[ಖಬರ್] ಆಶಾವಾದಿ ಪ್ರಕಾಶನ್ ಆನಿ ಧೆಂಪೆ ಕೊಲೆಜಿಚಿ ಸಮ್ಜೀಕಾಯ್ ಕಬ್ಲಾತ್

ಆಶಾವಾದಿ ಪ್ರಕಾಶನ್ ಆನಿ ಧೆಂಪೆ ಕೊಲೆಜಿಚಿ ಸಮ್ಜೀಕಾಯ್ ಕಬ್ಲಾತ್

6 ಮಾಯ್ 2023: 13 ಮಾಯ್ 2023, (ಗೊಂಯ್): ಆಶಾವಾದಿ ಪ್ರಕಾಶನ್ ಆನಿ ಭಾರತೀಯ್ ಭಾಶಾ ವಿಭಾಗ್, ಧೆಂಪೆ ಕಲಾ ಆನಿ ವಿಜ್ನಾನ್ ಮಹಾವಿದ್ಯಾಲಯ್ ಹಾಂಚ್ಯಾ ಜೋಡ್ ಪಾಲವಾನ್ ಸ್ವಾಮಿ ವಿವೇಕಾನಂದ್ ಸಭಾಘರ್, ಧೆಂಪೆ ಕೊಲೆಜ್ ಹಾಂಗಾ 13 ಮಾಯ್ 2023 ದಿಸಾ ಸಾಂಜೆರ್ ಚ್ಯಾರ್ ವೊರಾಂಚೆರ್ ಪುಸ್ತಕ್ ಲೊಪಾರ್ಕಣ್ ಸುವಾಳೊ ಆನಿ ಕವಿಸಂಮೇಳನ್ ಆಯೋಜಿತ್ ಕೆಲ್ಲೆಂ. ಸಲೋಮಿ ಮಿಯಾಪದವ್ ಹಿಚ್ಯಾ ಕವಿತೆಂಚೊ ಜಮೊ ’ಆಟ್ವೊ ಸುರ್’ ತಶೆಂಚ್ ಮೊನಿಕಾ ಡೆಸಾ ಮಥಾಯಸ್ ಹಿಚ್ಯಾ ಕವಿತೆಂಚೊ ಜಮೊ ’ಪಾನಾಂಚ್ ಫುಲಾಂ ಜಾತಾನಾ’ ಮ್ಹಳ್ಳ್ಯಾ ಕನ್ನಡ್ ಆನಿ ನಾಗರಿ ಲಿಪಿಯೆಂತ್ಲ್ಯಾ ಪುಸ್ತಕಾಂಚೆಂ, ತಶೆಂಚ್ ವೈಷ್ಣವಿ ರಾಯ್ಕರ್ ಹಿಚ್ಯಾ ’ಆತ್ಮನಾದ್’ ಹ್ಯಾ ಡಿಜಿಟಲ್ ಇ-ಪುಸ್ರಕಾಚೆಂ ಲೊಕಾರ್ಪಣ್ ಅನುಕ್ರಮಾನ್ ದಲ್ಗಾದೊ ಕೊಂಕಣಿ ಅಕಾಡೆಮಿಚೆ ಅಧ್ಯಕ್ಷ್ ಸೆಲ್ಸೊ ಫೆರ್ನಾಂಡಿಸ್, ಶೈಲೇಂದ್ರ ಮೆಹ್ತಾ ಆನಿ ಧೆಂಪೆ ಮಹಾವಿದ್ಯಾಲಯಾಂಚ್ಯಾ ಪ್ರಾಚಾರ್ಯ್ ಡೊ|ವೃಂದಾ ಬೊರ್ಕರ್ ಹಾಂಚ್ಯಾ ಹಸ್ತುಕಿಂ ಜಾಲೆಂ.

