्राणी हांवे सोदूंक सुरवात
केली. आमच्या शाराच्या गरीब लोकांच्या वसणुकांनी
हांव भोंवड्यो मारूंक लागलों. एके राती, घाणयारे
वसणुकेंत एका पोरन्या, काळख्या ताव्हेर्नान्त
बसून पियेतना मुखावयल्या कपाटावयल्यो सोऱ्याच्यो
बाटल्यो म्हाका हालिल्ल्यावरी दिसल्यो. कांय खीण
बारिकसाणीन पळयल्याउपरांत त्यो बाटल्यो थंय
नाशिल्ल्यो.
हांव उठलों आनी कपाटाचेर असा
तरी कितें हे पळवंक म्हजो हात घालो. हाताक एक मोव
वस्त लागली. हांवें दोनूय हातानी ती सकयल काडली
जाल्यार तें आशिल्लें एक काळें माजर. प्लूटोवरी
मोठो आनी गुबगुबीत बुकलो. तें एकदम प्लुटोचेंच
दुसरें रूप दिसतालें; फकत एक गजाल सोडून, ताच्या
हड्ड्यार एक धवो दाग आशिल्लो.
हांवें ताका
स्पर्श केल्या उपरांत तो उठलो आनी आपली तकली
म्हज्या हाताक घासुंक लागलो. ताका हांव मानवलों
अशें दिसतालें. असोच प्राणी हांव सोदतालों. बरोच
वेळ इश्टागतीन ताणें म्हजेकडल्यान सासपून घेतलें.
उपरांत हांव घरा येवंक भायर सरल्याउपरांत तोय
रस्त्यार आयलो आनी म्हजेवांगडा घरा आयलो. आतां
म्हजे एक नवें घर आशिल्लें.
घरांत
आयल्याउपरांत संवकळ आशिल्लेवरी ताणें पुटकरून एके
कदेलीर उडी मारली आनी तो सुस्त न्हिदलो. तो
आमचेवांगडा रावंक लागलो आनी आमचेर दोगांयचेर मोग
करू लागलो. रोखडोच तो म्हजे बायलेचो लाडको
जालो.पूण जशे दिस वचूंक लागले, कांय सप्तकांभितर
म्हाका ताचेविशीं मोग दिसना जालो आनी दिसांदिस
ताची तिडक येवंक लागली. तो म्हजेवयलो मोग दाखयता
हाचो म्हाका दुस्वास दिसूंक लागलो.
रोखडोच
म्हजो दुस्वास वाडत गेलो, पूण हां, हांव ताचेकडेन
क्रूरपणान वागलोना. हय, ते गजालीची हांवें पुराय
जतनाय घेतिल्ली. कारण म्हज्या गरीब स्वभावाच्या
प्लुटोचें हांवें कितें केल्लें ताचो उगडास म्हाका
येत रावतालो. हांवें ह्या प्राण्याचो चड दुस्वास
करपाचें दुसरें एक कारण म्हळ्यार ताकाय प्लूटोवरी
फकत एकूच दोळो आशिल्लो. तो म्हजेवांगडा घरा
आयल्याउपरांत दुसरे दिसा म्हाका तें समजल्लें. ते
गजालीक लागून म्हजी बायल ताचेर चडूच मोग करूंक
लागिल्ली!
पूण हांव त्या बुकल्याचो जितलो चड
दुस्वास करतलों ताचेपरस चड मोग तो म्हजेर करतालो.
हांव वतां थंय थंय तो म्हजेफाटल्यान भोंवतालो आनी
म्हज्या पायांमदीं येतालो. सदांच हांव बसतां ते
कदेलीपोंदा तो बसतालो. केन्ना केन्नाय तो म्हजे
मांडयेर उडी मारतालो तेन्ना म्हाका ताचो खून करचो
कशें दिसतालें पूण हांवें तशें केलेनां. हांव
स्वताकूच थामयतालों कारण म्हाका प्लूटोची याद
जाताली, तेभायर ह्या जनावराची म्हाका भिरांतूय
दिसातली.
ते भिरांतीचें वर्णन हांव कशें
करूं? खरें म्हळ्यार एखाद्र्या वायट कर्तुपाची ती
भिरांत नाशिल्ली... पूण हांव तिचें वर्णन कशेतरेन
करुं तेंच म्हाका समजना. कांय दिसांसावन ती
विचित्र भिरांत वाडूंक लागिल्ली आनी हांव
पुरायपणान भिरांतीचे सावळेपोंदा पाविल्लों. हाचें
कारण सांगीत जाल्यार तुमी म्हजेर विस्वास दवरचे
ना. तुमी म्हाका पिसो म्हणटले.
बरेच फावट
म्हजे बायलेन बुकल्याच्या हड्ड्यावयलो दाग म्हाका
दाखयल्लो . त्या दागाचो आकार बदलता अशें ती म्हाका
सांगी. हांवें तिचेर विस्वास दवरलो ना . पूण कांय
सप्तकांभीतर तिच्या उतरांमदलें सत म्हाका
व्होलमलें. त्या दागाचो आकार खरेंच बदलतालो.
ताच्यो दोनूय कडो नीट जाल्ल्यो. आनी ल्हवल्हव एक
वेगळो आकार तांतल्यान तयार जातालो.
हय,
काळजांत भिरांत निर्माण करपी तें एका यंत्राचें
चित्र आशिल्लें. मरणाची ख्यास्त जाल्ल्या मनशाक
फासावर हुमळावन मारपाचें यंत्र !
सुख, विसव
ह्या उतरांचो अर्थ हांव त्या दिसासावन विसरून
गेलों. दिसभर तें जनावर म्हजी फाट सोडिनाशिल्लें.
रातीकडेन दर वराउपरांत तें म्हाका जागयतलें.
