[Khobor] D.K.A.n Gova Rajy-Dis Achoronn Kelo

Panaji: Rajbhas kaido chalik launk nam tem ekdom’ borem zalem kiteak asa tie sthitint kaido chalik lailolo zalear Romi lipi vaporpi Konknni lok trasant poddttole asle oxem mot ugtaitanam Dalgado Akademicho (DKA) Odheokx Tomazinho Cardozo hannem sanglem ki Gõyant bhaile lok vevsai kortat, tannim Konknni xikonk zai asli punn ami tanche koddem tanchea bhasamni uloitat hi ek vichitr gozal zaun asa, mhunnonuch Konknni fattim fattim poddot asa. To DKA-n ghoddoun haddlolea Gõy Ghottokraj Dis-achie karyavollint uloitalo. Tache borabor Chittnis Vincy Quadros ani Bhanddari Celso Fernandes machier asle. Hi karyavoll 30 Mai 2018 disa DKA-chea Reginald Fernandes Vosreant zali.

Gõy ani Ghottokraj ho vixoi gheun ghoddoun haddlolea kovi sommelonant Gõya vixim kovink boroch husko asloleacho zannvolem. Gõykarank aplie osmitayechi ani daizachi vhoddvik asa punn onnbhova pormannem Gõychi sthiti sarki nasloleachem mot aikunk mell’llem. Niraxiponnachio bhavnam-i veokt zalio. Gõy ek sobit raj’ya asunui tea rajyachem soimb rakhunk amche rajki fuddari osomorth asat oso legit sur kovitantlean ailo. Gõycho itihas sangtanam Kendrantlea fuddariamni Gõykarank koslim kettam kelim tacheim chitronn eke kovitentlean aikunk mell’llem. Gõyak mell’llem ghottokraj punn konnachea matheak taj? Oso xinn kaddpi kovita khorea nagrikachi bhavna dakhoita. Cholta tie sthitint Gõykar khuxal nant punn somarombh he korunkuch zai ani utsov he monoukuch zai oxea axavadi vichearamni kovi sommelon borench ronglem.

Kovit sommelonant Narayan Khorjuvenkar, Sandhya Fernandes, Anthony Miranda, Rackson Fernandes, Anthony Correia, Silvestrina Pereira, Saynex J. Souza, Menino Almeida, Joaquim Lourence Fernandes, Seby Braganza, Joseph Pinto, Rena D’ Souza, Annie de Colvale, Maria Monteiro ani Vincy Quadros hannim aplio kovita sador kelio.

Chittnis Vincy Quadrosan kovi sommelon ghoddoun haddpa fattlo hetu sanglo ani 31 vorsam adim aslolea Gõycho aichea Gõya koddem sor korun zonn eklean koxie toren Gõy sambhallunk zai tacher bhor dilo. Upkarachea ulovpant Bhanddari Celso Fernandes khuxalponnan mukhar vochunk ulo marlo. Raxttrgit mhunnon karyavoll sompli.

Bhatmi: Vinsi Kvaddros

पणजी: राज्य‌भास कायदो चालीक लावंक नां तें एकदम बरें जालें कित्याक आसा ती स्थितिंत कायदो चालीक लायललो जाल्यार रोमी लिपी वापर्पी कोंकणी लोक त्रासांत पडटले आसले अशें मत उग्तायतानां दाल्गादो आकादेमिचो (डी.के.ए.) अध्योक्ष तमाजिन्हो कार्डोजो हाणें सांगलें की गोंयांत भायले लोक वेवसाय कर्तात, ताणीं कोंकणी शिकुंक जाय आसली पूण आमी तांचेकडें तांच्या भासांनी उलयतात ही एक विचित्र गजाल जावन आसा, म्हुणनूच कोंकणी फाटीं फाटीं पडत आसा. तो डी.के.ए.न घडवन हाडलल्या गोंय घटक‌राज दीस-आचिये काऱ्यावळिंत उलयतालो. ताचे बराबर चिटनीस विन्सी क्वाड्रोस आनी भांडारी चेल्सो फेर्नांदेस माचियेर आसले. ही काऱ्यावळ ३० माय २०१८ दिसा डी.के.ए.च्या रेजिनालड फेर्नांदेस वसऱ्यांत जाली.

गोंय आनी घटक‌राज हो विशय घेवन घडवन हाडलल्या कवी संमेलनांत गोंयाविशीं कविंक बरच हुसको आसलल्याचो जाण्वलें. गोंयकारांक आपलिये अस्मितायेची आनी दायजाची व्हडवीक आसा पूण अणभवा पर्माणें गोंयची स्थिती सार्की नासलल्याचें मत आयकुंक मेळ्ळें. निराशिपणाचियो भावनांय व्यक्त जालियो. गोंय एक सबीत राज'या आसुनूय त्या राज्याचें संयब राखुंक आमचे राजकी फुडारी असमर्थ आसात असो लेगीत सूर कवितांतल्यान आयलो. गोंयचो इतिहास सांग्तानां केंद्रांतल्या फुडारियांनी गोंयकारांक कसलीं केटां केलीं ताचेईं चित्रण एके कवितेंतल्यान आयकुंक मेळ्ळें. गोंयाक मेळ्ळें घटक‌राज पूण कणाच्या माथ्याक ताज? असो शीण काडपी कविता खर‍या नाग्रिकाची भावना दाखयता. चल्ता तिये स्थितिंत गोंयकार खुशाल नांत पूण समारंभ हे करुंकूच जाय आनी उत्सव हे मनवकूच जाय अश्या आशावादी विच्यारांनी कवी संमेलन बरेंच रंगलें.

कवीत संमेलनांत नारायान खर्जुवेंकार, सांध्या फेर्नांदेस, आंथन्य मिरांदा, राचक्सन फेर्नांदेस, आंतोनी कोरेया, सिलवेसत्रिना पिरेरा, सायनेश ज. सवजा, मेनिनो आल्मेइदा, जाकुयं लवरेंचे फेर्नांदेस, सेबी ब्रागांजा, जोसेफ पिंटो, रेना डी’सोज, आणिये दे चलवाले, मारिया मंतेइरो आनी विन्सी क्वाड्रोस हाणीं आपलियो कविता सादर केलियो.

चिटनीस विन्सी क्वाड्रोसान कवी संमेलन घडवन हाडपा फाटलो हेतू सांगलो आनी ३१ वर्सां आदीं आसलल्या गोंयचो आयच्या गोंया कडें सर करून जण एकल्यान कशिये तरेन गोंय सांभाळुंक जाय ताचेर भर दिलो. उपकाराच्या उलवपांत भांडारी चेल्सो फेर्नांदेस खुशाल्पणान मुखार वचुंक उलो मारलो. राश्ट्र्गीत म्हुणन काऱ्यावळ संपली.

भात्मी: विन्सी क्वाड्रोस