ವಿದಿತಾ ಶೆಟ್ ಹಿಣೆಂ ಕಾರ್ಯಾಚೆಂ ಸೂತ್ರ್ ಸಂಚಾಲನ್ ಕೆಲ್ಲ್ಯಾ ಹ್ಯಾ ಕಾರ್ಯಾಚೆಂ ಉಗ್ತಾವಣ್ ಜಾತಚ್ ಡೊ|ವೃಂದಾ ಬೊರ್ಕರಾನ್ ಅಪ್ಲ್ಯಾ ಯೆವ್ಕಾರ್ ಉಲವ್ಪಾಂತ್ ಪ್ರಾಂತೀಯ್ ಭಾಸೆಂಕ್ ಚಡಿತ್ ಮಹತ್ವ್ ಆಸಾ ಜಾಲ್ಲ್ಯಾನ್ ಕೊಂಕಣಿ ಭಾಸೆಚ್ಯಾ ವಾಡಾವಳೆಚ್ಯಾ ದಿಶೆನ್ ಆಮಿ ಎಕ್ಟಾಂಯ್ ಜಾವ್ನ್ ವಾವ್ರ್ ಕರ್ಪಾಚಿ ಗರಜ್ ಆಸಾ ಮ್ಹಣಾಲಿ. ವಲ್ಲಿ ಕ್ವಾಡ್ರಸಾನ್ ಆಶಾವಾದಿ ಪ್ರಕಾಶನಾಚಿ ’ಬುನ್ಯಾದಿ ವಾವ್ರ್ ಆನಿ ಚಿಂತಪ್’ ವಿಶ್ಯಾಚೆರ್ ಉಲವ್ನ್ ಆಜ್ ಸಮಾಜೆಚ್ಯಾ ದರೇಕಾ ಶೆತಾಂತ್ ನಿರಾಸ್ ಆಸಾ, ನಾ-ಸಮಧಾನ್ ಆಸಾ, ಅಶೆಂ ಮ್ಹಣುನ್ ಮನಿಸ್ ಜಾಲ್ಲ್ಯಾನ್ ಜಿಯೆಂವ್ಚೆಂ ಸೊಡುಂಕ್ ಜಾಯ್ನಾ, ಹ್ಯಾ ನಿರಾಸೆಮಧೆಂ ಆಶಾವಾದ್ ಜಾವ್ಪಾಚಿ ಗರಜ್ ಆಸಾ, ತ್ಯಾ ದಿಶೆನ್ ’ಯದಾಹಾಂ ಜೀವಮಿ, ಅಹಮಾಶಾಂಸೆ’ (ಜೀವ್ ಆಸ್ತಾಸರ್ ಭರ್ವಸ್ತಾಂ) ಧ್ಯೇಯಾಖಾಲ್ ಆಶಾವಾದಿ ಪ್ರಕಾಶನ್ ಜಾತ್-ಪ್ರಾಂತ್ಯ್-ಲಿಪಿ-ಬೊಲಿಚ್ಯೊ ಗಡಿ ಉತ್ರುನ್ ವಾವ್ರ್ ಕರುನ್ ಆಯ್ಲಾಂ ಆನಿ ಅಪ್ಲ್ಯಾ ಕಾಮಾಮುಖಾಂತ್ರ್ ಉಲಯಿತ್ ಆಯ್ಲಾಂ ಆನಿ ಫುಡೆಂಯ್ ಅಸಲಿಂಚ್ ಕಾಮಾ ಮುಖಾರುನ್ ವರ್ತೆಲೆಂ ಮ್ಹಣಾಲೊ.

ತ್ಯೇ ಉಪ್ರಾಂತ್ ಆಶಾವಾದಿ ಪ್ರಕಾಶನ್ ಆನಿ ಧೆಂಪೆ ಕೊಲೆಜಿನ್ ವೆಗ್-ವೆಗಳ್ಯಾ ಸಾಹಿತಿಕ್ ಕಾರ್ಯಾವಳೆಂಚಿ ಯೆವ್ಜಣ್ ಕರ್ಚ್ಯಾ ದಿಶೆನ್ ಪಾಂಚ್ ವರ್ಸಾಂಚಿ ಸಮ್ಜೀಕಾಯ್ ಕಬ್ಲಾತ್ (Memorandum Of Understanding (MOU) ಘಡ್ಲಿ. ಧೆಂಪೆ ಕೊಲೆಜಿಂತ್ ಕೊಂಕಣಿ ಶಿಕ್ಚ್ಯಾ ವಿಧ್ಯಾರ್ಥಿಂಕ್ ಕೊಂಕಣಿ ಸಾಹಿತ್ಯಾಚೆಂ ಚಡ್ತಿಕ್ ಶಿಕಪ್ ದಿಂವ್ಚ್ಯಾ ಇರಾದ್ಯಾಚ್ಯಾ ಹ್ಯಾ ಸಮ್ಜೀಕಾಯ್ ಕಬ್ಲಾತೆಕ್ ಧೆಂಪೆ ಕೊಲೆಜಿಚ್ಯಾ ಪ್ರಾಚಾರ್ಯ್ ಡೊ|ವೃಂದಾ ಬೊರ್ಕಾರಾನ್ ತಶೆಂಚ್ ಆಶಾವಾದಿ ಪ್ರಕಾಶನಾ ತರ್ಫೆನ್ ವಲ್ಲಿ ಕ್ವಾಡ್ರಸಾನ್ ಸಯ್ ಘಾಲಿ. (ಹ್ಯಾ ಆಧಿಂ ಆಶಾವಾದಿ ಪ್ರಕಾಶನಾನ್ ಗೊಂಯ್ಚ್ಯಾ ಶ್ರೀ ಮಲ್ಲಿಕಾರ್ಜುನ ಕೊಲೆಜಿಸವೆಂ 2019 ಇಸ್ವೆಂತ್ ಪಾಂಚ್ ವರ್ಸಾಂಚಿ ಸಮ್ಜೀಕಾಯ್ ಕಬ್ಲಾತ್ ಘಡುನ್ ಸಾಹಿತಿಕ್ ಕಾರ್ಯಿಂ ಚಲಯಿಲ್ಲಿಂ)