म्हाका याद जाता, केन्नाकेन्नाय म्हाका सामक्या
भिरांकूळ सपनांतल्यान जाग आयल्याउपरांत म्हज्या
मुखामळालागीं आपलें तोंड हाडून तो म्हजें काळीज
दामित म्हज्या हड्ड्यार बसून आसतालो.
आतां
म्हजें परिवर्तन जावंक लागिल्लें. म्हजेभीतर
सद्गुण चिमटीभर लेगीत उरलोना. म्हजे तकलेंत दुश्ट
विचार नाचूंक लागिल्ले- एकदम काळेकिट्ट आनी सामके
हिंस्त्र विचार. भोंवतणच्या दरेकल्याचो आनी दरेक
वस्तूचो हांव दुस्वास करूंक लागलों... म्हजे
बालयेचो लेगीत. एक दिस ती म्हजेवांगडा लाकडां
कापूंक सकयल तळघरांत आयली. आतां नोकर दवरपाची
म्हजी ऐपत नाशिल्ली. हांव सोंपणा देवून सकयल
येताना बुकलोय म्हज्या फाटल्यान आयलो आनी म्हज्या
पायांमदीं घुटमळुंक लागलो. स्वस्ताक सावरिना
जाल्यार हांव गडगडत सकयल वचपाचों. म्हाका सामकी
भिरभिरी मारली. थंय आशिल्ली एक कुराड उबारून
हांवें ताचे दोन कुडके करपाचो यत्न केलो. पूण हांव
कुराड सकयल हाडटना म्हजे बायलेनआपल्या हातान म्हजो
हात घटआंवळून धरलो. म्हाका चड तिडक आयली. हांवें
एका झटक्यान म्हजे मनगट सोडवन घेतलें, कुराड परत
उबारली आनी घस्स करून तिचे तकलेर मारली. ती थंयच
जमनीर कोसळ्ळी आनी आवाज काडीनासतना तिणें जीव
सोडलो.
कांय खीण हांवें हेवटेन तेवटेन
बुकल्याक सोदलो, पूण तो पळून गेल्लो. आतां म्हाका
दुसरी चिंता सतावंक लागली. बायलेच्या मड्याचें
कितें करप? म्हाका बेगोबेग कितेंतरी करप गरजेचें
आशिल्लें. मड्याक खंय लिपोवन दवरुं? घरभयार काडप
शक्य ना. शेजारी पाजारी पळयतले! हांवें ती कूड
कापून लासपाचें चिंतलें; तळघरांतूच फोंड कडून
पूरपाचें चिंतलें; जर्दीना पलतडचे न्हंयत उडवपाचें
चिंतलें; एका बऱ्या बॉक्साभितर घालून कोणाक
कळनासतना घराभायर काडपाचें चिंतलें. अचकित म्हजी
नदर तळघरांतले एके वंटीचेर पडली. थंय पोरनी,
वापरूंक नाशिल्ली फायर प्लेस चुनो आनी विटो लावन
बंद केल्ली. तें बांदकाम तकलुपी दिसतालें. हांवे
एक पारय घाली आनी यत्न करून कांय विटो हालयल्यो.
त्यो सहज निखळुन आयल्यो. तांचेफाटल्यान हांवें
चिंतिल्लें तेच भशेन एक कूड उरपाइतली सुवात थंय
आशिल्ली. बरीच खटपट करून हांवें ती कूड थंय घुसयली
आनी सगळ्यो विटो आदलेवरी दाळून दवरल्यो. चुनो लावन
विटांची वणत सारयली. आतां तिचेभितर आनी वंटीच्या
हेर सुवातेभीतर कसलीच फरक दिसनाशिल्लो. कांय वेळ
ते वंटीकडेन पळयल्याउपरांत हांव धादोशी जालों.
कारण ते वंटीतल्यान विटो काडून त्यो परत्यो दाळून
दवरल्यात हें मात्तुय समजनाशिल्लें. हांवें जमीन
नितळ केली आनी चोंयवटेन नदर मारली. थंय कितें
घडलां हाची सुलूस कोणाकूच लागप शक्य नाशिल्लें.
हांव वयर आयलों आनी त्या बुकल्याक
जीवेंशीं मारतलोंच असो हांवें निश्चेव केलो. ताणें
म्हज्या नशीबांत वायट दिस हाडिल्लो. हांवें ताका
सगळ्याक सोदलो पूण तो म्हाका मेळोना. हांव बायलेचो
खून करतना तो थंय आशिल्लो आनी हांव ताची वाट
पळयतां हें बेस बरें जाणून तो म्हजेलागीं येवचोना
हें म्हाका समजतालें. हांवें सांजेमेरेन ताची वाट
पळयली पूण तें दुश्ट जनावर म्हाका खंयच दिसलेना.
रातीकडेनूय तो आयलो ना आनी बऱ्याच रातींउपरांत
हांव सवस्तकायेन न्हिदलों. सकाळींफुडें जाग येतकच
लेगीत तो म्हजे नदरेक पडलो ना देखून म्हाका मातशें
अजाप दिसलें. दोन, तीन दिस गेले पूण बुकलो खंयच
दिसलो ना. म्हाका कितली खोस जाली तें कशें सांगुं?
त्या बुकल्याविणें म्हजी जीण सुखी जाली. हय! ताकाच
लागून हांव दुखेस्त आशिल्लों. आनी आतां तो गायब
जाल्याउपरांत म्हाका मुक्त जाल्ल्यावरी दिसलें.
पुराय मुक्त आनी उर्बेभरीत! हाचेफुडें माजर नाका!
केन्नाच नाका!
