[ಖಬರ್] ತರ್ಜಣ್ ಆನಿ ಲಿಪ್ಯಂತರ್ ಕೊಂಕಣಿ ಕಥಾಂಚೆರ್ ರಾಷ್ಟ್ರೀಯ್ ಪರಿಸಂವಾದ್ ಕಥಾದಾಯ್ಜ್

8 ದಸೆಂಬರ್ 2023 (ಪಣ್ಜಿ, ಗೊಂಯ್): ಕನ್ನಡ್ ಆನಿ ನಾಗರಿ ಲಿಪಿಯೆಂತ್ಲ್ಯಾ ತರ್ಜಣ್ ಆನಿ ಲಿಪ್ಯಂತರ್ ಕೊಂಕಣಿ ಕಥಾಂಚೆರ್ ಖೊಲಾಯೆನ್ ಅಧ್ಯಯನ್ ಕರ್ಚ್ಯಾ ಇರಾದ್ಯಾನ್ ಧೆಂಪೆ ಕೊಲೆಜ್ ಮಿರಾಮಾರ್ ಗೊಂಯ್ ಆನಿ ಆಶಾವಾದಿ ಪ್ರಕಾಶನಾನ್ ರಾಜ್ಯ್‌ಭಾಸ್ ಸಂಚಾಲನಾಲಯ್ ಗೊಂಯ್ ಸರ್ಕಾರ್ ಹಾಂಚ್ಯಾ ಮಜತೆನ್ ಎಕಾ ದಿಸಾಚೆಂ ರಾಷ್ಟ್ರೀಯ್ ಪರಿಸಂವಾದ್ ’ಕಥಾದಾಯ್ಜ್’, ದಸೆಂಬರ್ 8 ತಾರಿಕೆರ್ ಸುಕ್ರಾರಾ ಸಕಾಳಿಂ ಧಾ ಥಾವ್ನ್ ಸಾಂಜೆರ್ ಪಾಂಚ್ ವೊರಾಂ ಪರ್ಯಾಂತ್ ಸ್ವಾಮಿ ವಿವೇಕಾನಂದ ಸಭಾಗೃಹಾಂತ್ ಚಲ್ಲೆಂ. ನಾಮ್ನೆಚಿ ಲೋಕ್‌ವೇದ್ ಸಂಸೋಧಕ್, ಕಥಾಕಾರ್ ಡೊ.ಜಯಂತಿ ನಾಯ್ಕ್ ಹಿಚ್ಯಾ ಅಧ್ಯಕ್ಷ್‌ಪಣಾಖಾಲ್ ಚಲ್‌ಲ್ಲ್ಯಾ ಹ್ಯಾ ಪರಿಸಂವಾದಾಂತ್ ಮುಖೆಲ್ ಸಯ್ರೊ ಜಾವ್ನ್ ಸಾಹಿತ್ಯ್ ಅಕಾಡೆಮಿಚೊ ಸಹ-ಸಂಚಾಲಕ್ ದೊ.ಪೂರ್ಣಾನಂದ ಚ್ಯಾರಿ, ಸಂಜನಾ ಪಬ್ಲಿಕೇಶನ್ಸಾಚೊ ಪ್ರಕಾಶಕ್ ಬಾಬ್ ದಿನೇಶ್ ಮಣೇರ್ಕಾರ್, ಬಾಬ್ ವಲ್ಲಿ ಕ್ವಾಡ್ರಸ್, ಬಾಬ್ ರಮೇಶ್ ಲಾಡ್ ತಶೆಂಚ್ ಬಾಬ್ ಶೈಲೇಂದ್ರ ಮೆಹ್ತಾ ಮಾರ್ಗ್‌ದರ್ಶಕ್ ಜಾವ್ನ್ ಹಾಜರ್ ಆಸ್ಲೆ.