ಮುಖೆಲ್ ಸಯ್ರೊ ಸೆಲ್ಸೊ ಫೆರ್ನಾಂಡಿಸಾನ್ ’ಕೊಂಕಣಿ ಭಾಸೆಚ್ಯಾ ವಾವ್ರಾಕ್’ ಆಮಿ ಸರ್ವಾಂನಿ ಎಕಾ ಮನಾನ್ ವಾವ್ರ್ ಕರ್ಚಿ ಗರ್ಜ್ ಮ್ಹಣಾಲೊ.

ತ್ಯೇ ಉಪ್ರಾಂತ್ ಶೈಲೇಂದ್ರ ಮೆಹ್ತಾಚ್ಯಾ ಅಧ್ಯಕ್ಷ್‌ಪಣಾಖಾಲ್ ಚಲ್‌ಲ್ಲ್ಯಾ ಕೊಂಕಣಿ ಕವಿಸಂಮೇಳನಾಂತ್ ಪ್ರಕಾಶ್ ದ. ನಾಯ್ಕ್, ನೂತರ್ ಸಾಖರ್‌ದಾಂಡೆ, ನಯನಾ ಅಡಾರಕಾರ್, ವಿಲ್ಲಿ ಗೋಯೆಸ್, ಡೊ|ಪ್ರಕಾಶ್ ಪೆರ್ಯೆಂಕಾರ್, ಫಿಲೋಮೆನಾ ಸಾಂಫ್ರಾನ್ಸಿಸ್ಕೊ, ರಾಜಶ್ರೀ ಸೈಲ್, ಅಲ್ಕಾ ಸಿನಾಯ್ ಅಸೊಲ್ಡೆಕಾರ್, ಸುಜಾತ ಕಾಂಬ್ಳಿ, ವೈಷ್ಣವಿ ರಾಯ್ಕರ್, ಆನಿ ದ ಕೊಲ್ವಾಳೆ ಆನಿ ಗೌರಾಂಗ್ ಭಾಂಡಿಯೆ ಹಾಣಿಂ ಆಪಾಪ್ಲ್ಯೊ ಕವಿತಾ ಸಾದರ್ ಕೆಲ್ಯೊ.

ಧೆಂಪೆ ಕೊಲೆಜಿಚ್ಯಾ ಕೊಂಕಣಿ ವಿಭಾಗಾಚಿ ಮುಖೇಸ್ತ್ ಅಂಜು ಸಾಖರ್‌ದಾಂಡೆನ್ ಅಪ್ಲ್ಯಾ ಉಪ್ಕಾರಾಚೆಂ ಉಲವ್ಪಾಂತ್ ಕಶೆಂ ಪಾಟ್ಲ್ಯಾ ಥೊಡ್ಯಾ ವರ್ಸಾಂನಿ ಆಶಾವಾದಿ ಪ್ರಕಾಶನಾಸವೆಂ ರಾಶ್ಟ್ರೀಯ್ ಮಟ್ಟಾಚಿಂ ವೆಬಿನಾರಾಂ ಆಯೋಜಿತ್ ಕರುನ್ ಗೊಂಯ್ಚ್ಯಾ ಜಾಯ್ತ್ಯಾ ಕೊಂಕಣಿ ವಿಧ್ಯಾರ್ಥಿಂಕ್ ಮಜತ್ ಲಾಭ್ಲಿ ಆನಿ ಹ್ಯಾ ದಿಶೆನ್ ಫುಡೆಂಯ್ ವೆಗ್-ವೆಗಳಿಂ ಉಪಕ್ರಮಾಂ ಮಾಂಡುನ್ ಹಾಡ್ಚೆವಿಶಿಂ ಉಲವ್ನ್ ಸಮೇಸ್ತಾಂಚೊ ಉಪ್ಕಾರ್ ಬಾವುಡ್ಲೊ.