म्हजी बायल दिश्टी पडना
देखून शेजारी पाजारी आनी बरेच लोक म्हजे भेटेक
आयले, ताणीं विचारल्या आडव्या तिडव्या प्रस्नांक
हांवें सादूरपणान जापो दिल्यो. तांचें समादान
जालें आनी फुडले दोन तीन दिस तिचो सोद घेवपाचे
यत्न जाले. चवथ्या दिसा पुलिस घरा आयले. ताणीं
घरांत सोदूंक सुरवात केली तेन्ना हांव मात्तुय
कांचावलोंना. घरांत सगळेकडेन सोदतना ताणीं म्हाका
आपलेवांगडा येवपाची विनंती केली आणि हांवें ती
मानली. ताणीं बारिकसाणीन सोदलें. सगळ्याक, परत
परत. घराचो एक एक कोनसो ताणीं सोदलो. मागीर ते
तळघरांत पावले. हांवुय तांचेवांगडा सकयल देंवलों.
म्हाका मात्तुय भिरांत दिसूनाशिल्ली. ते हांगा थंय
सोदीमेरेन हांव तांकां पळयत पासयो मारतलों. तांकां
कांयच मेळेंना आनी रोखडेच ते वचपाचे चालीक लागले.
म्हजें काळीज खोशयेन भरलें आनी ते सोंपणां
चडटना म्हजें तोंड मर्याद सोडून बडबडूंक लागलें.
हांव कितें उलयतां हें म्हाकाच कळनाशिल्लें. "देव
तुमकां बरो दिस दिंव, सर! हें घर पोरनें पूण
सामकें घटमुट. हय, सामकें पोरनें पूण घटमुट!
हाच्यो वंटी म्हळ्यार...आरे, तुमी चल्ले, सायब? —
ह्यो वंटी सामक्यो घटमुट काय न्हय ? पळयात,
कितल्यो घटमुट त्यो! " अशें उलयतां उलयतां हांवे
थंय आशिल्लो एक दांडो घेवन वण्टीर नेटान मारलो..
म्हजे बायलेचें प्रेत लिपोवन जे सुवातेर हांवें
नवी वणत बांदिल्ली थंयच दांड्याचो धपको बसलो.
अचकित हांवें दांडो मारिल्ले सुवातेवयल्यान
भितरल्यान एक आवाज आयलो. ल्हान बाळकाच्या रडपाचो
आवाज! सुर्वेक दामून धरिल्यावरी, हुंडक्यां-
हुंडक्यांनी, तुटक आनी कांय खीणांभितर मोठ्यान,
थामनासतना, एक किळांच कशी... मनशाची न्हय... एक
वेगळीच. अर्दी भयाची, अर्दी जैताची !
पाताळांतल्यान खंयच्या तरी सैतानाच्या आवाजावरी.
म्हाका भोंवतणीं कितें जाता तेंच समजना जालें.
पायांक थरथरो भरलो आनी आदराक लागून हांव मुखावयले
वण्टीक तेंकलों. दचकून सोंपणांचेर उबे रविलेले
पुलिस खीणांभितर धडाधड सकयल देंवले आनी ती वणत
मोडुंक तांकां फक्त कांय सेकंद लागले. भूंयारावरी
आशिल्ले ते खाचींत म्हजे बायलेचें रगतान भरिल्लें,
भेसूर- भयानक दिसपी,अर्दवट कुशिल्लें मडें कडक
जावन उबें आशिल्लें. मड्याचे तकलेर काळो बुकलो
तामडेंगुंज तोंड उक्तें करून भिरांकूळ सैतानावरी
आड्डतालो. ताचो एक दोळो उज्यावरी भगभगतालो. दुश्ट
आनी हुशार प्राणी! ताणें म्हाका म्हजे बायलेचो खून
करूंक प्रवृत्त केल्लो आनी आतां आपल्या पापी,
अभद्र आवाजान तो म्हाका फाशीचे दोरयेमेरेन ओडून
व्हरतालो.
June 2020 |
|
Mull Kanni:
The black cat.
Konkonnint: Kallo Buklo |
Kallo buklo
(Bokul)
lhan astonasaun
hamv ekdom' xant anni movo sobhavacho.
Mhojeantlea monisoponnachi sogllech tust kori.
Mhojea movalloponnak lagun mhoje ixtt mhoji
fokannam kortale. Mhaka zonauram pospacho bhovo
ghost. Dekhun, mhojer upatt mog korpi mhojea auy
- bapain mhojekhatir borech pranni poxil'le.
Hamv mhozo choddso vell tanchevangodda sartolom.
Tankam khann gholop, teanche ladd korop
hacheporos chodd sukh mhaka her koslech
gozalintlean mellnaxil'lem. Mhoje pirayevangodda
hi audd vaddot geli. Visvasu ani huxar kutro
pospeank tacher axil'lea mogantlean kedo vhodd
anond melltta hem vegllem sangpachi goroz
na.Tancho suvarthi ani nitoll mog bod'd kallzant
rigta. Hachem karonn mhollear amkam monxachi
boiman, toklupi ixttagot ani lottkea
pramannikoponnachi somvy zal'li asta.
Hamve tornne
pirayer logn kelem. Mhoje bailechoi sobhavo
mhojebhoxenuch asa hem kollttokoch mhaka khub
khos zali. Mhozo zonauramvixincho mog polloun
tinnem begobeg borech pranni ghorant haddle.
Amchekodden kaim suknnim, goldd fix, ek sobit
kutro, sonxe , ek lhanso makodd ani ek mazor oxe
pranni axil'le.
Hem mazor,
khorem mhollear buklo gubgubit ani sobit dispi.
To purai kallo ani samko huxar. Mhoji bail matxi
ondhoxrod'dh. Kallim majram mhollear chettkinni,
hea pornea kallantlea somzonnecher tichoi
vixvas. Mat hea bukleavixim uloitona ti hem mot
toxem gombhiroponnan uktem korinaxil'li. Hamvem
hem sangpachem karonn mhollear mhaka sohoz tachi
yad aili.
Plutto,
mhollear ho buklo , amchea poxil'lea
zonauram'modim mhozo soglleant chodd ghostacho
soungoddi. Tachi kuitad hamvuch kori , dekhun to
mhojea fattlea fattlean bhomvtalo. Hamv
ghorabhair votna legit to vangdda yeunk sodi
punn hamv taka addaitalom.