ಉಗ್ತಾವಣ್ ಕಾರ್ಯಾಂತ್ ಯೆವ್ಕಾರಾಚೆಂ ಉಲವ್ಪ್ ಕರಿತ್, ಧೆಂಪೆ ಕೊಲೆಜಿಚಿ ಪ್ರಿನ್ಸಿಪಾಲ್ ಬಾಯ್ ಡೊ.ವೃಂದಾ ಬೋರ್ಕಾರ್ ಹಿಣೆಂ ಕಶೆಂ ಏಕ್ ಸಮಾಜ್ ಎಕಾ ಭಾಸೆಚೆಂ ಮಾಧ್ಯಮ್ ವಾಪ್ರುನ್ ಹೆರ್ ಭಾಸೆಂತ್ಲೆಂ ಸಾಹಿತ್ಯ್, ಹೆರ್ ಸಮಾಜೆಚಿ ಸಂಸ್ಕೃತಿ ತಶೆಂಚ್ ತ್ಯಾ ಸಮಾಜೆಂತ್ಲೆಂ ಗಿನ್ಯಾನ್ ಸಾಹಿತ್ಯಾಮುಖಾಂತ್ರ್ ಜೊಡುಂಕ್ ಸಕ್ತಾ ಆನಿ ತ್ಯಾ ದಿಶೆನ್ ತರ್ಜಣ್ ಆನಿ ಲಿಪ್ಯಂತರ್ ಖರೆಂ ಏಕ್ ವ್ಹಡ್ ಮೇಟ್ ಮ್ಹಣಾಲಿ. ಡೊ.ಪೂರ್ಣಾನಂದ ಚ್ಯಾರಿನ್ ಅಪ್ಲ್ಯಾ ಉಲವ್ಪಾಂತ್ ಕಾಳ್ ಮುಕಾರ್ ಗೆಲ್ಲೆಪರಿಂಚ್ ಆಮಿ ಸಯ್ತ್ ರಾವ್‌ಲ್ಲೆಕಡೆಚ್ ರಾಂವ್ಚೆಂ ನ್ಹಯ್, ಬಗಾರ್ ಆಮಿಂಯೀ ಮುಕಾರ್ ಪಾವ್ಲಾಂ ಕಾಡ್ಚಿ ಗರ್ಜ್ ಆಸಾ, ತ್ಯಾ ದಿಶೆನ್ ಡಿಜಿಟಲ್ ಮಾಧ್ಯಮಾಂತ್ ಕೊಂಕಣಿ ಸಾಹಿತ್ಯಾಚೊ ವಾವ್ರ್ ಖರೊಚ್ ಜಾಂವ್ಚಿ ಗರ್ಜ್ ಆಸಾ ಆನಿ ತ್ಯಾ ದಿಶೆನ್ ವಾವ್ರ್ ಕರ್ತೆಲ್ಯಾಂಕ್ ಥೊಕ್ಣಾಯ್ ಜಾಂವ್ಕ್ ಫಾವೊ ಮ್ಹಣಾಲೊ. ಹೆಚ್ ಸಂಧರ್ಭಾರ್ 1952 ಇಸ್ವೆಂತ್ ಅರ್ನೆಸ್ಟ್ ಹೆಮಿಂಗ್‌ವೇನ್ ಬರಯಿಲ್ಲ್ಯಾ ’The old man and the sea ನವಾಲಿಕೆಚೆಂ, ಬಾಬ್ ಜೆರಾಲ್ಡ್ ವಿ. ಕಾರ್ಲೊನ್ ಕೊಂಕಣಿಕ್ ಕೆಲ್ಲ್ಯಾ ತರ್ಜಣೆಕ್ ವಲ್ಲಿ ಕ್ವಾಡ್ರಸಾನ್ ನಾಗರಿಕ್ ಲಿಪ್ಯಂತರ್ ಕೆಲ್ಲೆಂ ಪುಸ್ತಕ್ ’ಮ್ಹಾತಾರೊ ಆನಿ ದರ್ಯಾ’ ಡಿಜಿಟಲ್ ಪುಸ್ತಕಾಚೆಂ ವಿಮೋಚನ್ ಕಾರ್ಯೆಂ ಡೊ.ಪೂರ್ಣಾನಂದ ಚ್ಯಾರಿನ್ ಕೆಲೆಂ.

