[ಖಬರ್] ಥಾನೆಂತ್ ದಭಾಜಿಕ್ ಕೊಂಕಣಿ ಕಾರ್‍ಯೆಂ

ಮುಂಬಯ್ (ಫೆಬ್ರೆರ್ 4): ಕೊಂಕಣಿ ಕ್ಯಾಥೊಲಿಕ್ ಅಸೋಸಿಯೇಶನ್ ಥಾನೆ ಸಾಂದ್ಯಾಂನಿ ’ಘಡ್ಕಾರಿ ರಂಗ್‌ಮಂಚಿ ಥಾನೆ’ ಹಾಂಗಾಸರ್ ಅಪುರ್ಭಾಯೆಚೆಂ ಕೊಂಕ್ಣಿ ಕಾರ್ಯೆಂ ಮಾಂಡುನ್ ಹಾಡ್ಲೆಂ.

ನಾಮ್ಣೆಚೊ ನಾಟಕಿಸ್ತ್ ಮಾನೆಸ್ತ್ ಜೋನ್ ಆರ್ ಮಸ್ಕರೇನ್ಹಸ್ ಹಾಚ್ಯಾ ಲಿಖ್ಣೆಥಾವ್ನ್ ಉದೆಲ್ಲೊ, ನಿರ್ದೇಶಿತ್ ಜಾಲ್ಲೊ ಸಾಮಾಜಿಕ್ ಹಾಸ್ಯ್ ನಾಟಕ್ ’ಲಿಂಬೆ ಆನಿ ಮಿರ್ಸಾಂಗ್’ ಪಳೆಂವ್ಕ್ ಸಗ್ಳೆಂ ಸಾಲ್‌ಭರ್ ಲೋಕ್ ಹಾಜರ್ ಆಸ್ಲೊ.

ಪಯ್ಣಾರಿ.ಕೊಮ್ ಸಂಪಾದಕ್ ವಲ್ಲಿ ಕ್ವಾಡ್ರಸ್ ಮುಖೆಲ್ ಸಯ್ರೊ ಜಾವ್ನ್ ಹಾಜರ್ ಆಸ್‌ಲ್ಲೊ, ಕೆ.ಸಿ.ಎ.ಚ್ಯಾ ಅಧ್ಯಕ್ಷ್ ಮಾನೆಸ್ತ್ ಒಲಿವೆರ್ ಕೊಲಾಸೊನ್ ಫುಲಾಂತೊ ಬುಕ್ಕೊ ದೀವ್ನ್ ತಾಚೊ ಸ್ವಾಗತ್ ಕೆಲೊ.

ತಶೆಂಚ್ ಬೆಳ್ತಂಗಡಿಚ್ಯಾ ’ದಯಾ ಸ್ಪೆಶಲ್ ಕೇರ್ ಸೆಂಟರ್’ ಚೊ ಕಾಪುಜಿನ್ ಯಾಜಕ್ ಮಾ|ಬಾ|ವಿನೋದ್ ಮಸ್ಕರೇನ್ಹಸ್ ಸಯ್ರೊ ಜಾವ್ನ್ ಹಾಜರ್ ಆಸ್ಲೊ, ತಾಚೊ ಸ್ವಾಗತ್ ಕೆಲೊ ಉಪಾಧ್ಯಕ್ಷಿಣ್ ಮಾನೆಸ್ತಿಣ್ ಸೋನಲ್ ಡಿ’ಸಿಲ್ವಾನ್.

ಹೆಚ್ಚ್ ಸಂಧರ್ಭಾರ್, ಹೊ ನಾಟಕ್ ಹೌಸ್‌ಫುಲ್ ಜಾಂವ್ಚ್ಯಾಕ್ ಮಿನತ್ ಕೆಲ್ಲ್ಯಾಂಕ್ ಫುಲಾಂಚೊ ತುರೊ ದೀವ್ನ್ ಮಾನ್ ಕೆಲೊ.

ನಾಮ್ಣೆಚೊ ಕಾರ್‍ಯೆಂ ನಿರ್ವಾಹಕ್ ಮಾನೆಸ್ತ್ ಎ. ಎಲ್. ಮೊನಿಜ್ ಹಾಣೆಂ ಅಪುರ್ಭಾಯೆನ್ ಕಾರ್ಯೆಂ ನಿರ್ವಾಹಣ್ ಕೆಲೆಂ.

ಸಂಸ್ಥ್ಯಾಚೊ ಪ್ರಧಾನ್ ಕಾರ್‍ಯದರ್ಶಿ ಮಾನೆಸ್ತ್ ಕ್ರಿಸ್ಟೋಫರ್ ಡಿ’ಸೋಜಾನ್, ಹಾಜರ್ ಜಾಲ್ಲ್ಯಾ ಲೊಕಾಂಚೊ ಉಪ್ಕಾರ್ ಬಾವುಡ್ಲೊ ಆನಿ ಫುಡೆಂಯೀ ಅಪುರ್ಭಾಯೆಚಿಂ ಕೊಂಕ್ಣಿ ಕಾರ್‍ಯಿಂ ಚಲಂವ್ಚೊ ಭರ್ವಸೊ ದಿಲೊ.

 ಖಬರ್: ಆಮ್ಚೊ ಭಾತ್ಮಿ