Oxe toren
borinch vorsam amchi ixttagot tigli. Punn
itlemozogotim mhojea sobhavant ani vagnnukent
boroch bodol zatalo ani tovui vaitt orthan.
Mhaka hem sangunk legit loz dista, punn soitan
mhojea monant ghor kortalo. Disanodis hamv
'muddi' ani kirkiro zait votalom. Dusreanchea
bhaunancho vichar korop posun hamvem soddun
dil'lem. Mhoje bailekodden hamv osbhyoponnan
vagtalom. Ken'naken'na ticher hatuy ubarotalom.
Mhozo ho bodlopi sobhavo, ghorchea poxil'lea
zonauranchey motint ayil'lo.
Hamve tanchi
vaspus tor soddun dil'lich, punn tankam hamv
vaitt vagnnukuy ditalom. Pluttovixim mat mhojea
monant thoddembhovo apleponn axil'lem. Dekhun
hamvem taka vaitt vagnnuk divonk naxil'li. Her
pranni chukun va mhojeavoilea mogak lagun mhojea
payambhomvotonni ghuttomllear hamv tankam tras
ditalom. Sonxe, makodd ani mhojea kutreak legit.
Mhaka soreachem-i veson laglem. Hem duyems
vaddot raulem. Plutto atam mhataro zaunko
lagil'lo, dekhun matso kirkiroi ani lhou lhou
mhojea ragixtt sobhavacho tacheruy porinnam'
zaunko laglo.
Osoch eke ratim
hamv sodchebhoxen gamvant vochun samko taitt
zaun ghorant paulom ten'na buklo mhaka polloun
lipta oso mhaka bhas zalo. Tiddkin hamvem
zhompoi marun taka dhorlo. Hamvem kel'le
lottafottik lagun to bhielo ani tannem mhojea
hatak lhouch ghams marlo. Mhaka kainch zaunko
naxil'lem punn mhoje kuddint soitan ghuslo.
Ragan hamv pixeavori zalom anni kitem kortam hem
mhakach somzona zalem. Mhozo mull atmo mhoji
kudd soddun gelo ani soreache noxen chodduch
fafosl'li soitani prourit'ti mhoje kuddintole
dorek onnumeren pauli. Mhojea kottachea
bolsantlean hamvem ek lhanso chaku bhair kaddlo,
ukto kelo anni tea bukleachi gomtti aullun
dhorun tacho ek dolloch kapun kaddlo! mhoje he
krur kornnevixim sangtona hamv lojen bhorlam,
bhitorlea bhitor hamv zollttam, bhoyan mhozo
auro uddtta.
Ratim
ragachea nettar kel'lea papi kortupacher upai
mhunn ek vhoddli jhem' kaddleauporant
sokallimfuddem hamv veusthit zagear ailom.
Kel'lea guneamvak lagun ek opradhi axil'leachi
bhauna mhaka sotaitali, loz distali, poxchatap
zal'lo. Punn torilegit hea sogllea
chitomnafattlean vhoddlenxem bollgem naxil'lem.
Te ghoddnnuken mhojea atmeacher ek sado dag
legit poddunaxil'lo. Hamvem portun pieunk survat
keli ani te ghoddnnukechi yad soreachea glasant
buddoun uddoili.
To buklo il'lo
il'lo korun boro zalo. Dollo naxil'li tachi
khanch bhoyanok distali. Vedna puraiponnan
poisaul'li oxem distalem. To sodcheuri ghorbhor
bhomvtalo . Punn mhojer nodor poddleauporant to
thort bhieun pollun votalo. Monachea eka
konxeant mhozo movo sobhavo azun tigun uril'lo.
Dekhun, mhojer upatt mog korpi poxil'lem zonaur
mhaka bhieun pois polltta hem polloun mhaka
bhovo khont bhogtali. Punn rokhddich te
khontichi suvat tiddkin ghetli. Mhojebhitor ek
khor oxi vikriti nirmann zali ani thoimsaun
porot yeupacho marg purai bond zalo.
Totvogoneanant oxe vikritichi aizomeron
bhasabhas zaunko na punn mhoje kuddibhitor atmo
asa hem hodd'ddear hat marun hamv zoxem sangunk
xoktam tech porin vikriti hi monxachi ek adim'
prernna oxem mhaka dista. Hi mullavi bhauna
monxachea sobhavak dika dita. Amcheamodlea
doreklean xombor fautt koslentori
murkhoponnachem va duxttoponnachem kortrip
kel'lem asta ani tachefattolem ekuch karonn
mhollear vikriti. Oxe vagnnukechi amchekoddlean
ast nasta. Apleak khobor axil'lo ekadro kaido
fokt moddpakhatir moddcho oxem amcheamodlea
dorekleak dista kai na? ti chuk hem khobor asun
legit? mhojea monantole he vikriticho ek dis
samkoch tol gelo. Svotakuch tras korun gheupachi
ek vichitr , punn somzonnebhaili khor itsa
mhojea atmeak khempuk lagli. Fokot vaitt
korchekhatir keli ek vaitt gozal oxench tichem
rup axil'lem. Ani niyontronnabhair gel'li mhoji
itsa bhagoupakhatir hamve te monzatiche hal
sasnnankhatir sompoile. Sokallimfuddench hamvem
ochlloi tache gomttebhomvotonni doryecho fas
ghalo ani taka eka zhaddachea khandyer
humkollailo. Teavellar mhojea dolleantlean
udkachi zhor vhamvtali ani poxchat'tapachea
ujean mhojem mon koddu zaun gel'lem. Hamvem taka
fasar humkollailo. Karonn mhaka khobor axil'lem
; tannem mhojer mog kel'lo. Oxem kortup
korchekhatir hamv udyukt zauncho oxe torechi
tachi vagnnuk naxil'li. Hamvem taka fasar
humkollailo karonn hamv ek pap kortam hem mhaka
puraiponnan khobor axil'lem. Mhozo atmo bhoinkor
papache kornnek lagun sapp bhumybhorounn
zaupacho axil'lo ani khoincheach doyen
bhoril'lea va bhoinkor devachi kripa taka
vachounk xoknaxil'li.