ಪರಿಸಂವಾದಾಂತ್ ಪಯ್ಲೆಂ ಕನ್ನಡ್ ಲಿಪ್ಯೆಂತ್ ಜಾಲ್ಲ್ಯಾ ಸಮಗ್ರ್ ಸಾಹಿತ್ಯಾಚಿ ಝಳಕ್ ದಿವುನ್ ವಲ್ಲಿ ಕ್ವಾಡ್ರಸಾನ್ 1850-1899, 1900-1949, 1950-1999, 2000-2023 ಅಶೆಂ ಚ್ಯಾರ್ ವಿಭಾಗಾಂನಿ ಪುಸ್ತಕಾಂ ರುಪಾರ್ ಛಾಪುನ್ ಆಯಿಲ್ಲ್ಯಾ ಸಮಗ್ರ್ ಸಾಹಿತ್ಯಾಚೊ ವಿವರ್ ದಿವುನ್ ಹ್ಯಾ ಸರ್ವ್ ವರ್ಸಾಂನಿ ಜಾಲ್ಲ್ಯಾ ಮೊಟ್ವ್ಯಾ ಕಥೆಚ್ಯಾ ತರ್ಜಣ್ ಆನಿ ಲಿಪ್ಯಂತರ್ ವಾವ್ರಾಚೊ ಸವಿಸ್ತಾರ್ ವಿವರ್ ದಿವುನ್ ಭಾಸ್, ಭಾಸೆ ಉಪ್ರಾಂತ್ ಲಿಪಿ, ಲಿಪಿ ಉಪ್ರಾಂತ್ ಬೊಲಿ, ಬೊಲಿ ಉಪ್ರಾಂತ್ ಸಮುದಾಯ್ ಅಶೆಂ ಎಕಾ ಲಿಪಿಂತ್ ಸಯ್ತ್ ಆಸ್ಚ್ಯಾ ಸಮುದಾಯಾಚಿ ಒಳೊಕ್ ತಶೆಂಚ್ ತ್ಯಾ ಸಮುದಾಯಾನ್ ವಾಪಾರ್ಚ್ಯಾ ಉತ್ರಾಂಚಿ ಜಾಣ್ವಾಯ್ ಎಕಾ ಲಿಪ್ಯಂತರಿಕ್ (ಬೋಲ್ಯಂತರ್) ಗರ್ಜ್ ಆಸಾ ದೆಕುನ್ ಕೊಂಕಣಿಂತ್ ಎಕಾಚ್ ರಿತಿನ್ ಬರಯ್ಜೆ ಮ್ಹಳ್ಳೆಂ ರಾಜಾಂವ್ ಸಾರ್ಕೆಂ ನ್ಹಯ್ ಮ್ಹಣಾಲೊ. ಬಾಬ್ ದಿನೇಶ್ ಮಣೇರ್‌ಕಾರಾನ್ ಕನ್ನಡ್ ಆನಿ ನಾಗರಿ ಲಿಪಿಯೆಚೆಂ ಬೊಲ್ಯಂತರಾಂತ್ ಕೆಲ್ಲೆಂ ತುಲನಾತ್ಮಕ್ ಉಲವ್ಪ್ ಸಾದರ್ ಕೆಲೆಂ. ಬಾಬ್ ರಮೇಶ್ ಲಾಡ್ ಹಾಣೆಂ ಕನ್ನಡ್ ಭಾಸ್, ಆನಿ ಕನ್ನಡ್ ಲಿಪ್ಯೆಂತ್ಲ್ಯಾ ಕೊಂಕಣಿಚೆಂ ನಾಗರಿ ಕೊಂಕಣಿಕ್ ಲಿಪ್ಯಂತರ್ ಕರ್ತಾನಾ ಜಾಲ್ಲೊ ಅಣ್ಭವ್ ವಿಶ್ಯಾಚೆರ್ ಉಲಯ್ಲೊ. ಬಾಬ್ ಶೈಲೇಂದ್ರ ಮೆಹ್ತಾನ್ ನಾಗರಿ ಲಿಪ್ಯೆಂತ್ ಜಾಲ್ಲ್ಯಾ ತರ್ಜಣ್ ಆನಿ ಲಿಪ್ಯಂತರ್ ವಾವ್ರಾಚೆರ್ ಉಲಯ್ಲೊ.