[खबर] आशावादी प्रकाशन आनी धेंपे कोलेजिची समजीकाय कबलात 

आशावादी प्रकाशन आनी धेंपे कोलेजिची समजीकाय कबलात

१३ माय २०२३, (गोंय): आशावादी प्रकाशन आनी भारतीय भाशा विभाग, धेंपे कला आनी विजनान महाविद्यालय हांच्या जोड पालवान स्वामी विवेकानंद सभाघर, धेंपे कोलेज हांगा १३ माय २०२३ दिसा सांजेर च्यार वोरांचेर पुसतक लोपार्कण सुवाळो आनी कविसंमेळन आयोजीत केल्लें. सलोमी मियापदव हिच्या कवितेंचो जमो ’आटवो सूर’ तशेंच मोनिका डेसा मथायस हिच्या कवितेंचो जमो ’पानांच फुलां जाताना’ म्हळ्ळ्या कन्नड आनी नागरी लिपियेंतल्या पुसतकांचें, तशेंच वैषणवी रायकर हिच्या ’आत्मनाद’ ह्या डिजिटल ई-पुस्रकाचें लोकार्पण अनुक्रमान दल्गादो कोंकणी अकाडेमिचे अध्यक्ष सेल्सो फेर्नांडीस, शैलेंद्र मेहता आनी धेंपे महाविद्यालयांच्या प्राचाऱ्य डो|वृंदा बोर्कर हांच्या हसतुकीं जालें.

विदिता शेट हिणें काऱ्याचें सूत्र संचालन केल्ल्या ह्या काऱ्याचें उग्तावण जातच डो|वृंदा बोर्करान अपल्या येवकार उलवपांत प्रांतीय भासेंक चडीत महत्व आसा जाल्ल्यान कोंकणी भासेच्या वाडावळेच्या दिशेन आमी एकटांय जावन वावर कर्पाची गरज आसा म्हणाली. वल्ली क्वाड्रसान आशावादी प्रकाशनाची ’बुन्यादी वावर आनी चिंतप’ विश्याचेर उलवन आज समाजेच्या दरेका शेतांत निरास आसा, ना-समधान आसा, अशें म्हणून मनीस जाल्ल्यान जियेंवचें सोडुंक जायना, ह्या निरासेमधें आशावाद जावपाची गरज आसा, त्या दिशेन ’यदाहां जीवमी, अहमाशांसे’ (जीव आसतासर भर्वसतां) ध्येयाखाल आशावादी प्रकाशन जात-प्रांत्य-लिपी-बोलिच्यो गडी उत्रून वावर करून आयलां आनी अपल्या कामामुखांत्र उलयीत आयलां आनी फुडेंय असलिंच कामा मुखारून वर्तेलें म्हणालो.

त्ये उपरांत आशावादी प्रकाशन आनी धेंपे कोलेजीन वेग-वेगळ्या साहितीक काऱ्यावळेंची येवजण कर्च्या दिशेन पांच वर्सांची समजीकाय कबलात (Memorandum Of Understanding (MOU) घडली. धेंपे कोलेजिंत कोंकणी शिकच्या विध्यार्थिंक कोंकणी साहित्याचें चडतीक शिकप दिंवच्या इराद्याच्या ह्या समजीकाय कबलातेक धेंपे कोलेजिच्या प्राचाऱ्य डो|वृंदा बोर्कारान तशेंच आशावादी प्रकाशना तर्फेन वल्ली क्वाड्रसान सय घाली. (ह्या आधीं आशावादी प्रकाशनान गोंयच्या श्री मल्लिकार्जून कोलेजिसवें २०१९ इस्वेंत पांच वर्सांची समजीकाय कबलात घडून साहितीक काऱ्यीं चलयिल्लीं)

मुखेल सयरो सेल्सो फेर्नांडिसान ’कोंकणी भासेच्या वावराक’ आमी सर्वांनी एका मनान वावर कर्ची गर्ज म्हणालो.

त्ये उपरांत शैलेंद्र मेहताच्या अध्यक्ष‌पणाखाल चल‌ल्ल्या कोंकणी कविसंमेळनांत प्रकाश द. नायक, नूतर साखर‌दांडे, नयना अडारकार, विल्ली गोयेस, डो|प्रकाश पेऱ्येंकार, फिलोमेना सांफ्रान्सिसको, राजश्री सैल, अल्का सिनाय असोलडेकार, सुजात कांबळी, वैषणवी रायकर, आनी द कोलवाळे आनी गौरांग भांडिये हाणीं आपापल्यो कविता सादर केल्यो.