Te ratikodden
hamv ochkit utthlom - mhojea polongak uzo
lagil'lo. Hamvem bhailean yeupi lokancheo
add'ddoyo aikleo. Uzo! uzo! amchea ghorak uzo
lagil'lo ! hamv, mhoji bail anni amcho nokor,
tigainche noxib borem dekhunamocho jivo vachlo.
Ujean ghor bhumybhorounn zatna ami tigamni-i
polloilem.
Dusre disa
sokallim imarotint kainch urunk naxil'lem.
Raticheoch soglleo vonntti ratcheoch sokoil
poddil'leo, fokot ek modli vonnot soddun. Hi
vonnot koxi moddlina hanchem-i karonn mhaka
vholmolem: karonn ticher novo plasttor layil'lo.
To azun oloch axil'lo.
Vonnttixezorak lokanchi gordi polloun mhaka ozap
dislem. Heutten teutten hat dakhoit te vhoddlean
uloitale. Hamv matso lagim gelom. Gordechea
khandeavoilean polloilem. Ube axil'le
vonttiuylea novea dhovea plasttorant mhaka
kallom rong dislo. Manebhomvotonnoche doryer
humkollopi eka vhoddlea majracho to akar
axil'lo. To akar polloitona hamv thort bhielom.
Spoxttoponnan vichar korchekhatir mhaka boroch
vell laglo. Spoxtt chintunk mhaka yotn korchech
poddttole hem-i zannoulem. Ti akriti thoim koxi
pauli?
ghorabhomvotonnchea zardinantlea zhaddacher
hamve majrak humkollail'lem hachi ghott'tt mhaka
yad axil'li. Uzo laglo ten'na zardinant borech
lok zomil'le. Ghoddye tanchemodlea konnetori
mel'lea majrachi dori zhaddauylean kapun taka
zonelantlean mhaka zago korchekhatir bhirkottaun
marlam astolem. Ujeak lagun her vonntti
kosllottona mazor ole vonnttik doxil'lean
thoinch puraiponnan korpolem. Ani tacho kallo
akar ole vonnttik doslo. Hoi, oxench ghoddlam
asumye hacher mhozo vixvas boslo.
Punn fuddle kaim
mhoinetori hamv to kallo akar visrunk xoklo na.
Mhaka to sopnamni legit distalo. Ek borem zonaur
hogddailem hachi khont mhaka distali. Tosoch ek
pranni hamve sodunk survat keli. Amchea xarachea
gorib lokanchea vosnnukamni hamv bhomvddeo
marunk laglom. Eke rati, ghanneare vosnnukent
eka pornea , kallkhea tauhernant bosun pietona
mukhauylea kopattauyleo soreacheo battleo mhaka
halil'leavori disleo. Kaim khinn barikosannin
polloileauporant teo battleo thoim naxil'leo.
Hamv utthlom ani
kopattacher osa tori kitem he pollvonk mhozo hat
ghalo. Hatak ek movo vost lagli. Hamvem donuy
hatani ti sokoil kaddli zalear tem axil'lem ek
kallem mazor. Pluttouri mottho ani gubgubit
buklo. Tem ekdom' pluttochench dusrem rup
distalem; fokot ek gozal soddun, tachea
hodd'ddear ek dhovo dag axil'lo.
Hamvem taka sporx
kelea uprant to utthlo ani apli tokli mhojea
hatak ghasunk laglo. Taka hamv manoulom oxem
distalem. Osoch pranni hamv sodtalom. Boroch
vell ixttagotin tannem mhojekoddlean saspun
ghetlem. Uprant hamv ghora yeunk bhair
sorleauporant toi rostear ailo ani mhojevangodda
ghora ailo. Atam mhoje ek novem ghor axil'lem.
Ghorant
aileauporant somvkoll axil'leuri tannem
puttkorun eke kodelir uddi marli ani to sust
nhidlo. To amchevangodda raunk laglo ani amcher
dogamycher mog koru laglo. Rokhddoch to mhoje
bailecho laddko zalo.Punn zoxe dis vochunk
lagle, kaim soptokambhitor mhaka tachevixim mog
disna zalo ani disandis tachi tiddok yeunk
lagli. To mhojeuyolo mog dakhoita hacho mhaka
dusvas disunk laglo.
Rokhddoch mhozo
dusvas vaddot gelo, punn ham, hamv tachekodden
krurponnan vaglona. Hoi, te gozalichi hamvem
purai zotnai ghetil'li. Karonn mhojea gorib
svobhavachea pluttochem hamvem kitem kel'lem
tacho ugddas mhaka yet rautalo. Hamvem hea
pranneacho chodd dusvas korpachem dusrem ek
karonn mhollear takai pluttouri fokot ekuch
dollo axil'lo. To mhojevangodda ghora
aileauporant dusre disa mhaka tem somojl'lem .
Te gozalik lagun mhoji bail tacher chodduch mog
korunk lagil'li!
punn hamv tea
bukleacho jitlo chodd dusvas kortolom tacheporos
chodd mog to mhojer kortalo. Hamv votam thoim
thoim to mhojefattlean bhomvtalo ani mhojea
payam'modim yetalo. Sodanch hamv bostam te
kodeliponda to bostalo. Ken'na ken'nai to mhoje
manddyer uddi martalo ten'na mhaka tacho khun
korcho koxem distalem punn hamvem toxem kelenam.
Hamv svotakuch thamoitalom karonn mhaka
pluttochi yad zatali, tebhair hea zonaurachi
mhaka bhirantuy disatoli.