ಪುಸ್ತಕ್ ಉಗ್ತಾವಣ್ ಕಾರ್ಯಾಂತ್ ಬಾಬ್ ಶೈಲೇಂದ್ರ ಮೆಹ್ತಾನ್ ಭಾತರೀಯ್ ಭಾಸೆಂತ್ಲ್ಯಾ ಸಾಹಿತ್ಯಾಂತ್ ಚಡ್ತಾವ್ ಭಾಸೆಂನಿ ಮುಂಬಯ್ಚ್ಯೊ ಕಥಾ ಮ್ಹಳ್ಳೊ ಪ್ರಕಾರ್ ಯುರೋಪಿಯನ್ ಭಾಸೆಂನಿ ಸಯ್ತ್ ತರ್ಜಣ್ ಜಾಲಾ, ಆನಿ ಕೊಂಕಣಿಂತ್ ಸಯ್ತ್ ಆಯಿಲ್ಲ್ಯಾ ಹ್ಯಾ ’ಮಾಯಾನಗರಿ’ ಪುಸ್ತಕಾಂತ್ ಬಾಬ್ ವಲ್ಲಿ ಕ್ವಾಡ್ರಸಾನ್ ಅಪ್ಣಾನ್ ಜಿಯೆಲ್ಲ್ಯಾ, ಪಳೆಲ್ಲ್ಯಾ, ಪಾರ್ಕಿಲ್ಲ್ಯಾ ಭಾರೀಕ್, ನಾಜೂಕ್ ಸಂವೇದನಾಂಕ್ ಸಯ್ತ್ ಕಥೆಂನಿ ಸೊಭಿತ್ ರಿತಿನ್ ಹಾಡ್ಲಾಂ ಆನಿ ಎಕೇಕ್ ಕಥಾ ವೆಗ್ಳೊ ಅನ್ಭವ್ ದಿತಾ ಆನಿ ವಾಚಕಾಕ್ ವೆಗ್ಳ್ಯಾಚ್ ಸಂಸಾರಾಕ್ ವರುನ್ ಪಾವಯ್ತಾ ಮ್ಹಣಾಲೊ.

ಡೊ.ಜಯಂತಿ ನಾಯ್ಕ್ ಹಿಣೆಂ ’ಮಾಯಾನಗರಿ’ ಪುಸ್ತಕಾಚೆಂ ವಿಮೋಚನ್ ಕರುನ್, ಬಾಬ್ ವಲ್ಲಿಚ್ಯಾ ನಾಗರಿ ಕೊಂಕಣಿ ಕಥೆಚಿಂ ತೀನ್ ಪುಸ್ತಕಾಂ ವಿಮೋಚನ್ ಜಾತಾನಾ ಸಯ್ತ್ ಅಪುಣ್ ಆಸ್ಲಿಂ ಆನಿ ಆಮ್ಚಿ ಒಳೊಕ್ 2016 ಇಸ್ವೆಂತ್ ಕಥೆಚ್ಯಾ ಮುಖಾಂತ್ರ್ ಜಾಲ್ಲಿ, ತ್ಯೇ ಉಪ್ರಾಂತ್ ಅನನ್ಯ ಜರ್ನಲಾಂತ್ ಬಾಬ್ ವಲ್ಲಿಚ್ಯೊ ಸ ಅಂಖ್ಯಾಂನಿ ಸ ಕಥಾ ಪ್ರಕಾಶಿತ್ ಕೆಲ್ಯಾತ್ ಆನಿ ತಾಚ್ಯೊ ಎಕೇಕ್ ಕಥಾ ವಿಭಿನ್ನ್ ಜಾವ್ನಾಸುನ್ ಮುಂಬಯ್ ಜಿವಿತಾಚೆಂ ಚಿತ್ರಣ್ ದಿತಾತ್ ಮ್ಹಣಾಲಿ.

ಪುಸ್ತಕಾಚೆಂ ವಿಮೋಚನ್ ಜಾತಚ್ ಕಥಾಕಾರಾನ್ ಅಪ್ಲ್ಯಾ ಉಲವ್ಪಾಂತ್, ಕಶೆಂ ಅಪ್ಲ್ಯಾ ಪಯ್ಲ್ಯಾ ನಾಗರಿ ಕಥೆವರ್ವಿಂ ಅಪ್ಣಾಕ್ ಗೊಂಯ್ಚ್ಯಾ ವರಿಶ್ಟ್ ಕಥಾಕಾರಾಂಚಿ ಒಳೊಕ್ ಜಾಲಿ ಆನಿ ಹಿ ಒಳೊಕ್ ಕಶೆಂ ಕೊಂಕಣಿಚ್ಯಾ ದೋನ್-ತೀನ್ ಲಿಪಿಯಾಂನಿ ಶಿಂಪಡ್ಲೆಲ್ಯಾಂ ಮಧೆಂ ಏಕ್ ಭಾಂದ್ ಜಾಲೊ ಮ್ಹಣುನ್ ಪುಸ್ತಕಾಚೆಂ ಅಪುರ್ಭಾಯೆಚೆಂ ಬೊಲ್ಯಂತರ್ ಕೆಲ್ಲ್ಯಾ ಬಾಬ್ ರಮೇಶ್ ಲಾಡ್ ತಶೆಂಚ್ ಅಪುರ್ಭಾಯೆನ್ ಛಾಪ್‌ಲ್ಲ್ಯಾ ಬಾಬ್ ದಿನೇಶ್ ಮಣೇರ್ಕಾರಾಚೊ ಉಪ್ಕಾರ್ ಬಾವುಡ್ಲೊ.