धेंपे कोलेजिच्या कोंकणी विभागाची मुखेसत अंजू साखर‌दांडेन अपल्या उपकाराचें उलवपांत कशें पाटल्या थोड्या वर्सांनी आशावादी प्रकाशनासवें राश्ट्रीय मट्टाचीं वेबिनारां आयोजीत करून गोंयच्या जायत्या कोंकणी विध्यार्थिंक मजत लाभली आनी ह्या दिशेन फुडेंय वेग-वेगळीं उपक्रमां मांडून हाडचेविशीं उलवन समेसतांचो उपकार बावुडलो.

[Khobor] Ashawadi Prakashan ani Dhempe College'ichi Somjikai Koblat

Ashawadi Prakashan ani Dhempe College'ichi Somjikai Koblat

13 Mai 2023, (Gõy): Ashawadi Prakashan ani bharoti-i bhaxa vibhag, Dhempe kola ani vijnan mohavidealoi hanchea zodd palovan Svami Vivekanond Sobhaghor, Dhempe kolez hanga 13 Mai 2023 disa sanjer chear vorancher pustok loparkonn suvallo ani kovisom'mellon ayojit kel'lem. Salomi Miapodav hichea kovitencho zomo ’Attvo Sur’ toxench Monica Dsa Mathais hichea kovitencho zomo ’Pananch Fulam Zatana’ mholl'llea kon'nodd ani nagori lipientlea pustokanchem, toxench Vaishnnavi Raikar hichea ’Atmonad’ hea ddijittol i-pusrokachem lokarponn onukroman Dolgado Konkonni Akaddemiche odhyokx Celso Fernandes, Shailendra Mehta ani Dhempe mohavidealoyanchea prachary Dr|Vrinda Borkar hanchea hostukim zalem.

Vidita Shett hinnem kareachem sutr sonchalon kel'lea hea kareachem ugtaunn zatoch Dr|Vrinda Borkaran oplea yeukar uloupant pranti-i bhasenk choddit mohotv asa zal'lean konkonni bhasechea vaddaullechea dixen ami ekttam-i zaun vaur korpachi goroz asa mhonnali. Valley Quadrosan Ashawadi Prakashanachi ’buneadi vaur ani chintop’ vixeacher uloun az somajechea doreka xetant niras asa, na-somodhan asa, oxem mhonnun monis zal'lean jiemvchem soddunk zaina, hea nirasemodhem axavad zaupachi goroz asa, tea dixen ’Yadahaam jeevami, Ahamashamse’ (jiv astasor bhorvostam) dhyeyakhal Ashawadi Prakashan zat-pranty-lipi-bolicheo goddi utrun vaur korun ailam ani oplea kamamukhantr uloyit ailam ani fuddem-i osolinch kama mukharun vortelem mhonnalo.

Tye uprant Ashawadi Prakashan ani Dhempe Collegin veg-vegollea sahitik kareavollenchi yeuzonn korchea dixen panch vorsanchi somjikai koblat (Memorandum Of Understanding (MOU) ghoddli. Dhempe kolejint konkonni xikchea vidhearthink konkonni sahiteachem choddtik xikop dimvchea iradeachea hea somjikai koblatek dhempe kolejichea prachary Dr|Vrinda Borkaran toxench Ashawadi Prakashana torfen Valley Quadrosan soi ghali. (hea adhim Ashawadi Prakashanan Gõychea Shree Mallikarjuna Collegisovem 2019 isvent panch vorsanchi somjikai koblat ghoddun sahitik karyim choloyil'lim)

mukhel soiro Celso Fernanddisan ’Konkonni bhasechea vaurak’ ami sorvamni eka monan vaur korchi gorz mhonnalo.

Tye uprant Shailendra Mehtachea odhyokx‌ponnakhal chol‌l'lea konkonni kovisom'mellonant Prakash Da Naik, Nutan Sakhardande, Nayana Adarkar, Willy Goes, Dr.Prakash Perienkar, Philomena Samfransisco, Rajashree Sail, Alka Sinai Asoldekar, Sujata Kambli, Vaishnnavi Raikar, Annie De Colvalle ani Gaurang Bhandiye hannim apapleo kovita sador keleo.

Dhempe kolejichea konkonni vibhagachi mukhest Anju Sakhardanden oplea upkarachem uloupant koxem pattlea thoddea vorsamni Ashawadi Prakashanasovem raxttri-i mott'ttachim vebinaram ayojit korun Gõychea zaitea konkonni vidhearthink mozot labhli ani hea dixen fuddem-i veg-vegollim upokromam manddun haddchevixim uloun somestancho upkar bavuddlo.