Te bhirantichem
vornnon hamv koxem korum? khorem mhollear
ekhadrea vaitt kortupachi ti bhirant naxil'li
... Punn hamv tichem vornnon koxetoren korum
tench mhaka somzona. Kaim disamsaun ti vichitr
bhirant vaddunk lagil'li ani hamv puraiponnan
bhirantiche saulleponda pavil'lom . Hachem
karonn sangit zalear tumi mhojer visvas douroche
na. Tumi mhaka piso mhonnttole.
Borech fautt
mhoje bailen bukleachea hodd'ddeavoilo dag mhaka
dakhoil'lo . Tea dagacho akar bodlota oxem ti
mhaka sangi. Hamvem ticher visvas dourolo na .
Punn kaim soptokambhitor tichea utram'modolem
sot mhaka vholmolem. Tea dagacho akar khorench
bodlotalo. Tacheo donuy koddo nitt zal'leo. Ani
lhoulhou ek vegllo akar tantlean toyar zatalo.
Hoi, kallzant
bhirant nirmann korpi tem eka yontrachem chitr
axil'lem. Mornnachi kheast zal'lea monxak fasaur
humllaun marpachem yontr !
sukh, visou hea
utrancho orth hamv tea disasaun visrun gelom.
Disbhor tem zonaur mhoji fatt soddinaxil'lem.
Ratikodden dor vorauporant tem mhaka zagoitolem.
Mhaka yad zata, ken'naken'nai mhaka samkea
bhirankull sopnantlean zag aileauporant mhojea
mukhamollalagim aplem tondd haddun to mhojem
kalliz damit mhojea hodd'ddear bosun astalo.
Atam mhojem
porivrton zaunk lagil'lem. Mhojebhitor sodgunn
chimttibhor legit urlona. Mhoje toklent duxtt
vichar nachunk lagil'le- ekdom' kallekitt'tt ani
samke himstr vichar. Bhomvtonnchea dorekleacho
ani dorek vostucho hamv dusvas korunk laglom...
Mhoje balyecho legit. Ek dis ti mhojevangodda
lakddam kapunk sokoil tollghorant aili. Atam
nokor douropachi mhoji oipot naxil'li. Hamv
sompnna devun sokoil yetana bukloi mhojea
fattlean ailo ani mhojea payam'modim
ghuttmollunk laglo. Svostak saurina zalear hamv
goddgoddot sokoil vochpachom. Mhaka samki
bhirbhiri marli. Thoim axil'li ek kuradd ubarun
hamvem tache don kuddke korpacho yotn kelo. Punn
hamv kuradd sokoil haddttona mhoje bailenaplea
hatan mhozo hat ghottamvollun dhorlo. Mhaka
chodd tiddok aili. Hamvem eka zhottkean mhoje
mongott soddoun ghetlem, kuradd porot ubaroli
ani ghoss korun tiche tokler marli. Ti thoinch
zomnir kosll'lli ani avaz kaddinasotona tinnem
jivo soddlo.
Kaim khinn hamvem
heutten teutten bukleak sodlo, punn to pollun
gel'lo. Atam mhaka dusri chinta sotaunk lagli.
Bailechea moddeachem kitem korop? mhaka begobeg
kitentori korop gorjechem axil'lem. Moddeak
khoim lipoun dourum? ghorbhoyar kaddop xoky na.
Xezari pazari polloitole! hamvem ti kudd kapun
laspachem chintlem; tollghorantuch fondd koddun
purpachem chintlem; zordina poltoddoche nhomyot
uddoupachem chintlem; eka borea boksabhitor
ghalun konnak kollnasotona ghorabhair kaddpachem
chintlem. Ochkit mhoji nodor tollghorantole eke
vontticher poddli. Thoim porni, vaprunk naxil'li
fair ples chuno ani vitto laun bond kel'li. Tem
bandkam' toklupi distalem. Hamve ek paroi ghali
ani yotn korun kaim vitto haloileo. Teo sohoz
nikhllun aileo. Tanchefattlean hamvem
chintil'lem tech bhoxen ek kudd urpaitoli suvat
thoim axil'li. Borich khottpott korun hamvem ti
kudd thoim ghusoili ani soglleo vitto adleuri
dallun dourleo. Chuno laun vittanchi vonnot
saroili. Atam tichebhitor ani vonttichea her
suvatebhitor koslich forok disnaxil'lo. Kaim
vell te vonttikodden polloileauporant hamv
dhadoxi zalom. Karonn te vonttitlean vitto
kaddun teo porteo dallun dourleat hem mat'tui
somzonaxil'lem. Hamvem zomin nitoll keli ani
chomyvtten nodor marli. Thoim kitem ghoddlam
hachi sulus konnakuch lagop xoky naxil'lem.
Hamv voir ailom
ani tea bukleak jivenxim martolonch oso hamvem
nixchevo kelo. Tannem mhojea noxibant vaitt dis
haddil'lo. Hamvem taka soglleak sodlo punn to
mhaka mellona. Hamv bailecho khun kortona to
thoim axil'lo ani hamv tachi vatt polloitam hem
bes borem zannun to mhojelagim yeuchona hem
mhaka somzotalem. Hamvem sanjemeren tachi vatt
polloili punn tem duxtt zonaur mhaka khoinch
dislena. Ratikoddenuy to ailo na ani boreach
ratimuporant hamv soustokayen nhidlom.
Sokallimfuddem zag yetkoch legit to mhoje nodrek
poddlo na dekhun mhaka matxem ozap dislem. Don ,
tin dis gele punn buklo khoinch dislo na. Mhaka
kitli khos zali tem koxem sangum? tea
bukleavinnem mhoji jinn sukhi zali. Hoi! takach
lagun hamv dukhest axil'lom. Ani atam to gaib
zaleauporant mhaka mukt zal'leavori dislem.
Purai mukt ani urbebhorit! hachefuddem mazor
naka! ken'nach naka!
mhoji bail
dixtti poddna dekhun xezari pazari ani borech
lok mhoje bhettek aile, tannim vicharlea addvea
tiddvea prosnank hamvem saduroponnan zapo dileo.