ಧೆಂಪೆ ಕೊಲೆಜಿಂತ್ಲ್ಯಾ ಭಾರತೀರ್ ಭಾಸೊ ವಿಭಾಗಾಚಿ ಮುಖೇಸ್ತ್ ಬಾಯ್ ಅಂಜು ಸಾಖರ್‌ದಾಂಡೆನ್ ಧಿನ್ವಾಸ್ ಪಾಟಯ್ಲೆ. ಹ್ಯಾ ಪರಿಸಂವಾದಾಕ್ ಧೆಂಪೆ ಕೊಲೆಜಿಚ್ಯಾ ಸಾಹಿತ್ಯಿಕ್ ವಿಧ್ಯಾರ್ಥಿಂಸವೆಂ ರೋಜರಿ ಕೊಲೆಜ್, ಫಾ.ಆಗ್ನೆಲ್ ಕೊಲೆಜ್, ಎಸ್.ಎಸ್.ಎ. ಸರ್ಕಾರಿ ಕೊಲೆಜ್ ಪೆರ್ನೆಂ, ಸರ್ಕಾರಿ ಕೊಲೆಜ್ ಖಾಂದೊಲಾ, ಸರ್ಕಾರಿ ಕೊಲೆಜ್ ಖೆಪೆಂ, ಸರ್ಕಾರಿ ಕೊಲೆಜ್ ಸಾಂಕೆಲಿಂ, ಪಿ.ಇ.ಎಸ್ ಕೊಲೆಜ್, ಸಿ.ಇ.ಎಸ್. ಕೊಲೆಜ್ , ಶ್ರೀ ಮಲ್ಲಿಕಾರ್ಜುನ ಕೊಲೆಜ್, ಎಮ್.ಇ.ಎಸ್. ಕೊಲೆಜ್, ಕಾರ್ಮೆಲ್ ಕೊಲೆಜ್, ಝೇವಿಯರ್ಸ್ ಕೊಲೆಜ್ ಅಶೆಂ ಕೊಲೆಜಿಚಿಂ ವಿಧ್ಯಾರ್ಥಿಂನಿ ವಾಂಟೊ ಘೆತ್ಲೊ. ಬಾಯ್ ವಿಧಿತಾ ಶೆಟ್, ಬಾಬ್ ಗೌರಾಂಗ್ ಭಾಂದ್ಯೆ, ಬಾಯ್ ದೀಪಾ ರಾಯ್ಕರ್ ಹಾಣಿಂ ಸೊಭಿತ್ ರಿತಿನ್ ಸೂತ್ರ್ ಸಂಚಾಲನ್ ಚಲಯ್ಲೆಂ. ಬಾಬ್ ದಾಮೋದರ್ ಗಾಣೆಕಾರ್, ಬಾಯ್ ಉರ್ಜಿತಾ ಭೊಬೆ, ಬಾಯ್ ಫಿಲೋಮೆನಾ ಸಾಂಫ್ರಾನ್ಸಿಸ್ಕೊ, ಬಾಯ್ ಮಾನ್ಸಿ ಧಾಉಸ್ಕಾರ್ ಆನಿ ಹೆರ್ ವರಿಶ್ಟ್ ಕಥಾಕಾರಾಂನಿ ಹ್ಯಾ ಪರಿಸಂವಾದಾಂತ್ ಹಾಜರ್ ಆಸ್ಲಿಂ. 