Tanchem somadan zalem ani fuddle don tin dis
ticho sod gheupache yotn zale. Chouthea disa
pulis ghora aile. Tannim ghorant sodunk survat
keli ten'na hamv mat'tui kanchaulomna. Ghorant
sogllekodden sodtona tannim mhaka aplevangodda
yeupachi vinonti keli anni hamvem ti manli.
Tannim barikosannin sodlem. Soglleak, porot
porot. Ghoracho ek ek konso tannim sodlo. Magir
te tollghorant paule. Hamvui tanchevangodda
sokoil demvlom. Mhaka mat'tui bhirant
disunaxil'li. Te hanga thoim sodimeren hamv
tankam polloit paseo martolom. Tankam kainch
mellemna ani rokhddech te vochpache chalik
lagle.
Mhojem kalliz
khoxyen bhorlem ani te sompnnam choddttona
mhojem tondd moread soddun boddboddunk laglem.
Hamv kitem uloitam hem mhakach kollnaxil'lem .
"devo tumkam boro dis dimv, sor! hem ghor pornem
punn samkem ghottmutt. Hoi, samkem pornem punn
ghottmutt! hacheo vontti mhollear...Are, tumi
chol'le , saib? — heo vontti samkeo ghottmutt
kai nhoi ? polleat, kitleo ghottmutt teo! " oxem
uloitam uloitam hamve thoim axil'lo ek danddo
gheun vonnttir nettan marlo.. Mhoje bailechem
pret lipoun je suvater hamvem novi vonnot
bandil'li thoinch danddeacho dhopko boslo.
Ochkit hamvem
danddo maril'le suvateuylean bhitorlean ek avaz
ailo. Lhan ballkachea roddpacho avaz! survek
damun dhorileavori, hunddkeam- hunddkeamni,
tuttok ani kaim khinnambhitor motthean,
thamnasotona, ek killanch koxi... Monxachi
nhoi... Ek vegllich. Ordi bhoyachi, ordi
zoitachi ! patallantlean khoinchea tori
soitanachea avazauri.
Mhaka bhomvtonnim
kitem zata tench somzona zalem. Payank thorthoro
bhorlo ani adrak lagun hamv mukhauyole vonnttik
tenklom. Dochkun sompnnancher ube rovilele pulis
khinnambhitor dhoddadhodd sokoil demvle ani ti
vonnot moddunk tankam fokt kaim sekond lagle.
Bhumyarauri axil'le te khachint mhoje bailechem
rogtan bhoril'lem, bhesur- bhoyanok
dispi,ordoutt kuxil'lem moddem koddok zaun ubem
axil'lem. Moddeache tokler kallo buklo
tamddengunz tondd uktem korun bhirankull
soitanauri add'ddotalo. Tacho ek dollo ujeavori
bhogbhogotalo. Duxtt ani huxar pranni! tannem
mhaka mhoje bailecho khun korunk prourit't
kel'lo ani atam aplea papi, obhdr avazan to
mhaka faxiche doryemeren oddun vhortalo.
June 2020 |
|
|
|
 |
|
ದಾಯ್ಜ್.ಕೊಮ್ |
|
2004 ಥಾವ್ನ್
2011 ಪರ್ಯಾಂತ್ ಕಾರ್ಯಾಳ್ ಆಸ್‌ಲ್ಲ್ಯಾ
ದಾಯ್ಜ್.ಕೊಮ್ ಚೆರ್
ಪರ್ಗಟ್‌ಲ್ಲ್ಯಾ ವಿಂಚ್ಣಾರ್ ಸಾಹಿತಾಕ್ ಆಮಿ
ಫುಡಿಲ್ಯಾ ದಿಸಾಂನಿ ಪಯ್ಣಾರಿ ವಾಚ್ಪ್ಯಾಂಕ್
ಲಾಭಯ್ತೆಲ್ಯಾಂವ್. | |
| |
 |
|
ತರ್ಜಣ್‌ಕಾರ್ |
 |
| ಶೈಲೆಂದ್ರ್ ಮೆಹ್ತಾ |
ಶೈಲೆಂದ್ರ್ ಮೆಹ್ತಾ ಗೆಲ್ಲ್ಯಾ ಚಾಳೀಸ್ ವರ್ಸಾಂಪರಸ್ ಚಡ್ ಕಾಳಾಸಾವನ್
ಕೊಂಕ್ಣಿ , ಮರಾಠಿ ಆನಿ ಇಂಗ್ಲಿಶ್ ಭಾಶೆಂತ್ಲ್ಯಾನ್ ಸಾಹಿತ್ಯ್ ನಿರ್ಮಣಿ
ತಶೆಂಚ್ ಹೆರ್ ಬರ್ಪಾವಳ್ ಕರ್ತಾ. ಮರಾಠೀಂತ್ಲ್ಯಾನ್ ಪ್ರಕಾಶಿತ್ ಜಾವ್ಪಿ
'ಸಂಗ್ರಾಮ್'ಹ್ಯಾ ಮ್ಹಯ್ನಾಳ್ಯಾಚೊ ತೊ ಕಾರ್ಯಕಾರಿ ಸಂಪಾದಕ್, ಇಂಟಿರೀಯರಆನಿ
ಡಿಝಾಈನ್ ಹ್ಯಾ ವಿಶ್ಯಾಂಕ್ ಒಂಪಿಲ್ಲ್ಯಾ 'ಇಂಡೆಕ್ಸ್ ಫರ್ನಿಚರ್ ಜರ್ನಲ್'
ಹ್ಯಾ ಅಂತರರಾಶ್ಟ್ರೀಯ್ ನೆಮಾಳ್ಯಾಚೊ ತೊ ಸಲ್ಲಾಗಾರ್ ಸಂಪಾದಕ್. ತಾಣೆಂ
ಇಂಗ್ಲಿಶ್, ಸ್ಪೆನಿಶ್, ಪುರ್ತುಗೆಜ್ ಭಾಶೆಂತ್ಲ್ಯಾ ಸಾಹಿತ್ಯ್ ಆನಿ ಹೆರ್
ಬರ್ಪಾವಳೀಚೊ ಕೊಂಕ್ಣಿ ಆನಿ ಮರಾಠಿ ಭಾಶೆಂತ್ ಅಣ್ಕಾರ್ ಕೆಲಾ.
'ಪೊಸ್ಟ್ ಗೊಲ್ಪಿಠಾ ಮರಾಠಿ ಪೊಎಟ್ರಿ' ಹ್ಯಾ ಮಾಥಾಳ್ಯಾಖಾಲ್ ಮರಾಠೀಂತಲೆ
ಮನೊಹರ್ ವಾಕೊಡೆ, ಭುಜಂಗ್ ಮೆಶ್ರಾಮ್ ಆನಿ ವಾಹ್ರು ಸೊನಾವ್ಣೆ ಹಾಂಚ್ಯಾ
ಕವಿತಾಂಚೊ ಇಂಗ್ಲಿಶ್ ಭಾಶೆಂತ್ ತಾಣೆಂ ಅಣ್ಕಾರ್ ಕೆಲಾ. ತೆಭಾಯ್ರ್
ಗಾಬ್ರಿಎಲಾ ಮಿಸ್ತ್ರಾಲ್ ಹಿಚ್ಯಾ ಸ್ಪೆನಿಶ್ ಕವಿತಾಂಚೊಯ್ ಅಣ್ಕಾರ್ ತಾಣೆಂ
ಕೆಲಾ. ಕಿತ್ಲ್ಯಾಶ್ಯಾಕ್ ಕೊಂಕ್ಣಿ , ಮರಾಠಿ ಆನಿ ಹಿಂದಿ ಭಾಶೆಂತ್ಲ್ಯಾ
ಸಿನೆಮಾ - ಡೊಕ್ಯುಮೆಂಟರೀಚಿಂ ಇಂಗ್ಲಿಶ್ ಸಬ್ಟಾಯಟ್ಲ್ಸ್ ತಾಣೆಂ
ಬರಯ್ಲ್ಯಾಂತ್. ಎಡ್ಗರ್ ಅೆಲನ್ ಪೊ, ಆರ್ಥರ್ ಕೊನನ್ ಡೊಯ್ಲ್, ಪಿ. ಜಿ.
ವೂಡ್ಹಾಉಜ್, ಸಾದತ್ ಹಸನ್ ಮಂಟೊ ಹಾಂಚ್ಯಾ ಕಾಂಯ್ ಕಥಾಂಚೊ ತಾಣೆಂ
ಕೊಂಕ್ಣೀಂತ್ ಅಣ್ಕಾರ್ ಕೆಲಾ. |
|
शैलेंद्र मेहता |
शैलेंद्र मेहता गेल्ल्या चाळीस वर्सांपरस चड काळासावन कोंकणी,
मराठी आनी इंग्लिश भाशेंतल्यान साहित्य निर्मणी तशेंच हेर बरपावळ
करता. मराठींतल्यान प्रकाशित जावपी 'संग्राम'ह्या म्हयनाळ्याचो
तो कार्यकारी संपादक, इंटिरीयरआनी डिझाईन ह्या विशयांक
ओंपिल्ल्या 'इंडेक्स फर्निचर जर्नल' ह्या अंतरराश्ट्रीय
नेमाळ्याचो तो सल्लागार संपादक. ताणें इंग्लिश, स्पॅनिश,
पुर्तुगेज भाशेंतल्या साहित्य आनी हेर बरपावळीचो कोंकणी आनी
मराठी भाशेंत अणकार केला.
'पोस्ट
गोलपिठा मराठी पोएट्री' ह्या माथाळ्याखाल मराठींतले मनोहर
वाकोडे, भुजंग मेश्राम आनी वाहरू सोनावणे हांच्या कवितांचो
इंग्लिश भाशेंत ताणें अणकार केला. तेभायर गाब्रिएला मिस्त्राल
हिच्या स्पॅनिश कवितांचोय अणकार ताणें केला. कितल्याश्याक कोंकणी
, मराठी आनी हिंदी भाशेंतल्या सिनेमा - डॉक्युमेंटरीचीं इंग्लिश
सबटायटल्स ताणें बरयल्यांत. एडगर अॅलन पो, आर्थर कॉनन डॉयल, पी.
जी.
वूडहाउज, सादत हसन मंटो हांच्या
कांय कथांचो ताणें कोंकणींत अणकार केला. |
|
Shailendra Mehta |
Shailendra Mehta gel'lea challis
vorsamporos chodd kallasaun konknni , moratthi ani inglix
bhaxentlean sahity nirmonni toxench her borpaull korta.
Moratthintlean prokaxit zaupi 'songram''hea mhoinalleacho to
karyokari sompadok, inttiriyorani ddizhain hea vixeank
ompil'lea 'inddeks fornichor zornol' hea ontororaxttri-i
nemalleacho to sol'lagar sompadok. Tannem inglix, spenix,
purtugez bhaxentlea sahity ani her borpaullicho konknni ani
moratthi bhaxent onnkar kela.
'postt golpittha moratthi
poettri' hea mathalleakhal moratthintole monohor vakodde,
bhuzong mexram' ani vahru sonaunne hanchea kovitancho inglix
bhaxent tannem onnkar kela. Tebhair gabriela mistral hichea
spenix kovitanchoi onnkar tannem kela. Kitleaxeak konknni ,
moratthi ani hindi bhaxentlea sinema - ddokyumenttorichim
inglix sobttaittls tannem boroileant. Eddgor aelon po,
arthor konon ddoil, P. G. Vuddhauz, sadot hoson montto
hanchea kaim kothancho tannem konknnint onnkar kela. |
|
|
| |