[खबर] तर्जण आनी लिप्यंतर कोंकणी कथांचेर राषट्रीय परिसंवाद कथादायज

८ दसेंबर २०२३ (पणजी, गोंय): कन्नड आनी नागरी लिपियेंतल्या तर्जण आनी लिप्यंतर कोंकणी कथांचेर खोलायेन अध्ययन कर्च्या इराद्यान धेंपे कोलेज मिरामार गोंय आनी आशावादी प्रकाशनान राज्य‌भास संचालनालय गोंय सर्कार हांच्या मजतेन एका दिसाचें राषट्रीय परिसंवाद ’कथादायज’, दसेंबर ८ तारिकेर सुक्रारा सकाळीं धा थावन सांजेर पांच वोरां पऱ्यांत स्वामी विवेकानंद सभागृहांत चल्लें. नाम्नेची लोक‌एद संसोधक, कथाकार डो.जयंती नायक हिच्या अध्यक्ष‌पणाखाल चल‌ल्ल्या ह्या परिसंवादांत मुखेल सयरो जावन साहित्य अकाडेमिचो सह-संचालक दो.पूर्णानंद च्यारी, संजना पबलिकेशन्साचो प्रकाशक बाब दिनेश मणेर्कार, बाब वल्ली क्वाड्रस, बाब रमेश लाड तशेंच बाब शैलेंद्र मेहता मार्ग‌दर्शक जावन हाजर आसले.

उग्तावण काऱ्यांत येवकाराचें उलवप करीत, धेंपे कोलेजिची प्रिन्सिपाल बाय डो.वृंदा बोर्कार हिणें कशें एक समाज एका भासेचें माध्यम वापरून हेर भासेंतलें साहित्य, हेर समाजेची संसकृती तशेंच त्या समाजेंतलें गिन्यान साहित्यामुखांत्र जोडुंक सक्ता आनी त्या दिशेन तर्जण आनी लिप्यंतर खरें एक व्हड मेट म्हणाली. डो.पूर्णानंद च्यारीन अपल्या उलवपांत काळ मुकार गेल्लेपरिंच आमी सयत राव‌ल्लेकडेच रांवचें न्हय, बगार आमिंयी मुकार पावलां काडची गर्ज आसा, त्या दिशेन डिजिटल माध्यमांत कोंकणी साहित्याचो वावर खरोच जांवची गर्ज आसा आनी त्या दिशेन वावर कर्तेल्यांक थोकणाय जावंक फावो म्हणालो. हेच संधर्भार १९५२ इस्वेंत अर्नेसट हेमिंग‌वेन बरयिल्ल्या ’The old man and the sea नवालिकेचें, बाब जेरालड वी. कारलोन कोंकणीक केल्ल्या तर्जणेक वल्ली क्वाड्रसान नागरीक लिप्यंतर केल्लें पुस्तक ’म्हातारो आनी दऱ्या’ डिजिटल पुस्तकाचें विमोचन काऱ्यें डो.पूर्णानंद च्यारीन केलें.

परिसंवादांत पयलें कन्नड लिप्येंत जाल्ल्या समग्र साहित्याची झळक दिवून वल्ली क्वाड्रसान १८५०-१९००, १९०१-१९५०, १९५१-२०००, २०००-२०२३ अशें च्यार विभागांनी पुस्तकां रुपार छापून आयिल्ल्या समग्र साहित्याचो विवर दिवून ह्या सर्व वर्सांनी जाल्ल्या मोटव्या कथेच्या तर्जण आनी लिप्यंतर वावराचो सविस्तार विवर दिवून भास, भासे उपरांत लिपी, लिपी उपरांत बोली, बोली उपरांत समुदाय अशें एका लिपिंत सयत आसच्या समुदायाची ओळोक तशेंच त्या समुदायान वापार्च्या उत्रांची जाण्वाय एका लिप्यंतरीक (बोल्यंतर) गर्ज आसा देकून कोंकणिंत एकाच रितीन बरयजे म्हळ्ळें राजांव सार्कें न्हय म्हणालो. बाब दिनेश मणेर‌कारान कन्नड आनी नागरी लिपियेचें बोल्यंतरांत केल्लें तुलनात्मक उलवप सादर केलें. बाब रमेश लाड हाणें कन्नड भास, आनी कन्नड लिप्येंतल्या कोंकणिचें नागरी कोंकणीक लिप्यंतर कर्ताना जाल्लो अणभव विश्याचेर उलयलो. बाब शैलेंद्र मेहतान नागरी लिप्येंत जाल्ल्या तर्जण आनी लिप्यंतर वावराचेर उलयलो.

पुस्तक उग्तावण काऱ्यांत बाब शैलेंद्र मेहतान भातरीय भासेंतल्या साहित्यांत चडताव भासेंनी मुंबयच्यो कथा म्हळ्ळो प्रकार युरोपियन भासेंनी सयत तर्जण जाला, आनी कोंकणिंत सयत आयिल्ल्या ह्या ’मायानगरी’ पुस्तकांत बाब वल्ली क्वाड्रसान अपणान जियेल्ल्या, पळेल्ल्या, पार्किल्ल्या भारीक, नाजूक संवेदनांक सयत कथेंनी सोभीत रितीन हाडलां आनी एकेक कथा वेगळो अनभव दिता आनी वाचकाक वेगळ्याच संसाराक वरून पावयता म्हणालो. डो.जयंती नायक हिणें ’मायानगरी’ पुस्तकाचें विमोचन करून, बाब वल्लिच्या नागरी कोंकणी कथेचीं तीन पुस्तकां विमोचन जाताना सयत अपूण आसलीं आनी आमची ओळोक २०१६ इस्वेंत कथेच्या मुखांत्र जाल्ली, त्ये उपरांत अनन्य जर्नलांत बाब वल्लिच्यो स अंख्यांनी स कथा प्रकाशीत केल्यात आनी ताच्यो एकेक कथा विभिन्न जावनासून मुंबय जिविताचें चित्रण दितात म्हणाली.

पुस्तकाचें विमोचन जातच कथाकारान अपल्या उलवपांत, कशें अपल्या पयल्या नागरी कथेवर्वीं अपणाक गोंयच्या वरिश्ट कथाकारांची ओळोक जाली आनी ही ओळोक कशें कोंकणिच्या दोन-तीन लिपियांनी शिंपडलेल्यां मधें एक भांद जालो म्हणून पुस्तकाचें अपुर्भायेचें बोल्यंतर केल्ल्या बाब रमेश लाड तशेंच अपुर्भायेन छाप‌ल्ल्या बाब दिनेश मणेर्काराचो उपकार बावुडलो.

धेंपे कोलेजिंतल्या भारतीर भासो विभागाची मुखेस्त बाय अंजू साखर‌दांडेन धिन्वास पाटयले. ह्या परिसंवादाक धेंपे कोलेजिच्या साहित्यीक विध्यार्थिंसवें रोजरी कोलेज, फा.आग्नेल कोलेज, एस.एस.ए. सर्कारी कोलेज पेर्नें, सर्कारी कोलेज खांदोला, सर्कारी कोलेज खेपें, सर्कारी कोलेज सांकेलीं, पी.ई.एस कोलेज, सी.ई.एस. कोलेज , श्री मल्लिकार्जून कोलेज, एम.ई.एस. कोलेज, कार्मेल कोलेज, झेवियर्स कोलेज अशें सात कोलेजिचीं विध्यार्थिंनी वांटो घेतलो. बाय विधिता शेट, बाब गौरांग भांद्ये, बाय दीपा रायकर हाणीं सोभीत रितीन सूत्र संचालन चलयलें. बाब दामोदर गाणेकार, बाय उर्जिता भोबे, बाय फिलोमेना सांफ्रान्सिसको, बाय मान्सी धाउसकार आनी हेर वरिश्ट कथाकारांनी ह्या परिसंवादांत हाजर आसलीं.

[Khobor] Torzonn ani lipyontor Konkonni kothancher raxttri-i porisomvad KATHADAIZ

8 dosembor 2023 (Ponnji, Gõy): Kon'nodd ani nagori lipientlea torzonn ani lipyontor konkonni kothancher kholayen odhyoin korchea iradean dhempe kolez miramar gõy ani axavadi prokaxonan rajy‌bhas sonchalonaloi gõy sorkar hanchea mozoten eka disachem raxttri-i porisomvad ’KATHADAIZ’, dosembor 8 tariker sukrara sokallim dha thaun sanjer panch voram poreant svami vivekanondo sobhagrihant chol'lem. Namnechi lok‌ved somxodhok, kothakar Do.Jayanti Naik hichea odhyokx‌ponnakhal chol‌l'lea hea porisomvadant mukhel soiro zaun sahity okaddemicho soho-sonchalok Do.Purnananda Chari, Sanjana Publicationsacho prokaxok Bab Dinesh Manerkar, Bab Valley Quadros, Bab Ramesh Lad toxench Bab Shailendra Mehta marg‌dorxok zaun hazor asle.

Ugtaunn kareant yeukarachem uloup korit, dhempe kolejichi prinsipal Bai Do.Vrinda Borkar hinnem koxem ek somaz eka bhasechem madhyom' vaprun her bhasentlem sahity, her somajechi somskriti toxench tea somajentlem ginean sahiteamukhantr zoddunk sokta ani tea dixen torzonn ani lipyontor khorem ek vhodd mett mhonnali. Do.Purnananda Charin oplea uloupant kall mukar gel'leporinch ami soit ravo‌l'lekoddech ramvchem nhoi, bogar amimyi mukar paulam kaddchi gorz asa, tea dixen ddijittol madhyomant konkonni sahiteacho vaur khoroch zamvchi gorz asa ani tea dixen vaur korteleank thoknnai zaunko favo mhonnalo. Hech sondhorbhar 1952 isvent Ernest Hemingwayn boroyil'lea ’The old man and the sea' novalikechem, bab Gerald W. Carlon konkonnik kel'lea torzonnek Valley Quadrosan nagorik lipyontor kel'lem pustok ’Mhataro ani Dorea’ digital pustokachem vimochon karyem Do.Purnananda Charin kelem.

Porisomvadant poilem kon'nodd lipyent zal'lea somogr sahiteachi zhollok divun Valley Quadrosan 1850-1900, 1901-1950, 1951-2000, 2000-2023 oxem chear vibhagamni pustokam rupar chhapun ayil'lea somogr sahiteacho vivor divun hea sorv vorsamni zal'lea mottvea kothechea torzonn ani lipyontor vauracho sovistar vivor divun bhas, bhase uprant lipi, lipi uprant boli, boli uprant somudai oxem eka lipint soit aschea somudayachi ollok toxench tea somudayan vaparchea utranchi zannvai eka lipyontorik (Bolyontor) gorz asa dekun konkonnint ekach ritin boroije mholl'llem razamv sarkem nhoi mhonnalo. Bab Dinesh Manerkaran kon'nodd ani nagori lipiechem bolyontorant kel'lem tulonatmok uloup sador kelem. Bab romex ladd hannem kon'nodd bhas, ani kon'nodd lipyentlea konkonnichem nagori konkonnik lipyontor kortana zal'lo onnbhou vixeacher uloilo. Bab Shailendra Mehtan nagori lipyent zal'lea torzonn ani lipyontor vauracher uloilo.

Pustok ugtaunn kareant bab xoilendro mehtan bhatori-i bhasentlea sahiteant choddtavo bhasemni mumboicheo kotha mholl'llo prokar yuropiyon bhasemni soit torzonn zala, ani konkonnint soit ayil'lea hea ’mayanogori’ pustokant Bab Valley Quadrosan opnnan jiel'lea, pollel'lea, parkil'lea bharik, nazuk somvedonank soit kothemni sobhit ritin haddlam ani ekek kotha vegllo onbhou dita ani vachokak veglleach somsarak vorun pauyta mhonnalo. Do.Jayanti Naik hinnem ’MAYANAGARI’ pustokachem vimochon korun, Bab Vol'lichea nagori konkonni kothechim tin pustokam vimochon zatana soit opunn aslim ani amchi ollok 2016 isvent kothechea mukhantr zal'li, tye uprant ononyo zornolant bab vol'licheo so onkheamni so kotha prokaxit keleat ani tacheo ekek kotha vibhin'n zaunasun mumboi jivitachem chitronn ditat mhonnali.

Pustokachem vimochon zatoch kothakaran oplea uloupant, koxem oplea poilea nagori kotheurvim opnnak Gõychea vorixtt kothakaranchi ollok zali ani hi ollok koxem konkonnichea don-tin lipiamni ximpoddleleam modhem ek bhand zalo mhonnun pustokachem opurbhayechem bolyontor kel'lea Bab Ramesh Lad toxench opurbhayen chhap‌l'lea Bab Dinesh Manerkaracho upkar bavuddlo.

Dhempe kolejintlea bharotir bhaso vibhagachi mukhest Bai Anju Sakharanden dhinvas pattoile. Hea porisomvadak dhempe kolejichea sahityik vidhearthimsovem Rozori kolez, Fa.Agnel kolez, SSA Sorkari kolez Pernem, sorkari kolez Khandola, sorkari kolez Quepem, sorkari kolez Sanquelim, PES kolez, CIS Kolez, Shree Mallikarjuna kolez, MES. Kolez, Carmel kolez, Xaviers kolez oxem kolejichim vidhearthimni vantto ghetlo. Bai Vidhita xett, bab gourang bhandye, bai dipa raikor hannim sobhit ritin sutr sonchalon choloilem. Bab Damodor Ganekar, Bai Urjita Bhobe, Bai Philomena Samfransisco, Bai Manso Dhauskar ani her vorixtt kothakaramni hea porisomvadant hazor aslim.